بلوچستان نا ضلع آواران نا علاقہ مشکے ٹی پاکستانی لشکر نا لشکر کشی برجاء ءِ، لشکر کشی ٹی گن شپ ہیلی کاپٹر آک بشخ ہلنگ ءُ۔

حوال تا رد ئٹ مشکے نا علاقہ بزی، مُرماسی، خلخلونک، پچڑ، کاھلو، لہڑو و ایب کیب ئنا علاقہ آک لشکر کشی نا پلویڑ ئٹی ءُ۔

ہندی حوال تا رد ئٹ فوجی ہیلی کاپٹر آتا ہن و بر برجاء ءِ، جتا ہند آتیا سخت شیلنگ برجاء ءِ و پاکستانی لشکر و سلہہ بند بندغ آتا نیام ئٹ جھڑپ آتا حوال ہم ارے۔

علاقہ ٹی لشکر کشی برجاء مننگ نا سوب آن نسخان تا بابت ئٹ ودیک معلومداری رسینگتنے۔

کوالخواہ تا کنڈ آن دا بابت ئٹ داسکان ہچو ہیت متنے۔

درو ضلع کیچ ئنا علاقہ بلیدہ ٹی سلہہ بند جھڑپ آتا حوال اس ہراڑے پاکستان لشکر نا مخ تفی ٹی کاریم کروک سلہہ بند ٹولی (ڈیتھ اسکواڈ) و بلوچ آزادی دوست آتا نیام ئٹ جھڑپ مسس ولے جھڑپ آتیٹ ہچ وڑ ئنا نسخان تا حوال رسینگتنو۔

بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارے کہ سرمچار آک کیچ ئنا علاقہ بلیدہ گلی ٹی پاکستانی لشکر نا قافلہ ءِ آئی ای ڈی جلہو ئٹ ٹک کریر، جلہو نا دک ئٹ برسا اسہ گاڑی اس تیبہ بھس مس ہراٹی سوار کُل کارندہ غاک کھسکر۔

درو تینا شنگ کروک بیان ئٹی او پارے کہ اینو سہب ئنا ہشت بجہ غا زامران ئٹی آپریشن کن ہنوکا پاکستانی لشکر نا چِل گاڑی نا قافلہ ءِ بلیدہ گلی ٹی سرمچار آک ٹک کریر۔ جلہو ئٹ اسہ گاڑی تیبہ بھس مس، ہراٹی اسہ جونیئر فوجی افسر ئسے تون اوار ہشت سپاہی جنید، سپاہی آصف رشید، سپاہی وحید، سپاہی عثمان غنی،سپاہی آصم، سپاہی نادر، سپاہی رحیم مرگ ئنا گواچی مسر۔

او پارے کہ بلوچستان لبریشن فرنٹ نا سرمچار آک عسکری و انٹلیجنس بنداو آ پاکستانی لشکر ءِ بلوچستان نا ہر علاقہ ٹی ٹک کرسا جانی و مالی نسخان تننگ ءُ ہرا نا سوب آن بلوچستان ئٹی پاکستانی لشکر تینا مورال و ہوش ءِ گوآنے۔ اندا بدحواسی ٹی سرمچار آتا خلیس آن لس مخلوق آ چھاپہ، زوراکی نا بیگواہی و ایلو ڈوہ تے کننگ ءِ و تینا تموکا مورال ءِ بڑز کننگ نا بےسوب کوشست کننگ ءِ۔

ترجمان پارے کہ بی ایل ایف دا پاش پائک کہ بلوچستان ئٹی برجاء جنگ بلوچ الس ئنا جنگ ءِ و دا جنگ ئٹی بی ایل ایف بلوچ الس ئنا کمک و تعاون ئٹ مونا ہِننگ ءِ و بروکا وخت ئٹ پاکستانی لشکر و اونا مخ تفی کروکا تیا سختی ئٹ جلہو کرو۔

ایسر ئٹ او پارے کہ بلوچستان لبریشن فرنٹ دا جلہو نا ذمہ واری ءِ ارفک و پاش پائک کہ آزاد و خوشحال بلوچستان نا دوئی مننگ اسکان پاکستانی مفاد آتے بلوچستان ئٹی ٹک کننگو۔

