بلوچستان نا دریابی علاقہ گوادر ئٹی پولیس کارندہ ئس خودکشی کرینے۔
خودکشی کروکا پولیس کارندہ نا چاہنداری پنجگور نا ہندی خلیل نا مار حمل نا پن ئٹ مسنے۔
حوال تروکا تا رد ئٹ اونا ڈیوٹی گبد چیک پوسٹ آ اس ہراڑے او خود کشی کرینے۔
جون ءِ جیونی آن گوادر اسپتال آ کاروائی کن رادہ کننگانے۔ واہم خودکشی نا سوب داسکان سما تمتنے۔
بلوچستان نا ضلع کیچ ئٹی نادرست آ بندغ آک سم کاری کرسا اسہ بندغ ئسے کھسفیر۔
کہوکا بندغ نا چاہنداری عثمان نا مار میران نا پن ئٹ مسنے۔
سم کاری نا تدینی ضلع کیچ ئنا علاقہ تمپ کوہاڑ نا ہند آ مسنے۔
لیویز نا رد ئٹ جلہو کار آک موٹر سائیکل آ سوار اسر ہرا تدینی آن پد نرار، و جون ءِ لیویز دوئی مرسا اسپتال آ درے۔
وا ہم تدینی نا سوب داسکان سما تمتنے۔
لمئی بولی تا جہانی دے نا ردئٹ فینکس اکیڈمی قلات ٹی ہر سال آن بار اینخو ولدا 21 فروری نا دے اسہ گچینو مچی اس اڈ تننگا۔ دا مچی ٹی بولی، لمئی بولی و اونا اہمیت نا ردئٹ تران تون اوار ساڑی مروک خوانندہ و مہمانک براہوئی شاعری، متل، وسائت و چاچا ہم پاریر۔
مجلس نا مہماندار نوشتہ کار قیوم بلوچ ئس ہندن ایلو تران کروک آتیٹی فینکس اکیڈمی قلات نا ڈائریکٹر یوسف عجب، براہوئی زبان نا ورنا غا شاعر و استاد ابراہیم بلوچ، عامر بلوچ، و صادق بلوچ تران کریر۔ ہندن دا مچی ٹی ساڑی نیاڑی مہمان و خوانندہ آک ہم براہوئی زبان ٹی تران کننگ تون اوار اوار چاچا و بوگ شوگ شاعری ہم بنفیر۔
مچی ٹی ساڑی آ بندغ آتون تران کریسہ اکیڈمی نا ڈائریکٹر و براہوئی زبان نا شاعر و نوشتہ کار یوسف عجب زبان و زبان نا علم نا باروئٹ ہیت و گپ کرے۔ یوسف عجب تینا تران ٹی لسانیات، تاریخی لسانیات، تقابلی لسانیات، تجزیاتی لسانیات، اطلاقی لسانیات و عام لسانیات نا باروئٹ گونڈو معلومداری اس تس۔
یوسف عجب تران کریسہ پارے کہ زبان تا جہانی دے نا اڈ تننگ ننے دا کلہو ایتک کہ نن تینا زبان تا شونداری کن گام گیج کننگ نا کوشست تون اوار اوار اوفتا رکھ اکن ہر پڑا سوگو ءُ گام ارفن۔
مجلس نا ارٹمیکو مہمان ابراہیم بلوچ تینا تران ٹی پارے کہ بولی نا اہمیت رسم و رواج و راجی دود ربیدہ تون تعلقداری ءِ تینا پین سوگو کیک۔ لمئی بولی خیال و جوزہ تا درشانی کننگ کن بھلو کمک اس کیک۔ او پارے کہ لمئی آ زبان نا رکھ ءِ کننگ اونا خیال ءِ کننگ ہر ہمو بندغ پیر ورنا کماش نیاڑی نرینہ غا الّمی ءِ ہرا دا زبان اٹ گپ و تران کیرہ۔
ابراہیم بلوچ پارے کہ تینا بولی ٹی گپ و تران کننگ و اودے خواننگ، خوانفنگ، و اوٹی نوشت کننگ اٹ بولی نا شونداری ءِ کننگ کینہ۔ اودے اینو نا وخت اٹ Digitalize کننگ کہ اینو نا وخت ئنا سوشل میڈیا غا تینا بولی ٹی ہیت و گپ کننگ اونا شونداری کن بھاز بھلو کمک اس پاش مریک۔
