بلوچ یکجہتی کمیٹی نا کنڈ آن تولوک برانزک آک ریاستی کریک ڈاؤن، برانزی تا دزگیری و حکومت نا کنڈ آن مذاکرات ئٹی بےسوبری نا برخلاف مننگ ءُ۔

صوبائی حکومت نا کنڈ آن مذاکرات نا پنا باسک آتا دزگیری و بےدادی نا مذمت کرسا بی وائی سی تدوکا نُہہ دے آن تولوک برانز کننگ ءِ۔ نوشکی، گوادر، تربت و شال ئٹی کیہی چُنا نیاڑی و نرینہ آک برانز آتیٹ اوار ءُ۔

نوشکی ٹی برانزی تیا سم کاری و شہیدی تا برخلاف بی وائی سی نا تولوک برانز نا مخ تفی ءِ کرسا آل پارٹیز نوشکی نا سروک آک ہم اوار مسر۔

اندن بلوچ یکجہتی کمیٹی نا ایلو برانز کوئٹہ ٹی بلوچستان یونیورسٹی نا مونا برجاء ءِ ہراڑے برانزیک تینا خواست آتے ایمنی ئٹ پورو کننگ نا خواست کننگ ءُ۔

ایلو کنڈ آن ضلع کیچ ئنا بنجائی شار تربت ئٹی شہید فدا چوک آ تولوک برانز برجاء ءِ ہراٹی بھلو کچ ئسیٹی مخلوق اوار ءِ و شار ئٹ انٹرنیٹ سروس تدوکا اسہ ہفتہ ئسے آن بند کننگانے۔

اندن دریابی شار گوادر ئٹی بلوچ یکجہتی کمیٹی نا بنجائی تولوک برانز نُہمیکو دے برجاء ءِ و کیہی شاریک برانز ئٹ اوار ءُ۔

 چیئرمین بلوچ نیشنل موومنٹ (بی این ایم) ڈاکٹر نسیم بلوچ جمہوری ڈیہہ تا سروک آتیان دمدستی بنداو آ بندغی المیہ نا گواچی بلوچستان ئٹی اقوام متحدہ نا کنڈ آن ‘فیکٹ فائنڈنگ مشن ‘ تون اوار مُسہ اہم خواست کرینے، جمہوری ڈیہہ تا سروک آتا پنا چھٹی لکھِسہ او پارینے ای بلوچستان ئٹی بندغی حق آتا سخت لتاڑ نا کنڈ آ نُمے پام ترفنگ خواہوہ۔ بلوچ راج تدوکا کیہی دہک آن ریاستی جبر، ظلم و زوراکی و بے بندغی روشت نا گواچی ءِ و دانا روتہ غاک 1948 ئٹی پاکستانی ریاست نا زور ئٹ اوڑدئی ٹی ءُ۔

او پارینے کہ بلوچستان ئٹی پاکستانی عسکری بےدادی و بلوچ زنک کشی نا اسہ پوکسنو چھول ئس دا کرن ئنا بناء آن بناء مس، وخت گدرینگ تون داٹی پین ودکی برسا کننگ ءِ۔ دا وختا بلوچستان ئٹی پاکستانی لشکر، ڈھکوک ادارہ غاک و پاکستانی لشکر نا اڈ تروکا ڈوہدار تا سلہہ بند ٹولی تیوہ بلوچستان ئٹی بندغی حق آتا لتاڑ ءِ کننگ ءُ۔ پاکستانی لشکر بلوچ راج ءِ اشتماعی سزا نا حکمت عملی نا رد ئٹ بیدس تفریق ٹک کننگ ءِ۔ دا وختا ہزار آ بلوچ آتے زوراکی ئٹ بیگواہ کرسا پاکستانی لشکر نا عقوبت خانہ غا تیات بندی کننگانے، زوراکی نا بیگواہی تا چرجوئی ئٹ مونا بروک تدینیک بلوچ چاگڑد ءِ ہلہ ہوشی و نفسیاتی دباؤ نا گواچی کرینے۔

