بلوچستان لبریشن فرنٹ نا ترجمان میجر گہرام بلوچ میڈیا غا شینک بیان ئٹ پاینے کہ ننا سرمچار آک چاغی ٹی پاکستانی لشکر نا اسہ گاڑی ئسے بمب ئٹ ٹک کریر۔

او پارے کہ سرمچار آک چاغی نا ڈرم بازار ئٹ پاکستانی لشکر نا اسہ مچی سے ریمورٹ کنٹرول بمب ئٹ ٹک کریر، ہراڑان اسہ گاڑی اس تیوہ بھس مس و اوٹی سوار شش بندغ مرگ ئنا گواچی و ارٹ ٹپی مسر۔

ترجمان پارے کہ چاغی ہراڑے پاکستان ایٹمی تراک کرسہ بلوچ راج نا باتی تے جوہری تابکار تا زیم آتا پلویڑ ئٹ ہلیسہ مڈی تا لٹ و پل ءِ برجاء تخانے، نن چاغی و تیوہ بلوچستان ئٹ لٹ و پل ئٹ اختہ راج و کمپنی تے پامدار کینہ کہ او پاکستان نا ضمانت آ تینا ساہ و مڈی تے شڑط آ تخپس۔بلوچ راج جنگ ئنا حالیت ئٹی ءِ و بلوچستان ئٹ بلوچ راج نا موکل آن بیدس ہچو ڈٹ بندی ئسے تون امنائی مننگ کپک۔

شہیداتا کرد ہچ مفک ہر  بیان پھل

شاعر : سارنگ بلوچ

شہیداتا کرد ہچ مفک ہر  بیان پھل

وطن نا سپائیکو جنگ نا ایمان پھل

غزل یا نظم تے دتر ئٹ قلم کیو

شعر تے امر کیو وطن نا درمان پھل

فدائی کنا سرمچارکو دیوانہ

گوادر نا رکھوکا کنا بولان پھل

ایلُمک ایڑ دھرتی نا مش تلار تٹی

آجوئی نا فدائیک تسر قل اذان پھل

گواڑخ نازبو تے سلار او دتر تٹی

دھرتی نا مفسہ گنوکاک ہچ گمان پھل

دیوانہ مکرانا ناصر پل کائم جانا

ہکل تس سبخ تے جنگ نا زبان پھل

گنوکُن مست بس سارنگ نادان نن

اسلمی جوزہ کن مسن خن طوفان قل

بلوچستان نا علاقہ خاران ئٹ ڈگری کالج نا خوانندہ تا پارہ غان و پنجگور ئٹ بلوچ اسٹوڈنٹس ایکشن کمیٹی نا پارہ غان پنجگور ڈگری کالج ئٹی شاعر گلزمین مبارک قاضی نا یات ئٹ مجلس ہڈ تننگا۔

بلوچستان نا علاقہ خاران ئٹ ڈگری کالج نا خوانندہ تا پارہ غان اسہ دے ئی کتاب مُچی اس و خواجہ مبارک قاضی نا یات ئٹ مجلس و مشاعرہ اس ہڈ تننگا۔ مجلس و مشاعرہ نا مہمان خاص خاران نا ایڈیشنل ڈپٹی کمشنر فاروق شاہ ئس۔

مشاعرہ ئٹ شاعر و نوشتکار، چاہندار، اسکالر و کالج تون اوار اسکول آتا چناک و ایلو جتا تپہ نا بندغ آک بھلو کچ اسیٹ اوار مسر۔

مجلس و مشاعرہ ئٹ کتاب نا اہمیت و برجاء وخت ئٹ اونا گرج و بلوچی بولی نا پِنی آ شاعر خواجہ مبارک قاضی نا زند و اونا شاعری آ شابیتی ہیت کننگا۔

مشاعرہ ئٹ بلوچی بولی نا پنی آ شاعر حسرت خارانی، احمد مہر، شکور زاہد، مسلم شفیع، پروفیسر شکور گورام زئی، جلال فِراق، ایف جی فیضی، فقیر شاہ، ممتاز ارمان، زبیر شاد، عطا نصیر، حافظ رازق و ایلوفک مبارک قاضی نا یات ئٹ شئیر پاریر۔