ورنا غا نوشتہ کار عامر بلوچ مچی آن تران کریسہ پارے کہ زبان راج آتا پجار مریک. تیبہ جہان ٹی ہمو قوماک سرسہبی نا نیمہ غا گام کیرہ ہرا تینا جند ئنا بولی ٹی خوانیرہ و نوشتہ کیرہ. ولے افسوز دا کہ ننا نیمہ غا ننا ادارہ غاتیٹی ننا لمئی دوی آن بیدس اردو و انگریزی ٹی تعلیم تننگک ہرا نن کے بھلو وئیل ئسے. او پارے کہ براہوئی زبان نا پن جہان ٹی ہمو زبان تا لڑ ٹی بننگ ءِ ہرا ساڑی آ وخت ٹی کیہی وئیل آتا گواچی اریر۔
بلوچستان نا علاقہ بولان و ایب کیب نا علاقہ تیٹ پاکستانی لشکر بھلو کچ ئسے آ لشکر کشی بناء کرینے، ہیلی کاپٹر آتیٹ جتاء ہند آتیا شینلگ، میزائل و مارٹر گولہ ہم خلیسہ ءُ۔
ٹی بی پی نیوز ڈیسک ءِ رسینگوک حوال تا ردئٹ اینو سہب نا مالو پاکستانی لشکر ہرنائی نا جتاء علاقہ میاں کور، جمبرو و ایب کیب ئٹ لشکر کشی بناء کرینے۔
ہندی حوالکار تا ردئٹ فوج آباتی آ تالان علاقہ تیٹ مارٹر گولہ خلنگ ءِ اندن ہیلی کاپٹر آک آسمان ئٹ خننگانو۔
اندا وخت ئٹ بولان و سبی نا علاقہ سانگان، بزگر، لاکی، لکڑ و ایب کیب ئٹ کیہی ہیلی کاپٹر آتا ہن و بر برجاء ءِ دا وخت آ تراک آتا توار ہم بِننگا۔
خیال ئٹ مرے کہ درو پک کروک حوالکار آک ٹی بی پی ءِ پاریسر کہ بولان و ایب کیب ئٹ پاکستانی لشکر ذوالفقار علی بھٹو نا وخت ئنا آپریشن آنبارو لشکر کشی ئسے نا تیاری کننگ ءِ۔ دا لشکر کشی نا دک ئٹ کوہلو کاہان تون اوار بولان نا مری قبیلہ تیا تالان علاقہ غاک مرور۔
ایلو پارہ غان لشکر کشی نا وخت آ مالو آن زوراکی ئٹ بیگواہ بندغ آتے دروغ نا مونتس ئٹ کسفنگ نا خُلیس ہم پاش مریسہ ءِ۔
خیال ئٹ مرے 29 جنوری آ بلوچ لبریشن آرمی مچھ ئٹ اسہ ترند حالیت نا جلہو آن پد اِرا دے اسکان شار ءِ کوزہ کرے دا وخت ئٹ پاکستانی لشکر بھلو کچ ئسے آ جانی و مالی نسخان تون مون تسوسس۔
بی ایل اے دا جلہو ءِ ’آپریشن درہ بولان‘ نا پن تس۔ گل ئنا ترجمان پارے کہ دا آپریشن ئٹ بی ایل اے نا جند ندر بمبار مجید بریگیڈ، ہر اول دستہ فتح اسکواڈ و اسپیشل ٹیکٹیکل آپریشنز اسکواڈ بشخ ہلکر۔
بلوچ لبریشن آرمی نا جلہو آن پد پاکستانی لشکر مچھ ئنا علاقہ آن پین شش بندغ نا جون تے کوئٹہ غا دریسس واہم پدان پن کروک بندغ تا چاہنداری مالو آن زوراکی ئٹ بیگواہ بندغ تیان مس۔
دا بابت بلوچ یکجہتی کمیٹی نا پریس کانفرنس ئٹ ڈاکٹر ماہ رنگ بلوچ نا پاننگ ئس کہ ریاست سلہہ بند بندغ تا کارروائی تے جواز جوڑ کریسہ بیگواہ بندغ تے کسفیسہ بے بندغی کاریم کننگ ءِ۔ ریاست اسہ دروغ بیانیہ ئسے آ بلوچ زنک ایسری ءِ برجاء تخانے کہ بیگواہ بندغ آک مَش تیٹی ءُ ولے گواچنی داڑان چپ ءِ۔ ہرا بندغ آک سلہہ بند جنگ کننگ ءُ اوفتیکن اسُل بیگواہ بندغ تا خاہوت آک برانز کتنو و نئے کہ اوفتا پِنک بیگواہ بندغ تا لڑ ئٹی اوار ءُ۔
