بلوچستان نا علاقہ ژوب ٹی سلہہ بند بندغ آتا جلہو ٹی پاکستانی لشکر نا میجر تون اوار پنچ کارندہ مرگ ئنا گواچی اندن چار ٹپی کننگانو ۔

شابیتی حوال تا ردئٹ اینو سہب تون بلوچستان نا علاقہ ژوب ٹی پاکستانی لشکر آ سلہہ بند بندغ تا جلہو ٹی پاکستانی لشکر نا اسپیشل سروسز گروپ (ایس ایس جی) نا اسہ میجر تون اوار پنچ کارندہ مرگ ئنا گواچی و کیپٹن تون اوار چار ٹپی کننگار ۔

مرگ ئنا گواچی مروک آتیٹ میجر علی رضا و حوالدار راہو نثار اوار ءُ اندن ٹپی مروک آتیٹ کیپٹن نعمان، سپاہی یاسر و سپاہی عمران اوار ءُ۔

ٹپی مروک آتیٹ کیپٹن نعمان و سپاہی یاسر نا حالیت خلیس نا پاننگیک ۔

جلہو نا ذمہ واری ءِ تحریک طالبان پاکستان ارفینے۔ ٹی ٹی پی نا ترجمان پارے کہ پاکستانی کارندہ غاتے مرگ ئنا گواچی کریسہ ٹی ٹی پی باسک آک رکھوک مسر۔

جھل مگسی ٹی سلہہ بند بندغ آک اُرا ٹی پیہسہ ارغ زائیفہ ءِ مرگ ئنا گواچی و مسہ چنا ءِ ٹپی کریر ۔

شابیتی حوال تا ردئٹ جھل مگسی نا ہیڈ کوارٹر گنداواہ محلہ بپڑ ٹی نن نیمہ آ نا درست سلہہ بند بندغ آک اراٹی پیہسہ سم کاری کریر ہرانا سوب عبدالکریم لاشاری و اونا زائیفہ مرگ ئنا گواچی کننگار و مسہ چنا فرمان ، سلیمان و لاشار خان ٹپی مسر ۔

تدینی آن گڈ ڈوہدار آک نرار، دائسکان کسفنگ نا سوب سما تمتنو۔

تدینی آن گڈ گنداواہ پولیس ہند آ رسینگا ۔ جون و ٹپی مروک آتے ہسپتال آ دننگا اندن علاقہ ٹی ناکہ بندی کریسہ ڈوہدار نا پٹ و پول بناء کننگانے۔

تربت ٹی پاکستانی فورسز تون جھڑپ ٹی مرگ ئنا گواچی مروک ارا بندغ نا چاہنداری مس واہم فورسز کارندہ آک دائسکان جون تے خاہوت نا حوالہ کتنو ۔

مسہ دے مالو تربت ٹی پاکستانی لشکر و سلہہ بند بندغ تا نیام ئٹ ہمو وخت جھڑپ مس ہرا وخت فورسز کارندہ آک علاقہ ٹی آپریشن نا بناء ءِ کریر ۔ علاقائی ذرائع تا ردئٹ آپریشن ٹی جاسوس طیارہ و ہیلی کاپٹر آک بشخ ہلکر ۔

جھڑپ تا وخت ہڑتومکا پارہ غان جانی و مالی نسخان آتا حوال آک دوئی کننگار واہم پاکستان لشکر نا شعبہ تعلقداری عامہ آن ارا سلہہ بند بندغ ءِ خلنگ نا بابت ئٹ بیان شینک کننگا ۔

بیران مروک بندغ تا چاہنداری کامریڈ مقصود ولد احمد سکنہ ہیرونک تربت و مسلم ولد رضائی سکنہ آپسر تربت نا پن آن مسونے ۔

ذرائع تا ردئٹ پن کروک ہڑتومکا بندغ تا جون آک فورسز کارندہ آتون او ہرافتے دائسکان ضلعی بست و بند یا خاہوت ءِ تننگتنے ۔

زرینہ نا ڈُکھ آتیان پُر آ ودار 

ٹی بی پی سرگپ

”کنا اَرغ تدوکا کیہی سال تیان زوراکی ئٹ بیگواہ ءِ، تپرہ کہ ای تینے اونا زائیفہ تکوْ یا جنوزان۔“ زرینہ نا ہفت سال آن بیگواہ اَرغ شبیر بلوچ نا یلہ مننگ کن کراچی ٹی برانز ئٹ پاروک آ لوز آک بلوچ زالبول تا دڑد و ڈکھ ءِ پاش کیرہ، ہرا کیہی سال تیان تینا زوراکی ئٹ بیگواہ دوستخواہ تا کسر ءِ اُریرہ و ودار اوفتا بخت جوڑ مسنے۔ 

