بلوچ سلہہ بند جنز، پوسکنی و ترندی – جاچ تیدری
نوشت: باہوٹ بلوچ
دی بلوچستان پوسٹ
24 جون 2023ء، دو شمبے نا دے، بلوچستان نا شار تربت ئٹ اسہ بھلو و پین ڈول ءُ تدینی اس مس، ہرا تیوہ ڈیہہ ئٹ اِربشی تالان کرے۔ ہراڑے بلوچ لبریشن آرمی اسہ ’جند ندر‘ جلہو اسیٹ پاکستانی لشکر ءِ ٹک کرے۔
بلوچ لبریشن آرمی نا ترجمان جیئند بلوچ میڈیا ٹی شینک کروک بیان ئٹ پارے کہ گل ئنا جند ندر کڑدہ ”مجید بریگیڈ“ اینو پیشیم نا وخت تربت شار ئٹ دژمن لشکر نا ڈھکوک ادارہ تا اسہ ”ہائی ویلیو“ قافلہ ئسے جند ندر جلہو ئٹ ٹک کریسہ دژمن ءِ بھلو جانی و مالی نسخان تا گواچی کرینے۔
دا جلہو ءِ مجید بریگیڈ نا زالبول جند ندر سمعیہ قلندرانی بلوچ سر تس۔ بی ایل اے ترجمان پارے کہ بیست و پنچ سالی سمعیہ قلندرانی نا تعلقداری صحافت نا پیشہ آن ئس، او پنچ سال اسکان بلوچ لبریشن آرمی نا میڈیا ونگ (ہکل) ئٹ خذمت سر تریسہ کرے و دا نیام ئٹ بی ایل اے میڈیا ونگ ءِ سوگوْ و اثردار کننگ ئٹ اسہ اہم کڑد اس سر تس۔
سمعیہ بلوچ ارٹمیکو بلوچ جند ندر زالبول ئس، ہرا کارروائی سر تس۔ اوکان مالو شاری بلوچ کراچی ٹی جند ندر جلہو ئٹ کنفیوشس انسٹی ٹیوٹ نا چینی باسک آتے ٹک کریسس۔ پن کروک تراک نا سوب آن چینی شاری تیتون اوار پاکستانی فورسز کارندہ تے جانی نسخان ارفوئی تما۔
تربت جلہو نا بیرہ اِرا توہ گدرینگ آن پد 13 اگست 2023 آ بلوچستان نا اہم دریابی شار گوادر ئٹ سہب ئنا 9:18 بجہ آن خڑک سلہہ بند بندغ آک چینی شاری تا قافلہ ءِ توننگ ئٹ سرسہب مسر و قافلہ ئٹ اوار چینی شاری و پاکستانی لشکر نا کارندہ تے نسخان تسر۔
پن کروک جلہو نا ذمہ واری ءِ ہم بلوچ لبریشن آرمی ارفے۔ بی ایل اے نا ترجمان جیئند بلوچ بیان ئٹ پارے کہ دا جلہو بی ایل اے نا آپریشن زرپہازگ نا مسٹمیکو بشخ ئس اندن دا آپریشن ءِ بی ایل اے مجید بریگیڈ نا اِرا جند ندر نوید بلوچ عرف اسلم بلوچ و مقبول بلوچ عرف قائم بلوچ سر تسر۔
بلوچ لبریشن آرمی نا ہڑتوم آ جلہو تیٹ ٹک کننگ نا گچین کاری اہمیت تخک؛ تربت ئٹ پاکستانی ڈھکوک ادارہ آئی ایس آئی نا بھلا افسر آتے ٹک کننگا۔ بناء ئٹ پاکستانی لشکر جلہو نا نسخان تے ڈھکسہ دادے پولیس آ جلہو گوندا واہم پدان پک کروک احوالکار آک و سی سی ٹی وی فوٹیج پاش کرے کہ جلہو ئٹ پاکستانی لشکر نا گاڑی ٹک مس ہرا ٹی بھلا افسر آک ساڑی ئسر۔
تدوکا پنچ سال ئنا وخت ئٹ گوادر ئٹ چینی انجینئر و سرمایہ کار آتیا مروک اِرا جند ندر جلہو تیان پد گوادر ئٹ سکیورٹی بست و بند آک بھاز سخت کننگانو واہم خدو گوادر جلہو ئٹ پن کروک نازرک ہند آ سلہہ تیتون اوار سر مریسہ گوادر پورٹ نا پارہ غا ہنوک چینی انجینئر تا قافلہ ءِ ٹک کننگا۔ بی ایل اے ترجمان نا ردئٹ دا آپریشن ئٹ بی ایل اے نا انٹیلیجنس کڑدہ و ٹیکٹیکل کڑدہ ہم اوار ئسر۔
