بنگلادیش نا آجوئی ٹی خوانندہ آتا کڑد
نوشت: واھگ بزدار
براہوئی مٹ: گندار بلوچ
دی بلوچستان پوسٹ
جہان نا تاریخ آ اگہ نظر شاغنگ مرے تو دا راستکی پاش مریک کہ ہر اسہ چاگڑدی، سیاسی و انقلابی عمل ئٹ ورنا نسل نا اسہاستان دننگ مفروکو کڑد اس مسنے۔ اینو نا مُستی ہنوک، دیمروی کروک و آزات قوم ئسے نا تاریخ ءِ اسہ رژنا ءُ کسر اس تننگ ئٹیخوانندہ آتا اسہ عظیم ءُ کڑد اس مسنے۔ اندا خوانندہ آک ئسر ہرا ویتنام ئٹ امریکہ نا ڈول انگا استعمار ءِ ہکل تسر، چین ئٹ آمریت نابرخلاف سیسہ پلائی دیوال جوڑ مسر و کاٹم تے ندر کریر، الجزائر ئٹ فرانس نا ڈول انگا کوزہ گیر آتے ذلیل و خوار کریر و بنگالیخوانندہ آک پاکستان نا ڈول انگا زوراک آ ریاست نا بنداؤ ءِ لڑزفیر و تینا قوم ءِ آجو کننگ ئٹی سرسہب مسر۔
جہان نا غٹ چاگڑد آتیان تعلقداری تخوکا خوانندہ آک تینا قومی و ڈیہی سواد آتیکن باز آ قربانی تے تسنو و چرجوئی ئٹ تریسہ بننگ ءُو دا ہمو تپہ ءِ ہرا اسہ چاگڑد ئسے نا دیمروی و تاریخ ئٹی اسہ اہم ءُ کڑد اس ایسری ایتک۔ جہان نا چاگڑد ئٹی زالبول و نرینہ خوانندہآتے چاگڑد ئٹ رہینگوکا ہر فکری تپہ نا بندغ آک مثبت نظر ئٹ ہُننگ نا کوشست کیرہ انتئے کہ او اوفتے ہمو چاگڑد و قوم و ڈیہہ ئنا مڈیپُہہ مریرہ۔ ورناک معاشرہ نا کُل آن زیات متحرک آ روتہ آک چاننگ مریرہ۔ ہرا معاشرہ ءِ سمت تننگ ئٹی اسہ کلیدی کڑد اس تخرہ۔اندا ہمو روتہ آکو ہرا قوم کن کسر کشیرہ و جوش ئٹ قوم ئنا موہبری ءِ کیرہ۔ جہان نا کُل تحریک آتیٹ ہرا تحریک ءِ ہم ورناک بناء کرینواوڑے تحریک آک ساندہ سرسہبی ئٹ مزل آ سر مسنو۔ ورنا تا دا جنبش ءِ اگہ شعور و علم آن بڈ ورناک تینا کاٹم آ ہلیر اوڑے جہد اسہاندنو تاریخی دروشم اس ہلیک ہراڑ تون بروکا نسل آک ریس کیرہ۔
اگہ جہان نا تاریخ ءِ خواننگ مرے تو اوڑے زالبول و نرینہ خوانندہ آتا آجوئی نا جنگ آتیٹ باز بھلو کڑد اس خننگ کن ملیک، ہرا تینا قوم،سرزمین، تہذیب و زبان کن بے کچ قربانی تسنو و کم سنی ٹی وطن نا دڑد ءِ اُست ئٹ تخیسہ آسودہ خاک مسنو۔ ہمو قوم و ڈیہک ہراڑےخوانندہ آتا جنگی پڑ آ عظیم ءُ کڑد اس مسنے، اوفتیٹ افریقہ، ہندوستان، الجرائر، فلسطین، روس، بلوچستان و بنگلادیش و ایلو ڈیہکاوار ءُ۔
