بلوچستان نا جتاء علاقہ آتیان زوراکی ئٹ بیگواہ کروک پنچ بندغ آجو مریسہ تینا اُرا تے سرمسر ۔ آجو کروک بندغ  آتے جتا وخت آتیٹبیگواہ کننگاسس ہرافتیٹ کیہی سال آتیان بیگواہ کروک بندغ آک  ہم اوار ءُ۔

ٹی بی پی نیوز ڈیسک ءِ رسینگوک حوال تا ردئٹ آجو کروک آتیٹ وہاب ولد حبیب سکنہ پنجگور ، خالد ولد منیر احمد سکنہ نوشکی ،رسول بخش ولد یعقوب خان ، سوراب آن الہ دین ریکی و محمد آصف ریکی اوار ءُ  ۔

یلہ کروک آتیٹ وہاب ءِ  پنچ سال ، خالد ءِ  ہشت سال ، رسول بخش ءِ  مسہ سال ، الہ دین و آصف ءِ  ارا سال مالو پاکستانی فورسزکارندہ آک دزگیر کننگ آن گڈ نا درست ہند آ دریسر ۔

آصف ریکی و الہ دین ریکی بلوچستان ٹی بیگواہ بندغ آتیکن جہد کروک تنظیم وائس فار بلوچ مسنگ پرسنز نا وائس چیئرمین ماما قدیربلوچ نا ایلم نا مارک ءُ۔

ماما قدیر بلوچ نا سیال آتا زوراکی ئٹ بیگواہی تا ردعمل ٹی بلوچستان نا سیاسی تنظیم آک اودے بلوچستان ئٹ برجاء اشتماعی سزا ناپن کریسر ہڑتوما ورناتے اینو ارا سال آن گڈ یلہ کننگا۔

یاتی مرے کہ بلوچستان ٹی زوراکی ئٹ بیگواہیک بھی بش کروک دروشم دوئی کرینو ، ہراڑے سال آتیان بیگواہ بندغ آتا آجوئی نا حوالآک مونا بریرہ ہموڑے گیشتر بندغ آتے بیگواہ کننگیک ۔

ارا دے مالو مسہ بندغ نا جون تے پاکستانی فورسز کارندہ آک سول ہسپتال کوئٹہ آ دریر ہرافتا ہاٹی تیا بے دادی تا نشان آک ساڑیئسر۔ پن کروک مسہ بندغ نا چاہنداری زوراکی ئٹ بیگواہ کروک بندغ آتیان مسونے ہرافتے جتاء وخت آتیٹ بیگواہ کننگاسس ۔

مچھ سول ہسپتال ٹی پین ارا بندغ نا جون آتے دننگانے واہم اوفتا بابت ئٹ دائسکان شابیت حوال آک مونا بتنو۔

اینو عید نا اولیکو دے بلوچستان نا جتاء شار آتون اوار پاکستان نا داراحکومت اسلام آباد ٹی بلوچستان ئٹ زوراکی نا بیگواہی تابرخلاف بیگواہ کننگوک بندغ آتا خاہوت و گیشتر نا پارہ غان برانز کننگ ءُ۔

بلوچستان نا علاقہ مچھ ٹی پاکستانی فورسز کارندہ آک ارا بندغ نا جون آتے ہسپتال آ درینو ۔

ذرائع تا ردئٹ پاکستانی فورسز کارندہ آک مچھ ہسپتال ٹی ارا بندغ نا جون ایسنو ہرافتا بدن تیا سم تا نشان آکو واہم پن کروک بندغآتا چاہنداری مننگ کتنے ۔

علاقائی ذرائع تا پاننگ ءِ کہ پن کروک بندغ آک مننگ کروک وڑ ئٹ تدوکا دے تیٹ مچھ و  بولان نا علاقہ تیٹ فوجی آپریشن نا وختخلنگانو واہم اوفتا چاہنداری دائسکان متنے ۔

یاتی مرے کہ ارا دے مالو پاکستانی فورسز کارندہ آک کوئٹہ ہسپتال ٹی مسہ بندغ نا جون تے سرکریسر ہرافتا چاہنداری زوراکی ئٹبیگواہ کروک بندغ آتا وڑ ئٹ مسونے ۔

