پاکستان ئٹ بیگواہ آ بندغ آتا خاہوت آتے تینا بندغ آتا آجو نہ مننگ نا برخلاف برانز آ تیٹ تڑی، و پولیس نا کرینگ آ تون مون تروئی تمکو بھاز وختا اوفتے برانز ئٹ بےدادی و  دزگیری تون ہم مون تروئی تمک۔ دا ہیت آتے ایمنسٹی انٹرنیشنل پنچ شمبے نا دے اسہ پوسکنورپورٹ ئسے ٹی کرے۔

ایمنسٹی انٹرنیشنل نا رپورٹ نا رد ئٹ برجاء سال سینزدہ جون آ سندھ اسمبلی نا مونا بلوچ یکجہتی کمیٹی کراچی و وائس فار مسنگپرسنز نا نیمہ غان اِرا بلوچ خوانندہ دودا بلوچ و غمشاد بلوچ نا زوراکی نا بیگواہی نا برخلاف سندھ اسمبلی نا مونا برانز کننگ آ بلوچزالبول آتے بے دادی نا گواچی کننگا۔

رپورٹ ئٹ پاننگا کہ سندھ پولیس زالبول آ تون اوار ورنا خوانندہ آتیا لٹ کٹ کرے، ہرا نا سوب آن او باز ٹپی مسر۔

ایمنسٹی انٹرنیشنل دا تدینی تیان دا ہیت ئنا شاندہی کریسہ پارے کہ پولیس و انٹیلی جنس ادارہ آک پرامن برانز آتے دانگ اینگ کننگکن غیر ضروری تاغت کارمرز کیرہ۔ دا عمل جہانی بندغی حق آتا قانود و معیار آ تیان چپ و اوفتے لتاڑنگ ءِ۔

بلوچ یکجہتی کمیٹی کراچی نا آرگنائزر آمنہ بلوچ ایمنسٹی انٹرنیشنل نا رپورٹ ءِ حکومت نا مونا شامات اس پارے و اونا پاننگ ئس کہدا رپورٹ گواچنی تیا ساڑی ءُ رپورٹ ئسے۔

آمنہ بلوچ نا پاننگ ئس کہ اندا زوت سندھ حکومت بلوچ یکجہتی کمیٹی کراچی تون حوال کریسہ اوفتے مذاکرات نا دعوت تس و دا بابتئٹ وزیراعلیٰ سندھ سید مراد علی شاہ نا ہدایت آ سندھ ئنا سینئر وزیر میر شبیر بجارانی خاہوت آ تتون اوڑدئی ہم کرے۔ دا اوڑدئی ٹیاوفتے یخین تننگا کہ زوت غٹ بیگواہ آ بندغ آتے آجو کننگ مرو۔ ولے داسکان کس آجو متنے۔

آمنہ نا پاننگ ئس کہ بیگواہ آ بندغ آتا آجوئی نا جہد اسہ پرامن و جمہوری تحریک ئسے۔ حکومت و ادارہ آک قانود نا عزت ءِ کیر بیگواہآ بندغ آتے عدالت آ تیٹ پاش کیر۔

آمنہ بلوچ حکومت آن خواست کرے کہ او جمہوری جہد ئنا احترام ءِ کیر و قانود و آئین نا دائرہ ٹی رہینگیسہ سندھ ئٹی بیگواہ آ بندغآتا آجوئی ءِ یخینی کیر و ننا جمہوری و قانودی تحریک ءِ توننگ کن تاغت کارمرز کپس۔

آمنہ بلوچ پارے کہ قانود نافذ کروکا ادارہ آک قانود آن چپ ہِننگ ءُ۔ ہراڑان سندھ ئٹی ہم بندغی حق آتا لتاڑ مننگ ءِ۔ دا وختا کہی بندغآک سی ٹی ڈی و بنجائی ادارہ آتا قیذ ئٹی ءُ ہرا بے ڈوہ ءُ۔

مکران یونیورسٹی نا پوسکنا وائس چانسلر نا برخلاف خوانندہ آتا کنڈ آن برانز نا لڑ برجاء ءِ، یونیورسٹی نا خوانندہ آک سیاسیو چاگڑدی تنظیم آ تتون اوار پریس کانفرنس کریر۔

