کراچی بیچ لگژری ہوٹل ئٹ آکسفورڈ یونیورسٹی پریس نا سروکی ٹی اڈ تروک پانزدہمیکو کراچی لٹریچر فیسٹول ئٹ دی لٹل بک کمپنی حمید لغاری نا کتاب ”عشق ءَ رُلغے گونیں“ ءِ 2023 نا جوان انگا بلوچی شاعری نا کتاب نا داد تننگانے۔
حمید لغاری نا تعلقداری ڈیرہ غازی خان آن ءِ اونا شاعری نا کتاب ”عشق ءَ رُلغے گونیں“ ءِ بلوچی اکیڈمی کوئٹہ شینک کرینے۔
حمید لغاری نا پارہ غان داد ءِ بلوچی اکیڈمی نا نمائندہ و پنی آ ادیب شرف شاد دوئی کرینے۔
چمن سیم آ پاسپورٹ سسٹم جوڑ کننگ نا برخلاف تدوکا چار توہ آن تولوک برانز برجاء ءِ، درے ننکان تولوک برانز نا بندغ آک تینا برانز ءِ شابیت کریسہ چمن آفس نا مونا کنٹینر تخیسہ پاسپورٹ آفس ءِ بند کریسر۔
بست و بند و ایف سی نا پارہ غان ننکان پاسپورٹ آفس نا مونا برانزی کیمپ آ چھاپہ خلنگا و پاسپورٹ آفس نا مونان کنٹینر آک ارفنگار، اندن ایف سی و بست و بند نا پارہ غان صادق اچکزئی تون اوار کیہی بندغ آتے دزگیر ہم کننگانے۔
دانا ردعمل ئٹ ایلو راہشون تا پارہ غان چمن ئٹ شٹرڈاؤن ہڑتال کننگا و چمن کوئٹہ بین الاقوامی کسر آ ہڑاند بش کریسہ کسر ءِ ہن و بر کن بند کننگا۔
برانزیک ڈسٹرکٹ پولیس آفس نا مونا تولوک برانز کریر، ایف سی قلعہ ءِ خل خلکر، اندن برانزی تے یکہ کننگ کن ایف سی کارندہ غاک آنسو گیس نا شیلنگ کریر واہم برانز کروک آک ایف سی قلعہ و ڈی پی او آفس نا مونا بھلو کچ اسیٹ ساڑی ءُ۔
تولوک برانز آن جنرل سیکرٹری و لغڑی اتحاد نا راہشون غوث اللہ اچکزئی میڈیا ءِ پارے کہ تولوک برانز نا ترجمان صادق اچکزئی و ایلو برانزی تا یلہ مننگ اسکان چمن کوئٹہ کسر، ایف سی و ڈی پی او آفس نا مونا برانز برجاء مرو۔
سلمان بلوچ نا زوراکی ئٹ بیگواہی نا قصہ
تحریر: لطیف بلوچ | مٹ و بدل: سعدیہ بلوچ
دی بلوچستان پوسٹ
بلوچستان نا شار خضدار نا اُست ئٹ ساڑی کھٹان نا ہندی سلمان بلوچ ہرادے 13 نومبر 2022 آ شال کوئٹہ آن زوراکی ئٹ بیگواہی نا گواچی کننگا، دا حوال آن اونا اُراٹی اسہ تدینی ئس مس ہرا دا خاہوت نا بنیات آتے سرفے الا۔ انتئے کہ خاہوت نا امیت و تُغک ورنا سلمان تون تفوک اسر۔
سلمان بلوچ، محمد جان نا مار، بیرہ اسہ بندغ ئس الو او تینا خاہوت نا است ئنا توار اس۔ اسہ زیباؤ ورنا اس، تینا پیرنگا باوہ، تینا لمہ نا تغ و تینا ایڑ تا خوئشی تا امیت و سہارہ نا دروشم ئس اسک۔ ہمو تغ ہرادے اونا لمہ مار ئنا کاٹم آ سرسوبی و خوش قسمتی آن زیبا ہُننگ کن جوان اسر، ناگمان آ بور بور مسر، ہراڑان خاہوت نا زند ئٹ اسہ بھلو خلا ئس ودی مس۔
تینا ایڑ تا بھلا ایلم مننگ تون اوار سلمان بیرہ اسہ ایلم ئس آخہ بلکن طاغت نا پلمندہ و تیوہ اُرا کن خوئشی تا روشنائی اس۔ اونا ایڑک اسہ اندنو بروک وخت ئنا تصور ئس کریسر ہراڑے اونا ایلم اوفتا خوئشی ءِ پورَو کننگ و بکار نا وخت راہشونی نا زریعت جوڑ مننگ ئٹ اہم ءُ کڑد ئس سر ترو۔ واہم، قسمت اسہ بے چاؤکو چوٹ ئسے آ سر مس، ایڑتے تینا زیبا غا ایلم نا زوراکی ئٹ بیگواہی نا دڑد سگنگ کن الار۔
پیرنگا باوہ کن، سلمان بیرہ اسہ مار ئس الو بلکن او اسہ باوری ءُ سپورٹ سسٹم ئس اسک، مصیبت نا وخت طاغت نا زریعت اسک۔ سلمان نا ناگمان آ زوراکی ئٹ بیگواہی آن نہ بیرہ خاہوتی ہاٹی بلکن اونا باوہ نا ہڑ دے ئنا زند ئٹ ہم اسہ خلا ئس الانے، ہرا جزباتی و عملی وخت اسکان تینا مار ئنا ساڑی مننگ تون اسک۔
سلمان بلوچ نا زوراکی ئٹ بیگواہی بیرہ اسہ بندغ نا تدینی ئس اف۔ دا اسہ شابیت و راجی لڑ ئسے، دا بھاز آ خاہوت آتیتون مروک فریشانی و مایوسی ءِ پاش کیک ہرا تینا مہروان آتا ڈس ئنا بے یخینی حالیت نا سوب آن فریشان ءُ۔ سما اف سلمان نا گم و گار مننگ نا دڑد و ڈکھ انصاف نا دوئی کننگ و مایوسی خاہوت آ مون ءُ جھمر ئسے نا ڈول پھیری کننگ ءِ۔
سلمان بلوچ نا قصہ زوراکی ئٹ بیگواہی نا لڑ ءِ ایسر کننگ ، بندغی حق آتا وکالت کننگ و زیمی بندغ آتیکن انصاف ءِ یخینی جوڑ کننگ نا زوت بکار ءِ۔ دانا کیس اسہ پاش ءُ یات کرفنگ ئسے کہ ہر بیگواہی نا پد ئٹ اسہ خاہوت ئس پِنک، تغ آک نیم پورو مریرہ، و زند جہان نا خرین آ گواچن آن ارٹ و چار مریک۔
