بلوچ اسٹوڈنٹس ایکشن کمیٹی نا بنجائی ترجمان تینا شینک کروک آ بیان ئٹی لیاری ادبی و سیاسی فیسٹیول نا ہڈ تننگ نا پڑو کریسہ پارے کہ 23 جنوری 2022 آ بلوچ اسٹوڈنٹس ایکشن کمیٹی نا پارہ غان  لیاری ٹی گرینڈ ادبی و سیاسی فیسٹیول ہڈ تننگو ہراٹی سیاست، ادب و کراچی نا ویل آتون اوار جتا سرحال تیا بلوچ دانشور، سیاسی جماعت آتا راہشون و طلبا تنظیم آتا اوغدیدار پینلسٹ نا دروشم اٹ اوار مرور داڑان بیدس فیسٹیول ٹی بلوچستان کتاب کاروان نا پن ئٹ  کتب مُچی ہم ہڈ تننگو و زیمل دیوان ہم ہڈ تننگو۔

او پارے کہ اسہ ہم چاگڑد ٹی دیمروی ٹی خوانندہ آتا اسہ عظیم کڑدار اس مسونے ہراڑے خوانندہ آک اسہ پوسکنو سوج و فکر نا شیف چاگڑد کن پوسکنو کسر پاش کرور گڑا ایلو پارہ غان چاگڑد ٹی پوسکنو دیمروی دوست ہیت و شرہ آتا بناء کریسہ اوفتے اشتماعی عمل نا پارہ آ پامدار کیرہ۔ بلوچ اسٹوڈنٹس ایکشن کمیٹی بلوچ خوانندہ آتا راہشونی کریسہ بلوچستان تون اوار بلوچ بھاز آ علاقہ آتیٹ برجاہ وڑ ئٹ جتا مجلس و فیسٹیول ہڈ تریسہ کرینو۔ اندنآ فیسٹیول و مجلس نا بنماسی مسخت خوانندہ آتون اوار چاگڑد نا ہر ذی شعور تپہ نا دیمروی دوست سوج ءِ مونی دریسہ اوفتیٹ سیاسی، ادبی و علمی شعور ءِ مونی دروئی ءِ تاکن ورنا تون اوار ہر تپہ آن تعلقدار بندغ اشتماعی عمل نا بشخ جوڑ مرے۔

اوفک پین پاریر کہ بلوچ اسٹوڈنٹس ایکشن کمیٹی نا پارہ غان تدوکا سال ئٹی کوئٹہ، حب چوکی و تونسہ شریف ٹی گرینڈ فیسٹیول ہڈ تننگا و اندا وڑ ءِ برجاہ تخیسہ لیاری ادبی و سیاسی فیسٹیول ہڈ تننگ نا پڑو کننگانے۔ دا فیسٹیول ٹی جتا سیاسی جماعت آتیان تعلق تخوک آ بلوچ سیاسی راہشون تے خوایفنگ ءُ ہرا بلوچ سیاست نا تاریخی اندا ندارہ و ساڑی سیاسی سرگڑدانی تون اوار کراچی نا سیاست آ ہیت آتا درشانی ءِ کرور۔

او پین پاریر کہ کتاب آک چاگڑد ٹی پوسکنو سوج اس مونی دننگ و مجلس تننگ ٹی خاص کڑدارایسر کیرا، بلوچ اسٹوڈنٹس ایکشن کمیٹی خوانندہ تنظیم آتا رد ئٹ یخین تخیک کہ بلوچ چاگڑد نا دیمروی و ترویج علم و شعور آن مننگ کیک بلوچ چاگڑد ٹی کتابی ماحول ءِ تالانی بشخنگ کن تنظیم نا پارہ غان بلوچستان کتاب کاروان نا پن آن بلوچستان نا کنڈ کنڈ ئٹی کتب میلہ ہڈ تننگو۔ اندا وڑ ءِ برجاہ تخیسہ لیاری ادبی و سیاسی فیسٹیول ٹی ہم بلوچستان کتاب کاروان نا بابت ئٹ اسہ کتب مُچی اس ہڈ تننگو ہراڑے جتا پبلشر تا کتاب تخنگو۔ داڑان بیدس بلوچ فنکار آتا  فن ئنا ترویج کن آرٹ ایگزیبشن تون اوار زیمل دیوان ہم ہڈ تننگو۔