مچھ ہسپتال آ ہتنگوک جون آتا دائسکان چاہنداری متنے ۔

بلوچستان نا دریابی علاقہ گوادر و خضدار ٹی سلاء بند بندغ آتا سم کاری آن پنجاب نا ہندی ئسے  تون اوار ارا بندغ مرگ نا گواچیمسونو ۔

شابیتی حوال تا ردئٹ دریابی شار گوادر نا تحصیل جیونی کوسر بازار ٹی سئور نا وخت آن موٹر سائیکل سوار نا درست بندزگ آک سمکاری کریسہ پنجاب سیالکوٹ نا ہندی اکبر چوہدری پنی بندغ ئسے مرگ نا گواچی کریر ۔

علاقائی ذرائع تا ردئٹ پن کروک بندغ ءِ  ہمو وخت سم کاری کریسہ مرگ نا گواچی کننگا ہرا وخت او فٹبال گراؤنڈ آن تینا ہند نا پارہ غاہننگ ئس ۔

ایلو پارہ غان خضدار آن حوال آکو کہ زہری ٹی نا درست سلاء بند بندغ آک سم کاری کریسہ لیویز کارندہ نثار زرکزئی پنی بندغ ئسےمرگ نا گواچی کریر ۔

واہم ہڑتوما تدینی تا سوب آک دائسکان مونا بتنو ۔

بلوچی بولی نا اسٹ انگا اخبار ہڑدے ئی “نوائے وطن” کوئٹہ نا ایڈیٹر آمنہ پناہ درو پنچ شمبے آ کوئٹہ ئٹ کذیت کرے۔ اونا گڈیکو نمازسبزل روڈ کوئٹہ ئٹ خواننگا و اودے ہموڑے دفن کننگا۔

آمنہ پناہ پنی ءُ شخصیت اس، “نوائے وطن” نا ایڈیٹر، ملک محمد پناہ نا مسڑ و منیر عیسیٰ نا زائیفہ ئس۔

ہڑدے ئی جوڑ مننگ آن مالو “نوائے وطن” ہفتئی اخبار اس ئس ہرادے کم و ود نوزدہ سد پنجاہ نا دہائی ٹی ملک محمد پناہ و غلام محمدشاہوانی ہڑتوماک اوار کشاسر۔

“نوائے وطن” ئٹ پنچ سال اسکان کاریم کروک ورنا و بلوچ نوشتکار عبداللہ دشتی نا رد ئٹ 2003 آن “نوائے وطن” ہفت دے ئی آن ہڑدےئی جوڑ کننگا و ہمو وخت آن او ہڑدے شینک مننگ ءِ۔

“نوائے وطن” بلوچی بولی نا اسٹ انگا اخبار ءِ و دا کوئٹہ ئٹ پرنٹ مریک واہم اخبار نا خوانوک آک مفننگ نا برابر ءُ۔ ہرا وڑ بلوچ تینابولی نا اولیکو و اسٹ انگا اخبار ءِ خن تیان چپ کیک اندا وڑ حکومت ہم اشتہار نا مد ئٹ “نوائے وطن” ءِ خن تیان چپ کننگ ءِ۔

“نوائے وطن” آمنہ پناہ و منیر عیسیٰ نا کوشست و ذاتی جہد ئنا سوب چرجوئی ئٹ شینک مننگ ءِ۔ عبداللہ بلوچ نا رد ئٹ اخبار ناشینکاری پرنٹ و آن لائن ہڑتوما دروشم تیٹ مننگ ءِ۔

بلوچستان نا ضلع پنجگور نا بنجاہی بازار ئٹ پاکستانی لشکر ءِ چغلی بمب ئٹ ٹک کننگانے۔

پولیس نا رد ئٹ ٹیچنگ اسپتال آن خڑک پاکستانی لشکر آ نادرست بندغ آک چغلی بمب ئٹ جلہو کریر ہرا نا سوب اسہ کارندہ اس ٹپیمس۔