ڈاکٹر نسیم بلوچ چھٹی ٹی پارینے کہ ای نُمے تیوہ بلوچستان آن رسینگوکا جون تا کنڈ آ پام ترفنگ خواہوہ کہ دا تم اسکان کیہی زوراکی ئٹ بیگواہ کننگوک بلوچ آتا درست مفروکو جونک رسینگانو ہرا اسہ بھاز بھلو بندغی المیہ ئس ودی کرینو، داکان بیدس بلوچستان نا جتا علاقہ آتیان کیہی اشتماعی قبر ہم خننگانو، پاکستانی لشکر کیہی دیہات آتے ڈھرفینے و کیہی اُرا تے ہُشانے زنک کشی نا دا عمل دا چھٹی ءِ لکھنگ نا وخت اسکان تیوہ شدت ئٹ برجاء ءِ، ولے معلومداری نا پوسکنا ذرائع تا مننگ آن بیدس جہانی تلہ غا بلوچ نا ویل ئٹ ترندی و اونا بندغی پہلو ءِ نظر انداز کننگ مننگ ءِ۔ ـ اقوام متحدہ تون اوار غٹ جہانی ادارہ غاک دا بندغی ویل آ خن تر تولوک ءُ۔ زوراکی نا بیگواہی تا بابت ئٹ 2011 ٹی اقوام متحدہ نا ورکنگ گروپ اسہ نمائشی دورہ ئس کرے ہرا کوئٹہ نا فائیو اسٹار ہوٹل اسکان اس، او کمیشن زیمی مروکا بلوچ آتے اسکان سر مننگ ءِ المی پُہہ متو یا پاکستانی کوالخواک اوفتے سر مننگ التور۔ ـ

او ودیک لکھا کہ بلوچ تینا زنک کشی نا برخلاف چرجوئی ئٹ جہد کننگ ءِ ولے پاکستانی ریاست چنکا چنکا برانز آتے ہم سختی ئٹ لتاڑنگ نا پالیسی تیا عمل کننگ ءِ۔ اندا زوت ئنا لڑ 27 جولائی 2024 آن داسکان برجاء ءِ، زوراکی نا بیگواہی و زنک کشی نا برخلاف بلوچستان نا دریابی شار گوادر ئٹی 28 جولائی آ اسہ “راجی مچی” ئس اڈ تننگ نا پڑو مسس۔ کراچی و پنجاب تون اوار تیوہ بلوچستان آن الس رضاکارانہ دا راجی مچی ٹی اوار مننگ کن پیشتما۔ پاکستانی لشکر مخلوق ءِ توننگ کن کُل کسر تے بند کرے، دو ہورک آ بندغ آتیا سم کارئ کرے، اوفتا اُلاخ آتیا سم کاری کرسا اوفتے بےکار کرے و ہُشا۔ ـ

بی این ایم نا چیئرمین نے لکھا کہ کُل ہڑاند و فریشانی تیان بیدس ہزار آ بندغ آک گوادر آ سر مننگ ئٹ سرسوب مسر اوکان گڈ راجی مچی آ جلہو کرسا گوادر شار ءِ دتر چُر کننگا و راجی مُچی نا راہشون تی دزگیر کننگا۔ تینا نہار کون آ زوراکی و ڈوہداری تے ڈھکنگ کن حوالکاری نظام، انٹرنیٹ ءِ ہم بند کننگا ہرا داسکان بند ءِ۔ ـ

حوالکاری زریعت و کسر تا بند مننگ نا سوب آن گوادر نا سہی حالیت نا بارو ئٹ معلومداری رسینگ ئٹ ہڑاند مننگ ءِ و ٹپی مروکا تے جانجوڑی نا آسراتی تننگ منکن مننگ اف۔ گوادر ئٹی کُننگ نا دیر تننگ بند کننگانے، کسر تے بند کننگ نا سوب آن گوادر و ایلو شار تیٹ کُننگ نا گڑا تا کاختی ءِ۔ـ پاکستانی لشکر کُننگ نا گڑا تا ہتنگ نا کسر تے بند کرینے۔