تربت ئٹی زوراکی ئٹ بیگواہ کننگوک بندغ آتا خاہوت آتا برانزی کیمپ ءِ ہفت دے مس، خاہوت آک بین برانز بناء کریر ہراڑان اسہ زالبول ئسے نا تب خراب مس۔

ضلع کیچ ئنا جتا علاقہ آتیان تعلقداری تخوک بیگواہ غا بندغ آتا خاہوت آتا برانزی کیمپ ءِ ہفت دے مس، خاہوت آتا کیمپ ضلعی انتظامیہ کیچ ئنا دفتر نا مونا برجاء ءِ، ہراڑان ضلعی انتظامیہ نا دفتر تون اوار کمشنر مکران، محکمہ خزانہ و ضلع چیرمین کیچ ئنا دفتر ہم تدوکا اسہ ہفتہ ئسے آن بند ءِ۔

خاہوت آک کیمپ ءِ اسہ ہفتہ ئس پورو مننگ آن پد بین برانز بناء کریر، خاہوت آتا پاننگ ءِ کہ ننا بندغ آتے آجو کننگ متو تو نن بیوس مرسا برانز نا غٹ آپشن تیا عمل کرون۔

بیگواہ غا بندغ آتا خاہوت آتا کیمپ ئٹی بلیدہ آن بیگواہ جان محمد نا لمّہ بی بی شراتون نا تب خراب مس و او تُسینگا ہراڑے اودے جانجوڑی کمک تننگا۔

کیمپ ئٹی چُنا نیاڑی تا بھلو کچ ئس اوار ءِ ہرا ضلع کیچ ئنا جتا علاقہ آتیان تعلقداری تخرہ۔

کیمپ ئٹی بی ایس او پجار ،حق دو تحریک و ایلو سیاسی و چاگڑدی گل آتا سروک آک اوار مرسا اواری نا درشانی کریر۔

پاکستان نا قطب دے کہی صوبہ خیبر پختونخوا ٹی مروکا شدت پسندی نا دا زوت ئنا تدینی تیان گڈ کیہی قبائلی ضلع آتیٹی ”امن پاسون‘‘ یعنی امن مارچ نا سرحال ئٹ اسہ پوسکنو سیاسی و برانزی کاریم تا بناء ئس مسنے۔

اندا رد ئٹ بنوں ٹی اینو انجمن تاجران، مذہبی و چاگڑدی گل آتا کنڈ آن اسہ ‘امن مارچ‘ ئس اڈ تننگا، ہراٹی ہزار آ بندغ آک اوار مسر۔

بنوں نا شش تحصیل آن ریلی کشنگا، ہراٹی اوار مروکا بنوں شار ئنا بنجائی چوک آ مُچ مسر و دا برانزیک دو تیٹ پیہُنو بیرک ہرفیسر۔

خن ئٹ خنوک شاہدی و کوالخواہ تا پاننگ ءِ کہ جمعہ نا مُچی ہمو وخت پر تشدد مس، ہرا وخت گمانی وڑ ئٹ برانز کروکا اسہ فوجی ماڑی ئسے نا دیوال تے سر مسر و سم کاری بناء مس۔

چوک آ جاگہ کم مس تو برانز کروکا تے بنوں اسپورٹس کمپلیکس ئٹ رادہ کننگ نا فیصلہ کننگا۔ اوکان برانز کروکا بنوں کینٹ ئنا کنڈ آ راہی مسر۔ اندا وخت سم کاری نا تدینی مس و مخلوق دانگ اینگ مس۔‘‘

صوبائی وزیر جانجوڑی پختون یار نا رد ئٹ دا برانز آتا سوب آن اسہ بندغ ئس کھسک۔ او تینا بیان ئٹی پاکستانی لشکر آ سم کاری نا دوبہ ءِ خلک۔

پختون یار اے ایف پی ءِ پارے، ’’ریلی نا وختا کنے آ و کنا خڑک آ سلوک بندغ آتیا مون پہ مون سم کاری کننگا۔ دا بیرہ تہو ٹی سم کاری الو بلکہ دا نا مسخت ننے کھسفنگ اس۔‘‘

