بلوچستان نا دریابی شار گوادر ئٹی پدی زر نا ہند آ بلوچ یکجہتی کمیٹی نا برانز برجاء ءِ، استو حکومتی وفد تولوک برانز جاہ آ مزاکرات کن بس۔

دا وختا بلوچ یکجہتی کمیٹی نا راہشون رہنما ڈاکٹر ماہ رنگ بلوچ حکومت تون مروک مذاکرات نا بابت ئٹ مخلوق ئے چاہنداری تس و مزاکرات نا خواست آتے مونا تخا۔

خواست آتا رد ئٹ بلوچ راجی مچی ٹی اوار مروکا تا برخلاف گوادر تون اوار تیوہ بلوچستان ئٹی تاغت کارمرز کننگ بند مرے۔

اندن تیوہ بلوچستان ئٹی راجی مچی نا دزگیر مروکا بندغ آتے دمدستی یلہ کننگ مرے و بلوچستان نا کُل کسر تے دمدستی ملنگ مرے۔

داکان بیدس گوادر نا مخلوق نا اُرا تیا چھاپہ خلنگ و اوفتے بیم تننگ نا لڑ ایسر کننگ مرے۔

ڈاکٹر ماہ رنگ پارے کہ مذاکرات نا وختا اگہ گوادر تون اوار تیوہ بلوچستان نا اسہ کم علاقہ ئسیٹی بلوچ راجی مچی ٹی اوار مروکا تے فریشان کننگا یا تاغت کارمرز کننگا تو نن مزاکرات ءِ ایسر کرسا تولوک برانز کرون۔

نن تو خنانُن

سُم ئنا ٹہپ ء
جون ئنا کہپ ء

دتر نا گند ءِ
خیسون ء رنگ ءِ

سنگت نا لاش ءِ
ایلم ءِ گم انگا

ڈہروکا ارا ءِ
ویران ءَ خلق ءِ

پیرنگا باوہ ءِ
لمہ نا خڑینک ءِ

ایڑتا وداری ءِ
بے شون ء کچاری ء

ننتو خنانن

مگہ نی سہوسک ؟
دا بدل ء تِروسک ؟

مگہ سگ ارینے
مگہ ارفینُس لاش

مگہ تسونس کوپہ سنگت ءِ تینا
مگہ لاد ئٹی دتر چُر ءَ ایلم ءِ ڈڑفینُس

مگہ لڑزوکا جوڑ تے خنانس کماش نا
مگہ لمہ نا پراد آتے بنگونس

مگہ سردرآ زنڈوکا ءَ ایڑ ء ہرناس
اونا پیہونا پُیہہ غاتے خنانس

اگہ آخہ گڑا انتکن کھڈ خُتیسہ
انتے تینا زند ءِ د وڑ کُنیسہ
انتے وہوکا سمندر ٹی دہڑیسہ
انتے خاخر نا تیِرونک ہتیسہ

سعد زہری

تدوکا دے تیٹ گوادر ئٹ برجاء تولوک برانز نا وختا دزگیر مروک بلوچ یکجہتی کمیٹی نا سروک ڈاکٹر صبیحہ آن گڈ سمی و صبغت اللہ ہم آجو مسنو۔

تومکا سروک آتے تدوکا دے تیٹ ڈاکٹر صبیحہ بلوچ تون اوار دزگیر کننگاسس ہراکان گڈ او بیگواہ اسر۔

واہم گوادر برانز آن دزگیر کننگوک 200 آن زیات برانزی تے دزگیر کننگاسس و دزگیری آن گاد اوفتا بارو ئٹ ہچو معلومداری رسینگتنے۔

ڈاکٹر صبیحہ اینو تینا اسہ پریس کانفرنس ئسیٹی پارینے کہ شار ئٹ کرفیو و حال حوالی بست و بند نا بند مننگ نا سوب آن اوفتے تینا باسک و برانزی تا بارو ئٹ ہچو معلومداری اف کہ دیر دزگیر مسنو، دیر بیگواہ ءِ، و دیر روپوش مسنے۔

