بلوچستان نا ضلع کیچ آن پاکستانی لشکر اسہ بندغ ئسے دزگیر کرسا بیگواہ کرینے۔

بیگواہ کننگوک بندغ نا چاہنداری امید نا مار کمبر نا پن ئٹ مسنے۔

حوال تروکا تا رد ئٹ ورنا ءِ استو ننکان یک بجہ نا وختا فورسز آک کیچ ئنا علاقہ بلیدہ بگ آ چھاپہ خلِسہ دزگیر کرینو ہراکان گڈ اونا بارو ئٹ ہچو معلومداری رسینگتنے کہ او ہراڑے و امر ءِ۔

خیال ئٹ مرے بلوچستان ئٹی زوراکی نا بیگواہی تا تدینیک چرجوئی ئٹ رپورٹ مننگ ءُ۔ تدوکا دے خاران آن پاکستانی لشکر اِرا بندغ ءِ دزگیر کرے ہرافتا خاہوت نا برانز خاران ریڈ زون ئٹی برجاء ءِ۔ داکان بیدس تدوکا دے تیٹ گوادر اوتھل و کوئٹہ آن ہم زوراکی نا بیگوہی تا تدینیک رپورٹ مسنو۔

یاتی مرے کہ پن کروک ورنا داکان مُست ہم زوراکی نا بیگواہی تا گواچی مسنے ہرا ہفت دے آن پد آجو مسس داسا اسہ وار پدا فورسز آک اودے زوراکی ئٹ بیگواہ کرینو۔

کوئٹہ نا ایب کیب ئنا علاقہ آتیٹ پاکستانی لشکر نا ہیلی کاپٹر آک بال کننگ آ خننگ مسنو۔

حوال تا رد ئٹ زرغون و اونا ایب کیب ئنا علاقہ آتیٹ اینو پاکستانی لشکر نا ہیلی کاپٹر آک چرجوئی ئٹ بال کننگ ءُ۔

کوالخواک دا رد ئٹ دائسکان شابیتی حوال تتنو۔

ہندی مخلوق نا رد ئٹ علاقہ ٹی فوجی آپریشن نا خلیس نا درشانی مننگ ءِ واہم دا ہیت دائسکان پک اف۔

گواڑخ دسیو کیو سینگار بولانے
ہُورہ مریو شلیو کیو سینگار بولانے

شوان ئتو بُزگل گھر گھٹ تلارآتے
خنتا تِخیو کیو سینگار بولانے

گہوش پُدینا پِر بلسم زیبل ڈغار
لوز پٹیو ہتیو کیو سینگار بولانے

دیوان دا مشتے تون مُدامی مرے
ٹاکو خلیو مخیو کیو سینگار بولانے

خنپر مونجا ہِچ اسُل تلار آتے تینا
غمتے ای کُنیو کیو سینگار بولانے

دیدن گوا آجوئی نا پِرِک کِن ہُریس
شعر تفیو کیو سینگار بولانے

دیدن بلوچ

بلوچستان نا بنجاہی شار کوئٹہ غان پاکستانی لشکر اِرا بندغ ءِ زوراکی ئٹ بیگواہ کرے۔

پاکستانی لشکر نیام غنڈی آن اِرا ایلم ءِ زوراکی ئٹ بیگواہ کرے ہرافتا چاہنداری بار خان مری نا مار خدا رحم مری و خدائے دوست مری ہند لیس ڈغاری نا پِن تیٹ مسنے۔

ٹی بی پی ءِ حوالکار آک پاریر کہ پن کروک بندغ آتیان خدائے دوست ءِ اپریل ئٹ و خدا رحم ءِ مئی ٹی زوراکی ئٹ بیگواہ کننگا ہڑتوم آ بندغ آک کولا کانڑ ئٹ مزوری کریرہ۔

خیال ئٹ مرے بلوچستان ئٹ زوراکی نا بیگواہی تا کیہی تدینیک مُر ئنا علاقہ تیٹ حوالکاری آسراتی مفننگ و خاہوت آتا خُلیس نا سوب وخت آ رپورٹ مفسہ۔

بلوچ یکجہتی کمیٹی نا پارہ غان تیوہ بلوچستان ئٹ تدوکا اِرا ہفتہ نا وخت ئٹ جلسہ و برانز کننگا ہرافتا خواست آتیٹ زوراکی ئٹ بیگواہ بندغ تا آجوئی و دروغ نا مونتس آتیٹ بیگواہ بندغ تا کسفنگ ءِ بند کننگ اوار ءِ۔

بلوچستان نا ضلع آواران ئٹی پاکستانی لشکر آبادی تیا سم کاری کرسا اسکول نا اسہ استاد ئسے کھسفینے۔

