سندھ آن پاکستانی لشکر ارا سندھی راج دوست باسک دزگیر ئٹ ہلسہ بے گواہ کرے۔ بے گواہ کروکا باسک آتا چاہنداری امیر جمالی و ارشاد نوحانی نا پن ئٹ مسنے۔

سندھ ئٹ کاریم کروکا بے گواہ آ بندغ آتا تنظیم وائس فار مسنگ پرسنز آف سندھ سورٹھ لوہار فورسز نا دو آن ہڑتوما ورنا تا بے گواہی ءِ پک کرسہ اینو برانز نا کال تس۔

دا رد ئٹ مائکرو بلاکنگ ویب سائٹ ایکس آ وائس فار مسنگ پرسنز آف سندھ تنظیم نا سروک سورٹھ لوہار تینا اسہ پوسٹ اسیٹی پارینے کہ دادو آن امیر جمالی و سہیون آن ارشاد نوحانی ءِ پاکستانی ایجنسیک دزگیر کریسہ بے گواہ کریر۔ ہرافتا یلہ مننگ کن اینو آن برانز کرون۔

اردن ئٹ امریکی فوجی اڈہ غا ڈرون جلہو ئٹ 3 امریکی فوجی مرگ ئنا گواچی و کیہی ٹپی مسر۔

امریکی کوالخواک ملکی حوال تروک ادارہ سی این این ءِ پاریر کہ ڈرون جلہو ئٹ 3 فوجی کارندہ و 2 درزن آن زیات کارندہ غاک ٹپی مسنو، غزہ ئٹ برجاء اسرائیلی جلہو تا بناء آن پد نیامی دے ٹک ئٹ دا امریکی فوجی تا مرگ ئنا گواچی مننگ نا اولیکو تدینی ءِ۔

امریکہ نا پاننگ ءِ کہ ڈرون جلہو شام ئنا سیم آن خڑک اردن ئٹ امریکی فوجی اڈہ غا کننگا، ڈرون جلہو ءِ عراق و شام ئٹ کاریم کروک ایرانی مُخ تف سلہہ بند ٹولیک کریر۔

امریکی کوالخواہ تا ردئٹ گمان ءِ کہ ڈرون شام ئنا حد آتیان بسنے، دا بابت پٹ و پول کننگ اُن۔

امریکی سینٹرل کمانڈ جلہو ءِ پک کریسہ پارینے کہ جلہو ئٹ 3 کارندہ تا مرگ ئنا گواچی مننگ تون اوار 25 کارندہ ٹپی مسنو۔

امریکی کوالخواہ تا پاننگ ءِ کہ امریکی فوجی تیٹ گمانی بھاز ٹپی آتا جاچ ہلنگک۔

امریکی صدارتی آفس وائٹ ہاؤس آن شینک کروک بیان اسیٹ صدر جوبائیڈن جلہو نا مذمت کرینے، امریکی صدر جوبائیڈن نا پاننگ ءِ کہ جلہو نا بابت معلومداری مُچ مننگ ءِ واہم ننے سماء ءِ کہ دا جلہو عراق و شام ئٹ کاریم کروک ایرانی مُخ تف سلہہ بند ٹولی تا پارہ غان کننگانے۔

ارٹمیکو پارہ غان اردن تینا ڈغار آ جلہو تے پک کتنے اردنی کوالخواہ تا پاننگ ءِ کہ ڈرون جلہو اردن نا ڈغار آ آخہ بلکن شام ئٹ مسنے۔

مستونگ و قلات ئٹ نیشنل پارٹی و پیپلز پارٹی نا گچین کاری دفتر آتیا چغلی بمب جلہو تیٹ ارا بندغ ٹپی مسر۔

حوال آتا رد ئٹ مستونگ ئٹ نا درست آ بندغ آک پاکستانی گچین کاری تیٹی بشخ ہلسہ گچین کاری مہم چلیفوکا نیشنل پارٹی نا دفتر آ چغلی بمب ئس خسار ہرا ترند تراک ئٹ ترخا۔

