قلات دروغ نا مونتس – ٹی بی پی سرگپ

قلات نرمک شیشہ ڈغار ئٹ ہفت ستمبر نا نن پاکستانی لشکر اسہ دروغ نا مونتس اسیٹی اِرا ایلم، اسماعیل و محمد عباس لہڑی ءِ اوفتا اُرا غا چھاپہ خلیسہ اُرا غان ارفے و دیخس مُر دریسہ اوفتا لمہ نا مونا اوفتے کسفے و جون تے گیاوان ئٹ خسا۔

اسماعیل و محمد عباس نا لمہ اسہ صحافی ئسے نا مونا گواچنی تے بیان کریسہ پائک کہ ای فوجی کارندہ تا نت تیا تماٹ و پاریٹ کہ کنا چناک اگہ ردی اس کرینو گڑا اوفتے پولیس اسٹیشن آ دبو و عدالت ئٹ ہتبو، اگہ اوفتیا گڑاس پاش مس گڑا اوفتے سزا ایتبو ولے ظالم آک کنا مار تے کنا کُٹ آن ارفیر دریر و دیخس مُر دریسہ اوفتے کسفیر بِٹیر۔

قلات ئٹ لمہ نا مونا چنا تے کسفنگ نا اُست ءِ لڑزفوکا تدینی اولیکو اف بلکن پاکستانی لشکر بلوچستان ئٹ بیدس عدالت زوراکی ئٹ بیگواہ بندغ تے دروغ نا مونتس تیٹ کسفنگ ئٹی اوار ءِ و سینزدہ اگست اِرا ہزار بیست آ تربت شار ئٹ حیات بلوچ ءِ اونا لمہ و باوہ نا مونا فرنٹیر کور نا کارندہ غاک کسفینو۔

بلوچستان ئٹ آجوئی کن کاریم کروک بلوچ سلہہ بند گل آتا پاکستان و چین ئنا اقتصادی و عسکری ہدف آتیا بھیم بش کروک جلہو تیان پد زوراکی ئٹ بیگواہ بندغ تے و اُرا تیان ورنا تے ارفنگ آن پد اوفتے کسفسہ جنگجو گوندنگ نا تدینی تیٹ ودکی مریسہ ءِ۔

پاکستانی لشکر نا سروک عاصم منیر، پاکستان نا سر وزیر شہباز شریف و بلوچستان نا متنازعہ سر وزیر نا بیان آک و اسمبلی ٹی قرارداد آتیان پاش ءِ کہ بلوچستان ئٹ لشکر کشی و دزگیری مرکز آتا ذریعت ئٹ ظلم ئنا برخلاف بش مروکا مزاحمتی سیاست ءِ ایسر کننگ نا کوشست آک برجاء تخنگور ولے زوراکی ئٹ بیگواہ بندغ تا کسفنگ و دزگیری مرکز آتا ذریعت ئٹ بلوچ مزاحمت ءِ توننگ نا کوشست آک مالو ہم بے سہب مسنو و بروکا وخت ئٹ ہم سرسہب مروفس۔

پنی آ بلوچ شاعر و نوشتہ کار مبارک قاصی نا اولیکو سال دے آ ڈگری کالج خاران و انٹر کالج مسکان قلات ئٹ جتا جتا مجلس اڈ تننگا۔

شابیتی حوال تا ردئٹ گورنمنٹ بوائز ڈگری کالج خاران نا خوانندہ کونسل نا پارہ غان اندن گورنمنٹ انٹر کالج مسکان قلات ئٹ ہم خوانندہ تا پارہ غان مبارک قاضی نا اولیکو سال دے بھاز ادب و شرف ئٹ اڈ تننگا ہراٹی خوانندہ مار و مسنک مبارک قاضی نا زند و شاعری آ ہیت کریر۔

ڈگری کالج خاران ئٹ اڈ تروک مجلس ئٹ شاعر و زبان دوست آتیتون اوار خوانندہ تا بھلو کچ اس ساڑی ئس۔

مجلس نا اولیکو بشخ ئٹ اولیکو سال نا خوانندہ شہزاد سلیم مبارک قاضی نا زند و شاعری آ تینا مقالہ ءِ مونا ہتیسہ پارے کہ مبارک قاضی ساڑی آ وخت ئنا بھلو شاعر اس ئس، ہرانا شئر تیٹ بلوچستان نا مَش، صحرا، دشت و بیان و سمندر نا ذکر مسکہ، اینو و جسمانی دروشم ئٹ ننتون اوار اف ولے اونا فن و شاعری ننا اُست آتیٹ ساندہ زندہ سلو۔