ڈاکٹرنسیم بلوچ پارینے کہ دا کن کہ فخر ئنا ہیت اسے کہ برجاء غا بلوچ مزاحمتی تحریک نا راہشونی اِرا دلیر ءُ نیاڑی ڈاکٹر ماہ رنگ بلوچ و سمّی بلوچ کننگ ءُ دا مزاحمتی تحریک نا کا اول دستہ ہم بلوچ زالبول کو۔ ـ سمی بلوچ نا باوہ ڈاکٹر دین محمد بلوچ “بلوچ نیشنل مومنٹ” نا بنجائی سروک آتیان اسٹ ءِ ہرا تدوکا پانزدہ سال آن پاکستانی لشکر نا دو آن زوراکی نا بیگواہی تا گواچی ءِ۔ ڈاکٹر ماہ رنگ بلوچ نا باوہ میر غفار لانگو ءِ پاکستانی لشکر اِرا وار زوراکی ئٹ بیگواہ کرسا اودے عقوبت خانہ آتیٹ بےبندغی اذیت تننگ آن گڈ شہید کرے اوکان گڈ اونا جشوک جون ءِ خسنگا۔ـ یاتی مرے کہ سمّی بلوچ ءِ اندا زوت ئٹ بندغی حق آتیکن فرنٹ لائن ڈیفنڈر نا تننگا۔ ہرادے او زوراکیبئٹ بیگواہ کننگوک بلوچ آتا خاہوت آٹا پنا کرے و بلوچ زالبول تا جہد دا خطہ ٹی اسہ پوسکنو و بے مثل ءُ مثیل اسے۔

ڈاکٹر نسیم بلوچ جمہوری ڈیہہ تا مونا مُسہ اہم خواست کرے:

1۔بلوچستان ئٹی بندغی المیہ نا جائزہ ہلنگ کن اقوام متحدہ نا “فیکٹ فائنڈنگ مشن ” راہی کننگ کن قرارداد ئس ہتیر۔
2۔ نن نُمے آن بلوچ آتا زنک کشی، ریاستی بےدادی و بلوچستان ئٹی بنداوی آجوئی تا لتاڑ نا مذمت ءِ کننگ نا خواست کینہ۔
3۔نن خواست کینہ کہ نُم پاکستان آ سفارتی دباؤ شاغبو کہ او راجی و جہانی بندغی حق آتا خیال ءِ کے۔

بی این ایم نا چیئرمین تینا چھٹی نا ایسر ئٹ لکھا کہ بلوچستان نا حالیت ننا اوڑدئی جمہوری اقدار و اصول آتیکن چکاس اسے۔ دا بندغی کاختی آ نُما مثبت ردعمل نہ بیرہ لکھ آ بلوچ آتا زند آتیا زیمی مرو بلکہ تیوہ جہان ئٹ جمہوری اقدار نا سوگوی و رکھ ئنا وڑ مونا برو۔ نن نُمے آن خواست کینہ کہ نُم دننگا سخت و زہم تخوکو گھام ہرفبو ہراڑان بندغی اقدار ءِ رکھنگ مرے نن نُما یکمشتی و مخ تفی نا ودار اُن۔

بلوچ یکجہتی کمیٹی نا ترجمان تینا اسہ بیان اسیٹ پارینے کہ ریاست پاکستان بلوچ راجی مُچی نا برخلاف طاغت و بیدادی کاریم ئٹ ہتنگ آن پد بلوچ راجی مُچی نا وخت آ دزگیر و زوراکی ئٹ بیگواہ بندغ تا خاہوت آتے بلوچ راجی مُچی نا برخلاف پریس کانفرنس کن تڑی تننگ ءِ۔

او پارے کہ ریاستی ڈھکوک ادارہ و ریاستی ڈیتھ اسکواڈ آک کوئٹہ نا سریاب، کلی اسماعیل و ہدا ٹی بلوچ راجی مُچی نا وخت آ دزگیر یا زوراکی ئٹ بیگواہ کننگوک بندغ تا خاہوت آتے تڑی تننگ بناء کرینو۔ دا خاہوت آتے بیوس کننگسہ ءُ کہ اوفک پریس کانفرنس کریسہ بلوچ یکجہتی کمیٹی و بلوچ راجی مُچی نا مذمت کیر۔ ریاستی ادارہ غاک دا خاہوت آتے تڑی تریسہ ءُ کہ اگہ دا خاہوت آک کمک کتور گڑا اوفتا بندغ آتے آجو کننگپرو و اوفتے نسخان تننگو۔

