وڈھ ئٹ حالیت آتا خرابی
ٹی بی پی سرگپ

بلوچستان ئٹ قلات ڈویژن نا بنجاہی شار خضدار نا تحصیل وڈھ ئٹ اسہ توہ ئسے آن حالیت آک خراب ءُ۔ مینگل قبیلہ نا سردار اسد مینگل و بلوچستان نیشنل پارٹی نا سروک سردار اختر مینگل و فریق شفیق مینگل اسٹ ایلو نا برخلاف سنگر ہلکنو و جھڑپ آتیٹ بھلا سلہہ تے آزاتی ئٹ کاریم ئٹ ہتنگ ءُ۔ ترند جھڑپ آتا سوب وڈھ ئنا بندغ آک گھیرہ ٹی ءُ و وڈھ ئنا ہند آ کوئٹہ کراچی کسر گاڑی تا ہن و بر کن تیوہ بند مسنے۔

بلوچستان نیشنل پارٹی نا دوبہ ءِ کہ شفیق مینگل ڈھکوک ایجنسی تا پاننگ آ سردار اختر مینگل ءِ نزور کننگ نا کوشست کننگ ءِ۔ بی این پی شفیق مینگل نا برخلاف تیوہ بلوچستان ئٹ پہیہ جام و شٹر ڈاؤن ہڑتال کرینے و حکومت بلوچستان و قبائلی سردار آتا کوشست آتیان بیدس وڈھ ئٹ حالیت آتا خرابی دائسکان ترندی ہلنگ ءِ و شفیق مینگل نا بندغ آک کوٹ مینگل ئٹ سردار اختر مینگل نا اُرا ءِ راکٹ آتیٹ ٹک کننگ ءُ۔

بلوچستان ئٹ سیاسی ٹولیک چرجوئی ئٹ دوبہ خلیسہ کرینو کہ پاکستان نا ایجنسیز آک بلوچ انسرجنسی ءِ ایسر کننگ کن اِرا ہزار ہشت آن تیوہ بلوچستان ئٹ ڈیتھ اسکواڈ جوڑ کرینو، ہرا کیہی سیاسی باسک آتا زوراکی نا بیگواہی و خون تیٹ اوار ءُ و اندافتیان اسہ ڈیتھ اسکواڈ اس شفیق مینگل نا سروکی ٹی جوڑ کننگا ہرا ‘مسلح دفاع بلوچستان’ و ‘حق نا توار’ نا پِن ئٹ چاننگرہ۔ بلوچستان ئٹ ڈیتھ اسکواڈ آک انداخس تاغتور ءُ کہ او ریاست نا تہٹی ریاست نا کڑد ءِ سر تننگ ءُ۔

مسلح دفاع بلوچستان، جھالاوان عوامی پینل و حق نا توار شفیق مینگل نا سروکی ٹی قلات ڈویژن و خاص وڑ ئٹ خضدار ئٹ ریاستی ادارہ تیان زیات تاغت تخرہ۔ او گمانی وڑ ئٹ زر اکن برمتہ، زوراکی نا بیگواہی و خون تا بھاز آ تدینی تیٹ اوار مسنو۔ لیویز فورس نا توننگ آ ہند آ ساڑی نو لیویز کارندہ تے کسفنگ ئٹ اوار ءُ۔ سندھ پولیس نا جے آئی ٹی رپورٹ نا ردئٹ شفیق مینگل نا تعلقداری لشکر جھنگوی تون ہم ارے و شکارپور جلہو، ہرا ٹی شست (60) بندغ خلنگار او خودکش جلہو کار تے ءِ وڈھ ئٹ ہند تننگاسس و شفیق مینگل نا بندغ آک اوفتے شکارپور اسکان سر کریر۔

