بلوچستان نا دریابی شار گوادر ئٹ بلوچ راجی مُچی تولوک برانز نا دروشم ئٹ ہفتمیکو دے برجاء ءِ، اندن شار دائسکان فوج ئنا پلویڑ ئٹی ءِ و حوالکاری نظام بند ءِ۔
تولوک برانز کروک آتا پاننگ ءِ کہ راجی مچی نا برخلاف ظالم آ کریک ڈاؤن آن پد ہم پدی زر نا ہند آ تولوک برانز برجاء ءِ۔
اوفتا ودیک پاننگ ءِ کہ اسہ پارہ غا برجاء گپ و تران آن پد ہم، ریاست تیوہ بلوچستان ئٹ پرامن برانز کروک آتا برخلاف کریک ڈاؤن ترند کننگ ءِ، ہرانا سوب آن شار تیٹ شہید مروک و ٹپی مروک آتیٹ ودکی مننگ ءِ۔ دا بیداد آ کاروائیک زنک ایسری نا برخلاف پرامن بلوچ تحریک ءِ ایسر کننگ نا ریاستی ارادہ ءِ پاش کیرہ۔ واہم، اگہ او تکرہ کہ بلوچ مخلوق بنداوی بندغی حق و شرف اکن تینا جنگ ءِ یلہ کرو گڑا او رد ءُ۔ نن دا فاشسٹ ریاست نا بیدادی و تادی کروک چم آتا مونا ہچبر شیف مفرون۔
ایڑے نوشکے ٹی درو بلوچ یکجہتی کمیٹی نا گوادر راجی مچی تون ہمکوپئی کننگ کن بندغ آتا بھلو کچ اس ریلی کشار، ہراڑا پاکستانی لشکر سم کاری کرے۔
سم کاری آن اسہ ورنا حمدان شہید اندن مُسٹ بھاز ٹپی مسر۔ سم کاری آن پد نوشکے ٹی حالیت آک خراب مسر و انٹرنیٹ بند کننگا۔
ننکان نا حوال تا ردئٹ برانز آ سم کاری نا برخلاف برانزی تا راجی کسر این 40 اسٹیشن قلم چوک آ تولوک برانز برجاء مس این 40 آ ہن و بر بند مس، گاڑی تا مرغن قطار آک لگار۔ اندن شار ئٹ ہڑتال نا سوب پوریائی مرکز آک بند ءُ۔
درو کراچی ٹی بلوچ یکجہتی کمیٹی نا سروکی ٹی گوادر ئٹ بلوچ یکجہتی کمیٹی نا ”بلوچ راجی مُچی“ آ پولیس نا بیدادی، دزگیری و قافلہ تیا بیدادی نا برخلاف کراچی ٹی ریلی کشنگاسس۔ ریلی ٹی اوار مروک آک آرٹس کونسل کراچی آن پریس کلب اسکان مارچ کننگ نا تیاری کننگ ئسر کہ پولیس جلہو کریسہ اوفتیا لٹ و کٹ کرے۔
واہم دزگیری تیان پد ہم برانز کروک آتا بھلو کچ اس آرٹس کونسل نا خڑک آ تولوک برانز کریر۔
کراچی ٹی پولیس گردی نا برخلاف بلوچ یکجہتی کمیٹی نا ترجمان نا پارہ غان شینک مروک بیان ئٹ ترجمان خُلیس نا درشانی کریسہ پارے کہ پرامن برانز کننگ ہر شاری نا حق ءِ و دا حق ءِ آئین ایتک۔ افسوز ءِ کہ آئین نا پاسداری تینٹ حکومت کننگ اف مخلوق ءِ جمہوری حق آن نئے بیرہ پدماندہ کننگ ءِ بلکن ترند بیدادی ئٹ غٹ دود و اقدار آتے لتاڑنگ ئٹ اختہ ءِ۔
اسہ بیان اسیٹ او پارینے کہ برانزی ریلی ئٹ زالبول، چنا و کماش آک ہم اوار ئسر اوفتے کسر تیا گِرار و ترند بیدادی نا گواچی کریر، ظلم و نا انصافی نا بڑزی ءِ دوئی کریسہ زالبول و ورنا تے دزگیر ہم کننگا۔ بیرہ پِن ئنا جمہوری نظام آمرانہ ڈول نا حکومت ئسے۔ ہرادے ہچ وڑ ئٹ منپنہ۔
بیان ئٹ پاننگا کہ بلوچستان نا ویل سیاسی ءِ و سیاسی ویل آتا ایسری ہیت و گپ ئٹ پیشتمک۔ طاغت ءِ کاریم ئٹ ہتنگ ہنوک وخت ئٹ ہم نسخان نا سوب ئس و اینو ہم۔ او پارے کہ بیگواہ بندغ تا ویل بندغی حق آتیتون گنڈوک ءِ اندا خاطران بیگواہ بندغ آتے آئین نا ردئٹ عدالت آتیٹ ہتنگ مرے و آمرانہ رویہ ایسر کننگہ۔
پوسکنا حوال تا ردئٹ کراچی ٹی بلوچ یکجہتی کمیٹی نا برانز نا وخت آ دزگیر کننگوک زالبول باسک آتے پولیس یلہ کرینے واہم برانز کروک آتا پاننگ ءِ کہ ہراتم اسکان غٹ بندغ آک یلہ کننگتنو ہموتم اسکان اوفتا برانز برجاء مرو۔
بی وائی سی پارینے کہ 18 ورنا دائسکان یلہ کننگتنو و اوفک دائسکان پولیس نا دزگیر ئٹی ءُ۔
