بیست و ہفت جولائی آ مستونگ آن پاکستانی لشکر نا دو آن زوراکی ئٹ بیگواہ کننگوک مُسہ بندغ آجو مرسا اُراغا سر مسر۔

شابیتی حوال تا رد ئٹ 27 جولائی آ مستونگ آن بلوچ راجی مچی نا کاروان آن پاکستانی فورسز آتا دو آن بیگواہ مروک مُسہ ورنا آجو مرسا اُرا غا سر مسنو۔

آجو مروکا تیٹ زبیر بلوچ، انیس بلوچ و بزید بلوچ اوار ءُ ہرا اینو آجو مسنو۔

خیال ئٹ مرے کہ 28 جولائی آ بلوچستان نا دریابی شار گوادر ئٹ بلوچ یکجہتی کمیٹی نا کنڈ آن اسہ مُچی اس بلوچ راجی مُچی نا پنا اڈ تننگاسس ہراٹی اوار مننگ کن تیوہ بلوچستان آن بندغ آک پیشتماسر واہم اوفتے فورسز آک گوادر ئٹی پیہنگ التور۔

مستونگ نا ہند آ فورسز آک کاروان آ مون پہ مون سم کاری کریر ہراڑان چھانڑدہ بندغ ٹپی مسر و کیہی تے پاکستانی فورسز آک دزگیر کرسا بیگواہ کریر ہرافتا مُسٹ اینو آجو مسنو۔

بلوچستان نا دریابی شار و سی پیک نا بنجاہ گوادر ئٹی پولیس نا ساڑی گری ٹی زبان زانت کار، محقق و بلوچی ڈکشنری نا خواجہ سید ظہور شاہ ہاشمی نا بُت ءِ پرغنگ نا کوشست کننگانے۔

نادرست آ بندغ آک بُت ءِ تیوہ غا پرغنگ کتور ولے بُت ءِ نسخان رسینگانے۔

دا رد ئٹ گوادر نا اسہ ہندی خبر تروک ادارہ “دی گوادر پوسٹ “تون تفوک صحافی و ڈائریکٹر نیوز جمیل قاسم چاگڑدی حوالکاری میڈیا غا تینا اسہ پوسٹ ئسے ٹی خن ئٹ خنوک بندغ آتا حوالہ ترسا پارے کہ اسہ ریشی ءُ بندغ ئس رکشہ ٹی سوار مرسا سید ہاشمی نا بُت ئنا خُڑک آ بس۔ اونا دو ٹی تفر ئس اس، و پولیس نا ساڑی گری ٹی او بندغ تفر ئٹ سید ہاشمی نا بُٹ آ دک خلنگ بناء کرے، ہرا نا سوب آن سید ہاشمی نا بُت ئنا بامُس و چشمک ءِ نسخان مس۔

خیال ئٹ مرے کہ سید ہاشمی نا بُت پدی زر (میرین ڈرائیو) آ خلوک ءِ ہراڑے تدوکا اِرا ہفتہ ٹی بلوچ راجی مچی نا تولوک برانز برجاء اس۔

اندن تدوکا دے تیٹ بی وائی سی بلوچستان نا بنجائی شار کوئٹہ ٹی بلوچستان یونیورسٹی نا رہا ” بلوچ زنک ایسری نا چیدہ” نا تختی ءِ جِک کریسس ہرادے ایلو دے نادرست آ بندغ آک پرغاسر۔

ضلع کیچ ئنا علاقہ کولواہ ٹی استو پاکستانی لشکر نا سم کاری و گولہ باری آن پنچ سالی چُناس بیران مس۔

بیران مروک چُنا نا چاہنداری بشیر احمد نا مسڑ ستارہ نا پن ئٹ مسنے۔

فائرنگ و گولہ باری نا تدینی ضلع کیچ ئنا علاقہ کولواہ ڈنڈار نا ہند آ مسنے۔

ہندی حوال تا رد ئٹ استو پاکستانی لشکر لس آبادی تیا سم کاری و گولہ باری کرے ہرانا پلویڑ ئٹ برسا پن کروک چُنا بیران مسنے۔