بلوچستان نا پارلیمانی ٹولیک جتا وخت آتیا ڈیتھ اسکواڈ تا برخلاف پاکستان نا پرلیمان و برانز آتیٹ توار ارفیسہ کرینو ولے بلوچستان ئٹ ہموتم اسکان ڈیتھ اسکواڈ تا برخلاف تحریک نا سوگوْ مننگ سخت ءِ ہراتم اسکان پارلیمانی ٹولیک دا ڈیتھ اسکواڈز آتے تینا پارٹی تیٹ جاغہ تننگ ءِ بند کتنو، گڑا او گمانی ڈیتھ اسکواڈ سروک قلات ئٹ کوہی خان مینگل و قمبر خان مینگل مرے، مشکے ٹی علی حیدر محمد حسنی مرے، مستونگ و کوئٹہ ئٹ نور احمد بنگلزئی مرے یا کیچ ئٹ راشد پٹھان و میر اوتمان مرے۔

اسہ علاقہ ئٹ ڈیتھ اسکواڈ آتا مخالفت و ایلو علاقہ نا ڈیتھ اسکواڈ ءِ پارٹی ٹی باہوٹ تننگ آن دافتا ایسری مننگ کپک۔ پارلیمانی ٹولی تے بیدس فرخ آن ریاستی ڈیتھ اسکواڈ آتا مخالفت ءِ کروئی تمو گڑا ہموتم بلوچستان ئٹ ڈیتھ اسکواڈ تا برخلاف تحریک سوگوْ مننگ کیک۔

ریاستی ادارہ تے ہم سرپد مروئی تمو کہ ڈیتھ اسکواڈ تا کمک ئٹ سیاسی جنز آک ایسر کننگ مفسہ و بلوچ آتے راجی حق تننگ آن بیدس بلوچستان نا ویل آک ایسر مفرور۔

بلوچستان ئٹ مروک خودکشی نا تدینی تا بابت بلوچستان حکومت تون اوار بندغی حق آ تا ادارہ، راج دوست گل و پارٹی تیٹ ہم اسہ چھپی اس خننگک۔ خودکشی تا بابت مخلوق ئٹ اسہ منفی رجحان اس خننگک، ہراڑے دانا زی آ پاش ہیت کننگ نا جاگہ غا، دادے ملامتی تون تفیسہ دن انگا تدینی تے بھلو کچ اسیٹ ڈھکنگ نا کوشست کننگک۔

دی بلوچستان پوسٹ نا مُچ کروک کچ و حساب نا ردئٹ برجاء سال نا اولیکو شش توہ ئٹ خودکشی نا 29 کیس رپورٹ مسنو، ہرافتیٹ 11 زالبول و 18 نرینہ اوار ءُ۔

ٹی بی پی ویژول اسٹوڈیو نا انفوگرافکس ئٹ بلوچستان ٹی رپورٹ مروک خودکشی نا معاملہ تیا برجاء سال نا اولیکو شش توہ ئٹ رجحان و سوب آتا جاچ ءِ ہلنگا۔

ڈیٹا نا ردئٹ خودکشی نا تدینی تیٹ مرگ ئنا گواچی مروک بندغ آتیٹ 11 زالبول و 18 نرینہ اوار ءُ اندن دافتیٹ 13 آن 28 سن ئنا زالبول و نرینہ اوار ءُ۔

دی بلوچستان پوسٹ نا مُچ کروک معلومداری تا ردئٹ ہر ہفتہ غا خودکشی نا اسہ کیس اس مونا بس ہرا آباتی نا 100000 آن 0.135 ریکارڈ کننگانے۔

خودکشی نا تدینی تیٹ 2 بندغ تیزاپ و زار کننگ، 12 چِٹ ئٹ، 10 نادرست وڑ تیٹ اندن 4 بندغ تینے تینٹ سم خلیسہ تینا زند ءِ ایسر کریر ہرافتا سوب تیٹ، غریبی، اُرائی جیڑہ، اُرائی بے دادی و گمانی وڑ ئٹ ریاستی فورسز و طاغت تخوک بندغ آتا بلیک میلنگ اوار ءِ۔

شش توہ نا تدینی تیٹ تیوہ غاتیان زیات زیمی مروک علاقہ تیٹ گڈانی، حب چوکی، کوہلو، نوشکی، کوئٹہ، تربت، چاغی، دالبندین، کچھی، کیچ، خضدار، پنجگور، آواران، ڈیرہ بگٹی، دکی و گوادر اوار ءُ۔