جلہو ئٹ غلام محی الدین و عبد العزیز پنی ءُ ارا بندغ ٹپی مسر۔

ٹپی آ بندغ آتے ڈی ایچ کیو ہسپتال آ دریر۔ پولیس علاقہ ءِ گھیڑ ئٹ ہلسہ جلہو کار آتا پٹ و پول ءِ بنا کرینے۔

ایلو پارہ غا قلات ئٹ نادرست بندغ آک پیپلز پارٹی نا گچین کاری دفتر آ بمب جلہو کریر۔

حوالکار تا ردئٹ قلات نا ہند منگچر ئٹ پیپلز پارٹی نا گچین کاری دفتر آ چغلی بمب جلہو کننگا واہم تدینی ٹی ہچو جانی نسخان اس متنے۔ گیشتر پٹ و پول لیویز کننگ ءِ۔

بلوچ لبریشن آرمی نا ترجمان جیئند بلوچ میڈیا غا شینک بیان ئٹ پارینے کہ بی ایل اے، پاکستانی میڈیا ادارہ جیو نیوز نا ہمو حوال آتے رد کیک، ہرافتیٹی سراوان ئٹ خلنگوکا نو پنجابی تا کھسفنگ نا ذمہ واری ءِ بی ایل اے آ شاغنگانے۔

او پارے کہ نن پک کننگ خوانہ کہ دے کہی بلوچستان ئٹ نئے بلوچ لبریشن آرمی نا کیمپ ارے و نئے کہ سرمچار۔ نن میڈیا ادارہ غاتے چاہندار کننگ خوانہ کہ بی ایل اے تون تفوکا حوال و ذمہ واری تیکن، ننا آفیشل چینل آ ہُربو۔

یاتی مرے کہ درو دے کہی بلوچستان نا علاقہ سراوان ئٹ سم کاری نا اسہ تدینی اسیٹی ود و کم نو بندغ مرگ ئنا گواچی و مسٹ ٹپی مسر۔

مرگ ئنا گواچی مروکا تا تعلقداری پاکستان نا صوبہ پنجاب آن ئس۔

تدینی نا باروٹ پاکستانی نیوز چینل جیو نیوز تون اوار ایلو میڈیا چینل آتیا پاننگا کہ دا تدینی نا ذمہ واری ءِ بلوچ لبریشن آرمی ارفینے۔ واہم بی ایل اے تینا آفیشنل میڈیا چینل ہکل آ شینک مروکو اسہ بیان اسیٹی اودے رد کرے۔

برطانیہ نا آئل ٹینکر آ جلہو آن گڈ امریکہ یمن ئٹ حوثی تیا اسہ پوسکنو جلہو ئس کرینے ہرادے امریکی لشکر نا سینٹرل کمانڈ نا کنڈ آن پک کننگانے۔

سینٹرل کمانڈ نا پاننگ ءِ کہ او حوثی تا اسہ ’اینٹی شپ میزائل‘ ئسے آ ہفتہ نا دے سہُب ئنا جلہو کرینو۔

سینٹ کام نا رد ئٹ دا میزائل جلہو نا مسخت بحیرۂ احمر ئٹ تینا ہدف ءِ ٹک کننگ اس و دا لانچنگ کن ہم تیار اس۔

امریکی فوج ئنا سینٹرل کمانڈ نا دا ہم پاننگ اس کہ امریکی لشکر تینا دفاع ٹی میزائل ئس خلک بھس کرے۔

یاتی مرے داکان مُست یمن نا حوثیک خیلج عدن ئٹ برطانیہ نا آئل ٹینکر ءِ میزائل ئٹ ٹک کریسر۔

برطانیہ نا میڈیا نا رد ئٹ حوثی تا ترجمان پارینے کہ یمن آ امریکہ و برطانیہ نا جلہو تا ورندی ٹی او خلیج عدن آن گدرینگوکا برطانوی کمپنی نا آئل ٹینکر ءِ ٹک کرینو۔

