جرمن زبان نا اسے نظم اس | مَٹ: محبوب شاہ
ہراتم اوک اولیکو وار بسر یہودی کے دریر
ہمو تم ای چپ کریٹ
انتیکے ای یہودیس الوٹ
ولدا اوک بسر کمیونسٹ آکے دریر
ای ولدا چپ کریٹ
انتیکے ای کمیونسٹ اس الوٹ
دا وار سوشل ڈیموکریٹس آتا وار اس
ای بائے تینا بند کریسٹ
انتیکے ای سوشل ڈیموکریٹس اس الوٹ
پدی بسر دا جار مزور یونین نا کماش آکے دریر
ای خنکے تینا تر کریٹ
انتیکے ای مزور یونین نا باسکس الوٹ
ہراتم بسر کنے دریر
داسہ اہیت کروکو کس الو
کوالخواہ تا رِدئٹ داریوش مہرجوئی ءِ ہفتہ نا بیگہ غا اونا زائیفہ تون اوار تہران نا رہی آ اُراٹی چاخو ئٹ کسفنگا۔
سی و ہشت سالہ پنت تروک ایرانی ‘سینما نا اولیکو لڑ’ آن تعلقدار ئس، ہرا 1969 ئٹ ‘دا کاؤ’ کوْن ءُ جہان ئٹ پنی مروک فلم جوڑ کرے ہرا دا تحریک نا اولیکو فلم آتیان اسٹ ئس۔
ایرانی عدلیہ نا ‘میزان آن لائن’ احوالکاری ایجنسی نا رِدئٹ تہران نا رہی البرز صوبہ نا چیف جسٹس حسین فاضلی ہریکندی پارے ‘بنائی سروسوج نا وختا نن خنان کہ داریوش مہرجوئی و اونا زائیفہ وحیدہ محمدیفر ءِ لخ آ کیہی دک خلیسہ کسفنگا۔’
ہندی اخبار ‘اعتماد’ ئٹ شینک مروک گپ تران ئٹ فلم ساز نا زائیفہ پاریسس کہ اوفتے تڑی تننگانے و اوفتا اُراٹی دُزی کرفنگا۔
میزان آن لائن نا رِدئٹ ‘پٹ و پول آن سما تما کہ مہرجوئی نا بنجائی اُرا ئٹ بیدس قانود آن پیہنگ و اوفتا گڑا تا دزی نا بابت ہچو شکائست اس نوشت کننگتویسس۔’
دریوش نا تیوہ غاتیان یات کروک فلم آتیٹ ‘دی کاؤ’ تون اوار 1970 نا ‘مسٹر گلبل’، 1977 نا ’دا سائیکل‘، 1987 نا ’دا ٹیننٹس‘، 1990 نا ’ہامون‘، 1993 نا ’سارہ‘، 1995 نا ’پری‘ و 1997 نا ’لیلیٰ‘ اوار ءُ۔
مہرجوئی ءِ دروت ندر کننگ کن دا تیوہ غا فلم آتے پیرس نا تلہ ‘ڈی امیجز’ ئٹ نشان تس کن مونا ہتنگاسس۔
1980 و 1985 نا وختا ایرانی فلم ساز فرانس ئٹ ہندی مس ہراڑے او دستاویزی فلم ‘جرنی ٹو دی لینڈ آف رمباڑ’ آ کاریم کرے۔
ایران واپس بننگ آ اونا فلم ‘دا ٹیننٹس’ باکس آفس آ دمچر کرے۔
1990 ئٹ او ‘ہامون’ نا پنت کاری ءِ کرے ہرا اسہ تامور بوگ شوگ فلم ئسے ہراٹی اسہ دانشور ئسے نا زند ئٹ مُسٹ آن گڈ فریشانی تے نشان تننگا۔
1990 نا دہ یک نا وختا مہرجوئی سارہ، پری و لیلیٰ کوْن آ فلم آتیٹ زالبول تا زند آتا درشانی ءِ کرے۔