دی بلوچستان پوسٹ ءِ خودکشی نا دا تدینی تیا پٹ و پول نا وخت کیہی سختی تیتون مون تروئی تمانے، کیہی ہند آتیا پک احوالکار تیان پک کننگ آن بیدس کہ اسہ اُرا اسیٹ خودکشی نا تدینی اس مونا بسنے، حوال کننگ آ بندغ آک نمن مریسہ دا مرک آتے طبی یا تدینی نا پِن تسر اندن مُر ئنا علاقہ و حوالکاری آسراتی تا مفننگ نا سوب ہم کیہی تدینیک مونا بفسہ۔

بھاز آ کیس تیٹ خودکشی نا تدینی تیٹی ریاستی فورسز و گمانی وڑ ئٹ حکومتی سروکی ٹی کاریم کروک سلہہ بند ٹولی تا بلیک میلنگ اوار ءِ، اندن دا تدینی تیٹ بے پوریائی و ایلو نفسیاتی ویل آک ہم اریر۔

یاتی مرے بلوچستان ئٹ رپورٹ مروک خودکشی نا معاملہ غاک مننگ کیک 100 درسد درست مفس، انتئے کہ مُر ئنا علاقہ تے اسکان سر مننگ ئٹ سختی و حوالکاری آسراتی تا ساڑی مفننگ نا سوب مننگ کیک تدینی تا رپورٹنگ ئٹ کمبوتی مرے۔

بلوچستان نا ضلع پنجگور و نصیر آباد ئٹ سُم کاری نا تدینی تیٹ پولیس کارندہ تون اوار لمہ و مار مرگ ئنا گواچی مسر۔

پنجگور نا علاقہ کلگ ٹی سلاء بند گاڑی ٹی مروک بندغ آک سم کاری کریر ہراڑن  پولیس کانسٹیبل سمیر الہی بخش مرگ جنا گواچی مس ۔

ایلو پارہ غان بلوچستان نا علاقہ نصیر آباد ٹی زمین نا شرہ غا سم کاری نا تدینی ئٹ لمہ و مار کسفنگار ۔

پولیس نا ردئٹ نصیرآباد نا علاقہ گوٹھ موندر ٹی زمین نا شرہ غا سلہہ بند بندغ آک سم کاری کریر، تدینی ٹی لمہ و مار بیران مسر۔

پولیس نا پاننگ ئس کہ ڈوہدار آک سم کاری آن گڈ ہند آن نرار ، پولیس کارندہ آک جون تے اسپتال آ دریر اندن ڈوہدار تا پٹ و پول برجاء ءِ ۔

سفر زند و شاعری

نوشت: نزار قبانی | مَٹ: عتیق آسکوہ بلوچ

دہمیکو بشخ

ریل گاڑی آ جُلہو

نوزدہ سد و چِل نا دہ یک ئٹ ای بغداد، قاہرہ، دمشق و بیروت ئٹ ای و شیطان نا چناک سیخائی ریل گاڑی آ جُلہو کننگ، اونا مون ءِ ہڑسنگ و اونا مسافر تے آجو کننگ نا چم اس سجھفین۔ واہم پیر نزور آ ریل گاڑی آ دا جُلہو کننگ آسان اَلو۔ عثمانی دور نا رکھوک آک تینا متکنا گولہ بارود ئتون ریل نا چھٹ آ تولوک ئسر۔ اوفک ہمو ورنا تیا سُم شلنگ ئسر ہرافک ریل نا درغ و کھڑکی تیان تہٹی بننگ نا کوشست ئٹ ئسر۔ کیہی ورناک خلنگار و اخس ٹپی مسر۔ واہم منہ پُر جوزہ ورنا منہ ڈبہ غا کوزہ کننگ ئٹ سرسُہب مسر۔ شست ئنا دہ یک ئٹ اوفک زیات ڈبہ تیا کوزہ کریر۔ ہفتاد نا دہ یک ئٹ او ریل نا انجن آ تولوک مسر و ایسر اوفک اونا مون ءِ ہڑسار۔

