بلوچ یکجہتی کمیٹی نا کنڈ آن شال سریاب، کیچی بیگ اسٹیڈیم ئٹ جنز ئنا پنچمیکو بشخ ئنا رد ئٹ ٹہفوک جلسہ ٹی ہزار آتا کچ نرینہ نیاڑی، پیر، کماش و چُناک اوار ءُ۔

جلسہ ٹی اوار مننگ کن بلوچستان نا کنڈ کنڈ آن بندغ آک کاروان تا دروشم ئٹ بسنو۔

بلوچستان نا جتا علاقہ، کیچ، پنجگور، خضدار و کراچی آن درو آن بندغ آک کاروان تا دروشم ئٹ شال آ بننگ اسر، و اندا لڑ اینو ہم برجاء اس۔

داکان بیدس شال ئٹ ساڑی پشتون، ہزارا و ایلو قوم آتا بندغ آک ہم جلسہ ٹی اوار مننگ کن بسنو۔

جلسہ ئٹ بلوچ یکجہتی کمیٹی نا راہشون تا کنڈ آن بلوچی چادر ہم بشخنگا، ہرا ریاستی زوراکی تا برخلاف بلوچ مزاحمت نا پیدواری ءِ کیک۔

جلسہ نا بناء ٹی ڈاکٹر صبیحہ تران کرسا بلوچ یکجہتی کمیٹی نا جوڑ مننگ نا دیہاڑ آ روشنائی شاغا و اینو نا جلسہ نا بارو ئٹ چاہنداری تس۔

اندن لانگ مارچ و اسلام آباد تولوک برانز نا راہشون تتون اوار خاہوت آک و ایلو بندغ آک ہم تران کننگ ءُ۔

یاتی مرے، بلوچ یکجہتی کمیٹی اسلام آباد ئٹ تینا تولوک برانز ءِ ایسر کرسا شال آ بننگ نا پڑو کننگ تون اوار شال ئٹ السی جلسہ نا ہم پڑو کرے۔

بلوچ یکجہتی کمیٹی نا جلسہ نا پڑو آن گڈ درو بلوچستان نا نگران حوالکاری وزیر جان اچکزئی شال ئٹ اِرا ہفتہ اسکان دفعہ 144 نا پڑو کرے و پارے کہ ہر وڑ ئنا جلسہ و مُچی تیا رکھ خلنگانے۔

واہم بی وائے سی نا جلسہ اینو تینا اڈ ہلوک تاریخ و جاگہ غا مننگ ءِ۔ السی تپہ آتا رد ئٹ دفعہ 144 بلوچ یجکجہتی کمیٹی نا برخلاف اسہ چم بازی ئسے نا چرجوئی ءِ۔

تربت نا علاقہ تجابان ئٹی ورنا ئسے نا زوراکی نا بیگواہی نا برخلاف سی پیک کسر بند کننگا، ہندی مخلوق تولوک برانز کرسا اُلاخ آتا ہن و بر ءِ بند کریر۔

شابیتی حوال تا رد ئٹ استو ننکان پاکستانی لشکر تجابان سنگ کلات ئٹی بہادر چاکر پنی ءُ ورنا سے اُرا غا چھاپہ خلِسہ دزگیر کرے و بے ڈس ءُ جاگہ سے آ درے ہراکان گُڈ اونا بارو ئٹ اونا خاہوت ءِ ہچو معلومداری تننگ متنے۔

ہندی مخلوق اینو ہفتہ نا دے ورنا نا بیگواہی نا برخلاف سی پیک کسر آ تولوک برانز کرسا کسر ءِ بند کریر۔

تولوک برانز ئٹ چُنا نیاڑیک اوار ءُ و کسر بند مننگ نا سوب آن اُلاخ آتا ہن و بر بند ءِ۔

ہندی حوال تا رد ئٹ پاکستانی لشکر کیچ ئنا علاقہ ہوشاب ئٹ ہم استو چھاپہ خلِسہ اِرا ونا ءِ بیگواہ کرینے ہرافتا بارو ئٹ ہچو معلومداری تننگ متنے۔