ایلو پارہ غا بلوچ اسٹوڈنٹس ایکشن کمیٹی پنجگور ڈگری کالج یونٹ نا پارہ غان مبارک قاضی نا یات ئٹ مجلس اس ہڈ تننگا ہرا ٹی مبارک قاضی نا زند و اونا شاعری تون اوار ایلو سرحال آتیا ہیت کننگا۔ مجلس چار بشخ آتیا تالان ئس ہرا ٹی تران، مشاعرہ، شئیر و باگل و کتاب مُچی اوار ئسر۔

مجلس مبارک قاضی نا یات ئٹ اِرا ساہت نا چُپی تون بنا مس ہراڑان گڈ مبارک قاضی نا زند، شاعری، غزل و جتا پالو تیا مصدق بلوچ، پیر جان بلوچ، خواجہ گمشاد بلوچ و ملا مراد شابیتی ئٹ ہیت کریر۔

مجلس نا ارٹمیکو بشخ مشاعرہ غا تالان ئس ہرا ٹی خوانندہ غاک مبارک قاضی نا شئیر تے خوانار و مبارک قاضی نا بلوچ ڈغار و راج دوستی نا فکر و فلسفہ ءِ روشن کریر۔

مجلس ئٹ ”بلوچستان کتاب کاروان“ نا پن ئٹ کتاب مُچی اس ہم ہڈ تننگا ہراڑے اسٹال آ بلوچستان، دیہاڑ، سیاست، ادب و سائنس نا جتا سرحال آتیا کتاب آک تخنگاسر، کتاب مُچی ئٹ گل ئنا لٹریچر نوشت، گام و بلوچ لٹریسی کیمپئن نا کتابچہ غاک ہم تخنگاسر۔

کتاب مُچی ئٹ استاد و خوانندہ تا بھلو کچ اس اوار مریسہ کتاب ہلکر۔

مجلس نا ایسری بشخ شئیر و باگل آ تالان ئس ہرا ٹی نادر بلوچ، مسرور بلوچ و کلیم اللہ بلوچ مبارک قاضی نا شئیر تے تینا گچین آ توار تیٹ پاریر و تینا فن ئنا درشانی کریسہ مجلس ءِ ایسر کریر۔

بھارت و نیپال تون اوار کیہی ملک آتیٹ  زمین جمب نا چنڈیک محسوس کننگار ہرافتا ترندی 6.2 ریکارڈ کننگانے۔

بھارتی دارالحکومت و اتر پردیش تون اوار بھارت نا کیہی علاقہ آتیٹ زمین جمب مس، جتاء بھارتی شار تیٹ بندغ آک انداخس خلیسر کہ ارا و ماڑی تیان پیشن پیشتمار۔

ایلو پارہ غان نیپال و چین نا سرحدی علاقہ آتیٹ ہم زمین جمب مس ، زمین جمب نا کڑمبی 10 کلو میٹر پاننگانے ہرانا بنجاہ نیپال ئٹ ئس۔

کوئٹہ نا علاقہ ماڈل ٹاؤن ٹی ڈاکٹر منوج اکیڈمی ٹی خاخر لگا۔ خاخر لگنگ نا سوب شارٹ سرکٹ پاننگک۔

خاخر لگنگ آن گڈ فائڑ بریگیڈ نا گاڑیک ہند آ رسینگار ، غٹ خوانندہ آتے رکھوک جاہ آن دننگانے، فائر بریگیڈ خاخر کسفنگ ئٹ اختہ ءِ۔ زیات موڷ مننگ نا سوب آن کیہی خوانندہ آک تُسینگار۔ واہم ہچو وڑ نا جانی نسخان نا حوال آک  رسینگتنو۔

سول اسپتال احوالکار تا ردئٹ دائسکان زیمی مروک ءُ 26 خوانندہ ہتنگانے۔

خدو آن زوراکی ئٹ بیگواہ مشکے نا ہندی ممتاز بلوچ نا ہیڑ نا مسڑ بانڑی بلوچ تینا ماما ممتاز بلوچ ولد محمد مراد نا یلہ مننگ کن بندغی حق آتا گل آتیان کڑد سر تننگ نا خواست کرینے۔

او پارے کہ کنا ماما ءِ دا مسٹمیکو وار ءِ بیدس قانود زوراکی ئٹ بیگواہی نا گواچی کننگک، داڑان مالو اودے اِرا وار دزگیر کریسہ بیگواہ کننگانے۔ 2016 ئٹ اودے بیگواہ کننگا و ہفت توہ بے دادی نا گواچی کننگ آن پد ہم اوڑا ہچ اس ثابت متو و اودے یلہ کننگا، پدا اودے 2017 ئٹ دوارہ ارفنگا و اِرا سال اسکان ریاستی ادارہ تا دزگیر ئٹ مس ولے اونا برخلاف بے قانودی کاریم تیٹ اوار مننگ نا اسہ شاہدی اس رسینگتو و اودے جنوری 2020 ئٹ یلہ کننگا۔