ریل گاڑی آ کوزہ آن گڈ دا ہیت الّمی اَلو کہ جلہو کار ورناک دا ہیت آ اسٹ ایلو تون زنچک مہ زنچک مننگ و شرہ کیر کہ ریل گاڑی ئٹ اولیکو پیہوک نا پِن دیر ئس و پیہنگ نا تاریخ انت ئس۔ گواچن دادے کہ او تیوہ غاک اسہ جاغہ و خڑک خڑک زمانہ آتیٹ پیہاسر۔ دا ہیت ئنا ہچو اہمیت اس اَلو کہ اسہ بندغ ایلو آن اسہ فٹ یا نیمہ فٹ نا مُری آ پیہا یا اسہ سیکنڈ یا گڑا اوڑان ہم کم وخت ئنا فرخ تون، دا خاطر کہ تجدیدِ شاعری آ تار خلنگ نا قائدہ غاک بفسہ۔ شاعری نا پوسکنی اسہ غنجل و سخت ءُ گڑاس ءِ۔ اونا کیہی درغ آک ءُ۔ اونا معاملہ پڈ پُری و چُنا خننگ نا ڈول ءِ ہرا زمانہ و تیاری تیتون تفوک مریک۔ دا اساس آ ننکن ممکن اف کہ فلاں اولیکو بندغ ئس ہرا آجو شاعری نا جراثیم ءِ پٹّا، دنکہ آئن اسٹائن ‘نظریہ اضافیت’ یا ڈاکٹر فلیمنگ ‘پنسلین’ نا پٹ و پول ءِ کرے۔ زمغ آنبار ایسری فیصہ کروک پرمان شاعری آ بننگ کپک۔ شاعری تو دیہاڑ، نفسیات و تہذیب نا اندن انگا مجموعہ و کوڑ آتا سوب ءِ ہراٹی سلینگ اف، دا اسہ یاتگار اس اف ہرادے نن اسہ اُلسی ہند ئسے آ تخیسہ داڑا ہمو بندغ آتا پِن تے نوشت کین ہرافک شاعری نا سفر ئٹ خلنگار۔ شہدانِ شاعری بھاز ءُ، اوفتیٹ درست مروک آتیان زیات نادرست آک ءُ، و اوفتا بالاد اوفتیان ہم کم چاہندار ءِ۔

پوسکنی و پوسکنی تول نا بابت گپ کریسہ ننے آ لازم ءِ کہ نن قینچی ءِ کاریم اٹ ہتپن کہ نن ادب نا دیہاڑ ءِ تینا مرضی تون کپ چنڈ کننگ آ مرین، و ہمو درزن آ جراتمند شاعر آتا دروشم تے چِیرن ہرافک 1925 ئٹ دا کاریم نا باریم ءِ ارفیر و عربی شاعری نا نزور آ ریل گاڑی آ جلہو کننگ نا چم کریر۔ دا جتا ءُ ہیت ئسے کہ دیہاڑی، چاگڑدی و ربیدگی حالیت آک اوفتے تینا چم آتیا مُستی گام ارفنگ نا موْکل تتور۔ دا بھاز بھلو ردی اس مرو، دیہاڑی و اخلاقی ردی، اگہ نن انقلابی تا لڑ ئٹ الیاس ابی شبکہ کوْن آ بندغ آتا پِن تے اوار کپن۔ اوڑان ہم بھلو ردی اس مرو کہ نن انقلاب و انقلابی تا بابت تینا گپ تران آتیٹ بڑز کڑدار بندغ تیان بے پام مرین دنکہ بشارت الخوری، امین نخلہ، صلاح لبکی، یوسف غصّوب، سیعد عقل، فوزی المعلوف، ایلیا اہوماضی، نسیب عریضہ، رشید ایاب، عمر ابوریشہ، علی محمود طٰہ، و ابراہیم ناجی۔

پوسکنی نا ہمو تیوہ غا خواننگ ہرا روتہ غاتے اسکان سرمننگ کتو، بیرہ بڑز ئنا و خودغرض خواننگ سلور۔ بیدس شک نہ پوسکنی نا دور ننے آن مُست سلوک ئس و نہ شاعری نا بناء ننتون اوار مسونے۔ شاعری نا ہر ساعت تینا مُست ئنا ساعت تون گنڈوک ءِ۔ شعری کوک آک پوچکو آنبار نیستی آن وجود اٹ بفسہ۔