بیگواہ کننگوک ورنا تا چاہنداری حمل ولد قادر بخش و اسلم ولد کریم بخش نا پنا مسنے۔

حوال تروکا تا پاننگ ءِ کہ حمل ہشتمی و اسلم دہمی جماعت نا خوانندہ اسے، ہرافتے پاکستانی لشکر استو سئے بجہ نا وختا چھاپہ خلِسہ دزگیر کرینے و بے ڈس ءُ ہند ئسے آ درینے۔

یاتی مرے، بلوچ یکجہتی کمیٹی نا کنڈ آن زوراکی نا بیگواہی و بیدس قانود خون تا برخلاف جنز برجاء ءِ، و اینو شال ئٹ اسہ بھلو السی جلسہ ئس ہم مننگ ءِ۔ داکان بیدس ہم ریاستی فورسز آتا کنڈ آن بلوچستان ئٹ ورنا تا زوراکی نا بیگواہیک برجاء ءُ۔

بلوچ لانگ مارچ نا سروک ڈاکٹر ماہ رنگ بلوچ چاگڑدی حوالکاری میڈیا غا بلوچی و براہوئی بولی ٹی اسہ وڈیو کلہو ئس شنگ کرسا پارے کہ ‏ای غٹ بلوچستان نا تینا ایڑ و لمّہ آتیان خواست کیوہ کہ پگہ شال ئنا جلسہ ٹی بشخ ہلیر۔

او پارے کہ نیاڑیک ہم ہمو وڑ چاگڑد نا بشخ ئسے ءُ ہمر کہ نرینہ چاگڑد نا اسہ بشخ ئسے۔ بلوچ نسل کشی نا برخلاف برجاء دا تحریک تیوہ بلوچ راج ئنا تحریک ءِ ہراٹی کل نرینہ و نیاڑیک اوار ءُ۔

‏ڈاکٹر ماہ رنگ پارے کہ کنے اومیت ءِ کہ کنا راج ئنا شیر زال آک پگہ بھلو کچ ئسیٹ دا جلسہ ٹی بشخ ہلور۔

او تینا وڈیو کلہو ئٹ پارے کہ ‏ای تینا بلوچ راج آن دُو تفوک خواست کیوہ کہ جلسہ نا نظم و ضبط نا خیال داری ءِ کیر، بی وائی سی نا جوڑ کروک ڈسپلن نا زی آ عمل کیر۔

او پارے کہ جلسہ ٹی اوار مروکا دنو ہچ کاریم ئس کپس ہراڑان ننا دشمن فائدہ ارفہ۔ کنے اومیت ءِ کہ ننا راج ریاست نا غٹ چم آتے بےسہب کرو۔

یاتی مرے کہ بلوچ یکجہتی کمیٹی نا کنڈ آن اڈ ہلوک لانگ مارچ ئٹ اوار مروکا اِرا تُو اسلام آباد نیشنل پریس کلب نا مونا تولوک برانز آن گڈ درو دوارہ شال آ بسر ہراڑے نرینہ و زالبول آک بھلو کچ ئسیٹی اوفتے بخیر کریر۔

بلوچ یکجہتی کمیٹی نا کنڈ آن پڑو کننگا کہ 27 جنوری آ شال ئٹ اسہ السی جلسہ ئس کننگو ہراڑان تحریک نا پنچمیکو بشخ بناء مرو۔

جلسہ ٹی اوار مننگ کن بلوچستان نا کنڈ کنڈ آن مخلوق کاروان تا دروشم ئٹ شال آ بننگ ءِ، و ایلو کنڈ آن حکومت نا کنڈ آن شال ئٹ اِرا ہفتہ اسکان السی مُچی ءِ توننگ کن دفعہ 144 خلنگانے۔