پنجگور پریس کلب ٹی پریس کانفرنس کریسہ خوانندہ آتا پاننگ ئس کہ نن تدوکا 40 دے آن یونیورسٹی آف مکران ءِ تیوہ بند کریسہاسہ متنازع ءُ وائس چانسلر عبدالمالک ترین نا برخلاف برانز کننگ اُن کہ دا بندغ ہرا نا ماضی داغدار ءِ ہراڑا بلوچستان یونیورسٹیاسکینڈل ٹی تُد مننگ نا دوبہ ارے ہرادے لورالائی یونیورسٹی آن غیر تسلی بخش کڑد ئنا بنیات آ مُسہ تو ئنا تہٹی کشنگا و ہرادے ایچ ایسی نا کنڈ آن مُسہ سال ئنا سزا تننگانے و پن کروک وائس چانسلر آ پلیجیرزم نا کیس ارے دا بندغ ءِ نن یونیورسٹی آف مکران نا وائسچانسلر اسُل منپنہ۔

خوانندہ آتا پاننگ ءِ کہ برانز نا وختا نن یونیورسٹی آف مکران ءِ تیوہ بند کریسہ یونیورسٹی ءِ ہر وڑ ئنا کاریم تیکن بند کریسُن و پنجگورنا غت خوانندہ آ تتون اوار مریسہ یونیورسٹی آن ہلیس ڈپٹی کمشنر نا دفتر اسکان نن برانزی ریلی اس ہم کشان اسہ دے اس تیوہپنجگور ئٹ شٹر ڈاون ہڑتال نا کال ہم تسون ہراڑان گڈ پنجگور نا بنجائی بازار تیوہ بند کننگا و اندن وخت وخت آ پریس کانفرنس آ تیٹتیوہ بلوچستان نا خوانندہ آتتون اوار ہر فکر ئنا تپہ آتا بندغ آتے تینا ویل ئنا بابت ئٹ چاہنداری تسون۔

خوانندہ آتا پاننگ ئس کہ نن پاش پانہ کہ متنازعہ وائس چانسلر نا داکان کشنگ نا خواست بیرہ یونیورسٹی آف مکران نا خوانندہ آتااف بلکن پنجگور نا 18 اسٹیک ہولڈر تپہ آک ہرافتیٹ یونیورسٹی آف مکران نا زالبول و نرینہ خوانندہ، پنجگور نا ایلو سیاسی و سولسوسائٹی نا تنظیم آک ہم اوار ءُ، کُل ئنا ءِ۔

یونیورسٹی آف مکران نا خوانندہ آک پاریر کہ تدوکا چل دے آن یونیورسٹی نا خواننگ و خوانفنگ نا عمل بیرہ اسہ بندغ ئسے نا اناپرستی و ضد ئنا سوب آن زیمی مسنے و اینو نن خوانندہ آک جتا اسٹیک ہولڈر آ تتون صلہ کریسہ دا فیصلہ کرینُن کہ یونیورسٹی آفمکران ئٹی 10 اگست 2022 آن خواننگ و خوانفنگ نا عمل بناء کننگو و تعلیمی کاریمک بحال مرور ولے متنازع وائس چانسلر نا برخلافبرانز ترندی ئٹ برجاء مرو و یونیورسٹی آف مکران نا زالبول و نرینہ خوانندہ آتا بشخ آ تیٹ کیمپ خلیسہ برانز آ تولنگ مرو۔

خوانندہ آتا پاننگ ئس کہ اوفتا برانز ہمو وخت اسکان برجاء مرو ہرا وخت اسکان عبدالمالک ترین نا جاگہ آ اسہ شرفدار و جوانو کڑد ئناوائس چانسلر اس ہتنگ مرو۔

خوانندہ آک ودیک پاریر کہ دا نیام ئٹ عبدالمالک ترین یونیورسٹی آف مکران ئٹی بننگ نا کوشست کرے تو نن یونیورسٹی ءِ تیوہ بند کرونو پنجگور نا غٹ اسٹیک ہولڈر آتتون اوار تیوہ پنجگور ئٹ برانز کرون دا حالیت ئٹ اگہ اسہ بے یخینی حالیت اس ودی مس تو دا نا ذمہوار ہم مالک ترین مرو داڑتون اوار نن یونیورسٹی بست و بند آن خواست کینہ کہ او بروکا ہفتہ آن لیپ ٹاپ بشخنگ بناء کیر۔