حوال تا رد ئٹ اینو سہب ئنا ہندی مخلوق چُنا ئے گُڈی ہند کننگ آن پد برانز کرسا آواران کیچ روڈ ءِ بند کرینے۔

بلوچ یکجہتی کمیٹی نا پارہ غان راجی مُچی نا شہید آتا یات ئٹ اینو پنجگور ئٹی اسہ جلسہ اس اڈ تننگا ہراٹی ہزار آ بندغ آک اوار مسر و بلوچ شہید آتے دروت ندر کریر۔

جلسہ ئٹ ڈاکٹر ماہ رنگ، و صبغت اللہ، تون اوار ایلو راہشونک تران کریر اندن جلسہ نا ایسر ئٹ راجی سوغندی دیوان اڈ تننگا۔

ڈاکٹر ماہ رنگ بلوچ جلسہ ئٹ تران کریسہ پارے کہ بلوچ راج نشان تس کہ بلوچ نا سم تا مونا بننگ کیک ولے سلنگ کپک۔ ہرا بندغ آک پاریر کہ پاکستانی ریاست نا برخلاف بلوچ تحریک سرسہب مننگ کپک اوفک پاریر کہ کاٹم و خل ئنا جنگ مننگ کپک ای اوفتے پاننگ خواوہ کہ بلوچ دنو ہزار کاٹم ودی کرو و او کاٹمک دا خل ءِ پرغور، ننا ایمان ءِ دا خل ءِ نن بور بور کرون۔ بلوچ نا جیرت، جوزہ و دلیری ءِ لوز آک بیان کننگ کپسہ۔

او پارے کہ ریاست تدوکا اِرا ہفتہ غان گوادر ءِ پلویڑ و اودے ریڈ زون پِن کننگ کن تینا تیوہ غا طاغت ءِ کاریم ئٹ ایسنے۔ داڑان پد ہم نم نشان تسرے کہ گوادر ریاست کن ریڈ زون مننگ کیک ولے او ننا لمہ وطن ءِ۔ ہر ڈول ئنا ریاستی ظلم و تادی ءِ سگنگ آن پد ہم بلوچ راج دا پاش کرے کہ ننے ہچو طاغت اس گوادر آ و ننا وطن نا اسہ ہم بشخ ئسے آ ہننگ آن توننگ کپک۔ دا لپڑزہ مفروکا حوصلہ جہان آ پاش کرینے کہ بلوچ راج تینا لمہ وطن ئٹ ہر ڈول ئنا تادی و زنک ایسری ءِ چُٹفنگ نا لائخی تخک۔

بلوچستان نا ضلع کیچ آن پاکستانی لشکر چار بندغ دزگیر کننگ آن پد بیگواہ کرینے۔

بیگواہ کننگوک بندغ آتا چاہنداری بلیدہ نا ہندی پیر بخش نا مار نصرم، ولید حمید، نزیر اُمید و حنیف نا پن ئٹ مسنے۔

بیگواہ کننگوک بندغ آتا خاہوت آتا پاننگ ءِ کہ اگہ اوفتا بندغ آتے آجو کننگ متو تو او سخت برانز کرور۔

خیال ئٹ مرے کہ بیگواہ کننگوک نصرم ءِ داکان مُست ہم پاکستانی لشکر بیگواہ کریسس ہرا سینزدہ جون آ آجو مسس۔ و داسا دوارہ پاکستانی لشکر نا دو آن بیگواہ مسنے۔

پن کروک ورنا ئے دا وار آ خاہوت نا کنڈ آن تربت ئٹی تولوک برانز کننگ آن گڈ پاکستانی لشکر آجو کریسس، داسا اسہ وار پدا اودے دزگیر کرسا بیگواہ کننگانے۔