خاہوت آتا بندغ آتے تینا ڈول آ کاریم ئٹ ہتنگ نا دا ظالم آ حکمت عملی بندغی حق آتا ترند لتاڑنگ ئسے و دا پاش کیک کہ ریاست امنائی کپننگ ءِ چپ کرفنگ کن ہرا ہد اسکان ہننگ کن تیار ءِ۔ نن پاکستان نا ریاست آ پاش کینہ کہ دا چم آک بلوچ راج ءِ چپ کرفنگ کپسہ، نن تینا پرامن جہد ئٹ سلوک مرون۔

بلوچستان ئٹ تیز پِر تا سوب آن علاقہ ٹی بھس کاری مسنے، ہار و پِر تیان 12 بندغ بیران مسنو۔

‏‎شابیتی حوال تا رد ئٹ بلوچستان نا قطبی، قطب دی ٹکی و جاندمی ضلع آتیٹ بشام نا پِر تا سوگو سسٹم ئس ارے ہرا نا سوب آن شال تون اوار 22 ضلع ٹی پِر مننگ نا پاننگاسس۔

‏‎محکمہ مُد ئنا رد ئٹ بلوچستان ئٹی پِر ئنا دا لڑ 6 اگست اسکان مرو ہرا نا سوب آن خضدار، لسبیلہ، آواران ، پنجگور، بارکھان، موسیٰ خیل، مستونگ، سبی، شیرانی، کوہلو، بولان، ہرنائی، نصیر آباد، جھل مگسی، جعفرآباد، ڈیرہ بگٹی، کوئٹہ، زیارت، ژوب، قلعہ عبداللہ، قلعہ سیف اللہ و قلات ٹی تیز انگا تہو تون اوار پِر ئنا گمان ارے و جاگہ جاگہ غا تیز پِر ئنا سوب آن جھل تا دیر دننگ و لینڈ سلائیڈنگ نا ہم خلیس ارے۔

‏‎سرکاری ریکارڈ نا رد ئٹ بلوچستان نا کیہی ضلع آتیٹ برجاء بشام نا پِر، گروک تمنگ و ہار ئنا سوب آن داسکان 12 بندغ بیران و 32 ٹپی مسنو، پِر و ہار آن 263 اُرا تے نسخان مسنے ہرافتیٹی 91 اُرا تیوہ بھس مسنو۔

‏‎طوفانی آ پِر تیان 312 ایکڑ آ ساڑی فصل آک و 19 کلو میٹر کسر زیمی مسنو و 106 ساہدار کھسکنو۔

‏‎پی ڈی ایم اے بلوچستان خبردار کرینے کہ مننگ کروک خطرہ آتا سوب آن بندغ آک بے المی سفر و جھل تیان مُر مریر، دا رد ئٹ پی ڈی ایم اے کُل زمہ وار اداعہ آتے الرٹ مننگ نا پنت تسنے و الس آن ہم خواست کرینے کہ او خیال کیر تاکہ بھلو نسخان تیان بچیر۔

‏‎ایلو کنڈ آن بلوچستان نا جتا علاقہ آتیٹ ہورہ گروک تون پِر تا لڑ برجاء ءِ، علاقہ آتیات ہار ئنا سوب آن کسرک زیمی مسنو و کیہی علاقہ آتا اسٹ ایلو تون حوالکاری پنانے۔

دیغر مرے شنزہ شلے مشمار برے ٹاکو خلے
خوش ارے مشتا سَلے خمار مرے ٹاکو خلے

دیرہ چاپ دِرکُڑ مریر ساز سُروز کہ خلق ئٹ
ورنا برے دوتے ہَلے دیدار مرے ٹاکو خلے

پیرزال آک مُچ مریر گودیک کُل نازینک خلیر
اول برے مولے ملے چِکار مرے ٹاکو خلے

سلوک پیر ورنا خلق ئنا کُل کسرا کہ اونا
شیفی دڑے خنے بلبلے سار مرے ٹاکو خلے

مُر مُر آن بروکا سیال سنگت چاری امیدآتو
ہالو مرے جی بلے سرمچار مرے ٹاکو خلے

اودے خنور کُل بوچ و سہدار خوش مرور
شوان برے اِلے جھلے شوکار مرے ٹاکو خلے

ملاس آ بالاد ئتو تینا کہ سر مرو وخت ئس
ناز مرے خل خلے جماز مرے ٹاکو خلے

دیدن

وہنگے ڈغارا دتر انقلابی اتو رنگ داسہ سفر انقلابی
تفینے جمَر انقلابی کنا ڈے ئٹی دا شلنگے شکر انقلابی