رخصت اف یا اڑے قربان
نوشت: ضیاء مرید
دی بلوچستان پوسٹ
بلوچ راج و بلوچ ڈیہہ نا بھاز گچینو ہرا گپ ءُ، اسٹ رخصت اف اوار اُن سنگت ایلو اڑے قربان ولے دا ہراتم زُبان آ بریرہ اندُن لگک جون نا ٹُکراتے مُچ کروکو کس اس اف۔
تولوک ئسونہ مجلس ٹی بھلو ٹاکو ئسے آن پد سنگت اس پارے رخصت اف اوار اُن۔ ہراتم او دا ہیت ءِ کرے اندن لگا کہ جہان ٹی سور لگا اچ اس سلتو دنیا ٹی، سنگت کنے خمب ٹی خلک او پارے یار مُونجا انتکن مریسہ دا تو امو ہنینا گپ ءِ ہرادے پھلین تینا یار آتون کریسہ بشخندہ کریسہ درتی نا حق ءِ ادا کرے دا تنیا جملہ اس اف دا کنا میراث ءِ، مونجاہی پین ودا دڑد گیشتر مس ہراتم امیر نا زلف آک یات بسر دڑد مُچ وجود آ تالان مس خن تیٹ طوفان اس بس جوزہ باسن مس گڑا ای پاریٹ اڑے قربان۔
اڑے قربان نمکن نما توکل و ایمان آ قربان قربان نما مش آن بڑز انگا حوصلہ تیکن قربان نما پند و خواری تا قربان نما دلبری و دلبر کن، نما دلبر تو ڈیہہ ءِ پدا ڈیہہ نا کچ مہروان دے مروئے او تو دلار تے ام پدا تینا سینہ ٹی جاہ تیک ولے نم بختاور اُرے کہ نم ڈیہہ تون وفا کننگرے۔ سنگت رخصت کریسہ سر الک تینا مزل نا کنڈا۔
جمبر ام شوخ ئس خاخر نا ماس آ تولوک خیال اس بس کہ بر اینو دڑد آتے زراب تیو انداڑ تون زور آن چِرک اس چکا خاخر ءِ کسفے پدا دڑد آک مون اڑسار است ءِ زراب تسر ولے تہو ٹی اسہ بھاز ہنینو خوشبو اس ئسکہ، مسک، نازبو و گواڑخ نا خوشبو آن گچین۔
گڑا ای بھاز سوچنگ آن مش آن ہرفیٹ ”دا امرو خوشبو ئسے“؟
مش پارے ”انتئے نے معلوم اف انت۔“
”او کنے سما اف۔“
گُڑا او پارے ”نے انت سما ءِ دا خوشبو امو شہید آتا ءِ، او نت تا رند آتیان نے سما اف کہ شہید اسو کسپک او اچ فنا مفک، او پدا مش ٹی اوار مریرہ گواڑخ آتا ہتم ٹی بریرہ نمے خوشبو تیرہ، دا خوشبو ضیاء، رشید و وحید جان نا محفل نا ءِ، ہراتم او داکان پند خلیسہ بولان آ ہنار، ولے داڑے اسہ گپ اس ام زلف، ٹک و رخسار نا کتور، گلزمین لمہ ءِ، گلزمین کن سدخہ، گلزمین مہر ءِ، گلزمین وفا ءِ، گلزمین ننا ءِ، ننا جان و ساہ ءِ۔“
مش مون ءِ اڑسا پارے ”نی پاسہ کی نی دڑد خنانس، نی انت دڑد خنانس ہراتم وحید جان نا بشخندہ آک کنا تلار تیٹ پنرہ تو کنا خل خل پراد کیک، جلک خڑینک شولرہ بوچ بوچ مونجا مریک، اندنو چپی اس بریک ہراٹی نہار آتا ام است ترخک۔ نی پاسہ کہ نی وطن نا دڑد آتون دولخی اُس تو پاوہ کہ نی دروغ تڑنگ اُس۔