تراک آن گڈ فورسز آک علاقہ ءِ گھیرہ کریسہ گیشتر پٹ و پول بناء کریر۔

پن کروک جلہو نا ذمہ واری ءِ بلوچ آجوئی دوست سلہہ بند گل بلوچ لبریشن آرمی ارفینے۔

بلوچ لبریشن آرمی نا ترجمان جیئند بلوچ میڈیا ٹی شینک کروک بیان اسیٹ پارے کہ ننا سرمچار آک اینو پنجگور شار ئٹ گاڑی ٹیسوار کوزہ گیر پاکستانی لشکر نا کارندہ تے چغلی بمب جلہو ئٹ ٹک کریر، تراک نا سوب اسہ دژمن کارندہ اس مرگ ئنا گواچی و اِرٹٹپی مسر، ہرافتیٹ اسٹ اس بھاز ٹپی ءُ اوار ءِ۔

جیئند بلوچ پارے کہ بلوچ لبریشن آرمی دا جلہو نا ذمہ واری ءِ ارفک۔ کوزہ گیر پاکستانی لشکر نا تیوہ پیش تمنگ اسکان ننا کاروائیکبرجاء مرور۔

کوئٹہ آن رسینگوک حوال آتا ردئٹ پاکستانی فورسز کارندہ آتا دوتیان بیگواہ کروک ارا بندغ آجو مریسہ اُرا غا رسینگار ۔

بلوچستان ٹی زوراکی ئٹ بیگواہی تا بر خلاف توار ارفوک تنظیم وائس فار بلوچ مسنگ پرسنز پک کرینے کہ پاکستانی ڈھکوک ادارہ آتادوتیان اپریل 2016 آ اسپلنجی آن بیگواہ کروک ڈاکٹر عبدالشکور ولد فتح علی آجو مس ۔

انداڑتون کوئٹہ آن زوراکی ئٹ بیگواہ کروک شیرزمان ہم آجو مریسہ اُرا غا  رسینگا ۔

یاتی مرے کہ منہ دے مالو پاکستانی فورسز کارندہ آک شیر زمان و شعیب بلوچ ءِ زوراکی ئٹ بیگواہ کریسر واہم شعیب دائسکان آجوکننگتنے ۔

خڑکنا ذرائع آک شیر زمان نا آجوئی نا پک کرینو ۔

بلوچستان نا ضلع پنجگور ئٹ نادرست سلہہ بند بندغ آک ننکان اُرا ٹی پترینگسہ سم کاری کریر و اسہ ادیب و شاعر ئسے نا خون ءِکریسہ نرار۔

کسفنگوک بندغ نا چاہنداری یعقوب عامل نا پن ئٹ مسونے ہرا محکمہ زرعی انجینئرنگ نا ڈپٹی ڈائریکٹر ئس۔ یعقوب عامل ادیب ئسے نادروشم ئٹ پنی ءِ، اونا کتاب آک بلوچی و اردو بولی ٹی شینک مسونو۔

خون ئنا سوب آک دائسکان سما تمتنو اندن جتا ادبی کڑدہ غاک اونا خون آ اُست ہسونی نا درشانی کننگ ءُ۔

بلوچستان نا ضلع پنجگور آن پاکستانی لشکر اسہ بندغ ئسے زوراکی ئٹ بیگواہ کریسہ نادرست جاگہ آ درے اندن پنجگور و کیچ آنزوراکی ئٹ بیگواہ مروک اِرا بندغ یلہ مریسہ تینا اُرا تے سر مسر۔

حوال تا رد ئٹ پنجگور نا تحصیل پروم آن پاکستانی لشکر اسہ بندغ ئسے زوراکی ئٹ بیگواہی نا گواچی کریسہ نادرست جاگہ آ درینے۔ہرا نا چاہنداری قیصر نا مار حنیف نا پن ئٹ مسونے ہرا پروم ریش پیش ئنا ہندی ئسے۔