ہمر کہ نن سلمان نا قصہ آ پام ایتن، چاگڑد ہم زوراکی ئٹ بیگواہی تا برخلاف توار ارفے، ننے زوراکی ئٹ بیگواہی تا برخلاف بش مننگ، زیمی مروک خاہوت آتا حق آتا وکالت کننگ و اسہ اندنو جہان ئسے جوڑ کروئی ءِ، ہراڑے ظلم و زوراکی و نا انصافی نا راج چلنگپ، ہراڑے بندغ آزات مرے و امیت نا سیخا ایسر مف۔ اشتعماعی شعور، ننا چاگڑد ٹی انصاف و بندغی حق آتیکن جہد کننگ ءِ برجاء مروئی ءِ ۔
بلوچ لانگ مارچ و اسلام آباد تولوک برانز آن گڈ اسہ فریشان کروک پام ئس مونا بس، ریاست زوراکی ئٹ بیگواہی تیکن برانز آتیٹ اوار مروک بیگواہ غا بندغ تا خاہوت آتا برخلاف ایف آئی آر درج کننگ ءِ۔
خضدار آن بیگواہ کننگوک سلمان بلوچ نا ایڑ سعدیہ بلوچ و آصف و رشید بلوچ نا ایڑ و کزن سائرہ بلوچ و خاہوت نا گیشتر مسڑ تے اِرا جتاء جتاء ایف آئی آر ئٹ نوشت کننگانے۔
دا تدینیک بھاز خلیس بش کروکءُ انتئے کہ زوراکی نا ڈول بیگواہ کننگوک تینا ایلم تا پٹ و پول کروک ڈکھ و اشتعماعی سزا نا گواچی ایڑ ءِ کمک کننگ آن ابید ریاست ایڑ تا برخلاف فرسٹ انفارمیشن رپورٹس ( ایف آئی آر ) درج کننگ ءِ دوست کرینے۔ دا بندغ آتے چپ کرفنگ کن ایف آئی آر تے سلہہ نا ڈول کاریم ئٹ ہترنگ ءُ۔
ہرا ریاست آن تینا بیگواہ غا بندغ آتا بابت ئٹ سوج کننگ نا ہمت کیرہ۔ داڑان نہ بیرہ زوراکی ئٹ بیگواہ مروک بندغ آتا خاہوت آتا توار ءِ شیف خلنگ ءُ بلکن خلیس نا آسمان ہم ودی کننگ ءُ۔
زوراکی ئٹ بیگواہ کننگوک آتیکن تینا مہروان آتا بابت ورندی خواہوک آتے چپ کرفنگ کن ایف آئی آر ءِ دزگیر کننگ ٹی کاریم ئٹ ہترنگ نا بھیم بش کروک پام ءِ زوت ئٹ بند کننگے، دا عمل بنداوی بندغی حق آتا ترند لتاڑ ءِ و بندغی حق آتا تنظیم آتیان مذمت کننگ نا خواست ءِ۔
افسانہ | فیصلہ نا طاغت (ارٹمیکو بشخ)
نوشت: ضیاء دلجان بلوچ | مٹ: گواڑخ
دی بلوچستان پوسٹ
دائسکان بس لک پاس ٹنل آن تدینگتوسس کہ اودے سلوئی تما۔ ڈرائیور کل مسافر تے دڑنگ کن پارے، او بس ئنا مون نا شیشہ غان پیشن ہُرا تو فورس ئنا بھاز آ گاڈی تے خنا، او کل اندنکہ دڑنگ کن بش مسر گڑا فورس ئنا منہ کارندہ بس ئٹ پیہار و کل ءِ تولنگ نا پرمان تسر۔ پدا اسٹ اسٹ آ کل ئنا دروشم تے ہُننگ بناء کریر۔ اسہ کارندہ اس مچے مونی بس و نیامیکو سیٹ آن اسہ ورنا ئسے نا زنچخ ئٹ ہلک اودے بش کرے و اونا پِن و ڈس ءِ ہرفے۔ او ورنا تون اسہ نیاڑی اس و اِرا چنا ئسر۔ اندنکہ او تینا پِن و ڈس ءِ پارے گڑا کارندہ اودے خلنگ و کرینگ تننگ بناء کرے۔ چنا بھیم نا سوب ہوغنگ ءِ بناء کریر و نیاڑی ہم ہوغا۔ او ورنا بلکن اونا اَرغ ئس، او تینا اَرغ ءِ کارندہ غاتیان یلہ کننگ نا کوشست کرے کہ سپاہی اس توفک نا بٹ ئٹ نیاڑی نا کاٹم آ خلک۔ نیاڑی نا کاٹم آن دتر وہنگ بناء مس۔ اول نا سپاہی دائسکان ورنا ءِ مُچ ئٹ خلنگ ئس و اودے کھرینگ تننگ ئس، او پاریسہ ئس بھلو کمانڈر اس کیسہ تینے چرینگسہ دہشت گرد نا مار، نا باوہ ہم بلوچستان ءِ پاکستان آن جتاء کننگ کپک۔ ورنا ءِ خلیسہ دتر چر کریر و بس آن دڑفیر گریسہ تینا گاڑی ٹی تولفیر دریر تہ۔ او نیاڑی و چناک دائسکان ہوغنگ ئسر۔ فورس ئنا ہننگ آن پد نیاڑی گٹو مروک ڈول ئٹ بس ئٹی ساڑی نرینہ مسافر آتے پامدار کریسہ پارے نمے ٹی ہچو بلوچی ننگ اس الو کہ او سپاہیک بسر کنا ارغ ءِ دریر و نم بیرہ ہُرارے۔ کنا ارغ دُز یا داڑیل اس الو بلکن او نما پگہ ءِ جُوان کننگ نا خاطر دژمن نا کھرینگ و لغت آتے سگنگ ئس، ولے نم کل اودے لغت کُننگ آ بیرہ ہُرارے، نیاڑی اوفتے بِنفنگ ئس و کل بندغ آک چپ ئسر۔ اوفتیٹ ذاکر ہم کل آتیانبار کاٹم ءِ شیف کریسہ چپی ئٹ فرش ءِ ہُننگ ئس، او داڑان بیدس ہچ کننگ کتوکہ۔ سفر برجاء ئس منہ پین نیاڑی دا نیاڑی و اونا چنا تے دلاسہ تننگ ئسر۔ ہرا وخت ذاکر نا علاقہ سر مس گڑا او بس آن دڑنگا و اُرا غا ہنا۔