شمالی وزیرستان نا علاقہ میر علی ٹی فوجی کاروان آ خود کش جلہو کننگا، ہرا نا ذمہ واری ءِ “اتحاد مسلح اسلامی مجاہدین( امام) پنی ءُ تنظیم اس ارفے۔

پاکستان فوج ئنا شعبہ تعلقات عامہ آئی ایس پی آر نا رد ئٹ فوجی کاروان آ جلہو  شمالی وزیرستان نا علاقہ میرعلی ٹی کننگا و جلہوئٹ 4 فوجی کارندہ خلنگار۔

آئی ایس پی آر نا رد ئٹ کہوکا کارندہ آ تیٹ لانس نائیک شاہ زیب، لانس نائیک سجاد، سپاہی عمیر و سپاہی خرم اوار ءُ۔

خیبر پختونخواہ نا علاقہ شمالی وزیرستان ئٹی پاکستان فوج نا کاروان آ مروکا خودکش جلہو نا ذمہ واری ءِ “امام” پنی آ تنظیمارفینے۔

“اتحاد مسلح اسلامی مجاہدین” (امام) نا ترجمان ابو بصیر وزیرستانی تینا شینک کروک بیان ئٹ پارے کہ “امام نا استشہادی مجاہدپاکستانی غلام فوج ءِ سر سہب جلہو ئٹ ٹک کرے ہرا ٹی ہفت کارندہ مرگ ئنا گواچی و ٹپی مسر۔”

مونا بروکا پوسکنا تنظیم “امام” نا کنڈ آن دا اولیکو خودکش جلہو ءِ۔ تدوکا تو ئٹ خیبر پختونخواہ ٹی پولیس کارندہ آتیا جلہو نا ذمہواری ءِ ہم اندا تنظیم ارفیسس ہرا ٹی اے ایس آئی گل آفریدی آ جلہو ہم اوار ءِ ہرا ٹی او خلنگاسس۔

افغان جیڑہ و طالبان تنظیم آتے کڑمبی ئٹ مطالعہ کروک و نظر تخوک پشاور ئٹی سینئر صحافی، اینکر پرسن و تجزیہ نگار رفعتاورکزئی پائک کہ دا تنظیم نا وجود ئٹی ہچو شک اس اف، دافتتون خود کش جلہوکار ہم ارے۔ اگہ تنظیم ٹی ٹی پی نا ڈول بھلو تنظیماس اف ولے سکیورٹی فورسز و پولیس آ جلہو کننگ نا صلاحیت تخک۔

برجاء وخت ئٹ قبائلی ضلع شمالی وزیرستان ئٹ پاکستانی فورسز آ تیا جلہو و جھڑپ آک ہڑدے نا کاریم جوڑ مسنو۔ تدوکا تو 4 جولائیآ دا علاقہ ٹی فورسز آتا قافلہ آ خودکش جلہو ئٹ کم اس کم 10 سیکیورٹی کارندہ ٹپی مسوسر۔

داکان مُست 30 مئی آ موٹرسائیکل آ سوار خودکش جلہوکار رزمک نا علاقہ ٹی پاکستانی فورسز آتا اسہ کاروان ئسے آ جلہو کریسس۔

بلوچستان نا ضلع کیچ ئٹی استو ننکان یانزدہ بجہ نا وختا پاکستانی فورسز آک چھاپہ خلیسہ اِرا ورنا ءِ دزگیر کریسہ بےڈس ءُ جاگہسے آ دریر۔

شابیتی حوال تا رد ئٹ تربت ڈنک ئٹی استو ننکان یانزدہ بجہ آ پیراملٹری فورس موسیٰ پنی ءُ بندغ ئسے نا اُراغا چھاپہ خلیسہ اِرا چُنا ءِبیگواہ کرے و بے ڈس ءُ جاگہ سے آ درے۔

بیگواہ مروک خوانندہ آتا چاہنداری بالاچ و براھمدگ ولد موسیٰ نا پنا مسنے، ہرافتیٹ براھمدگ نہمی کلاس و بالاچ چارمی کلاس ناخوانندہ ئسے۔