غزہ ٹی باہوٹی تا اسہ اسکول ئسے آ اسرائیل نا آسمانی جلہو نا سوب غزہ نا جانجوڑی کوالخواہ تا ردئٹ 90 آن زیات بندغ مرگ ئنا گواچی مسنو۔ دا جلہو غزہ جنگ ئنا بناء آن پد اسرائیل نا پارہ غان کروک بھلا جلہو تیان اسٹ ئسے۔

اسرائیل فوج جلہو نا ذمہ واری ارفسہ اسہ شاہدی اس ہم فراوان کننگ آن بیدس دعویٰ کرینے کہ اسکول ئٹ حماس نا کمانڈ سینٹر ئس۔

حوال تروک ادارہ ’اے ایف پی‘ نا ردئٹ غزہ نا سول ڈیفنس ایجنسی پارینے کہ اسرائیل باہوٹی تا اسکول آ مُسہ راکٹ خلک ہراڑان مرگ ئنا گواچی مروک بندغ تا کچ 90 آن 100 ئنا نیام ئٹ ءِ۔

غزہ نا جانجوڑی وزیر نا ردئٹ نیامی غزہ نا تابین اسکول آ جلہو ئٹ 47 بندغ ٹپی ہم مسنو۔ دا اسکول ءِ غزہ جنگ آن زیمی مروک آک رہینگنگ کن کاریم ئٹ ہتنگ ئسر۔

خن خنوک شاہد ابو انس پارے کہ جلہو ہموتم مس ہراتم بندغ آک اسکول نا تہٹی ساڑی مسیت ئٹ سہب ئنا نماز خواننگ ئسر اندن جلہو آن مُست ہچو حوال اس ہم تننگتوسس۔

ابو انس نا ردئٹ ”بندغ آک نماز خواننگ ئسر، گڑاس وضو کننگ ئسر و گڑاس بندغ زی آ خاچاسر ہرافتیٹ زالبول، چنا و پیر انگا ہم اوار ئسر۔ اسیکہ اسہ میزائل اس بس و اوڑان پد ایلو، پدا ہر جاگہ غا بندغی جون تا اُزبہ غاک تموک تالان ئسر۔“

اسرائیل لس شاری تا کسفنگ نا ذمہ وار حماس ءِ پائک ہرانا پاننگ ءِ کہ حماس اسکول و رہینگوک علاقہ تے تینا آپریشنل مسخت آتیکن کاریم ئٹ ہتیسہ بندغ آتا زند آتے بھیم ئٹ شاغنگ ءِ۔

اسرائیل پوسکنا جلہو ءِ اندنو وخت ئسے آ کرینے ہراڑے امریکہ، قطر و مصر نا ثالثی ٹی بدی دار آتے جنگ بندی معاہدہ نا خڑک آ ہتنگ نا کوشست برجاء ءِ۔

امریکہ برجاء دے تیٹ دعویٰ کریسس کہ جنگ بندی معاہدہ ایسری مرحلہ تیٹی ءِ۔

یاتی مرے غزہ جنگ نا بناء خدو ہفت اکتوبر آ حماس نا اسرائیل آ جلہو آن پد مسوسس۔ اسرائیلی کوالخواہ تا ردئٹ دا جلہو ئٹ 1200 بندغ مرگ ئنا گواچی و کم و ود 250 بندغ ءِ بندی کننگاسس۔

اسرائیل نا ورندی کارروائی ٹی غزہ نا جانجوڑی وزیر نا ردئٹ 39 ہزار آن زیات فلسطینی مرگ ئنا گواچی مسنو ہرافتیٹ بھلا کچ زالبول و چنا تا ءِ۔