سم کاری نا تدینی آواران نا علاقہ مالار نا ہند آ مسنے، و بیران مروکا استاد نا چاہنداری عبدالخالق دوست محمد نا پنا مسنے۔

بی این ایم نا بندغی حق آتا ڈیپارٹمنٹ پانک تدینی ءِ پک کرسا پارینے کہ دننگا کارروائیک بندغی حق آتا سخت لتاڑ ءُ و دافتا دمدستی حساب ہلوئی مرے۔

او پارے کہ نن پاکستانی کوالخواہ تیا زور شاغِنہ کہ او شاری تا رکھ ءِ یخینی کیر و جہانی قانود آتا پابندی ءِ کیر۔

خیال ئٹ مرے کہ اِرا دے ئٹی دا وڑ ئنا دا ارٹمیکو تدینی ءِ داکان مُست تدوکا دے تیٹ پاکستانی لشکر کولواہ نا علاقہ ڈنڈار ئٹی سم کاری کرسا پنچ سالی ءُ چُنا سے بیران کریسس ہرا نا چاہنداری ستارہ بشیر نا پن ئٹ مسس۔

پاکستان نا آزاتی نا دے ئنا بابت مجلس آتیا گمانی جلہو تا سوب کوئٹہ تون اوار کیہی شار تیٹ سکیورٹی ہائی الرٹ کننگانے۔

کوئٹہ شار نا جتا کسر تے بند کریسہ اسنیپ چیکنگ کننگسہ ءُ اندن ایف سی و ایلو ادارہ غاک اوار کسر تیا پیری کننگ ءُ۔ کیہی کسر تیا مخلوق ءِ پَٹیسہ ءُ۔

ایڑے کچھی بست و بند نا 14 اگست نا ردئٹ امن و امان برجاء تخنگ کن سکیورٹی نا رکھوک گامگیج آک شینک کننگانو۔

بولان نا غٹ سیل و سواتی ہند آتے 13 اگست آن ایلو پرمان اسکان عارضی بند کننگ نا فیصلہ کننگانے۔

بست و بند نا ردئٹ بولان ئٹ بیگہ نا 6 بجہ غان سہب ئنا 6 بجہ اسکان مسافر ٹرانسپورٹر آتا سفر آ ایلو پرمان اسکان عارضی رکھ خلنگانے۔

بولان ئٹ مسافر بس و ویگن آتے بننگ نا موکل بیرہ دے ئٹ مرو۔

گوادر، لسبیلہ و قلات ئٹ فوج، ایف سی و پولیس کسر تیا پیری و فلیگ مارچ کریر۔

ایلو پارہ غا کوئٹہ تون اوار ایلو علاقہ تیٹ پاکستانی آزاتی نا دے ئنا مجلس آتیا تراک آتا لڑ برجاء ءِ۔

کوئٹہ ئٹ تدوکا بیست و چار گھنٹہ آتا وخت ئٹ چار ہند آتیا تراک مسنے ہرافتیٹ پاکستانی جشن آزاتی نا مجلس آتیکن گچین کروک ہند و بیرک بہا کروک اسٹال آتے ٹک کننگانے۔

گیشتر دا کہ درو بلوچ لبریشن آرمی نا سرمچار آک کوئٹہ ئٹ اسہ اسکول ئسے نا دورہ کریسہ اوڑے مجلس نا تیاری تیٹ اختہ استاد ص خوانندہ تیتون ہیت کریر ہراڑان پد مجلس کپننگ نا فیصلہ کننگا۔

بلوچ لبریشن آرمی درو گرلز کالج سریاب مل آ تراک نا ذمہ واری ہم ارفے ہراڑے چانزدہ اگست نا بابت مجلس نا تیاریک برجاء ئسر۔

بلوچ یکجہتی کمیٹی نا ترجمان بیان اس شینک کریسہ پارے کہ درو مستونگ ئٹ تربت نا ہندی ورنا و ڈی سی پنجگور، زاکر بلوچ، و آواران ئٹ معصوم آ مسڑ ستارہ شبیر نا کسفنگ نا مذمت کینہ۔ زاکر بلوچ و ستارہ شبیر نا کسفنگ بلوچستان ئٹ برجاء کشت و خون ئنا ہمو لڑ ءِ ہرا تدوک ہفت دہائی تیان برجاء ءِ، و داٹی ہمو طاغت آک سیدھا اوار ءُ ہرا ہڑدے بلوچ ورنا تا جشوک جون تے خسنگ آن ہلیس دروغ نا مونتس تیٹ اوفتے کسفنگ ءُ۔

