حوال تا رد ئٹ کوئٹہ ٹی ریڈزون ءِ واپس لس مخلوق نا ان و بر کن بند کریر مخلوق است کٹئ مسونے۔
یاتی مرے کہ سروزیر بلوچستان میر عبدالقدوس بزنجو و گورنر بلوچستان سید ظهور آغا تدوکا ہفتہ کوئٹہ ریڈزون ءِ لس مخلوق کن ملار۔
و اوار دا پڑو ءِ کریسر کہ اگہ ننا تیان خیال ءِ کننگ کتون گڑا مخلوق نا خیال ءِ ہرا وڑ ئٹ کرون۔ اسہ ہفتہ گدرینگ آن گڈ ریڈزون نا اسہ وار واپس گیٹ ءِ بند کریسہ مخلوق نا امیت آتیا دیر شاغار۔
حوال تا رد ئٹ نوشکی ایف سی ہیڈ کوارٹر آ جہلو آن گڈ نوشکی ٹی پنچمیکو دے ہم موبائل نیٹ ورکس و انٹرنیٹ سٹم بند مننگ نا سوب آن صحافیک ،لس مخلوق ، کاروبار کروک آک و موبائل صارفین آک بھاز سختی تا گواچی ءُ۔
گیشتر حوال تا رد ئٹ نوشکی ٹی پنچمیکو دے ہم جہان تون حوال کننگ بند ءِ اندن ایلو پارہ غان سیکورٹی فورسز نا جتا جاگہ آتیا چیکنگ نا لڑ برجاہ ءِ۔
یاتی مرے 2 فروری آ بلوچ آجوئی دوست سلاء بند تنظیم بلوچ لبریشن آرمی مجید بریگیڈ نوشکی ایف سی ہیڈ کوارٹر آ جہلو کرے ہراڑان گڈ موبائل نیٹ ورکس و انٹر نیٹ سسٹم بند کننگا اینو پنچمیکو دے فحال کننگتنے۔
سر آتا اسہ پین عہد اس ایسر مس، بالی وڈ گلوکارہ لتا منگیشکر 92 سال ئنا سن ٹی کذیت کرے، کورونا اونا مرگ نا سوب جوڑ مس۔ تیوہ آ جہان ٹی کروڑ آک دوست تخوک آک سوگ ئٹی ڈوبینگار۔
بھارتی میڈیا نا رد ئٹ 92 سال ئنا گلوکارہ کورونا وائرس نا گواچی مننگ نا سوب آن 9 جنوری آ ممبئی نا بریچ کینڈی ہسپتال ٹی تورنگا ہراڑے او بھاز خیال کروک یونٹ اسٹ دارو درمان مننگ اس۔ ڈاکٹر آک اونا دراخی کن بھاز کوشست کریر ولے او جانجوڑ مننگ کتو و دا کوڑی ءِ یلہ کرے۔
لتا منگیشکر جتا بولی تیٹ 30 ہزار آن زیات باگل پارینے، اودے سر آتا ملکہ ہم پاریرا۔ لتا منگیشکر 1942 ٹی 13 سال نا سن ٹی کیریئر نا بناء ءِ کرے، 1948 ٹی فلم مجبور نا شئر ”دل میرا توڑا” آن پن کٹا۔ 1949 ٹی شیر “آئے گا آنے والا” آن پن کٹینگ نا بڑزی تیا سر مس۔ 2004 ٹی فلم “ویرزارا” کن تینا ایسری البم ریکارڈ کرفے اندن 30 مارچ 2021 آ کیریئر نا ایسری شئر “سوگند مجھے اس مٹی کی” ریلیز مس۔ تدوکا سال تیوہ آتیان بھلا بھارتی سویلین اعزاز بھارت رتنہ تننگار، اودے فلمی ایوارڈ دادا صاحب پھالکے ہم تننگا۔
بلوچستان نا ضلع نوشکے آن پاکستانی لشکر ارا بندغ ءِ دزگیر کننگ آن گُڈ بیگواہ کرینے۔
ہڑتوم آ بندغ آک نوشکے نا کلی جمالدینی آن دزگیر کننگار ہڑتوم آ ورنا تا چاہنداری عاصم و وحید نا پن آن مسونے۔
یاتی مرے کہ نوشکے ٹی تدوکا مسہ دے آن حوالکاری آسراتیک بند ءُ ایلو حوال آتے دوئی کننگ ئٹ سختی تون مون تروئی تمنگ ءِ۔