دزگیر مروکا تومکا چُناک تدوکا سال کیچ ئٹی ڈیتھ اسکواڈ نا دو آن خون مروکا ملک ناز نا الّہ ملࣿ آکو۔

یاتی مرے کہ دو ہزار بیست ئٹی کیچ ئنا ڈنک ئٹی ڈوہدار آک دُزی کن نن ئنا تہارمئی ٹی اُرا سے آ جلہو کریسر، اُرا ٹی ساڑی ملک نازپنی ءُ نیاڑی اس مزاحمت کریسس ہرا نا سوب آن دُز آک نیاڑی ءِ خون کریسر۔

سُم کاری آن ملک ناز نا چُنک سن مسڑ برمش ہم ٹپی مسوسس، دا خون ئنا برخلاف بلوچستان و پیشن ملک آ تیٹ برانز ہم کننگا، جتاسیاسی و چاگڑدی تنظیم آک دا تدینی نا برخلاف برانز کریر و ڈوہدار آتے سزا تننگ نا خواست کریر۔

حکومتی کوالخواہ و پولیس نا رد ئٹ دا کارروائی ٹی اوار غٹ ڈوہدار آتے قید کننگانے ولے الس ئنا اندا خواست ءِ کہ ہمو غٹ بندغ آتے بےسلاء کننگ مرے ہرافتے ریاستی کوالخواہ تا مخ تفی تُد ءِ۔

مستونگ ئٹی سلاء بند بندغ آتا سُم کاری آن مسیحی برادری نا چار چُنا ٹپی مسنو۔

شابیتی حوال تا رد ئٹ بلوچستان نا ضلع مستونگ نا علاقہ کرسچن کالونی ٹی نادرست آ سلاء بند بندغ آک محلہ ٹی ساڑی بندغ آتیاسُم کاری کریسہ نرانو۔

تدینی آن گُڈ پولیس و بست و بند تدینی نا جاگہ آ رسینگیسہ جلہو کروکا تا پٹ و پول ءِ بناء کرینے۔

حوال تا رد ئٹ ٹپی مروکا چُنا تے دمدستی شہید نواب غوث بخش میموریل ہسپتال مستونگ آ سر کننگا و اوکان گُڈ کوئٹہ ءِ رادہ کننگا۔

ضلع نا بست و بند نا رد ئٹ تدینی نا بابت ئٹ پٹ و پول پولیس کارندہ آک کننگ ءُ واہم تدینی نا بابت ئٹ شابیت حوالک داسکان مونابتنو۔

اوغانستان ٹی بیست و چار گھنٹہ ٹی تحریک طالبان پاکستان نا اِرا اہم ءُ کمانڈر سنگت آ تتون اوار اِرا جتا ءُ علاقہ آ تیٹخلنگانو۔

خلنگ مروکا تیٹ ٹی ٹی پی نا اہم راہشون ملا عمر خالد خراسانی، حافظ دولت خان، ملا حسن، ملا امیر و مولانا عقابی اوار ءُ۔

پِن کروک ٹی ٹی پی راہشونک اِرا جتا ءُ علاقہ کنڑ و لوغر ٹی اِرا جتا ءُ تدینی ٹی خلنگ مسنو۔

یاتی مرے کہ تدینیک ہمو وخت مسُر ہرا وخت پاکستانی لشکر و ٹی ٹی پی نا نیام ئٹ گپ تران و جیڑہ چلنگ ئس۔

حوال تروکا تا دعویٰ ءِ کہ تدینی ٹی اخس کہ بندغ خلنگانو او غُٹ مذاکرات نا سخت برخلاف ئسُر و اندا سوب آن او خلنگانو تاکہ ٹی ٹیپی ءِ زور و تاغت ئٹ مذاکرات نا ٹیبل آ پاکستانی لشکر تینا خواست آتے منفنگ کِن شیف کے۔

داسکان ٹی ٹی پی نا ہچو بیان اس دا تدینی تا باروٹ مونا بتنے۔

بلوچستان نا دریابی شار گوادر ٹی تدوکا دے نادرست آ بندغ آک پاکستانی فورسز آتا اُلاخ ئسے بمب جلہو ئٹ ٹِک کریر ہرا ٹی فورسزآتے جانی نسخان نا حوال ءِ۔ جلہو نا ذمہ واری ءِ بلوچستان لبریشن فرنٹ ارفے۔