غزہ نا سلہہ بند گل حماس نا سیاسی کڑدہ نا سروک اسماعیل ہنیہ ءِ ایران نا بنجاہی شار تہران ئٹ کسفنگانے ہرادے حماس و پاسدارانِ انقلاب ہم پک کرینے۔

حوال تروک ادارہ ’رائٹرز‘ نا رپورٹ نا ردئٹ حماس اسماعیل ہنیہ نا کہنگ ءِ پک کریسہ اینو بیان ئٹ پارے کہ تہران ئٹ اسماعیل ہنیہ نا جاگہ غا جلہو کننگا۔

حماس دوبہ خلکنے کہ دا جلہو ءِ صیہونیک کرینو ہراٹی او کسکنے۔

وائس آف امریکہ نا ’فارسی‘ سروس نا ردئٹ حماس ایران ئٹ تینا سیاسی کڑدہ نا سروک نا کسفنگ نا دوبہ ءِ اسرائیل آ خلکنے۔ ولے دا دعویٰ کن سلہہ بند گل ہچو شاہدی اس تتنے۔

وی او اے فارسی نا ردئٹ حماس نا اسہ سینئر باسک موسیٰ ابو مرزوق پارینے کہ اسماعیل ہنیہ نا کسفنگ اسہ لغور ءُ کاریم ئسے۔ اونا مرک مفت ہنپرو۔

حماس نا ترجمان سامی ابو زہری حوال تروک ادارہ ’رائٹرز‘ تون ہیت کریسہ پارے کہ اسماعیل ہنیہ نا اسرائیل نا دو آن مرک حماس نا ارادہ تے پرغنگ نا کوشست ئسے۔

سامی ابو زہری پارے کہ حماس تینا کسر آ روان مرو انتئے ننے سر سہبی نا باور ءِ۔

سعودی عرب نا حوال تروک ادارہ ’الحدث‘ نا ردئٹ اسماعیل ہنیہ ءِ ننکان دو بجہ غا ٹک کننگا۔

رپورٹ ئٹ حوالکار تا حوالہ تریسہ دعویٰ کننگانے کہ اودے ٹک کننگ کن میزائل کاریم ئٹ ہتنگا۔

رپورٹ نا ردئٹ اسماعیل ہنیہ تون تُد اونا محافظ وسیم ابو شعبان ساڑی ئس۔ میزائل جلہو اونا خاچوک جاگہ ءِ ٹک کننگا۔

ایران نا حوال تروک ادارہ ’پریس ٹی وی‘ نا اسہ رپورٹ اسیٹی پاننگا کہ حماس نا راہشون اسماعیل ہنیہ ایران نا پوسکن گچین مروک صدر مسعود پزشکیان نا سوغند ارفوک مجلس ئٹ اوار مننگ کن تہران ئٹ ساڑی ئس۔

اسماعیل ہنیہ ایران نا سرکاری مہمان ئس ہرادے حکومت مجلس کن بَٹنگاسس۔

مسعود پزشکیان نا سوغند ارفوک مجلس ئٹ 70 آن زیات ڈیہہ تا نمائندہ تیتون اوار ایران و دے کہی ڈیہہ تیٹ جوہری توانائی آ گپ و تران نا یورپی یونین نا کمک کار ہم اوار مسوسس۔ داکان بیدس تاجکستان نا صدر امام علی رحمٰن و فلسطینی سلہہ بند ٹولی حماس نا راہشون اسماعیل ہنیہ و اسلامی جہاد نا زیاد النخلیج اوار ئس۔

رپورٹ آتا ردئٹ ایرانی پاسدارانِ انقلاب اینو اسماعیل ہنیہ نا مرک ءِ پک کریسہ پارے کہ تہران ئٹ ہراتم اوڑا جلہو کننگا تو اوڑتون اوار اونا محافظ ہم ساڑی ئس ہرا دا کارروائی ئٹ خلنگانے۔