بلوچستان نا ضلع ڈیرہ بگٹی نا تحصیل سوئی نا جتا ہند آتیا پاکستانی لشکر و ڈھوکوک ادارہ غاک چھاپہ خلِسہ 10 آن زیات بندغ ءِ دزگیر کرسا بیگواہ کریر، اندن ضلع کیچ ئٹ بہادر چاکر نا پاکستانی لشکر نا دو آن بیگواہی نا برخلاف اینو ارٹمیکو دے سی پیک کسر آ تولوک برانز برجاء ءِ۔

ہندی حوال تا رد ئٹ ڈیرہ بگٹی ٹی اسہ کاروائی ئسیٹی پاکستانی لشکر ظفر کالونی آ چھاپہ خلِسہ جی ٹی اے نا ضلعی صدر و جمہوری وطن پارٹی نا باسک ماسٹر غوث بخش ولد میران بخش بگٹی ءِ زوراکی ئٹ بیگواہ کرینے۔

اندن سوئی نا تحصیل بازار ئٹ موسیٰ ہوٹل آ تولوک رحیم داد ولد حاجی بگٹی و رحیم داد ولد سوالی بگٹی ءِ ہم سی ٹی ڈی و ڈھوکوک ادارہ آتا کارندہ آک زوراکی ئٹ بیگواہ کرینو۔

حوال تروکا تا پاننگ ءِ کہ سوئی نا جھکرا چوٹ آ ساڑی اُرا سے آ ڈھکوک ادارہ آتا کارندہ آک چھاپہ خلِسہ عطاللہ ولد گوبر خان بگٹی ءِ دزگیر کننگ آن گڈ بیگواہ کرینو و شاہ زین پمپ آن مُسہ بندغ ءِ دزگیر کننگ آن گڈ بیگواہ کرینو ہرافتا چاہنداری داسکان متنے۔

حوال تا رد ئٹ سوئی فیلڈ نا فینس ئٹ لیبر کوارٹر آن فیصل ولد حنیف بگٹی و شاہ حسین ولد شاہ گل بگٹی ءِ ہم سی ٹی ڈی دزگیر کریسس ولے شام ئنا تومکا دے یلہ کننگاسر۔

ایلو نیمہ آن کیچ ئنا علاقہ تجابان نا ہندی بہادر چاکر نا زوراکی نا بیگواہی نا برخلاف اونا خاہوت نا کنڈ آن M-8 سی پیک کسر آ تجابان نا ہند آ تولوک برانز اینو ارٹمیکو دے ہم برجاء ءِ۔

شابیتی حوال تا رد ئٹ ہفتہ نا نن پاکستانی لشکر تجابان سنگ کلات ئٹی بہادر چاکر پنی ءُ ورنا ئسے اُراغا چھاپہ خلِسہ زوراکی ئٹ بیگواہ کریسس، ورنا نا بیگواہی نا برخلاف درو آن اونا خاہوت و ہندی مخلوق سی پیک کسر ءِ بند کرسا تولوک برانز کننگ ءُ۔

داکان بیدس ہمو شام پاکستانی لشکر چھاپہ خلِسہ پین اِرا ورنا ہم بیگواہ کریسس ہرافتا چاہنداری حمل ولد قادر بخش و اسلم ولد کریم بخش نا پنا مسس۔ حمل ہشتمی جماعت و اسلم دہمی جماعت نا خوانندہ اسے۔

یاتی مرے بلوچ یکجہتی کمیٹی زوراکی نا بیگواہی و دروغ ئنا مونتس آتیٹ بندغ آتے کھسفنگ ءِ بلوچ زنک کشی پارینے۔

بی وائے سی نا کنڈ آن درو شال ئٹ اسہ جلسہ ئس ہم مس، ہرا برانزی تحریک نا پنچمیکو بشخ ئنا رد ئٹ اڈ تننگاسس۔ وا ہم بلوچستان ئٹ زوراکی نا بیگواہی تا چرجوئی برجاء ءِ۔

کوئٹہ ٹی بلوچ یکجہتی کمیٹی نا کیس رجسٹریشن کیمپ ئٹی کیہی سد خاہوت آک تینا بیگواہ مروک بندغ آتا کوائف جمع کریر۔