اِرا دے آن پد بس ئٹ مروک تدینی ءِ او گیرام کرے، داسہ او تینا انٹرویو چِٹھی کن ودار کننگ ئس دا وخت ئٹ اونا حال حوال فون آ اونا مُست ئنا سنگت تون مریسہ کریکہ۔ پانزدہ دے آن پد اونا ڈس آ انٹرویو چٹھی ہم سر مس۔ داسہ اِرا دے آن پد اودے پدا کوئٹہ غا ہنوئی ئس ولے او سوچ خلک کہ دا وار او مالو آنبار ہنپرو، او بازار آ ہنا تینکن بوٹ و جیکٹ ہلک، اوفتے ہلنگ آن پد او اسہ ہوٹل اسیٹ چاہ کُننگ کن ہنا، او ہُرا کہ ایلو خڑک ئنا ٹیبل آ چار ورنا تولوک ئسر و بھاز ترندی ئٹ اوفتا نیام ئٹ سیاسی شرہ برجاء ئس، او چاہ کننگ ئس کہ ناگمان آن اونا نظر تما کہ ہوٹل آن پیشن مونی فورسز آتا کیہی گاڈیک بریسہ سلیسر۔ گاڈی تیان فوج ئنا کارندہ غاک دڑنگسہ کریر و ہوٹل ءِ گھیڑ کریر، منہ کارندہ ہوٹل ئٹ پیہار و ہوٹل ئٹ ساڑی کل بندغ آتے پٹنگ بناء کریر۔ اسہ کارندہ اس اودے ہم پَٹا، ہراتم او ہیت کننگ نا کوشست کرے گڑا اسہ فوجی کارندہ اس اودے چپانٹ اس خلک ایلو کارندہ غاک ہمو ورنا تے پٹار و اوفتے خلنگ بناء کریر۔ اوفتے خلنگ و وس ئٹ کننگ کن منہ کارندہ پین مونا بسر۔ او ورنا تے خلیسہ پدان ہمو کرینگ و ہیت آتے بناء کریر کہ نم پاکستان ءِ پِرغنگ خوائرے، اوفتے گاڈی تیٹ شاغسہ راہی مسر۔ او چپانٹ ءِ جَلنگ آن پد اُرا نا پارہ غا راہی مس و مُچا کسر ئٹ اودے سفر نا وخت بس ئٹ مروک تدینی و ہوٹل ئٹ مروک ہیت آک یات بننگ ئسر، اودے اندن گمان مس کہ او چناک اینو ہم ہوغنگ ءُ۔ داسہ علی و اونا سنگت نا ہیت آک اودے بھاز یات بننگ ئسر۔ اودے سماء ہم تمتو کہ او اُرا ءِ امر سر مس۔ مُچا دے اندا اِرا تدینی اونا مِلی ٹی پیری کننگ ئسر۔ ننکان لُمہ پارے مڷ کنا خاچ سہب ئنا نے انٹرویو کن کوئٹہ غا ہنوئی ءِ، ای سہب ئنا بش مروٹ نیکن دعا کروٹ کہ خدا نے انٹرویو ئٹ سر سہب کے و نے نوکری رسینگے۔
اِرغ کننگ آن پد او تینا بسترہ غا لیٹا ولے تُغ اونا خن تیان بھاز مر ہناسس۔ او تینا انٹرویو چٹھی ءِ ہُریسہ ٹک خلنگ ئس کہ او ہرا نوکری کن خوشی ئٹ ٹیسٹ تریسہ بسس داسہ انٹرویو چٹھی ءِ خنیسہ اونا اُست خوائتوکہ کہ او دا نوکری ءِ کے۔ سماء اف ننکان ارا وخت اونا خنک اوار تمار و او تغ ئنا خمب ئٹ ہنا۔ سہب ئنا ہراتم اونا لُمہ اودے بش کرے تو ننکان ہُرے آ خاچنگ نا سوب او زور ئٹ بش مس۔ غسل کننگ آن پد نیرن کرے و ہِننگ کن تیار مس، اونا اُست خوائتوکہ ولے او ٹک خلنگ ئس کہ لُمہ ءِ انت ورندی ایتوٹ کہ ای انٹرویو کن انتئے ہِننگ افٹ۔ او اُست ئنا وے خوائنگ آن پد ہم بیگ ءِ ارفے گڑا لُمہ اودے بھاز نیک دعا کرے۔ اللہ نے سر سہب کے و نی اسہ بھلو افسر اس مریسہ بر۔ اُرا غان پیشتما و رکشہ ئٹ توس، بازار ئٹ دڑنگا بس ئنا راہی مننگ نا ودار کرے۔ منہ ساہت آن پد بس ہم راہی مس، کسر ئٹ ہرا شار و خلق بسکہ تو او فورسز آتا چوکی تے خناکہ، حالانکہ دا چوکیک مالو ہم ساڑی ئسر ولے داکان مالو او تینا اُست ئٹ اوفتا برخلاف داخس خار محسوس کتوکہ۔ اینو ہرا چوکی ءِ خناکہ یا فورس ئنا گاڑی ئسے آ اونا نظر تماکہ گڑا اودے ہمو نیاڑی نا چیہانٹ و چنا تا پوہاڑ و ہمو ورناک یات بسرہ و دافتیتون اوار اودے تینا بے شرفی نا ہمو چپانٹ ہم یات بسکہ۔
کوئٹہ ءِ سر مننگ آن پد او سیدھا علی آ ہنا انتئے کہ اونا انٹرویو مُسہ دے آن پد ئس، ننکان او علی تون مس تو او ہڑتوم آ تدینی تے علی ءِ پارے۔ علی پارے تہ کہ: ”سنگت بلوچستان نا کنڈ کنڈ ئٹ دن انگا سد آ تدینیک ہڑدے مونا بریرہ۔“ ننکان ہُرے اسکان او اندا سرحال آ ہیت کریر و خاچار۔ ارٹمیکو دے علی سوج کرے ”یار نا انٹرویو اراتم ءِ؟“ او پارے ”اِرا دے آن پد۔“ علی ہمو سوج ءِ دوارہ کرے ”نی راستی نا فوج ئٹ بھرتی مننگ خواسہ؟“ او پارے ”ہئو الّم ای فوج ئٹ بھرتی مننگ خواوہ ولے الّمی اف کہ پنجابی نا لشکر ئٹ بھرتی مریو۔“ علی گوڑینگا و اوڑان ہرفے ”گڑا ارا لشکر ئٹ بھرتی مننگ خواسہ؟“ او پارے ”تینا لشکر، بلوچ آتا لشکر بی ایل اے ٹی۔“ او گیشتر پارے کہ ”داڑکن نے کنے آ باور کروئی تمو، کنکن کسر پٹوئی تمو۔ ای انٹرویو تننگ خواپرہ و اُرا غا ہم ہِننگ خواپرہ انتئے کہ اگہ ای اُرا غا ہناٹ گڑا کنے بھاز آ سوج آتیتون مون تروئی تمو۔ یار نی پٹہ و بی ایل اے کیمپ آ ہِننگ ئٹ کنا کمک ءِ کر۔“ او اسہ ڈول ہیت کریسہ ئس۔ علی رازدار ڈول ئٹ پارے ”یار ای کس ءِ تپرہ۔“ او علی ءِ پارے ”انت اس کروئی نے کروئی ءِ ای اُرا غا پدا ہنپروٹ۔“ علی اودے پین ہچ پاتو۔ ارٹمیکو دے اونا انٹرویو ئس ولے او ہنتو او تینا انٹرویو چٹھی ءِ علی نا مونا ہَریسہ پارے ”ای داکان ہموتم اسکان ہنپروٹ ہراتم اسکان نی کنکن بی ایل اے اسکان کسر پٹیتنس۔“ علی بھاز پہہ کرے تہ ”یار ای کس ءِ تپرہ۔“ او پارے ”ای انداڑے نیتون مریسہ ودار کروٹ و ہچو جاگہ ئسے آ ہنوفٹ۔“
