بلوچستان نا ضلع خضدار و پنجگور ئٹ بلوچ سلہہ بند گل آک پاکستانی لشکر و اوفتا کمکار کارندہ آتے چغلی بمب جلہو تیٹ کرینو۔خضدار شار ئٹ مروک بمب جلہو ئٹ کم و وَد چار بندغ ٹپی مسر۔

خضدار جلہو نا ذمہ واری ءِ بلوچ لبریشن آرمی آرمی ارفے۔ ترجمان جیئند بلوچ میڈیا بیان ئٹ پارے کہ ننا سرمچار آک تدوکا نن خضدارشار ٹی جھالاوان کمپلیکس نا ہند آ قوضہ گیر پاکستانی لشکر و ڈھکوک ادارہ آتا ہڈ تروک بیرہ پن ئنا سلاء بند ٹولی ڈیتھ اسکواڈ ناکارندہ اسلم محمد زئی مینگل ءِ  چغلی بمب ٹی ٹک کریر، ہراٹی او ٹپی مس ۔

ترجمان نا پاننگ ئس کہ اسلم محمد زئی مینگل، ڈیتھ اسکواڈ سرغنہ شفیق مینگل نا نائب مسونے و خضدار شار و ایب و کیب ٹی بلوچآتا سم کاری کسفنگ ٹی ہم اوار مسونے ، اندن پن کروک کارندہ آک دکاندار نا دروشم ئٹ تینے ڈھکاسس۔

ایلو پارہ غان بلوچستان لبریشن فرنٹ نا ترجمان میجر گہرام بلوچ شینک کروک بیان ئٹ پارے کہ سرمچار آک ہفتہ نا دے، پنجگور نابنجائی بازار چنکان ٹی پاکستانی لشکر نا پوسٹ آ چغلی بمب ئٹ جلہو کریر۔ چغلی بمب چوکی نا تہہ ئٹ تما ہراڑان اسہ فوجی ئسمرگ نا گواچی مس۔

بلوچستان نا دریابی علاقہ گوادر آن حوال آک رسینگانو کہ پاکستانی لشکر نا اسہ کارندہ اس چنک سن چنا ئسے تون جنسی زیاتی ناکوشست کرینے۔

تدینی نا برخلاف ہندی بندغ آک برانز ئٹ سی پیک روڈ ءِ بند کرینو و برانز برجاء ءِ۔

خیال ئٹ مرے کہ بلوچستان ئٹ دا وڑ نا تدینیک ہر وخت رپورٹ مسونو۔

داڑان مالو بیست و یک اپریل 2021 آ بلوچستان نا ضلع کیچ ئٹ پیراملٹری فورس ایف سی نا کارندہ غاک اسہ چنک سن مار امیر داد ءِجنسی زیاتی نا گواچی کریسہ توسینگوک حالیت ئٹ خساسر۔ ہندی بندغ آک تدینی نا برخلاف برانز کریسہ ہوشاپ ئٹ کسر ءِ بندکریسر۔

یاتی مرے بلوچستان ئٹ بندغی حق آتا گل و بلوچ راج دوست آک ہر وخت بلوچستان ئٹ ساڑی ایف سی، پیراملٹری فورس آ بندغی حقآتے لتاڑنگ نا دوبہ خلیسہ بسونو۔

داڑان مالو پاکستانی فورسز آ بندغ تے برمتہ و بیگواہ کننگ آن بیدس بندغ تے خون کننگ نا دوبہ غاک ہر وخت خلنگانو۔

بلوچستان نا گیشتر علاقہ آتیٹ 36 گھنٹہ آتیان برجاء مروک پر تا وخت ئٹ 3 بندغ مرگ نا گواچی و کہیک ٹپی مسر ۔

بلوچستان ٹی چار شمبے آ بناء مروک آ پر تا لڑ ترند پر ئٹ بدل مسونے و جمعہ اسکان برجاء مس و دا نیام ئٹ نسخان آک ہم مسر ۔

پی ڈی ایم اے بلوچستان نا سروکی نصیر احمد نصر نا پاننگ ئس کہ لسبیلہ ، کیچ ، پنجگور ، واشک ، خضدار ، مستونگ و سورابتون اوار 7 ضلع آک بھاز خراب وڑ ئٹ زیمی مسونو ۔

خضدار ئٹ گروک تمنگ آن ارا چنا مرگ ئنا گواچی و گیشتر ارا بندغ ٹپی مسونو، ارٹمی تدینی ٹی کیچ نا علاقہ ٹی پر آن گڈ کسر آ  گاڑی شکست نا گواچی مس و اسہ شاری ئس مرگ نا گواچی مس ۔

تربت ٹی زیات پر آن گڈ نوکاپ نا دیر بس و شاری تون اوار ای کیب  آتیٹ زند نا نظام بند مس و کیہی اُراتے نسخان رسینگانے ۔