بلوچستان نا علاقہ دکی و مچھ ئٹ سم کاری و روڈ شکست آتیٹ جتا تدینی تیٹ 2 بندغ مرگ نا گواچی اندن پنج چنا ٹپی مسونو۔

حوال تا رد ئٹ بلوچستان نا ضلع دکی ٹی ٹرائبل کول ایریا ٹی سلاء بند بندغ آک سم کاری کریسہ کولا کانڑ نا انجن ڈرائیور ءِ کسفیر و نرار۔ ایس ایچ او دکی انور جلالزئی نا رد ئٹ  تدوکا دے ٹرائبل کول مائنز نا ہد و ہویل ئٹ سلاء بند بندغ آک سم کاری کریسہ کانڑ نا انجن ڈرائیور اوغانستان آن تعلقدار راج ہوتک ملا عبدالرشید نا مار لوط الرحمان ءِ کسفیر و نرار۔

مرگ نا گواچی مروک انجن ڈرائیور نا جون سول ہسپتال دکی آ سر کننگا جون دو ٹی الینگ نا کاروائی آن گڈ خاہوت نا دوٹی تریسہ باوہ پیرہی آ وطن افغانستان آ رادہ کننگا۔

ویل ئنا برخلاف کولا کانڑ نا کانکن آک برانزی وڑ ئٹ کاریم ءِ بند کریسہ ڈودار آتے دزگیر کننگ نا خواست کریر۔ ایس ایچ او نا رد ئٹ ویل دزی نا تدینی اس لگیک۔ اندن پولیس نادرست ڈودار آتا بر خلاف ٹھیکیدار عبدالمجید نا خواست آ مقدمہ نوشت کریسہ پٹ و پول ءِ بناء کرینے۔

اندن پین حوال ئسے نا رد ئٹ  لونی آباد نا خڑک سلاء بند بندغ آک ٹرک آ سم کاری کریسہ ٹائر تے ترخفیر و نرار۔ پولیس نا رد ئٹ امو ٹرک دکی پنجاب کن کولا لوڈ کریسہ دننگ اس کہ سلاء بند بندغ اوڑا سم کاری کریسہ ٹائر ءِ ترخفیر اندن سم لگینگ نا سوب آن ٹرک نا آئل ٹینکی ہم نسخان مس پولیس ویل ئنا مقدمہ نوشت کریسہ ڈودار تا پٹ و پل ء بناء کرے۔

اندن پین حوال ئسے نا رد ئٹ مچھ ئٹ ٹرک و رکشہ نا ڈک لگنگ آن اسہ بندغ اس مرگ نا گواچی و اسہ ارا نا پنچ چنا بھاز ٹپی مسر، ٹپی مروکا چناک سول اسپتال مچھ ئٹ بنائی دوا درمان آن گڈ پین دوا درمان کن کوئٹہ غا دننگار۔

اندن پولیس نا رد ئٹ مچھ پل آن خڑک بولان نا بھلا روڈ آ کوئٹہ آن سبی کن ہنوکا رکشہ و مون آن بروکا ٹرک اسٹ ایلو تون ڈک لگار ہرانا سوب آن رکشہ ئٹ سوار  کوئٹہ نا ہندی  نظر محمد نا مار سعد اللہ جاگہ غا مرگ نا گواچی مس و پنچ چنا ٹپی مسر۔

گیشتر حوال تا رد ئٹ ٹپی چنا تیٹ محمد عارف خان، شاہد خان، شاہ زیب خان، ادریس خان اوار ء اندن کہوک و ٹپی آ چنا تا تعلقداری اسہ ارا آن پاریسہ ءِ، ٹپی مروکا چناک مچھ اسپتال ئٹ بنائی دوا درمان آن گڈ پین دوا درمان کن کوئٹہ غا دننگار، اندن جون المی کاروائی آن گڈ خاہوت نا دو ٹی تننگا۔

کوئٹہ ٹی ورنا ڈاکٹر آک ریڈ زون ہننگ نا کوشست کریر ہراڑا پولیس اوفتے لٹ کٹ کرے و 20 ڈاکٹر آتے دزگیر کرے اندن 6 پولیسں کارندہ ہم ٹپی مسر۔ ورنا ڈاکٹر آک اینو خواست آتا حق ئٹی ریڈ زون ٹی وزیراعلیٰ ہاؤس نا مونا برانز نا پڑو کریسر۔

