جنگ، جنگ آتا برخلاف
نوشتکار: سلام صابر
مٹ: برناز بلوچ
دی بلوچستان پوسٹ
بلوچستان ئٹ سیاسی بیداری بلوچ انسرجنسی نا ودی کروک ئسے، ہفتاد نا دہائی ٹی جنگ آن پد راجی آجوئی نا فکر ئتون تفوک بندغاک خیر بخش مری نا کماشی ٹی اوغانستان ئٹ جلاوطن ئسر و بلوچ سیاست پاکستان نا پارلیمانی راہداری تیٹی اختہ ئس۔
بلوچستان ئٹ برجا جہد نا راہشون خیربخش مری راجی آجوئی نا جہد ٹی سلہہ بند جنگ ءِ اہمیت تسکہ انتئے کہ تاغت آن بیدس دشمن ءِ شکست تننگ مننگ کپک و تاغت ءِ بیرہ تاغت ہی چٹفنگ کیک، حق توار نا منوک بلوچ آک جنز ءِ کسر اس نشان تسر و بروکا وخت ئنا جنز نا راہشون آک دا سرکل ٹی بلوچ فکری کاروان نا بشخ جوڑ مرسا بیست و یکمیکو کرن ئٹ بلوچ انسرجنسی نا بنداو ءِ تخار۔
خیر بخش مری نا فکری سنگتاک بلوچ لبریشن آرمی نا تلہ آن ہراتم سلہہ بند جنگ ئنا بنداو ءِ تخنگ ئسر، او وخت آ بلوچستان ئٹ سیاسی جماعت آک پاکستان نا پارلیمان ٹی چندی سیٹ آتیکن آجوئی نا جنز آن دو کشاسر، وڈھ ئنا راجی مہکش راسکوہ ٹی گلزمیں نا سینہ ءِ ایٹمی تراک آتے ئٹ دتر چر کننگ آن پد خوش خوش پاکستان نا سروزیر نا ڈریوری ءِ مناسس و مڈل کلاس نا راہشونی نا دعویٰ کروکا راہشون ڈاکٹر مالک نا پاننگ ءِ کہ اوفتا سنگتاک 1985 ٹی سلہہ بند جہد آن پیشتمسا پاکستان نا پارلیمانی کسر ءِ ہلکسر۔
برجا غا جہد نا بناء نا وخت بلوچ انسرجنسی ٹی سیاسی پڑ ساڑی الو، دا ردئٹ اختلاف تخوکو بندغ مرو ولے دیہاڑ آن واخب سیاسی باسک آک دا راستکی آن نمن کروفس کہ بلوچستان نا پوسکنا کرن نا بناء ٹی سلاء بند پڑ ئنا بندغ آتیان مست بی ایس او و بی این ایم (بلوچستان نیشنل موومنٹ) ءِ پوسکنو دروشم اس تریسہ راجی آجوئی نا جہد تون تفنگ ٹی اہم ءُ کڑدار اس سلاء بند جہد ہی مونا ہیسوسس۔
جنگ ئنا بناء و بنائی سال آتیٹی سلاء بند محاذ بلوچ انسرجنسی نا پجار ئس، چیئرمین غلام محمد نا راہشونی ٹی راجی سیاسی جماعت نا جوڑ مننگ تون اوار سیاسی ادارہ غاک بلوچ جنگ نا توار مرسا انسرجنسی ءِ تاغت بشخار و چیئرمین غلام محمد و صباء دشتیاری بلوچ سیاسی پڑ آ راجی جنگ ئنا ترجمانی ءِ کرسا بلوچ راج ءِ آجوئی نا کسر ٹی سلاء بند جنگ ءِ گچین کننگ نا پنت تسر، ریاست بلوچ راجی ادارہ آتے نزور و ایسر کننگ کن زوراکی نا بیگواہی تے اسہ ازباب ئسے نا ردئٹ کاریم ئٹ ہتیسہ سیاسی جماعت و ادارہ آتا منوک جہدکار آتے غٹ آن مہالو ٹک کرے و تیوہ بلوچستان و کراچی ئٹ زوراکی نا بیگواہی تا وے کھٹوک ءُ لڑ اس بناء مس ہراکہ اینو اسکان برجا ءِ۔
زوراکی نا بیگواہی تیٹی فکر آتا نیام ئٹ فرق کننگتو، سیاسی راہشون، چاہندار، استاد، ڈاکٹر، مزور و جنگی سپاہی غٹ بیگواہی نا گواچی کننگار پدان ہرافتا جشوک جونک مش و بیابان آتیان دو بننگ بناء مسر۔ ریاست بلوچستان ئٹ سیاست نا زی آ رکھ خلک، کیہی سیاسی کارکن آک خلیج و یورپ ٹی باہوٹ ہلکر، ہزار آ سیاسی جہدکار آک مش ئنا پاسوئی مون کریر و سلاء بند محاذ ءِ جنگ ئنا پوسکنو سنگر اس جوڑ کریر، لَکھ آتیٹی بندغاک بلوچستان نا جتا جتا غا علاقہ و پنجاب، سندھ و اوغانستان آ جلاوطن مسر۔