بلوچستان نا علاقہ کولواہ ٹی پاکستانی لشکر نا چیک پوسٹ آ جلہو کننگا، پن کروک جلہو نا ذمہ واری ءِ بلوچ لبریشن آرمی ارفے۔
حوال تا ردئٹ کولواہ ٹی رود نا ہند آ نادرست سلہہ بند بندغ آک استو پاکستانی لشکر نا پوسٹ ءِ بھلا سلہہ تیٹ ٹک کریر۔
واہم دا بابت سلہہ بند کوالخواہ تا پارہ غان دائسکان ہچو ہیت اس مونا ہتنگتنے۔
درو آن پن کروک علاقہ و ایب کیب ئٹ پاکستانی لشکر نا ہن و بر ئٹ ودکی خننگانے۔
بلوچ آجوئی دوست سلہہ بند گل بلوچ لبریشن آرمی نا ترجمان جیئند بلوچ پن کروک جلہو نا ذمہ واری ءِ ارفیسہ پارے کہ ننا سرمچار آک کولواہ ٹی کوزہ گیر پاکستانی لشکر ءِ اسہ جلہو اسیٹ ٹک کریر ہرا ٹی مُسہ کارندہ ٹپی مسر۔
ترجمان پارے کہ بی ایل اے نا سرمچار آک استو کم و ود 9 ئنا وخت آ کولواہ ئٹ رود نا ہند آ کوزہ گیر پاکستانی لشکر نا اسہ پوسٹ ئسے آ گرنیڈ لانچر ئٹ کیہی گولہ تے خلکر، تراک آتا سوب آن کم آن کم مُسہ دژمن کارندہ ٹپی مسر اندن دژمن ءِ مالی نسخان تیتون ہم مون تروئی تما۔
او پارے کہ بی ایل اے دا جلہو نا ذمہ واری ءِ ارفک۔ کوزہ گیر پاکستانی لشکر نا تیوہ پیشتمنگ اسکان ننا کاروائیک برجاء مرور۔
اسرائیل و فلسطین نا اڑینگ
ٹی بی پی سرگپ
ہفت اکتوبر آ حماس نا سلہہ بند کڑدہ عزالدین القسام بریگیڈ نا کمانڈر محمد ضیف اسرائیل نا برخلاف طوفان الاقصٰی آپریشن نا پڑو کرے، القسام بریگیڈ نا دوانزدہ سد جنگجو غزہ – اسرائیل نا سیم آ رکھوک واڑ ءِ کیہی جاگہ غاتیان نقب خلیسہ جاندمی اسرائیل ئٹ فوجی چھاؤنی تیا بھلو کچ اسیٹ جلہو کریر، ہرا اسرائیل و جہان ءِ گوڑیفے۔ نوزدہ سد ہفتاد و دو نا کپور دے آ شام و مصر نا اسرائیل آ جلہو نا پنجاہ سال آن پد اولیکو وار داخس بھلو کچ ئسے آ جنگ بش مسنے۔
القسام بریگیڈ نا جلہو ئٹ اسرائیل نا سینزدہ سد آن زیات فوجی و لس شاری کسکر، ہراڑان گڈ اسرائیلی فوج غزہ نا پٹی آ وے ایسر مروک بمب جلہو تا لڑ ءِ بنا کرے، ہرا ٹی دائسکان اِرا ہزار آن زیات بندغ کسکنو ہرافتیٹ بھلا کچ چنا و زالبول تا ءِ۔ اقوام متحدہ نا ردئٹ اسرائیل نا آسمانی جلہو تیٹ اونا یانزدہ باسک مرگ ئنا گواچی مسنو و ریڈ کراس نا ترجمان نا پاننگ ءِ کہ اسرائیلی فوج پیرامیڈکس و اسپتال آتے ٹک کننگ ءِ ہرافتیٹ کیہی پیرامیڈکس آک کسکنو اندن جرنلسٹ ود آؤٹ بارڈر نُہہ فلسطینی صحافی تا کہنگ نا پڑو کرینے۔
