بلوچستان نا علاقہ لسبیلہ ئٹ کسر شکست نا سوب مُسہ بندغ بیران مسر۔

کمکار کوالخواہ تا ردئٹ لسبیلہ نا علاقہ بیلہ آن خڑک بھیم بش کروک تدینی اس مونا بس ہراڑے اسہ مسافر کوچ اس ترند رفتار نا سوب چپی مس ہرا نا سوب کوچ ئٹ سوار مُسہ بندغ بیران مسر۔

کوالخواک پاریر کہ تدینی نا سوب 20 بندغ آن زیات مسافر ٹپی مسنو ہرافتے جانجوڑی کمک کن اسپتال آ دننگانے۔

کوالخواہ تا پاننگ ءِ کہ مسافر کوچ کوئٹہ غان کراچی آ ہننگ ئس اندن تدینی ٹی بیران مروک آتا چاہنداری غلام نا مار نذر علی، عبدالبلال نا مار عبدالنبی و احسان نا مار نادر خان نا پن تیٹ مسنے۔

بلوچستان ٹی کسر تدینیک چرجوئی ئٹ برجاء ءُ، ہڑدے جتا حالیت نا شکست آتیٹ کیہی بندغک ٹپی مریرہ ہموڑے اسہ بھلو کچ اسیٹ بندغ آتا ساہک زیان مننگ ءُ۔

دی بلوچستان پوسٹ نا ڈیٹا ویژول اسٹوڈیو نا کچ و حساب نا رد ئٹ 2023 نا ارٹمیکو مُسہ تو ئٹی تیوہ بلوچستان ئٹ روڈ شکست آتا سوب آن 540 خاہوت زیمی مسنو و رپورٹ مروک تدینی تا کچ 175 ءِ۔

کچ و حساب نا رد ئٹ پن کروک تدینی تیٹ 145 آن زیات بندغ کسکنو و 395 آن زیات بندغ ٹپی مسنو۔ غٹ آن زیات زیمی مروکا علاقہ مستونگ ئٹ 30 تدینی، کوئٹہ ٹی 15 تدینی، خضدار ٹی 15، قلات ٹی 9، چمن ٹی 7 و سوراب ٹی 7 تدینی رپورٹ مسنو و سبی ٹی 6، تربت ٹی 6، مسلم باغ ٹی 5 و نوشکی ٹی 5 تدینی رپورٹ مسنو۔

انفوگرافکس

بلوچستان ٹی ارا دے نا نیام ئٹ چارمیکو جوْن دوئی کننگانے، ہرافتیان اسٹ نا چاہنداری دائسکان متنے ۔

بلوچستان نا ضلع بارکھان نا علاقہ عیشانی آن اسہ بندغ ئسے نا جون خننگانے۔ مش آن دوئی کروک جون نا چاہنداری اللہ بخش ولد توکلی قوم مسوری نا پن آن مسونے ۔

ہندی بندغ آتا ردئٹ اللہ بخش، بشک عیشانی گارنانی نا کھریا ئسک ہرا اسہ تُو ئس مالو بیگواہ مسوسس و اینو اونا جون دوئی کننگانے ، گیشتر پٹ و پول بست و بندی کوالخواک کننگ ءُ۔

اندن ضلع چاغی نا بنجائی علاقہ دالبندین آن اسہ پین بندغ ئسے نا جون خننگانے ۔

ذرائع تا ردئٹ پولیس ءِ اسہ بندغ ئسے نا جون اونا اُرا نا مون آن رسینگا ہرا نا چاہنداری سلیمان شاہ ولد حاجی دوست محمد قوم اسحاق زئی نا پن آن مسونے ۔

جون ءِ پرنس فہد ہسپتال آ دننگا ۔ ڈاکٹر آتا میڈیکل رپورٹ آتا ردئٹ کاٹم آ سم لگنگ نا سوب آن بیران مسونے ۔

ذرائع نا پاننگ ئس کہ پن کروک بندغ گمانی ردئٹ نشہ نا عادتی ئسک ، جون ءِ میڈیکل چیک اپ و اوکان گڈ المی کاروائی کننگ آن پد خاہوت نا حوالہ کننگا ۔ پولیس گیشتر پٹ و پول کننگ ءِ ۔

یات مرے کہ درو دالبندین آن اسہ جشوک جون ئس دوئی خننگاسس ہرانا چاہنداری دائسکان متنے اندن نوشکے نا سیم سری علاقہ ڈاک آن ہم اسہ بندغ ئسے نا جون دوئی کننگا۔