جنگ ئنا سیخا آن زیمی یورپ ٹی جلاوطن مروک گڑاس بندغ ہرا جنگ ئنا بنائی سال آتیٹی جنگ ئنا بشخ ئسر، او پاش یا ڈھکوک لوز آتیٹ بلوچ انسرجنسی نا ساڑی پوسکنا جنگی حکمت عملی تا برخلافی کننگ ءُ کہ خدانخواستہ یورپ ٹی اوفتا سیاسی باہوٹ نا خواست آ زیم تمیسہ اوفتا زند زیمی مف انتئے کہ بلوچ انسرجنسی تون تفوک سلاء بند ادارہ غاک کوزہ گیر پاکستان تون اوار چین ئنا سامراجی مسخت آتے ہم ٹک کننگ ءُ۔
کنا علم ٹی بننگ اف کہ اوفک جنگی حکمت عملی تا برخلاف مننگان انت دوئی کننگ خوائرہ، اگہ فرض کین بلوچستان ئٹ سیاست کن موکل مسکہ گڑا مگہ اوفک یورپ ٹی جلاوطن مسرہ؟ سیاست ءِ ایسر کننگ نا ریاستی چم آک متورہ گڑا ڈاکٹر دین محمد و زاکر مجید بیگواہ مسرہ؟ بلوچ سیاست نا کسر منطقی متوکہ گڑا امیرالملک تینٹ گڈیکو سم ءِ تینکن گچین کریکہ؟ ریاست نا بیم بش کروک زوراکیک متورہ گڑا زبیر سرپراہ مگہ ننے جشوک جون ئنا حالیت ٹی رسینگاکہ؟ اگہ ننکن ایمنی نا کسر اس بچاکہ گڑا مگہ شاری و سمّو جند ندری جلہو کریرہ؟ جنگ آن بیدس اگہ ننتون پین کسر مسکہ گڑا مگہ شانزدہ ورنا اسہ نن ئٹی دشمن نا کیمپ آتیا جلہو کریرہ؟
نن انتئے دا گواچنی آن نمن مروک اُن کہ بلوچ جنگ ئنا سوب آن جہان ننا توار ءِ بننگ ءِ۔ اگہ بلوچستان ئٹ سلہہ بند جنگ متوکہ گڑا اینو بلوچستان ٹی ننا پوہاڑ ءِ بننگ کن کسس ہم متوکہ و جنگی تاغت متوکہ گڑا کوزہ گیریت نا پنجہ آتیٹی اڑینگوک نزور راج ئنا وجود خطرہ ٹی مسکہ۔
سمّی و مہلب چانڑدہ سال آن پاکستان نا ہرا ادارہ ءِ کہ ہرانا در آ ہنتنو، اوفتے دا وخت اسکان دروغ آ اُست تننگ آن بیدس پین انت رسینگانے؟ زاکر نا پیر انگا لمہ دا عمر ٹی پریس کلب آتا مونا فریاد کیک، اودے انصاف رسینگانے؟ ہراتم ہفتاد نا دہائی ٹی پاکستان ءِ پوسکنو زند اس تروکا زولفقار علی بھٹو نا مار پاکستان آن نااومیت مرسا زولفقار نا پن آن پاکستان نا برخلاف سلاء بند جہد نا کسر ءِ گچین کیک گڑا نن انتئے اومیت کینہ کہ دا ملک ئٹ نن کن سلاء بند جہد آن بیدس کسر ارے؟
مگہ یورپ ٹی جلاوطن مروک ننا سنگتاک سرپند مریرہ کہ کسر آتیا دو تیٹی بینر ہلوک بندغی حق آتا لتاڑنگ نا برخلاف نعرہ خلنگ و بندغی حق آتا ادارہ آتے بلوچستان ئٹ بندغی حق آتے لتاڑنگ نا رپورٹنگ آن راجی حق آک دُو برور۔
بلوچستان ئٹ پاکستانی کوزی گیری نا برخلاف سلاء بند جہد مف گڑا مگہ بلوچستان ئٹ زوراکی نا بیگواہی و بندغی حق آتا لتاڑنگ نا لڑ برجا مرو؟
بی این ایم نا سیکریٹری جنرل خواجہ دلمراد بلوچ نا پاننگ ءِ کہ “بلوچستان نا ویل بندغی حق آتا آخہ بلکن راجی بقاء نا ءِ۔”