بلوچستان نا بنجائی شار کوئٹہ ٹی زاری گیس نا پر مننگ آن کولا کانڑ ئٹ تراک نا سوب آن پنچ کانکن بیران و مسٹ ٹپی مسونو۔
پولیس نا رد ئٹ دا ویل نجی کولا کانڑ ئٹ شام ئنا مونا بس ہراڑے زاری آ گیس نا پر مننگ نا سوب آن تراک مس اندن اِرا کانکن ء رکھ آتون بچفیر۔
بیران مروکا کانکن تا جون و ٹپیک اسپتال آ دننگار ہراڑے جون آک المی کاروائی آن گڈ خاہوت آتا دو ٹی تننگار۔
حوال تا رِد ئٹ بلوچستان نا سیمی آ ضلع چمن ٹی روغانی روڈ لیول کراس آ لیویز چیک پوسٹ آ بمب تراک، 2 لیویز کارندہ تون اوار 6 بندغ ٹپی مسونو۔
گیشتر حوال تا رد ئٹ جمعہ نا دے آ چمن ٹی روغانی روڈلیول کراس لیویز چیک پوسٹ آ نادرست بندغ آک چغلی بمب ئٹ جہلو کریر، دا تراک ئٹ 2 لیویز کارندہ و 4 ہندی بندغ آتون اوار 6 بندغ ٹپی مسونو۔
ٹپی آک دمدستی وڑ ئٹ چمن ہسپتال آ دننگار، حوال رسینگتون سیکورٹی فورسز علاقہ ءِ داپار ایپار آن ہلیسہ تراک کروک آتا پٹ و پول ءِ بناء کرینے۔
حوال تا رِد ئٹ تراک کروک آک لیویز چوکی ءِ ٹک کرینو ٹپی لیویز آن لائن پارے کہ نن لیویز چوکی ٹی تولوک ئسون کہ دہشت گرد آک ننے آ چغلی بمب ئٹ جہلو کریر او پارے کہ کنتون اوار مسہ بندغ پین کہ اسہ خاہوت آن اُن اندن دہشت گرد آک پنج آن شش ئسر۔
حوال تا رد ئٹ نوشکی ٹی تدوکا دے این سی ہیڈ کوارٹر آ جہلو آن گڈ نوشکی ٹی خلیس نا سوب آن اینو تیوہ آ تعلیمی ادارہ آک موبائل نیٹ ورکس بند کننگانو اندن انجمن ناجران نوشکی نا خواست آ دکاندار آک تینا دکان تے بند کرینو۔
گیشتر حوال تا رد ئٹ تیوہ آ شار ویران ء تدوکا شام بمب تراک نا سوب آن سول ہسپتال نوشکی بھاز زیمی مننگ آن گڈ سول اسپتال نوشکی ء ہم ساعت اسیکن دارو درمان کننگ کن بند کننگا ہراڑان گڈ ناجوڑ و اوفتا خاہوت آک بھاز سختی تا گواچی ء۔
یاتی مرے تدوکا شام پنجگور و نوشکی ئٹ پاکستان ایف سی ہیڈ کواٹر تیا جہلو مس ہرا ٹی پاکستان فورسز نا بھاز آ کارندہ آک مرگ نا گواچی مسر جہلو تا ذمہ واری ء بلوچ لبریشن آرمی نا ترجمان جیئند بلوچ ارفے یاتی مرے داکن مست ہم بلوچستان ٹی پاکستان فورسز آ بلوچ لبریشن آرمی مجید بریگیڈ جہلو کریسہ کرینے۔
ڈیرہ بگٹی ٹی سلاء بند بندغ آتا نیام ئٹی جھڑپ ٹی سرکاری ہم کوپہ ٹولی آن تعلق تخوک اسہ کارندہ اس مرگ نا گواچی اندن 2 ٹپی مسونو۔
گیشتر حوال تا رد ئٹ جیڑہ ڈیرہ بگٹی ٹی ڈل ٹوبانی نا ہند آ مسونے، ٹپیک و مرگ نا گواچی مروک آتا تعلق نوسانی بلوچانزئی پاننگ ءِ۔ یاتی مرے کہ زوت منہ دے ئنا سے ڈیرہ بگٹی ٹی پن کروک ٹولی تیا جہلو ٹی ترند خننگیک۔