او پارے کہ قاضی مبارک دا وخت ئنا بلوچی بولی نا بھلو شاعر اس ئس ہرانا شاعری بلوچستان و بلوچ کن ئس، اسہ لس بندغ اسیکن اونا شاعری ءِ پہہ مننگ ہچ سخت الو۔

ایلو تران کروک آک ہم اونا شاعری آ ہیت کریر و پاریر کہ او تینا شاعری نا وسیلہ ئٹ ننا اُست آتیٹ زندہ ءِ۔

مجلس نا ایلو بشخ ئٹ مشاعرہ مس ہراٹی خاران نا پنی آ شاعر ریاض زرمبش، جلال فراق، ضیاء شفیع، ممتاز ارمان، زائد راہی، عتیق ارشاد تون اوار خوانندہ غاک تینا شئر تے پاریر۔

مجلس نا ایسر ئٹ کالج اسٹوڈنٹ کونسل نا کماش عزیز اکرم و حبیب عارف غٹ خوانندہ تیتون اوار مہمان و شاعر آتے منتوار پاریر۔

بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹ پارے کہ ننا سرمچار آک گوادر و کوئٹہ ئٹ اِرا جتا کارروائی تیٹ کوزہ گیر پاکستانی لشکر و ڈھکوک ادارہ تا کمکار و مخبر آتے جلہو تیٹ ٹک کریر۔ ہرافتا سوب آن اسہ کمکار اس مرگ ئنا گواچی و اسٹ ٹپی مس۔

ترجمان پارے کہ بی ایل اے نا سرمچار آک درے ننکان گوادر شار ئٹ کوزہ گیر پاکستانی لشکر و ڈھکوک ادارہ تا اسہ مخبر و کمکار ئسے چغلی بمب جلہو ئٹ ٹک کریر، تراک ئٹ او بھاز ٹپی مس۔ پن کروک دژمن کمکار بیکری دکاندار ئسے نا دروشم ئٹ دژمن لشکر کن مخبری کننگ ئس۔

او پارے کہ اسہ پین کارروائی اسیٹی بلوچ لبریشن آرمی نا سرمچار آک کوئٹہ نا علاقہ کیچی بیگ ئٹ کوزہ گیر لشکر نا اسہ مخبر و کمکار غلام سرور نا مار خالد حسین ہند اوستہ محمد ءِ سم کاری کریسہ مرگ ئنا گواچی کریر۔

ترجمان پارے کہ پن کروک کارندہ آ بی ایل اے نا انٹیلی جنس کڑدہ نظر تخاسس، ہرا کوئٹہ تون اوار قلات ئٹ کوزہ گیر لشکر کن مخبری نا کاریم کریکہ اندن تدوکا دے تیٹ کیچی بیگ ئٹ دروشم بدل کریسہ دژمن لشکر کن حوال مُچ کننگ نا کاریم کریکہ۔

جیئند بلوچ پارے کہ بلوچ لبریشن آرمی پن کروک ہڑتوم آ جلہو تا ذمہ واری ءِ ارفک۔

بلوچی بولی نا پنی آ شاعر شاعرِ آشوب ایماندار مبارک قاضی نا جہان آن رخصتی ءِ سال ئس پورو مس۔

ایماندار مبارک قاضی 24 دسمبر 1956 ئٹ پنسی ٹی واجہ کہدہ امان اللہ نا اُرا ٹی ودی مس و اونا حساب بلوچی نا بھلا و پنی آ شاعر آتیٹ مریک۔

مبارک قاضی خدو سال 16 دسمبر 2024 ئٹ تربت ئٹ کذیت کرے ہرادے اونا باوہ پیرئی آ علاقہ پسنی ٹی بلوچ اُلس نا بھلو کچ ئسے نا ساڑی گری ٹی شرف ئٹ کڈ کننگا۔

او شاعری نا جہان ئٹ اسہ جتاء ءُ چاہند ئسے نا خواجہ ئس، اونا نیم کرن نا شاعری بلوچی ادب ءِ بھاز زیمی کرے و اودے آشوبی شاعری کننگ نا سوب کہی وار بندی ہم کننگا، اونا شعری مجموعہ غاتیٹ زرنوشت،ہانی منی ماتے وتن، شاگ ماں سبزیں ساوڑ ءِ،منی عہدے غم ءِ،قصہ و پین کتاب آکاوار ءُ۔

شعبان آن برمتہ مروکا 7 بندغ 100 دے گدرینگنگ آن پد ہم یلہ مننگ کتور حکومت شعبان آن برمتہ مروکا ننا 7 بندغ ءِ دائسکان یلہ کرفنگ کتو۔