محکمہ مدح والاک خبردار کرینو کہ بلوچستان ٹی بروکا 48 گھنٹہ نا نیام ئٹ گیشتر پر مننگ کیک ۔

کنا جند ہمو ئس

نوشت: جویریہ بلوچ

ای سال آتا شش و پنچ نا گواچی، کتاب آتے خوانیوہ کہ نوائے تینے رسینگو، تینا “جند” ءِ ہرا کنے آن گم و گار ءِ یا کہ سوختہ ءِ کنے آن، انت اس کہ ارے ولے ای، ای افٹ اخس مُر اُٹ تینے آن ہچ سماء اف، ای اخس تینے دا کوٹی ٹی بند کریٹ تنیا کریٹ ولے نا اومیت مسوٹ، بنگوسٹ کہ تنیائی ٹی بندغ تینتون ہمکلام مریک تینے پہہ مریک کہ ای انتسے اُٹ دیر اُٹ، ولے ای تینے اخس تنیا کریٹ ہموخس شش و پنچ نا گواچی مسوٹ، تنیائی آن کنا مِلی ٹی اندنو توار توار اس بش مس کہ ای او توار نا نیام ئٹ اخس رُمب کریٹ دُودینگاٹ تینے سر متوٹ بلکن گیشتر تینے آن بیگانہ مریسہ ہناٹ۔ دا ہر ساہت ئنا توار توار کنے گنوک کیک ای ہربشی مریوہ تینے آن تینٹ نرّنگ کن اُست خوائک۔ ولے داسہ اسہ پین کسر اس آزموندہ کیو؟ نوائے ہموکان “کنا جند” کنے رسینگہ۔

اندنی تون کوٹی نا در ئنا توار کنے کنا خیال آتیان ہجم تس و ای سار آ بسوٹ۔ و ای کتاب نا پارہ غا اُراٹ کہ کتاب ئٹ دوک کنا اندن سخت ءُ کس پائے کتاب نرک کنے آن، ای دو تے تینا ملاٹ و کتاب ءِ آجو کریٹ تینا کوزہ آن، ہراتم ای پیشن نا توار آ پام تسوٹ گڑا سماء تما کہ تہو اندن ترند ءِ ہرا نا سوب دریچہ و کوٹی نا در اندنو توار اس کننگ ءُ ہرافتیان بھیم تالان مننگ ءِ کوٹی ٹی۔ اندن گمان مسکہ کہ دا ترند آ تہو تُنگان و بے سار آ بندغ تے بش مننگ کن ہکل تننگ ءِ، ہورّہ غاتا تراک تراکارہ خف تیٹ پِننگ ئس، گروک آتا رژنائی دریچہ اسکان بریسہ ایسر مننگ ئس۔ ای خُلیس نا گواچی مسوٹ اسیکہ وا سوچاٹ کہ دیخہ پیشن کاو و اُریو کہ مُد امرے پِر مننگ ءِ یا بیرہ ہورہ غاکو۔

ہراتم ای پیشن پیش تماٹ و دا خنیسہ گوڑینگاٹ کہ ہتم نا بننگ نا خوشی ٹی سہیل ئٹ تموک بارُن پَن آک اسہ محفل اس ہڈ تسونو ہرا ٹی تہو ساز و زیمل نا کڑد سر تننگ ءِ، گروک آک دا محفل ئٹ رژنائی تالان کننگ ءُ و ہورہ غاک ہکل تننگ ءُ مخلوق ءِ کہ بش مبو ہتم بسونے۔ ای اُراٹ بارن پن آتا پارہ غا او اندن گل و بال و ناچ ئٹ چٹ گوہنگاسر، مننگ کیک دا سوب آن کہ اینو نا ہتم اوفتا سوب آن بسونے اندا ئسر ہرا قربانی تسر دا پوسکنا ہتم کن، درخت آتیان لڑیسہ تمیسہ ندر مسر۔

ولے ای خناٹ کہ ہتم ئٹ پوسکن خرّوک آ نہال آک خوش خننگتورہ او گوڑینگوک ئسر، پَن آتے گل و بال ناچ کننگ آ خنیسہ گوڑینگاسر بلکن او ہم کنا وڑ سوچ خلنگ ئسر کہ دن امر مننگ کیک کہ کس تینا کہنگ و ایسری آ داخس خوش مرے مگہ مرگ زند ئنا پِن ءِ ؟ اگہ اف گڑا دا انتکن داخس خوش ءُ ؟  بیرہ اندا پوسکن بروک آ ہتم کن ؟ مننگ کیک بھلو وخت اس  ودار ئٹ مریر اندا دے ئنا، ہچ مِلی کاریم کپک کہ انت کسہ ئسے ؟ ای نہال آتا حالیت ءِ خناٹ مونجا مسوٹ کہ دافک ہم کنا حالیت نا گواچی ءُ و بارن پن آک امرو خوش بخت ءُ کہ تینے سرپد مسونو، تینا جند ءِ۔ کہنگ آن گڈ ہم زندہ ءُ تینا پدریچ ئنا نیام ئٹ گل و بال ءُ۔