ہیومن رائٹس واچ نا پاننگ ءِ کہ اسرائیل نا لشکر غزہ و جاندمی لبنان ئٹ پیہن فاسفورس بمب آتے کاریم ئٹ ہتنگ ءِ۔ اسرائیل نا مُسہ لکھ و شست ہزار پیادہ لشکر بکتر بند گاڈی، ٹینک و توپ خانہ آتیٹ غزہ ءِ گھیڑ کریسہ لشکر کشی کن تیاری کننگ ءِ و کسر تے بند کننگ وخت آ شار تے اسکان خوراک، پاٹ و دیر کون آ الّمی آ گڑا تے سر کننگ نا موکل تننگ افس۔
جہان نا جتا مسلمان ڈیہہ تا سروک آک و او جاگہ غاتا جماعت آک فلسطین تون ہمکوپئی کن توار بڑز کننگ ءُ، ولے ہمو حق آتے تینا ڈیہہ تیٹ راج آتے تننگ افس۔ ترکی غزہ ئٹ بمباری نا ترند مخالفت کننگ ءِ ولے ایلو پارہ غان شام و عراق ئٹ آجوئی کن کاریم کروک کرد آتیا آسمانی بمباری کننگ ءِ۔
بلوچستان ئٹ زنک ایسری آ چُپ مروک آک فلسطینی تا لس خون آ برانز کننگ ءُ۔ پاکستان ئٹ اسرائیل آپریشن آ نغد کاری و حماس نا مزاحمت نا ستا ءِ کروک آک تینا ہمسایہ بلوچ راج نا مزاحمت ءِ لتاڑنگ کن فوجی آپریشن نا مُخ تفی ءِ کیرہ۔
اِرا ریاستی حل آن بیدس فلسطین و اسرائیل نا جنگ اندا وڑ برجاء مرو۔ جہان نا اثر دار آ ڈیہک جنگ ءِ ایسر کننگ کن عملی گام ارفر انتئے کہ فلسطین نا ویل ءِ ایسر کننگ آن بیدس نیامی دے ٹک ئٹ ایمنی ہتنگ ممکن اف۔ اقوام متحدہ نا قراداد آتا ردئٹ و جہانی قانود آتے کاریم ئٹ ہتنگ آن ہی فلسطین و اسرائیل ئٹ کشت و خون ءِ ایسر کننگ مریک۔
بلوچ ریپبلیکن گارڈز نا ترجمان دوستین بلوچ میڈیا غا شینک کروک بیان ئٹ پارینے کہ سوئی آن کراچی آ ہنوکا 36 انچ نا گیس پائپ لائن ءِ بھس کننگ نا ذمہ واری ءِ ارفنہ۔
بی آر جی نا ترجمان نا پاننگ ئس کہ درے ننکان سندھ نا ضلع خیر پور ئٹ سوئی آن کراچی آ ہنوکا 36 انچ نا گیس پائپ لائن ءِ بی آر جی نا سرمچار آک تراکی شورہ کڈ کریسہ بھس کریر۔
ترجمان دوستین بلوچ پارے کہ ننا دا وڑ ئنا کاروائیک بلوچستان نا آجوئی اسکان برجاء مرور۔
بلوچ لبریشن آرمی نا ترجمان جیئند بلوچ میڈیا ٹی شینک کروک بیان اسیٹ پارے کہ بی ایل اے نا سرمچار آک کیچ نا بنجاہی شار تربت ئٹ بی ایل اے انٹیلیجنس ونگ نا ڈھکوک احوال آ کارروائی کریسہ کوزہ گیر پاکستانی لشکر نا 6 کمکار ءِ مرگ ئنا گواچی کریر۔