بلوچ زنک کشی نا برخلاف کوئٹہ نا شاہوانی اسٹیڈیم ئٹ راجی جلسہ اڈ تننگا ہرا ٹی ہزار آتا کچ بندغ آک اوار مسر، اسٹیڈیم پُر مننگ نا سوب آن بندغ آتا بھلو کچ ئس دیوال آتیا و ڈن آ سلوک اس۔

اندن جلسہ ٹی بلوچستان نا جتا علاقہ آتیان الس کوئٹہ آ سر مس، ہرافتیٹ ہمو بندغ آک ہم اوار اسر ہرافتا خاہوت نا بندغ آک زوراکی ئٹ بیگواہ کننگانو۔

کوئٹہ جلسہ نا وختا زوراکی ئٹ بیگواہ کننگوک بندغ آتا کیس آتے مُچ کننگ و لکھنگ کن بیگواہ غا بندغ آتا ڈیٹا مُچ کننگ نا چرجوئی ہم برجاء اس، مُر مُر ئنا علاقہ آتیان بیگواہ غا بندغ آتا خاہوت آک برسا تینا کیس آتے لکھفیر ہرا ریاستی ادارہ آتا دو آن زوراکی نا بیگواہی تا گواچی مسنو۔

حوال تا رد ئٹ داسکان کیہی سد خاہوت تینا کیس آتے نوشتہ کرفینو۔

بلوچ یکجہتی کمیٹی نا رد ئٹ اوفتتون ہزار آتا کچ بندغ آتا کیس آک اریر، اندنو ہم کیس ارے ہراڑے بندغ آتے دڑکو ترسا خُلیفنگ مسنے کہ او تینا کیس آتے مونا ہتپس، ہرا اینو خلیس ءِ پرغِسہ دا جلسہ ٹی اوار مسنو و تینا بندغ آتا آجوئی کن کوشست کننگ ءُ۔

او خواست کریر کہ ہرا بندغ آتے زوراکی نا بیگواہی تا بارو ئٹ تینا کیس آتے نوشتہ کرفوئی ءِ و چائے انت سوب ئسے آن ننے اسکان سر مننگ کتنو، او ننتو حوال کیر و کوشست اندا مرے کہ غٹ کوائف تون اوار زوراکی نا بیگواہی تا کیس آتے نوشتہ کرفر۔

کاروان انقلاب

نوشت: درناز رحیم

دی بلوچستان پوسٹ

“نن بے سُہب مرسہ داکان ہِننگ افن، نن سرسُہب مسونن، ننا سرسُہبی دادے کہ نن تینا راج ءِ بش کرینن، ننا سرسہبی دادے کہ لکھ آتا کچ ئٹ بندغ آک بلوچستان ئٹ ننا ودار ءُ، نن بے اومیت مرسہ داکان ہِننگ افن، ننے اومیت ءِ کہ بلوچستان ئٹ دنو دے ئس ہم برو کہ چُنا تا دو ٹی اوفتا باوہ غا تا فوٹوک مروفس بلکن اوفتا باوہ غاک تینٹ اوفتیکن ساڑی مرور، لمّہ غاک تینا چُنا تتون زند گدریفور۔”

دا اسلام آباد آن واپسی آ بس ئنا دروازہ غا سلوک ڈاکٹر ماہ رنگ بلوچ نا گڈیکو لوز آک اسر، و صحافی ئسے نا ہمو سوج ئنا ورندی ٹی اسر ہرا اوڑان سوج کرے کہ نُم بے اومیت واپس ہِننگ اُرے۔ و نن اینو خنِنہ کہ ڈاکٹر ماہ رنگ نا ہیت آک راست اسر۔ ہرا وڑ اوفتے شال ئٹ بخیر کننگا، اونا کاٹم آ راجی راہشونی نا دستار تخنگا، و ہرا وڑ ماہ رنگ تون اوار ایڑ لمّہ غا تا اسہ توار آ بلوچستان نا کنڈ کنڈ آن کاروانک پیشتمِسہ راجی جلسہ ٹی اوار مسر، دا غٹ پاش کریر کہ ننا ایڑ لمّہ غاک، چُناک، کماش آک و ورناک، ہرا لانگ مارچ ئٹ اوار اسر و اسلام آباد نیشنل پریس کلب نا مونا ڈاکٹر ماہ رنگ نا راہشونی ٹی تولوک اسر، بے سُہب متور۔ او ہمو سرسہبی ءِ کھٹار ہرا دیہاڑ ئٹ مُست آن کس ءِ دوئی متوسس۔