بارن پن آتے اُریسہ ہچ سماء اف کہ ہرا وخت کنا خنک اوار تماسر ای سماء کریٹ کہ سہب تمانے ٹک تسونے، دانگ اینگ اُراٹ محفل ایسر مسوسس گروک و ہورہ غاتا ڈس الو، ای تنیا تولوک ئسوٹ و ناگمان آن استو نا ندارہ کنا خن تا مون آ پیری کننگ ءِ بناء کرے، ہمو سوج آک دوارہ کنے ہربشی کریر ای زو بش مسوٹ ہمو کسر ءِ آزموندہ کننگ کن تینا جند ءِ پٹینگ کن تنیائی و کتاب آتا جاگہ غا مَش تا پارہ غا مون کریٹ، ای اندن تدینگسہ ہننگ ئسوٹ کس پائے او کنا ودار ئٹ توسونے۔

کس تینے آن بے تعلقدار مرے و تینا جند و تینے پہہ مف گڑا زند بھاز سخت مریک، انتئے کہ ایسکان کس تینا جند ءِ پہہ متنے او تینا زند ئنا مسخت ءِ ہم پہہ مفک، دا نیام ئٹ کیہی سوج آک بندغ ءِ بے جارات کیرہ و اندا حالیت ئس کنا۔ ای گام تے ترندی ئٹ ارفیسہ بڑز اُراٹ دے دیخہ بڑز بسوسس، اُشکنو تہو اس ہم چلنگ ئس داسہ مش ہم کنے آن خڑک ئس، امر کہ ای مش ءِ سر مسوٹ دیخہ مُستی ہناٹ و کسر آ تنیا تولوک اسہ بندغ اس خناٹ ہرا نا پژہ غاک یلہ گُد اسہ کوپہ غا و نیمہ تا ڈغار آ تموک ئس۔

ای رہی آ تا ہناٹ سلیسوٹ، او خل اس ارفیسس ڈغار ءِ کُریسہ ئس، اوڑان سوج کریٹ: “نی انتئے داڑے کسر آ تنیا تولوک اُس حالیت نا انتئے دن ءِ؟” او ہچ ورندی تتو۔ ای اودے خوڑتی ئٹ اوننگ بناء کریٹ اونا پژہ غاک نیمہ آن زیات پیہن ئسر و ای اونا چہرہ ءِ اوننگ نا کوشست کریٹ ولے بےسہب مسوٹ انتئے کہ اونا چہرہ ءِ پژہ غاک ڈھکاسر۔ ای الاٹ تا تینا سفر کن رادہ مسوٹ دیخہ مُستی ہناٹ او کوکار کننگ ءِ بناء کرے ای چائسوٹ کنا سلنگ و سوج کننگ نا اودے سماء تمتنے۔

کنا گامک ترند ئسر او کوکار ئٹ پاریسہ ئس: “بر اینو مون پہ مون مرین اسہ مجلس اس کین، بر ای پاوہ نے نی انتئے بےجارات اُس، بر کنتون نا ہر سوج ئنا ورندی ارے، ہئو! نی کتاب آتے خوان علم مُچ کر ولے تینے پہہ مننگ کن پیشن پیش تم تینا ڈغار و مخلوق ءِ اُر، تنیائیک نیکن جوڑ افس دا مخلوق ئتون نی تینے خنوس دا بندغ آک نے نا جند ئتون اوڑدہی کرفور، انداڑے نا مسخت نے رسینگو۔”

ای اوڑا ہچ پام تتوٹ انتئے کہ وخت ءِ زوال کننگ خوائتوٹہ، ای ہنیسہ ئسوٹ و داسہ اونا توار ہم ایسر مریسہ ئس کنا مُر بننگ نا سوب آن، ای تیوی مش ءِ پیری کریٹ ولے بےسہب مسوٹ و بیوس مریسہ چیہانٹ اس خلکوٹ انداڑے کنا گوڈ آک ڈغار ئٹ لگار کنا اُست پاریکہ کہ دا مش ءِ تینا حالیت نا بابت پاو ولے اُراٹ کہ وخت ہنانے ٹاک نیمروچ مسونے، ای بش مسوٹ و ہمو تنیا غا کوٹی کن سر ہلکوٹ۔