بلوچ یکجہتی کمیٹی نا سروکی ٹی بلوچ راجی مُچی نا قافلہ تربت ءِ سر مس۔ بی وائی سی نا تربت ئٹ جلسہ، ہراٹی ہزار آتا کچ ئٹ نرینہ و زالبول آک اوار مسر، کیچ ٹاور تون اوار خڑک ئنا ماڑی تیا بھلو کچ اسیٹ بندغ آک ساڑی ئسر۔

جلسہ ئٹ ڈاکٹر ماہ رنگ بلوچ، سمی دین، صبغت اللہ شاہ جی، ڈاکٹر صبیحہ تون اوار ایلو راہشونک ساڑی ئسر۔

بلوچ یکجہتی کمیٹی نا بنجاہی آرگنائزر ڈاکٹر ماہ رنگ بلوچ تربت جلسہ ئٹ تران کریسہ پارے کہ بلوچ نا جیرت و دلیری غٹ چم آتے بے سہبی نا گواچی کرینے گوادر راجی مچی بلوچ تحریک ئٹ اسہ پوسکنو باب ئسے نا ودکی کرے۔ تلار ئٹ بلوچ راج سگ ئنا پوسکنو مثیل جوڑ کرے کوہ سلیمان آن سیستان بلوچستان اسکان بلوچ راج راجی مُچی نا توار آ لبیک پارے۔ سم کاری و آنسو گیس شیلنگ کننگا ولے بلوچ سلوک مس دا بلوچ نا سر سہبی و روشن آخبت نا شاہدی ءِ و دا جہد غلامی نا زمزیر تے پرغنگ ئٹ سر سہب مرو۔ بلوچ یکجہتی کمیٹی بلوچ نا توار ءِ راجی تشکیل نا پارہ غا اسہ جوانو گام ئسے۔ بلوچ آتے کلہو ایتوہ کہ بلوچ یکجہتی کمیٹی راجی تحریک ئسے، بلوچ آن زندگی کننگ نا حق پُلنگانے دا تحریک پوسکنا زنک ئنا روشن آخبت نا تحریک ءِ بلوچ تینا جہد و تحریک آن ہچو دروشم اسیٹ پدی مفرو۔ کیچ ئنا ڈغار مہر و مابت نا ڈغار ءِ شہید آتا ڈغار ءِ۔

صبغت اللہ شاہ جی پارے کہ 27 جولائی آن ظلم و تادی تا لڑ بناء کننگا 3 سنگت شہید کننگار درزن آک ٹپی کننگار بالاچ نا بیدس عدالت خون آن پد بناء مروک تحریک اینو اسہ سوگوْ تحریک ئسے نا دروشم دوئی کرینے۔

سمی دین بلوچ تران کریسہ پارے کہ 8 توہ مالو اندا شہید فدا چوک آ اسہ جون اس داڑے تخنگاسس۔ ساندہ ننے لاش تننگا ولے ہر لاش آن پد اسہ پوسکنو انقلاب اس ودی مریک ننے فخر ءِ کہ ننا تعلق اسہ اندنو راج ئسے آن ءِ ہرا قربانی تیان خُلپک۔ غٹ چم آک بے سہب مسنو بلوچ نا جہد اسہ سوگو دروشم اسیٹ مونی ہِننگ ءِ ننا جہد اسہ پرامن جہد ئسے ولے ریاست ساندہ ننا جہد ئنا مونا توفک آتے توروک سلوک مسنے اسلام آباد ئٹ ہم اندن کننگا گوادر ئٹ ہم طاغت کاریم ئٹ ہتنگا۔ بلوچ اسہ اشتماعی مارشت و اشتماعی جہد ئسے نا پارہ غا ہِننگ ءِ، گوادر ئٹ انت کننگا، نیٹ ورک و انٹرنیٹ، کسر و بازار آک بند کننگار، دیر بند کننگا بندغ آتے اسہ اشتماعی سزا اس تننگا۔ اسہ ریاستی دلال ئسے گوادر راجی مچی ئٹ رادہ کریسہ ننے آ جلہو نا ڈٹ بندی کننگا۔ گوادر مچی پاش کرے کہ بلوچ جہد نا کسر توننگ مفک۔ ہمکوپہ و سوگو مریسہ ہی دا تحریک ءِ سر سہب کننگ کینہ، بلوچ راجی پجار و شرف ءِ ایسر کننگ کن جتا چم آتے کاریم ئٹ ہتیسہ ءُ ولے بلوچ تینا پجار آن ہچبر پدی مفرو درو ننا باوہ غاک دا کسر تیا تولسہ برانز کننگ ئسر اینو نن اُن ولے دا جہد سلنگ کننگ کپک۔