او پارے کہ اِرا وار کنا ماما ءِ زوراکی ئٹ بیگواہی نا گواچی کننگا غٹ ذہنی و جسمانی اذیت آتیان پد ہم اوڑا ہچ اس ثابت کننگ متو و داسہ مسٹمیکو وار اودے انتئے و ہرا بنداو آ بیگواہ کننگانے؟ و ننے وار وار انتئے اشتماعی اذیت نا گواچی کننگک؟

او پارے کہ عدالت آک دا ناانصافی و ظلم آ انتئے چُپ ءُ؟ اسہ معصوم شاری ئسے وار وار زوراکی ئٹ بیگواہی نا گواچی کننگک و خاہوت ءِ ہم وار وار ذہنی اذیت آتیان گدریفنگک ولے افسوز عدالت، میڈیا و بندغی حق آتا گل آک چُپ تماشائی جوڑ مریسہ ننا بیوسی آن اُست پدین مننگ ءُ۔

بانڑی بلوچ گیشتر پارے کہ خدو 6 ستمبر 2022 آ کنا ماما ممتاز بلوچ ءِ سی ٹی ڈی و ایلو ریاستی ادارہ غاک خضدار آن بیدس قانود برمتہ کریسہ دریر و دائسکان ننے اونا بابت ہچو معلومداری اس تننگپک کہ و اراڑے کے و انت حالیت ئٹی ءِ۔

بانڑی بلوچ چیف جسٹس سپریم کورٹ قاضی فائز عیسیٰ آن خواست کریسہ پارینے کہ چیف جسٹس کنا ماما نا بیدس قانودی زوراکی ئٹ بیگواہی نا نوٹس ہلے، کنا ماما بے ڈوہ ءِ اودے دمدستی یلہ کرفے و ننا جان ءِ دا اذیت آن آسرات کے

او ودیک پارے کہ کنا ماما نا یلہ مننگ کن پگہ 3 اکتوبر 2023 آ بلوچ وائس فار جسٹس و خاہوت نا پارہ غان ایکس آ اسہ کمپین اس مرو ای غٹ بندغ دوست آتیان خواست کیوہ کہ او ننا کمک ءِ کیر و کمپین ئٹ بشخ ہلیسہ کنا ماما ممتاز بلوچ نا رکھوک یلہ مننگ کن توار بڑز کیر۔

بلوچستان نا ضلع آواران آن حوال آک رسینگانو کہ پاکستانی لشکر اسہ اسکول استاد ئسے تون اوار مُسہ بندغ ءِ زوراکی ئٹ بیگواہی نا گواچی کریسہ نادرست ہند آ درینے۔

شابیتی حوال تا ردئٹ آواران نا تحصیل جھاؤ نا علاقہ کورک آن اینو سہب ئتون پاکستانی لشکر اسکول استاد محمد اکبر، اسد اللہ و فہیم بلوچ ءِ دزگیر کریسہ بیگواہ کرینے۔

احوالکار تا ردئٹ پن کروک بندغ آک خڑک سیال ءُ ہرافتے فورسز آک اُرا غا چھاپہ خلیسہ دزگیر کریر۔

ایلو پارہ غان جھاؤ نا علاقہ کوہڑو ٹی سید حاجی زیارت و ایب کیب ئٹ فورسز آک جنگل آتے ہم ہشانو۔

کنا راج ئنا باتِیک 

نوشت: رحمان بلوچ 

دی بلوچستان پوسٹ 

اسہ اُرا سیٹی بندغس خن ملا، باوہ و لمہ ایڑ و ایلم کُل خوش مسر کہ ننا اُراٹی چُوچُو نا دروشم ٹی اسہ خوشی اس بسک۔ سیال عزیز خڑک و مُر ئنا کل پھاشی کِن بریرہ او خاہوت ءِ موارک بادی ترسہ کیرہ۔ اندُن لمہ ہم خوشی آن ڈغار ءِ خنپک کہ کنا اولاد کنکن زِند ئنا اسہ آسودئی اس ہتو، باوہ ہم بشخندہ ٹی وخت ءِ تیر کیک کہ پگہ دے اگہ کنے گڑاس مس تو پروا اف کنا اولاد کنا اُرا ءِ خواجہی مرو، ایڑک ہم خوشی کیرہ کہ ننا ایلم ساندہ ننے رکھو۔ ایلمک ہم اندا امیت ءِ کیرہ کہ ننکہ ہم کوپہ اس بس۔ 