نا اومیت و دم درینگوک آ نت تیٹ پدا بننگ ئسوٹ، کوٹی خڑک ئس، داسہ ہمو نا ہیت آک کنا مِلی ٹی پیری کننگ ءِ بناء کریر، ای سرپد مسوٹ کہ او کسر آ کنا ودار ئٹ تولوک ئس۔ اونا دا ہیت آک کنا خف تیٹ پِننگ ئسر کہ: “بر اینو مون پہ مون مرین، بر ای پاوہ نے نی انتئے بےجارات اُس، پیشن پیش تم تینا ڈغار و مخلوق ءِ اُر، دا بندغ آک نے نا جند ئتون اوڑدہی کرفور، انداڑے نا مسخت نے رسینگو۔”

ای پہہ مسوٹ، کنے کنا سوج آتا ورندی رسینگا، انتئے کہ ای ہرا سوج آتے پٹینگ کن پیش تماسٹ او ہمو سوج آتا ورندی تے پاننگ ئس۔ ای پہہ مسوٹ کہ “کنا جند ہمو ئس” ای گل و بال مسوٹ کنا اُست پارے کہ کاو اوڑتون مون پہ مون مریو، ای چک ءِ ہڑساٹ،،،،،
ولے
او الو۔

نوشتکار تا حق آتیکن کاریم کروک امریکی گل “پین امریکہ” اسہ رپورٹ اسیٹ چین آن گڈ ایران ءِ ہم نوشتکار تیکن جہان نا ارٹمیکوبھلا جیل پن کرے۔ رپورٹ ئٹ پڑو کننگانے کہ چین آن گڈ ایران نوشتکار تیکن کل آن بھلا جیل ءِ۔

“پین امریکہ” جہان ئٹ درشانی نا آجوئی نا رکھ اکن ادب و بندغی حق آتا منوک و تخلیقی درشان ءِ ممکن کروک آزاتی تا رکھ ئنا ردئٹنوشتکار و اوفتا سیوتی تے اوار کننگ نا کوشست آتیٹ اختہ امریکئی گل ئسے۔

گل ئنا رپورٹ نا رد ئٹ تدوکا سال چین ئٹ کم آن کم 90 و ایران ئٹ 57 نوشتکار تے قید کننگا۔ داڑان بیدس ایران زالبول نوشتکار تےبندی کننگ نا معاملہ ئٹی جہان ئٹ اولیکو نمبر آٹے۔ دانا سوب دادے کہ تیوہ جہان ئٹ 42 زالبول نوشتکار تیان 16 ایران ئٹ و 11 چینئٹ بندی ءُ۔

پین امریکہ نا پٹ و پول آتیان سماء تمک کہ تدوکا سال 36 ڈیہہ ئٹ کم آن کم 311 نوشتکار و دانشور تے اوفتا کاریم و نوشت آتا سوبدزگیر کننگا۔

ایران و چین ہڑتوماک سرکاری تلہ غا خیال آتا درشانی آ رکھ آن نمن کیرہ۔ دا رپورٹ ئٹ گیشتر پاننگا کہ چین و ایران ‘بھیم ئٹنوشتکار‘ تا کچ ئنا سوب اولیکو و ارٹمیکو نمبر آٹو۔ واہم درشانی نا آجوئی آ رکھ آن بیدس تدوکا سال دا ہڑتوما ڈیہہ تیٹ برانز مس وبندغ آک درشانی نا آجوئی و بندغی حق آتا مخ تفی ٹی توار بڑز کریر۔

ایرانی فتویٰ آن گڈ برطانوی نوشتکار سلمان رشدی آ خونی جلہو ءِ یات کریسہ، پین امریکہ دا ہیت آ زور تس کہ تدوکا سال جہان ئٹدرشانی نا آجوئی نا حالیت ‘بھیم بش کروک تلہ‘ غا مسونے۔ واہم جہان بے دادی نا برخلاف توار ارفنگ نا لڑ ئٹ ایران و یوکرین ئٹ بھازآ دلیر آ گام تے خنا۔ دا رپورٹ ئٹ پاننگا کہ یوکرین نا الس روسی جلہو نا برخلاف مزاحمت و سوگوی نا درشانی کرے و تینا ڈغار وانفرادی کسہ تا رکھ ءِ کرے۔

“ایران ئٹ زالبول آک تینا حق آتا خواست اکن اسہ ‘دلیر ءُ برانزی تحریک‘ ئسے نا راہشونی ءِ کریر و حکومت نا بنداؤ تے سرفیر۔” امریکن پین ایسوسی ایشن تینا رپورٹ ئٹی ایران ئٹ برانز آتا وخت زالبول نوشتکار و شاعر آتا دزگیر نا بابت نوشتہ کرے کہ اوفتونناروا سلوک و اوفتیا بے دادی کننگا۔