کیچ و پشین ئٹ ایف سی و سی ٹی ڈی ءِ نا درست بند بندغ آک اِرا جتاء ریمورٹ کنٹرول بمب جلہو آتیٹ ٹِک کریر۔

حوال آتا رد ئٹ بلوچستان نا ضلع کیچ ئٹ نا درست بند بندغ آک پاکستانی لشکر نا گاڑی ءِ ریمورٹ کنٹرول بمب جلہو ئٹ ٹک کریر۔

جلہو ضلع کیچ ئنا علاقہ بلیدہ ٹی گِلی کننگا

حوال تا رد ئٹ قافلہ ئٹ ساڑی اسہ ویگو گاڑی ئس جلہو نا دک ئٹ بس۔ ہراڑان گاڑی ءِ نسخان نا مون تروئی تمانے وختس کہ اوٹی سوار کارندہ اسٹ نا کہنگ و شش ئنا ٹپی مننگ نا ھوال ءِ۔

ایلو پارہ غان بلوچستان نا علاقہ پشین ئٹ کاؤنٹر ٹیررزم ڈیپارٹمنٹ (سی ٹی ڈی) نا گاڑی آ مروکا بمب جلہو ئٹ کارندہ غاتیتون اوار شش بندغ نا ٹپی مننگ نا احوال ءِ۔

حوال آتا رد ئٹ پشین زلزلہ ہوٹل نا خڑک آ سی ٹی ڈی نا گاڑی ءِ ریموٹ کنٹرول تراک ئٹ ٹِک کننگا۔

پولیس نا پاننگے کہ مسہ کارندہ تون اوار شش بندغ ٹپی مسنو۔ ٹپی آتے جان جوڑی کن سول ہسپتال پشین آ سر کننگانے۔

پولیس نا رد ئٹ ایس ایچ او سی ٹی ڈی چوہدری اصغر رکھوک ءِ۔

تراک آن گڈ پولیس و ایف سی علاقہ ءِ گھیڑ ئٹ ہلسہ پٹ و پول ءِ بناء کرینے۔

افسانہ: باہوتر

نوشت: حسن ناصر

دی بلوچستان پوسٹ

مشن انا دامان اٹ چشمہ غاتا وہوک آ دیر تا نیام اٹ کنا مہر اتون پند اس…… است وہوک آ مہر گل و بالی نا وہیر اٹ وہاکہ…… شادری نا جمر اٹ مش بوک ئس۔ گون نا درخت آک خشنگ لُڈنگ ئسر۔ پدین آ چرک درخت نا شمب آتا نیام آن خلسا بانسری نا توار ءِ تالان کننگ ئس۔ چانجل نا چنگ اٹ امن ایمنی خوشی گل و بالی نا شئیر تے ساز کریسس۔ کنا ڈیہہ انا ہر باتی ہر خاہوت آسراتی نا خمب اٹ تینے تینا بالاد آن بڑز چلتن نا مشن انا ٹول آ تکاکہ۔ مہر آک تینا مراد آ چاپ خلکرہ۔ اینو ہانی شے مرید آتا نیام اٹ ہچ ءُ چاکر اس اَلو۔ ہڑدوسر دوپدو مش انا تلار تیا جُپ خلسا تینا مہر انا زباد تون دولخی ئسر۔ کست و کاڑ پاہو ہلکوسس۔ اسٹی، اواری و سخاوت، مہر آتا چلکارہ ئس۔ مہر ببکائی خلککہ۔ خرمہری نا گمان ہم گدر مسوسس۔ آسمان تینا خرنی ءِ ڈغار آ تالان کریسس۔ خزم و آہوک خل تیا خوشی آن جپ خلسا ترڈارہ…… خرما و خزم آک اسہ کمب آن اوڑدہ دیر آن کننگ ئسر۔ بئے بوچ آک اسہ ایلو تون بشخندہ…… دے انا دشتار دے اتون مون پہ مون تینا مون ءِ ہڑسنگ ئس…… گواڑخ آک تینا چوکی آ ناز کریرہ۔ ہر رنگ انا گواڑخ آک ہفت رنگ کشیدہ غانبار تالان تینا زیبا غا ندارہ تون خن تے پدین کریرہ۔ بلبل و جرکی تا ہنین آ توار…… گڈک آتا سٹنگ…… شانتل نا توار اٹ سلیمانی ساز و زیمل تہو اٹ تالان دا بئے بوچ جر آتا زباد تیوی تہو اٹ تالان ئس…… تہو اٹی گڑاک تینا آسراتی تون دا جنت اٹ ساڑی ئسر۔ ہرا کہ شداد نا جنت ءِ ہم شکی کریسر۔ ہندن پا کہ بہشت نا ٹکر اس ڈغار آ دڑاسس۔ نی پا انت اَلو دا جنت اٹ؟ بندغ نا ازل اسے آن ہلیس تابہ اینو اسکان اونا انت آسراتی آسودہی اس ارے ہر خواہش داڑے ساڑی ئس۔