بلوچستان لبریشن فرنٹ نا ترجمان میجر گہرام بلوچ میڈیا غا شینک کروک تینا بیان ئٹ پارے کہ ہفت اگست آ ننا سرمچار آک بلوچستاننا شار گوادر میرن ڈرائیو ( پدی زر ) کسر آ فورسز آتا سگنل ڈور پیکچ اُلاخ ءِ ریموٹ کنٹرول بمب ئٹ ٹِک کریر۔ اونا پاننگ ئس کہ جلہوئٹ اُلاخ نا پَد ئنا بشخ تراک نا دک ئٹ بس، اُلاخ ٹی سوار چار کارندہ مرگ ئنا گواچی و اِرٹ ٹپی مسُر۔

اونا پاننگ ئس کہ جلہو بلوچستان لبریشن فرنٹ نا اسکسپلوز اسکواڈ نا پارہ غان کننگانے، اربن گوریلہ تکنیک ءِ کاریم ئٹ ہتیسہ نناسرمچار آک رکھوک پیشتمنگ ئٹ سر سہب مسُر ۔

میجر گہرام بلوچ اسہ پین جلہو ئسے نا ذمہ واری ءِ ارفیسہ پارے کہ ضلع کیچ نا علاقہ مند ٹی چکاپ کور ٹی اسہ چوکی سے آنارٹمیکو چوکی نا پارہ غا ہنوک چار فوجی کارندہ ءِ اسنائپر آتیٹ ٹِک کریر ہراڑان اِرا فوجی ٹپی مسر۔

ترجمان نا پاننگ ئس کہ جلہو آن گُڈ اِرا پین فوجی اسہ مورچہ آن نرِنگ ئٹ سر سہب مسُر ۔ جلہو آن گُڈ قوضہ گیر لشکر کہی مارٹرگولہ خسّار و بھلا سلاء تیٹ سُم کاری کریر۔ اندن سرمچار آک جلہو آن گُڈ سلامت تینا جاگہ آ رسینگار ۔

ایلو پارہ غا قلات شیخڑی ٹی درو ایف سی نا گاڑی ئسے بمب جلہو اسیٹی ٹک کننگا ہرانا ذمہ واری ءِ بلوچ لبریشن آرمی ارفے۔

بلوچی اکیڈمی نا شست و چارمیکو سالانہ جنرل باڈی مجلس کماش رفیق بلوچ نا کماشی ٹی اڈ تننگا۔

مجلس ئٹ جنرل سیکریٹری ڈاکٹر بیزن سبا رپورٹ ئٹی تدوکا سال ئٹ اڈ تروکا ادبی کاریم و مجلس، شینکاری و ایلو منصوبہ آتا بابتئٹ باسک آتے چاہنداری تس۔

داڑان بیدس سالانہ رپورٹ ئٹی مالی خرچہ آتا بابت ئٹ باسک آتے بریفنگ تننگا و موکل ہلنگ مس۔ بلوچی اکیڈمی نا باسک آک دا ہیت آفریشانی نا درشانی کریر کہ سرکاری اسکول آ تیٹ خوانفوکا بلوچی مضمون آتا نصاب جوڑ کننگ و بلوچی خوانفنگ نا عمل ءِ ہم بندکننگانے۔

داڑان بیدس باسک آک خواست کریر کہ اسکول آ تیٹ بلوچی بولی ءِ خوانفنگ کن بلوچی ٹیچر ہتنگ مرے۔ اکیڈمی نا باسک آک دا ہیت آہم فریشانی نا درشانی کریر کہ کالج لیول آ بلوچستان نا جتا کالج آ تیکن بلوچی نا ہورک انگا سیٹ آتے پبلک سروس کمیشن نا رد ئٹمشتہر کریسہ استاد ہتنگ مرے تاکہ سرکاری کالج آ تیٹ بلوچی خوانفنگ نا عمل ئٹی ترندی برے۔