بلوچ لبریشن آرمی نا ترجمان جیئند بلوچ میڈیا ٹی شینک کروک بیان ئٹ پارے کہ ننا سرمچار آک تربت و پنجگور ٹی مسہ جتاء جلہو تیٹ کوزہ گیر پاکستانی لشکر ءِ ٹک کریر، ہرافتیان مسہ دژمن کارندہ مرگ ئنا گواچی مسر ۔

ترجمان نا پاننگ ئس کہ بی ایل اے نا سرمچار آک تدوکا نن تربت نا علاقہ آبسر ٹی کوزہ گیر پاکستانی لشکر نا ٹریننگ سینٹر نا رکھوک چوکی آ کارندہ آتے ٹک کریر ، سرمچار اک گرنیڈ لانچر آن دژمن آ کیہی گولہ خلکر ہراڑان کم و ود ارا کارندہ مرگ ئنا گواچی مسر و کہیک ٹپی مسر۔

بیان ئٹ پاننگا کہ اندا وخت بی ایل اے نا اسہ پین دستہ اس تربت ایئر پورٹ نا ہند آ پاکستانی لشکر نا چوکی ئسے آ گرنیڈ لانچر آن کیہی گولہ خلکر ، دا جلہو نا سوب کم و ود مسہ دژمن کارندہ ٹپی مسر۔

بیان ئٹ گیشتر پاننگا کہ اسہ پین کاروائی اسیٹی بی ایل اے نا سرمچار آک دوانزدہ جولائی 2023 نا نن آ پنجگور ٹی رخشان ڈور نا ہند آ مروک کوزہ گیر پاکستانی لشکر نا پوسٹ ءِ ٹک کریر ، سرمچار آک سلہہ بند جلہو ئٹ دژمن کارندہ آتیا گرنیڈ لانچر آن کیہی گولہ خلکر ، جلہو نا سوب کم و ود اسہ کارندہ ئس ہند آ مرگ ئنا گواچی مس اندن دژمن لشکر ءِ گیشتر جانی و مالی نسخان ارفوئی تما۔

ایسری ٹی اونا پاننگ ئس کہ بلوچ لبریشن آرمی دا ہر مُسہ جلہو تا ذمہ واری ءِ ارفک و دا پک گمان ءِ کیک کہ آزات ڈیہہ نا دوئی کننگ اسکان ننا کاروائیک برجاء مرور ۔

ضلع کیچ نا بنجائی شار تربت ٹی ایف سی ٹریننگ سینٹر و ایئرپورٹ روڈ آ چیک پوسٹ ءِ استو نادرست بندغ آک جلہو تیٹ ٹِک کریر۔ جلہو تا وخت آ تُرند تراک و سُم کاری نا توار تیوہ شار ئٹ پنا۔

کوالخواہ تا ردئٹ ائیرپورٹ نا ہند آ مروک ایف سی چیک پوسٹ آ راکٹ فائر کننگا ہرا ترند توار ئٹ ترخا ہرانا توار مُر مر اسکان بننگا ۔

تدینی آن گڈ فورسز کارندہ آتا پارہ غان سم کاری کننگا و علاقہ ءِ بند کریسہ گیشتر پٹ و پول ءِ بناء کننگا ۔

داکان مالو تربت نا علاقہ آبسر ٹی پاکستانی فورسز فرنٹیئر کور نا ٹریننگ سینٹر ءِ سلاء بند بندغ آک جلہو ئٹ ٹک کریسہ نرار۔

ہندی بندغ آتا ردئٹ جلہو نا وخت تراک و زیات سم کاری نا توار بننگا ۔

داکان بیدس تدوکا دے تربت ٹی سلاء بند بندغ آک سم کاری کریسہ ارا بندغ ءِ مرگ نا گواچی کریر ۔

سم کاری آن مرگ ئنا گواچی مروک آتا تعلقداری کراچی آن پاننگک ہرافتا چاہنداری نورالہی ولد ابوبکر و استاد نعیم نا پن آن مسونے۔

پولیس نا پاننگ ئس کہ سم کاری نا تدینی چاہ سر کراس نا ہند آ مس ۔ ہراڑے ہڑتوما کار سلوک سروس کوشک ٹی کاریم کننگ ئسر واہم تدینی نا سوب آک دائسکان مونا بتنو۔