ورنا ڈاکٹر آک خواست آتا حق ئٹی تدوکا یک و نیم تو آن زیات وخت آن ہڑتال و برانز ئٹی ءُ، ورنا ڈاکٹر تا سنڈیمن اسپتال آن انسکمب روڈ آ دپ درشانی ٹی ورنا ڈاکٹر تیان بیدس پیرا میڈیکل اسٹاف و نرس آک ہم اوار ئسر، ورنا ڈاکٹر تا ریلی نا وخت آ پولیسں نا بھلو کچ اس ہند ءِ ہلوک اس اندن ریڈزون آ ہننک آ کسر پتی ءُ تار خلیسہ بند کننگاسس۔

ترجمان وائی ڈی اے نا رد ئٹ  پولیسں نا بے دادی آن 10 آن زیات ورنا ڈاکٹر و پیرامیڈیکل باسک آک ٹپی مسونو، کوئٹہ نا سرکاری اسپتال آتیٹ ورنا ڈاکٹر تا ہڑتال نا سوب آن ان ڈور سروسز و اوپی ڈبیز بند ءُ ورنا  ڈاکٹر تا ہڑتال نا سوب آن ناجوڑ آک پریشانی تا گواچی مننگ ءُ۔

ناجوڑ تا پاننگ ءِ کہ صوبائی حکومت و محکمہ جانجوڑی ورنا ڈاکٹر تا ہڑتال آ بے پامی و بے وسی نا گواچی ءِ، اوفک لس مخلوق نا اسہ ہم ویل ئسے نا سوج اف، او خواست کرینو کہ حکومت ورنا ڈاکٹر تا ہڑتال نا نوٹس الیسہ  اودے دمدستی وڑ ئٹ ایسر کرفے تاکن لس مخلوق ءِ آسراتی رسینگہ۔

پشاور نا علاقہ تہکال ٹی اُرا نا متکنا چت ئنا تمنگ آن پنچ نیاڑی کسکر و اِرا چنا ٹپی مسر۔

کمکی ٹیم آتا پاننگ ءِ کہ دا تدینی انقلاب کالونی نا علاقہ تہلکال ٹی مسونے، ہراڑے اُرا نا چت پر آن پد متکن مسوسس و سہہ شنبے نا نن ناگمان آن چت و دیوال اُرا ٹی ہندی ٘مخلوق نا زی آ تمار۔ تدینی ٹی اُرا ٹی ساڑی پنچ نیاڑی کسکر و اِرا چنا ٹپی مسر۔

پولیس نا پاننگ ءِ کہ اُرا ٹی ہندی بندغ آک اوغان باہوٹی ئسر، ہرافتا جوْن آتے بنائی کارروائی کن خیبر ٹیچنگ اسپتال آ درینو، ہراکان اوفتے اوغانستان نا شار جلال آباد آ درو۔ کہوک آتیٹ لمہ و مسڑ اوار ءُ۔

سہہ شنبے نا دے امریکہ اوغانسان کن بندغی ہمدڑدی ٹی 30 کروڑ 80 لکھ ڈالر کمک تننگ نا پڑو کرینے۔ ایلو نیمہ غا اقوام متحدہ ہم باسک ملک آتیان پنچ ارب ڈالر نا کمک نا خواست کرینے ہرا کہ اینو اسکان اسہ ملک اسیکن کروکو کل آن بھلو خواست ئسے۔

امریکہ نا کنڈ آن پڑو اندنو وخت ئسے آ کننگانے ہرا وخت اقوام متحدہ اوغانستان نا خلقت کن ریکارڈ خواست کننگ ءِ و خبردار کننگ ءِ کہ ملک ئنا نیم آباتی شابیت پڑ آ خوراک نا نیستی و لنگڑی تون مون تننگے۔

امریکہ نا سلامتی کونسل نا ترجمان ایملی ہورن اسہ بیان اسیٹی پارے کہ اوغانستان کن پڑو کروک کمک مون پہ مون یو ایس ایجنسی فار انٹرنیشنل ڈیویلپمنٹ آن بندغی کمک نا غیر سرکاری تنظیم آتے رسینگو۔

