آجوئی یا دہشتگردی؟ بلوچ جہد نا مقدمہ
نوشت: سفر خان بلوچ
براہوئی مٹ: دیار بلوچ
دی بلوچستان پوسٹ
جہان نا دیہاڑ آجوئی نا جہد آن پر ءِ۔ ہرا راج و خطہ ہرا وخت کہ اسہ راج یا پیشن نا طاغت ئسے نا کوزہ ئٹی مس، گڑا او تینا پجار، حق خود ارادیت و آجوئی کن مزاحمت کرینے، دا مزاحمت وختس سیاسی پلیٹ فارم نا وسیلہ ئٹ مسونے و وختس عسکری جنز آتا دروشم ئٹ۔ واہم ہرا دور ئٹی کوزہ گیر طاغت آک دا جنز آتے ”دہشتگردی“ تون اوار کننگ نا کوشست ءِ کرینو گڑا وخت پاش کرینے کہ ہرافتے”دہشت گرد“ پاننگا او گواچن ئٹ تینا راج ئنا باسک و آجوئی نا علمبردار ئسر۔
ویتنام نا آجوئی نا جنگ ٹی ہوچی منھ فرانسیسی و امریکہ نا کوزہ نا برخلاف مزاحمت کرے۔ جنوبی افریقہ ئٹی نیلسن منڈیلا ءِ ”دہشت گرد“ پاریسہ 27 سال بندی کننگا۔ ولے اوکان گڈ او ایمنی نا جہانی چیدہ اس جوڑ مس۔ الجزائر فرانسیسی نوآبادیاتی کوزہ آن آجو مننگ کن کیہی سال جنگ کرے و او نا جنز ” نیشنل لبریشن فرنٹ “ (FLN) ءِ دہشت گرد پاننگا م۔ ہندوستان ئٹی برطانوی سامراج نا برخلاف بھگت سنگھ، سبھاش چندر بوس و ایلو کارندہ آک ہم ہندا وڑ ” باغی“ و دہشت گرد پاننگار۔
ہندا وڑ، لیبیا ٹی عمر مختار و کیوبا ئٹی فیڈل کاسترو ہم تینا ڈیہہ ئنا آجوئی کن جنگ کریسہ کریر، و دیہاڑ تینا فیصلہ ءِ ہندا تا حق ئٹی کرے۔ کوزہ گیر آک شکی مریسہ دیہاڑ ئٹی نیست و نابود مسر۔
اینو ہندا لڑ ئٹ، بلوچستان نا آجوئی نا تحریک اسہ راجی ءُ تحریک ئسے نا دروشم ءِ دوئی کرینے۔ ہرا نہ بیرہ دیہاڑی جواز اس تخک بلکن بندغی حق، سیاسی خودمختاری و راجی بندغی نا اصول آتیا برجاء ءِ۔ دا بیرہ مڈی یا کہ دیمروی نا خواست نہ، بلکن اسہ راج ئسے نا پجار، ڈغار، دود و بولی نا بقا نا جہد ئسے۔
بلوچستان نا آجوئی نا جنز ئنا بناء 1948 ئٹی ہمو وخت مس ، ہرا وخت کہ ریاستِ قلات پاکستان تون اوار مننگ ءِ منتو۔ خان آف قلات، احمد یار خان 15 اگست 1947 آ قلات ءِ اسہ آزات ءُ ریاست اس پارے۔ ہرا برٹش انڈیا تون اوار معاہدہ نا ردئٹ نیم خودمختار ئس۔ ولے مارچ 1948 ئٹی پاکستان تینا طاغت نا زور ئٹ قلات آ کوزہ کرے و ہندن بلوچ مزاحمت نا جنز بناء مس۔
پاکستان مدام بلوچ جنز ءِ ایسر کننگ نا کوشست کرینے، وختس دادے گڑاس سڑدار تا بغاوت پارینے، وختس پیشن نا چم اس پارینے، ولے ہندن دا جنز وخت ئتون اوار سوگوْ مریسہ ہنا، ریاستی بیانیہ نزور مریسہ مس، اینو ہراتم کہ پاکستان نا آرمی چیف و وزیراعظم منیرہ کہ ”بلوچستان ئٹ علیحدگی پسند (آجوئی دوست) آک ساڑی ءُ، گڑا دا ہندا حالیت نا اسہ گچین ءُ شاہدی ئسے کہ دا پروپیگنڈا مسئلہ اس اف۔
سرفراز بگٹی نا وڑ انگاک ہرا وخت دُن پارہ کہ ”بیرہ اِرا مُسہ درسد بلوچ آک آجوئی خواہرہ“ گڑا اگہ بلوچ آبادی نا اندازہ ءِ اسہ کروڑ اس خلنگے، گڑا دا ہم لکھ آتا حساب ئٹ مریک۔ ڈغار نا ردئٹ بلوچ جنز ورنا تا گیشتر نا کوالخواہ جوڑ مسنے۔