بلوچستان نا ضلع آواران ئٹ بلوچ سرمچار و حکومت نا مخ تف سلہہ بند ٹولی تا نیام ئٹ جھڑپ نا احوال ءِ۔

حوال آتا رد ئٹ آوارن نا علاقہ جھل جھاو ٹی حکومت نا مخ تف سلہہ بند ٹولی و بلوچ سرمچار آتا نیام ئٹ جھڑپ مسنے۔

حوال تا رد ئٹ دا جلہو ئٹ ہڑدوسر نسخانی مسنے۔

واہم جانی نسخان تا پک دائسکان کس ئس کتنے نئے کہ بست و بند نا ہیت مونا بسنے، ہچو سلہہ بند تنظیم ئس دا بابت ہچ پاتنے

افغانستان آن خڑک پاکستان نا قبائلی ضلع خیبر نا علاقہ وادی تیراہ ئٹ سکیورٹی فورسز آتا چیک پوسٹ آتیا جلہوک، کم آن کم ہفت کارندہ مرگ ئنا گواچی و دوانزدہ ٹپی مسنو۔

دا جلہو تیٹ ہشت کارندہ نا بیگواہ مننگ اندن پوسٹ آ سلہہ بند آتا کوزہ کننگ نا حوال آک اریر۔

ہندی بست و بندی اوغدہ دار تا ردئٹ چیک پوسٹ ءِ سلہہ بند آتا کوزہ غان ہلنگ کن سکیورٹی فورسز آتا پین ٹولی رادہ کننگانے۔

فوج ئنا حوالکاری تلہ (آئی ایس پی آر) نا پارہ غان دائسکان وادی تیراہ ٹی گمانی سیم آن ایپار افغانستان آن سلہہ بند آتا جلہو تا بابت ہچو بیان اس شینک متنے۔

ولے ضلع خیبر نا سول پولیس و ایلو ادارہ تا نیام ئٹ حوالکاری تیٹی دا تدینی نا پک کننگانے۔

یاتی مرے پاکستان نا لشکر و سکیورٹی ادارہ غاک گمانی افغانستان ئٹ ساڑی کالعدم تحریک طالبان پاکستان (ٹی ٹی پی) ءِ پاکستان ئٹ دہشت گردی نا ذمہ وار پارہ۔

سکیورٹی ادارہ تا دا خیال مسنے کہ ٹی ٹی پی نا جنگجوک سیم ئنا ایپار آن پاکستان آ بریسہ کارروائی کیرہ۔ اندا خاطران طالبان حکومت دافتا برخلاف کارروائی کے۔

واہم افغانستان ئٹ طالبان حکومت پاکستان نا دا دوبہ تے رد کریسہ دہشت گردی ءِ پاکستان نا تہہ ئنا معاملہ اس گوندک۔

ہندی کوالخواہ تا ردئٹ استو تیراہ نا جتا چیک پوسٹ آتیا تھانہ تیراہ 27 بریگیڈ نا انڈر کمانڈ 231 ونگ آدم زنگئی پوسٹ و تھانہ تیراہ غا سلہہ بند بندغ آک بھلا و چنکا سلہہ تیٹ جلہو کریر۔

