راجی حوالکاری میڈیا نا فائدہ
وشت: سنگت آجو
دی بلوچستان پوسٹ
بندغ نا فطرت ءِ تینکہ آسودئی، خوشی، جارات پٹک او ودی مننگ آن ہلیس کہنگ اسکان ہڑدے تینا آسودئی کن چرت خلیسہ کائک۔
بندغ ءِ اگہ گڑتی مفروسس تو اینو ایلو ساہدار تیان بار او ام تنیا کنگکہ خاچاکہ و اندن اوندائی ٹی تینا سہب ءِ شام کریکہ۔
بندغ ایلو مخلوق آن کل گڑا تیٹی افضل ءِ، خدا تینٹ بندغ ءِ اشرف المخلوقات پارینے یعنی کل ساہدار تیٹی بندغ کل آن بھلن ءِ و غور فکر و مشاہدہ نا خواجہ ءِ، خدا بندغ ءِ غور کننگ کن علم تس کہ او گڑا تے ارے سرپد مرے۔
بندغ اینو جہان نا دا کنڈان ایلو کنڈ اسکان سفر کنگ ءِ، او اسہ سیکنڈ اٹ تینا کلہو ءِ تینا سیال ئسے آ و تینا سنگت آتیا رائی کیک۔
جہان نا ہرا کنڈ مرے بندغ نا انت کلہو اسہ ارا منٹ آتیٹی سر مریک، مالو اسے کلہو ئسے نا سر مننگ اٹ سال آک لگارہ اخس نا مزل مر اس ہموخس کلہو ام ارے سر مسکہ و ولدا ورندی تا ہموخس وخت خلکہ ولے بندغ اینو داخس ترقی کرے شون ہلک داسہ انت کلہو اسے بٹن نا خلنگ تو سر مریک۔
جہان نا ہرا کنڈ ٹی ویل اس ہلے بندغ تے انت گواچی اس مرے اگہ نی خواس تو ہمو جٹ کمک ءِ تا کننگ کیسہ۔
بندغیت نا بنیاد آ نی تینا وس و واک ئنا کچ اٹ و اونا ویل ءِ خلاس کننگ کیسہ۔
نی اگہ اوڑکن پیسہ اس مون ایتس اوڑکن راشن مون ایتس تو امو جٹ ئٹ اوڑا سر مریرہ، او نے نیک دوائی کنگ کیک۔
جہان اسے خلق اس جوڑ مسونے ہراٹی نی جہان نا ہر وڑ ئنا بندغ تو ہیت و گپ و محفل ءِ ملنگ کیسہ۔ ٹیکنالوجی نا دو آن نی اوفتا فکر و خیالات ءِ سر پند مریسہ نے ویل اس ہلے تو دانا خلاسی ءِ جہان نا ہرا نیمہ غان خواست کیس ہمو پارہ غان نے کمک سر مریک۔
بندغ ءِ دا کل گڑا تا غرض مس تو تینکہ اسے آخوبتی گڑا اس سوچا و موبائل ءِ جوڑ کرے۔
کلہو ءِ اسے کنڈان ایلو کنڈا رائی کننگ کہ کل آن مالو انگریز فون ءِ ایجاد کرے، کل آن اولیکو فون ءِ او تینا سنگت ئسے آ کرے ہرا اسے کوٹی آن ایلو کوٹی ئس، ہراڑے اونا سنگت ساڑی اس۔
مالو میسج رائی متوکہ خالی ہیت مسکہ۔
اوکان پد شون ہلیسہ فون ئٹی میسج کننگ و نیٹ ام اوڑدہ مس۔ داسہ مخلوق تینا خیال آ تا درشانی ءِ ام کننگ ءِ پوہ مس، کم وخت اٹ زیات آن زیات مخلوق آ تینا کلہو ءِ سر کنگ نا بناء مس۔
اندن مونی دا پین ترقی کریسہ تھری جی بس، داسہ بندغ تینا فوٹو تے ءِ ام اسے ایلو آ رائی کننگ کریکہ و مون پہ مون اسے ایلو ءِ خننگ ام کریکہ اندن فیسبک بس ٹوئٹر بس انسٹا بس، دا کل راجی حوالکاری نا سائٹ آک ودی مسر ہراکہ بندغ کن آسودئی بشخار۔
اینو بندغ ءِ اسے تلہ اس رسینگانے او جہان نا ہرا کنڈا مرے او بھلو کچ اسیٹ مخلوق آ تینا خیال آتا درشانی ءِ کرفک۔
اینو ننا مونا ٹی ءِ کہ نن موبائل ءِ سہب ئنا ملینہ تو جہان جہان نا ہرا خبر اس مرے ننا موبائل نا ملنگ تو سر مریک ننے ایلو کل کنڈا آتا معلومداری ہچ وسائل اس خرچ کننگ آن بیدس دو بریک و ننا وخت ام بچک۔ راجی حوالکاری میڈیا نا فائدہ اس دا ام ارے بھلو مخلوق اس دادے روزگار نا حساب اٹ ام دوئی کیک بھازا بندغ تا بلاگ آک جوڑ ءُ او ہموڑے اسے بیٹ اس ارفیرہ ہمو نا زی آ کاریم کریسہ کارہ داڑان او اِرا فائدہ ملیک اسے مخلوق نا کمک ام کیک ایلو تینا دیر و ارغ نا ام بندوبست ءِ کیک، نا بلاگ نا زیات اوننگ آن نے کن ہموخس پیسہ ام ودی مریک نی ہرا کنڈا تولوک تینا اُرا ءِ ام ولیفیسہ او راج ئنا خذمت ام کیسہ و مخلوق نا ویل آتے ام خلاس کیسہ۔
راجی حوالکاری میڈیا نا اخس کن فائدہ اریر ہموخس کچ تاوان ام اریر تو ننے بھاز خیالداری اٹ دادے کاریم اٹ ہتوئی تمک کہ ننا دو آن پین مخلوق ءِ نسخان سر مف۔