بلوچ اسٹوڈنٹس آرگنائزیشن آزات نا بنجاہی انفارمیشن سیکریٹری شبیر بلوچ ءِ فرنٹیئر کور چار اکتوبر اِرا ہزار شانزدہ آ کیچ نا علاقہ گورکوپ آن زوراکی ئٹ بیگواہ کرے۔ شبیر نا ہیڑ سیما و زائیفہ زرینہ ہفت سال آن اونا یلہ مننگ کن برانز کننگ ءُ، اسلام آباد و کوئٹہ نا ریڈ زون ئٹ تولوک برانز کرینو، کوئٹہ، حب چوکی و کراچی ٹی چرجوئی ئٹ برانز کننگ ءُ۔ پاکستان نا عدالت و بندغی حق آتا کمیشن آتا در آ ہنانو ولے ہفت سال تدینگ آن پد ہم شبیر بلوچ یلہ کننگتنے۔ 

جنگ زدہ بلوچستان ئٹ کیہی زرینہ غاک ءُ ہرا تپسہ کہ اوفتا اَرغک زندہ ءُ یا کسفنگانو۔ سیما، فرزانہ و رخسانہ کون آ ہیڑک سال آتیان تینا ایلم تا کسر ءِ اوننگ ءُ و کیہی پیر انگا لُمہ باوہ غاک تینا مار تا ودار ئٹ دا کوڑی آن رخصت کرینو۔ بلوچستان ئٹ اسہ دنو علاقہ اس اف کہ ہرا زوراکی نا بیگواہی تیان زیمی متنے۔ 

پاکستان نا بلوچ انسرجنسی ءِ ایسر کننگ کن زوراکی نا بیگواہی تے سلہہ ئسے نا ڈول کاریم ئٹ ہتنگ نا پالیسی بلوچستان ئٹ اندنو گڑتی اس ودی کرینے ہراڑان ہزار آ خاہوت آک زیمی ءُ۔ زوراکی نا بیگواہی تیا جہان و جہانی بندغی حق آتا ادارہ تا چُپی و پاکستان آن ورندی خواپننگ بلوچستان نا بد حالیت آتیٹ ودکی نا سوب جوڑ مننگ ءِ۔

کاؤنٹر ٹیررازم ڈپارٹمنٹ (سی ٹی ڈی) درے ننکان دعویٰ کرے کہ اسہ مونتس اسیٹ اِرا سلہہ بند بندغ ءِ کسفینن، اندن وی بی ایم پی دا کارروائی ءِ دروغ نا مونتس پن کریسہ اسہ بندغ ئسے نا چاہنداری کرینے۔

درے ننکان سی ٹی ڈی دعویٰ کریسس کہ بنجاہی شار کوئٹہ نا علاقہ ہزار گنجی ٹی سلہہ بند بندغ آتا ساڑی گری نا حوال آ کاروائی کننگا ہراڑے مونتس ئٹ ارا سلہہ بند بندغ کسفنگار۔

سی ٹی ڈی دعویٰ کرے کہ خلنگوکا بندغ تا تعلقداری بلوچ لبریشن آرمی آن ءِ اندن اوفتیان اسہ توفک، اسہ موٹر سائکل و مسہ چغلی بمب خننگانے۔

درو کاؤنٹر ٹیررازم ڈیپارٹمنٹ پن کروک بندغ تا جون تے سول ہسپتال کوئٹہ آ چاہنداری کن سر کریسس۔

ایلو پارہ غان وائس فار بلوچ مسنگ پرسنز چاگڑدی احوالکاری تلہ ایکس آ اسہ ٹویٹ اسیٹ دا کارروائی ءِ دروغ نا مونتس پن کریسہ پارے کہ سی ٹی ڈی تدوکا دے تیٹ کوئٹہ ہزار گنجی ٹی اِرا بندغ ءِ مونتس ئٹ کسفنگ نا دعویٰ کریسس، اوفتیان اسٹ نا چاہنداری محمد یوسف نیچاری نا پِن آن مسنے ہرادے سی ٹی ڈی برجاء سال 26 اگست آ نیچاری آباد کلی بڑو آن زوراکی ئٹ بیگواہ کریسس۔