خیال ئٹ مرے داڑان مالو ہم پن کروک بندغ ءِ فورسز آک ہفت جون 2018 ئٹ دزگیر کریسہ بیگواہ کریسر و اِرا سال اسکان بیگواہ کننگآن گڈ فورسز آک اودے یلہ کریسر و داسہ اسہ وار پدا او بیگواہ کننگانے۔

اندن پنجگور آن بیگواہ مروک بندغ اس یلہ مریسہ تینا اُرا ءِ سر مسونے۔ حوال تا رد ئٹ 5 دسمبر 2021 ئٹ پاکستانی لشکر نا دو آنزوراکی ئٹ بیگواہی نا گواچی مروک ورنا حاجی لال بخش نا مار ساجد ہند پنجگور یلہ مسونے۔ خاہوتی احوالکار تا پاننگ ءِ کہ اونا یلہمننگ ءِ ہفت دے مریک۔

ایلو پارہ غا کیچ ئنا علاقہ شہرک نا ہندی و عطا شاد ڈگری کالج تربت نا خوانندہ خلیل احمد نا مار میر وائس استو یلہ مریسہ تینا اُرا ءِسر مسونے۔

خاہوت نا رد ئٹ اودے سکیورٹی فورسز آک برجاء سال 28 فروری آ برمتہ کریسر ہرا یلہ مس۔

یاتی مرے بیگواہ بندغ تا خاہوت آتا گل وائس فار بلوچ مسنگ پرسنز نا رد ئٹ بلوچستان نا جتا علاقہ تیان ہڑدے بندغ تے سکیورٹیفورسز آک دزگیر کریسہ بیگواہ کننگ ءُ واہم منہ بندغ ءِ یلہ کریسہ گیشتر بندغ تے بیگواہ کننگک۔

تربت کوہ مراد زیارت آن پسنی آ بروک زائرین تا گاڑی شکست نا گواچی، زالبول تتون اوار یانزدہ بندغ ٹپی مسر۔

شابیتی حوال تا رد ئٹ تربت کوہ مراد زیارت آن پدا پسنی آ بروک گاڑی نمبر CK1355 کوسٹل ہائی وے آ شتنگی آن خڑک شکست ناگواچی مس ہرا ٹی ہفت زالبول عباس نا زائیفہ لکی، رحمت نا مسڑ عائشہ، گہرام نا زائیفہ جمیلہ، سعید نا مسڑ مہناز، موسیٰ نا مسڑشاری، بدل نا زائیفہ مہر جان، جمال نا مسڑ نجمہ، اندام، مجاہد، فضل بخش، پیر محمد ٹپی مسر۔

تدینی گاڑی نا ٹائر ئنا ترخنگ نا سوب آن مونا بس، ٹپی تے بنائی جانجوڑی کمک تننگ کن آر ایچ سی پسنی آ دننگا، تدینی ٹی ٹپیمروک آتا تعلقداری پسنی آن پاننگک۔

خیال ئٹ مرے کہ برجاء ہفتہ کوہ مراد نا زیارت کن ہنوک زائرین تا گاڑی نا دا ارٹمیکو تدینی ءِ۔

درو بس ٹرمینل تربت آن خڑک ترند رفتار ئنا سوب گاڑی نا چپی مننگ آن زالبول درگل ہند ملائی بازار جاگہ غا بیران اندن 15 بندغ ٹپیمسوسر۔

وطن نا شہیدے سلامی کبو نم

دا ورنا  مجیدے سلامی کبو نم

وطن نا کرینو ہرا جہدے  برجا

بشیرے مریدے  سلامی کبو نم

دترتیٹ نوشتہ کرینو بہشت ئس

ہمو خنتا دیدے  سلامی کبو نم

  ہرا فکر اسے ناسفرٹی شپا دو

  ہموتا  ائیدے  سلامی  کبو نم

فدائی کرینو ہمو  خزملی خنک

ببو دا  شہیدے  سلامی کبو نم

روانے  دترتیٹ  ہراتا  وطن جی

کہ ہندا  امیدے سلامی کبو نم

نی قاسم مدامی دا شیراتے نازیف

وطن نا  حمیدے سلامی  کبو نم

قاسم ناز