اسہ وار اتون اسہ ٹِک ٹِک انا توار اس کنے کنا دوٹی ہلسا دا پرچس آ تغ آن کشنگ ئس…… ساہت اسے آن گڈ ای تینا خن تے موشکسا خن تے ملنگ نا کوشست اٹ…… داسہ تارہ غا کوٹھو اٹ دیوال آ درنجوک گھڑی نا سیلہ نا ٹک ٹک نا توار کنا مزغ انا تار تے ٹی اسہ چُپ ءُ لڑزہ اس شاغا۔ خن تے مچے پین پٹاٹ کہ دا تغ اس مف گواچنی مرے…… ولے گھڑی نا ٹک ٹک نا توار کنے تینا پارہ غا چکسا کنا گمان ءِ پک کننگ ئس۔ ہندا گمان تون کنا جون آن اسہ پدین ءُ خید اس یلہ مس۔ کلئی سیٹ تینا جون ءِ دوتے ڈغار اٹی ترسا بڑز کریٹ توسٹ۔ داسہ وخت انا کوٹھو اٹ…… ہر پارہ غا ٹک…… ٹک…… نا پاریشت نا گمان مسکہ…… داسہ تہاری نا ہر کنڈ آ وخت انا سرسر ئس…… اف…… دا عجب مس۔ داسہ دن کہ آدم ءِ جنت آن خولم کشا۔ ہندن کنا زیبا غا تغ انا بلہ غاتے دا وخت انا ٹک ٹک نا توار ہرفے۔

ای دا تغ ءِ تینا سوچ آتا خڑجین اٹ شاغنگ نا کوشست اٹ کہ دا تغ اٹ سلو۔ ہندا تغ اٹ ساہ ہلیو، مدام ہنداٹی تینا وخت ءِ تیر کیو۔ ولے وخت انا ٹک ٹک نا توار گوالئی آ سیلہ غانبار کنا سوچ آتا خڑجین ءِ ٹنگ کرسا ئس۔ ہراڑان دا تغ پش پش مرسا ڈیر مس۔ کنا ہروہ ژند و بند ئس۔ داسہ نن مچ دا وخت اتون کنا رٹنگ و جنگ برجا ئس۔ وار اس اوڑا خن تے خیسن کریٹہ۔ وار اس بے وسی آن اونا نت دو تیا تماٹہ۔ اودے منت زاری کریٹہ کہ کنے آن کنا تغ ءِ پلپہ۔ کنے ہمو تغ ءِ پدی ایت۔ کنے ہموٹی زندہ مروئی ءِ…… ولے گھڑی نا ٹک ٹک نا توار کنے آ ملنڈ کریکہ۔ کنے آ ڈری خلسا جوڑ تے جُبی کریکہ۔ ……اُف اے تغ…… داسہ ہر نن زیٹ آ خن تتون ہمو تغ ءِ پٹاٹہ خن تے تر کرسا ہمو تغ اٹ ہننگ نا بے سہب آ کوشست ئس۔ ولے گھڑی نا ٹک ٹک نا توار سم آنبار لگسا کنا ہروہ ءِ کپ کننگ ئس۔