پاسدارانِ انقلاب بیان ئٹ جلہو نا حالیت یا پین ہچ وڑ نا حوال تتنے۔ پاسدارنِ انقلاب نا پاننگ ءِ کہ دا جلہو نا پٹ و پول مننگ ءِ۔

بیان ئٹ دعویٰ کننگانے کہ جلہو نا پٹ و پول نا شابیتی حوال آک اینو شینک کننگور۔

امریکہ نا حوال تروک ادارہ ’سی این این‘ نا ردئٹ وائٹ ہاؤس نا اسہ ترجمان اس پارینے کہ اسماعیل ہنیہ نا مرک ئنا بابت رپورٹ آتیان آگاہ اُن۔ البتہ دا بابت پین ہچ تبصرہ کننگتو۔

’سی این این‘ رپورٹ ئٹ ودیک پارے کہ اسرائیل نا لشکر اسماعیل ہنیہ نا مرک ئنا بابت رپورٹ آتیا تبصرہ کننگ آن نمن کریسہ پارے کہ او پیشن ملکی میڈیا نا رپورٹ آتیا تبصرہ کپک۔

اسماعیل ہنیہ ہر وخت تینا بیان تیٹ پاریکہ کہ ”ننا بندغ آک سلہہ بِٹپرور۔ تینا حق آتا رکھ ءِ کریسہ کرور۔“

اسُل کم ءُ سمندر نا چُلکاک
وطن بھاز ءُ، اسُل بھاز ءُ نا ڈکّھاک

زراب ءِ جوزہ ءِ سینہ ٹی خاخر
ہُشوکا آہڑی ایکان لُکّاک

کرینُر مست گمراہ دشمن ئے پین
ننا خن شیفا ایلم تا سُرکّاک

کنینہ سُم مخیسہ کاٹم ئٹ دا
ننے توپسّہ او نا دِھکہ مُکّاک

سبخس دشمن ئے دا محسن اِیتن
بفسّہ ہچ مدد کِن داسہ چکّاک

محسن فگار

بلوچ یکجہتی کمیٹی دا پک کرینے کہ درو آن بیگواہ کننگوک بی وائی سی سروک ڈاکٹر صبیحہ بلوچ ءِ قانود نافذ کروکا ادارہ غاک سخت السی برانز آن گڈ یلہ کرینو۔

ودیک حوال تا رد ئٹ ڈاکٹر صبیحہ بلوچ ءِ اِرا دے بیگواہ کننگ آن گڈ قانود نافذ کروکا اداعہ آک اینو یلہ کرینو، واہم بی وائی سی سروک سمی دین بلوچ و صبغت اللہ شاہ جی بیگواہ ءُ۔

بلوچ یکجہتی کمیٹی نا رد ئٹ دا وختا گوادر آن کم آن کم تنظیم نا اِرا سد باسک و تیوہ بلوچستان آن اسہ ہزار آن زیات باسک آک فورسز آتا دو آن دزگیر و بیگواہ کننگانو۔ ہرافتے بیست و چار ساعت گدرینگ آن پد ہم ہچو عدالت ئسیٹی ہتنگ متنے۔

ایمنسٹی انٹرنیشنل نا جاندمی ایشیاء ریجن نا گوادر تون اوار تیوہ بلوچستان ئٹ برجاء ریاستی لشکر نا جلسہ ٹی اوار مننگ کن ہنوکا تیا بےدادی و کریک ڈاون نا مذمت۔

ایمنسٹی انٹرنیشنل بلوچستان ئٹ برجاء برانز آتے پاکستانی لشکر نا کنڈ آن بےدادی ئٹ توننگ نا کوشست آتیا فریشانی نا درشانی کرینے، ایمنسٹی انٹرنیشنل نا رد ئٹ ہراڑے کم آن کم مُسہ بندغ بیران و کیہیک دزگیر کننگانو۔