حوال تا رد ئٹ پاکستانی لشکر بلوچستان نا ضلع کیچ ئنا علاقہ بلیدہ بِٹ ئٹی جتا ہند آتے آ چھاپہ خلِک و اِرا ورنا ءِ بےدادی آن گڈ دزگیر کرے و بے ڈا ءُ جاگہ سے آ درے۔

پاکستانی لشکر نا دو آن زوراکی ئٹ بیگواہ مروک ورنا تا چاہنداری حفیظ اللہ ولد عبدالحمید و اسماعیل ولد شاہی داد نا پنا مسنے، ہرا تین پہ تین خُڑک سیال ءُ۔

ضلع کیچ آن زوراکی ئٹ بیگواہی تا دا اِرا دے ئٹی ارٹمیکو تدینی ءِ، داکان مُست ضلع کیچ ئنا بنجائی شار تربت آن پاکستانی لشکر بلوچی زبان نا شائر قاسم ءِ سول اسپتال آن دزگیر کننگ آن گڈ بیگواہ کرے ہرا نا بارو ئٹ داسکان ہچو معلومداری رسینگتنے۔

برجاء تُو ئٹی “ٹی بی پی” ءِ بلوچستان نا جتا ضلع آتیان 16 بندغ نا پاکستانی لشکر نا دو آن بیگواہ مننگ نا حوال رسینگانے ہرافتیٹ کوئٹہ و گوادر آن 2 بندغ، کیچ آن 9, آواران آن 2، جعفرآباد آن 1 ورنا ئس و جھل مگسی آن 2 بندغ بیگواہ کننگانو۔ داکان بیدس 4 بندغ یلہ کننگانو۔

ایلو کنڈ آن بلوچستان ئٹ زوراکی نا بیگواہی تا برخلاف بھلو کچ ئسیٹی برانز آتا لڑ برجاء ءِ ہراڑے بلوچ یکجہتی کمیٹی و بیگواہ غا بندغ آتا خاہوت آک پگہ کوئٹہ ٹی زوراکی نا بیگواہی تا برخلاف جلسہ اڈ ایتور۔

بلوچ یکجہتی کمیٹی و ایلو بلوچ گل آک پارہ کہ دا زوراکی نا بیگواہی و خون تیٹ ریاستی ادارہ آک تُد ءُ، دا گل آتا پاننگ ءِ کہ زوراکی نا بیگواہی تیٹ تُد ریاستی ادارہ آتا مخ تفی ءِ پاکستان نا مین اسٹریم پارٹیک، حکومت و عدالت کیک ہرا شاری تا حق آتا سخت لتاڑ ءِ۔

اسہ چینی کمپنی ئس چنک کچ ئنا ایٹمی بیٹری ئس تیار کرینے ہرا کہ 50 سال اسکان چلنگ کیک و دا چارج کننگ ہم خواہپک۔

حوال تا رد ئٹ چین ئنا بیٹاوولٹ پنی آ کمپنی اندا زوت ئٹ BV100  بیٹری ئسے نا مون پاشی ءِ کرینے، ہرا کچ ئٹی اسہ سکہ ئسے آن ہم چُنک ءِ۔

کچ ئٹی اسہ سکہ ئسے آن چُنکا دا بیٹری پنجاہ سال اسکان بیدس چارج کننگ آن چلنگ کیک۔

ایٹمی بیٹری ایہُن تو پوسکنو گڑاس اف، انتئے کہ امریکہ و روس دُنو پاور یونٹ 1960 ئٹی جوڑ کریسر۔ واہم او ایٹمی بیٹریک بھلو مننگ تون اوار خطرناک ہم اسر، ہرافتے جوڑ کننگ ئٹ بھاز خرچہ بسکہ و اوٹی پلوٹیم ہم کارمرز مسکہ ہراٹی ریڈیوایکٹیو پاور ارے۔

ولے داسا سائنس نا دیمروی نا سوب آن دا بیٹری رکھوک آئیسوٹوپ و نِکل 63 ئٹ جوڑ کروک ءِ۔

