اوغانستان نا صوبہ نیمروز ئٹ سلاء بند بندغ آک جلہو کریسہ ارا بلوچ باہوٹی ءِ ٹپی کریر۔

قوم پرست جماعت بلوچ ریپبلکن پارٹی نا بنجائی ترجمان شیر محمد بگٹی میڈیا ءِ اسہ بیان ئسیٹی پارے کہ پاکستان نا انٹیلی جنس نا کارندہ غاک اوغانستان نا شار نیمروز ئٹ بگٹی باہوٹی تیا جلہو کریر۔ ہرانا سوب آن اِرا بندغ ٹپی مسونو۔

اونا پاننگ ئس کہ نن ساڑی اوغان حکومت آن خواست کینا کہ او باہوٹی تا رکھ ءِ یخینی کے، دا جلہو بلوچ و پشتون روایات آتا خلاف ءِ۔

یاتی مرے کہ اولیکو جلہو اف کہ اوغانستان ئٹ بلوچ باہوٹی آک ٹک کننگانو داڑان مست ہم بلوچ باہوٹیک اوغانستان نا صوبہ کندھار ئٹ ٹک کننگانو۔

برجاء سال اپریل نا توہ ئٹ اوغانستان نا سیمی علاقہ اسپین بولدک ئٹ سلاء بند بندغ آک سم کاری کریسہ چار بگٹی باہوٹی ء کسفیر۔ کہوک آ بندغ آتا چاہنداری غلام نبی، ترونگ علی بگٹی نا مار، جنگی، درمان بگٹی نا مار، سکا، دیں محمد بگٹی نا مار، امیر جان، روستم بگٹی نا مار نا پن آن مسوسر۔

داڑان مست تدوکا سال 20 دسمبر آ کندھار ئٹ سلاء بند بندغ آتا سم کاری آن ارا بگٹی باہوٹی خلنگاسر ہرافتا چاہنداری گل بہار بگٹی و اونا مار مراد علی بگٹی نا پن آن مسر۔

اوغانستان نا جتا علاقہ تیٹ دا وخت بلوچستان آن لڈ و ہنپ کریسہ ہزار آ باہوٹیک جاگئی ءُ۔

داسہ نا دے تیٹ اسہ پارہ غان ہراڑاے بلوچستان ئٹ پاکستان آرمی شابیت لڑ ئسے آ آپریشن نا بناء ءِ کرینے و ایلو پارہ غان بلوچستان آن پیشن بلوچ سیاسی باسک و بلوچ تحریک نا ہمدرد آک ٹک کننگسہ ءُ۔

اوغانستان نا دارالحکومت کابل ئٹ پل محمود خان نا علاقہ ٹی عیدگاہ جامع مسجد نا پیشن بم تراک ئسیٹی کہیک بیران و ٹپی مسونو۔

جلہو نا حوال ءِ طالبان کوالخواک پک کرینو، طالبان ترجمان ذبیح اللہ مجاہد چاگڑدی حوال تا ویب سائٹ آ اسہ ٹویٹ ئسیٹی جلہو نا پک حوال ءِ کریسہ پارے عیدگاہ آن پیشن اسہ پروگرام مجلئسے نا نیام ئٹ تراک ئٹ کہی بندغ آک بیران و ٹپی مسونو۔

کابل آن دی بلوچستان پوسٹ نا کارندہ اس پارے کہ دا تراک ہموتم مس ہراتم بندغ آک طالبان ترجمان ذبیح اللہ مجاہد نا لمہ نا فاتحہ خواننگ برجاء ئس۔

یاتی مرے کہ ذبیح اللہ مجاہد نا لمہ تدوکا دے تیٹ کذیت کریسس، داتم اونا فاتحہ خوانی برجاء ءِ۔

داسکان ذبیح اللہ مجاہد تینا بیان ئٹ دا ہیت ئنا ذکر ءِ کتنے۔

ایلو پارہ غان اوغانستان نا پوسکنا حکومت نا وزارت داخلہ نا ترجمان قاری سعید خوستی بم تراک ئٹ ارا بندغ نا بیران مننگ و مسہ بندغ نا ٹپی مننگ نا پک ءِ کرے۔

اندن ایلو حوال تا رد ئٹ جلہو ئٹ ہشت بندغ خلنگانو و بیست ٹپی مسونو۔ نمائندہ نا پین پاننگ ءِ کہ داڑان مست اوغانستان نا صوبہ جوزجان ئٹ اسہ برام ئسیٹی تراک ئسینا سوب آن برامی تون اوار چار بندغ خلنگار۔

اوغان میڈیا نا رد ئٹ صوبہ ننگرہار نا دارالحکومت جلال آباد ئٹ تراک نا سوب آن چار بندغ بیران مسر ہرافتیٹ اسہ چنا اس ہم اوار ئس۔

ہندی بست و بند آتا پاننگ ء کہ بیران مروکا بندغ آتیٹ ارا طالبان کارندہ ہم اوار ء داسکان اسہ گروپ ئسینا پارہ غان دانا ذمہ واری قبول کننگتنے۔