ایمنسٹی انٹرنیشنل نا کنڈ آن شنگ مروک رپورٹ ئٹی ادارہ نا پاننگ ءِ کہ گوادر جلسہ، ہرادے ‘بلوچ راجی مچی’ نا پن ئٹ چاننگک، اونا مسخت شاری، سیاسی و معاشی، و علاقہ ٹی زوراکی نا بےگواہی و بیدس عدالت خون ئنا ویل ءِ پاش کننگ اس ہرادے سخت ریاستی کریک ڈاون تون مون تروئی تما۔

ایمنسٹی انٹرنیشنل نا جاندمی ایشیا نا ڈپٹی ریجنل ڈائریکٹر بابو رام پنت ودیک پارے کہ” ہراتم ہم بلوچستان ئٹی برانز مریک، اوفتا خواست آتے سیکورٹی فورسز آک بےدادی و بھلو کچ ئسیٹی دزگیری تیٹ تورِرہ، نن اندن تدوکا سال دسمبر ئٹی بلوچ آتا اسلام آباد نا کنڈ آ لانگ مارچ ئٹی ہم خنان۔”

اونا پاننگ اس کہ “نن دا ریاستی بےدادی ءِ اسہ وار پدا بلوچ راجی مچی نا برانزی تتون خنننگ اُن ہرا پاش پاکستانی کوالخواہ تا کنڈ آن پرایمن برانزی تے توننگ و پرایمن برانز کننگ آن توننگ کن اسہ ڈوہداری کوشست اسے۔“

ایمنسٹی انٹرنیشنل دزگیر کننگوک برانزی تے دمدستی یلہ کننگ نا خواست کرینے، ہرافتیٹی جلسہ نا سروک سمی دین بلوچ، صبغت اللہ شاہ جی، و ڈاکٹر صبیحہ بلوچ اوار ءُ، ہرا درو آن بیگواہ ءُ۔

بندغی حق آتا تنظیم گوادر ئٹ شاری تا ہن و بر آ رکھ خلنگ و حال حوالی نظام آ رکھ آ ہم نغد کاری کرسا پارے کہ شار ئٹی کسر تیا ہڑاند و تیوہ بلوچستان ئٹی انٹرنیٹ و موبائل نیٹ ورک آتا بند کننگ، و بنداوی حق آتا لتاڑ ءِ۔

28 جولائی 2024 آ بناء مروکا بلوچ راجی مچی علاقہ نا ویل آتا کنڈ آ پام ترفے، برانز آن مُست، 27 جولائی آ، سیکورٹی فورسز آن برانز ئٹی اوار مننگ کن گوادر آ سفر کروکا کاروان تیا سم کاری کرے ہرا نا سوب آن کم ئس کم 14 بندغ ٹپی مس۔

تدوکا چار دے آن تیوہ بلوچستان ئٹی حالت آک خراب ءُ، حکومت کوئٹہ ٹی دفعہ 144 نا رد ئٹ السی مُچی تیا رکھ خلکنے و شار آن ریڈ زون ئنا کنڈ آ کسر تے بند کرینے۔

ایمنسٹی انٹرنیشنل پاکستانی حکومت و بست و بند آ زور تس کہ بلوچستان ئٹی پرایمن بلوچ برانزی تا برخلاف برجاء تاغت نا کارمرز ءِ بند کرسا اوفتے پرایمن برانز نا حق ایتے۔

گوادر جلسہ ٹی اوار مروکا تیا ریاستی بےدادی آن پد شار ئٹی چک و تاڑ نا حالیت برجاء ءِ۔

گوادر ئٹی ریاستی لشکر نا کریک ڈاؤن آن پد کیہی بندغ آک راجی مُچی نا سروک سمی دین بلوچ، ڈاکٹر صبیحہ بلوچ و بلوچ یکجہتی کمیٹی نا شاہ جی صبغت اللہ تون اوار بیگواہ ءُ، ہرافتا بارو ئٹ دائسکان اوفتا سنگت و خاہوت آتے ہچو حوال رسینگتنے و نئے درو آن اوفتتون حوال مسنے۔