بنگلادیش نا آجوئی ٹی خوانندہ و ڈھاکہ یونیورسٹی نا باز اہم ءُ کڑد اس رہینگانے۔ کنا خیالا دا پاننگ راست مرو کہ اگہ ڈھاکہیونیورسٹی و خوانندہ آک دا آجوئی نا تحریک ئٹ اوار متورہ تو آجوئی ہلنگ منکن متوکہ۔ ڈھاکہ یونیورسٹی ءِ برطانوی سامراج نا کوزہنا وخت آ جوڑ کننگا ہرا نا مسخت اوڑے رہینگوکا مسلمان تے اسہ اندنو ادارہ اس تننگ ئس ہرا برطانیہ یا اونا دلال محمد علی جناح نااِرا قومی نظریہ ءِ سوگو کے و ہندوستان ئٹ ساڑی قوم آتے مذہب نا بنیات آ میڑِفسا و ونڈ کریسہ اسہ پوسکنو ریاست یعنی پاکستان ءِجوڑ کننگ ئس۔ یونیورسٹی ءِ جوڑ کننگ تون اوار اوڑے کُل پروفیسر و خوانندہ آک مسلم و اسلام نا پرچار ءِ بڑز کریر ہرا کہ برطانیہ نااسہ چم اس ئس۔
برطانوی سامراج نا کنڈ آن جوڑ مروکا کالونی پاکستان 1947 ئٹی اِرا جاگہ غا تیان ونڈ مس ہرادے قطبی و جاندمی پاکستان نا پنتننگا۔ پاکستان نا جوڑ مننگ تون اوار پوسکن ودی مروک و غیر فطری ریاست ویل آتا گواچی مس و پاکستان پنجاپی کوزہ گیر مافیا نادو ٹی ہنا و پنجاپیک بنگالی و ایلو قوم آتا چکار ءِ کننگ آن بیدس تینا خیال و نظریہ آتے اوفتیا چٹی کننگ بناء کریر۔ پنجاپی ءِ تینٹ نہزبان و نئے دود ربیدہ نا خواجئی ارے و نئے کہ ایلو قوم آتا تشخص ءِ چائک۔ اندا سوب آن او اردو ءِ پاکستان نا قومی زبان پاریسہبنگالی تا پجار ءِ مسخ کننگ نا کوشست کریر ولے دھرتی نا دا عظیم آ مل٘ آک دا سامراجی کوشہ گیری نا پالیسی ءِ منینگ آن تیوہ نمنمسر و ریاست نا ظلم و زوراکی نا برخلاف توار بڑز کریر۔
ڈھاکہ یونیورسٹی و ایلو غٹ خوانندہ آک پنجاپی سامراج ءِ بے چکاری نا تُغ آن بش کننگ نا کوشست کریر کہ پاکستان ئٹ کُل آن بھلاآبادی ننا ءِ ہرا کہ تیوہ پاکستان نا ۵۶ درسد ءِ، تو نُم اَرا بنیات آ ننے آن ہرِفنگ آن بیدس و ننا صلہ ءِ ہلنگ آن بیدس ننا آخبت نا فیصلہ ءِکننگ کیرے۔ ننا تشخص ننا سرزمین و ننا زبان تون تفوک ءِ تو نن اردو ءِ ہچ وڑ آ تینا قومی زبان منیپنہ و ننا قومی زبان بنگالی ءِ ہراڑکننن ہر حد اسکان ہننگ کن تیار اُن۔
خوانندہ تنظیم آتا کنڈ آن تیوہ بنگلادیش ئٹ پرامن برانز کننگا و دا وڑ ئنا ناخدائی تیان تیوہ نمن کننگا۔ مدا مدا خوانندہ آتا کنڈ آن بناءکننگوکا تحریک تیوہ بنگلادیش ئٹ تالان مس۔ سامراج ہرا کہ تاغت و بےدادی نا زبان ءِ پُہہ مریک ڈھاکہ ٹی تالان مروکا خوانندہ آتامزاحمتی تحریک ءِ خنیسہ ۲۱ فروری ۱۹۵۲ نا دے پنجاپی سامراج ڈھاکہ یونیورسٹی نا خوانندہ آتیا جلہو کرے ہرا نا سوب آن ڈھاکہیونیورسٹی نا کیہی خوانندہ آک شہید مسر۔ بنگلادیش نا خوانندہ آتا دا تحریک و جہد بشاء آندولن نا پن ئٹ یات کننگک۔