یاتی مرے کہ بلوچستان ئٹ سی ٹی ڈی نا کاروائیک ساندہ شکبر مسنو اندن گیشتر کارروائی تیٹ بلوچستان آن زوراکی ئٹ بیگواہ بندغ آتے کسفنگ نا شاہدی رسینگانے، بلوچستان نا راج دوست جماعت آک و بندغی حق آتا تنظیم آک دا مون تس تے دروغ گوندرہ۔

کوئٹہ ٹی علمدار روڈ آ سم کاری آن اسہ بندغ اس مرگ ئنا گواچی۔ حوال آتا رد ئٹ کوئٹہ نا علاقہ علمدار روڈ سعید آباد ئٹ سم لگنگ آن اسہ بندغ ئس مرگ ئنا گواچی مس، ہرانا چاہنداری 18 سالی آ نور محمد رضا ولد حسن علی ہزارہ نا پن آن مسنے۔

ایلو پارہ غان دکی ٹی زمان روڈ آ سم کاری آن اسہ بندغ ئس ٹپی مس، حوالی نا رد ئٹ دکی نا علاقہ زمان روڈ آ نا درست سلہہ بند بندغ تا سم کاری آن اسہ بندغ اس ٹپی مس۔

ٹپی آ بندغ نا چاہنداری محمد نبی ولد عبد الحکیم قوم سلیمانخیل نا پن ئٹ مس۔ٹپی ءِ سول ہسپتال دلی ٹی بنداوہی جانجوڑی کمک آن گڈ مستی جان جوڑی کن کوئٹہ غا دریر۔

سفر زند و شاعری

نوشت: نزار قبانی | مَٹ: عتیق آسکوہ بلوچ

شانزدہمیکو بشخ

مسٹمیکو بولی

ہراتم ای نوشت ءِ بناء کریٹ گڑا اولیکو گِڑا ہرا کنا مِلی آ تالان مسوسس او بولی ئس ہراٹی ای نوشتہ کریٹہ۔ بیدس شک او اسہ بولی اس ئس، بلکن اندنو بولی اس ہرا بھلا گمان و پھبی لائخی تخوک ئس ولے لسانی چاہندار آک اوڑا بھیم بش کروک ءُ خواجہی تخاسر؛ اوفک دا بولی آ آزاتی نا درغ آتے بند کریسر و اودے پیشن مننگ و خلق کوچہ غاتا بولی تون اوڑدئی آن توریسر۔ دا بولی ذاتی ماڑی اس مروک سلیسوسس۔ ایلو پارہ غا لسانی چاہندار تا انجمن ئس ہرا داڑان جُوان سواد ارفوک ئس۔ اسہ لوز ئسے قانودی ہند تننگ یا اسہ سائنسی یا تکنیکی اصطلاح ئسے نا تعرب )عربی کننگ( کن فتویٰ الّمی ئس، ہراڑکن لسانی جامعات مُسہ مُسہ سال اسکان استار تا ڈول و استخارہ غاتے اریسہ کریرہ و چاہ و بابونج نا ہزار آ پیالہ غاتے نوش کریرہ۔

اسہ پارہ غا دا تکبری آ بولی ئس ہرا اسہ بندغ ءِ ہم موْکل تتوکہ کہ او اونا بڈ ءِ ارفنگ کے، گڑا ایلو پارہ غا اُلسی بولی ئس، بِسٹ زند آن پُر، بیدار، و مخلوق نا پام و ہڑدے ئی معاملہ غاتے تینا پلویڑ ئٹ ہلوک۔ دا اِرا بولی نا نیامٹ تیوہ غا پول آک پورو پنوک ئسر۔ داسہ نہ تو دا بولی ایلو ارٹمیکو بولی کن تینا بھلا ہند آن شیف بسکہ و نہ ہمو ارٹمیکو بولی ئٹ داخہ در جیرت مسکہ کہ او اولیکو بولی اسکان ہنوک کسر آ کائے، اونا بنائی درغ اسکان سر مرے، و اوڑتون مجلسی مننگ کے۔ گڑا ننے اِرا بولی نا نیامٹ گوڑیفوک ناوَلدی نا گمان مننگ آ مس۔ اسہ بولی ہمو ئس ہراٹی نن اُرا، کوچہ و قہوہ خانہ ئٹ ہیت کرینہ، و ارٹمیکو ہمو بولی ہراٹی نن اسکول آن رسینگوک کاریم تے کرینہ، تینا استاد آتا تران آتے بنگنہ و تینا امتحان تے تسونہ۔ گڑا عرب مخلوق اسہ بولی ئٹ خواناکہ، نوشت کریکہ، تصنیف و تالیف کریکہ و تران کریکہ، و ارٹمیکو بولی ئٹ شئر پاریکہ، گل و بالی کریکہ، شرہ جنگ کریکہ، چنا تیتون شغل شغال کریکہ، و تینا مابت تون عشق کریکہ۔