یو ایس ایڈ ہم سہہ شنبے نا دے تینا بیان ئٹ پارے کہ اوغانستان کن کمکی زر خوراک و ایلو غذائی مڈی، جانجوڑی بنجا نا کمک و جانجوڑی نا موبائل آسراتی تا زی آ خڑچ کننگو، و دا ہیت یخینی جوڑ کننگو کہ کمک کروک بندغ آک و سرکننگ سخت انگا علاقہ غاتے رسینگے۔ داڑان بیدس دا کمک ہمو پروگرام آتیا خڑچ کننگو ہرافتا رد ئٹ بندغ آتے یخ آن بچنگ کن شیلٹر کٹ، ہیٹر، کمبل و باسن ءُ پچ رسینگنگ ءِ۔

یو ایس ایڈ نا پاننگ ءِ کہ امریکہ افغانستان نا خلقت نا کمک کن پر عزم ءِ۔ وا ہم دا کمک نا موثر مننگ کن المی ءِ کہ غٹ کاریم کروک بالخصوص کارم کروکا نیاڑی تے آزاتی ئٹ و رکھوک وڑئٹ کارم کننگ نا موْکل رسینگے و اوفتے دا قابل مروئی ءِ کہ او نیاڑی و مسن تے آسراتی ئٹ رسینگر۔

اقوام متحدہ نا سلامتی کونسل دسمبر نا ایسر ئٹ اسہ قرارداد اس منظور کریسس ہراٹی بھاز وڑ ئنا بندغہ کمک آتے امریکہ نا کنڈ آن طالبان نا بھازا شخصیت آتے پابندی تے آن جتا کننگا۔ دا قرارداد نا مسخت اوغان عوام ءِ اندن کمک تننگ ءِ کہ اوڑان طالبان ءِ ہم فائدہ رسینگپ۔

پنی آ شاعرہ و بندغی حق آتا باسک مایا اینجلو اولی سیاہ فام نیاڑی ءِ ہرا نا پن ئٹ یاتگاری سکہ امریکی حکومت شینک کرینے۔

خبر تروک ادارہ اے ایف پی نا پاننگ ءِ کہ امریکی محکمہ خزانہ دوشنبے نا دے پوسکنو سکہ اس شینک کرینے ہراڑا مایا اینجلو نا دروشم کندہ کروک ءِ۔

داڑ آن بیدس درزن آ کتاب آتا نوشتکار مایا اینجلو اولیکو شخصیت ءِ ہرانا پن ئنا سکہ جنوری 2021 ٹی منظور مروکا قانود نا رد ئٹ شینک کننگانے۔ دا قانود نا رِدئٹ تیوہ غا پِنی آ امریکئی نیاڑی تا پن ئنا یاتگاری سکہ شینک کننگو۔

امریکئی محکمہ خزانہ نا بیورو آف منٹ نا رِدئٹ 25 سینٹ نا سکہ غا پنی آ امریکئی شاعرہ نا دروشم کندہ کننگانے و سکہ غاتا اولیکو لوڈ راہی کننگانے۔

بیورو آف منٹ نا نائب ڈائریکٹر وینٹرس گبسن نا پاننگ ءِ کہ امریکہ نا تاریخ ٹی قابل ذکر کڑدار ایسر تروکا نیاڑی تا شرف ٹی سکہ شینک کننگ آ اودے فخر ءِ۔

’امیریکن وومن کوارٹر پروگرام‘ نا رِدئٹ بیورو آف منٹ سال 2022 آن 2025 نا نیام ئٹ ہر سال پنچ جتا امریکئی نیاڑی نا پن ئنا یاتگاری سکہ شینک کرو ہرا راج اکن گچین کڑدار ایسری تسونو۔

امریکئی سیکریٹری خزانہ جینٹ ییلن نا پاننگ ءِ کہ اودے فخر ءِ کہ دا سکہ غاک امریکہ نا کل آن لائخ آ نیاڑی تا خذمت آتے اریسہ اوفتا شرف ٹی شینک کننگانو۔

مایا اینجلو سال 1928 ٹی ریاست میسوری ٹی ودی مسوسس۔ او شاری حق آتا تحریک ٹی مارٹن لوتھر کنگ و میلکم ایکس تون اوار گچین کڑدار ایسر تسوسس۔

مسکوئی صدر بل کلنٹن نا سوغندی دود نا مجلس نا وختا نظم خوانوکا مایا اینجلو نا کذیت سال 2014 ٹی مس۔

کراچی پریس کلب نا مونا ہڈ تروک وائس فار بلوچ مسنگ پرسنز نا کیمپ ءِ اینو سئے شمبے نا دے 11 جنوری آ 4555 دے پورو مس، است ہسونی نا درشانی کروک آتیٹ بلوچ یکجتی کیمٹی کراچی نا کنوینئر بانک آمنہ بلوچ، ماہ گنج بلوچ، صابرہ بلوچ و ایلوفک اوار ئسر۔