جلہو تیا چمشانک:
خدو بلوچ سلہہ بند آجوئی دوست آک جمعی وڑئٹ 612 جلہو کریر۔ پن کروک جلہو تیٹ پاکستانی لشکر، تیل و گیس کمپنی، مڈی دروک گاڑی و سائٹس، احوالکاری ٹاور، ریل گاڑی و پٹڑی، پیشن نا سرمایہ کاری و ہندی ’کمکار‘ تے ٹک کننگا۔ بلوچ لبریشن آرمی نا سالانہ رپورٹ نا ردئٹ بی ایل اے غٹ 247 جلہو کرے اندن بلوچستان لبریشن فرنٹ نا سالانہ رپورٹ ئٹ پاننگا کہ گل 284 جلہو کرے و ایلو گل آک بی آر جی، بی این اے، بی ایل ٹی، یو بی اے کم و ود 81 جلہو تا ذمہ واری ءِ ارفیر۔
تربت و گوادر جلہو تیتون اوار بلوچ لبریشن آرمی نا خاص کڑدہ فتح اسکواڈ 14 ستمبر 2023 نا شام کوئٹہ شار آن کم و ود 20 کلو میٹر نا مُری آ ولی تنگی نا ہند آ پاکستانی لشکر نا پوسکن جوڑ کروک پوسٹ آتیا جلہو کریسہ اوفتیا کوزہ کریر، جلہوکار آک فوج ئنا سلہہ و گولہ بارود آتے ہم تینتون اوار دریر۔
بی ایل اے نا اسپیشل ٹیکٹیکل آپریشنز اسکواڈ (ایس ٹی او ایس) بولان نا علاقہ مارگٹ ئٹ 11 اکتوبر 2023 آ اسہ کارروائی اسیٹ پاکستان نا پیرا ملٹری فورس فرنٹیئر کور نا اِرا کارندہ صوبیدار محمد خان و سپاہی عبدالرشید ءِ دزگیر کننگا۔ ترجمان پارے کہ دا اسہ انٹیلی جنس بیسڈ کارروائی اس ئس۔
گل ئنا کارروائی تیا تالان سالانہ رسالہ ’دک‘ نا ردئٹ بی ایل اے نا سرمچار آک خدو 9 خاص آپریشن سر تسر ہرافتیٹ پنچ کارروائی ’ایس ٹی او ایس‘، اِرا کارروائی فتح اسکواڈ و اِرا کارروائی مجید بریگیڈ سر تس۔
بلوچستان لبریشن فرنٹ کولواہ ئٹ 3 جولائی 2023 آ پاکستانی لشکر نا موٹر سائیکل آ تالان قافلہ ءِ اسہ جلہو اسیٹ ٹک کریر جلہو نا سوب پاکستانی لشکر نا میجر ثاقب تون اوار شش کارندہ مرگ ئنا گواچی مسر۔
تیوہ بلوچستان ئٹ پاکستانی لشکر نا جوڑ کروک سلہہ بند ٹولی تے ڈیتھ اسکواڈ نا پن ئٹ چاننگک۔ پن کروک ٹولیک پاکستانی لشکر و ڈھکوک ادارہ تا شیف آ مریرہ اندن شاہدیک پارہ کہ دا ٹولی تا مالی خواست آتے پوروْ کننگ کن لشکر اوفتے داڑیلی، زر اکن برمتہ، نشہ بہا کننگ و ایلوفتا موکل تسنے۔
7 اگست 2023 آ بی ایل ایف نا سرمچار آک بالگتر نا علاقہ نلی ٹی ’ڈیتھ اسکواڈ‘ باسک آتا اسہ گاڑی ئسے آئی ای ڈی جلہو ئٹ ٹک کریر ہرا نا سوب 6 جاگہ غا مرگ ئنا گواچی مسر، مرگ ئنا گواچی مروک بندغ تا چاہنداری ڈیتھ اسکواڈ سروک محمد اسحاق و اونا سنگت آتا دروشم ئٹ مس۔
خدو مُسہ نومبر آ بلوچستان لبریشن فرنٹ نا سرمچار آک کوسٹل ہائی وے آ ضلع گوادر نا تحصیل پسنی ٹی بدوک نا ہند آ پاکستانی لشکر نا اِرا گاڑی تیا تالان قافلہ آ سنگر ہلیسہ ترند ءُ جلہو کریر۔ جلہوکار آک اسہ گاڑی ئسے آئی ای ڈی جلہو ئٹ ٹک کننگ آن پد اوفتیا جلہو کریر، ہڑتوم آ گاڑی تیٹ سوار کل 14 کارندہ مرگ ئنا گواچی مسر اندن جلہوکار آک اوفتا سلہہ تیا کوزہ کریر۔
اندا وڑ یک اپریل 2023 آ اسہ جلہو اسیٹ بلوچ لبریشن آرمی نا سرمچار آک زامران نا علاقہ ساہ دیم ئٹ پاکستانی لشکر نا اسہ گاڑی ئسے سنگر کریسہ ٹک کریر، گاڑی ئٹ سوار غٹ چار کارندہ جاگہ غا مرگ ئنا گواچی مسر اندن جلہوکار آک اوفتا سلہہ تیا کوزہ کریر۔
براس:
بلوچ سلہہ بند آجوئی دوست آتا پارہ غان خدو اسہ گچین ءُ گام اس ہمو وخت خننگ ئٹ بس ہراتم راہشونک بلوچ سلہہ بند آجوئی دوست آتا سیوت بلوچ راجی آجوئی سنگر (براس) ءِ بروک وخت ئٹ اسہ سنگل لشکر ئسے نا دروشم ئٹ کننگ نا بابت درشانی کریر۔
براس، بلوچ سلہہ بند آجوئی دوست آتا اسہ سوگوْ سیوت ئسے نا دروشم ئٹ مونا بس۔ ہرا تینا جوڑ مننگ تون پاکستانی لشکر ءِ ترند حالیت نا جلہو تیٹ ٹک کریسہ بھلو جانی و مالی نسخان تسنے، دا جلہو تیٹ پاکستانی لشکر نا کیمپ آتیا کوزہ، نیوی کارندہ تے چاہنداری آن پد مرگ ئنا گواچی کننگ، پاکستانی لشکر نا کارندہ تیتون اوار تیل و گیس کمپنی تا کارندہ تے مرگ ئنا گواچی کننگ اوار ءِ۔
ولے خدو براس نا پارہ غان ہچو جلہو اس مونا بتو واہم داٹی اوار بلوچ سلہہ بند آجوئی دوست گل آتا اواری و اسہ لشکر ئسے ٹہفنگ ءِ گچین ءُ گام ئسے نا ڈول اُننگک۔
لٹریچر:
بلوچ آجوئی دوست گل آتا سلہہ بند کارروائی تیٹ تدوکا منہ سال ئٹ ہرا وڑ بدلی خننگ ئٹ بسنے ہموڑے دا گل آتا پارہ غان لٹریچر آ پام تننگک، ہنوک وخت ئٹ ہرا نا کمبوتی ئس۔
خدو بلوچ لبریشن آرمی نا بنجاہی میڈیا چینل ’ہکل‘ تون اوار ایلو چینلز آتیا 25 نا کچ تربیتی ویڈیوز و کتاب آک شینک کننگار۔ ہرافتیٹ پوسکنا سلہہ تا کاریم ئٹ ہتنگ، شاری گوریلا اسنائپر نا بابت کتاب، ڈیجیٹل سکیورٹی نا بابت کتابچہ، جند ندر زالبول شاری بلوچ نا بابت کتابچہ اوار ءِ اندن پوسکنا سلہہ تا بابت تربیتی ویڈیوز آتے بلوچستان ئٹ کل آن زیات ہیت کروک اِرا بولی بلوچی و براہوئی ٹی شینک کننگ ہم اوار ءِ۔
دا گل آک توئی و سالی کارروائی تیا تالان رسالہ ہم شینک کرینو۔
اندا وڑ بلوچ آجوئی دوست راہشون تا پارہ غان ویڈیو کلہوک ہم شینک مریسہ کرینو۔ خدو بلوچ لبریشن آرمی نا سروک بشیر زیب بلوچ نا ویڈیو کلہو تیا تالان اِرا ویڈیو شینک مسر ہرافتیٹ اسہ کلہو اسیٹ او بلوچ جنز ئنا بابت شابیتی ئٹ ہیت کریسہ خننگک اندن گوادر ئٹ چائنیز انجینئرز آتیا بی ایل اے مجید بریگیڈ نا جلہو تا منہ دے آن پد اونا ارٹمیکو ویڈیو کلہو شینک مس ہرا ٹی او چین و عرب ڈیہہ تیتون اوار جہان ءِ پامدار کریسہ خننگک۔
پن کروک کلہو ئٹ او پارے کہ چین ئتون اوار عرب ڈیہک، یورپ، کینڈا و ننا ایب کیب ئنا ڈیہہ تے سماء مرے کہ بلوچ تینا راجی مڈی تا لٹ و پل ءِ اسہ دروشم اسیٹ ہم سگپرو، ننا ایلو راج آتیتون ہچو دژمنی اس اف اگہ کس بلوچ راجی مڈی تے لٹ و پل کرے، زنک ایسری ٹی پنجابی و پاکستان تون اوار مس پدا گڑا بلوچ دا اُرپرو کہ او اخس ءُ بھلو طاغت ئسے۔