دا جلہو تا سوب سکیورٹی فورسز آتا شش کارندہ ہند آ مرگ ئنا گواچی و دوانزدہ ٹپی مسر۔

کوالخواک دا جلہو آتیان پد ہشت کارندہ تا بیگواہ مننگ نا ہم حوال تسنو۔

ہندی سول بست و بندی اوغدہ دار آتا پاننگ ءِ کہ ٹپی آتیٹ اسہ افسر اس ہم اوار ءِ۔

کوالخواک پدان اسہ پین کارندہ ئسے نا مرگ ئنا گواچی مننگ نا حوال تسر ہراڑان پد سلہہ بند آتا جلہو تیٹ مرگ ئنا گواچی مروک کارندہ نا کچ ہفت مسنے۔

کوالخواہ تا پاننگ ءِ کہ سلہہ بند بندغ آتا جلہو تیٹ پولیس کارندہ تے ہچ وڑ نا مالی و جانی نسخان رسینگتنے۔

وادی تیراہ ئٹ سکیورٹی فورسز آتیا گمانی سیم آن ایپار افغانستان آن سلہہ بند بندغ آک دا جلہو ءِ اسہ اندنو وخت ئسے آ کریر ہراڑے علاقہ نا کوکی خیل قبیلہ نا پارہ غان سکیورٹی و بست و بندی ویل آتا بابت جمرود ئٹ تولوک برانز مننگ ءِ۔

خیبر پختونخواہ پولیس نا ردئٹ برجاء سال ہفت توہ ئنا وخت ئٹ مروک جلہو تیٹ 563 بندغ مرگ ئنا گواچی مسنو۔

انسداد دہشت گردی پولیس (سی ٹی ڈی) نا ردئٹ جلہو تا تدینی تیٹ 76 پولیس کارندہ مرگ ئنا گواچی و 113 ٹپی مسنو۔

پاکستان انسٹی ٹیوٹ فار کانفلکٹ اینڈ سکیورٹی اسٹڈیز نا خدو نا اسہ رپورٹ ئسے نا ردئٹ پاکستان ئٹ 2013 آن پد کل آتیان زیات خودکش جلہوک 2023 ئٹ ریکارڈ کننگار۔

رپورٹ نا ردئٹ 2022 نا کچ آ 2023 ئٹ خودکش جلہو تا کچ ئٹ 93 درسد ودکی مس۔ دا جلہو تا سوب مرگ آتا کچ ئٹ 226 درسد ودکی مس۔

دا تدینیک اندنو وخت ئسے آ مسنو ہراتم جون ئٹ حکومت دہشت گرد آتا برخلاف ’عزمِ استحکام آپریشن‘ نا پن ئٹ فوجی کارروائی بناء کننگ نا پڑو کریسس۔ ولے دا آپریشن نا ہندی تلہ غا مخالفت کننگاسس اندن صوبہ نا جتا ضلع تیٹ دانا برخلاف جلسہ و ریلیک ہم مسنو۔

‏‌‎بلوچ راجی آجوئی سنگر (براس) نا ترجمان بلوچ خان تینا بیان اس شنگ کرسا پارینے کہ بلوچ الس ءِ حوال ایتنہ کہ 14 اگست آ پاکستان نا پن ئنا جشن آزادی نا مجلس آتے ٹک کرون۔ ننے یخین ءِ کہ بلوچ راج ہنوکا وخت آن بار کوزہ گیر نا تقریب آتان بے چکار مرو۔ بلوچ سرزمین آ دا مجلس آک پاکستانی کوزہ نا پیدواری ءُ۔