وی بی ایم پی نا وائس چیئرمین ماما قدیر بلوچ وفد تون مخاطب مریسہ پارے کہ 2000 آن ہلیس اینو اسکان جہد برجاہ ءِ ہرا ٹی زالبول تا بھاز بھلو ندری ارے اوفتا ندری تا دا لڑ اینو ہم برجاء ءِ، دا وخت پرامن جہد اسہ اندن ءُ  ہند ئسے آ مخالف آتون اوار تضاد و پروشت ودی کننگ نا کوشست تون اوار دژمن نا پارہ غان بھاز آزمائش تون برجاہ ءِ، خاص وڑ ئٹ مذہبی و قبائلی عناصر آک پرامن جہد نا بر خلاف کننگ ءُ۔ اوار پاکستان تیوہ جنگی اصول آتے پامال کریسہ اینو لس آباتی تیا بمباری چنا و زالبول تے شہید کننگ تون اوار زورٹ بیگواہ کریسہ گم کیک ہرافتا رد ئٹ اسٹ ءِ ہم سما اف کہ ہراڑے و ہرا حالیت ٹی ءُ، نن اسہ  وحشی دژمن اسیتون مون پہ مون اُن ہرا بندغی اقدار نا ہد ءِ گدریفینے۔

او پارے کہ  بلوچ چنا تا زورٹ برمتہ کننگ ہڑدے ئی جوڑ مسونے اندن کہ الجرائر ٹی سامراج فرانس و بنگلہ دیش ٹی اندن پاکستان نا داستان آک  پنی ءُ دژمن جائل متکنا بے فائدہ غا بست و بند ودی کریسہ نن تون زوراکی کریسہ  تینا  حاکمیت ءِ برجاہ تخنگ نا ہر کوشست کننگ ءِ، حاکم سرپد مریک کہ نن بیرہ  بے دادی سگنگ کینا ولے اینو بلوج راج  ثابت کرے کہ او پرامن جہد نا علم و شعور تون اوار کننگ کیک۔  پرامن جہد ٹی زالبول نا خاص  کڑدار مریک  اندا وڑ بلوچ راجی پرامن جہد ٹی بھلو کچ اسیٹ بلوچ زالبول آتا اواری بشخ الینگ ہم  تاریخ تا پنہ آتیٹ نوشت مننگ ءِ۔

جماعت اسلامی نا صوبائی جنرل سیکرٹری و “بلوچستان ءِ حق ایتبو تحریک” نا راہشون مولانا ہدایت الرحمٰن بلوچ پارینے کہ گوادر آن گڈ داسہ خضدار ٹی تحریک بناء کرون۔ ننا تحریک نا سوب آن بلوچستان ٹی مسہ سد چیک پوسٹ ایسر کننگار، 10لکھ آن زیات بندغ کوئٹہ ٹی مچ کرون، ہراڑے ننا اولیکو  خواست دا مرو کہ ایف سی ءِ بلوچستان آن کشر، دا بندغ آک بلوچستان نا بندغ آتون بے شرفی کننگ ءُ، نہ بیرہ داڑا بس کرینو بلکن اوفک حیات بلوچ و بی بی زینب ءِ شہید کرینو، و واپس پاریر کہ ردی مسونے ۔

او مُستی پارے کہ فورسز نا مونا بلوچستان نا ہشت سال ئنا چنا ہم  دہشت گرد ئسے انتیکہ بلوچستان نا ہشت سال ئنا چنا ءِ دہشت گرد  پاریسہ فورس شہید کرے، غریب صوبہ نا بیرہ سال ئنا ہفتاد ارب رپئی بیرہ ایف سی آ خڑچ کننگک و داڑے بندغ آک بین آن کہنگ ءُ، گیس  بلوچستان آن پیشن مریسہ ہزار آ کلومیٹر مر اسکان تننگک ولے بلوچستان قدرتی گیسں آن بے بشخ ءِ، گیس خیسن و چاندی نا مچ کروک صوبہ بے بشخی نا گواچی ءِ ہرا صوبہ ٹی سیندک، ریکوڈک، ساحل و سی پیک مرے اونا بندغ آتا نت تیٹ پازوار اس مف  اگہ دا بے دادی اف گڑا انت ئسے۔