ڈاکٹر بیزن سبا سالانہ رپورٹ ءِ مونا ہتیسہ پارے کہ اکیڈمی دا سال ئٹ بلوچی زبان نا ڈیجیٹیلائزیشن کن اسہ موبائل ایپلی کیشن اساڈ ترفینے ہراٹی اکیڈمی نا کنڈ آن شینک مروکا کتاب آک خواننگ کن دوئی مرور۔

داڑان بیدس پولکاری شعبہ ٹی 9 پولکاری کتاب شینک کننگانے۔ و اینخو انگریزی بلوچی ڈکشنری، بلوچی چار زبانی ڈکشنری آن بیدسشاعری و فکشن نا بابت ئٹ 21  کتاب شینک کننگانے۔

اکیڈمی مجلس عامہ ءِ ہدایت کرے کہ او چنا تیکن تعلیمی مواد نا تیاری، پیشن ملکی بولی تا کلاسیک تخلیق آتے بلوچی بولی ٹی مٹ وبلوچی نا شاہکار ادبی و تاریخی مواد آتے انگریزی یا ایلو بولی تیان مٹ کننگ، بلوچی بولی نا لہجہ و تاریخ نا بابت ئٹ پٹ و پول وشینکاری و بلوچستان نا تاریخ نا بابت ئٹ گام ہرفے۔

جنرل باڈی نا باسک آک وزیر اعلیٰ بلوچستان و اسمبلی نا باسک آتے دا کنڈ آ پام تسر کہ بلوچی بولی تون اوار بلوچستان نا ایلو بھلازبانک پشتو و براہوئی ءِ سرکاری پرائمری اسکول آ تیٹ خوانفنگ کن گام ارفنگ کن قانود جوڑ کیر۔

باسک آک بلوچی اکیڈمی نا کاریم تا بابت ئٹ ہیت و تران کریسہ پاریر کہ اکیڈمی تدوکا منَہ وخت آن پولکاری کاریم تا بابت ئٹ سیمیناراڈ تسنے و تحقیق نا کنڈ آ گیشتر پام تسنے ہراڑان بلوچی بولی نا دوی ادب نا دیمروی ٹی کمک رسینگنگ ءِ۔ داڑان بیدس بلوچی اکیڈمینا جوڑ کروکا موبائل اپیلی کیشن ہم دا کنڈ آ اسہ خاص ءُ گام ئسے۔

شست و چارمیکو مجلس ئٹی دا صلہ غاک مونا ہتنگار و حکومت بلوچستان تون اوار ذمہ وار ادارہ آ تیان خواست کننگا کہ بلوچستان ناغٹ سرکاری پرائمری اسکول آ تیٹ بلوچی، پشتو و براہوئی نا باقاعدہ استاد (ٹیچر) تخنگ مرے و پرائمری سکول آ تیٹ دا بولی تےخوانفنگ نا عمل ءِ دوارہ بناء کننگ مرے۔ بلوچستان ئٹی سریاب روڑ آ ساڑی میوزیم تون اوار جتا علاقہ آ تیٹ کلچرل سینٹر آتے ہم فعالکننگ مرے۔ جعفرآباد و نصیرآباد نا علاقہ آ تیٹ بلوچی بولی ءِ خوانفنگ نا کاریم بناء کننگ مرے۔ ریڈیو و ٹی وی پراگرام آتے معیاریجوار کننگ آن بیدس اوفتا شینکاری نا وخت ءِ ہم ودفنگ مرے۔

بلوچی اکیڈمی نا کماش سنگت رفیق مجلس ئٹی اوار مروکا غٹ باسک آتے منتوار پاریسہ دا ہیت ئنا درشانی کرے کہ بلوچی اکیڈمیبلوچی بولی، تاریخ، دود و ربیدگ و ادب نا دیمروی کن تینا کوشست آتیٹ ودیک ترندی و سوگوی ہتو۔

بلوچستان نا دریابی شار گوادر ٹی نادرست آ بندغ آک پاکستانی فورسز آتا اُلاخ ئسے بمب جلہو ئٹ ٹِک کرینو۔

فورسز آتا اُلاخ ءِ گوادر نا علاقہ میرین ڈائیو آ ٹِک کننگانے، حوال تا ردئٹ جلہو ئٹی فورسز آتے جانی و مالی نسخان مسنے، ولے دا ناپک داسکان متنے۔