جنوری 2022 ئٹ ہم اسہ بندی نوشتکار بکتاش ابتین کرونا ناجوڑی نا گواچی مس و حکومت نا کنڈ آن اونا جانجوڑی خیالداری ٹی اُرےمننگ نا سوب او کذیت کرے۔ پین امریکہ نا پاننگ ءِ کہ تدوکا سال جیل ئٹ بندی بھاز آ نوشتکار آک ایران ئٹ ئسر و اود ‘زالبول، زند،آجوئی‘ تحریک نا بناء مننگ تون درزن آ نوشتکار و فنکار تے زوراکی ئٹ دزگیر کرے۔ ہرافتیٹ منہ مسکوہی سیاسی بندی ہم اوار ئس۔

دا رپورٹ ئٹ حسین رونگھی، گولروخ ایرائی، عاطفہ چہارمحلیان، بہروز یاسمی، بہناز امانی، سمان یاسین، توماج صالحی و مونابرزوئی نا خاص وڑ ئٹ ذکر کریسہ پاننگا کہ نوشتکار، شاعر و برانزی تے بے مناسب حالیت ئٹ دزگیر کننگا۔ اوفتے جانجوڑیخیالداری، جسمانی بدسلوکی و عدالتی قانود آتا برخلافی تون مون تروئی تما۔

کراچی یونیورسٹی جند ندری جلہو نا اسہ سال: بلوچستان ئٹ پیشن نا سرمایہ کاری آ زیمک

ٹی بی پی سرگپ

26 اپریل اِرا ہزار بیست و دو آ کراچی یونیورسٹی نا کنفیوشس انسٹی ٹیوٹ ئٹ چینی استاد آتے بلوچ لبریشن آرمی مجید برگیڈ نا جندندر شاری بلوچ اسہ جلہو اسیٹ ٹک کرے، ہرا ٹی مُسہ چینی شاری مرگ ئنا گواچی مسر و دا جلہو بلوچ تحریک ءِ اسہ پوسکنو دروشماس تس، ہرا ٹی اولیکو وار بلوچ زالبول اس جند ندری جلہو کریسہ تیوہ جہان ءِ سوبری ئٹ سوچنگ آ بیوس کرے کہ بلوچ تینا ڈغار نارکھ ئکن ہر حد اسکان ہننگ کن تیار ءِ۔

منہ سال آتیان بلوچ سلہہ بند گل آک مون پہ مون چین ئنا مفاد و او نا شاری تے ٹک کننگ ءُ۔ بلوچ لبریشن آرمی نا مجید برگیڈ نا جندندریک دالبندین ئٹ سیندک پروجیکٹ ئتون تفوک چینی انجینئرز، کراچی ٹی چینی کونسلیٹ، گوادر ئٹ ایسٹ بے روڈ آ چینی انجینئر تاگاڑی و کراچی ٹی کنفیوشس انسٹی ٹیوٹ ئٹ چینی استاد آتیا جلہو کرینو۔ دا جلہوک بلوچستان ئٹ چین ئنا سرمایہ کاری و چینپاکستان اقتصادی راہداری کن بھاز بھلو بھیم ئسے ءُ۔ بلوچ سلہہ بند گل آک مالو روایتی گوریلا جنگ ئنا دروشم ئٹ تینا جلہو تے برجاءتخاسر ولے مجید برگیڈ نا جلہوک بلوچ شورش نا ترندی ٹی ودکی کرینو۔

پاکستان نا مسکوہی صدر و پاکستان پیپلز پارٹی نا کماش آصف علی زرداری جیو نیوز آ حامد میر ئتون انٹرویو اسیٹ کراچییونیورسٹی تدینی نا ہیت ءِ کریسہ بلوچ سلہہ بند گل آتا کنڈ آن چین ئنا مفاد آتیا مروک جلہو تیا خُلیس نا درشانی کرینے و جند ندریجلہو نا دے پاکستان آرمی نا چیف عاصم منیر چین ئنا فوجی قیادت تون اوڑدہی کننگ کن چین ئنا دورہ آٹے ہرا پاش کیک کہ پاکستانو چین ئنا قیادت بلوچ سلہہ بند گل آتا جلہو تے توننگ ئٹ بےسہب مننگ آن گڈ بلوچستان ئٹ چین پاکستان اقتصادی راہداری و ایلوپروجیکٹ آتا بابت بھاز خُلیس نا گواچی ءُ۔

پاکستان اِرا دہائی آن بلوچ راجی تحریک ءِ ایسر کننگ و بلوچستان ئٹ زرگزرانی کاریم تے بحال کننگ نا دعویٰ کننگ ءِ اندن بلوچ سلہہبند گل آک دا ہیت ءِ ہر وخت کریسہ بسونو کہ او بلوچ راج ئنا موکل آن بیدس پیشن نا سرمایہ کاری نا موکل تروفس و چرجوئی ئٹ دنانگا منصوبہ تے جلہو تیٹ ٹک کننگ ءُ، ہراڑان بلوچستان ئٹ پیشن نا سرمایہ کاری و چین ءِ تینا منصوبہ تے سر تننگ ئٹ بھاز سختیتتون مون تروئی تمنگ ءِ۔