جیئند بلوچ پارے کہ بی ایل اے نا انٹیلی جنس ونگ نا معلومداری تا ردئٹ پاکستانی لشکر نا کیہی کمکار و مخبر آک تربت شار نا علاقہ سیٹلائٹ ٹاؤن ئٹ اسہ ہورک ءُ اُرا ئسے رہینگنگ کن کاریم ئٹ ہتیرہ۔ پن کروک کمکار آتے کوزہ گیر پاکستانی لشکر نا کیمپ آ بننگ ہننگ و دژمن نا گاڑی تیٹ سوار مریسہ ہم خننگا۔
او پارے کہ پن کروک کارندہ غاک دروشم بدل کریسہ کوزہ گیر پاکستانی لشکر کن مخبری و بلوچ دژمن کاریم تیٹ اوار ئسر، ہرا بیرہ پِن ئنا ڈیتھ اسکواڈ کارندہ آتے جاگہ ہم فراوان کننگ ئسر۔
او گیشتر پارے کہ بلوچ لبریشن آرمی نا سرمچار آک کارروائی کریسہ استو کم و ود 12 بجہ نا وخت آ پن کروک ٹھکانہ غا چھاپہ خلکر، ہراڑے شش دژمن کمکار جاگہ غا مرگ ئنا گواچی مسر اندن نرّنگ نا کوشست ئٹ اِرا کمکار ٹپی مسر ہرافتیٹ اسہ بھاز ٹپی اس اوار ءِ اندن ہمو جاگہ غا ساڑی اسہ مار ئسے اونا چنک سن ئنا سوب سرمچار آک نسخان تتور۔
او پارے کہ مرگ ئنا گواچی مروک کمکار آتیٹ اللہ داد نا مار رضوان، ممتاز نا مار شہباز، ممتاز نا مار وسیم، شفیق احمد، اسلم نا مار محمد نعیم و رمضان نا مار سکندر ہند ملتان، نارووال و پنجاب اوار ءُ۔
جیئند بلوچ پارے کہ بلوچ لبریشن آرمی ہندی ٹھیکیدار، ہوٹل و اُرا خواجہ غاتے خبڑدار کرینے کہ او کوزہ گیر پاکستانی لشکر نا کمکار آتے کمک تننگ آن پدی مریر، پن کروک کمکار آک دروشم بدل کریسہ جتا ڈول تیٹ تربت شار تون اوار ایب کیب ئٹ کوزہ گیر پاکستانی لشکر نا پاننگ آ بلوچ راجی آجوئی نا جنز نا برخلاف کاریم کننگ ئسر۔
بی ایل اے نا ترجمان پارے کہ نن اسہ وار پدا ٹھیکیدار، ہوٹل خواجہ و رہینگوک آ اُرا خواجہ غاتیا پاش کینہ کہ کوزہ گیر پاکستانی لشکر نا کمکار آتے کمک فراوان کننگ آ او تینا جانی و مالی نسخان تا ذمہ وار تینٹ مرور۔
امریکہ نا غلام آک کہ ہرافک تینا مزاحمت ئٹ دیہاڑ نوشتہ کریر
نوشت: ڈاکٹر مبارک علی | مٹ: برناز بلوچ
دی بلوچستان پوسٹ
امریکہ نا جاندومی ریاست آتیٹی افریقہ غان ہتوکا غلام آتا بھلو کچ اس آبات ئس، ہرافک سفید فام مالک آتا ڈغار تیٹ سخت خواری ئٹ کاریم کریرہ۔
ہراتم اوفتے غلام جوڑ کرسا ہتنگ مس گڑا اوفتا پجار ءِ مٹ کننگا۔ اوفتیا پوسکنو پن تخنگ مس۔ اوفتا مذہب ءِ مٹ کننگا و اوفتے مسیحی جوڑ کننگ مس و اوفتا خواری کشی ءِ مننگ متو بلکن اوڑان نمن کرسا اوفتے شیف خلکر و کم تر ثابت کریر۔