یاتی مرے کہ بلوچستان ئٹی اینو دا ارٹمیکو بمب جلہو ءِ ہراٹی فورسز آتے ٹِک کننگانے، داکان مالو قلات نا علاقہ منگچر ٹی پاکستانیفورسز فرنٹیئر کور نا اُلاخ ءِ نادرست آ بندغ آک تراکی آ مواد آ تیٹ ٹِک کریسُر ہرانا ذمہ واری ءِ بلوچ لبریشن آرمی ارفینے۔

اندن تدوکا دے بلوچستان نا بنجائی شار کوئٹہ ٹی پولیس کارندہ آتے ٹِک کننگاسس ہرا نا ذمہ واری ءِ بلوچستان لبریشن فرنٹارفیسس۔

گوادر ٹی مروکا دا جلہو نا ذمہ واری ءِ داسکان ہچو تنظیم اس ارفتنے۔

بلوچستان نا بنجائی شار کوئٹہ ٹی بیگواہ آ بلوچ آتا آجو نہ مننگ و زوراکی نا بیگواہی تا برخلاف وائس فار بلوچ مِسنگ پرسنز نابرانزی کیمپ ءِ اینو پریس کلب نا مونا 4715 دے پورو مس۔

دا وختا تنظیم نا کمک کماش ماما قدیر بلوچ نا پاننگ ئس کہ اگہ نن شخصی خواہش و انفرادیت آن پیشتمتون تو قوم پین ہڑاند آتاگواچی مرو۔

اونا پاننگ ئس کہ فورسز آک مستونگ، اسپلنجی، جوہان قلات، نوشکی چاغی و بلوچستان نا ایب کیب ئٹ قیامت نا ڈول انگا آپریشن آتیٹ ہندی آباتی تے تینا زوراکی تا گواچی کرینو۔

ماما قدیر بلوچ نا پاننگ ئس کہ ہرنائی زیارت ئٹی پاکستانی لشکر بیگواہ آ بندغ آتا دوانزدہ جون اسپتال آ سر کریر، ہرا جشوک مننگنا سوب آن چاننگ ہم متورہ۔ پاکستانی لشکر نا کنڈ آن دروغ ئنا مونتس آتا ڈرامہ و بیگواہ آ بندغ آتا جشوک جون تے خسنگ ئٹی ترندیبسنے۔

ایلو نیمہ غان بلوچستان اسمبلی نا مجلس ئٹی صوبائی وزیر پی اینڈ ڈی نور محمد دمڑ نا پاننگ ئس کہ بلوچستان ئٹی اسہ دود اسجوڑ مسنے کہ خواست آک جائز مریر یا آخہ، ولے بندغ آک پریس کلب نا مونا برانز آ تولِرہ ہرافتے سیاسی تپہ آتا مخ تفی تُد مریک۔

صوبائی وزیر نا دا بیان نا ورندی ٹی وائس فار بلوچ مسنگ پرسنز نا سروک و ڈاکٹر دین محمد بلوچ نا مسڑ سمی دین بلوچ چاگڑدیحوالکاری میڈیا ٹوئٹر آ ٹوئیٹ کریسہ پارے کہ اگہ برانز آتے سیاسی تپہ آتا مخ تفی تُد مسکہ گُڑا دا لمّہ و ہیڑک تدوکا 17 دے آن گورنرہاؤس نا مونا بے وارث آتا ڈول چارکسر آ در پہ در متورہ۔

صوبائی وزیر نا ودیک پاننگ ئس کہ سپریم کورٹ ئنا سطح آ جوڈیشل کمیشن اڈ تننگ نا خواست آ عمل کننگ بلوچستان حکومت نادائرہ اختیار ئٹی اف۔

سمی دین بلوچ نا ودیک پاننگ ئس کہ ہرا وخت اسکان ننا ڈکھ و اذیت آتے وختس سیاسی جماعت، وختس ملک دشمن آتا مخ تفی نا پنتریسہ تو وختس ایلو دوبہ آ تیٹ ننا ڈکھ آ تیا مسخرہ کرورے؟ اگہ ننا ڈکھ آتا مداوہ کننگ کپیرے تو کم اس کم دُننگا ہیت آ تیٹ بیگواہکروکا ادارہ آتیکن پوسکنو کسر ملپبو۔