پاکستان فوج نا پاننگ ءِ کہ ژوب ئٹ فوجی چھاونی آ جلہو و سوئی ئٹ اسہ فوجی لشکر کشی ئسے نا وختا 12 فوجی کارندہ خلنگانو۔

پاکستان فوج نا ترجمان محکمہ آئی ایس پی آر نا رِدئٹ چار شمبے نا سُہب ”دہشت گرد” آک ژوب گریژن آ جلہو کریر، ہراٹی نو فوجی خلنگار و پنچ جلہوکار ورندی کارروائی ٹی خنگار۔

بیان نا رِدئٹ اسہ پین تدینی اسیٹ بلوچستان نا ضلع سوئی ئٹ بھلا سلہہ تخوک ”دہشت گرد” آتیتون سُم کاری ئٹ پین مسہ فوجی کارندہ خلنگار و اِرا جلہو کار ہم خلنگار۔

آئی ایس پی آر پنچ شمبے نا نن پڑو کرے کہ ژوب ئٹ علاقہ ءِ ساف کننگ نا آپریشن ایسر کننگانے۔

مسہ سیکورٹی کارندہ احوالکاری ادارہ روئٹرز ءِ پاریر کہ عسکریت پسند آک ژوب ئنا فوجی اڈہ نا اسہ میس ئسے آ چغلی بمب خسار و دوارہ کہی گھنٹہ آتے اسکان سُم کاری مس۔

کمشنر ژوب ڈویژن سعید عمرانی میڈیا نمائندہ غاتے پارے کہ سم کاری آن نیو آبادی کاکڑ ٹاون ئٹ اِرا بندغ ٹپی مسر و اسہ پین ہند ئسے آ کوچ اس سم کاری نا دک اٹ بس ہراڑان اسہ زالبول اس ٹپی مس، و دوارہ کذیت کرے۔

تحریک جہاد پاکستان (ٹی جے پی) پنی اسہ پوسکنو جہادی گل اس ژوب جلہو نا ذمہ واری ءِ ارفیسہ دعویٰ کرے۔ ٹی جے پی دا جلہو ئٹ بشخ ہلوک تینا جنگول آتا عکس و پن تے ہم شینک کرینے۔

تحریک جہاد پاکستان نا پِن ہمو وخت مونا بس ہراتم دا گل برجاء سال مارچ ئٹ سبی نا رہی آ پولیس نا گاڑی آ جلہو نا ذمہ واری ءِ ارفے۔ دوارہ قلعہ سیف اللہ چھاونی آ جلہو نا ذمہ واری ءِ ہم اندا گل ارفے۔

ایلو پارہ غان سوئی ئٹ فوج آ جلہو نا ذمہ واری ءِ بلوچ لبریشن ٹائیگرز ارفے۔ ترجمان میران بلوچ بیان ئٹ پارے کہ فوجی کارندہ تیا ہمو وخت جلہو کننگا ہراتم اوفک لس آباتی تیا لشکر کشی کننگ ئسر۔

ضلع کیچ و خضدار آن پاکستانی فورسز و سلہہ بند بندغ آک ارا بندغ ءِ زوراکی ئٹ بے گواہی نا گواچی کرسہ نا درست آ ہند آ تیادریر۔

حوال آتا رد ئٹ کیچ نا علاقہ تمپ آن استو دو نیم بجہ نا وخت آ 17 سالی آ ورنا حکمت علی ولد ماسٹر برکت ءِ پاکستانی فورسز ناکارندہ غاک دزگیر کننگ آن گڈ بے گواہ کریر۔

حوال آتا رد ئٹ خاہوت ءِ حکمت علی نا باروٹ ہچ وڑ ئنا معلومداری تننگ افس۔

یاتی مرے کہ کیچ آن ارا دے ئٹ دائسکان ارا بندغ نا زوراکی ئٹ بے گواہی نا تدینیک رپورٹ مسنو۔

ایلو پارہ غان خضدار آن حوال آتا رد ئٹ سبزی منڈی آن سلہہ بند بندغ آک ثناء اللہ پندرانی ءِ زوراکی ئٹ بے گواہ کرینو۔

2023 نا اولیکو شش تُوہ ئٹ بلوچ سلہہ بند گل آتا پارہ غان 285 تدینی تا ذمہ واری ارفنگا۔ دا تدینی تیٹ مرگ ئنا گواچی، ٹپی و مڈی تے نسخان سر مننگ نا سوب اہم ءُ زیم تمانے۔