زیارت تدینی نا دروغ ئنا مونتس ئٹی خون مروک بندغ آتا اولیکو سال پوروی آ شہید شہزاد بلوچ نا اُرا ٹی شہید آتا یات ئٹی اسہریفرنس ئس اڈ تننگا۔

دا وخت آ زیات نا شہید آتیکن قرآن خوانی ہم کننگا و اوفتا ایصال ثواب کن خیرات ہم بشخنگا۔

شہید شہزاد نا خاہوت، خوانندہ آتون اوار اونا ایلو سیال عزیز آک اوڑدئی کریر۔ اوار مروکا ریفرنس ئٹی تران کرسا پاریر کہ دا ہیت کسآن ڈھکوک اف کہ ہر بروکا دے بلوچ قوم نا ورنا تے دُننگا دروغ ئنا مونتس آتیٹ شہید کرسا ویران آتیٹ خسنگک۔

او پاریر کہ شہزاد دھوار پولی ٹیکنک کالج آن انجینئرنگ نا ڈگری ہلکسس و او تینا ڈگری ءِ ہلنگ کن قلات آن کوئٹہ آ ہناسس کہ اودے04 جون 2022 آ سادہ ءُ پُچ بینوک ڈھکوک ادارہ آتا کارندہ و ایف سی نا کارندہ آک موسیٰ کالونی سریاب روڈ کوئٹہ آن اونا ایلوسنگت آتون اوار، ہرافتیٹ ڈاکٹر مختار بلوچ، عتیق بلوچ، احمد بلوچ اوار ءُ، دزگیر کرسا بیگواہ کریر۔

“بیگواہ مننگ آن گڈ جتا وخت آتیٹ شہزاد نا موبائل نمبر آن 12 جون 2022 اسکان پاکستانی ڈھکوک ادارہ آتا کنڈ آن خاہوت نا بندغآتے شہزاد نا پن آ میسج کننگاکہ کہ ای پکنک کن ہنانُٹ و منَہ دے آن پد واپس بروٹ اُرا نا بندغ آک فریشان مفس، منَہ دے آن پد شہزادبلوچ نا ایلم ءِ کوئٹہ ٹی اسہ سنگت ئس پارے کہ شہزاد ءِ ریاستی ادارہ آک تدوکا دے تیٹ کوئٹہ آن بیگواہ کرینو ہمو وخت شہزاد بلوچنا خاہوت اونا موبائل فون ءِ ٹریس کرفے تو لوکیشن کوئٹہ کینٹ پاننگاکہ ہرا نا شاہدی اونا خاہوت تون ارے۔

خاہوت نا بندغ آک ودیک پاریر کہ اوکان پد نن کوئٹہ پریس کلب ٹی شہزاد نا بیگواہی نا باروئٹ پریس کانفرنس و برانز ہم کرین و تھانہبوسی منڈی کوئٹہ ٹی شہزاد بلوچ نا بیگواہی نا ایف آئی آر ہم کرین، ٹوئٹر آ کمپین ہم کننگا و سیول ڈیفنس ئٹی ہم شہزاد نا بیگواہی نارپورٹ کننگا، 02 جولائی 2022 آ ننے سیول ڈیفنس نا کمیشن ئٹ پاشی کن خواہفنگا، 15 جولائی 2022 آ پاکستانی لشکر نا کنڈ آنبلوچستان نا علاقہ زیارت ئٹی شہزاد بلوچ تون اوار پین 9 بیگواہ مروکو بندغ دروغ ئنا مونتس ئٹی شہید کننگا، شہزاد بلوچ تون اوارایلو بیگواہ غا بندغ آتے ہم بلوچستان نا جتا ضلع آتیا جتا وخت آتیٹ سیکورٹی لشکر دزگیر کننگ آن گڈ بیگواہ کریسس ہرافتا خاہوت ووائس فار بلوچ مسنگ پرسنز نا کنڈ آن اوفتا آجوئی کن جتا وخت آتیٹ برانز ہم کننگاسس۔