او بندغ نا پِن ءِ کَرم خان تِخار۔ اندُن کرم خان  خنتے ملیسہ ملیسہ چاگڑد ئٹی اوار مریک او ہر اسہ گڑا غان رُستی مریسہ کیک۔ باوہ مُچ تینا دے ءِ خواری و خید ئٹی تیر کیک کہ کنا مار خوش مرے اودے ہچ ئسے نا کمی مف۔ لُمہ ہم تینا اولاد نا کُل آن زیات خیال ءِ تخسہ کیک۔ 

اندُن مریسہ مریسہ دیک و ننک ہنسہ کیرہ کَرم خان  بھلُن مریسہ کیک داسا اود چُھنکی نا سِیم ءِ پرغسہ جوانی نا پارہ غا گھام ءِ تِخک، اود تینا بغل ٹی کتاب منٹ خلیسہ سکول آ خواننگ کن کائک، سنگت آتون سنگتی کیک، سیال آتون سیالی کیک و دنیا ءِ پُہہ مریسہ کیک۔ وختس باوہ لمہ لنگڑ و بینگن مریرہ ہم ولے تینا مار کرم خان  ءِ لنگڑ منِنگ الیپسہ۔ باوہ پیشن رُلسہ بھاز ہیت سگیک ولے اونا دا اُست سگیپک کہ کنا اولاد پگہ نا دے کنے آن بار خوار مرے۔ 

داسہ کرم خان جَوانی نا نیم ئٹی بس سلیس اسہ دے سنگتاک دریر تہ بازار آ چکر و سیل اتون اوار دا ہم خبر تما کہ اینو اسکول آن چھٹی ءِ مچہ سیل و چکر آن پدا اسہ مذہبی دود اسیٹی اَوِڑدہ مسر ہرادے دنیا عید میلادالنبی نا پِن ئٹ درست کیک۔ ولے ناگمان آن تراک ئسے نا بھلو توار اس مریک ہراٹی کرم خان تینا پنچ سنگت تون اوار ہندا دھماکہ نا گُواچی مریک۔ باوہ ہم بِننگ تون اوار بیلچہ و کُلنگ آتے خسیسہ تینا خیری ءِ مُچ کیک، وا رُمب کیک کائک بازارا ہمو جاگہ ہراڑے کہ مخلوق جلوس کریسس ہمو جاگہ ءِ سر مریک و چُیہانٹ خلیسہ تینا مار ءِ پٹیک، اسہ درستی ءُ بندغس تہ اودے خنیک و اونا کمک ءِ کیک، نیٹ امو جاگہ ءِ سر مریک ہراڑے کہ مار و ایلو سنگتاک ءُ تہ۔ 

باوہ خننگ تون گُٹ ئنا پُھر ئٹ کُوک کیک بندغاتے پائک کہ کنا مار ءِ ببو ہسپتال آ دین۔ آخر کار مخلوق بریک کمک کن باوہ اول تینا مار ءِ ہُرک کہ اسہ نت اس و دُو اس افک مار ئنا و باوہ نا مُچ ست ہوش کائک۔ بندغاک تینا کمک ئٹ مار ءِ ہفرہ دیرہ باوہ ءِ ہم اوڑتون اوار۔اوکان پدا سما تمک کہ مار تو ہمو وخت ساہ تسونے ہراتم کہ دھماکہ مس۔ 

اوکان پدا باوہ مار ئنا لاش ءِ دیک جاگہی کیک۔ دا بیرہ اسہ کرم خان ئنا کسہ اف جی آن کنا راج ئنا غُٹ باتی تا کسہ ءِ ہرا دے نیام لو دے جتا جتا غا حادثہ تا گواچی مریرہ، و ہرا زندہ ءُ اوفک تینا ساہ ءِ دلدستہ تخرہ کہ نن ہم اندا ڈول ریاست نا سیاسی گُوازی تا یام ئٹ حادثہ تا گواچی مرینہ۔