سلوکے سُمان پد گر انقلابی ہلو بیر چاس لشکر انقلابی
ہتم نا خِزا تو گمر انقلابی بکارے ننے ام جغر انقلابی

ئسے نیمغا جنگ جوزہ ئسے نیمغا رقص نعرہ عجَب منزرے دا
تَسُر ناچ سوزے سُرونز ئٹ کہ عشق ئنا دا خَنِر انقلابی

کرک خن چڑہ شیف پائک کرک دُن غلامی کنا نی امرکہ اریسک
برے کس کُنے راج ئنا غَم سلے گر حقا تو پارہ کافر انقلابی

الے نی گنوکے ارے دا سفا سارٹی تو ہنانے زرابٹ ہُشِنگے
سلوکے ننا راج مونٹ گڑا خلپ نعرہ بجارو امر انقلابی

بجار بلوچ

بلوچستان نا بنجاہی شار کوئٹہ نا ریڈ زون آ ہنوک کسر تے ملنگ آن پد اینو دوارہ بند کننگانے۔

کوئٹہ پولیس نا اسہ کارندہ ئسے نا ردئٹ ریڈ زون ءِ استو دوارہ بند کننگانے۔

بست و بند تدوکا ہشت دے اسکان بند مروک ریڈ زون ءِ مخلوق کن بحال کریسس، واہم اینو اسہ وار پدا فورسز آتا بھلو کچ اس کسر تے بند کرینے۔

یاتی مرے کہ بلوچستان نا دریابی شار گوادر ئٹ 28 جولائی آ اڈ تروک بلوچ راجی مُچی آ حکومتی کریک ڈاؤن آن پد دا ارٹمیکو وار ءِ کہ کوئٹہ ریڈ زون ءِ بند کریسہ ءُ۔

داڑان بیدس بلوچستان نا ایلو بنجاہی کسر تے کیہی دے تے اسکان حکومت کنٹینر تخسہ بند کریسس۔ ایڑے گوادر آ ہنوک غٹ کسرک دائسکان بند ءُ۔

بلوچستان نا دریابی شار گوادر ئٹ بلوچ راجی مُچی تولوک برانز نا دروشم ئٹ ہفتمیکو دے برجاء ءِ، اندن شار دائسکان فوج ئنا پلویڑ ئٹی ءِ و حوالکاری نظام بند ءِ۔

تولوک برانز کروک آتا پاننگ ءِ کہ راجی مچی نا برخلاف ظالم آ کریک ڈاؤن آن پد ہم پدی زر نا ہند آ تولوک برانز برجاء ءِ۔

اوفتا ودیک پاننگ ءِ کہ اسہ پارہ غا برجاء گپ و تران آن پد ہم، ریاست تیوہ بلوچستان ئٹ پرامن برانز کروک آتا برخلاف کریک ڈاؤن ترند کننگ ءِ، ہرانا سوب آن شار تیٹ شہید مروک و ٹپی مروک آتیٹ ودکی مننگ ءِ۔ دا بیداد آ کاروائیک زنک ایسری نا برخلاف پرامن بلوچ تحریک ءِ ایسر کننگ نا ریاستی ارادہ ءِ پاش کیرہ۔ واہم، اگہ او تکرہ کہ بلوچ مخلوق بنداوی بندغی حق و شرف اکن تینا جنگ ءِ یلہ کرو گڑا او رد ءُ۔ نن دا فاشسٹ ریاست نا بیدادی و تادی کروک چم آتا مونا ہچبر شیف مفرون۔

ایڑے نوشکے ٹی درو بلوچ یکجہتی کمیٹی نا گوادر راجی مچی تون ہمکوپئی کننگ کن بندغ آتا بھلو کچ اس ریلی کشار، ہراڑا پاکستانی لشکر سم کاری کرے۔