اودے علی تون مروک دہ دے تدینگاسس، اُرا غان ہم وار وار آ فون بسکہ و ہر وار اوڑان اندا سوج کننگاکہ کہ انٹرویو امر تسوس و اُرا غا اراتم بریسہ۔ او خاہوت نا ہیت آتے دانگ اینگ کریسہ پاریکہ زو اُرا غا بروٹ۔ یانزدہ میکو دے علی خواننگ آن پد پدا بس تو علی تون اونا سنگت ہم ئس۔ او سنگت تون سلام دعا آن پد تولیسہ ہیت بناء کرے، ہیت ہیت ئٹ اونا سنگت پارے ”یار علی پاریکہ کہ نی انٹرویو تننگ کن ہِنتنس و پاننگس کہ بی ایل اے ٹی اوار مریوہ۔“ او پارے ”ہئو۔“ پدا او دا سرحال آ بھاز ہُرے اسکان ہیت کریر کہ ”سنگت دا سفر بھاز مُرغن ءِ داٹی بھاز سوچ خلنگ آن پد گام تخوئی مریک و زند ئنا داخس بھلا فیصلہ ءِ نی جوزئی مریسہ کننگ کپیسہ، جوزہ آتیتون گڑا بندغ منہ دے سفر کننگ کیک اوٹی برجاء مزاجی متو گڑا او پِنک دم درینگک۔ بندغ ءِ ہچو حالیت اسیٹ کیفیت آتا گواچی مروئی اف۔ ایہن تو بندغ نا احساس ءِ بش کننگ کن اسہ تدینی اس بس ءِ ولے پدا ہم نے ہر پالو آ پام تروئی تمو۔ دا جنگ ئسے داٹی اسہ گام ئسے آ ہر گڑا مننگ کیک، اُراک بھس مریرہ تینا دوستخواک مُر مریرہ و ہمو تُغ تا پننگ نا بھیم مریک ہرافتے نن تینا جہان ئٹ خنوک مرینہ۔ داڑے دوست انگا سنگت آک مُر مریرہ ہرافتے نن تینٹ کوپہ تریسہ بش کینہ و تینا دو تیٹ مِش تیٹ کڈ کینہ اندا غم و بیر ئتون اوار پدان اسہ جنگ ئسے نا بناء ءِ کینہ۔ داڑے پِن، شہرت، دستار، کمانڈری، لیڈری نا غرض و جوفہ آن بیگانہ مریسہ ہر گام آ بے غرض بے بہا خذمت و جہد کروئی تمک۔ دا وخت نی جوزئی اُس و دا کاریم جوش ئٹ آخہ سار ئٹ کروئی مریک۔“
او پارے ”آخہ یار ای جوزئی افٹ ای بھاز ٹک خلکونٹ ای ہرا گام ءِ ارفنگ اُٹ اودے بھاز سوچنگ آن پد ارفنگ اُٹ و اینو کنے جُوان کنا راجی غلامی نا احساس ارے کاش اگہ نن مالو خنانہ تینے گڑا اینو نم ہڑتوم آتے دن باور کرفنگ نا گرج متوکہ۔“ او ہیت کریسہ ئس و اونا خیسن آ خن تیان خڑینک آک وہنگ ئسر، ہرا اونا پوشکن آ کلک آتیان وہیسہ تمارہ۔ او تینے ڈڈ کریسہ پارے ”سنگت انت نن اسہ راج اسہ ڈغار ئسے نا پِڈ آن ودی مریسہ پدان اسہ خاہوت یا ذات اسیٹ بندی مننگ کینہ؟ انت تینا تیان مُر مروک یا تینا خن تیٹ تینا تغ تے پِننگ آ خنوکا اولیکو بلوچ ای اُٹ؟ اگہ اسہ دوستخواہ ئسے نا جتائی کنے ژدغہ ژدغہ کیک گڑا انت اسہ سنگت ئسے نا کنکن دڑد کُننگ کنا زند ئنا مڈی مفک؟ انت اسہ بیوس بندغ ئسے ہرا تینا لُمہ و ایڑ تا خڑینک آتے خنیسہ احساس کرینے دوارہ اودے اندا بیوسی ٹی دڑد کُننگ الورے؟“ دا ہیت آتے بننگ آن پد اونا ہڑتوم آ سنگت آتیتون ہیت سلتو۔ داسہ ہر پارہ غا چپی تالان مسس۔ منہ ساہت آن پد اونا سنگت آک پاریر ”بر بازار آ کان۔“ ولے او تینا سنگت آتے نمن کریسہ پارے ”اینو کنے تنیا الیبو اینو تینے ٹی گم مننگ خواوہ۔ تینا ہنوک وخت ئٹ گم مننگ خواوہ تینا سیالی تے پدان سوگوْ کننگ کن بشخ چانٹ کننگ خواوہ، ای او چِٹ آتے ترندی ئٹ چِکنگ خواوہ ہرا اینو اسکان کنا نت تیٹ زمزیز مریسہ کنا کسر ءِ توریر۔“ ایلوزدے اونا سنگت اودے اسہ پین بندغ ئسے تون اوڑدہی کرفے، او بندغ اودے تینتون اوار کرے و سر ہلک داسہ او بولان نا پارہ غان ہِننگ ئسر۔ اِرا دے آن پد کیمپ ءِ سر مسر، اوڑے پوسکنا بندغ آک، پوسکن جاگہ و پوسکنا سوچ ئس۔ اوڑے سر مننگ تون اودے تینائی نا مارشت مس۔ کم و ود چِل بندغ نا دروشم تے ہُننگ آن پد اودے دیخس ہم دا احساس متو کہ ای بیگانہ بندغ تا نیام ئٹ تولوک اُٹ۔