شار ئٹ انٹرنیٹ و موبائل سروس بند مننگ نا سوب آن بیگواہ غا سروک و باسک آتا بابت ئٹ ہچو پک ءُ حوال رسینگتنے و فوجی کریک ڈاون نا وختا سمی دین بلوچ نا ٹپی مننگ نا بے پک ءُ حوال ہم ارے۔

پاکستانی لشکر و پولیس گوادر نا کل کسر تے بند کرینے۔

وزیر داخلہ بلوچستان ضیاء لانگو درو گوادر ئٹی اس، او میڈیا ءِ پارے کہ بی وائی سی جلسہ نا برخلاف کاروائی آن بیست و پنچ ئنا کچ بندغ دزگیر کننگانو۔

بلوچ یکجہتی کمیٹی نا راہشون ماہ رنگ بلوچ ہم گوادر ئٹی ءِ و اوڑتون ہچو حوال مننگ کتنے ولے درو او تینا اسہ ویڈیو کلہو ئسیٹی گوادر ئٹی حکومتی لشکر نا جلسہ ٹی اوار مروکا تیا بےدادی نا بابت ئٹ ہئت کرسا تیوہ بلوچستان ئٹی برانز و ہڑتال نا کال تسس و پاریسس کہ اودے یا بی وائی سی نا ایلو سروک آتے گڑاس مس تو اونا ذمہ وار ریاست پاکستان مرو۔

بلوچ راجی مچی آ حکومتی کریک ڈاؤن نا برخلاف الس ئنا برانز برجاء ءِ و حکومت نا کنڈ آن کسرک چھارمیکو دے ہم بند۔

مستونگ، گڈانی و تلار نا ہند آ بلوچ راجی مچی ٹی اوار مننگ کن ہنوکا تا تولوک برانز برجاء ءِ، ایلو کنڈ آن حکومت نا نیمہ غان ہڑاند آک برجاء ءُ۔

گڈیکو حوال تے اسکان پاکستانی لشکر تولوک برانز آ شیلنگ، سم کاری آن پد بندغ آتے بکتر بند گاڑی تیٹ لتاڑانے واہم برانزیک دوارہ پدی زر ئٹ مُچ مننگ بناء کرینو۔

دے آن نا برانز جاہ آ مون پہ مون سم کاری آن کیہی بندغ آک ٹپی مسنو۔ انڈس اسپتال پاکستانی لشکر نا کنٹرول ئٹی ءِ۔ ہرا نا سوب آن بیران و ٹپی مروکا تا سہی کچ خبر تمتنے۔ ایلو کنڈ آن پدی زر ئٹ کریک ڈاؤن آن پد دوارہ مخلوق مُچ مننگ بناء کرینے۔

اندن بلوچ یکجہتی کمیٹی نا کنڈ آن اینو سریاب روڈ آ بلوچستان یونیورسٹی نا مونا اسہ برانزی ریلی ئس کشنگا ہراٹی بلوچ الس بھلو کچ ئسیٹی اوار مس۔

یکجہتی کمیٹی نا ترجمان پارے کہ دا وختا تیوہ بلوچستان، حب چوکی آن شال و گوادر اسکان بند ءِ، تیوہ گوارر ئٹ کرفیو ءِ۔ ریاست نا نہاری و دہشتگردی آن بیدس بلوچ الس ہر علاقہ ٹی کسر تیا پیشتمنگ ءِ و دا نظام آن تینا خار ئنا درشانی کننگ ءِ۔

او پارے کہ نن بلوچ الس آن خواست کینہ کہ او برانز و ریلی تیٹ زیات آن زیات اوار مریر و ریاست ءِ کلہو ایتر کہ داسا بلوچ راج پین ظلم و زوراکی سگوف۔