او پارے کہ بلوچستان ئٹ دا ظلم و تادی تا سوب آن ہڑدے ئی بنداو آ کوہ سلیمان آن ہلیس مکران اسکان ہر اُرا ئٹ ماتم ءِ۔ داسہ تدوکا ہفتہ ئٹ بلوچ راجی مُچی ئٹ شہید کننگوک مُسہ بلوچ ورنا نا دتر باریتوسس کہ ملخدو پدا معصوم آ مسڑ ستارہ شبیر و درو ورنا غا زاکر بلوچ نا جونک بسر۔

ترجمان تینا بیان نا ایسر ئٹ پارے کہ دا وخت بلوچستان اسہ بندغی المیہ ئسے آن تدینگ ءِ، و بلوچ راج تیوہ زنک ایسری تون مون تننگ ءِ۔ بلوچ یکجہتی کمیٹی بندغی حق آتا گل آتیتون اوار اقوام متحدہ غان خواست کیک کہ دا زنک ایسری ءِ توننگ و لکھ آ بندغ تا زند آتے رکھنگ کن دمدستی کڑد سر ایتر۔

ایلو پارہ غان بی این ایم نا بندغی حق آتا ادارہ پانک ’ایکس‘ آ شینک کروک بیان اسیٹ ڈسٹرکٹ کمشنر پنجگور زاکر بلوچ نا کسفنگ نا ترند لوز آتیٹ مذمت کرینے۔

پانک نا ترجمان نا پاننگ ءِ کہ ”ننے او رپورٹ آتیا بھاز خُلیس ءِ کہ زاکر بلوچ ءِ بلوچ برانز کروک آتا برخلاف طاغت کاریم ئٹ ہتنگ نا پاکستانی لشکر نا پرمان آتیان نمن مننگ نا سوب ٹک کننگانے۔ بندغی حق آتا اصول آتے برجاء تخنگ و پرامن برانزی تا رکھنگ کن اوفتا سوگوی ءِ منّنگہ، و اونا شرف کننگ مرے، بیدادی نا دن انگا گندہ غا فعل نا سزا تننگ مف۔ دا خون بلوچستان ئٹ بندغی حق آتیکن بش مروک آتا برخلاف تڑی و بیدادی نا اسہ فریشان کروک بھیم ئسے نا نشانی کیک۔ تینا شاری تا حق آتا شرف ءِ کروک سرکاری بندغ آتے ٹک کننگ قانود نا حکمران و انصاف نا اصول آتیا جلہو ئسے۔

بلوچستان نا ضلع مستونگ ئٹ نا درست آ سلہہ بند بندغ آتا سم کاری آن ڈپٹی کمنشر پنجگور ذاکر بلوچ مرگ ئنا گواچی مس وختس کہ ڈسٹرکٹ پنجگور نا چیئرمین ٹپی ءِ۔

سم کاری نا تدینی مستونگ نا علاقہ کھڈکھوچہ نا ہند آ مس ہراڑے نیشنل پارٹی نا سروک ایم پی اے رحمت صالح نا ایلم و ڈسٹرکٹ چیئرمین پنجگور عبدالمالک و ڈپٹی کمشنر پنجگور ذاکر بلوچ ٹپی مس۔

ٹپی مروکا بندغ آتے نواب غوث بخش ریسانی ہسپتال آ سر کریر واہم ڈپٹی کمشنر پنجگور ذاکر بلوچ ٹپ آتے سگتئو مرگ ئنا گواچی مس۔

ایلو پارہ غان حوال تا رد ئٹ مستونگ نا ہندا علاقہ کھڈکوچہ ٹی ٹک ئنا ہند آ کراچی کوئٹہ بنجائی کسر آ بھلو کچ اسیٹی سلہہ بند بندغ آک کسر ءِ تفیر ہندا وخت آ گاڑی تا چیکنک برجاء ئس کہ ڈی سی پنجگور و چیئرمین پنجگور نا قافلہ ٹی ساڑی لیویز و پولیس فورسز نا سلہہ بند بندغ آتا نیام ئٹ جھڑپ مس ہراڑے کہیی بندغ آک ٹپی مسنو۔

واہم جلہو نا ذمہ واری ءِ دائسکان کس ارفتنے۔

پاکستانی لشکر نا کارندہ غاک بیدس سوب آن ننا اُرا تیٹ پترینگسہ چادر و چار دیوالی ءِ لتاڑیرہ – شاری تا شکائست

شابیتی حوال تا ردئٹ بلوچستان نا ضلع کیچ نا تحصیل ہوشاب تجابان نا ہندیک پاکستانی لشکر نا ہر وخت شاری تیا بیدادی، اُرا تیا جلہو و سرولینس نا برخلاف تولوک برانز کریر۔