لسانی اِرا رنگی نا دا ویل آتیتون ایلو بولیک متور۔ دا اِرا رنگی آن ننا افکار، مارنگ و زند اِرا بشخ ئٹ ونڈ مریسہ سلیس۔ اندا خاطر الّمی مس کہ ناوَلدی نا دا حالیت ءِ، ہرادے نن سگیسہ بننگ ئسون، ایسر کننگ کن گڑاس کننگ مرے۔ دا ایسری مسٹمیکو بولی اس تینا کننگ ئٹ ئس، ہرا لسانی اکادمی تیان اونا منطق، حکمت و سوگوْی ءِ ہلے، و خلقت نا بولی آن اونا باسنی، دلیری، و جیرتی آ سر سہبی تے۔

اینو نن ہمو مسٹمیکو بولی اٹ نوشتہ کینہ، و اندا مسٹمیکو بولی آ پوسکنا عربی شاعری، دیہاڑ آن کشکوک و زندانِ دیہاڑ نا قیذی مفننگ تون، تینا درشان کن باوری تخیک۔ دا مسٹمیکو بولی نا کوشست ءِ کہ او قاموس ءِ زند و بندغ نا خذمت ئٹ خلے؛ او تینا پھبی کوشست ءِ کننگے کہ مدارس ئٹ تننگوک عربی درس اسہ بے دادی ہند ئسے نا جاگہ غا سیل سوات نا دروشم دوئی کے، دانا کوشست ءِ کہ ننا ہیت گپ و نوشت نا نیامٹ بے ڈس مروک باور اسیکہ وا ودی مرے، و او دا تضاد ءِ ایسر کے ہرا ننا توار و ننا گٹ ئنا نیامٹ ءِ۔ کنا شئری بولی نا تعلقداری اندا مسٹمیکو بولی تون ءِ ہرانا بابت ای داسہ پاریٹ۔ بلکن تیوہ غاتیان زیات بھیم بش کروک شاہدی ہرا کنا بولی نا بابت تننگانے او دُن ءِ:

اگہ بس ئٹ نِزار قبّانی نا نوشت کروک اسہ کاغد اس تمے، ہراڑا اونا دستخط ہم مرے، گڑا اونا اولیکو سوار اودے ارفیسہ اونا اُراغا سر کرو۔

دا زیات نہاد شاہدی ئسے انتیکہ دا اسہ اندنو بندغ ئسے نا پارہ غا بس ہرا جامعہ دمشق ئٹ لسانیات نا پروفیسر ءِ، تینا کلاسیکی انتہاپسندی، متکنا بد دننگ، و پوسکنی و پوسکنی دوست آتے بِسٹ نمن کننگ نا رِدئٹ پنی ءِ۔ دا دا سوب آن ہم بڑز نہاد شاہدی ئسے کہ دا بندغ نِزار نا شاعری ءِ دوست کپک، نِزار نا شاعری اودے اسُل وڑپک، و او نِزار نا بابت تینا خیال آتیٹ تکبری کیک۔ ای دا بڑز نہاد امنائی ءِ تیوہ غاتیان بھلا شاہدی پاوہ۔

اخر دا مسٹمیکو بولی ارے انتس ہرا کنا بڑزی، چوٹ بامس و خن تا رنگ نا ڈول کنا گچین نشانی تیان اسٹ مسونے، و داسہ ای داڑان و دا کنے آن چاہنداری تخک؟ اخر دا بولی ارے انتس ہرا کنا و تینا نیامٹ بھاز ہم رنگی تا سوب کنا اندنو پروانہ سفر اس جوڑ مسونے کہ ہراتم وختس ای دادے رش آ کسر آ بے ڈس کیوہ گڑا مخلوق اودے کنے آ واپس سر کیک؟