نن انتئے تینا تہہ ئنا خلیس ءِ ڈھکنگ کن راجی بقاء نا جنگ ءِ بندغی حق آتا لتاڑنگ اسکان تفنگ اُن؟
بلوچ وائس فار جسٹس تون تفوک ننا سنگت لطیف بلوچ نا پاننگ ءِ کہ اگہ بلوچستان ٹی سیاست ئٹ ویل آک ایسر مسرہ گڑا پارلیمانی سیاست نا علمبردار سردار اختر مینگل وڈھ ئٹی مگہ شفیق مینگل نا برخلاف سنگر ہلککہ؟ یورپ ٹی جلاوطن مروک ننا سنگتاک انتئے داخس ناپوہی کرسا یورپ نا ہورک انگا بندغی حق آتا سیاست ءِ بلوچستان نا جنگی حالیت تا زی آ نافذ کننگ خوائرہ؟
مگہ ننا سنگتاک یورپ نا سامراجیت آن واخب افس؟
فلسطین ئٹ اسرائیلی زوراکی و بے دادی نا زی آ یورپ نا چپی آن بلد افس؟ سیاہ فارم افریقی مہاجر آتے روانڈا مون تننگان پد برطانیہ نا ارفوکا فیصلہ غان پوہ افس؟ جنگ آتیٹی فیصلہ غاک راجی سواد آتا بنداو آ ارفنگرہ یا بندغی حق آتا راہبند نا زی آ؟ ہراتم اقوام متحدہ سامراجی ڈیہہ تا اُرا تا چوکری جوڑ مسنے و یورپ تینا قانود نا زی آ عمل کننگ کن تیار اف گڑا بلوچ کون آ نزور تاغت نا زی آ انتئے دا قانود ءِ زور ئٹ شاغنگانے؟
عابد میر سن زو نا پنی آ کتاب ءِ مٹ کرسا سر لوز ٹی اسہ زیباؤ پیراگراف اس نوشتہ کرینے کہ “جنگ بھس کاری ئسے، بربادی ئسے، جنگ بندغ نا دشمن ءِ ، دیمروی، فن و فنکار نا دشمن ءِ ، ہندا خاطران جہان نا شاید ہی فنکار اس مرو ہرا کہ جنگ آن خار کروف، تیوہ جہان نا فنکار آک ساندہ جنگ آتا برخلاف شئیر نوشتہ کرینو، کسہ نوشتہ کرینو، چاگڑد ئٹ جنگ آن پد مننگ کن کسر پٹانو ، انتئے کہ ہندا ہی فن ئنا گواچن آ خواست ءِ۔
ولے ۔۔۔۔ ہراتم فنکار نا دھرتی آ کوزہ گیر نا کوزہ ٹی مرے، زوراکی تا راج مرے، لٹ و پل نا دیو دھرتی نا مسکین آ بندغ تا آزاتی نا زی آ جلہو کننگ مرے، زمین نا غلام جوڑ کروک بندغ تا زی آ او تینا دتری آ پنجہ غاتے تخوک مرے گڑا دن انگا وخت ئٹی قلمکار آک تینا قلم ءِ ازباب اس جوڑ کیرہ، جنگی ترانہ نوشتہ کیرہ، جنگ آتا کسہ آتے بیان کیرہ و تینا الس ءِ زوراکی تا برخلاف بش مننگ و جنگ کننگ نا پنت ایترہ، انتئے کہ ہندا فن ئنا بھلا خواست ءِ۔ ظالم و مظلوم نا جنگ ئٹی ہرافک تینا قلم ءِ مظلوم نا حق ئٹی ازباب جوڑ کپسہ گڑا او قلم تون بدکاری نا ڈوہدار مریک و دیہاڑ نا صلیب آ ہمو وخت نا سنگساری نا حقدار جوڑ مریک۔”
ننا ایمان ءِ کہ ننا جنگ بروکا نسل آتے ہر وڑ ئنا جنگ آتیان رکھنگ کن ءِ، ہندا خاطران نن ہر حالیت ئٹ سرسہب مرون۔
جنگ ئنا کیہی پہلو ءُ و لینن بھاز گچین پارینے کہ جنگ اسہ صنعت ئسے، ہرا ہزار آ بندغ تیکن بھس کاری نا سوب اس مریک و گڑاس بندغ جنگی صنعت آن سرمایہ نا ڈھیر اس مچ کیرہ۔ بلوچستان ئٹ برجا انسرجنسی ہزار آ شرحال خاہوت آتے بھس کرینے ولے بلوچ انسرجنسی تون تفوک گڑاس بندغ آجوئی نا جہد ءِ منافع نا پوریا اس جوڑ کرسا تینا لٹ و پل آ مسخت آتے پورو کرسا مال و مڈی و پن کھٹانو۔