اوفتا باروٹ دا ہیت لس کننگا کہ دا بدرنگ، موْن، گند کروک، بے واک و نالائخ ءُ۔ دا حالیت ئٹ اوفتون ترندی ئٹ پیش بننگ درست ءِ۔
نیگروز آتا باروٹ دیہاڑ نا ارٹمیکو چمشانک ءِ نوشتہ کننگ ڈکھیا ئس، انتئیکہ اوفتا تینا ہچو نوشت اس الوکہ۔ دا کمبوتی ءِ پورو کننگ کن تاریخ دان آک مسکوہی غلام آتیان انٹرویو ہلیسہ اوفتا زند و کاریم تا باروٹ ئٹ سرسوج کریر، دا وڑ امریکی غلام آتا اسہ پوسکنو دیہاڑ اس جوڑ مس، ہراد پیہن دروشمی آ نسل پرستی و اوفتا رویہ ءِ نغدی وڑ ئٹ مونا ہیس۔
غلامی نا دا سرحال آ Paul D. Escott نا کتاب Slavery Remembered قابل ذکر ءِ۔
نوشتکار آک درشان کیرہ کہ غلامی نا ادارہ ءِ برجا تخنگ کن پیہن دروشمی مالک آک سزا و اذیت تننگ ءِ کاریم ئٹ ہیسر تاکہ غلام آتیٹی خُلیس مرے و اوفک ہچ وڑ ئنا مزاحمت کپس۔
سزا تیٹی لس خل خلنگ اسہ سزا اس ئس، ہراتم غلام آک ڈغار تیا کاریم کننگ مسرہ گڑا فورمین بھاز وخت بیدس سوب ئسے آن ہر اسٹ ءِ کوڑا خلککہ۔ کاریم ئٹ بے واکی درشان کروکا تیکن جتاؤ سزا ئسک۔ ہندنکہ لخ ئٹی آہن نا طوق بیرفنگاکہ۔ نت تے زمزیر آتیٹ تفنگاکہ۔ ترند سزا نا حالیت ئٹ چھٹ ئٹ تفیسہ درخت آتیا ٹنگنگ مسرہ۔ وختس اوفتا دُو تے خاخر ٹی ہشارہ و وختس اوفتا ٹپ آتیا بے چھٹنگاکہ۔ گمان دا ئسک کہ دا سزا تا خُلیس آن غلام آتے تینا دوٹی کننگ مرو، و اوفتیٹی ہمت مروف کہ اوفک خواجہ آتا پاروکا ہیت آتیان نمن کیر۔
کاریم کن تیوہ ہفتہ مسکہ و حق زر اکن ہچو دے اس گچین مروک متوکہ۔ نرینہ و نیاڑی تا خاص ءُ پوشاک مسرہ ہرا سال ئٹی بیرہ اِرا وار اوفتے تننگارہ۔ اوفتا ہنکین آک بیرک دروشمی آ بان آک مسرہ و کُننگ کن نیمہ گڑا تننگاکہ۔ اگہ اسہ غلام ئسینا برام مسکہ گڑا او خواجہ نا است خواہی دا مسکہ کہ او نیاڑی زیات آن زیات چنا ودی کے تاکہ بھلن مننگان پد اوفک ہم غلامی ٹی اوار مریر۔ چنکا چنکا تے صفائی نا کاریم تیٹی خلنگاکہ و پانزدہ سال مننگ تون اوفتیان تیوہ کاریمک ہلنگارہ۔