نی تو دلبر نا خنتا خلوک اُس، نی تو اونا خڑینک آتے ڈغار آ تمنگ کن الیپسہ ولے سمی و سیما نا خڑینک آک روڈ آتے نمب کریر، ضیاء جان نا لمہ ہر در آ خڑینک شولک اوتا خڑینک آک نظر بفسہ، چُناک تینا باوہ تا ودار ٹی زار زار اوغرہ او خڑینک آک نمے نظر بفسہ نم خنی آ کور آک اُرے۔
دڑد انت ئسے ڈیہہ آن ہرف ہرا تینا پھل انگا چنا تے مِش ٹی اوار مننگ آ خنک، دڑد نا کنا امو خل آن ہرف ہراڑا ضیاء جان، وحید جان و رشید جان مجلس کریر، دڑد آن کنے ہرف کہ تینا بھلا جون نا ٹکر آتے ام مُچ کننگ تپرہ۔“
ای چُپ مسوٹ او پدا اُست پُر مس، پاریٹ اڑے قربان مش کنے پارے ”رخصت اف اوار اُن سنگت در ہِن رب نا جولی ٹی اُس، در ہن لمہ نا و مسکین آ ہیڑ تا پراد ءِ، و سوز بن در ہن کنا چُوری لمہ ڈغار نا کڑز ءِ ادا کر، در آزاتی کن پند اس خڷ۔“
اقوامِ متحدہ نا ادارہ یونیسکو نا پاننگ ءِ کہ جہان نا 40 درسد آبادی ءِ تینا لمئی بولی ٹی تعلیم رسینگپک و بھاز آ علاقہ غا تیٹ دا کچ اِرا انداخس ءِ۔
یونیسکو لمئی بولی تا جہانی دے ئنا رد ئٹ کلہو ترسا پارے کہ جہان ئٹ بولی تا ایسری نا سوب آن دود ربیدہ غا تا اسٹ ایلو آن جتا و بھاز مننگ نا زیبائی خطرہ ٹی ءِ۔
جہانی ادارہ نا رد ئٹ دا وختا جہان نا 40 درسد آبادی ءِ تینا لمئی بولی ٹی تعلیم رسینگپک و کیہی علاقہ غا تیٹ دا کچ 90 درسد اسکان ہم سر مسنے۔
جتا پٹ و پول آتیٹ لمئی بولی ٹی تعلیم دوئی کننگ نا سواد پک مسنے۔ اندن دا ہیت آ ہم امنائی مسنے کہ لمئی بولی ٹی تعلیم دوئی کننگ آن چُنا تا تینے آ باور (خود اعتمادی) و تخلیقی ڈول ئٹ سوچنگ نا لائخی و گشاد ہم ودی مریک۔ وا ہم ایلو کنڈ آن ہندی بولیک خطرہ ٹی ءُ۔
اقوامِ متحدہ نا اسہ رپورٹ ئسے نا رد ئٹ جہان نا کم ئس کم ہفت ہزار ہندی بولی تیان ہر اِرا ہفتہ ٹی اسہ بولی ئس ایسر مننگ ءِ۔
چاہندار آتا پاننگ ءِ کہ جہان نا ہچو بولی ئس بیرہ حوالکاری کن اف بلکہ اوٹی ساڑی جتا خیال، تصور و ایلو گڑا تے ہُننگ و پُہہ مننگ نا جتا انداز آک ہم اریر۔
اندا سوب آن ممکن ءِ کہ اسہ ہیت ئسے نا درشانی نا انداز ایلو زبان تیٹ بنداو آن اسل ساڑی ہم مف۔ زبان چاہندار آتا پاننگ ءِ کہ اسہ بولی ئسے نا ایسر مننگ آن بندغ آتا سوچنگ و پُہہ مننگ نا اسہ بھلو وسیلہ ئس ہم ایسر مننگ کیک۔
بھاز آ زبان چاہندار آک بولی تا رکھ کن اوفتا ڈیجیٹائزیشن و اے آئی کون آ ٹولز آتے ہم کاریم ئٹ ہتنگ نا پارہ۔ وا ہم اقوامِ متحدہ نا رد ئٹ جہان نا کم ئس کم ہفت ہزار بولی تیٹ بیرہ اسہ ہزار بولی داسکان ڈیجٹائز مننگ کرینو و ایلو زبان تے ڈیجیٹل جہان ئٹ رکھنگ کن کوشست بکار ءِ۔
بیوسی و امیت
نوشت: سائرہ بلوچ | مٹ: درناز رحیم