گھڑی نا سیل تے کشاٹ جگ جگ کریٹ بٹیٹ کہ نوا تنگان کاو کہ ہمو تغ اٹ زند ءِ ایسر کیو۔ ولے گھڑی نا سیلہ جک سلوک ئس…… اُف…… اُف…… دا توار ٹک ٹک…… نا توار ہرا پاسو آن بننگ ءِ…… دا توار کنا ملی ٹی چٹ ہندی مسوسس۔ ای گھڑی ءِ شیف تخسا جوان لغت تسٹ۔ ٹکر ٹکر کریٹ چغل تسٹ۔ ولے دا توار کنے چٹ پت آن کشا۔

دا ٹک ٹک نا توار کنا شادری آ تغ و وخت انا نیام اٹ اسہ بھلو جنگ اس برجا ئس۔ دا وخت انتئے کنا زیبا غا تغ ءِ پلا…… ای نن مچ ہندا اومیت گڑتی تون انتظاری کہ کنا خنک لگر و ای تینا ہمو تغ اٹ ولدا کاو ہرانا سیاگ آن کنے تاغت بریک۔ خن تے تر کیوہ گھڑی نا ٹک ٹک خن تے ملوہ گھڑی نا ٹک ٹک نا توار کنے جمب ترسا کنے خاچنگ کن الیپک…… ہندن لگک کہ دا وخت کنا ماتنہ ءِ…… کنے آن ہشنگک، کنے آ جشک۔

ای چندی دے تا ءِ تغ اکن آہری…… نن مچ شوگیر خلسا تینا تغ اکن سکوہ…… ولے وخت انا توار کنا تغ تے کنا تاغت ءِ سِجلہ کرے اِلا۔

پارہ وخت ءِ توار اف…… ولے…… دا ٹک ٹک…… ہر پارہ غان ٹک ٹک…… ٹک…… ٹک…… ای دا توار آن ہنداخہ بیزار کہ زند آن تماسٹ…… حیران ہبکہ کہ امر دا توار تیان آجو مریو…… تین تون دا فیصلہ کریٹ کہ تینے کشوئی ءِ…… داسہ خف تیٹی ہور تے ترسا…… ولدا ہم ٹک ٹک نا توار…… ہور تے ہنداخہ در زور تسٹ کہ کہ کنا ہورک کنا خف تا پڑدہ ءِ ارّسا دتر چر کریر…… ای بے ہوشی نا کنڈ آ بے خود…… اسہ وار ولدا ای ہمو زیبا غا تغ اٹ گام ءِ تخاسٹ…… کہ بخت مون ءِ ہڑسا…… آسمان نا پارہ غان اسہ خیسن ءُ بھلو بلا اس اژدیار آنبار با غان زراب کشسا کنا ڈغار نا کنڈ آ بننگ ئس…… او اسہ زراب اسے تون تیوی ڈغار نا زیبائی ءِ پتک تس…… کنا جون آ کنا پچ آک ہم سجلہ ہلکسر۔ او تینا با ءِ خٹ کرسا ترندی اٹ ڈغار نا پارہ…… ڈغار کن با بٹنگ ئس……تہو اٹی ڈغار ءِ باخو اس کننگ ئس۔ ای ہم ہندا ڈغار تون اونا باٹی ہننگ ئسٹ۔ اسہ اوندائی اس کنے پلویڑ کرے۔ کنے ہندن گمان مس کہ داسہ نن اونا باٹی…… کنا چرکاو آک کنا گٹ اٹ بارسر…… داسہ تو ای گھڑی ءِ ہم ٹکر ٹکر کریسٹ کہ اونا توار کنے دا غضب نا با غان کشے۔ اسہ وار اتون ہترم کرسا بش مسٹ۔ کنا سیک کنے آن بھاز مُر ہناسس……

داسہ ای چندی دے تا ءِ ہندا بھیم خلیس آن ہم خاچپرہ نوا ہمو تغ ولدا برے۔ داسہ کنا زیبا غا تغ آ ’بدروح‘ آ تغ تینا گد ءِ تالان کریسس۔ داسہ تو ہندا کوشست اٹ کہ تنگان ہنپرہ نوا ہمو بلا کنے کیدے۔ داسہ چارما کنڈ تینا کوٹھو نا دیوال آتیا گھڑی درنجانٹ۔ ہر پارہ غان ٹک ٹک۔ وخت انا توار…… ای ہندا بد انگا تغ ءِ مڑنگ نا جت پت اٹ…… وخت و تغ انا نیام اٹ بے وس باہوتر سلوک…… داسہ اومیت و اڑکا غا کنا گڈیکو دم ٹنگوک ءِ۔

