آزمانک
عید و ماہ گُل
نوشت: ارسلان بلوچ
دی بلوچستان پوسٹ
میرین و مقصود موسیٰ کالونی نا مونا ویگن اسٹاپ آ سلوک مستونگ آن بروکا تینا سنگت میر علی نا ودار ئسُر۔ انداڑے خضدار آن بروکو اسہ ویگن اس اوفتا مونا بریک کرے و کلینڈر ویگن لاری نا ڈکی و بلا در ءِ ملِسہ کوک ئٹ سواری تے پارسہ اس “چلو دڑنگبو ایسری اسٹاپ اندادے”۔
سواریک مَدان مَدان آ لاری آن دڑنگسہ ئسر، دیخس پد میرین و مقصود نا نظر لاری آن دڑنگوکو اِرا مسڑکو آ تما ہرافتا سن 17 سال و مُسہ سال ئس۔ میرین و مقصود مُسہ سالی آ ماہ گُل و 17 سالی آ سائرہ نا دو ٹی بیگواہ رشید و آصف نا فوٹو تے خنسہ سرپد مسُر کہ دا گودی تا تعلقداری زوراکی ئٹ بے گواہ مروکا بلوچ آتا خاہوت آن ءِ و دا عئید ئنا دے آ برانز کن شال آ بسُنو۔ ماہ گُل چُنک سنی نا سوب آن لاری آن شیف دڑنگ کتوکہ، میرین ماہ گُل نا دوٹی الک و اودے لاری آن شیف دڑفے۔ ایلو پارہ غان مقصود سائرہ نا پُر دڑڈ، نم و خیسن آ خنتے خنسہ کُڑمبو دڑڈ ئسے ٹی ڈُب الک، اندا ظالم تا دو آن شش سال مُست مقصود نا باوہ بیگواہ و پدا شہید کنگاسس، اندا سوب آن مقصود سائرہ و ماہ گل نا دڑد ءِ ترندی ئٹ مارنگ ئس۔
میرین ماہ گُل نا دو ءِ تینا دوٹی شاغا و ماہ گل آن سوج کرے۔ “ماہ گُل نا دوٹی دا دِنا فوٹوکو؟”
ماہ گُل میرین نا سوج ءِ بنسہ گوڑینگتو انتئے کہ مخلوق ماہ گُل آن ساندہ اندا سوج ءِ کریکہ و پدا ماہ گُل تینا خنتے خوارِفسہ میرین ءِ ورندی تس۔ “دا کنا ابو و ہِلہ نا فوٹو ءُ”۔
ماہ گُل نا دڑد آن پُر انگا توار میرین نا جون ئٹی لپڑزہ ئس ودی کرے و او پین ہچ ہیت کننگ کتو بیرہ ماہ گُل آن اندا سوج کرے۔ “نا ابو و ہلہ ہرادو؟”
ماہ گُل خڑینگ آن پُر انگا خن تے تینا خوارفسہ پارے۔
“کنا ابو ئسک بیگواہ ءُ ظالم تا جیل ئٹ قیذ و بند ءُ”
ماہ گُل نا اوغسہ ہیت کننگ میرین نا خنتے نم کرے،
دا وار میرین نا جاہ مقصود ماہ گل نا کاٹم آ دوتے تینا تخسہ سوج کرے۔ “ماہ گُل گُڑا داسا نی ہرانگ ہننگ اُس؟”
ماہ گُل خڑینگ آن پُر انگا خنتے پِر پِٹیفسہ پارے۔ “نن پریس کلب آ کانہ و تینا ابو و ہلہ نا رکھوک یلہ مننگ کن برانز کینہ”۔
مقصود تینا آستونک ءِ خنتا تینا خوشسہ ماہ گُل آن پدا سوج کرے کہ “ماہ گُل پلمے عئید ءِ مخلوق خوشی کیک، پوسکُنو پُچ بینک، پوسکُنو لتّر بینک، سیل و چکر کن کاہک نی برانز انتئے کیسہ؟”
مقصود نا دا سوج ءِ بنسہ ماہ گُل نا خنتا خڑینک آک ڈغار آ ٹُپنگ ءِ بناء کریر و ماہ گُل میرین نا پارہ غان سرغ ءِ تینا ہڑسِسہ پارے “باوہ و ہلہ نا بے گواہی آن گُڈ ننا عئید آک مُدام پریس کلب و برانز آتے ٹی تدینگ ءُ”
مقصود نا خڑینک آک سلینگ نا پن ءِ النگ الور و اونا سوج آک برجاء ئسر اسہ وار پدا سوج کرے، “ماہ گُل نا سن بھاز چُنک ءِ نے تینا ہُراٹی مروئی ئس خلقت نا ایلو چُنا تا وڑ نے ہم عئید کروئی ئس نا انت خواست برانز و پریس کلب نا؟”
مقصود نا دا سوچ آن اندن پا ماہ گُل نا خنتان خڑینک نا جل ئس وہا اونا وہوکا خڑینک آک انداخس زیات مسُر داسا او تینا خنتے گُد ئنا تینا پلو ئٹ سفا کرے و اوغسہ مقصود ءِ پارے۔ “نن ہمو تم اسکان عئید کروفن ہرا تم اسکان ننا باوہ و ہلہ آجوہ مروفس، نن امر اوفتان بیدس عئید کین؟ او زندان ئٹ بیدادی سہینگ ءُ نن خوشی کین؟ کنا ابو برو کنکن پوسکُنو گڑا اتو، نن اوار عئید کرون اوار خوشی کرون”
مقصود ماہ گُل نا خنتا پڑی تے رومال ئسے ٹی صفا کرے و ماہ گُل ءِ نوارنگ ئس، مقصود نا اُست پین سوج، سوج کننگ خواہسکہ ولے سائرہ ماہ گُل ءِ ہکل کرے پارے بر کان، ماہ گُل تینا دو تے مقصود نا دو تیان کشا و مقصود ءِ پارے نن داسا برانز کن کانہ، و ماہ گل سائرہ نا ہند آ اِنا دیخس پد سائرہ و ماہ گُل رکشہ سے ٹی توسر پریس کلب نا پارہ غا روان مسُر۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