ہراڑے ایلو بیٹریک بیرہ توانائی اسٹور کننگ کیرہ دا ایٹمی بیٹری بجلی ہم جوڑ کننگ کیک۔

کیچ آن بلوچ راجی جلسہ ٹی اوار مروکا کاروان ءِ ہوشاپ نا ہند آ الس بخیر کرے۔ کیہی بندغ آک کاروان ئٹ اوار مسر۔

حوال تا رد ئٹ تیبہ بلوچستان آن ہزار آتا کچ ئٹ بندغ آک کاروان نا دروشم ئٹ پیشتمِسہ شال السی جلسہ ٹی اوار مننگ کن رادہ مسنو۔

بلوچ یکجہتی کمیٹی نا کنڈ آن کراچی ٹی بس آتا بست و بند کننگا، ہرا شال السی جلسہ ٹی اوار مننگ کن کاروان نا دروشم ئٹ شیر شاہ، ملیر، نیپا آن اینو شام ئنا 5 بجہ غا پیشتمِسہ شال آ برور۔

بلوچ یکجہتی کمیٹی نا کنڈ آن پاننگا کہ اینو نا وڑ پگہ سہب ئنا ہم بلوچستان نا جتا علاقہ غا تیان بلوچ الس کاروان نا دروشم ئٹ پیشتمِسہ شال آ جلسہ ٹی اوار مننگ کن برو۔

‏او الس آن خواست کریر کہ تینا علاقہ غا تیان پیشتموکا السی کاروان تیٹ اوار مریر و شال السی جلسہ ٹی پگہ اوڑدئی کیر۔

یاتی مرے کہ بلوچ یکجہتی کمیٹی نا کنڈ آن اڈ ہلوک تولوک برانز اسلام آباد ئٹ اِرا توہ اسکان برجاء سلینگ آن گڈ درو مارچ ئنا بندغ آک کوئٹہ ءِ سر مسر ہراڑے السی مُچی اوفتے گچین ڈول ئٹ بخیر کرے۔ بخیر کروک مُچی ٹی زالبول، چنا و کماش آک بھلو کچ اسیٹ اوار ئسر۔

بلوچ یکجہتی کمیٹی نا کنڈ آن پڑو کننگا کہ 27 جنوری 2024 آ بلوچستان نا بنجائی شار ئٹ بلوچ زنک کشی، اسلام آباد ئٹ ایڑ لمّہ غا تا برخلاف ریاستی بے دادی، زوراکی و لانگ مارچ نا خواست آتا حق ئٹ تحریک نا پنچمیکو بشخ ئٹ 27 جنوری آ اسہ جلسہ ئس کننگو۔

جلسہ ئٹ تحریک نا سروک، سیاسی راہشون تتون اوار بیگواہ غا بندغ آتا خاؤت آک تران کرور۔

بلوچستان نا ہند تربت ئٹ سلہہ بند بندغ آک گچین کاری کمیشن نا ریجنل دفتر آ جلہو کریر۔

شابیتی حوال تا ردئٹ سلہہ بند بندغ آک دے ئنا دو بجہ نا وخت تربت ئٹ گچین کاری کمیشن نا ریجنل آفس آ جلہو کریسہ تہٹی پیہار، دفتر نا تہٹی ہڑتوم آ پارہ غاتیان سم کاری نا سوب اسہ پولیس کارندہ اس مرگ ئنا گواچی مس۔

حوالکار تا پاننگ ءِ کہ سلہہ بند بندغ آک پولیس نا سلہہ تیا ہم کوزہ کریر۔

جلہو آن پد پولیس و پاکستانی لشکر علاقہ ءِ گھیڑ کریسہ پٹ و پول بناء کرینے۔

خیال ئٹ مرے کہ پن کروک علاقہ ئٹ بلوچ آجوئی دوست گل آک کاریم کیرہ، واہم اینو نا جلہو نا ذمہ واری ءِ دائسکان ہچو گل اس ارفتنے۔