بلوچستان نا علاقہ خضدار ئٹ پاکستانی لشکر اُرا تیا جلہو کریسہ اوفتیٹ ساڑی نرینہ آتیتون اوار زالبول و چنا تیا بیدادی کریسہ اوفتے ٹپی کرے۔ تدینی نا برخلاف ہندی بندغ آک تولوک برانز کریسہ کسر ءِ بند کریر۔

حوال تا ردئٹ سہب سہار تون خضدار، گریشہ نا علاقہ کوچہ یونین کونسل گونی ٹی پاکستانی لشکر سی ٹی ڈی اُرا تیا جلہو کریسہ سلیم جان نا مار شاہ جان، خیر جان نا مار گوہر دین، لعل بخش نا مار محمد جان، لعل بخش نا مار معیار، عبدالرحمٰن نا مار محمد عارف، صبرو ساجدی نا مار منیر احمد تون اوار زالبول و چنا تے ٹپی کریر۔

حوالکار تا ردئٹ فورسز آتا سم کاری آن ابراہیم نا مار لعل بخش و حمل نا مار صبرو نا اُرا تیٹ ساڑی مُسہ زالبول ٹپی مسنو۔

ہندی بندغ آتا پاننگ ءِ کہ دا وخت آ فورسز کارندہ غاک اُرا تیٹ ساڑی اِرا موٹر سائیکل، اِرا لکھ روپئی و ہشت موبائل تینتون دریر اندن اُرا تیٹ گِڑا تے پِرغار و سولر سسٹم آتے سم کاری کریسہ بیکار کریر۔

تدینی نا برخلاف خاہوت آک بلوچ یکجہتی کمیٹی تون اوار مریسہ گریشہ گری آن بڑو نال کسر ءِ ہن و بر کن بند کریر۔

افغانستان و پاکستان نا جتا علاقہ تیٹ استو زمین جمب نا چنڈیک محسوس کننگانو۔

پاکستانی صوبہ خیبر پختونخواہ نا بنجاہی شار پشاور و اونا ایب کیب ئٹ زمین جمب نا چنڈیک مارنگانو۔ زمین جمب نا ترندی ریکٹر اسکیل آ 5 ریکارڈ کننگانے۔

باجوڑ، دیر بالا، خیبر و سوات ئٹ ہم زمین جمب نا چنڈیک مارنگانو۔

ایڑے افغان میڈیا نا پاننگ ءِ کہ افغانستان نا بنجاہی شار کابل ئٹ ہم زمین جمب نا ترند چنڈیک مارنگانو۔

افغان میڈیا نا ردئٹ زمین جمب ئنا چنڈیک افغانستان نا کیہی شار تیٹ مارنگار واہم نسخان تا بابت معلومداری رسینگتو۔

زمین جمب پیما مرکز نا ردئٹ زمین جمب نا بنجاہ کوہ ہندوکش ہند ئس اندن اونا کڑمبی 211 کلو میٹر ریکارڈ کننگانے۔

پشین ، دالبندین، مستونگ و خاران جتاء تدینی تیٹ اسہ بندغ ئس مرگ ئنا گواچی اِرا بندغ ٹپی تون اوار اِرا جون خننگا۔

حوال آتا رد ئٹ نا درست آ سلہہ بند بندغ آک بلوچستان نا علاقہ خاران ئٹ سم کاری کرسہ اسہ بندغ ئسے مرگ ئنا گواچی کریر۔

مرگ ئنا گواچی مروکا بندغ نا چاہنداری ظہور نوشروانی نا پن ئٹ مسنے۔

حوالی نا رد ئٹ خاران شار جنگل روڑ زم زم ہوٹل نا خڑک آ ٹہیفوک اونا دکان آ نا درست آ سلہہ بند بندغ آک سم کاری کرسہ ظہور نوشروانی ءِ مرگ ئنا گواچی کننگ آن گڈ نرنگ ئٹ سرسہب مسر۔