پاکستان نا دعویٰ تیان چپ بلوچستان نا گواچن حالیت آک پیشن نا سرمایہ کاری کن جُوان افس۔ بلوچ ویل ئنا ایسری آن بیدسبلوچستان ئٹ جنگ برجاء مرو و بلوچ سلہہ بند گل آک زرگزرانی منصوبہ تیا جلہو تے برجاء تخور۔ پیشن نا ملک آک اگہ بلوچستان ئٹسرمایہ کاری کننگ خوائرہ گڑا اوفتے بلوچ ویل ئنا ایسری کن پاکستان آ زور شاغوئی تمو و بلوچ تحریک تون تفوک ادارہ و ٹولی تتونمون پہ مون ہیت کروئی تمو۔

بلوچستان نا ضلع ڈیرہ بگٹی و خضدار ئٹ نادرست بندغ تا سم کاری و بمب جلہو ئٹ اِرا بندغ مرگ ئنا گواچی اندن ہفت ٹپی مسونو۔

شابیتی حوال تا ردئٹ جمعہ نا دے ڈیرہ بگٹی نا تحصیل سوئی نا علاقہ مٹ ئٹی نادرست بندغ تا سم کاری کننگ آن چنا تون اوار ارابندغ مرگ ئنا گواچی اندن مسہ بندغ ٹپی مسونو۔

لیویز کارندہ آک جون و ٹپی مروک آتے زوت ئٹ ہسپتال آ دریر ہراڑے المی کاروائی کننگ آن گڈ جون تے خاہوت نا دو ٹی تننگا۔

سم کاری نا تدینی ٹی مرگ ئنا گواچی مروک اسہ بندغ نا چاہنداری چھتا خان موندرانی نا پن آن مسونے ہرا مسکوئی صوبائی وزیرداخلہ سرفراز بگٹی نا گارڈ ئس۔

ڈیرہ بگٹی لیویز کارندہ آک علاقہ ءِ گھیرہ کریسہ جلہو کروک آتا پٹ و پول ءِ  بناء کرینو۔

ایلو پارہ غا بلوچستان نا ضلع خضدار نا ہند جھالاوان کمپلیکس ئٹ گیس سلینڈر دکان آ نادرست بندغ آک چغلی بمب ئٹ جلہو کرینوہرا نا سوب چار بندغ ٹپی مسونو ہرافتا چاہنداری عبدالحکیم، زکریا خان، غلام مرتضیٰ و محمد اسلم نا پن تیٹ مسونے۔

ٹپی آتے زو ٹیچنگ اسپتال آ دننگا، پولیس نا رد ئٹ جلہو کار آک جاگہ غان نرنگ ئٹ سرسہب مسونو۔

اسہ جتاو فرانسیسی مورخ اس

نوشت: ڈاکٹر مبارک علی | مٹ: عتیق آسکوہ بلوچ

دی بلوچستان پوسٹ

جیلوز مشلے نہ بیرہ انقلاب نا دیہاڑ ءِ نوشتہ کرے بلکن فرانس نا دیہاڑ آ شابیتی پٹ و پول کریسہ دیہاڑ نوشتئی اٹ ودّکی کرے۔

فرانسیسی انقلاب نہ بیرہ فرانس نا مورخ آتے پوسکنو سرحال تس بلکن اوفک سرحال تا درشانی کریسہ چاگڑد آ اوفتا زیم آتا جاچ ءِ ہمہلکر۔

انگریز مورخ تھامس کور لائل فراسنیسی انقلاب آ شابیتی تون نوشتہ کرے۔ ایڈمنڈ برک ہرا انقلاب نا نغدکاری جاچ ءِ ہلک، داڑان انقلابنا منفی زیمک پَک مسر۔

دا دیہاڑی و ذہنی پد ندارہ ئٹ جیولز مشلے نہ بیرہ انقلاب نا دیہاڑ ءِ نوشتہ کرے بلکن فرانس نا دیہاڑ آ شابیتی پٹ و پول کرے و دیہاڑنوشتئی ئٹ گچین ودّکی کرے۔

مشکلے نا باوہ پیرس ئٹ چھاپہ خانہ اس چلیفیکہ ہراڑے انقلابی لٹریچر چھاپ کننگاکہ۔ مشلے پام کننگ تون چھاپہ خانہ ئٹ کاریمکرے۔

نیپولین نا زمانہ ئٹ چھاپہ خانہ نا بابت ئٹ ڈھکوک ادارہ غاک حوال تسر کہ داڑے ریاست نا برخلاف مواد چھاپ کننگک۔ داڑا حکومتپریس آ رکھ خلک۔