او پاریر کہ زیارت تدینی آن گڈ دتکی وزیر داخلہ میر ضیاء اللہ لانگو ہم زیارت تدینی نا خاہوت آتے انصاف تننگ کن اسہ کمیٹی اس اڈتس ولے دا کمیٹی آن ہم ننے انصاف رسیگتو و رانا ثناء اللہ نا انصاف تننگ نا واعدہ آک ہم پورو متور۔

او ودیک پاریر کہ اگہ شہزاد بلوچ ڈوہداری اس کریسس تو اودے عدالت ئٹی پاش کننگاکہ و اونا ڈوہداری پک مسکہ تو اودے عدالت سزاتسکہ۔ مگہ ریاست نا عدالتی نظام مسخ و نزور مسنے کہ ریاست ءِ تینا عدالت آتیا ہم باور اف۔

او پاریر کہ اندن ننا لمّہ تینا مار ئنا دَک ءِ سگنگ کتو و کذیت کرے و ننا خاہوت ءِ ہم ریاست نا کنڈ آن چپ کرفنگ کن خاہوت نا ایلو بندغآتے بیگواہ کننگک۔

ایسر ئٹ او پاریر کہ نن بندغی حق آتا تنظیم و اقوام متحدہ آن خواست کینہ کہ ننے انصاف تننگ کن تینا کڑد ءِ سر تیر اگہ ننےانصاف تننگ متو تو نن تینا مُستی لائحہ عمل نا پڑو کرون۔

خضدار یونیورسٹی نا برانز کروک خوانندہ آتا برانز داسکان برجاء ءِ، خوانندہ آک استو ننکان مروک مذاکرات نا سرسہب مننگ آن نمنمسونو۔

استو ننکان خوانندہ آک گرینڈ الائینس و یونیورسٹی کوالخواہ تا نیام ئٹ مذاکرات مس و گڈ سر ئٹ اندا حوال مونا بس کہ خوانندہ آتاخواست آک ایسر مسنو ولے برانز کروکا خوانندہ آک دا حوال آن نمن نریسہ پاریر کہ کہ یونیورسٹی ٹی برانز داسکان برجاء ءِ۔

حوال تروکا تا رد ئٹ اسپیشل امتحان آتا باروئٹ فیصلہ آ بست و بند تینے توننگ کتنے، ہرا نا سوب آن خوانندہ آک نوٹفیکشن بننگ واوڑا امنائی کننگ اسکان برانز برجاء تخنگ نا فیصلہ کرینو۔

تدوکا دئے دے آن بلوچستان یونیورسٹی آف انجینئرنگ اینڈ ٹیکنالوجی خضدار نا خوانندہ آک تینا خواست آتا حق ئٹی برانز کننگ ءُ۔

تدوکا دے تیٹ برانز نا وخت آ پولیس و فرنٹیئر کور یونیورسٹی ٹی پیہسہ برانز کروک آتے بے دادی نا گواچی کرسا کیہی خوانندہ آتےدزگیر ہم کریر ہرافتے پدان یلہ کننگا۔

خضدار یونیورسٹی نا برانز کروک آتتون اوڑدئی نا درشانی کن بنجائی شار کوئٹہ ٹی بلوچ اسٹوڈنٹس ایکشن کمیٹی اسہ برانزی دپدرشانی اس ہم کرے و چاگڑدی حوالکاری میڈیا آ اوفتا حق ئٹی توار ہم بڑز کننگا۔

بولان میڈیکل کالج نا کلاس آک جمعہ نا دے آن دوارہ بناء مرور۔

شابیتی حوال تا رد ئٹ اِرا تُو آن زیات وخت بند مروک بولان میڈیکل کالج نا کلاس آک جمعہ نا دے آن دوارہ بناء مرور، کلاس آتے بناءکننگ نا پڑو چار شمبے نا دے یونیورسٹی نا بست و بند نا کنڈ آن اسہ نوٹس اسیٹ کننگا۔

بست و بند نا کنڈ آن شنگ مروک نوٹس ئٹی پاننگانے کہ بولان میڈیکل کالج نا خوانندہ آتے حوال تننگک کہ جمعہ نا دے 21 تاریخ آنکالج ئٹی کلاس آتون اوار ایلو کاریمک بناء کننگور۔