تحصیل ہوشاب تجابان نا ہندیک ریاستی فورسز آتا تادی آن تنک مریسہ ایم ایٹ کسر ءِ تجابان نا ہند آ تولوک برانز کریسہ بند کرینو علاقہ نا بندغ آک ایف سی چیک پوسٹ نا آباتی نا نیام ئٹ مننگ، فورسز آتا اُرا تیٹ پترینگ، بیست و چار گھنٹہ سرولینس ڈرون آتیٹ بندغ آتے ہُننگ آن ہندی بندغ آک بھاز تنک تمانو۔

برانز کروک آک شکائست کرینو کہ پاکستانی لشکر بیدس سوب آن اُرا تیٹ پترینگسہ اُرا تے پَٹیک و ہر کس ءِ سر و سوج نا پن آ ارفسہ ایف سی کیمپ آ دریسہ بیدادی نا گواچی کیک و داسہ دا ہڑدے نا کاریم اس جوڑ مسنے۔

ارٹمیکو پارہ غا کسر نا بند مننگ و تولوک برانز نا سوب کسر نا ہڑتوما پارہ غاتیا گاڑی نا مرغن قطار لگانے۔

ہوشاب نا علاقہ تجابان نا ہندیک خواست کرینو کہ ایف سی کوالخواک تینا کیمپ ءِ آباتی آن مُر دیر و ہندی بندغ آتے بھیم ئنا گواچی کپس۔

یاتی مرے تجابان خاص وڑئٹ ضلع کیچ نا ہندیک داڑان مالو ہم پاکستانی لشکر نا آباتی تا نیام ئٹ ایف سی کیمپ ٹہفنگ نا مخالفت کریسہ کرینو شاری تے شکائست ءِ کہ ایف سی کارندہ غاک اوفتا ہڑدے ئی زند ءِ زیمی کیرہ اندن کیہی وار ایف سی کیمپ آن خلوک گولہ غاک شاری تا اُرا تیٹ ہم تمانو۔

درو ضلع کیچ نا علاقہ کولواہ ٹی پاکستانی لشکر نا سم کاری و گولہ باری آن اسہ گولہ اس ہندی آباتی آ تماسس ہراڑان بشیر نا مسڑ ستارہ پنی ءُ پنچ سالی مسڑ اس بیران مسوسس۔

تدینی نا برخلاف درو ہندی بندغ آک و خاہوت چنا ءِ دفن کننگ آن پد برانز ئٹ آواران و کیچ نا کسر ءِ بند کریسہ تولوک برانز کریسر۔

بلوچ یکجہتی کمیٹی نا سروکی ٹی اینو نوشکے ٹی جلسہ اس اڈ تننگا ہراٹی زالبول و نرینہ غاک ہزار آتا کچ ئٹ اوار مسر و ہمکوپئی نا درشانی کریر۔

جلسہ ئٹ اوار مروک آک ظلم و تادی تا برخلاف سیوتی ئٹ جہد کننگ نا سوغند ارفیر۔ جلسہ ئٹ شہید حمدان بادینی تون اوار غٹ شہید آتے دروت ندر کننگا اندن جلسہ ئٹ نوشکے و رخشان تون اوار ایلو علاقہ تیان بندغ آک اوار مسر۔

بی وائی سی نا آرگنائزر ڈاکٹر ماہ رنگ جلسہ ئٹ تران کریسہ پارے کہ ننے دا راجی سیوتی و ہمکوپئی ءِ تینا زند ئنا ہر گام آ برجاء تخوئی ءِ۔ ننا راجی طاغت ءِ کل آتیان زیات ذاتی، خاہوتی و قبائلی جنگ آک نسخان تسنو۔ دا قبائلی جنگ آتیٹ ننا ہزار آ بندغ خلنگانو۔ ننا ہزار آ اُراک بھس مسنو۔ داسہ وخت بسنے کہ نن دا تین پہ تین نا جنگ آتیان پیشتمن۔ دا قبائلی جنگ آک قدرتی مفسہ و نئے کہ ننا بندغ آتے تین پہ تین جنگ کننگ و کہنگ نا شوق ءِ بلکن ننا اُرا نا ویل آتیٹ بدر تا زیم مریک او ننا چنکا چنکا ویل و اختلاف آتیان فائدہ ارفسہ ننے تین پہ تین جنگ کرفرہ۔

او پارے کہ دا انگریز آتا وخت ئنا پالیسی ئسے تاکہ ننے تین پہ تین تون جنگ کرفسہ، ننے بشخ کریسہ ننا زی آ اڑزانی ئٹ حکومت کننگ کیر و اینو او جارات ئٹ دا کاریم ءِ کننگ ءُ و نن دا پالیسی ءِ پہہ مننگ افن بس تین پہ تین تینا دو تیٹ تینا ایلم ءِ کسفنگ اُن۔ ولے داسہ بس کروئی ءِ، داسہ تین پہ تین جنگ کروئی اف۔ داسہ تین پہ تین نا جنگ آتے ایسر کننگ نا وخت بسنے۔