غلام آتے مسہ تپہ ٹی بشخ کننگاسس، ہمو غلام آک کہ ہرافک ڈغار تیٹی کاریم کریرہ اوفتا تیوہ وخت سہب آن شام اسکان ڈغار تیٹی گدرینگاکہ، ایلو کاریگر آک غلام ئسر ہرافتے ہنرمندی، فنی چاہنداری نا سوب زیات ڈکھیا مروئی تمتوکہ۔ مسٹمیکو اُرائی غلام آک ئسر۔ اُرا نا کاریم تے کننگ نا سوب آن سفید فام مالک آک اوفتا خیال ءِ تخارہ۔ اوفتے کُننگ نا آسراتی ہم ئس۔ کوچ مین ہراتم وردی ءِ بینسا گاڑی ءِ چلفیکہ گڑا اود تینے ایلو غلام آتیان بڑز ہلککہ۔
غلام آتیٹی وفاداری نا جوزہ ءِ برجا تخنگ کن چرچ ئٹ عبادت نا وخت پادری تینا ہیت آتیٹی بائبل نا حوالہ ءِ تریسہ دا پنت تسکہ کہ غلام آتے مالک آتا وفادار مننگ مرے و کاریم تیٹی بے واکی نا درشانی کننگ مف ولے دا پنت و تبلیغ نا پد ہم غلام آتا تہٹی مالک آتا ہڷ و تس نا برخلاف جوزہ غاک بش مسرہ ہرا مزاحمت نا دروشم ہم ہلکرہ۔
مزاحمت اسہ ڈول دا ہم ئس کہ غلام آک نرّارہ ولے زوت اوفک ہلنگارہ۔
نرّوکا غلام آتے توننگ کن ہر کنڈ آ سفید فام گارڈ آتا چوکیک ئسر۔ ہلنگ آن پد نرّوکا غلام آتے سخت سزا تننگاکہ۔ گڑاس غلام آک نرّارہ و کھیب نا جنگل ئٹ تینے ڈھکارہ و اوفتا سنگتاک اوفتے کُننگ نا گڑا دریرہ سر کریرہ۔ مزاحمت نا اسہ ڈول داہم ئس کہ ناجوڑ مرین و تینا بشخ نا کاریم ءِ پورو کپن۔
سفید فام مالک آتا دا کوشست مسکہ کہ غلام آک اسہ جاگہ غا اوار تولپس تاکہ اوفتا نیامٹ ہچو سیوتی اس ودی مف، ہندا خاطران غلام آک ڈھکوک اوڑدہی مسرہ و تینا ڈکھ و دڑد آتے بیان کریرہ۔ مسخت دا ئس کہ اوفتا نیامٹ چاگڑد نا گمان ودی مرے و اسٹ مریسہ اوفک اسٹ ایلو نا ڈکھ و ویل آتیٹی اوار مریر۔ غلام آک دا ماحول ئٹ رہینگسہ ‘موْنا ربیدگ’ ءِ ہم ودی کریر ہرانا درشانی اوفتا ساز و زیمل و چھاپ آن مسکہ۔
او ساز و زیملی ازباب و دھول جوڑ کریر ہرانا سُر آ اوفک چھاپ کریرہ و شئیر خلکرہ۔ موْنا ربیدگ اوفتے اسہ جتاؤ پجار اس تس۔ امریکہ ئٹ لنکن نا کماشی ٹی سول وار بناء مس تو فیڈریشن نا مسخت دا ئس کہ ساؤتھ ءِ جتا مننگ اِلنگ مروف و یونین ءِ برجا تخنگ کن غلامی ءِ ایسر کننگ مرے تاکہ جاندومی ریاست آک نزور مریر۔
دا جنگ ئٹ غلام آک فیڈریشن نا فوج آتتون اوار مسر انتئیکہ دا غلامی نا ایسری کن جنگ کننگ ئسر، ہراتم جنگ ایسر مس و فیڈریشن نا فوج آک جاندوم ئٹ تینا حاکمیت ءِ مونا ہیسر گڑا غلام آتے اسہ پوسکنو آزموندہ اس رسینگا کہ فیڈریشن نا فوجیک ہم سفید فارم ئسر و اوفتیٹی ہم نیگروز آتا برخلاف تعصب ئس، دا وڑ خانہ جنگی غلام آتے آجو تو کرے ولے داڑتون اوار اوفتیکن کیہی ویل ہم ودی کرے ہرافتیٹی کلان بھلا ویل بیروزگاری ئس۔