بلوچستان لبریشن فرنٹ (بی ایل ایف) 29 سرمچار تا نسخان تیتون اوار گوڑیفوک دروشم ئٹ 147 جلہو کرینے۔ دا جلہو تا سوب جتا محکمہ تیان تعلقداری تخوک پاکستانی لشکر نا 137 آن زیات کارندہ مرگ ئنا گواچی مسر۔ بی ایل ایف نا کارروائی تیٹ 57 آن زیات بندغ ٹپی و مڈی تے ہم نسخان رسینگا۔ بی ایل ایف 10 ضلع تا 50 علاقہ تیٹ کارروائی سر تس ہرافتیٹ کیچ، پنجگور و آواران ضلع تیا پام تننگا۔ بی ایل ایف دا وخت ئٹ اسٹ انگا گل ئس ہرا ضلع گوادر ئٹ جلہو تا ذمہ واری ءِ ارفے، ہرا چین پاکستان اقتصادی راہداری (سی پیک) نا اسہ اہم ءُ بنجاہ ئسے۔

بلوچ لبریشن آرمی (بی ایل اے) سال ئنا اولیکو شش تُوہ ئٹ 118 جلہو تا ذمہ واری ءِ ارفے۔ دا جلہو تا سوب 98 آن زیات بندغ مرگ ئنا گواچی مسر ہرافتیٹ پاکستانی فوج و ایلو سلہہ بند ادارہ تا کارندہ غاک اوار ءُ، اندن 116 آن زیات کارندہ غاک ٹپی مسر و 80 آن زیات جلہو تیٹ مڈی تے نسخان تننگ نا حوال آک رسینگار۔ پامدار آ ہیت دادے کہ بی ایل اے نا شاری جلہوک ایلو گل آتیان زیات ئسر اندن بی ایل اے 17 ضلع تیٹ تالان 54 علاقہ تیٹ کارروائی سر تس۔ دافتیٹ ‘جند ندری’ جلہو تیان ہلیس بنجاہی کسر تے بند کننگ اوار ئس۔ بیرہ جون ئٹ، بی ایل اے اِرا وار بنجاہی کسر تے بند کریسہ کیہی ٹرک آتے ہشا و کولا کانڑ نا کاریم تیٹ اڑاند ودی کرے۔ بی ایل اے بولان و کوئٹہ نا علاقہ تیٹ کیہی چھاپہ تا ہم ذمہ وار ئس۔ دا وخت ئٹ گل ءِ چار جنگجو تا نسخان تیتون مون تروئی تما، ہرافتیٹ مجید بریگیڈ نا اسہ زالبول باسک اس ہم اوار ئس ہرا ‘جند ندری’ جلہو کرے۔

ایلو سلہہ بند گل آک، یعنی بلوچ نیشنلست آرمی، یونائیٹڈ بلوچ آرمی، و بلوچ ریپبلکن گارڈز یکہ یکہ 21 جلہو تا دعویٰ کریر۔ دا تدینی تا سوب 19 آن زیات مرگ و 6 آن زیات مڈی تے نسخان رسینگا۔ دا گل آک 8 ضلع تا 10 علاقہ تیٹ کاریم کریر۔ دافتا جلہو تا ترندی کم ئس۔ پامدار آ ہیت دادے کہ دا گل آتیان اسٹ ءِ ہم جانی نسخان تیتون مون تروئی تمتو۔ دا گل آک 2023 نا اولیکو شش تُوہ ئنا وخت ئٹ غٹ جلہو تیٹ کم و ود 8 درسد بشخ ہلکر۔

بلوچ سلہہ بند گل آتا کاریمک بلوچستان ئٹ سکیورٹی نا حالیت آ بھلو زیم شاغانو۔ ذمہ واری، مرگ و مڈی تے رسینگوک نسخان تا بھلو کچ اس خطہ ٹی پاکستانی سکیورٹی فورسز آتا سختی تے پاش کیک۔ دا سلہہ بند گل آتا پارہ غان کاریم ئٹ ہتنگوک جتاء چم آک، ہرافتیٹ روایتی جلہو تیان ہلیس اڑاند ودی کروک گامک اوار ءُ، حالیت نا غنجل مننگ ءِ گیشتر پاش کیرہ۔ دا گل آتیٹ جنگجو تا نسخان شرہ نا ترند حالیت ءِ پاش کیک۔