یاتی مرے کہ بولان میڈیکل کالج ئٹی استاد آتا کنڈ آن تینا خواست آتا حق ئٹی برانز و کلاس آتا بائیکاٹ نا سوب آن تدوکا اِرا تُو آنیونیورسٹی ٹی خوانندہ آتا غٹ کاریمک بند ئسر ہرا نا برخلاف خوانندہ آتا کنڈ آن برانز و پریس کانفرنس ہم کننگا۔

خوانندہ آتا پاننگ ئس کہ بلوچستان نا غٹ میڈیکل کالج آک ہڑاند آتا گواچی ءُ، خوانندہ آک استاد آتا آئینی برانز نا مخ تفی ءِ کیرہ وذمہ وار آتیان خواست کیرہ کہ او استاد آتا خواست آتے ایسر کیر تاکہ خوانندہ و استاد آتے ودیک ہڑاند مف۔

خوانندہ آک اینو یونیورسٹی نا کنڈ آن کلاس آتا دوارہ بناء کننگ نا پڑو آن گڈ پاریر کہ دا خوانندہ آتا جہد ئنا سرسہبی ءِ و اویونیورسٹی ٹی برجاء ہڑاند آتے ایسر کننگ کن آئینی برانز نا مخ تفی ءِ برجاء تخور۔

ضلع خضدار نا تحصیل وڈھ ئٹی فریق آتا کنڈ آن کیہی گھنٹی اسکان ترند سم کاری کننگا، علاقہ ٹی بیم و خلیس تالان مس۔

وڈھ ئٹی فریق آتا کنڈ آن ٹہفوک سنگر تیان اسٹ ایلو آ سم کاری کننگا۔ تومکا کنڈ آن پوسکن و بھلا سلاہ تیٹ جلہو مس۔

دا باروئٹ علاقہ ٹی باز بیم و خلیس تالان ءِ۔ بازارک تیوہ بند و شاریک اُرا تیٹ بند ءُ۔

یاتی مرے کہ فریق آتا کنڈ آن استو ننکان سم کاری بناء مس ہراٹی اینو شام ئنا وخت آ ترندی بس۔

بلوچستان نیشنل پارٹی و سردار اختر مینگل نا حامی تا موقف ءِ کہ شفیق مینگل ءِ ریاستی ادارہ آتا مخ تفی دوئی ءِ و وڈھ ئنا حالیتآتے خراب کننگ خواہرہ۔

پارٹی کوٹ مینگل آ جلہو نا برخلاف تیوہ بلوچستان ئٹی برانز نا پڑو کرسا کسر تے بند کرے۔ بلوچستان نا صنعتی شار حب چوکی ٹیکراچی کوئٹہ نا کسر ءِ ہن و بر کن بند کننگا۔

کوئٹہ نا بائی پاس و ایلو علاقہ آتیٹ ہم بی این پی نا باسک آک برانز کرسا کسر تے بند کریر۔

وا ہم وڈھ آن رسینگوک حوال تا رد ئٹ تومکا کنڈ آن سم کاری تا لڑ اسیکہ سلیسُنے۔

زوراکی نا بیگواہی نا گواچی سیف اللہ رودینی نا ہیڑ فرزانہ رودینی تینا ایلم نا رکھوک آجوئی نا خواست کرسا پارے کہ بندغی ہمدردی نا بنداو آتیا کنا ایلم ءِ آجو کننگ مرے۔

او ودیک پارے کہ بیرہ کنا ایلم ءِ بیگواہ کننگتنے بلکہ ننا خوشی تے ہم بیگواہ کننگانے، ننا جوزہ آتے لتاڑنگانے، کنا بیگواہ غا ایلم نا بے ساڑی مننگ آن ننا زند آک اسہ عذاب ئسے ٹی گدرینگ ءُ، ایلم نا بیگواہی نا ڈکھ درشان کننگ مفک، کنا ایلم سیف اللہ ءِ ننے واپس تننگ مرے۔