نسخان تیا چمشانک:
خدو جمعی وڑئٹ 49 بلوچ سرمچار بلوچستان نا جتا علاقہ تیٹ شہید مسر ہرافتیٹ 3 جند ندر تون اوار 14 باسک بلوچ لبریشن آرمی نا، 35 باسک بلوچستان لبریشن آرمی نا اوار ءُ۔
بلوچ آجوئی دوست آتے اسہ بھلو نسخان اس سال ئنا ایسر ئٹ بلوچ نیشنلسٹ آرمی (بی این اے) نا ایسر مننگ نا دروشم ئٹ ہمو وخت ارفوئی تما ہراتم سرفراز بنگلزئی تینا سنگت آتیتون پاکستانی لشکر نا مونا سلہہ بِٹسہ پاکستان ءِ منّنگ نا پڑو کرے۔ دا پڑو ءِ او کوئٹہ ئٹ بلوچستان نا نگران احوالکاری وزیر جان اچکزئی تون اوار پریس کانفرنس ئٹ کرے۔
کوالخواک پریس کانفرنس ئٹ دعویٰ کریر کہ سرفراز بنگلزئی 70 بندغ تون اوار سلہہ بِٹینے واہم پن کروک پریس کانفرنس ئٹ بیرہ ہژدہ بندغ خننگار، بھاز آ احوالکار تا ردئٹ کوالخواہ تا پارہ غان اوفتا کچ ءِ ودیفسہ بیان کننگانے۔
سرفراز بنگلزئی نا سلہہ بٹنگ پاکستانی سلہہ بند کوالخواہ تیکن اسہ سرسہبی اس گمان کننگ مریک ولے بلوچستان ئٹ برجاء جنز آ پاش ءُ زیم شاغنگ کپک بلکن احوالکار تا ردئٹ گلزار امام نا گمانی دزگیری آن پد بھاز آ جہدکار آک بی این اے آن پاہناد کریسہ جتا گل آتیٹ اوار مسوسر اندن سرفراز بنگلزئی تون منہ بندغ ئسر و عملی دروشم ئٹ بی این اے مالو آن ایسر مسوسس۔
داکان بیدس بلوچستان ئٹ برجاء جنز ورنا تیا تالان اسہ بھلو کچ اس تیار کرینے ہرانا سوب کمانڈر آتا شہید مننگ یا دزگیری زیات زیم شاغنگ کپک۔
ایسری:
بلوچ سلہہ بند آجوئی دوست آتا حکمت عملی تیٹ بدلی نا سوب اوفتا جلہوک ترند مریسہ ءُ۔ خدو نا اوفتا ترند حالیت نا جلہو تیان پاش مریک کہ تربت کون آ شار مرے یا کوسٹل ہائی وے، گوادر شار نا نازرک ہند مرے یا کولواہ نا مُر ئنا علاقہ یا کوئٹہ کینٹ آن منہ کلو میٹر نا مُری آ ولی تنگی نا علاقہ، غٹ جاگہ تیا بلوچ سلہہ بند آجوئی دوست گل آک متحرک و ترند حالیت نا جلہو تا لائخی تخرہ۔
پاکستانی لشکر آجوئی دوست آتا برخلاف ڈرون جلہو تیتون اوار تیوہ طاغت و وسائل تے کاریم ئٹ ہتنگ ءِ واہم اودے جوانو نتیجہ دوئی مننگ کتنے۔
بلوچ آجوئی دوست آتا جلہو تا سوب ڈیہہ ئٹ پاکستانی سلہہ بند مفاد آتیتون اوار پیشن نا سرمایہ کاری تے بروک وخت ئٹ پین سخت حالیت آتیتون مون تروئی تمنگ کیک اندن شاری بلوچ و سمعیہ قلندرانی بلوچ نا جند ندر جلہوک دا جنز ئنا بدل مروک دروشم ءِ پاش کیرہ۔
بی بی سی اردو تون ہیت کریسہ بی ایل اے نا سروک بشیر زیب نا پاننگ ئس کہ جند ندر آک بلوچ راج ئنا عظیم راجی ہیرو و راجی مڈیک ءُ، بلوچ راج اوفتے آجوئی ایتوک و اُمیت تکک، اندا خاطر اینو اسہ بھلو کچ اس بلوچ نرینہ و زالبول آک عملی دروشم ئٹ مجید بریگیڈ نا بشخ جوڑ مسنو و جند ندر جلہوک بلوچستان نا تیوہ آجوئی اسکان گیشتر ترندی تون برجاء مرور۔