تدینی آن گڈ جون ءِ کاروائی کن سیول ہسپتال آ سر کننگا۔

ایلو پارہ غان بلوچستان نا شار مستونگ پڑنگ آباد آن جنگل نا خڑک آن جون ئس خننگا۔

پولیس نا رد ئٹ جون دہ آن پانزدہ دے مست ئنا سے وختس کہ پولیس جون ءِ چاہنداری کن اسپتال آ درے۔

پن کروک آ بندغ نا جیب آن شناختی کارڈ ئس دو بسنے ہراڑے پن محمد قام ولد محمد گل سکنہ پڑنگ اباد نوشتوک ءِ۔

ہندن بلوچستان نا شار پشین نا علاقہ ڈورء سلیمان خیل ئٹ اسہ بندغ ئسے نا سُم تا گواچی مروک جون خننگانے۔

لیویز حوالی نا رد ئٹ کھسفنگوک آ بندغ نا چاہنداری ملا عبدالغفار نا پن ئٹ مسنے۔

جون ءِ کاروائی کن سول ہسپتال پشین آ سر کننگا۔

ایلو پارہ غان بلوچستان نا شار دالبندین نا علاقہ تالو لانڈھی نا ہند آ نا درست آ سلہہ بند بندغ آک سم کاری کرسہ اِرا بندغ ءِ بھاز ٹپی کریر، سم کاری آن گڈ نا درست آ سلہہ بند بندغ آک نرنگ ئٹ سرسہب مسر۔

واہم ٹپی آتے زوت ئس دالبندین سول ہسپتال آ سر کننگا۔ بست و بند مستی تدینی نا پٹ و پول کننگے۔

سی ٹی ڈی نا دروغ ئنا مونتس ئٹ شہید مروک شہزاد بلوچ نا ارٹمیکو سالروچ نا وختا اونا خاہوت نا کنڈ آن ریفرنس ئس اڈ تننگ نا پڑو کننگانے۔

شہزاد بلوچ نا خاہوت نا کنڈ آن شنگ مروک اعلامیہ نا رد ئٹ شہید شہزاد بلوچ نا ارٹمیکو سالروچ نا رد ئٹ اوفتا اُرا ٹی “زیارت نا شہید” آتے دروت ندر کننگ کن ریفرنس ئس اڈ تننگو۔

شہزاد بلوچ نا خاہوت نا رد ئٹ 04 جون 2022 آ موسیٰ کالونی پولی ٹیکنک کالج نا خڑک آن شہزاد دھوار تینا پین اِرا سنگت عتیق بلوچ و احمد بلوچ تون اوار سادہ پُچ بینوک لشکری کارندہ آتا دو آن بیگواہی نا گواچی مسس، پدان 15 جولائی 2022 آ شہید شہزاد بلوچ ءِ پین نُہہ بیگواہ ءُ بندغ تون اوار دروغ ئنا مونتس ئٹ زیارت نا خڑک آ شہید کننگاسس۔

اونا خاہوت ودیک پارے کہ شہزاد بلوچ کون آ ہزار آ ورناک داسکان ریاستی اذیت خانہ غا تیٹی بےدادی سگنگ ءُ و ہر بروکا دے ریاست نا کنڈ آن بیگواہ غا بندغ آتے دروغ ئنا مونتس آتیٹ شہید کننگک و نن دا نا سخت انگا لوز آتیٹ مذمت ءِ کینہ۔

شہزاد نا خاہوت تینا بیان ئٹی پارے کہ اگہ حکومت 27 جون 2024 آ کوئٹہ آن زوراکی ئٹ بیگواہ کننگوک ظہیر احمد ءِ پانزدہ دے ئٹی آجو کتو تو نن ظہیر احمد نا خاہوت تون اوار مونا برسا اوفتون اوار مرون۔

ایسر ئٹ او پاریر کہ درو خضدار ئٹ بیگواہ غا بندغ آتا خاہوت آن سعدیہ بلوچ و سائرہ بلوچ نا فورسز آتا کنڈ آن دزگیری نا سخت لوز آتیٹ مذمت ءِ کینہ۔ ریاست نا دا جابرانہ روشت نا برخلاف خضدار نا الس ئنا برانز کرسا کسر ءِ بند کننگ ستا کڑزیک۔