غرور کنے ہچبر دا ہد اسکا دننگ کپک کہ ای تینا پوسکنا بولی نا ایجاد کننگ نا دعویٰ کیو، دوارہ دُن ہم بولی جادوگر نا ٹوپ آن پیشن مروک اسہ مُرو اس اف ولے ای تینے دا ہیت ءِ پاننگ نا موْکل ایتوٹ کہ ای ساڑی بولی ءِ مخلوق نا جوڑ تیا تالان کرینٹ، حالانکہ اوفک دا بولی تون اوڑدئی آن خُلیسرہ۔

داکان مالو، شاعری نا بولی اشرافی، بیوروکریٹک، پروٹوکول والا مسکہ، دو تیا پیہن آ دستانہ بیننگ آن بیدس مخلوق تون دُو ہلتوکہ و گنبدی ماڑی تیٹ پینگن رنگ نا نکٹائی بینوک بیدس اوفتے بخیر کتوکہ۔

ای بیرہ دا کریٹ کہ شاعری ءِ دا ہیت آ امنا کریٹ کہ او تینا اشرافی سوچ آن پیشن مرے، تِیرمہ نا پُچ بینے، گلی تیٹ پیشن مرے کہ خلق ئنا چنا تیتون گوزی کے دِرکے، اوفتیتون مخے، اوفتیتون ہوغے۔ اسہ لوز اٹ پاننگے گڑا ای و لسان العرب و پلویڑ تا پلویڑ والا بولی نا نیامٹ ساڑی کُلف آتے مُر کرینٹ و اودے دا ہیت آ امنا کرینٹ کہ قہوہ خانہ و اُلسی سواتی ہند آتیا اُلس تون تولے، چنا، خوانندہ، خواری کش، و بزغر آتیتون سنگتی کے، اخبار خوانے، کہ گپ کننگ ہچ بے خیال کپ۔

افسانہ: او دیر اس

نوشت: درناز رحیم

دی بلوچستان پوسٹ

خلق ئنا رہی ئٹ اسہ اُشکُنو دگ ئس گدرینگاکہ، ہرا باز مُتکن و جاگہ جاگہ آن پنوک اس۔ دگ بھُٹ ئسے نا اسُل ماس آ اسک و کسر نا شیفینکو نیمغا منَہ اُرا و ڈغار تیٹ کشت و کشار اسر۔ ویگہ نا وخت اس۔ آہڑ نا مرغن و باسُن آ دیک ویگہ نا چار پنچ بجہ غان مُست پُدین متورہ۔ دے ئنا پُدینی آ ہرکس تینا ہڑدے نا کاریم تیٹ آختہ اس۔ فصل آ تیٹ نرینہ غاک کاریم کننگ اسر و منَہ چُنا گوازی کننگ اسر۔ بورنگ نا دیر تلاف ئٹ وہاکہ و تلاف آن جوک دیر ئے فصل آ تیٹ سر کریرہ۔ جو تا کرّک آ رخت آک قطار اسر و رخت آتیت چُک آتا کتوک۔ چُکاک بال کرِسا وختس چڑچڑ کریرہ تو قدرت نا ندارہ ئے ساز و باگل بشخارہ و دا ندارہ پین زیبدار مسکہ۔ نیل رنگ ئنا آسمان ئٹ جھمر نا پیہُن آ شینک آتیا خَن تماکہ تو قدرت نا زیبائی اُست ئے جارات نا جہان ئٹی سر کریکہ۔

خلق ئنا آبادی شش یا ہفت اُراغان زیات الو۔ اندا شش ہفت اُرا جتا جتا چار دیوالی کروک اسر۔ اسہ حاویلی دگ ئنا ماسا اسک و ایلو اُراک دگ آن مچٹ سِستہ اسر۔ دگ ئنا ماس ئنا حاویلی بھلن اس ولے مُسہ گیڈ تفوک اس ٹی تہ۔ نشخ تہ اندن اسک کہ ہر مُسہ گیڈ اسٹ ایلو تون گنڈوک اسر و دریچہ آک تا دگ ئنا پاسو آ اسر۔