اینو او جہان ءِ تینا کلہو ءِ سر کریر کہ بلوچ اسہ زندہ ءُ راج اسے، و زندہ غا راج آک تینا بقاء کن پندھ و خواری کشنگ آن تینے پد توپسہ۔ شست و دو دے آن گڈ کاروان انقلاب وختس تینا سر زمین آ بس تو او جہان ءِ دا کلہو ءِ تس کہ اسلام آباد اخس بد تہذیب اس، او ننا ایڑ لمّہ غا تے امر بخیر کرے، و بلوچ راج اخس تہذیب یافتہ ءِ او تینا ایڑ لمّہ غا تے امر بخیر کرے و اخس شرف تس۔ نہ بیرہ بلوچ بلکن پشون راج ہم دا جہد ئٹ اوفتتون اخس کمک کرے۔

او شار کوفہ غا ہنار اوفتتون تینا بیگواہ غا اُست ئنا بند آتا عکس آک اسر، او واپس بسر اوفتتون ہمو عکس آک تُد اسر۔ عکس، ہرادے نن اسہ بے ساہ ءُ گڑاس تکنہ، ولے اندا عکس اوفتا زند ئنا ہمسفر جوڑ مسنو۔ ننے کُل ءِ یات ءِ کہ وختس اندا ایڑ لمّہ غاک، پیر کماش آک، ورنا و چُناک اسلام اباد ئٹ سر مسر اوفتے لٹ و بےدادی ئٹ بخیر کننگا ولے اندا ہڑ ءَ دُڑ ئٹی ہم او اندا عکس آتا رکھ ءِ تینا ساہ آن زیات المی سرپند مسر۔ ولے نن خنّنہ کہ او ہمو عکس آتتون اوار او راجی بیداری و انقلاب نا کسر ءِ شان تننگ نا روشنائی ءِ ہم ہیسُر۔

شار کوفہ نا پارَو تفوکا یخ ئٹی خاہوت آک سگ و حوصلہ ئٹ اومیت نا پلّو ءِ سوگوی ئٹ توریر، و اومیت نا چراغ ءِ کہنگ الیتور۔ او مہر، سگ، و سیوتی نا اندنو کسہ نوشتہ کریر، ہرا بلوچ دیہاڑ نا پنّو آتیٹ ساندہ کن رکھوک مرور۔ بلوچ زنک ہر دور ئٹ دا کسہ غا تے دیہاڑ نا پنّو آتیٹ خوانو، و دا کسہ غاک اوفتے کن کسر شان تروکو اسہ روشنائی ئس مرور۔

بلوچ زنک مرل نا ہمو کلہو ءِ ہم دیہاڑ نا پنّو آتیٹ خوانو ہرا اودے اسلام آباد آن رسینگا۔ ہمو لمّہ نا کسہ ءِ ہم بلوچ تینا دیہاڑ ئٹ رکھوک تخو ہرا نت شپاد دا تحریک نا بشخ مس، اندا اومیت ئٹ کہ نوا او تینا زند ئنا گڈیکو دے تیٹ تینا جغر نا ٹکر ءِ خنِہ۔ بلوچ زنک بہ زنک ہر اسہ ایڑ لمّہ و باوہ و چُنا تا کسہ غا تے خوانو کہ امر بلوچ سر زمین آن تینا “بیگواہ غا ساہ ئنا بند” آتے پٹنگ کن ہنوکا ایڑ لمّہ غا تے اسلام آباد ئٹ بخیر کننگا، امر کاروان انقلاب دشمن نا چم بازی و سوختئی تون مون تس، امر ریاست نا زوراکی تے جہان نا مونا پاش کرے و امر سر سہب مرسا تینا ڈغار آ بس۔ ہر اسہ کسہ نوشتہ کننگو، و بلوچ پدریچ ہر دور ئٹ دا کسہ غا تے خوانو۔