مشلے خواننگ ءِ پورو کننگ آن گڈ دیہاڑ آ پٹ و پول نا کاریم ءِ بناء کرے۔ 1830 ئٹ انقلاب آن گڈ ہراتم لوئی فلیپ فرانس نا بادشاہ مسگڑا مشلے ءِ شاہی محل ئٹ ‘ریکارڈ کیپر‘ نا کماش کننگا۔

داڑے اودے وار رسینگا کہ متکنا دیہاڑ نا ‘دستاویز‘ آتے پٹ و پولی کاریم اٹ ہتنگ کے۔

دا اولیکو مورخ ئس کہ ہرا دا دستاویز آتیان سواد ارفے انتیکہ دوارہ چِک و تاڑی شرہ تا سوب دا دستاویز آتا بھلو کچ اس زوال مس۔

پیرس کمیون نا ریکارڈ ہم سلتئو۔ مشلے نا ارٹمیکو گچین آ کاریم دا ئس کہ 1831 ئٹ ہراتم او اٹلی اٹ ئس گڑا او اطالوی مورخ گیامبتیستا ویکو ءِ ہراکہ نیپلز یونیورسٹی ئٹ دیہاڑ نا پروفیسر ئس و ہرا نیو سائنس نا سرحال تون فلسفسہ دیہاڑ آ کتاب نوشتہ کرے، اودےمورخ آک بے پام کریسر۔

ویکو آ کنا کتاب (دیہاڑ اور فلسفہ دیہاڑ) ئٹ اونا دیہاڑ نا بابت کنا چمشانک ءِ اربو۔

مشلے ویکو ءِ پٹیسہ اودے اودیمی آن کشا، انتیکہ فرانس ئٹ 1830ء و 1848ء ئٹ انقلاب آک بسر گڑا ہمو دانشور ہرافک ریاست نابرخلاف ئسر، اوفک بے وطنی ءِ تینائی کریسہ اٹلی، بیلجیئم، ہالینڈ و انگلینڈ ئٹ باہوٹ ہلکر۔

مشلے بے وطنی نا زیات وخت اٹلی اٹ گدریفے۔ 1848 آن گڈ او واپس فرانس آ بس و نوشت و کتاب شون تننگ اٹ تیوہ غا زند ءِ گدریفے۔

مشلے رینے ساں نا اصطلاح ءِ تیوہ غاتیان مُست کاریم اٹ ایس و اونا رِدئٹ فرانس ئٹ دوانزدہمیکو صدی ئٹ رینے سان نا تحریک بشمس ہرا پانزدہمیکو صدی ئٹ اٹلی ئٹ بناء مس۔

او ہراتم فرانس نا دیہاڑ ءِ نوشتہ کننگ بناء کرے گڑا اودے نوشتہ کریسہ او بھاز مونجھا مس۔

ہراتم او سینٹ بارتھولومیو نا وخت آ پروٹیسٹنٹ فرقہ نا بابت لس خوْن نا بابت خوانا ہرا 1572 ئٹ مس، گڑا اودے بندغی فطرت نا بابتہراٹی کست کاڑ و بد دننگ نا جوزہ غاک ءُ، گڑا او دا بندغی فطرت نا سوب بے کچ ڈکھیا مس۔

اندن ہراتم او لوئی دی فورٹین نا بابت خوانا کہ او 1685 ئٹ ایڈکٹ نانٹیز نا قانود ءِ واپس ارفے، ہرانا سوب ئٹ پروٹیسٹنٹ فرقہ نا خلقتنا اسیکہ وا لس خوْن مس۔ ہرانا سوب اوفتا اسہ بھلو کچ اس فرانس ءِ یلہ کرے۔

مشکلے نا پاننگ ءِ کہ دا تدینی تیٹ اودے کڑمبی تون ڈکھ رسینگا کہ دیہاڑ ئٹ فساد و دتر وہیفنگ آن اخس بندغ نا ساہ ہنانے۔

اونا پاننگ ءِ کہ اودے دیہاڑ تون ہمو وخت ودّکی رسینگا ہراتم فرانسیسی انقلاب ئٹ تھرڈ اسٹیج یا خلقت نا نمائندہ غاک بغاوت کریسہٹینس کورٹ ئٹ ہنیسہ سوغند ارفیر۔

دا ہمو بنماس ئس کہ ہرا فرانسیسی انقلاب ءِ اُلس نا دوٹی تس۔

مشلے نا ہڑتوما کتاب آک دیہاڑ فرانس و فرانسیسی انقلاب، ہڑتوم آک دیہاڑ نوشتئی ئٹ اسہ پوسکنو درشانی اس کیرہ۔