گیڈ آتیان اسٹ ئٹی دریچہ نا رہا چُنک سن مسڑئس تولوک کشیدہ کننگ اس۔ او وار وار ئس دریچہ آن پیشن فصل آ تیٹ کاریم کروکا بزغر تے، گوازی کروکا چُنا تے و دگٹ ہنوک بروکاتے سئیل کریکہ۔ پیشن حاویلی ٹی اسہ زالبول ئس تار آ پُچ تالان کننگ و پیرو آئی سے تون ہیت کننگ ئٹی اسک۔ ہرا حاویلی نا رخت آتا سیخا ٹی پڑچھ ئس تالان کروک بَڑزی آ جھوکہ خلوک تولوک اس۔ آئی نا رہا اسہ لُونڈینگوکو چُناس گوازی کننگ اس۔ زالبول پُچ سلنگ کن بورنگ آ ہناسس ہراڑے خلک ئنا ایلو نیاڑیک پُچ سلنگ و دیر پُھر کننگ کن بسُرہ و داسا بورنگ آ مروکا اسہ اسہ ہیت ئنا حوال ئے آئی ئے تننگ اسک۔ آئی ہم خوڑت خفتورنگ ئٹی اس تہ۔۔۔

گیڈ ئٹی تولوکا مسڑکو کشیدہ کرِسا دریچہ آن پیشن ہُرا۔ دگ آ مون رنگ ئنا روب دارو گاڈی ئس مدا مدا برِسا بُھٹ ئنا چوٹ آ دگ ئنا کرک آ سلیس۔ مسڑکو کشیدہ ئے زان آن شیف کرِسا مُستی مس کہ ہُرِو دا امرو گاڈی سے، گاڈی آن دیر دھڑنگک۔ کس دھڑنگک یا گاڈی میتگ آ بریک، یا سما اف کسرے رد کرینے و دوارہ راہی مریک؟ دا خلک ئٹ تو دُنو گاڈی کس ئے اف گُڑا دا دیر نا ءِ، داڑے انتئے سلیس۔ مننگ کیک مہمان ئس مرے، ولے دیر نا مہمان مننگ کیک ؟ مُست آن دُنو گاڑی تو دا خلک ئٹی بتنے، یا سما اف گاڈی تا خراب مسک۔ اونا اُست ئٹی کیہی خیال بننگ اس، ولے گاڈی آن نہ کس دھڑنگا نہ گاڈی سُرا۔ جھٹ ئس جوانو گدرینگا، ولے گاڈی نا رہا ہچ سُر پُر متو۔ اندنی ٹی ایف سی نا گاڈی ئس اندا گاڈی آن زرس مونی گدرینگا سلیس۔ موننگا گاڈی سُرا، مدا مدا پدی برِسا دگ ئنا یام آ سلیس و گاڈی آن اِرا سِلہہ بندو بندغ دھڑنگار۔ تومکا تا دو ٹی توفک اسک۔ اوفک سادہ پُچ بینوک اسُر، و مونک تا مول اسر۔ ہڑتوما دگ ئنا یام آ سلیسر۔ ایف سی نا گاڈی آن ہم چار بندغ دھڑنگار و دَگ آ اندن سلیسُر پاروس کہ کس ئسے نا چاری ءُ۔

اندنی ٹی موٹر سئیکل ئسے نا توار مس۔ مسڑکو موٹر سئیکل نا توارے بِنگ و مونے ہمونگی ہڑسا۔ موٹر سئیکل آ ورناؤ مار ئس سوار اسک۔ موٹر سئیکل نا تومکا ہینڈل تیٹ پلاسٹک آ تیٹی گِڑا ٹنگوک اسر۔ گمان مسئکہ کہ ورنا شار آ ہناسس، شار آن سودا ہلکسس و اُراغا ہِننگ اس۔ شار ہم پانزدہ کلومیڑ آن زیات مُر الو، دا علاقہ آتا گیشتر بندغاک چُنکا چُنکا سودا تے خلک ئنا دکان تیان ہلکرہ ولے ایلو سودا تیکن شار آ ہنارہ بسرہ۔