ڈھاکہ یونیورسٹی نا خوانندہ آتے یونیورسٹی نا مونا شہید کننگا و اوفتا شہادت نا سوب آن دا جاگہ نا پن ءِ پدان یونیورسٹی نا خوانندہآک شہید مینار تخار و اینو ہم دا جاگہ شہید مینار نا پن ئٹ چاننگک۔
۱۹۵۲ آن ۱۹۵۶ اسکان ڈھاکہ یونیورسٹی جنگ ئنا پڑ ئنا دروشم ءِ ہلک و دا جنگ ئٹی تاغت نا نشہ ٹی چگرو پنجاپی توفک نا زور آہراڑے تحریک ءِ لتاڑنگ نا کوشست کننگ ئس ہموڑے بنگلادیشی ورناک تینے کتاب آتیان خڑک تخیسہ قوم ئنا آخبت ءِ جوڑنگ نا کوشستکننگ ئسر۔ بنگلادیشی ورناک ہراڑے اسہ نیمغان پنجاپی سامراج نا مونا تینا زبان و پجار ءِ رکھنگ کن جہد کننگ ئسر تو ہموڑے کموخت ئٹی بنگالی خوانندہ آک تینے اسہ تاغت ئسے نا وڑ منیفیر و پنجاپی سامراج گوڈ آتیا تمنگ آ بے وس مس و بنگالی زبان ءِ قومیزبان نا جاگہ ءِ تس۔
اولیکو سرسہبی ءِ دوئی کننگ آن گڈ بنگلا دیش نا خوانندہ آتا کنڈ آن پنجاپی کوزہ گیری نا نیمہ غان دانستہ ودی کروک ویل آتیا بحثکننگ بناء کریسہ تینے علم آن اسٹ کننگ نا کوشست بناء کننگک، خوانندہ آتیٹ قومی شعور ودی کننگ نا کوشست ہم بناء کننگک وڈھاکہ یونیورسٹی ٹی خوانندہ تنظیم نا بنداو ءِ تخنگ مریک ہرا باز کم وخت ئٹی ایشیاء نا پنی آ خوانندہ تنظیم نا دروشم ئٹ مونا بریک وباز کم وخت ئٹی ہزار آ خوانندہ آک دا یونین نا بشخ جوڑ مریرہ۔
خوانندہ آتا اندا ادارہ آک قوم ئنا راہشونی ٹی اولیکو چر ئنا کڑد ءِ ایسری تننگ تون اوار السی لیگ ئنا شیخ مجیب الرحمن و ایلوسیاسی تپہ آتون اوڑدئی کریسہ بنگلادیش نا ویل آتے ایسر کرفنگ نا ہر منکن کوشست کیرہ۔ جاندمی پاکستان تون وسائل اف ئنابریبر ئس اندا سوب آن او بنگلہ دیش ئٹ ساڑی غٹ وسائل آتے بے دڑدی ئٹ لٹیسہ پنجاپ آ دننگ ئسر ہرا نا برخلاف خوانندہ تنظیمآتون اوار السی لیگ تینا توار بڑز کرے کہ بنگلہ دیش نا استحصال ننے ہچ وڑ آ قبول اف۔ اندا وخت آ بنگلہ دیش نا متحرک خوانندہ آتےسیاسی کاریم تیان مُر تخنگ کن ذلیل و خوار کننگا و اوفتے خُلیفنگ و دڑکو تننگ و بیگواہ کننگ نا کوشست کننگا یونیورسٹی ٹی پولیسو فوج ہتنگا ہرا نا مسخت داڑے ساڑی زالبول و نرینہ خوانندہ آتے سیاست آن مُر تخنگ و بیم تننگ ئس۔
