آجوئی انت ئسے؟
نوشت: وحید انجمؔ
دی بلوچستان پوسٹ
انقلابی ڈول دادے کہ بندغ ءِ فطرت نا قہر، جہان نا محکومی و غلامی آن آزاد کننگہ۔ داڑے دا سوال بش مریک کہ آجوئی انت ئسے؟ آیا دا بندغ نا بیرہ ہورکو تصور ئسے مادی دنیا ٹی دانا ہچ وجود اف یا دا بندغ نا ہمیشہ غان رہینگوکو ارمان ئسے؟ اگہ دنیا ٹی آجوئی بیرکا مجردو لوز ئس پاننگہ، گڑا تو دا لڑ ئٹی ایلو تصوراک ہم بریرہ دہنکہ: نیکی، انصاف، علم، حُسن؛ انت داہم مادی دنیا غان پیشنو گڑا ءُ؟
بندغ نا زند ئنا ہمو وڑ ہراٹی او جبر ئنا جاگہ غا مسرت محسوس کے، کائنات ئٹ مجہولی نا بدل ٹی ایکٹِو کردار ئس مرے۔ عمل کننگ کے، سوال ہفّنگ کے اونا فطری آ حق آتا پین کس ئس زور آوری ئٹ بھلنی کپ، اودے انسانیت نا شرف آن کس بِٹپ تو اونا زند محکومی آن آزادی نا پروسیس ئٹ آزاد ءِ۔ سامراجی بیانیہ ٹی آزادی نا حق ءِ مننگ نا ہیت تو مریک ولے سامراج تینا دہشتگردی ءِ تالان کننگ ءِ ہم دنیا نا آزادی نا خواست ئس پہہ مریک ۔ پاننگ یا لکھنگ نا کچ اسکان تو کوزہ گیر طبقہ آجوئی نا حق ءِ منیک ولے ہرا وخت آ محکوم تینا نت آ سلک تینا آزادی نا توار ءِ خلیک تو سامراج اودے ہر وڑ ئٹ شیف بِٹنگ نا کوشش کیک۔
محکوم نا آزادی نا سفر اجتماعی وڑ ئٹ یونیورسل نا پارہ غا کائک۔ سامراجی آزادی نا تصور محکوم جوڑ کیک ولدا آزادی نا لالیچ ئٹ تینا محدود آ مفاد ءِ عزیز تخک، دا کچ اِسکان کہ انصاف نا زیہا سرمایہ کاری کیک و اودے بہا کیک ایلو کنڈ آ انقلابی مفاد عالمگیر مریک۔ کائنات نا دا بشخ (زمین) ہم ایلو بشخ آتان سرجم جتا اف و کل بدل مننگ (حرکت) نا قانون ئٹی تفوک ءُ، بندغ ہم کائناتی وجود نا شیف و بُڑزی تا نیام ئٹی ءِ۔ بھاز آک دا پارہ کہ بندغ زمین چھنڈ، گِروک، طوفان، آتش فشاں و وبا تان آجو مننگ کپک تو نن امر اودے آجوئی نا توار آ ہتین۔ راستیکا دا ہیت آزادی نا بارت ئٹ پورو افک و حاکمانہ ءُ دلیل ئسے انتئے کہ مطلق آزادی نا بےمننگ آن دا ظاہر مفک کہ آزادی نا ہر سطح ممکن اف۔ محکوم تینٹ آجوئی نا تصور ءِ بنیاتی حوالہ ئٹ اوہن پاپک ہمر سامراجی ذہن اونا وکالت ءِ کیک، اونا آجوئی نا تصور بندغ نا ظلم و لُٹ و پُل آن بندغ ءِ بری کننگ تو تفوک مریک۔
کائناتی قانود آتا اسہ تینا سفر ئس ہم ارے اگہ اوٹی استار تا پِننگ، رخت آتا بارنگ، اسہ سہدار نا ایلو سہدار تا غِزائی زمزیر ئٹی بننگ ارے تو ہندن بندغ ہم دا قانود آن تیبہ غان تیبہ پیشن اف۔ بندغ نا جہد ہم کائناتی قانود آتو ہم آہنگ مننگ کِن برجا ءِ ہراڑیسکا بندغ تینا جدوجہد ئٹ کائنات نا ویدن (راز) آتے پُہہ مسنے، او شعور ہم محکوم طبقہ غاتا حق ئٹی ہتنگپک، اگہ ہتنگہ تو بندغ نا لس زند ئٹی بھلو جست ئس بننگ کیک۔
آجوئی نا خیال ءِ کیئیک خواہش آتے چُھٹفنگ، جہان نا زند آن مُر مننگ، ویرانی تیٹ رہینگ، تپسیا اختیار کننگ ئٹی پٹیرہ، بھاز آک دادے داڑے وے رسینگوکو گڑاس پارہ۔ اولیکو ہیت دادے کہ جہان نا گیشتر دیہاڑ ہندا پائک کہ بھاز آ محکوم مخلوق آک ہرافتا ڈغار، وسائل و دود آ پین حاکم ئس بھلُنی کرینے تو او تینا آجوئی نا مزاحمت ئٹ تینے زندہ تخانو، و آجو مسنو نشان ہم تسنو۔ ارٹمیکو ہیت دا کہ دا وڑ نا خیال آتا پد ئٹ کائنات ئٹی بندغی جہد و تخلیق نا وے پُہی ءِ و ہر دور ئنا پیداواری ساخت نا وے چائنگی ءِ۔ سوج دادے کہ اگہ محکوم دا وڑ نا آزادی نا کنڈا کائک یا آجوئی ءِ ممکن پہہ مفک گڑا دا گڑا ءِ ہم امر گیرام کے کہ اسہ وخت ئسیٹ بندغ گِروک آتان، خاخر تان، خل تان ہم بےکچ خُلیسکہ و تینے اوفتا خلیس آن آجو کننگ کتوکہ بیوس سلیسکہ، ولے جہد ئٹ شعور نا کڑمبی تیٹ ہنسا بندغ دافتان تینے آجو کریسہ بریک و اوفتا بارت ئٹ زیادہ باعلم مریک۔ ہندن نوآبادیاتی دور ئٹی بھاز آ ڈیہک غلامی نا خلاف جہد کریسہ تینے آجو کرینو و اینو اسکان ہم دا مزاحمت برجاء ءِ۔ اسٹ مریک سماجی ارتقا ٹی راج آتا، بولی تا و ثقافت آتا تینا دروشم ءِ گوئینگ، بدل مننگ دہن کہ کیئی راج آک، بولیک وختس تینا پِن ئٹ زندہ ئسر داسا افس۔ ولے زندہ سلوکا راج، بولی و دود آتا زورآوری مس تو داڑے آزادی نا توار نا بش مننگ الّمی مریک۔
آجوئی نا سوچ دا گڑا غان ہم خڑک ءِ کہ بندغ فطرت نا اخس در تبدیلی تان واخب مننگ ئٹی ءِ و اونا تہہ ٹی روان آ ساز آتان اخس ءِ بندغی نا ڈکھ ءِ مُر کننگ کن چھیڑنگ نا وس تخک۔ آزادی نا تصور نا زیہا کوزہ گیر (آزاتی ءِ پُلوکا) نا خواہش مریک کہ اودے تینا مغدار آ بیان کیو و زیردست آ ہندا سامراجی آزادی نا گمان ءِ غالب کیو، ہراڑکہ او علمی پِڑ آ پوسکنو پوسکنو خیال مون آ ہتیک ولے او سوچ ئنا بُڑزی تان مُر اسہ گولو لِکیر ئسے ٹی چرینگرہ۔ لُٹ و پُل نا پروگرام ٹی آزادی نا ادراک ءِ مُجی کننگ نا ہم کوشست کننگک، ہراڑکہ محکوم نا احساس آتے تینا بناوٹی جہان تو ملفنگک تاکہ او ہندا ادراک آن گدرینگسہ غلام ءُ وجود ئس جوڑ مرے۔
بندغ ءِ آجوئی نا حق ءِ تننگ نا زیہا بھلو بھلو قانود پیش کننگانے، جہانی عدالت جوڑ کننگانے ولے بندغی نا بھلا کچ محکومی نا زند ءِ گدریفنگ ئٹی ءِ، انت بندغ جبلت نا بنیاد آ دڑد خور اف؟ اگہ ہئو تو گڑا آجوئی نا حق ءِ پُلوکا نا خلاف انقلابی تا جہد اَرا جبلت نا پھاشی ءِ؟ کوزہ گیر نا تینا عوام آن ہم ایلو ءِ غلام جوڑ کننگ نا خلاف نفرت کننگک۔ بندغی ہستی ٹی انقلابی و رد انقلابی نا تضاد ءِ اونا سماجی وجود و نظام نا تہہ ٹی ہُننگک۔
جہانی سماج نا خواست آتان اسٹ دادے کہ مادی وسائل آتا، سماج نا بنیاتی معاشی ساخت آ ٹولی نا جاگہ غا اجتماعیت کن جہد مرے، راج آتے محکومی آن آجو کننگ نا جہد کننگہ۔ دا وڑ نا انقلابی تبدیلی ٹی آجوئی نا حق، بندغی تعلقداری، سیاست و ثقافت کل بالائی ساخت آک عوامی و جمہوری مننگ کیرہ۔ آجوئی (محکومی آن پیشتمنگ) نا سرحال آ مکالمہ غان مُست دا الّمی ءِ کہ راستی وڑ ئٹ محکوم نا تینا آجوئی نا خواست آک انت انت ءُ؟ انت پین کس ئس اوڑکہ آجوئی نا تصور ئس ایجاد کننگ ئٹی تو اف؟ سامراجی بنیات آ جوڑ مروکا تصور محکوم نا معروض تو ہم آہنگ مننگ کپک۔
دا سوال کہ: آجوئی انت ئسے؟ و اَرا وڑ نا آجوئی؟ مکالمہ و پَٹ و پول نا پِڑ آ بف بلکہ اسہ نارست ءُ و وے چائنگوکو تصور ئس مرے، دا وڑ نا تصور آن آجوئی نا عمل چُنکو کچ ئس کاریم کیک، بھاز آ سطح و جہت آک ویران رہینگرہ و آجوئی نا عمل ءِ تہہ ٹی نزور تخرہ۔ آزادی نا یونیورسل تصور آن اودے یکہ کننگ آن اونا شعور ہم چُنک سلک دہن انگا سوچ انقلابی کاروان تا جہد ئٹی سوگوی نا جہا نزوری ہتیک۔ آزادی نا تصور ءِ اونا پراسیس نا تہہ ٹی ہُننگ بھاز الّمی ءِ و اونا بیانیہ ءِ فلسفیانہ بنیات آ تالان کننگ، اونا سرسہبی ءِ۔
؎ ہر اسٹ نا توار آجوئی
اینو خْواہک ڈغار آجوئی
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