بلوچستان ئٹ برجا جنگ ئنا سوب ہزار آ خاہوت آک سندھ، پنجاب، کوزہ مروک دےکہی بلوچستان و ہمسایہ ڈیھ اوغانستان ئٹ مہاجر آتا زند اس گدریفنگ ءُ، و “منہ حسابی بندغ” آتیان بیدس ایلو غٹ مہاجر آتا فکرمند آ حالیت ہننگ نا لائخ ءِ، ولے پیشن نا ڈیھک تدوکا یک و نیم عشرہ نا سیاست، ہندن کہ ننا سنگت آتا پاننگ ءِ “سفارت کاری” آن دا وخت اسکان بڑز پن کروک علاقہ آتیٹی آباد مہاجر تا بابت جہانی ادارہ آتسکان چنکو رسائی اس ہم انتئے مننگ کتنے؟
جہان نا ساڑی آ جیوپولیٹکس آن واخب مفروک زوال آ یورپ ٹی تولوک ننا سنگتاک ایمنی سیاست و بندغی حق آتا ادارہ تا کمک ئٹ و سفارتکاری آن راجی حق آتے ہلنگ نا دعویٰ کیرہ ولے خطہ نا حالیت و بلوچستان نا ڈغاری گواچنیک سنگت آتا دعویٰ آتیان اسل چپ ءُ۔
مگہ ننا سنگتاک منہ یورپی ڈیھ تیٹ برانز و ریلی تے سفارتکاری پارہ؟ مگہ دا کاریم تیان بلوچ راجی ویل ایسر مرو؟ اگہ راجی و جہانی ماملہ غاک برانز و ریلی تیان حل مسرہ گڑا مگہ اینو یورپ، امریکہ و سیوتی یوکرین ئٹ روس ئتون اوار جنگ نا حالیت ئٹ مسرہ؟ کلسٹر بمب آتا بابت سد ملک یورپ تون اوار معاہدہ غا دستخط کننگ آن بیدس امریکہ نا یوکرین ئٹ روس ئنا برخلاف کلسٹر بمب رادہ کننگ آ یورپی ملک آک چپ ءُ گڑا ہرا بنداو آ ننا سنگتاک یورپ نا بندغی حق آتا قانود ءِ ننا جنگ آ تخنگ خوائرہ؟
خطہ نا ترندی ئٹ مٹ مروکا حالیت آک، چین ئنا توسیع پسندی و خطہ ٹی دے کہی تاغت آتا زوال مننگ و بلوچستان ویل نا زی آ چپی ہندنو حالیت ودی کرینے کہ اگہ دا حالیت آتیٹی بلوچ انسرجنسی تون تفوک راجی جماعت و جنگی ادارہ غاک وخت و حالیت آتا نازرکی نا ردئٹ کبین ءُ فیصلہ ارفتوس گڑا بروکا وخت ئٹ بلوچ راجی جنگ نا سختی تیٹی ودکی مرو۔
خیر بخش مری نا پاننگ ءِ کہ اگہ منہ سال ئٹی نن بلوچ انسرجنسی ءِ اخیر اسکان سر کننگ ٹی سرسہب متون گڑا ننا فیصلہ ءِ کروکا پینک مرور، ننا راجی بقاء ننا جنگ ئٹی ڈھکوک ءِ و دا فیصلہ ارفوکا وخت آ ننا سنگتاک ہبکئی نا جاگہ غا تینا تاغت آتے راجی جنگ آ خرچ کیر۔
چُںک پان
تیوہ جہان نا تحریکی دیہاڑ آن ثابت مروک و منوک گواچنی ئسے کہ جنگ آن نروکا تا ہیت آتے نئے مسکوہی وخت آتیٹی اہمیت تننگانے و نئے ساڑی آ وخت ئٹ دن انگا بندغ تا ہیت آتے اہمیت تننگک۔
ایسری ہیت
دا شرف بندغی ٹی ہم بریک کہ ہراتم و ہراڑے ہم نن ہرینہ کہ اسہ مثبت ءُ عمل اس سر تننگک و نن ذاتی بابت ئٹ، او عمل نا بشخ جوڑ مننگ کپنہ گڑا بندغ تینا تہہ ئنا دشمنی و بیر ءِ کشیسہ “اخلاقی جیرت” نا درشانی ءِ کرسا منّے کہ او تینٹ راجی عمل نا بشخ اس جوڑ مننگ کپک، ولے ہرا بندغاک خاص وڑ ئٹ ورناک ہرا کہ تاغت تخرہ، ہرافتے ٹی جوزہ ارے گڑا اوفتے پابو کہ اوفک الم دا راجی عمل نا بشخ جوڑ مریر۔