بلوچستان نا بنجاہی شار کوئٹہ نا سیل و چکری آ ہند شعبان آن 20 جون آ بلوچ سلہہ بند گل بلوچ لبریشن آرمی نا دو آن دزگیر کننگوکا کسٹم کارندہ تون اوار 7 بندغ ءِ 100 دے گدرینگنگ آن ہم حکومت و فورسز یلہ کرفنگ کتو۔

برمتہ مروکا تا باوہ شان رضا پارینے کہ بلوچستان حکومت و قانود نافذ کروکا ادارہ غاک شعبان آن برمتہ مروکا ننا 7 بندغ ءِ یلہ کرفنگ کتنے۔

او پارے کہ برمتہ کروکا تا قیذ ئٹ قیذ آ تینا چناء تیکن فریشان و دے و نن اوفتا یلہ مننگ کن چُرت ئٹن، بنجائی حکومت و بلوچستان نا حکومت آن دڑدی ءُ خواست ئسے کہ مہروانی کرسہ ننا چناء تے یلہ کرفبو۔

یاتی مرے کہ بلوچ لبریشن آرمی نا ترجمان جیئند بلوچ میڈیا غا شینک کروک بیان ئٹ پاریسس کہ فتح اسکواڈ کوئٹہ ٹی ڈھکوک حوال آ کاروائی کرسہ دہ شکبر ءُ بندغ دزگیر کرینے۔

ترجمان پاریسس کہ دا کاروائی ءِ بی ایل اے نا خاص انگا کڑدہ فتح اسکواڈ ڈھکوک حوال آ کوئٹہ نا کیب ئنا علاقہ زرغون آن خڑک شعبان نا علاقہ ٹی سرسہبی ئٹ سر تسر۔

بلوچ لبریشن آرمی پن کروک بندغ آتا یلہ کننگ ءِ بندی تا بدلی تون تفیسس واہم حکومت و فوجی کوالخواک تا پارہ غان ہچو گام ارفنگتئو۔

شہید اعجاز بلوچ نا اولیکو سال دے شہید نا خاہوت نا پارہ غان اوفتا باوہ پیرئی علاقہ قلات ئٹ شرف تون اڈ تننگا دا وخت آ علاقہ نامخلوق و بلوچ خوانندہ تیتون اوار سول سوسائٹی نا نمائندہ غاک بھلو کچ اسیٹ اوار مسر۔

شہید اعجاز بلوچ نا اولیکو سال دے نا وخت آ شہید کن قرآن خواننگا و خیرات ہم کننگا۔

مجلس ئٹ شہید اعجاز بلوچ نا ایڑ تران کریسہ پارے کہ کنے فخر ءِ ای شہید ئسے نا اُرا غان تعلق تخوہ کنا ایلم شہید اعجاز بلوچ کون آ ورنا تے ہڑدے ملامت آ سی ٹی ڈی و پاکستانی لشکر دروغ نا مونتس آتیٹ شہید کریسہ اوفتے گیاوان تے ٹی خسک و پدان اسہ دروغ بیان اس شینک کیرہ کہ اوفتے مونتس ئٹ شہید کننگانے۔

اونا ایڑ ریفرنس ئٹ تران کریسہ پارے کہ شہید آک تینا ساہ تے ندر کریر داسہ دانا ذمہ واری نن و نمے آ فرض جوڑ مریک۔ ہر اسٹ ءِ راجی مسخت ئٹ تینا فرض ءِ سر تریسہ تینا ذات نا بشخ ءِ شاغوئی ءِ۔

ایسر ئٹ شہید اعجاز بلوچ نا قبر آ اونا خاہوت و ایلو سیال عزیز آک چادر شاغار و پھل شنکی ہم کریر۔

یاتی مرے 24 اگست 2023 نا نن پاکستانی سکیورٹی فورسز آک قلات نا علاقہ منگچر ئٹ میر احمد بلوچ نا اُرا غا چھاپہ خلیسہ اُرا ٹی ساڑی زالبول و چنا تیتون اوار ایلو بندغ آتیا بیدادی کریسہ اوفتا خن تے تفیسہ اسہ کوٹی اسیٹی بند کریر و اعجاز بلوچ ءِ زور ئٹ تینتون اوار دریر و کم و ود اسہ توہ ئسے آن پد خضدار نا علاقہ کھٹان ئٹ اسہ دروغ نا مونتس اسیٹ اعجاز شہید کننگا۔

بلوچستان نا ضلع قلات نا مَشی آ لڑ تیٹ پاکستانی لشکر نا پارہ غان لشکر کشی مننگ ءِ، جتا ہند آتیا ہیلی کاپٹر آتا ذریعت ئٹ کمانڈوز آک دڑفنگار۔

حوال تا ردئٹ ہربوئی نا علاقہ کرگزی، خیسن بند، پودگلی، سرخین، کاکڑی، جوہان، نرمک نا علاقہ تیٹ لشکر کشی برجاء ءِ۔