سم کاری آن اسہ ورنا حمدان شہید اندن مُسٹ بھاز ٹپی مسر۔ سم کاری آن پد نوشکے ٹی حالیت آک خراب مسر و انٹرنیٹ بند کننگا۔

ننکان نا حوال تا ردئٹ برانز آ سم کاری نا برخلاف برانزی تا راجی کسر این 40 اسٹیشن قلم چوک آ تولوک برانز برجاء مس این 40 آ ہن و بر بند مس، گاڑی تا مرغن قطار آک لگار۔ اندن شار ئٹ ہڑتال نا سوب پوریائی مرکز آک بند ءُ۔

درو کراچی ٹی بلوچ یکجہتی کمیٹی نا سروکی ٹی گوادر ئٹ بلوچ یکجہتی کمیٹی نا ”بلوچ راجی مُچی“ آ پولیس نا بیدادی، دزگیری و قافلہ تیا بیدادی نا برخلاف کراچی ٹی ریلی کشنگاسس۔ ریلی ٹی اوار مروک آک آرٹس کونسل کراچی آن پریس کلب اسکان مارچ کننگ نا تیاری کننگ ئسر کہ پولیس جلہو کریسہ اوفتیا لٹ و کٹ کرے۔

واہم دزگیری تیان پد ہم برانز کروک آتا بھلو کچ اس آرٹس کونسل نا خڑک آ تولوک برانز کریر۔

کراچی ٹی پولیس گردی نا برخلاف بلوچ یکجہتی کمیٹی نا ترجمان نا پارہ غان شینک مروک بیان ئٹ ترجمان خُلیس نا درشانی کریسہ پارے کہ پرامن برانز کننگ ہر شاری نا حق ءِ و دا حق ءِ آئین ایتک۔ افسوز ءِ کہ آئین نا پاسداری تینٹ حکومت کننگ اف مخلوق ءِ جمہوری حق آن نئے بیرہ پدماندہ کننگ ءِ بلکن ترند بیدادی ئٹ غٹ دود و اقدار آتے لتاڑنگ ئٹ اختہ ءِ۔

اسہ بیان اسیٹ او پارینے کہ برانزی ریلی ئٹ زالبول، چنا و کماش آک ہم اوار ئسر اوفتے کسر تیا گِرار و ترند بیدادی نا گواچی کریر، ظلم و نا انصافی نا بڑزی ءِ دوئی کریسہ زالبول و ورنا تے دزگیر ہم کننگا۔ بیرہ پِن ئنا جمہوری نظام آمرانہ ڈول نا حکومت ئسے۔ ہرادے ہچ وڑ ئٹ منپنہ۔

بیان ئٹ پاننگا کہ بلوچستان نا ویل سیاسی ءِ و سیاسی ویل آتا ایسری ہیت و گپ ئٹ پیشتمک۔ طاغت ءِ کاریم ئٹ ہتنگ ہنوک وخت ئٹ ہم نسخان نا سوب ئس و اینو ہم۔ او پارے کہ بیگواہ بندغ تا ویل بندغی حق آتیتون گنڈوک ءِ اندا خاطران بیگواہ بندغ آتے آئین نا ردئٹ عدالت آتیٹ ہتنگ مرے و آمرانہ رویہ ایسر کننگہ۔

پوسکنا حوال تا ردئٹ کراچی ٹی بلوچ یکجہتی کمیٹی نا برانز نا وخت آ دزگیر کننگوک زالبول باسک آتے پولیس یلہ کرینے واہم برانز کروک آتا پاننگ ءِ کہ ہراتم اسکان غٹ بندغ آک یلہ کننگتنو ہموتم اسکان اوفتا برانز برجاء مرو۔

بی وائی سی پارینے کہ 18 ورنا دائسکان یلہ کننگتنو و اوفک دائسکان پولیس نا دزگیر ئٹی ءُ۔

بھیم ہم ہبکہ ءِ اوفتان

بہرام بلوچ

انت انت ندارہ خننگو
سم تے سینہ ٹی کننگو
بارود و سم تا دنز ئٹ
لیکو لئے و چاپ خلنگو