ہڑدے ئی بنداو آ دا سلہہ بند گل آتا پاش مروک حکمت عملی و کاریم تے خڑک آن اوننگ کن بھاز الّمی ءِ تانکہ حالیت ءِ جوان وڑ ئٹ پہہ مننگ کین۔

بلوچستان نا ضلع قلات نا تحصیل منگچر نا ہند آ بیگواہ نوید لانگو، شاہان بلوچ، قذافی نیچاری، کفایت نیچاری و محمد حسن نا خاہوت آک تینا دوستخواہ تا یلہ مننگ کن تولوک برانز کریسہ کوئٹہ کراچی کسر ءِ ہن و بر کن بند کرینو۔

خاہوت آتا پارہ غان کسر ءِ سہب ئنا ہفت بجہ نا وخت آ بند کننگانے، برانز نا وخت بیگواہ نوید بلوچ نا ہیڑ میڈیا نمائندہ تیتون ہیت کریسہ پارے کہ نوید احمد لانگو ءِ 15 اپریل 2015 آ منگچر بازار آن فورسز کارندہ غاک تینتون دریر ہرا دائسکان بیگواہ ءِ و اونا بابت ہچو حوال اس رسینگتنے۔

او پارے کہ ننا غٹ بیگواہ بندغ تے یلہ کریسہ اوفتے عدالت ئٹ ہتنگے تانکہ نن دا اذیت و تکلیف آن آزات مرین۔

او گیشتر پارے کہ اگہ ننا بندغ تے عدالت آتیٹ مونا ہتنگپک گڑا کم آن کم ننے اوفتا بابت معلومداری تننگے و ننا بندغ تے ننتون ہیت کرفر تانکہ ننا اُست آتے جارات رسینگے۔

برانز نا وخت بیگواہ شاہان بلوچ نا مسڑ تران کریسہ پارے کہ کنا باوہ ءِ 2022 ئٹ فورسز کارندہ غاک بیگواہ کریر۔ نن تینا باوہ نا یلہ مننگ کن کیہی وار برانز کرین و سڑک آتیا دھکہ کنگن ولے ہچ اس متو۔

او پارے کہ کنا باوہ تون اوار بیگواہ بلوچ بندی تے یلہ کریسہ عدالت آتیٹ مونا ہتنگے یا ننے تینا بندغ آتیتون فون آ ہیت کرفنگے تانکہ ننے تسلی مرے۔

یاتی مرے اِرا تُوہ مُست 21 مئی 2024 آ ہم بیگواہ شاہان بلوچ، کفایت اللہ نیچاری، نوید بلوچ، و قذافی نیچاری تون اوار ایلو بیگواہ بلوچ آتا یلہ مننگ کن منگچر نا ہند آ خاہوت آک برانز کریسر۔ ہراڑے حکومتی تلہ نا بندغ تا پارہ غان اوفتے باوری کرفنگاسس ولے اوڑا دائسکان عمل درآمد مننگ کتنے۔

بلوچستان نا ارا ضلع کوہلو و آواران آن حوال ءِ کہ ارا زالبول خودکشی کریر۔

خودکشی کروک آتا چاہنداری عبدالولئ نا زائیفہ خانزادی و ندا نا پن آن مسونے۔

کوہلو ٹی خودکشی نا تدینیک ہفت جولائی آ مسر ، علاقائی ذرائع آک تدینی تا پک ءِ کریسہ پاریر کہ کوہلو نا غٹ تحصیل گرسنی نا علاقہ غربی گرسنی ٹی خانزادی پنی نیاڑی گمانی ردئٹ غریبی و لنگڑی آن تنگ مریسہ خودکشی کرے۔

یاتی مرے کہ غربی گرسنی نا ہندی دا وخت ہم غریبی نا ایسری لکیر ئٹ زند گدریفنگ ءُ ۔

ذرائع نا پاننگ ئس کہ خودکشی کروک نیاڑی نا ہشت مسڑ ءُ کل آن بھلا یانزدہ سال نا سن ئسے و چناتا باوہ پیر ءِ ہرا ہچو کاریم ئس کننگ کپک و دماغی حالیت تا ہم جوان اف۔

ایلو پارہ غان آواران آن ہم حوال آکو کہ گیشکور ٹی تدوکا دے تیٹ ندا پنی مسڑ ئس ہم خودکشی کرینے واہم تدینی تا سوب آک دائسکان سما تمتنو۔