ریاستِ پاکستان دا جنز ءِ ایسر کننگ کن زوراکی نا بیگواہی، دروغ نا مونتس تیٹ کسفنگ، ریاستی مخ تف ٹولی ڈیتھ اسکواڈ آتا جوڑشت، دا تیوہ غا چم آتے کاریم ئٹ ہیس۔ دا تیوہ انگا ظلم و زوراکیک نئے بیرہ بندغی حق آتا لتاڑنگ نا وڑ ءُ بلکن دافتا سوب آن ریاست نا برخلاف سوختئی پین سوگو مسونے۔ ہندا سوب آن اینو بلوچ ورناک پارلیمانی سیاست آن فریشان ءُ، و سلہہ بند تنظیم آتے گچین انگا کسر تکرہ۔
بلوچ سلہہ بند تنظیم آک تینا حکمت عملی ءِ پوسکنو دروشم اسیٹی مونا ہیسونو۔ مسکوہی وخت ئٹ ہرا جہد بیرہ مش اسکان ئس، اینو او شار تیٹی فدائی جلہو، انٹیلیجنس بیسڈ آپریشنز و پوسکن انگا ٹیکنالوجی تے کاریم ئٹ ہتنگ ءُ۔
بلوچ لبریشن آرمی (BLA) و بلوچ لبریشن فرنٹ (BLF) کون آ تنظیم آک نئے کہ بیرہ عسکری جنگ ئٹ اختہ ءُ، بلکن سوشل میڈیا و جہانی تلہ آ تینا ہیت ءِ زیمی وڑ ئٹ ہم سر کننگ ءُ۔
اینو بلوچ ورناک سرپند ءُ کہ اوفتا ویل بیرہ دیمروی آسراتی تیٹ اف بلکن راجی پجار نا ءِ۔ دافتا پاننگے کہ ہراتم اسکان بلوچ راج غلام ءِ، اوفتا مڈیک، دود، بولی و ڈغار رکھنگ مننگ کپک۔ ریاست نا گپ و تران ہرا شونداری کاریم تا وسیلہ ئٹ بلوچ آتے اُست بڈی تننگ نا کوشست کننگ اصل ئٹ دا جہد نا بنیات ءِ سرپند مننگ آن پدماندہ ءِ۔
بلوچ آزاتی پسند آتا پاننگ ءِ کہ ہراتم اسکان بلوچستان اسہ آزات ءُ ریاست اس جوڑ متنے، ہموتم اسکان دا نا اُلس ءِ نہ مُچا اختیار دوئی مریک نئے کہ رکھ۔
اینو بلوچ جنز تینا ترندی نا پارہ غا روان ءِ، سلہہ بند تنظیم آک خوندی مسونو۔ پوسکنا زنک بیدار ءِ، و جہانی برادری نا سوچ ہم ہندا پارہ غا مٹ مسونے۔ اقوام متحدہ و ایلو جہانی ادارہ غاک بلوچستان ئٹی بندغی حق آتا لتاڑنگ نا برخلاف سوج ئنا درشانی ءِ کننگ ءُ۔
دا جنز بیرہ وختی یا علاقائی ءُ بغاوت اس اف بلکن دا اسہ خوندی و راجی ءُ جہد ئسے، ہرا دیہاڑی حد و ویل و جہانی اصول آتیا برجاء ءِ۔ ریاست پاکستان دا جنز ءِ ایسر کننگ کن ہر وڑ ءِ آزموندہ کرے، عسکری طاغت، ریاستی پروپیگنڈا، دروغ نا مونتس تیٹ بندغ تے کسفنگ۔ ولے آجوئی نا خواست ءِ بلوچ نا اُست آن ایسر کننگ کتو۔
اینو بلوچ ورناک دا ہیت آن سرپند ءُ کہ ہراتم اسکان اوفک آجو ءُ ریاست اسے نا خواجہ مفسہ، دافتا چاہنداری، دود و مڈیک رکھنگ مننگ کپسہ۔ پارلیمانی سیاست کچ اسیٹ مسونے، ریاست نا مخ تف ٹولیک اُلسی مخ تفی ءِ گیرام کرینو و زمینی گواچنی اندادے کہ داسہ سلہہ بند مزاحمت بلوچ نا اسٹ انگا اومیت ءِ۔
بلوچ آجوئی نا تحریک نئے بیرہ پاکستان کن اسہ سیاسی و سیکیورٹی چیلنج ئسے، بلکن جہانی برادری کن ہم اسہ اخلاقی ءُ امتحان ئسے۔ انت او ہد و حویل آتا مفاد آتیٹ چُپ مریرہ، یا بیوس آ راج اکن حق پرستی نا مخ تفی ءِ کیرہ؟۔
وخت ئنا خواست ءِ کہ ریاست پاکستان دا ویل ءِ بیرہ سیکیورٹی یا معیشت نا سوب آن اُرپ۔ بلکن دادے اسہ سیاسی و راجی ءُ ویل اس سرپند مریسہ دیہاڑی انصاف نا اصول آتا ردئٹ حل کے۔ نئے گڑا او ہم کوزہ گیر ریاست تا وڑ ئٹ دیہاڑ ئٹی ظلم و زوراکی تا کسہ جوڑ مریسہ یات کننگو و بلوچ جہد چرجوئی ئٹ مُستی ہنیسہ کرو و ایسر اسہ دے اس دیہاڑ فیصلہ کرو کہ دیر ظالم ئس و دیر آجوئی نا علمبردار۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک
