بشیر زیب بلوچ: بلوچ لبریشن آرمی نا ریڈیکل راہشون
نوشت : کِیا بلوچ | مٹ: بَرناز بلوچ
دی بلوچستان پوسٹ
پاکستان نا جاندم دے کہی ہند بلوچستان، دترچر و پاکستان آن جتائی نا است خواہوک بلوچ آجوئی پسند و راجدوست سلاء بند آتا جلہو آتیٹ ڈرامائی ودکی تون مون تننگ ءِ۔ 2018 آن بلوچستان اٹ پاکستانی فورسز و چینی شاری تیا سوگوْ جلہو و خودکش جلہو آتا پوسکنو لڑ اس برجا ءِ۔ ہنوکا دے تیٹ 26 ستمبر نا دے اکن، بلوچ لبریشن آرمی اسہ پاکستانی فوجی ہیلی کاپٹر ئسے خلنگ بٹنگ و شش فوجی کارندہ تے کھسفنگ نا دعوی کریسس۔ پاکستانی فوج جاندم دے کہی بلوچستان اٹ نن نیمہ غا اسہ مشن ئسے نا وخت دا تدینی نا پک کریسس و مناسس کہ دا تدینی ٹی گواچنی اٹ اوفتا شش بندغ کھسکنو، ولے تدینی نا سوب ءِ بیان کننگ متو۔ ہیلی کاپٹر ءِ بنائی وڑ اٹ اِرا کارندہ تے رکھنگ کن رادہ کننگاسس، ہرافتے بی ایل اے دزگیر کریسس۔
داڑان مُست، بی ایل اے نا اسہ پین بھلو جلہو اس اپریل ٹی کراچی ٹی مس، ہراتم اسہ منی بس ئسے اسہ نیاڑی اس ٹک کریسس، ہراٹی مسہ چینی شاری و اوفتا پاکستانی ڈرائیور مرگ ئنا گواچی مسر۔ داڑان ہم مُست، فروری ٹی، بی ایل اے بلوچستان نا پنجگور و نوشکی ضلع تیٹ اسٹ آن پد ایلو فدائی جلہو کریسس۔ بی ایل اے 195 فوجی کارندہ آتے کھسفنگ نا دعویٰ کریسس، ولے دا کچ ءِ پاکستانی فوج رد کریسس۔
اندا وڑ سوگو و بھلا کچ نا جلہو آک دا درشان کیرہ کہ بلوچ باغی و خاص وڑ اٹ بی ایل اے وخت اتون اوار پین ہم ترند مرسا ءِ۔ او تینا متکنا حکمت عملی “خلنگ و نرّنگ” ءِ فدائی جلہو آتیٹ مٹ کرینے۔ ولے حکمت عملی ٹی داخس ڈرامائی ءُ بدلی انتئے بس؟ و بی ایل اے ٹی ودوکا پوسکنی و گچینی نا پد اٹ ہرا بندغاک ءُ؟ مگنہ دا سوب بشیر زیب بلوچ نا دروشم اٹ بی ایل اے نا راہشون نا بدلی مننگ کیک؟
بشیر زیب بلوچ دیر ئسے؟
بی ایل اے نا پوسکنا چِل سالی سرکماش، بشیرزیب، نیامیکو تپہ آن تعلقداری تخوک، اسہ جارات و خوش گفتار ءُ بندغ ئسے۔ بی ایل اے نا مسکوہی کماش راہشون اسلم بلوچ نا 25 دسمبر 2018 نا دے اکن اوغانستان نا صوبہ قندھار اٹ گمانی وڑ ئٹ پاکستانی انٹیلی جنس تون تفوک اسہ اندر ءُ خودکش بمبار ئسے نا دو آن خلنگ آن پد، زیب ءِ سینیئر کمانڈ کونسل و آپریشنل کور کمیٹی امنائی اٹ بی ایل اے نا سپریم کمانڈ گچین کریر۔ اوکان پد بشیر زیب اسلم بلوچ نا مشن ءِ مونی درسا، بی ایل اے نا حکمت عملی تے ترند کرسا، گیشتر خلنگ و فدائی جلہو تا لڑ ءِ برجا تخا۔
بشیر زیب بلوچستان نا صوبائی دارالحکومت کوئٹہ آن 145 کلومیٹر دے کہی شار نوشکی آن تعلقداری تخوک ءُ ڈاکٹر ئسے نا مار ءِ۔ اوفتا تعلقداری بلوچ آتا محمد حسنی قبیلہ آن ءِ، ہرا بلوچستان نا کہی ضلع تیٹ تالان مروکا بھلا قبیلہ تیان اسٹ ءِ۔ نوشکی ٹی تینا پرائمری خواننگ ءِ پورو کننگان پد او کوئٹہ نا ڈگری کالج آن تینا دوانزدہ 12 سالی آ تعلیم ءِ پورو کرے۔
ہائر سیکنڈری اسکولنگ نا ایسری آن پد بشیر زیب کوئٹہ نا پولی ٹیکنیک کالج اٹ داخلہ ہلک و مکینیکل انجینئرنگ ٹی ڈپلومہ کرے۔ اوکان گڈ زیب 2008 اٹی بلوچی ادب نا ماسٹرز پروگرام اٹی داخلہ ہلک۔ دا وخت اٹ او بلوچ اسٹوڈنٹس آرگنائزیشن آزات نا چیئرمین ہم مس۔ آجوئی خواہوک خوانندہ تنظیم بی ایس او آزات بلوچستان نا پاکستان آن جتائی کن چاہنداری تننگ ءِ۔ زیب 2006 آن 2012 اسکان بی ایس او آزات نا چیئرمین نا رد اٹ تینا خذمت آتے سر تس۔ دانا سوب، 2008 اٹی بلوچستان یونیورسٹی ٹی اونا بننگ آ پابندی خلنگ مس، و اوڑا یونیورسٹی ٹی کہی چھاپہ غاک خلنگ مسر۔ تاکہ یونیورسٹی آن اودے دزگیر کننگ مرے ولے زیب او تیوہ غا چھاپہ تیان رکھنگا۔
مارچ 2013 ٹی بی ایس او آزات نا زی آ تیوہ ڈیہہ اٹ رکھ خلنگا، ولے دا عمل ویل ءِ ایسر کننگ نا جہا، سلاء بندی نا اسہ پوسکنو لڑ اس ودی کرے انتئے کہ بی ایس او نا کہی راہشون، کارگشاد و باسک آک بلوچ سلاء بند تنظیم آتے ٹی اوار مننگ آن بیدس پین کسر خنتور۔
مثیل اس، بشیر زیب تینٹ ہم 2012 ٹی بی ایل اے نا باسک اس جوڑ مس۔ اوکان گڈ او تینا کہی سنگت آتے بی ایل اے نا کنڈا درے۔ قبائلی سردار و جاگیردار آتا راہشونی ٹی مروکا بی ایل اے اینو، نیامیکو تپہ نا مسکوہی بی ایس او آزات نا باسک آک، ڈاکٹر، انجینئر، و داڑ اسکان کہ اسہ مسکوہی پاکستانی فوج انا کارندہ ئسے نا سرکماشی ٹی فعال ءِ۔ پاکستانی فوج انا اسہ کپتان رحمٰن گل، بی ایل اے نا فدائی جلہوکار آتے تربیت ایتک، او مجید بریگیڈ نا راہشونی ءِ کننگ ءِ و زیب آن پد بی ایل اے نا کل آن پنی آ دروشم ءِ ۔
بی ایل اے ٹی اوار مننگ آن مُست، زیب بھاز آ وخت کوئٹہ ٹی پاکستان نا برخلاف لٹریچر تالان کننگ آ خننگاسس ہراکہ ورنا تے مڈی تیان سیر بلوچستان نا باروٹ چاہنداری تسکہ، ہرانا بابت او دلیل تسکہ کہ پاکستان نا غٹ آن بھلا و طاغتور آ صوبہ نا پنجاپی تا کنڈان لُٹ و پل مننگ ءِ۔ او بھلو سیاسی ریلی اڈ تسکہ، کالعدم تنظیم بی ایس او آزات کن پوسکنو باسک ارفنگ، و خوانندہ غا سنگت آتے پاکستانی ریاست نا برخلاف جہد کننگ کن اسٹ کریکہ۔
2010 اٹی، پاکستانی فوج بی ایس او آزات نا برخلاف اسہ بھلو کریک ڈاؤن اس بناء کرے، ہراٹی اونا کہی باسک آتے دزگیر کننگا و کھسفنگ مس۔ اوفتان کہی بندغاک underground ہننگ یا سلاء بند جہد اٹی اوار مننگ آ بیوس مسر۔ آپریشنل سیکورٹی ءِ برجا تخنگ کن بی ایس او آزات نا کاریم تے صحافی تیان مُر تخنگ مس، ہرانا متلب دا پیشتما کہ زیب اینو اسکان مخلوق ءِ ہبکہ کروک ءِ۔
تینا موکش اسلم بلوچ و بی ایل ایف نا بانی و سرکماش ڈاکٹر اللہ نظر نا وڑ زیب ہم بھرتی کننگ و چین و پاکستان ءِ تڑی تننگ کن راجی حوالکاری میڈیا ءِ فعالی رد اٹ کاریم اٹ ہتیک۔ ہرادان اونا پنی مننگ ئٹی ودکی مننگ ءِ۔ فروری ٹی شینک مروک اسہ وڈیو کلہو اسیٹی، مسکوہی خوانندہ راہشون “پاکستان نا برخلاف تُرند جنگ” ئسے نا پڑو کیک و بلوچ ورناتے بی ایل اے ٹی بننگ نا دعوت تس۔
او دعویٰ کرے کہ “اینو ننا مڈیک بہا مننگ ءُ” و “بدبختی آن کس اس بش مریسا بلوچ نمائندگی نا پن آ بشخ خوائک، در سد خوائک۔ گڑاس پارہ کہ ننے 25% ایتبو، گڑاس پارہ ننے 50% ایتبو۔ تاریخ اٹی ہراتم کہ فاتحین آک علاقہ ئسے کھٹارہ گڑا اوڑا کوزہ کرسا اونا لُٹ و پل ءِ بناء کریرہ، و اینو ہم ہندا گڑا مننگ ءِ، بس تنیا کوزہ گیر نا رنگ بدل ءِ۔”
زیب نا بی ایل اے نا راہشونی دا خلیس ءِ ودفینے کہ بروکا دے تیٹی بلوچ جنز گیشتر پرتشدد مننگ کیک۔ 2018 ٹی گروپ کمان ءِ سنبھالنگ آن پد، گروپ نا حکمت عملی تیٹی کہی بدلیک بسنو ہرافتا باروٹ پاکستانی کالخواہ تا دعویٰ ءِ کہ دانا تعلقداری اوغانستان نا ساڑی آ نیستی نا سوب آن ءِ۔ دا بدلی تیٹی زیب نا راہشونی ٹی پنچ فدائی جلہو ساڑی ءُ۔ پاکستان ءِ دا خلیس ءِ کہ دے کہی و انڈیا بلوچ باغی تے پراکسی نا رد اٹ کاریم اٹ ہتور تاکن بلوچستان اٹی بغاوت ءِ پین چِرک تننگ کیر و خطہ ٹی چینی سرمایہ کاری ءِ بند کننگ مرے۔ زیب تینا وڈیو کلہو آتا کمک اٹ پاکستان اٹی چینی تون مون تننگ کن بلوچ جہدکار آتے کمک کننگ کن امریکہ، یورپی یونین و انڈیا غا ہم زور شاغسا بسنے۔
گڈ سر:
بشیر زیب ، بلوچ جنز آجوئی ٹی اوار مروکا خوانندہ تپہ نا ورنا تا زنک آن ءِ۔ اندن کہ پاکستان بی ایل اے و ایلو بلوچ آجوئی پسند لشکر آتا برخلاف تینا کریک ڈاؤن ءِ برجا تخو، اوڑان ودیک بلوچستان اٹی امن نا چنکا ساہت آک ہی مننگ کرور۔ گیشتر دا کہ، سکیورٹی تون تفوک خیال آک بلوچ ورنا تیٹی خرّی ءِ ودیفسہ کرو و اوفک بی ایل اے نا وڑ انگا سلاء بند تنظیم آتا صف اٹی بریسہ کرور۔
بلوچستان نا ویل اتو مون تننگ کن اسلام آباد نا غیرسیاسی خیال آن بشیر زیب بلوچ چائنداری نا درشان ءِ کریسہ پین سواد ارفو و مننگ کیک کہ پوسکنو و ترند ءُ طریقہ ہم ارفنگ مرو ہراکہ بی ایل اے ءِ پین ہم سوگوی نا کنڈا درو ءِ۔
اندن گمان مریک کہ زیب ئنا سرکماشی ٹی بی ایل اے گیشتر متحرک مسنے۔ داسا پاکستان زیب ءِ خلنگ یا ہلنگ کن تینا تیوہ وسائل آتے کاریم اٹ ہتو۔ واہم، دا اُننگ دائسکان ارے کہ آیا بی ایل اے نا بڑز انگا راہشونی ءِ خلنگ آن پاکستان ءِ بھلو وخت اسیکن سواد رسینگک یا آخہ انتئے کہ بی ایل اے ہر بروکا نسل تون اوار پین سوگوْ خننگسہ ءِ ، اندن کہ اسلم بلوچ نا خوْن آن گڈ خننگا۔
زیب ئنا جند ہم زور شاغسا پارینے کہ او زندہ مرے یا آخہ ولے دا جنز مونا ہنو۔ اونا پاننگ ءِ کہ “نظریہ نا رد اٹ، فکر انا رد اٹ، حوصلہ نا رد اٹ، بلوچ ورنا تا ہچو کمبوتی اس اف۔”
یاتی: دا نوشت اولیکو وار جمیز ٹاون ئٹ شینک مسونے، ہرادے منتواری تون دی بلوچستان پوسٹ اردو ئٹ بدل کریسہ شینک کرے۔ دانا نوشتوک کیا بلوچ ءِ، او اسہ فری لانس حوالکار ئسے نا ردئٹ بلوچستان ئٹ چِک و تاڑ، سیاست، و بلوچ جنگول آتیا رپورٹنگ کیک۔ او @KiyaaBaloch آن ٹوئٹ کیک۔