اندن کہ مارکو کسر نا چوٹ ئے خُڑک کرے تونظر تہ مون رنگ ئنا گاڈی و ایف سی نا گاڈی آ تما۔ گاڈی تیا نظر تمنگ تون اوار مارکو موٹر سئیکل نا بریک ئے خلک و موٹر سئیکل ئے بِٹے، غٹ سوداک تمِسا دگ ئٹ ریڑ ہلکر، جند تہ مون شیف فصل آتا کُنڈ آ رمب کرے۔ مسڑکو ہپا مس کہ دا مارکو ئے انت مس دُن گنوکا تا وڑ موٹر سئیکل ئے بِٹے و نرنگ ءِ۔ مسڑکو نا ہِچ کاٹُم تمنگ الو۔ ہندُنی ٹی موننگا گاڈی آن دھڑنگوکا تومکا کارندہ آک سُم کاری بناء کریر و ایف سی نا کارندہ آک مارکو نا رند ئٹ رُمب کریر۔ مسڑکو نا خنک پھاؤڑینگار کہ دا انت ندارہ سے۔

سم تا توار تون فصل تیٹ کاریم کروکا بزغرک نرار، چُناک نرِسا دانگ اینگ مسر۔ مارکو نرِسا اس و رند ئٹ تہ ایف سی نا کارندہ غک رمب کننگ اسر۔ اینگان سادہ پُچ بینوکا بندغاک سُم کاری ئے توریر کہ داسا مونٹی ایف سی نا کارندہ غاک اسر، اگہ سُم خلکرہ تو کارندہ غاتے سُمک لگنگ کریرہ۔

اندا رُمب ئٹی ورنا نا اسہ نت ئنا چھوٹ پیشتما۔ اسہ نت ئٹی تہ چھوٹ ایلو نت شپاد رمب کننگ اس۔ اونا نرنگ نا وڑ آن اندا گمان مسکہ کہ زندہ سلامت دافتا دوٹی ہِچ تموئی الو تہ۔ ایف سی کارندہ آتیان اسٹ دانگان رمب کرِسا ورناغا سُم کاری بناء کرے۔ ولے مارکو اسُل سلینگ نا پِن ئے ہلتوکہ و اندن رمب کننگ اس پاروس کہ خواہنگ ءِ اگہ سُم لگیک تو پانے لگے تہ کہے یا گُڑا داکان تینے کشے، ولے دافتا دو ٹی تَمپ۔ رمب کرِسا اس کہ ایلو نت ئنا تہ چوٹ ہم پیشتما۔ داسا اسُل نت شپاد اس، بُوچ ءَ جھِر، پِت ءَ خل تا پرواہ ئے کننگ الو۔ دیچا اخس پِت اونا نتیٹ لگار۔ اندُنی ٹی سُم ئس دو ٹی تہ لگا۔ سُم لگنگ تون مارکو مچِہ جُگ ہلکک ولے سلتو۔ سم سُروش ناتہ بڑز آ لگاسس و دتک جو آن بار دو ئٹ تہ شیف وہنگ اسر۔

مسڑکو بش مس و رُمبِسا گیڈ آن پیشتما۔ اونا پیشتمنگ تون پین اِرا سم ئنا توار مس۔ حویلی ٹی آئی تینا ملخڑ تون ہبکہ سلوک اس۔ لونڈینگوکا چُنا آئی نا کچھ آ اسک و ہوغنگ اس۔ مسڑکو نا اُست ئنا درکہ آک اندن تیز اسر کہ گمان مسکہ داسا ایسا اُست تہ باٹی تہ بریک، پھاؤڑینگوکا خن تتون آئی ئے ہُننگ اس تو وار ئس تینا لمّہ ئے۔ زور ئٹ دم ئے راست کرسا پارے “گاڈی والاک مارکو ئے سم ئس خلکر آئی۔” آئی اسہ وار تو چنا ئے پڑچھ آ تخا و ہبکہ ہبکہ مُستی مرِسا سوج کرے “ اَرا مارکو ئے، دیر اسُر گاڑی والاک، دا ہمو سم تا توار اس؟ ”کس پارو مسڑکو نا گُٹ بارِس،“ دیچا آئی، سما اف دیر اس، اِرا گاڈی اسر، اسٹ ئٹی فوجی اسر، ایلو ٹی سما اف امرو بندغ اسُر، فوجی تو خننگتورہ۔” آئی ہم داسا الَو آن زیات فریشان مس و دو تے زان تیٹ خلسا پڑچھ آ تُوس۔