بھیم ہم ہبکہ ءِ اوفتان
خلیس ءِ دنکے لغت تے بولان
بے لاد آک دنا مرگ آ مخیسہ
مستائی ءِ آجوئی نا ہتنگو

ایکان سم کاری داکان رقص
دیر خنانے داڑے دنو عکس
دژمن نا بے ساہ غا ہٹکل تیا
بولان نا وقاب آک مخنگو

اسلم نا دا ڈیہہ ئٹ اف ہچ
پنجل نا پلیت آ دژمن تے جاگہ
دا پاک آ ڈیہہ ئنا آجوئی کن
اخس ریحان بمب خمب خلنگو

کودک آ دتک آک ارا تے تینا
جوژ ترسہ بولانی شکرا تیتون
اسہ مسخت کن مون پہ مون
دژمن تون خن و سم جنگ تننگو

بلوچستان لبریشن فرنٹ نا ترجمان میجر گہران بلوچ میڈیا غا شنگ کروک اسہ پریس ریلیز ئسیٹی زامران و پنجگور ئٹی پاکستانی لشکر آ مسہ جلہو نا ذمہ واری تے ارفے۔

ترجمان نا پاننگ اس کہ زامران و پنجگور ئٹی مُسہ جتا جاگہ غا تیا ڈیتھ اسکواڈ کارندہ، ماڑی و فوج کن راشن دروکا گاڑی تے ٹک کرین۔

او پارے کہ اینو سہب ئنا نُہہ بجہ غا زامران نا علاقہ ناگ ئٹی سرمچاراک کسر آ سنگر ہلِسہ کوزہ گیر پاکستانی لشکر نا راشن دروکا گاڑی ءِ راشن تون اوار کوزہ کریر و ڈرائیور ءِ بلوچ مننگ نا بنداو آ یلہ کریر۔

بیان ئٹ پاننگا کہ اسہ پین جلہو ئسے ٹی سرمچار آک استو ہشت نیم بجہ غا زامران نا علاقہ ڈمبان ئٹی انٹرنیٹ ٹاور ءِ بھس کریر۔ اندن مسٹمیکو جلہو ئٹی سرمچار آک 26 جولائی نا نن ہشت بجہ غا پنجگور نا علاقہ چتکان غریب آباد ئٹی سم کاری کرسا ڈیتھ اسکواڈ نا اِرا کارندہ لطیف ولد جلیل و امان اللہ ولد حسین ءِ کھسفیر و آصف ولد دلمراد ءِ ٹپی کریر۔

ترجمان پارے کہ مرگ ئنا گواچی مروک و ٹپی مروکا ڈیتھ اسکواڈ نا کارندہ ایم آئی و آئی ایس آئی نا جوڑ کروک فرید گروپ ئٹی اوار اسر و اوفتا خاص انگا بندغ آتیان اسر۔

او پارے کہ کہ بی ایل ایف کاروباری بندغ آتے خبڑدار کیک کہ او ریاست نا کمک و مخ تفی ءِ ہلیر۔ اگہ کاروباری بندغ آک و ڈرائیور آک دا روشت ءِ برجاء تخار تو او تینا نسخان نا ذمہ وار تینٹ مرور۔

او ودیک پارے کہ بی ایل ایف ہمو کُل بندغ آتے پاش پائک کہ ہرا ریاست نا پاننگ آ سرمچار آتا مخبری و لس الس ءِ تنگ کیرہ، نن اوفتے وار ایتنہ کہ او ریاستی کاریم تیان پد مریر نہ تو تینا عبرتی آ انجام کن تیار مریر۔

بیان ئٹ پاننگا کہ تنظیم نا انٹیلی جنس ٹولی ریاست و ریاستی کمک کروک آتیا ہر وخت نظر تخنگ ءِ و بلوچستان نا ہر کنڈ آ مروکا حالیت و تدینیک انٹیلیجنس ٹیم آن ڈھوک افس۔

ترجمان ایسر ئٹ پارے کہ بی ایل ایف دا ہر مُسہ جلہو تا ذمہ واری ءِ ارفک و بروکا وخت ئٹ دوارہ سخت ءُ جلہو نا عزم کیک۔