دی بلوچستان پوسٹ
کنا ایلم تا زوراکی نا بیگواہی آن پد زند ئنا دیک برانز آتیٹ گدرینگ ءُ، اوفتا آجوئی کن اقتدار نا بنجاہ اسلام آباد نا پریس کلب ئٹی ایلو زوراکی ئٹ بیگواہ کننگوک بندغ آتا خاہوت آتون کیمپ خلنگ نا فیصلہ کننگا و اندا رد ئٹ ای خضدار آن شال آ ہناٹ کہ اوکان اسلام آباد آ ہنوئی اس۔
بلوچستان، ہراڑے سُہب چُک آتا باگل آن بناء مفک بلکہ ماتم ئٹ بناء مریک۔ ہرا زوراکی نا برخلاف اقتدار نا بنجاہ غا برانز کن ہنوئی اس کہ تربت آن چار بیگواہ کننگوک ورنا تا بیدس قانود خون ئنا حوال ننے سر مس، دننگا حوالک ننا جغر ئے تل ایترہ کہ نن دا دڑد آن سرپند اُن و ہڑدے اندا خلیس ئٹ زند گدریفنگ اُن۔
بیست و پنچ نومبر نا ننکان ننے اسلام آ ہنوئی اس و ہمو دے بالاچ نا بیدس عدالت خون ئنا برخلاف کوئٹہ ٹی برانزی ریلی کشوئی اس۔ کیہی زوراکی ئٹ بیگواہ کننگوک بندغ آتا خاہوت آک و سیاسی تپہ آتون اوار نن ریلی کشان تاکہ تینا توار ئے ہموفتے سر کین ہرافتا سینہ ٹی اُست اف و لمّہ غا تا جغر نا ٹکر آتے کھسفنگ و گیاوان آتیٹ خسنگ آن مُست زرس ہم سوچپسہ ولے بلوچستان ئٹی با دُوی ئے بند کننگ نا قانود ءِ، ہرافتے کھسفنگک اوفتیکن برانز نا حق ہم اف۔ ننا کسر آ پتی ءُ تار تالان کننگا ولے مزاحمت آن گڈ ننا ریلی گورنر ماڑی کوئٹہ نا مونا سر مس و نن تینا برانز ئے رکارڈ کرفین۔
اسلام آباد نا سفر ئٹی کنتو اوار زوراکی ئٹ بیگواہ کننگوک سعید احمد نا لمّہ، و جہانزیب نا لمّہ و ایڑ ئنا چُنا ماہ نور اسر و راشد بلوچ نا خاہوت کراچی آن ننتو اوار مننگ کن بنَنگ اس۔
سفر دا شش و پنچ ئٹ گدرینگ اس کہ مگہ دا وار ای تینا ایلم تے آجو کرفنگ کروٹ یا برانز نا مرغنا لڑ اندن گدرینگو۔ بیوسی ئٹ سوچنگ اسٹ کہ کمیشنز و عدالت آتا پیری کرینٹ، گورنر ماڑی نا مونا برانز کرینٹ ولے دروغ انگا قول آتیان بیدس ننا بشخ ئٹ ہچ بتنے۔
گورنر ہاوس نا مونا برانز ئٹ گدرینگوک دڑدی آ پاس، ہرا ملی آ نشخ مسنو۔ پِر تا چرجوئی، شال ئنا پارو تفوکا یخ و بلوچ لمّہ غاک، ہرا دا امیت ئٹ تولوک اسر کہ مقتدرہ تاغت آک اسہ لمّہ ئسے نا فریاد ئے بِننگ آ بیوس مرور و اوفتا چُنا تے آجو کننگ ئٹ اوفتے کمک کرور۔
سیما نا چیہانٹ اینو ہم کنا خف تیٹ پیری کیک، ہمو شام نن چیہانٹ ئسے نا توار آ رُمبِسہ پیشتمان تو سیما روڈ آ پِر ئنا لچغ آتیٹ بے سُد تموک اس و چُنکل آ شارُل اونا دو تیان یلہ مرسا تماسس۔
بیست و ہفت نومبر آ نن اسلام آباد پریس کلب نا مونا تینا کیمپ ئے خلکن، ننا ہمو خواست اس ہرادے کیہی سال آن وار وار آ پاننگ اُن کہ ننا بندغ آتے آجو کننگ مرے۔ اگہ او ڈوہ ئس کرینو تو تینا قانود و ریاستی راہبند آ عمل کیر تاکہ نن اشتماعی ڈکھ آن آجو مرین، ہڑدے نن دڑدی آ خیال آتیٹ گدرینگنہ کہ ننا بندغ آک پاکستان نا عقوبت خانہ غا تیٹ سما اف امرو بےدادی سگنگ ءُ۔