غلام آتا گڑاس خاہوت آک روزگار نا پٹ و پول کن شمال نا ریاست آتیا ہمپیر ولے داڑے ہم اوفک تعصب نا گواچی مسر۔ ہرا غلام آک جاندوم ٹی پد رہینگاسر اوفک مسکوہی مالک آتا ڈغار تیٹی تنخواہ نا زی آ کاریم بنا کریر۔ جاندومی ریاست آتا باتیک غلام آتا آجوئی ءِ سگیتور۔
کو کلکس کلان (Ku klux klan) اسہ دہشتگرد جماعت اس ئسک ہرا نیگروز آتے بھیم نا گواچی کریکہ۔ داڑتون اوار جاندمی چاگڑد آک زنک پرستی نا بنیات آ نیگروز آتیان بائیکاٹ کریر، اوفتے سفید فام وانگجاہ تیٹی داخلہ تننگتوکہ۔ اوفتا عبادت جاہ جتا ئس، اوفتا پادریک ہم نیگروز مسرہ۔ ہوٹل آتیٹی اوفتے پیہنگ نا موکل الوکہ۔ بس آتیٹی اوفتیکن کن پد ئنا نشست آک مسرہ، سفید فام و نیگروز آتا نیامٹ برام کننگ آ رکھ ئس۔
دا تعصب و خار آتا نیامٹ بلیک کمیونٹی تینا حق آتیکن جہد و مزاحمت ءِ برجا تخا۔ داڑسکان کہ 1960 نا کرن ئٹ ہراتم کینیڈی امریکہ نا صدر جوڑ مس گڑا یکئی نا قانود آتے ایسر کرسا موْنا چاگڑد ءِ اونا حق آتے تس۔
داڑان بیدس کہ جمہوریت موْنا چاگڑد ءِ اونا سیاسی حق آتے تس ولے داسکان امریکہ نا چاگڑد آتیٹ نسلی تعصب برجا ءِ، واہم موْنا چاگڑد تینا دود و ربیدہ، ساز و زیمل، ادب و آرٹ ودی کرسا تینا پجار ءِ سوگوْ کرینے، و اوفتا دا سفر انگہ برجا ءِ۔ غلامی آن آجوئی اسکان اوفتا مزاحمت و جہد آن اوفتا آجوئی نا جوزہ آتا درشانی مریک۔
نگران وزیر داخلہ سرفراز بگٹی نا اسکواڈ ٹی مروک گاڑی اسلام آباد ٹی شکست نا گواچی۔
پولیس نا ردئٹ شکست ایئر پورٹ نا ہند ٹلیاں چوٹ آ مس، ہراڑے نگران وزیر داخلہ نا اسکواڈ نا گاڑی آئل ٹینکر ٹی ڈک لگا۔ اسہ آئل ٹینکر اس رد چوٹ ہلیسہ اسکواڈ نا چِر آ رسینگا، ٹینکر ہرانا ڈرائیور ءِ دزگیر کننگانے۔
پولیس نا ردئٹ شکست نا وخت نگران وزیر داخلہ سرفراز بگٹی ساڑی الو، او خیریت ئٹ ءِ۔ شکست ٹی ارا بندغ ٹپی مسر ہرافتے دارو کن اسپتال آ دننگانے ۔
اوغانستان ئٹ درو اسہ شیعہ مسیت اسیٹ خودکش تراک اسیٹ کم آن کم ہفت بندغ مرگ ئنا گواچی و پین پانزدہ نمازی ٹپی مسر۔