ایوبی آمریت نا ہننگ آن گڈ پاکستان نا سروک یحیٰ مس و او گچین کاری کرفنگ نا فیصلہ کرے تاکہ بنگلادیش ئٹ بش مروک توار تےتوننگ کن اسہ جواز اس ودی مرے انتئے کہ بنگالیک آمریت نا چپ ئسر اندا وخت آ قطبی پاکستان ءِ اسہ قدرتی ویل اس پلویڑ کرے ہراٹی پنچ لکھ آن زیات بنگالی مرگ ئنا گواچی مسر۔ یحیٰ، ہرا دا وخت ئنا سروک ئس او اِرا ہفتہ آن گڈ قطبی پاکستان نا دورہ ءِ کرے تواونگان نا بندغ آک سوج آتا کوڑی اس اونا مونا تخار کہ ننے آ داخس ءُ ویل اس نازل مس ولے جاندمی پاکستان نا کنڈ آن نن کن ہچوکمک تننگ متو ہرا کہ دانگان نا الس تون مغربی پاکستان نا تعصبانہ روشت ءِ۔ جنرل یحیٰ دا حالیت نا نازرکی ءِ پُہہ مریسہ گچینکاری ءِ منَہ وخت اسکان پد بٹے۔ اندا سال پاکستان ئٹ گچین کاری اڈ تننگا ہرا ٹی قطبی بشخ آن السی لیگ شیخ مجیب الرحمن ناپارٹی ۱۶۹ آن ۱۶۷ نشست کٹا دا وخت آ جاندمی پاکستان و پنجاپی سامراج ءِ دا خلیس پلویڑ کرے کہ داسا گورنمٹ قطبی پاکستان والسی لیگ ئنا دو ٹی ہنا۔
جنرل یحیٰ اقتدار ءِ سولین حکومت نا دو ٹی تننگ خواہسوکہ ولے او قطبی بشخ ءِ تیوہ پاکستان ءِ تننگ خواہتوکہ انتئے کہ اوفتے دا ہیتئنا خلیس ئس کہ اگہ حکومت السی لیگ ئنا دو ٹی ہنا تو جاندمی پاکستان ءِ باز نسخان مرو۔ باز وخت اسکان اسمبلی تے بحال کننگمتو و پدان شیخ مجیب الرحمن اسہ تاریخی جلسہ ئسے تون تران کریسہ پارے کہ السی لیگ پاش گیشتری ئٹ گچین کاری ءِ کٹانے ولےواہم نن چانہ کہ نُم حکومت ءِ ننا دو ٹی تننگ کن تیار افیرے و نُم اوڑے تولیسہ السی لیگ نا برخلاف چم بازی کننگ اُرے۔
مجیب الرحمن جلسہ ٹی تران کریسہ پارے کہ اینو آن اُلسی لیگ جاندمی پاکستان تون ہمو وخت اسکان عدم تعاون نا پڑو کیک ہرا وختاسکان حکومت ننا دو ٹی تننگ متنے، دا وخت آ ڈھاکہ یونیورسٹی نا زالبول و نرینہ خوانندہ آک عدم تعاون نا عمل نا ستا ءِ کریسہ داعمل ءِ سرسہب کننگ نا کوشست کریر و ہر فکری تپہ آتیان تعلقداری تخوکا بندغ آک اسہ سیوتی اس جوڑار۔
جنھارا امام ہرا ڈھاکہ یونیورسٹی نا خڑک آ رہینگاکہ، او عدم تعاون نا بارو ئٹ لکھیک کہ کنا مار رومی برانز آ ہنیسہ کنے پارے کہڈھاکہ یونیورسٹی ٹی سنٹرل اسٹوڈنٹس یونین اسہ میٹنگ اس خواہفینے ای ہمونگ ہننگ اُٹ ولے رومی نا لمّہ اودے دا پاریسہ ہننگ کنالیتو کہ نی ہچو اسٹوڈنٹس آرگنائزیشن ئسے نا باسک افیس و یونیورسٹی نا حالیت خراب ءِ تو اوڑے انتئے کاسہ، رومی نا لمّہ نا پاننگنا رد ئٹ رومی پارے کہ ہیت خوانندہ یا باسک مننگ نا اف، خاخر ہر کنڈ آن ننا قوم ئنا بندر آتے پلویڑ کننگ ءِ، ای داڑے اُرا ٹی تولیسہتینا بندغ آتے ہُشنگیسا خننگ کپرہ۔ اندا وخت آ ہمو غٹ زالبول و نرینہ خوانندہ آک اوار بنگال ئٹی برانز کریر ہرافتیا پولیس و فوج ئناکنڈ آن بےدادی کننگا و شانزدہ خوانندہ شہید و ہزار آ تا کچ خوانندہ آک ٹپی مسر ہرافتیٹ رومی ہم اوار ئس۔