زوراکی نا نظام ئے برجاء تخوکا تے بندغی اف ولے منَہ جوانو بندغ ارے ہرا بندغی نا چراغ ئے رژنا تخانو و ہموفتیان اسٹ حامد میر، اسد علی تور، سینیٹر مشتاق و پی ٹی ایم نا سنگت آک ننے آ کیمپ آ بسر، ننا توار جوڑ مسر و ننتو اواری نا درشانی کریر۔
اسلام آباد ہائی کورٹ ئٹی خوانندہ غا تا کیس ئے بِننگ اسر تو نن ہم تینا مسخت ئے پاننگ کن ہنان، ہراڑے ریاست نا کنڈ آن ہیت کننگ کن سرفرزا بگٹی (ہمو وخت ئنا نگران وزیر داخلہ) ساڑی اس، بگٹی صاحب زوراکی نا بیگواہی تیان نمن کرے، تیبہ جہان بلوچستان ئٹی ریاست نا زوراکی تیان پُہہ ءِ ولے ریاست نا کنڈ آن ہیت کروکا تینا خن تے ملنگ کن تیار افس۔
دا ریاستی نمائندہ غا تے مارشت اف کہ نن اَرا دڑد آن گدرینگ اُن، کنا تاتہ نا مار رشید نا لمّہ اندا دڑد ئتون تینا زند ئنا گڈیکو پاس آتے گدریفے و کلمہ نا جاگہ غا رشید نا پن ئنا ورد ئے کرسا ساندہ نا تُغ ئنا خُمب ئٹ ہنا۔
سرفراز ئے بھازی آن سما مروف کہ تینا ناجوڑ آ لمّہ نا خذمت نا جاگہ غا پاکستان نا بنجائی شار ئنا ایوان آتا در ئے ٹُھکفنگ اُٹ۔
ہائی کورٹ جج ئنا سوج آتیا سرفراز بگٹی چُپ اس، عدالت پاش وڑ ئٹ حکم تس کہ نن ہمو وخت اسکان حکومت نا موقف ئے منینگ کن تیار افن ایسکان کہ دا چُناک و لمّہ غاک تینٹ داڑے برسا پاتنو کہ ننا بندغ آک آجو مسنو و دہ جنوری اسکان اِرا ہزار بیست و چار زوراکی ئٹ بیگواہ کننگوک بندغ آک ( ہرافتا کیس آک عدالت ئٹی ءُ ) آجو متور تو نے آ و وزیراعظم آ ایف آئی آر نا حکم ایتون۔ جج ئنا فیصلہ آن ننا امیت زیات مس کہ بھازی آن عدالت نا حکم آ عمل مرو ولے عدالت آن پیشن سرفراز بگٹی دوارہ ریاست نا کنڈ آن تران کرسا زوراکی نا بیگواہی تا بارو ئٹ ڈھکوک لوز آتیٹ عدالت نا حکم آن مون ئے ہڑسا، دا پرمان بیرہ پرمان ئس سلیس، داڑا ہچو عمل متو، سرفراز و انوار الحق کاکڑ آ ایف آئی آر تو متو ولے ریاست نا کنڈ آن ہیت کننگ آ سرفراز بگٹی ئے بلوچستان اسمبلی نا سیٹ تننگا و بلوچستان حکومت ئٹی بشخ ہم رسینگا۔
نن تینا بھلا تیان بنگوسن کہ اسلام آباد و بلوچ نا سیالی زوراکی آ تفوک ءِ ولے نن امیت کرینہ کہ نوا داسا ننا توار بِننگ مرے ولے دسمبر نا ہمو یخ انگا نن ئٹی ریاست بلوچ آتون تینا روشت ئے تیبہ جہان نا مونا پاش کرے۔
نن کن او اُست ئے لڑزفوکا ندارہ غاک ہرافتے نن تینا تیبہ زند ئٹ گیرام کروفن، ننا خن تا مونا ریاستی پولیس ہشتاد سالی پیر انگا لمّہ آتے، ہرا مالو آن اِرا دہک آن بلوچستان ئٹ زوراکی نا سیخا ٹی زند گدریفنگ اسر، بےدادے نا گواچی کرے۔