اینو اودے مُسہ سال مننگ ئس۔ وخت وخت فون آ خاہوت تون حال حوال تہ مسکہ او مُسہ سال ئٹ اسُل شار آ ہم ہنتوسس۔ اندا نیام ئٹ مُر آن بروک کُبین آ توار اودے اونا خیال آتا جہان آن کشا۔ او ہُرا کہ ہمو کبین آ توار پین ترند مریسہ ءِ۔ او پہہ مس کہ دژمن نا جاسوس طیارہ ءِ۔ او مخابرہ ءِ ارفے و تینا سنگت آتے جاسوس طیارہ نا بننگ نا حوال تس۔
زوراکی ئٹ بے گواہ امیر بخش بلوچ نا مسڑ صدف امیر پارینے کہ کنا باوہ ءِ دہ سال مالو 4 اگست 2014 ئٹ کلانچ آن زوراکی ئٹ بے گواہ کننگا۔ اسہ دائی ئس تدینگا، نن اودے ولدا اسل خنتون و نئے کہ اونا باروٹ ننے گڑاس معلومداری فراوان کننگا۔
او پارے کہ ای اسلام آباد تولوک برانز ئٹ ہم بشخ ہلکٹ و اوکان ہم ننے ہورک دو رادہ کننگا۔
او مستی پارے کہ 21 فروری 2024 آ نن تینا باوہ نا رکھوک یلہ مننگ کن بلوچ وائس فار جسٹس تون اوار مریسہ X آ اسہ مہم ئس کرون۔
او پارے کہ ای تیوہ چاگڑدی میڈیا ایکٹوسٹس آتیان خواست کیوہ کہ اوفک ننکان 7 بجہ غان 12 بجہ اسکان دا مہم ئٹ بشخ ہلیر، ننا توار مریر، کنا باوہ نا رکھوک یلہ مننگ کن توار بڑز کیر و ننے دا مرغن آ ودار نا بیدادی آن خلاسی تننگ کن تینا بندغی آ کڑد ءِ سر تیر۔
پسنی آن خڑک کڑمب سمندر ئٹ جزیرہ ہفت تلار نا رہی آ کراچی آن تعلقداری تخوک ٹرالر ٹُبا، 25 مچی ہلوک رکھنگار اندن منہ مچی ہلوک ٹپی مسر۔
حوال تا ردئٹ ٹرالر ئٹ 25 نا کچ مچی ہلوک سوار ئسر ہرافتے ایلو لانچ ئنا بندغ آک رکھار اندن منہ مچی ہلوک ٹپی ہم مسر۔
اندن پاننگک کہ کراچی آن تعلقداری تخوک ٹرالر جیونی نا پارہ غا سفر کننگ ئس کہ تدینی نا گواچی مس۔ اندا ردئٹ محکمہ فشریز بلوچستان حوال ءِ پک کرے و پارے کہ ٹبوکا ٹرالر نا بندغ آتے پین لانچ اسیٹ سوار کریسہ کراچی آ رادہ کننگانے۔
بلوچستان گچین کاری تیان گُڈ
ٹی بی پی سرگپ
بلوچستان گچین کاری تیان گڈ برانزی تحریک آتا پلویڑ ئٹی ءِ۔ بلوچ، پشتون و ہزارہ قوم پرست تپہ غاک گچین کاری تیٹ بھلو کچ ئسیٹی دھاندلی نا برخلاف اوڑدئی تلہ غا برانز کننگ ءُ۔ دیہاڑ چاہوک آک دا ہیت آ امنائی کیرہ کہ بلوچستان ئٹی ایسری وار ساف گچین کاری نوزدہ سد و ہفتاد و یک ئٹی مسس، ہراٹی نیشنل عوامی پارٹی سرسہب مرسا حکومت جوڑ کریسس ولے بیرہ نُہہ تُو آن پد اوفتا حکومت ءِ ایسر کرسا بلوچستان ئٹی فوج کشی کننگا۔
بلوچستان ءِ مقتدر تاغت آک سیاسی تجربہ گاہ جوڑ کرینو و سیاسی تپہ غاک بیرہ پن کن مسونو۔ قوم پرست سیاسی تپہ آک تینا مُچی و برانز تیٹ دا ہیت ءِ منیرہ کہ بلوچستان نا فیصلہ غا تے عملی وڑ ئٹ فوج کننگ ءِ و مذہبی بنیاد پرست، ڈیتھ اسکواڈ، و ڈرگ مافیا ءِ بلوچ قوم ئنا زی آ چٹی کننگانے۔
بلوچستان ئٹی مالو ہم گچین کاری تیٹ بھاز دھاندلی مسنے ولے دا گچین کاری تیٹ اندنا بندغ آتے گچین کننگانے ہرا حلقہ نا الس اوفتے درست ہم کپک و اسہ حلقہ آن جتا امیت وار تے گچین کننگ نا پڑو کننگ مننگ ءِ۔ قوم پرست تپہ غاک برانز کننگ ءُ ولے اوفتا مصلحت پسندانہ پالیسی تا سوب آن الس اوفتا برانز تیان بے چکاری نا درشانی کننگ ءِ۔
بلوچ قوم پرست تپہ غاک قومی حق آتے دوئی مننگ نا جہد و ساحل وسائل نا دفاع نا دعویٰ کرینو ولے الس ئنا بنیادی و معاشی ویل آتے ایسر کننگ ئٹ بے سوب مسنو و زوراکی نا بیگواہی کون آ بھلا ویل آ ہم تران کننگ کن تیار افس، ہرا نا سوب آن بلوچستان ئٹی پاکستان نا پارلیمانی سیاست آن بےچکاری ودنگ ءِ و قوم پرست پارلیمانی تپہ غاک تینا شرف ءِ گوئنگ ءُ۔
افسانہ | فیصلہ نا طاغت (اولیکو بشخ)
نوشت: ضیاء دلجان بلوچ | مٹ: گواڑخ
دی بلوچستان پوسٹ
ننکان چار بجہ غا اودے اسہ سنگت اس تغ آن ٹوہیسہ پارے ”سنگت بشہ نا گھاٹ تننگ نا وخت ءِ۔“ او بھاز سختی ئٹ تینا خن تے ملنگ ئٹ سر سہب مس ولدا تینا توفک، امیل و کَلی ءِ ارفے و تینا سنگر نا پاسوئی راہی مس ہراڑے اونا اسہ پین سنگت اس اوڑان مالو گھاٹ تننگ ئس۔ ننکان بھاز پِر مسس و یخ ئنا ننک ایہن ہم مرغن مریرہ اندا خاطران دائسکان ہم اوندائی ئس۔ اودے ٹارچ ئنا روشنائی آن بیدس سنگر اسکان ہنوئی ئس انتئے کہ تارمئی ٹی ٹارچ ءِ کاریم ئٹ ہتنگ نا مطلب تینا ڈس ءِ تننگ ئس، سنگر مَش ئنا ٹُل آ ئس ہموڑ اسکان سر مریسہ پنچ بجہ مس۔ سنگر آ سر مریسہ تینا سنگت آن گھاٹ نا چارج ءِ ہلک و اودے موکل تس۔ منہ ساہت آن گڈ دے ٹک تس۔ او تینا جون ئٹ بھاز دڑد مارنگ ئس انتئے کہ تدوکا پنچ دے آن او و اونا سنگت آک دژمن نا دتری آپریشن تون مون تننگ ئسر۔ دژمن ہیلی کاپٹر و پوسکن سلہہ تیان سلہہ بند ئس و او بھاز دلیری ئٹ توفک و چنکا سلہہ تیٹ دژمن تون مون تننگ ئسر۔ تدوکا پنچ دے آن دژمن تون جنگ کریرہ و پیشتمارہ، ایلو پارہ غان ولدا اوفک دژمن تون مون پہ مون مسرہ دوارہ او مُخ ءِ تفیسہ جنگ کریرہ و گوریلا حکمت عملی نا ردئٹ پیشتمارہ۔ دژمن مَشی آ علاقہ تے چارمہ کنڈ آن گھیڑ کریسس و تہہ ئنا تیوہ غا کسر تے بند کریسس۔ پنچ دے ئنا جنگ ئٹ او جُوان وڑئٹ نہ گڑاس کنگسر نئے کہ جُوان خاچاسر۔ انتئے کہ او ہشت ہشت بندغ نا ٹولی ٹی ونڈ مسوسر و اوفتے دے ئٹ سفر کروئی تماکہ، دے و نن گھاٹ تروئی تماکہ و دژمن تون مون پہ مون مریسہ جنگ کننگ و تینا سنگت آتے رکھوک کشوئی تماکہ۔ تیوہ غا نن پِر مننگ نا سوب مُد بھاز گچین ئس ولے تدوکا دے تیٹ ہڑتوما پارہ غاتیان سم و دژمن نا مُر خلوک توپ آتا گولہ غاتا سوب ہر کنڈ آ چِرک ئٹ بارود نا گند تالان ئس۔
او دوربین ئٹ چارمہ کنڈ آن علاقہ نا جاچ ءِ ہلک۔ اونا گمان ئس کہ استو نا مروک آ پِر و ترند آ تہوک دژمن ءِ ہم پدی مننگ آ بیوس کرینو۔ او دوربین ئٹ چارمہ کنڈ ئنا جاچ ءِ ہلنگ آن فارغ مس گڑا آسمان نا پارہ غا ہُرا۔ آسمان آ دائسکان ہم مچے مچے جھمر تالان ئس، زیبدار آ مُد ءِ خنیسہ او تینا تدوک وخت ئٹ ہنا۔ اودے یات بننگ ئس کہ ہراتم او اولیکو وار کوئٹہ غا ہننگ ئس او ہم اندا یخ آتا دیک ئسر۔ اودے داخس ہم سما الو کہ کوئٹہ ٹی دا مد ئٹ اخس یخ مریک انتئے کہ او بلوچستان نا اسہ باسن ءُ علاقہ اسیٹ رہینگاکہ۔ او تینا نوکری نا ردئٹ اولیکو وار کوئٹہ غا ہننگ ئس۔ تیوہ غا نن بس ئٹ سفر کننگ آن گڈ ہراتم او کوئٹہ ءِ سر مس گڑا بس آن دڑنگ تون اودے مارشت مس کہ داڑے اخس یخ مریک اودے تینتون جیکٹ اس ہتوئی ئس۔ او بھاز پشیوان ئس، بس ئنا ٹکٹ ءِ ہلنگ وخت آ ٹکٹ تروک آ بس ئنا منشی اودے پاریسس کہ کوئٹہ غا ہننگ اُس او ہم جیکٹ دائے آن بیدس؟ او وخت او منشی نا ہیت آتیا پام تتوسس ولے داسہ اونا کروک آ ہیت آک اودے بھاز یات بننگ ئسر۔ بس آن دڑنگ آن پد، اوڑتون پین ہچو کسر الو، او زو اس کسر آن ہیمون مریسہ مونی آ ہوٹل ئٹ پیہا، ہوٹل ئٹ پیہنگ تون اودے باسنی نا گمان مس انتئے کہ ہوٹل ئٹ ہیٹر چلنگ ئس۔ او تینکن چاہ و پراٹہ نا پرمان تس و ٹیبل نا رہی ئنا کڑسی آ توس، و دانگ ہینگ ہننگ بناء کرے اوڑان بیدس کل بندغ آک تینے یخ آن رکھنگ کن کوٹ و دستانہ بینوک ئسر۔ او دائسکان یخ آن لڑزنگ ئس، نیرن کننگ آن گڈ نیم گھنٹہ اس ہموڑے توس ولے اودے پیشتموئی و ہمو جاگہ نا ڈس ءِ ہرفوئی ئس ہراڑے اونا انٹری ٹیسٹ ئس۔ او اندن کہ ہوٹل آن پیشتما یخ اسہ وار پدا اودے پلویڑ کرے۔ او سختی ئٹ منہ گام ہناسس کہ یخ آن اونا نَک شل مننگ بناء کریر۔ او زو اس دانگ ہینگ ہُرا۔ خڑک ئٹ اسہ پین ہوٹل اس خنا، ہوٹل ئٹ ہننگ آن بیدس اوڑتون پین ہچو کسر الو، او زو ہوٹل ئٹی پیہا و کڑسی آ توس۔ تولنگ آن پد ہم اونا نت و دوک لڑزنگ ئسر۔
ویٹر اونا رہی آ بس اودے خوڑتی ئٹ ہریسہ پارے ”لالا سندھی ئسے اُس؟“ ”آخہ بلوچ ئسے اُٹ انتئے؟“ او لڑزوک توار ئٹ ورندی تس۔ ویٹر پارے ”آخہ ایہن نی نہ کوٹ اس بینانس و نئے کہ جرسی اس، ای سرپد مسوٹ کہ نی سندھی ئسے اُس انتئے کہ سندھ ئٹی دا مد ئٹ ہم باسنی مریک بھازی سندھ ئنا بندغ آک کوئٹہ غا بریسہ اندا ردی ءِ کیرہ، او تکرہ کہ سندھ ئٹ باسنی ءِ گڑا کوئٹہ ئٹی داخس یخ مروف و داڑے بننگ تون نے آنبار لڑزرہ، خیر نیکن انت اس ہتیو؟“ ”اسہ کوپ اس چاہ ئنا۔“ او دوارہ چاہ کُنگ گڑا مچے باسِس، اندنکہ گھڑی آ اونا نظر تما ہشت بجہ مسس، او ہوٹل آن پیشتما و یخ آن لڑزسہ رکشئی آتون ہیت کرے، رکشہ والا مچے بھاز زر خواہا انتئے کہ ہراڑ اسکان اودے ہنوئی ئس اوڑے اسکان داخس کرایہ متوکہ، ولے اودے سما الو کہ ہرا جاگہ غا اودے ہنوئی ءِ او اخس مُر ءِ۔ او رکشہ ٹی توس و رکشہ والا جتا گلی تیٹ ہنیسہ اودے عسکری پارک آن خڑک آئی ایس ایس بی سینٹر نا مونا کسر آ دڑفے۔ رکشہ والا ءِ کرایہ تس و آئی ایس ایس بی سینٹر نا پارہ غا راہی مس۔ بنجاہی در آ او تینا بننگ نا مسخت ءِ پارے و تینا شناختی کارڈ و کال لیٹر ءِ نشان تریسہ پیہا۔