اندن تدوکا دے تیٹ بمب جہلو آتیٹ چار بندغ مرگ نا گواچی و پنج ٹپی مسوسر، داسکان تدوکا دے تا و اینو مروک جہلو آتا ذمہ واری ءِ داسکان کس ارفتنے۔
حوال تا رد ئٹ فیصل آباد تون اوار تیوہ آ پاکستان ئٹ سی و آئل نا نرخ آتیٹ ودکی نا لڑ برجاہ، اسہ ہفتہ نا نیام ئٹی اولیکو کچ آ سی و آئل نا نرخ آتیٹ 20 آن 30 و ہرٹمیکو کچ آ کنوک آ آئل و سی 40 رپئی اسکان کبین مسونے۔
کبینی نا سوب آن نیامی و غریب تپہ نا بندغ آتے بیوس کرے، کوننگ نا آئل و سی جوڑ کروک کمپنی نیایک اسہ ہفتہ نا نیام ئٹی 30 آن 40 رپئی اسکان نرخ آتیٹ ودکی کرے اولیکو کچ آ سی 30 رپئی ودیسہ 390 و آئل 20رپئی ودیسہ 410 رپئی اسہ لیٹر اسکان سر مسر اندن ہرٹمیکو کچ آ سی و آئل نا نرخ آتیٹ ہم 40 رپئی اسکان ودکی مس۔
اندن ارٹمیکو کچ آ آئل 390 ، سی 375 رپئی اسہ کلوگرام اسکان سرمسونے، زالبول آک پاریر داڑان بوڑچی خانہ نا تیوہ بجٹ ڈسٹرب مرو کم کھٹیا والا تپہ آک بھاز زیمی مرو کبینی آن زیمی مخلوق پارے کہ داسا تو تو نوبت دا بسونے کہ بوڑچی خانہ نا گڑاک تے الین گڑا دوائی الینگ مفک،دوائی تے الین گڑا بل آتا تننگ نامنکن مریک، بدلی سرکار دافتا حالیت رحم کہ۔
حوال تا رد ئٹ حکومت بلوچستان نا خواہوک آ وخت ایسر، ورنا ڈاکٹرز ایسوسی ایشن پگہ آئندہ نا کاریم ٹہینفگ نا فیصلہ کریر۔
یاتی مرے کہ حکومت بلوچستان نا پارہ غان ورنا ڈاکٹر ایسوسی ایشن تا خواست آتے پورو کننگ کن چار شمبے نا دے اسکان خواہوک آ وخت تننگاسس و صوبائی وزیر جانجوڑی سید احسان شاہ نا سر کماشی ٹی ٹہیفوک کمیٹی نا اجلاس مروئی اس۔
ہرا ٹی خواست آتے گڈی دروشم تروئی اس، داسکان کمیٹی نا اجلاس مننگکتو ہراڑان گڈ ورنا ڈاکٹرز ایسوسی ایشن بلوچستان آئندہ نا کاریم ٹہینفگ کن خاص اجلاس خواست کننگا ہرا ٹی برانزی تحریک ء دوام تننگ تون اوار جتا امور آ ہیت مرو۔
اندن ورنا نرسز ایسوسی ایشن نا وفد ارشاد بلوچ و اسرار کاکڑ نا راہشونی ٹی ورنا ڈاکٹر ایسوسی ایشن نا برانزی کیمپ بس و ورنا ڈاکٹر تون است اسونی نا درشانی کرے بلکن ورنا نرسز بروکا ویل آتیا ہم ورنا ڈاکٹر تے خفی کرے، ینگ ڈاکٹرز ایسوسی ایشن سول ہسپتال نا آنا و ٹیم بابر تیوہ آ ویل آتے ایسر کننگ کن تیوہ یخین تسر۔
دافتیان بیدس عوامی نیشنل پارٹی نا راہشونک ڈاکٹر صوفی اکبر و ڈاکٹر علیسی جوگیزئی ورنا ڈاکٹر تا کیمپ ئٹی ڈاکٹر تون است اسونی نا درشانی و یخین تسر کہ عوامی نیشنل پارٹی ورنا ڈاکٹر تا خواست آتے جائز سرپد مریسہ تیوہ امنائی کینا۔