اونا پین پاننگ اس کہ یونیورسٹی و اسپتال آتا جاگہ آ بلوچستان ءِ چیک پوسٹ تننگانے، ریمنڈ ڈیوس و کلبھوشن ءِ تو داڑے شرف تننگانے ولے بلوچستان والا تے شرف تننگ افس، نن شرف خونہ ننے کم آن کم تینا ڈیہہ  آ شرف اٹ زند کننگ نا حق تیر، خضدار نا اسپتال آتیٹ  پیناڈول اسکان ریسنگپک ولے خضدار ٹی نشہ اڑزانی اٹ رسینگک، کننگ نا دیر اف ولے  شراب اڑزانی اٹ رسینگک۔

مولانا پارے کہ دانا مطلب دادے  کہ سرپدی وڑ ئٹ بلوچستان تون بد سلوک کننگ ءُ ننے دا بےدادی نا بر خلاف پیشتموئی مرو داڑکن تیوہ  خضدار تیار مرے دا ہیت آتا درشانی ءِ او جماعت اسلامی خضدار نا پارہ غان ہڈتروک جلسہ آن ہیت کریسہ پارے۔

یونائیٹڈ ایجوکیشنل الائنس لورالائی نا سینئر نائب صدر محمد انور ناصر پارے کہ ضلع لورالائی ٹی تعلیم ٹی بے ضابطگی، کرپشن نا زوت نوٹس ہلنگے اگہ دن متو فروری ٹی یونائیٹڈ ایجوکیشنل الائنس نا اجلاس خواہفون و مونی نا لائحہ عمل نا پڑو کرون۔

دا خیال آتا درشانی اوفک یونائیٹڈ ایجوکیشنل الائنس لورالائی نا صدر جمال الدین کدیزئی، یونائیٹڈ ایجوکیشنل الائنس لورالائی نا جنرل سیکرٹری محمد اکرم تون اوار ایلو ہمراک دو شنبے نا دے کوئٹہ پریس کلب ٹی پریس کانفرنس کریسہ کریر۔

اوفک پاریر کہ لورالائی ٹی زیات تر ہائی اسکول تیٹ جونیئر ٹیچر آتے تعلیمی ادارہ آتا سربراہ جوڑ کننگانے و بھاز آ ادارہ آک داسکا ہم سربراہ تے آن محروم ءُ، ہنوکا سال لورالائی ٹی ٹیچنگ، نان ٹیچنگ سٹاف نا ٹیسٹ و انٹرویوک مسر، نان ٹیچنگ تے کن باقاعدہ اسہ کمیٹی اس جوڑ کننگاسس ہرانا چیئرمین ڈپٹی کمشنر، ممبران ٹی ڈسٹرکٹ ایجوکیشن آفیسر، ڈسٹرکٹ اکاؤنٹس آفیسر اوار ئسر۔ اڈ تروک کمیٹی و اوفتا کمک کار آک میرٹ نا جاگہ غا درجہ چہار و جونیئر کلرک آتا امیت وار آتے لکھ آتا، کروڑآتا پیسہ رشوت ہلیسہ قانود آن چپ اوفتے تخنگا و امیت وار و میرٹ ءِ اسہ وڑ نظر انداز کریر۔ ڈسٹرکٹ ایجو کیشن آفیسر لورالائی، سینئر ڈسٹرکٹ اکاؤنٹس آفیسر و اوفتا کمک آک ہرا 15 بندغ آتے تعینات کرینو اوفتا ثبوت ننتو ارے۔

او پاریر کہ ہنوکا شش تو ٹی چیف جسٹس سپریم کورٹ، چیف جسٹس بلوچستان ہائی کورٹ، چیئرمین نیب، ڈائریکٹر جنرل نیب، گورنر بلوچستان، وزیر اعلیٰ بلوچستان تون اوار ایلو اعلیٰ کوالخواک وار وار درخواست و شکائست رادہ کریسہ کرینو ولے بد بختی ءِ کہ کسس ہم ہچو پٹ پول کتنے بلکہ ننا خواست و شکائست آتے بے کار کاغذ تیانبار خسنگانے۔

او خواست کریر کہ ضلع لورالائی ٹی محکمہ تعلیم ٹی بے ضابطگی، کرپشن و میرٹ نا پامالی نا نوٹس ہلنگے نہ تو فروری ٹی اجلاس خواہفون و مونی نا لائحہ عمل ءِ ٹہیفون۔