او خنا کہ اوڑان مالو ہم بھاز آ مارک سینٹر آ بسنو۔ چاہ کُنفنگ آن پد اوفتے نمبر تننگا و اسہ بھلو ہال اسیٹی ہننگ کن اوفتے پاننگا۔ اینو سیکنڈ لیفٹیننٹ کن اوفتا انٹری ٹیسٹ ئس۔ ہال ئٹ پیہنگ آن پد او تینا رول نمبر ءِ پٹنگ بناء کرے ہرا اودے زو نظر بس و او ہموڑے توس، تولنگ آن گڈ دانگ ہینگ ہُرا اودے بھازی پنجابی، پشتون و ایلو بولی تیٹ ہیت کروک آک نظر بسر۔ دائسکان او منہ بلوچ خناسس۔ منہ ساہت آن پد اوفتے کوئسچن پیپر تننگا ہرا جتاء سبجیکٹ آتیا تالان ئس۔ او پرچہ ءِ پامداری ئٹ خواننگ بناء کرے بھاز آ سوج آک اوڑکن اڑزان ئسر انتئے کہ زیات ٹِک خلوک ءُ ئسر و او ایہن ہم تینا کلاس ئٹی جوان ءُ خوانندہ اس ئس و علاقہ ئٹ لائخ آ مار تیتون حساب مننگ تون اوار تینا خاہوت ئٹ ہم کل آتیان لائخ گمان کننگاکہ۔ گوازی کننگ تون اوار او تینا خواننگ آ زیات پام تسکہ، ولے تینا ایلو سنگت و تاتہ مار تیانبار لوفری کتوکہ۔ او وخت آن مالو کل ءِ سوج آتے ایسر کریسہ پرچہ ءِ تس و پیشن پیشتما۔ ایلو بھاز آ مارک ہم پیشن پیشتمار ہر اسٹ تینا چاہوک آتیان ہرفنگ ئس کہ او امر ٹیسٹ تس، او اندا کل ءِ ہُننگ ئس کہ اسہ ورنا اس اونا رہی آ بس سلام دعا آن پد ہرفے ”بلوچ ئسے اُس؟“ او تینا پِن ءِ ذاکر کریسہ پارے ”جی ہئو ای بلوچ ئسے اٹ۔“ پدا او مونغکو آن اونا ہرفے۔ ”کنا پِن انیس ءِ و ای مستونگ نا ئسے اُٹ۔“ او ورندی تس۔ ”امر مس ٹیسٹ؟“ ”سنگت کل ءِ سوج آتے حل کرین داسہ ہُرینہ انت مریک۔“
ہیت کریسہ او ہڑتوم آک بنجاہی در اسکان بسر۔ اسہ رکشہ اسیٹی بازار آ ہنار، ہڑتوم آک اسہ ہوٹل اسیٹ چاہ کُنگر و اسٹ ایلو نا موبائل نمبر آتے ہلکر۔ او انیس ءِ پارے کہ کنے بلوچستان یونیورسٹی آ ہنوئی ءِ۔ انیس پارے گڑا لوکل بس ئٹ کانہ، نی یونیورسٹی نا رہی آ دڑنگس ای مُستی ہنوٹ۔ ہڑتوم آک سریاب نا لوکل بس ئٹ لگار و راہی مسر، مچے مُستی ہننگ آن پد اوفک یونیورسٹی نا گیٹ ءِ سر مسر، او انیس آن رخصت کریسہ لوکل آن دڑنگا و تینا سنگت علی ءِ فون کرے ہرا یونیورسٹی ٹی خواننگ ئس۔
منہ ساہت ودار کننگ آن پد علی گیٹ آ بس و اودے ہاسٹل آ درے۔ علی نا کوٹھی ٹی پیہنگ تون او زو اس اسہ کمبل اسیٹ ویڑا تینے و پارے ”یار دا کوئٹہ اخس یخ مریک۔“ ”یار دائسکان یخ آک ارادو“ علی مخیسہ پارے، ”یخ آک گڑا جنوری فروری ٹی مریرہ۔“ علی اوڑکن چاہ کرے و ہڑتوم آک تولیسہ خوش ءُ مجلس اسیٹی اختہ مسر۔ او علی نا کوٹھی نا دیوال تے ہننگ بناء کرے ہرافتیا جتا ءُ عکس خلوک ئس۔ بھاز آ عکس آتیٹ پِن آن مالو شہید یا بندی نوشتہ ئس۔ او علی آن ہرفے ”یار دا عکس آتے نی انتئے خلکنس؟“ ”انتئے کنے دا عکس آتے خلوئی الو؟“ علی سوج کرے۔ ”ہئو یار ای ہم اندا ہرفنگ اُٹ کہ دا عکس آتے انتئے خلکنس و داڑے نی اسہ تنظیم اسیٹی تو اوار افیس؟“ ”ہئو ای بی ایس او نا باسک ئسے اٹ۔“ علی ورندی تس۔ او پارے ”یار اِلے دا تنظیم آتیان اراتم خڑک مسس و دا عکس آتے خلیسہ نی انت نشان تننگ خوائسہ، نی غلام ئسے اُس؟“ علی بشخندہ کریسہ پارے ”ہئو یار ای تو اندا تکوہ بلکن نی سرپند مفیسہ اندا خاطران فوج ئٹ بھرتی مننگ کن ٹیسٹ تسس و دا گمر ٹی اُس کہ فوج ئٹ بھرتی مریسہ تینا ڈیہہ و راج ئنا خذمت ءِ کروٹ۔“ ”ہئو کنا اندا سوچ ءِ۔“ او پارے۔ علی سوالیہ ڈول ئٹ اوڑان ہرفے، ”گڑا نی ہم ننے آ ظلم کروس، دا ورنا تا ڈول نی ہم ننے آن گڑاس ءِ شہید کروس۔“ داسہ شرہ بھاز ترندی ئٹ برجاء ئس داڑے اسکان کہ علی اسہ اِرا وار اوڑا کاوڑ ہم کرے۔ پدا علی تینے تورے انتئے کہ ذاکر ہمر کہ ئس اونا سنگت مننگ تون اوار اونا مہمان ہم ئس۔ نن ئنا ہشت مسس علی تینا الماری آن اسہ متکن ءُ کوٹ اس کشا ذاکر ءِ تس و پارے کہ بر اِرغ کُننگ کن میس آ کان۔ ہڑتوم آک کوٹھی آن پیشتمسہ میس ئنا پارہ غا راہی مسر، کسر ئٹ ہرکس علی ءِ خناکہ پاریکہ ”کامریڈ چے ھال اے“ ہڑتوم آک میس ءِ سر مریسہ اِرغ ہلکر و توسر ارغ کننگ بناء کریر۔ کُننگ آن فارغ مننگ آن پد علی سگریٹ ءِ کشیسہ اودے سَلاہ خلک ولے او نمن کرے، پدا ہڑتوم آک میس آن پیشتمار۔ پیشن پیشتمنگ تون اسہ ورنا اس علی ءِ خنا و پارے کامریڈ اینو ننا کوٹھی ٹی اسہ پین زون ئسے نا منہ سنگت بسنو ببو ہمونگی آ کان۔ علی پارے کانبو، پدا او ہر مُسٹ راہی مسر۔ کوٹھی ٹی پیہنگ تون او تینا اسہ مُست ئنا سنگت اس خنا، اُست ئنا ہُب ئٹ اونا دو ءِ ہلک۔ کل توسر حال حوال آن پد مجلس بناء مس پدا ننکان ہُرے اسکان اوفتا دا سیاسی شرہ برجاء مس، اندن او تینا سنگت تون ہیت کننگ ئس او و اونا سنگت پرائمری آن اسہ اسکول اسیٹی اوار خواناسر و بھاز جوانو سنگت ئسر۔ اوکان پد اونا دا سنگت پنجگور آ ہناسس، اینو کیہی سال آتیان پد اوفتا اوڑدہی مس تو او تینا بھاز آ متکنا یات آتے پوسکن کریسہ خوش مننگ ئسر۔ ہیت ہیت ئٹ اودے سما تما کہ اونا سنگت ہم بی ایس او نا باسک ئسے، نن ہناسس او بش مسر و سنگت آتیان رخصت کریسہ کوٹھی آن پیشتمار و علی نا کوٹھی نا پارہ غا راہی مسر۔ کسر ئٹ او سوچ خلنگ ئس کہ اگہ اونا سنگت اوڑے متوکہ و اوڑتون کچاری متوکہ گڑا او علی و اونا سنگت آتا ہیت آتیان بیزار مسکہ، او ہڑتوم آک کوٹھی ءِ سر مسر و خاچنگ نا تیاری ٹی لگار۔
علی دوارہ اوڑان ہرفے ”یار نی جائی فوج ئٹ بھرتی مننگ خوائسہ؟“ ذاکر تینا کاٹم ءِ ہئو ئٹ سُرفسہ ہرفے ”انتئے؟“ علی پارے ”یار نا نمبر آک جوان ءُ نی پین محکمہ اسیٹ نوکری اس انتئے پٹپیسہ۔ نی پین نوکری اس پٹے جوان ءِ۔ دا پنجابی فوج ئٹ بھرتی مننگ نا خیال ءِ تینا اُست آن کشے۔ مننگ کیک کنا ہیت آک نے وڑپس ولے گواچن ئٹ دا فوج ننا دشمن ءِ و نی اسہ کِرائی ءُ خونی ئسے نا دروشم ئٹ بھرتی مننگ اُس۔“ او پارے ”یار ایلو محکمہ غاتیٹ ارا وا نوکری رسینگک اوڑے تو بھلا بندغ آتا پاننگ آ نوکری رسینگک یا گڑا بندغ تون بھاز زر مرے گڑا۔ و نی چاسہ کہ کنکہ دیر سفارش کرو۔“ علی پارے ”سنگت اینو دا حالیت آتے خننگ آن پد سوچوئی تمک کہ فوج ئٹ ہنوئی ءِ یا آخہ ایلو ہئو دا پار کنتون پین اخس دے مروس؟“ ”بس اِرا دے آن پد ہنوٹ۔“ او ورندی تس۔ علی پارے یار ”اسہ ہفتہ اس مر پدا ہنوس۔“ ”آخہ یار دا وار نا کاوہ اگہ بنائی ٹیسٹ پاس مس گڑا انٹرویو کن ہراتم بسوٹ تو اسہ ہفتہ اس مروٹ ولے دا وار نا آخہ۔“
ننکان او خاچار و سہب ئنا ہُرے آ بش مسر منہ ساہت آن پد اونا سنگت فون کرے و ہرفے ”اراڑکن اُس؟“ او ورندی تس کہ او علی نا کوٹھی ٹی ءِ۔ سنگت پارے ”جوان ءِ ای ہمونگ بریوہ۔“ منہ ساہت آن پد اونا سنگت بس ہڑتوم آک تولوک ہیت کننگ ئسر۔ علی اونا سنگت ءِ پارے ”یار تینا سنگت ءِ پُہہ کہ دا پنجابی فوج ئٹ بھرتی مننگ کن بسنے ای اودے بھاز پہہ کننگ نا کوشست کریٹ ولے کنا ہیت آک اونا مغز ٹی تولپسہ۔“ او سنگت ہم اودے بھاز سرپند کننگ نا کوشست کرے ”یار دا انت کننگ اُس دشمن فوج ئٹ ہنپہ۔“ ولے او منّنگ کن تیار الو۔ خیر اِرا دے آن پد او تینا علاقہ کن راہی مس۔ علی آن رخصت کریسہ او بس ئٹ توس و بس راہی مس۔
برجاء۔۔۔
حوال آتا رد ئٹ بلوچستان نا شار ڈیرہ مراد جمالی ٹی نا درست آ سلہہ بند بندغ آتا سم کاری آن اِرا بندغ ٹپی مسر۔
ہندی مخلوق نا رِدئٹ ٹپی آ بندغ ڈاکٹر اسحاق بگٹی و اونا ایلم محمد ابرہیم نا تعلقداری حکومتی مخ تف سلہہ بند ٹولی آن ءِ۔
یاتی مرے کہ داڑان مالو ہم ڈیرہ مراد جمالی ٹی اوفتا کلینک آ بمب تراک مسوسس ہراٹی اوفک ٹپی مسسر۔
چمن ئٹ نا درست آ سلہہ بند بندغ آتا سم کاری آن پاکستانی لشکر نا اِرا بندغ مرگ ئنا گواچی مسر۔
کوالخوا تا رد ئٹ یک شمبے نا دے چمن ئٹ سیم ئنا تصدیق گیٹ آ ڈیوٹی چٹفنگ آن گڈ اِرا کارندہ ہننگ ئسر کہ نا درست آ بندغ آک اوفتیا سم کاری کریر ہرانا سوب آن نائیک ہاشم و سپاہی ناصر بھاز ٹپی مسر۔
سلہہ بند آ بندغ آتا سم کاری آن ٹپی آ بندغ آتے جان جوڑی کمک کن کوئٹہ غا دننگ ئسر کہ کسر ئٹ کسکر۔
فورسز نا پین نفری ہمو ہند آ سر مرسہ معلومداری مچ کننگ و جلہو کار آتا پٹنگ ءِ بناء کرے، مستی کاروائی برجاء ءِ۔