ریاست نا کنڈ آن پر امن برانز کروکا تیا بےدادی و زوراکی مننگ آ خنیسہ خوانندہ آتے باور مس کہ داسا پنجاپ تون ہچ وڑ آ رہینگمنکن اف ہرا نا اسٹ انگا کسر اسہ جتا و خودمختار ءُ ڈیہہ ئسے و اندا ڈیہہ ننا چاہنداری، دود ربیدہ و زبان نا رکھ ءِ کرو۔ وخت ئناخواست ءِ کہ کوزہ گیر نا برخلاف جہد کروئی ءِ۔ وخت و حالیت ءِ خنیسہ خوانندہ آتا کنڈ آن آجوئی نا خواست کننگا و اوفتا خواست ونیونٹ ایجنڈہ آ ساڑی ئس کہ نن بیرہ آجوئی خواہینہ و دا آجوئی کن ہر وڑ ئنا قربانی تننگ کن تیار اُن۔
اوڑے ساڑی ڈھاکہ یونیورسٹی نا خوانندہ راہشون حسن برانز ئٹ ہیت کریسہ پارے کہ داسا نن آجوئی آن بیدس ہچ گڑا سے آ امنائیکپنہ۔ نن ۱۹۴۸ آن دا زوراکی نا گواچی اُن۔ دا برانز ئٹ پنچ لکھ آن زیات بندغ ساڑی ئس۔ خوانندہ آتا کنڈ آن شیخ مجیب ءِ خواہفنگاکہ آجوئی آن بیدس نن ہچو ایجنڈہ سے آ ہیت کننگ کن تیار افن شیخ مجیب ہم دا برانز ئٹ آجوئی نا پڑو کریسہ پارے کہ حکومت نا غٹشعبہ تیان تیوہ بائیکاٹ نا پڑو کننگ مرے و پاکستان تون ہر وڑ ئنا انتظامی تعلقداری تے ایسر کننگ مرے۔ مجیب الرحمن پارے کہ بیستو سئے سالی تاریخ ئٹی بنگالی تے بےدادی، زوراکی، بےشرفی و جون تیان بیدس ہچ رسینگتنے۔ ننا تینا اسہ تاریخ اس جوڑ مسنے کہپنجاپی ۱۹۵۲ آن ہلیس اینو اسکان ننا بندغ آتا دتر شولانے و پاکستان نا دا قانود آک بنگلادیش ءِ ذلت و بےشرفی آن بیدس ہچ تتنو۔
جنرل یحیٰ حالیت نا ترندی و بنگالی الس ئنا سوگو ارادہ آتے پُہہ مریسہ ڈھاکہ ٹی اسہ دمدستی مجلس اس خواہفے و دا ویل ءِ ایسرکننگ نا کوشست کرے ولے حالیت باز خراب دروشم ہلکوسس و ہچو بھرم اس تننگ نا وڑ آ سلتویسر، ہرا نا سوب آن جنرل یحیٰ ناگمان آمیٹنگ آن بش مریسہ مجلس آن ہنا۔
کوزہ گیر تون کُل آن زیات کاریم ئٹ بروک سلاء بےدادی و تاغت ءِ اندا سوب آن جنرل یحیٰ نا کنڈ آن لشکری آپریشن ہمو گڈیکو کسربچاسس ہرادے او مطمئین کن انداز ئٹ عملی دروشم تننگ نا ارادہ کرے۔
جنرل یحیٰ نا ڈھاکہ آن ہننگ آن پنچ ساعت پد ڈھاکہ یونیورسٹی ٹی بھلو کچ اسیٹ لشکری آپریشن بناء مریک۔ ۲۵ مارچ ۱۹۷۱ ئنا ننیونیورسٹی ٹی لشکری الاخ و ٹینک آتا بننگ بناء مریک ہرا منَہ ساعت ئٹی یونیورسٹی ءِ کھپی تیٹ بدل کیرہ۔ یونیورسٹی نا اقبال ہاسٹلئٹی ۲۰۰ ورنا تے شہید و کیہی تے ٹپی کننگک و ایلو کنڈ آن زالبول خوانندہ آتیا اوفتا ہاسٹل آتیٹ ترند جلہو کننگ مریک۔