آئی پڑچھ آ تولنگ تون تینا تزبیع ئے ہرفے و ورد کرِسا دو تے کاٹم ئٹ خلک۔ چُنا اسہ وڑ ہوغنگ اس، شر خاتون چنا ئے بڈ کرے و بان ئٹی ہانئے توننگ اس، ولے مسڑکو ہموڑے تینا جاگہ غا سلوک اس و مارکو نا رمب کننگ، اونا نت تیان پازوار آتا پیشتمنگ، اونا دو آ سم ئنا لگنگ، و دتر تا وہنگ نا ندارہ اونا خن تا مون آن گدرینگ اسک۔ جھٹ ئس انداڑے گدرینگا، او گیڈ ئٹی ہِننگا ہم خُلینگ اس۔ ذہن ئٹ تہ سوج آک کاٹم ہرفنگ اسر، “ دیچا مارکو ئے ہلکر یا او بچا؟ سما اف امر مس؟ کاو دریچہ غان موٹر گاڈی تِہ ہُریو؟ پد ئنا ہڑتوما سُمک۔۔۔۔ ” ذہن ئٹ وار وار کاٹم ارفوکا دا گڈیکو سوال کھپی اسک، اونا پوروی آن مُست او مون کرے بان ئنا کنڈا، بان ئٹی پیہِسا مدا مدا دریچہ نا رہا بسک و انداڑے توس، و دریچہ آن کوکڑو کرے۔” او بیرہ موننگا اُلاخ ئے خنا ہرا دگ ئنا چوٹ آن چرینگِسا ہیمون مس، پدا مسڑ کو اودے خنتو۔

او مون ئے ہڑسا و جھوکہ خلسا اُست ئٹی پارے “ مارکو ئے ہلکر یا او بچا؟ دن زو او ارانگ نرو تینے بچفو ؟ ہلکر تہ چاوہ کہ، یا پد ئنا ہڑتوما سُمک لگار تہ ؟ دیچا کھسک یا زندہ مرو؟ جون ئے تہ دریر یا انداڑے تموک مرو، پیشن کاو ہُریو؟ کاو یا ہنپر؟ “ سوالک ہار ئنا دیر آن بار اودے پلویڑ کننگ اسر۔ او تینا غُٹ خیال آتا باریم ئے کاٹمان چھنڈیسہ بش مس و بھلو بھلو گھام ہرفِسا گیڈ آن حاویلی و حاویلی آن پیشن پیشتما۔ پد ئٹ آئی اودے توار کننگ اس “اَرانگ کاسہ، پیشن ہنپہ او گنوک امر اللہ گنوک کرے نے۔” ولے او ہچ بنتو۔

ڈن آ دانگ چَک خلک ھُرا، اینگ چک خلک ھُرا، بزغرک و ایلو بندغاک ہم الور، ہرکس ئے تینا ساہ ئنا ہلکسس۔ پیشن آ کس الو، ہمو مارکو ہم الو۔ او دگ ئنا کنڈا ہُرا موٹر سئیکل تموک اس، سوداک تموک اسر، اونا چھوٹاک ہم تموک اسر۔ مسڑکو منَہ گھام مُستی ہنا و تموکا چھوٹ ئے ہرفے۔ ایلو چھوٹ منَہ گھام مُستی تموک اس، او مَدا مَدا ہنا ایلو چھوٹ ئے ہم ہرفے۔ تومکا چھوٹ آتے دو ٹی کرے و ہموڑے توس۔ تولوک تولوک پدی چک خلک و تموکا موٹر سئیکل ئے ہُرا، اونا زہن ئٹ بس اسہ ہیت ئس اسک، “ او مارکو دیر اس ؟”

نیوزی لینڈ انگلینڈ ءِ اولی میچ ئٹ 9 وکٹ آ شکست تس۔

احمد آباد ئٹ مروک ورلڈ کپ نا اولی میچ ئٹ نیوزی لینڈ انگلینڈ نا پارہ غان تروک 283 نا ٹک ءِ اڑزانی ئٹ 36.2 اوور ئٹ اسہ وکٹ نا نسخان آ پورو کرے۔

ڈیون کونوے و رچت رویندرا شکست تننگپروک سد رنز کریر۔ رچت رویندرا کیرئیر نا تینا اولی سد رنز ءِ کرے۔

انگلینڈ نا پارہ غان ول یونگ نا اسٹ انگا وکٹ ءِ سیم کرن دوئی کرے۔

داڑان مست انگلینڈ اول بیٹنگ کرسہ تیوہ اوور تیٹ 9 وکٹ نا نسخان ئٹ 282 رنز جوڑا و نیوزی لینڈ ءِ 283 نا رنز نا ٹک تس۔