راجی مچی آ ریاستی زوراکی

ٹی بی پی اداریہ

پاکستان نا ذمہ وار تاغت آک کیہی وار بلوچ راجی آزادی کن جہد کروکا جہدکار تتون مذاکرات نا دعوت ترسا اوفتے پُرایمن جہد ئنا پنت ایترہ، ولے بلوچستان ئٹی ہرا گل آک پُرایمنی ئٹ جہد آ باور کرسا او سیاسی مزاحمت نا زریعت ئٹ تینا حق کن توار بڑز کننگ ءُ، ریاست تاغت نا زریعت ئٹ اوفتا سیاست ءِ توننگ نا کوشست کننگ ءِ۔

بلوچ راجی مچی آ ریاستی تاغت نا کارمرز نا بابت ئٹ ہرا خلیس نا درشانی مننگ اس، او راست مس و دود ئنا ردئٹ ریاستی ادارہ غاک زوراکی ئٹ بلوچ راجی مچی ءِ توننگ نا کوشست کریر، بلوچستان نا کُل کسر تیا ہڑاند تخِسہ چار دے آن کسر تے بند کننگا، مخلوق آ لٹ کُٹ و سم کاری برجاء ءِ، راجی مچی ٹی اوار مروکا تیا بلوچستان نا جتا ہند آتیا مون پہ مون سم کاری کننگا، ہرا نا سوب آن کیہی بندغ آک ٹپی و کیہیک شہید مسنو۔

بلوچ یکجہتی کمیٹی و ایلو سیاسی جماعت آتا راہشون و کیہی باسک آتے زوراکی ئٹ بیگواہ و دزگیر کننگانے، ہرا دائسکان بندی ءُ، ہرافتا آجوئی کن تیوہ بلوچستان ئٹ برانز برجاء ءِ۔

بلوچستان ئٹ حکومت و پاکستانی لشکر نا ترجمانک دا ویل ءِ ایسر کننگ نا جاگہ غا تاغت کارمرز کننگ ءِ جواز تننگ ءِ، ہرا نا سوب آن حالیت گیشتر چک و تاڑ نا کنڈ آ ہِننگ ءِ و بلوچ یکجہتی کمیٹی نا خواست آتے پورو کرسا حالیت ءِ جوان کننگ نا جاگہ غا اوفتا راہشون تے کھسفنگ نا کوشست مننگ ءِ۔ ہرا نا سوگو ءُ ثبوت ئس ملٹری انٹیلجنس نا اسہ ٹارگٹ کلر ئسے نا الس ئنا دو آن دزگیر مننگ آن گڈ تینا ڈوہ ئنا مننگ ءِ۔

بلوچ یکجہتی کمیٹی نا راہشونک بلوچ راجی حق کن پُرایمن جہد کننگ ءُ، اوفتا کُشت و خون ئنا کوشست بلوچستان ئٹ لگوک خاخر ئٹی تیل شاغنگ نا بریبر ءِ۔ ریاستی ادارہ غا تا سیاسی جماعت آتیا تاغت کارمرز کننگ بلوچستان نا سیاست ءِ تشدد نا کنڈ آ دننگ ءِ و ذمہ وار تاغت آتا دا گھام تیان بلوچستان ئٹ مُست آن خراب حالیت پین خرابی نا کنڈ آ ہِننگ ءُ، ہرا نا ذمہ واری ریاستی ادارہ غا تیاٹے۔

بلوچ راجی مچی نا دروشم ئٹ ہراڑے گوادر ئٹی اسہ دیئی جلسہ ئس مروئی اس، اودے ریاستی ادارہ غاک تینا مون تاغت کارمرز کرسا اسہ تحریک ئس جوڑ کرینو، ہرا تیوہ بلوچستان ئٹی غم و غصہ نا اسہ چھول ئس ودی کرینے، ہرانا مرغنو زہم ئس الم سخت گیر ریاست مخالف جذبہ غا تا دروشم ئٹ خننگ کن رسینگو۔