ہمو چُنا ہرادے زند ئنا راستکی تا بارو ئٹ سما الو، او ہم ریاست نا بےدادی تیان سرپند مس۔ پولیس ننے آ بےدادی کرسا ننے دگ آتیٹ گِھر کرسا گاڑی تیٹ خسا، او دڑد آن پُھر ءُ وخت اسر ہرا وخت پولیس ننا کاٹم تیان گُد آتے چِکا، ننا ایڑ لمّہ غا تا پُچ آتے ہرّا، او بیم تروکا ندارہ نا بارو ئٹ سوچوہ تو اینو ہم کنے خلیس پلویڑ کیک۔
نن، ہرا تینا زوراکی ئٹ بیگواہ کننگوک ایلم تا آجوئی کن برانز کننگ اسن ولے ننا بیوسی ئے ہُبو کہ ہرا ایلمک ننا برانز ئٹ اوار اسر اوفتے ہم ننا مونا بےدادی نا گواچی کننگا و بے سُدی نا حالیت ئٹی اوفتے دزگیر کننگ کننگا۔
ریاست تینا بنجاہ، جہان و میڈیا نا مونا ننے بےدادی نا گواچی کننگ کیک تو نن گمان کننگ کپنہ کہ ہمو عقوبت خانہ غا تیٹ کیہی سال تیان بندی کروک ننا بندغ آتتون او انت کننگ کیک۔
اِرا تُو ننا برانز جہان نا ضمیر ئے بش کننگ کن برجاء سلیس ولے اسلام آباد پریس کلب نا مونا پِتی آ تار آتا نیام ئٹی او برانز ہم ننا ایلم تا وڑ قید ئٹی اس۔ پِتی آ تارک، پولیس نا چوکیک، کُننگ نا گڑا تیا رکھ و اسلام آباد نا دتر ئے بارفوکا یخ ئٹی بیرُم تے کیمپ ئٹی ہتنگ آ رکھ خلنگا۔ کیمپ ئٹی بندغی نا دڑد ئے اسٹ ئٹ تخوکا تے ہم اوار مننگ آن توننگ نا کوشست کننگا ولے ننا مزاحمت برجاء سلیس و دا چم بازی تے سگِسہ، کیہی دے قید ئٹ گدریفسہ، پولیس نا دڑکو تے سگِسہ نن تحریک ئے سرسہب دروشم ئٹ برجاء تخان۔
بلوچستان ئٹ زوراکی نا نظام اِرا دہک آن برجاء ءِ ولے میڈیا نا چُپی و جہانی ادارہ غا تا مُری نا سوب آن ننے آ مروکا زوراکی تا کسہ غاک کس ئے سر متورہ ولے دا اِرا تُو ئٹی نن جہان ئے بلوچ قوم آ مروکا زوراکی تیان سرپند کننگ ئٹ سرسہب مسن۔
زوراکی نا بیگواہی تا دڑد ئتون سر مہ سر خاہوت آتا، غٹ سختی تے سگنگ آن بیدس ہم بیوسی ایسر متو۔ ہرا دڑد ئے ایسر کننگ کن نن اسلام آباد آ مون کرین او دڑد اینو ہم ہمو وڑ ارے۔ ودار نا مرغنا دڑد ایسر متو۔
بلوچ لمّہ غا تا بے استان ہنوکا جہد دا امیت ئے زندہ تخانے کہ اشتماعی مزاحمت ئٹ نن تینا بندغ آتے ریاست نا عقوبت خانہ غا تیان آجو کننگ ئٹ سرسہب مرون و تینا بندغ آتا زندہ واپسی اسکان ننا مزاحمت برجاء سلو۔
امریکہ نا محکمہ خارجہ پارینے کہ او پاکستان تون اوار تیبہ جہان ئٹ انٹرنیٹ نا آزاتی خواہرہ ہراڑے ہر تلہ غا بندغ آتے اسٹ ایلو تون حوال کننگ ئٹ ہڑاند مف۔
امریکی محکمہ خارجہ نا ترجمان میتھیو ملر پارے کہ، ’’امریکہ پاکستان تون اوار تیبہ جہان ئٹ انٹر نیٹ نا آزاتی خواہک۔ ہراٹی کُل ءِ چاگڑدی تلہ آک دوئی مریر و ہراٹی مخلوق نا اسٹ ایلو تون حوال کننگ ہم اوار ءِ۔”