مشلے نا اسہ گچین ءُ کتاب اس ‘دی پیپل یا اُلس‘ ءِ۔ داٹی او چاگڑد نا جتا تپہ غاتیا چمشانک شاغا ہرافتیٹ مزورکار، بزغر، سرکاریاوغدیدار، کاریگر، ہنر تخوک، دستکار دا تیوہ غاک اوار ئسر۔

اونا رِدئٹ چاگڑد نا دا تپہ غاک اسہ ایلوڑ تون تفوک افس، بلکن اوفتیٹ مُری ارے۔

او چاگڑد ئٹ ایمنی کن دا الّمی سرپد مریک کہ دا تپہ غاتیٹ مُریک ایسر مریر و دا اواری تون مریر، کہ بد دننگ و کست کاڑ نا جوزہغاک ودی مفس۔

مشلے دیہاڑ ءِ شابیٹ ڈوْل اٹ اریک۔ صنعتی انقلاب ئٹ ہرا بنماس آک سیاسی و چاگڑدی بدلی کریر، اوفک چاگڑد نا جوڑشت ءِ بدلکریر تخار، ہراتم اُلس ریاست نا برخلاف بغاوت آتے کریر گڑا اوفتے فوجی طاغت تون لتاڑنگا۔

دا حالیت آتیٹ سوشلزم نا نظریہ بش مس ہرا مخلوق ئٹ بدلی نا اُمیت ودی کرے، دُن چا دیہاڑ چرجوئی تون شیفی و بڑزی تیانگدرینگک۔

دا امیت و بے امیتی ہڑتوم آتے ودی کیک، ولے ظلم و زوراکی آن بیدس ہم بندغ تینا حق آتے برابر دوئی کننگ ءِ۔

بلوچستان نا ضلع خضدار ئٹ مروک اسہ تراک اسیٹ سی ٹی ڈی افسر مرگ ئنا گواچی مس اندن پن کروک جلہو نا ذمہ واری ءِ بلوچلبریشن آرمی ارفینے۔

حوال تا رد ئٹ کاؤنٹر ٹیررازم ڈیپارٹمنٹ (سی ٹی ڈی) نا سب انسپکٹر شربت خان ءِ خضدار ئٹ بنجاہی کسر آ جھالاوان میڈیکل کالجآن خڑک بمب جلہو ئٹ ٹک کننگا۔ تراک نا سوب سی ٹی ڈی افسر جاگہ غا مرگ ئنا گواچی اندن اونا گاڑی بھس مس۔

جلہو نا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے کہ بی ایل اے نا گچین آ کُڑدہ ایس ٹی او ایس اینو پنچشمبے آ خضدار شار ئٹ اسہ آپریشن اسیٹ کوزہ گیر پاکستانی لشکر نا بیرہ پن ئنا ذیلی ادارہ سی ٹی ڈی افسر شربت خان ءِ مرگئنا گواچی کرے۔

ترجمان پارے کہ بی ایل اے نا انٹیلی جنس ونگ ئنا معلومداری تیا اسپیشل ٹیکٹیکل آپریشنز اسکواڈ (ایس ٹی او ایس) کاروائی کریسہجھالاوان میڈیکل کمپلیکس آن خڑک سی ٹی ڈی نا انسپکٹر شربت خان ءِ ٹک کرے، تراک نا سوب شربت خان مرگ ئنا گواچی و اوناگاڑی تیوہ بھس مس۔

او پارے کہ پن کروک افسر بھلو وخت ئسے آن جتاء گاڑی تے بدل کننگ تون اوار ایلو وڑ تیٹ تینے ڈھکنگ ئس واہم بی ایل اے نا انٹیلیجنس ونگ اوڑا نظر تخاسس ہرا نا رد ئٹ دا کاروائی کننگا۔

جیئند بلوچ ودیک پارے کہ شربت خان بیرہ پِن ئنا سی ٹی ڈی تون کاریم کریسہ بلوچ آتے زوراکی ئٹ بیگواہ، اوفتے بے دادی نا گواچی ودروغ نا مونتس تیٹ خون کننگ نا ڈوہدار ئس۔

او تینا بیان نا ایسر ئٹ پارے کہ بلوچ لبریشن آرمی دا جلہو نا ذمہ واری ءِ ارفک و نن پاش کینہ کہ بلوچ راج آ مروک زوراکی تا ہر وڑ ئٹحساب ہلنگو۔

پورو آ توبے آ وختس کہ ہرانہ نیتو   

روشنائی نا سخاوت آ غزل پارینہ

مہر ئنا گپء کرینہ دا قلم نا خڑکا

عشق لکھانہ محبت آ غزل پارینہ

چہرہ غا دشت ئنا گواڑخ تا نظر تماکہ

تینا ماخول آ طبیعت آ غزل پارینہ

سید غریب شاہ انجم