وت کش تراک ہمو وخت مس ہراتم مسیت ئٹ جمعہ نا نماز خواننگ مریسہ ئس۔ رائٹرز نا اسہ تیدری اسیٹ پاننگانے کہ کہوک تیوہ غا بندغ آتا تعلقداری شیعہ کُڑدہ غان ئس۔
پولیس نا ترجمان شیر احمد برہانی اسہ بیان اسیٹ پارینے کہ جلہو بغلان صوبہ نا بنجاء پلِ خمری شار اٹ مس۔
رکھوک کارندہ غاک دا پٹنگ نا کوشست ئٹی ءُ کہ جلہو کروک امام زمان مسیت آ جلہو کننگ کن دا علاقہ ئٹی امر سر مس۔
جلہو نا ذمہ واری ءِ داعش ارفینے ہرا ‘اسلامک اسٹیٹ خراسان’ نا پن ئٹ ہم چاننگک۔
تدوک وخت ئٹ خاص وڑئٹ شیعہ اقلیت آتا برخلاف شابیت کچ ئسے آ دہشت گرد جلہو تیٹ دا کُڑدہ نا دُو مسونے۔
طالبان کوالخواہ تا پارہ غان شینک کروک عکس ئٹ مسیت نا تہٹی خیسن آ غالی آ تالان ڈھیر ئٹ نمازی تا ذاتی گڑاک و شال آتیٹ ڈھکوک جوْنک خننگرہ۔
اسلامک اسٹیٹ خراسان اگست 2021 ئٹ اوغانستان نا حکمرانی ءِ طالبان نا کوزہ آن گڈ تیوہ غا ملک ئٹ مسیت و اقلیت آتیا جلہو تیٹ ودکی کرینے۔
ملک نا کوالخواہی دوئی کننگ آن گڈ طالبان داعش نا کاریم تے توننگ کن اوفتا برخلاف سلہہ بند کرروائی کننگ ءُ۔ اوفتا دعویٰ ءِ کہ داعش نا واپس ءِ گوْنڈ کننگانے۔
اسلامک اسٹیٹ خراسان کُڑدہ 2014 ئٹ اوغانستان ئٹ مونا بس، و دادے طالبان کوالخوا تیکن تیوہ غاتیان بھلا رکھوک ہڑانڈ سرپد مننگک۔
بلوچستان نا ضلع کیچ نا بنجائی شار تربت نا سیٹلائیٹ ٹاؤن ئٹ استو سلہہ بند بندغ آتا سُم کاری آن شش بند مرگ ئنا گواچی و اِرٹ ٹپی مسر۔ کہوک و ٹپی تا تعلقداری پاکستان نا صوبہ پنجاب آن ءِ۔
پولیس نا رِدئٹ استو نادرست بندغ آک سیٹلائٹ ٹاؤن تربت ئٹ ٹھیکیدار نصیر احمد نا اُرا ئٹ پیہسہ سُم کاری کریر ہراڑان اوڑے ساڑی شش بندغ ہند آ مرگ ئنا گواچی و اِرٹ ٹپی مسر، کہوک و ٹپی تا چاہنداری اللہ داد نا مار رضوان، ممتاز نا مار شہباز، ممتاز نا مار وسیم، شفیق احمد، محمد نعیم و سکندر ہند ملتان و ناروال و ٹپی تا چاہنداری نزید احمد نا مار غلام مصطفیٰ ہند ملتان و جاور خان نا مار توحید ہند ناروال پنجاب آن مسونے۔
پولیس نا رِدئٹ دا تدینی جمعہ و ہفتہ نا نیامئی نن آ مس۔ پولیس دعویٰ کرینے کہ کسفنگوک آک ٹھیکیدار نا رہی آ ماڑی تفنگ نا رِدئٹ مزورکاری کننگ ئسر ہرافتے ٹِک کننگا، تدینی نا حوال رسینگ تون پولیس ہند آ سر مریسہ الّمی کاریم و پٹ پول نا بناء ءِ کرینو۔