پاکستان ئٹ ہفتہ نا دے آن چاگڑدی حوالکاری تلہ ‘ایکس’ ئنا شیف تمنگ نا حوالک مونا بسنو۔ ایکس کارمرز کروکا تے ایکس ئنا کارمرز ئٹ ہڑاند مننگ ءِ۔
ولے حکومت نا کنڈ آن داڑا داسکان ہچو تران متنے۔ ‘ایکس’ ئنا بند مننگ آ شاریک و صحافیک اوسوز نا درشانی کننگ ءُ۔
ترجمان میتھیو ملر سئے شمبے نا دے بریفنگ نا وختا پاکستان نا گچین کاری کاریم تیٹ گمانی دھاندلی نا سوج آ ورندی ترسا پارے کہ پاکستان تینا قانود و کاریم تا وڑ و ڈول ئنا رد ئٹ ساف پٹ و پول کے۔
میتھیو ملر پارے کہ، ’’غٹ دوبہ آتا پاکستان نا تینا قانود و وڑ و ڈول ئنا رد ئٹ ساف پٹ و پول کننگ مرے۔ اسہ وار پدا، ای پاکستان نا تہہ ئنا معاملہ غا تیا ہیت کننگ خواہپرہ۔ و ای بارو تخوہ کہ دا پاکستان نا تہہ ئنا معاملہ آک ءُ۔‘‘
بلوچستان نا ضلع آواران و کراچی آن پاکستانی لشکر مُسہ بندغ ءِ دزگیر کننگ آن گڈ بیگواہ کرینے۔
بیگواہ مروکا تا چاہنداری جمعہ نا مار شکر خان، دوست محمد نا مار نصر اللہ و نواز نا مار ممتاز نا پن ئٹ مسنے۔
پن کروک بیگواہ مروکا بندغ آتیان شکر خان ءِ پاکستانی لشکر 9 فروری 2024 آ کراچی آن ہموتم دزگیر کرے ہراتم او متحدہ عرب امارات آن چھٹی آ تینا علاقہ غا بَننگ اس۔
حوال تروکا تا رد ئٹ او متحدہ عرب امارات ئٹ مزوری کیک و کیچ ئنا علاقہ تیجابان سنگ آباد نا ہندی اسے۔
اندن ایلو ہڑتوما ورنا تا بارو ئٹ حوال تروکا تا پاننگ ءِ کہ او تومکا گراڑی گیشکور نا ہندی ءُ ہرافتے تدوکا تُو پاکستانی لشکر آواران ئٹ تینا کیمپ آ خواہفِسہ دزگیر کننگ آن گڈ بیگواہ کرینے۔
اسرائیل نا وزیراعظم بنجمن نیتن یاہو نا جنگی کابینہ نا اسہ باسک ریٹائرڈ جنرل بینی گانٹز یک شمبے نا دے پارے کہ اگہ حماس روچہ نا تُو ئنا بناء مننگ آن مُست غزہ ٹی بندی کروک اسرائیلی تے آجو کتو تو رفح ٹی جنگ برجاء مرو۔
گمان اندن ءِ کہ اوڑے روچہ 10 مارچ آن بناء مرو۔ اسرائیلی لشکر دو شمبے نا دے غزہ نا جاندمی پٹی ٹی آسمانی و ڈغاری کارروائی کرے ہراڑے فلسطینی تا بھلو کچ اس باہوٹ مسس۔
غزہ نا جانجوڑی محکمہ نا کوالخواہک پارینو کہ اکتوبر آن ہلیس کہ دائسکان بیران مروکا فلسطینی تا کچ داسا 29000 آن زیات مسنے۔
اسرائیلی لشکر دو شمبے نا دے پارے کہ او غزہ نا جاندم ئٹ ساڑی غٹ آن بھلا خلق خان یونس ئٹی تینا ہدف تیا جلہو کرینے۔
غزہ و خڑک ئنا آبادی تیان نروک فلسطینی تا بھلو کچ اس مصر ئنا سیمی کسر نا خڑک باہوٹ مسنو۔ اسرائیل نا پاننگ ءِ کہ اوڑے حماس نا جنگول ارے و او اوفتا ایسری اسکان تینا جنگ ءِ برجاء تخون، دا پڑو آن جہانی تلہ غا خلیس ئٹ ودکی مننگ ءِ۔