براس نا ترجمان نا پاننگ ءِ کہ چین کوزہ مروک بلوچستان نا مڈی نا لُٹ پُل ئٹی کوزہ گیر ریاست پاکستان تون اوار ءِ۔ نن توسیع پسند قوت آتیا پاش کینہ کہ کوزہ مروک بلوچستان نا اسہ انچ زمین آ ہم کس ءِ کوزہ کننگ کن الپرون۔ اگہ چین کوزہ مروک بلوچستان ئٹی پاکستانی کوزہ و استحصال ئٹی اوڑدئی آن پد متو تو بلوچ سرمچار آک کوزہ گیر ریاست پاکستان و اوڑتون اوار انگا تے عبرتی ءُ سبخ ایتو۔ بلوچ سرمچار آک گوادر آ کوزہ نا پاکستان و چین ئنا عزم و ڈٹ آتے سمندر ٹی نیست کننگ نا تیوہ لائخی تخک۔

او پاریر کہ چینی نمائندہ غاک بلوچ قوم ءِ پن ئنا چین پاکستان اقتصادی راہداری (سی پیک) نا اہمیت ءِ پُہہ مننگ نا پاننگ ءُ ولے او تینٹ دا ہیت ءِ چرجوئی ئٹ نظرانداز کننگ ءُ کہ گوادر تون اوار تیوہ بلوچستان اسہ کوزہ مروک ڈیہہ ئسے۔ گوادر ئٹی برجاء پراجیکٹ آک شونداری کن افس بلکہ استحصالی پراجیکٹ ءُ ہرافتا سرسہبی آن کوزہ مروک بلوچستان ئٹی آبادی نا کچ بدل مرو و بلوچ راج تینا ڈیہہ ئٹ اقلیت ئس جوڑ مرو و تینا راجی ٹیوار، تینا ڈیہہ و وسائل آ اختیار ءِ گو ءُ۔

ترجمان ودیک پارے کہ چین بلوچ وسائل نا لُٹ و پل ئٹی پاکستان تون اواری و اونا کمک ءِ بند کے تو اوڑتون بلوچ راج ئنا ہچو دشمنی ئس اف۔ چین دا ہیت ءِ جوانیکا پُہہ مرے کہ بلوچ تینا ڈیہہ نا خواجئی ءَ ہچو بدر راج ئسے تفرو و ہچو دنو تاغت ئسے نا برخلاف سخت مزاحمت کرو ہرا کوزہ گیر تون اوار مس یا براہ راست استحصال نا بشخ مس۔

ترجمان پارے کہ چین آن بیدس ایلو ڈیہک ہم بلوچستان ئٹی سرمایہ کاری آن پد سلیر، بلوچستان ئٹی سرمایہ کاری ہمو وخت منکن مننگ کرو ہرا وخت بلوچ راج تینا آجو آ ڈیہہ ئنا خواجہ تینٹ مرو و ڈنی سرمایہ کاری نا نوعیت تون اوار ”بلوچ راجی سالمیت” نا فیصلہ نا مختار مرو۔

براس نا ترجمان پارے کہ بلوچ راج ئنا خواجئی و اختیار ءِ پُھلیسہ ہرا ڈٹ بندیک مرور او بلوچ راج ئنا مفاد آتا برخلاف مرو، اندن جہانی اصول آتیان چپ ہم مرو۔ ماحولیاتی بدلی نا دا دور ئٹ دا ڈٹ آتا ماحولیات آ ہم منفی زہم تمک ہرا بلوچستان ئٹی بھس کاری نا سوب مریرہ۔ اندا سوب آن بناء دے آن براس دا ڈٹ آتا برخلاف سخت مزاحمت کننگ ءِ۔

ترجمان بلوچ خان پارے کہ براس نا کُل سرمچار آتی پنت تننگک کہ کوزہ گیر پاکستانی ریاست نا تقریب آتون اوار گوادر ئٹی استحصالی ڈٹ و استعماری عزم آتے بے سہب کننگ کن اوفتیا جلہو کیر۔ دا ڈغار بلوچ راج ئنا ءِ و دانا آزادی و رکھ کن بلوچ سرمچار آک سر بکف ءُ۔