او بندغی حق آتا تنظیم و چاگڑدی حوالکاری باسک آتیان خواست کرے کہ کنا ایلم سیف اللہ رودینی نا آجوئی کن توار بڑز کیر، ایلم نا مرغن آ بیگواہی آن ننا زند آک بے معنی مسنو، خوشیک و خواہش آک خڑینک و اذیت ئٹی بدل مسنو۔ بندغی حق آتا تنظیم آتیان خواست ءِ کہ کنا ایلم نا آجوئی کن ننے کمک کیر و اونا رکھوک آجوئی کن توار بڑز کرسا تینا کڑد ءِ سر تیر۔

خیال مرے کہ سیف اللہ رودینی ولد داد خدا سوراب نا ہندی و محکمہ پولیس ئٹی ملازم اس ئس۔ 22 نومبر 2013 آ او اُرا غان خضدار آ ڈیوٹی آ ہِننگ ئس کہ اودے خضدار و سوراب نا نیام زاوہ نا ہند آ سلاہ بند بندغ آک زوراکی ئٹ تینتو دریر۔

ہندی پولیس و لیویز تدینی نا ایف آئی آر کننگ آن نمن کریسس ہراڑکن اونا خاہوت بیگواہ غا بندغ آتا کمیشن آن خواست کرے کہ سیف اللہ نا بیگواہی نا ایف آئی آر کننگ مرے۔

ہشت سال گدرینگ آن گڈ کمیشن نا پاننگ آ 11 مئی 2021 ٹی ہندی لیویز ایف آئی آر کرے ولے سیف اللہ رودینی نا باروئٹ داسکان ہچو معلومداری رسینگتنے۔

سیف اللہ رودینی نا خاہوت نا پاننگ ءِ کہ بندغی حق آتا تنظیم آتون اوار ایلو جہانی ادارہ آک بلوچستان ئٹی زوراکی نا بیگواہی تا دا بندغی ویل ءِ نظر انداز کننگ ءُ ہراڑان بلوچستان ئٹی بندغی المیہ ودی مسنے۔

بلوچستان نا ضلع مستونگ ٹی جنی تا الاخ ءِ شکست مس ہرانا سوب ٹی ارا بندغ بیران اندن 19 ٹپی مسر۔

تدینی مستونگ نا ایب کیب ئنا علاقہ کنڈ میسوری دشت نا خڑک جنی تا پک اپ گاڑی چپی مننگ آن مس۔

تدینی نا حوال رسینگنگ تون نواب غوث بخش رئیسانی میموریل ہسپتال نا ایمبولینس آک ہمو ہند آ رسینگار و بیران و ٹپی مروک آتےہسپتال آ دریر۔ ہراڑے ٹپی مروک آتے جانجوڑی کمک تننگا، اندن ارا ٹپی مروک آتا حالیت نازرک پاننگک اوفتے کوئٹہ آ ریفر کننگانے۔

ایڑے قلات آر سی ڈی ملکی ایریا ٹی کوئٹہ آن خضدار آ ہنیسہ لینڈکروزر گاڑی موٹر سائیکل ءِ دک خلک ہراڑان شکست نا سوب ٹی ربنواز ولد محمد حسن قوم لہڑی سکنہ کھڈکوچہ سن 22 سال ہند آ کسک اندن اونا سنگت عطاءاللہ ولد شیر محمد قوم لہڑی ٹپی مس۔

جون و ٹپی مروک ءِ 1122 رسیکیوں DHQ قلات آ دننگا ہراڑے پولیس کاروائی آن گڈ جون ءِ خاہوت نا حوالہ کرے۔

ژوب نیو اڈا نا ہند آ مانسہرہ آن کوئٹہ آ ہنوک بس و رکشہ نا نیام ئٹ دک لگا، ہرانا سوب ٹی رکشہ ٹی مروک ڈارئیور تون اوار پنچ بندغٹپی مسر، ہرافتے اسپتال ژوب آ دننگانے۔

ہمو وخت خانوزئی دلسورہ نا ہند الاخ آتا نیام ئٹ دک لگنگ نا سوب ٹی ارا بندغ بیران و ارٹ ٹپی مسر۔

حوالکار تا ردئٹ ہڑتمکا تا تعلقداری پشین سیدان قوم آن پاننگیک۔