پاکستان تاغت نا کُل وڑ و ڈول ءِ کاریم ئٹ ہتیک و ڈھاکہ یونیورسٹی ٹی ساڑی پروفیسر آتا ہاسٹل ئٹ سم کاری نا بھرم ئٹی کیہی بندغآتے شہید کننگک۔ ڈھاکہ یونیورسٹی نا اسہ ہروفیسر اس یونیورسٹی نا حالیت نا بارو ئٹ لکھیک کہ ایلو دے ننے گراؤنڈ آ دننگا، اوڑےخوانندہ آتا جونک تماسر۔ او ودیک اسہ خوانندہ سے نا کسہ ءِ کیک کہ او تینا شہید مروکا سنگت آتا جون تتون سلوک ئس آرمی نا کنڈآن اودے مُر کننگ نا کوشست کننگا ولے او نمن کرے اندا نمن کننگ نا سوب آن اودے ہم سُم خلیسا کسفنگا۔
یونیورسٹی نا مونغی آن باز آ خوانندہ آتا لوشت انگا جونک خننگار و باز آ زالبول خوانندہ آتے آرمی کارندہ آک تینتو دریر ہرافتے جنسیحوس نا گواچی کننگ آن گڈ کسفنگا۔ اسٹوڈنٹ آتے شہید کننگ آن پد ہرا وخت اوفتا کوٹی و بیگ آتا تلاشی ہلنگا تو اوفتا کوٹی تیانسلاء و مزاحمتی ادب خننگا ہرافتے پدا ہُشار۔
یونیورسٹی ءِ تیوہ بند کننگا و ہرا زالبول و نرینہ خوانندہ آک دا سیاسی تحریک ئٹ اوار ئسر اوفتا اُرا تیا چھاپہ خلنگا و خوانندہ آتےبیگواہ کننگا و پدان اوفتا جون تے خسار۔ خوانندہ آک جنگی حالیت ءِ خنیسا اُرا تے اِلار و مش و جنگل آتیٹ ہنار و مکتی باہنی نا لشکرئٹ اوار مسر۔ مکتی باہنی موومنٹ آجوئی کن مخلوق ءِ سلاء بند جہد ئنا ہیل کاری تننگ ئس۔
ڈھاکہ یونیورسٹی ٹی ساڑی غٹ اہم انگا جاگہ غا تے بلڈوز کننگا ہرافتیٹ شہید مینار و پین منَہ کیفے ئسر ہراڑے خوانندہ آک توسرہ وہیت و تران کریرہ ہرا اینو ہم اندا پن تون تفوک ءِ۔
تاریخ دان آتا رد ئٹ دا جنگ ئنا بھرم ئٹی اسہ کروڑ بنگالی انڈیا ٹی باہوٹی مسر و اونا سیم آ رہینگ بناء کریر و تاریخ ننے پائک کہ ۲۵لکھ آن زیات بنگالی تے شہید کننگا۔ پاکستان آرمی نا کنڈ آن بنگلادیش ئٹی ساڑی ہزار آتا کچ ئٹ ورنا مسن تے برمتہ کننگا و اوفتےجنسی زیاتی نا گواچی کننگا، ہرا تینٹ بندغی و پاکستان نا مون آ اسہ چپانٹ ئسے۔ نوہ تو ئنا جنگ آن پد ۱۶ دسمبر ۱۹۷۱ آپاکستانی لشکر سلاء بٹے و بے سہبی اوفتا بخت جوڑ مس و بنگلادیش آجو مس۔ اینو ہم جہان نا غلام قوم آتیکن بنگلادیش نا خوانندہآتا جہد اسہ کسر ایشان تروکو چراغ ئسے و خوانندہ آک چرجوئی ئٹ محکومی نا برخلاف جہد کننگ ءُ۔