حوالکار تا ردئٹ جتا ہند آتیا ہیلی کاپٹر آتا وسیلہ ذریعت ئٹ فوجی کمانڈوز آک دڑفنگانو۔

علاقہ ئٹ لشکر کشی برجاء مننگ نا سوب گیشتر حوال دوئی کننگ متنے۔

خیال ئٹ مرے اِرا دے مُست نرمک، تخت نا علاقہ ئٹ فوج ئنا ٹرک گاڑی اسہ بمب تراک اسیٹ ٹک کننگاسس، کوالخواک تراک ئٹ ہشت کارندہ نا ٹپی مننگ ءِ پک کریر۔

پن کروک جلہو نا ذمہ واری ءِ بلوچ لبریشن آرمی ارفیسس۔ ترجمان جیئند بلوچ بیان ئٹ پارے کہ فوجی کارندہ تا گاڑی ءِ ہمو وخت تراک ئٹ ٹک کننگا ہراتم او لشکر کشی نا غرض ئٹ علاقہ ٹی بننگ ئسر۔

ہرنائی نا علاقہ تحصیل شاہرگ ئٹ ٹھیکدار حاجی شاہ محمد نا کولا کانڑ تیٹ زاری ءُ گیس پُر مننگ آن پنچ کانکن گٹ مریسہ دم بند مننگ آن کسکر۔

تدینی ٹی کہوک کانکن آتا چاہنداری عبدالنافع نا مار مطیع اللہ، عبدالغفور نا مار رحمان شاہ، محمد عظیم نا مار زبیح اللہ، عبدالغفور نا مار شفع اللہ، بادام گل نا مار نصیب اللہ نا پن تیٹ مسنے۔

کہوکا کانکن آتا تعلق افغانستان آن ءِ اندن اسہ کانکن خان محمد ءِ زندہ کشنگانے۔

یاتی مرے بلوچستان ئٹ درزن آ کولا کانڑ تا پروجیکٹ آک کاریم کیرہ ہرافتیٹ ہزار آ مزور آتا تعلق بلوچستان تون اوار ایلو شار تیان ءِ، جتا وخت آتیٹ دا تدینی تا گواچی مسنو اندن ہڑدے کانڑ تدینی تیٹ کیہی کانکن آک کسکنو۔

دا کولا کانڑ تیٹ کاریم کروک مزدور یونین، و مزور آتا حق آتا رکھ اکن کاریم کروک تنظیم آک دا تدینی تا سوب بے آسراتی و مزور آتے بے معیاری مواد فراوان کننگ ءِ گوندرہ۔

اسلام آباد آن کوئٹہ غا بروک بس ڈرائیور نا دو آن یلہ مریسہ کڈ ئٹ تما۔

شابیتی حوال تا ردئٹ بلوچستان ئٹ ژوب ئنا علاقہ دانہ سر ئٹ بس کڈ ئٹ تما، تدینی ٹی پنچ بندغ کسکر و بیست و دو ٹپی مسر، کیہی مسافر آتا حالیت نازرک ءِ۔

ٹپی آتے کڈ آن کشنگ آن پد ٹرانا سینٹر ژوب آ دننگانے۔

ژوب بست و بند نا ردئٹ ترند رفتار نا سوب بس تدینی نا گواچی مس، تدینی ٹی گواچی مروک بندغ تا بس اسلام آن کوئٹہ غا ہِننگ ئس۔

زوراکی ئٹ بیگواہ کننگوک اِرا وکیل آجو مسر۔

بلوچستان نا بنجائی شار کوئٹہ آن زوراکی نا بیگواہی تا گواچی مروک فدا بلوچ دشتی و ایڈووکیٹ صلاح الدین مینگل آجو مرسا تینا اُرا ءِ سر مسنو۔

ہڑتُما وکیل تے ننکان پاکستانی فورسز سی ٹی ڈی و ڈھکوک ادارہ آتا کارندہ غاک کوئٹہ نا جتا ہند آتیان دزگیر کرسا تینتو دریسر۔

کوئٹہ نا وکیل برادری سنگت آتا آجوئی ءِ پک کرینے۔

خیال ئٹ مرے کہ درو بلوچستان بار کونسل و ایلو وکیل تنظیم آک حکومت و ادارہ آتے بیست و چار ساعت نا الٹی میٹم تسوسر کہ اگہ اوفتا سنگت آک آجو متور تو سخت برانزی تحریک چلفور۔

وکیلک پاش کریسر کہ قانود نا رکھوک مننگ نا سوب آن اوفتا بیگواہی بے قانودی نا بریبر ءِ و دا حالیت ءِ ہچ وڑا قابل قبول سرپند مننگ کپنہ۔