ذبیح اللہ مجاہد نا نائب بلال کریمی نا رد ئٹ جمعہ نا دے آ ہم کابل ئٹ طالبان تا گاڑی ٹک کننگاسس، تراک آن گڈ سرچ آپریشن ئٹ داعش نا جنگجو تون جھڑپ آتا سوب آن کہی داعش جنگجو خلنگار و منٹ ئس دزگیر کننگار اندن کاروائی ئٹ طالبان کارندہ غاک ہم ٹپی مسوسسر۔

نی سر سُہب مسوس ریحان

نوشت عائشہ اسلم بلوچ | مٹ: شہزاد بلوچ

دی بلوچستان پوسٹ

ریحان جان ہمو بندغ نا پن ءِ ہرا دا چُنکا سن ٸٹ ہمو کرے نشان تس، ہرا کنا سوچ آن بھاز مونی ءُ۔ ریحان جان دا ثابت کرے کہ سوچ ٸنا سن ٸتون ہچو تعلقداری اس اف، جاہی ریحان جان نی انت پاریس ہمون کریس نشان تسوس کنے یات ءِ اینو ام ہراتم نی دوانزدہ سال نا اس ئسوس ہموتم نی پاریسُس کہ ای انشاللہ فدائی جہلو کروٹ، دژمن آ۔۔۔ ای بھاز زیات مخاسُٹ و ای پاریسُٹ ریحان ہیت کننگ بھاز آسان ءِ و نی تینٹ کنتون اوار مخاسہ، تینا سادئی ٹی پین ہچ اس ام پاتویس نی۔

ریحان جان اینو ای بھاز شکی اُٹ، نا عمل و سوچ ٸنا ماس آ، نی انت پاریس ہمون کریس نشان تسوس۔ ہمو دے آن گُڈ وختس ام نی کنتون دا ہیت ٸنا ورد ءِ کتویس و نہ وختس بھلو بھلو ہیت کریس ولے ای تو دا ہیت ءِ مسخرہ سمجِھسا گیرام کریسُٹ ولے نی گیرام کتویسُس۔ انتئے کہ نی مسخرہ کننگ الَویس۔ نا مسخت امے تمان نے تون اوار ئس، اینو نا باروٹ لکھنگ کن اُست بھاز خواہک ولے بھاز زور ٸٹ لکھِنگ کیوا، ای منِوا نا عمل کنا لوز آتا محتاج اف۔ چُنکی آن ہلیس نا رخصت پاننگ اسکان نا سفر بھاز یات بریک، اسہ جاہ اسکول آ ہننگ، مستی مذاق، جنگ و جیڑہ کُل گڑاک نا ہمو زیبلا ہیتاک، اُراٹی پیہنگ تون کنا پن ءِ ہلنگ اینو ام نا توار کنا خف تیٹی تمک۔ ریحان بھاز زیات فخر ءِ کنے نے آ، نی نن کُل ءِ حوصلہ تسونُس، ننے جوزہ تسوس وطن تون ہرا حد اسکان مابت کیرہ ہمون ہیل تسوسُس۔

کنا مایوسی تے پرغاس نی، کنا دا نزور آ اُست ءِ سوگو کریس، تینا عمل آن مالو ہم نی عظیم ئسوس۔ ہراتم ہم نے آ کس اس چِڑاکہ نی مخاسہ کس ٸنا سوختئی ءِ ہم بشخندہ تون سگاسہ۔ نی وختس ہم کس ءِ خر کتویس نا مخلصی نا عظیم مننگ نا شاہدی ءِ۔

ای نیتون پاریسُٹ کہ ای نے آن بیدس امر رہینگوٹ ولے اینو نی کنتون اوار اُس، نی زندہ اُس کنا سوچ ٸٹی کنا ہیت آتیٹی کنا یات آتیٹی نا ہیتاک مدام کنا ملی ٹی ءُ، نا ہمو مخوکا دروشم مدام کنا ماس ئٹی ءِ۔ ای اسول نے مایوس خنتوٹ، اسہ وارس سوج ام کریسُٹ ای نے آن، ریحان دا حالیت آتیٹی مایوس مفیسہ؟ نی مخِسہ ورندی تننگ کہ “نہ اسول نہ۔” ہموتم ای پاریٹ “ارے نی تو بھاز بے پروا ئسے اُس”

ہموتم ام نی مخِسا پاریس “دا ٹی پروا نا انت ہیت ٸسے؟” نی اسل بے پرواس ہلویس, پھل اینو دا کُل ہیتاک بھاز تکلیف تیرہ، ہراتم ام ای نا مسخت نا عمل نا باروٹ سوچِوا، ملی کاریم کننگ ءِ ہلک دوک لڑزِرہ و ہراتم لُمّہ باوا نا باروٹ سوچوا کہ امر اوفک نے مخِسہ بشخندہ کرسا رخصت کریر و اینو نے آ فخر کننگ او تو کنا حوصلہ تینٹ سوگوی بریک، اُست تینتو تینٹ بھلُن مریک۔ ریحان جان نا سوچ اینو ہر جاگہ غا ساڑی ءِ۔ کُل ٸٹ اسہ پوسکُنو جوزہ اس ودی مسونے۔ نی سر سُہب مسوس، کنا پُھل مُچا وڑٹ سر سُہب مسوس۔

حوال تا رد ئٹ حکومت اسہ وار واپس لس مخلوق آ کبینی نا ایل پی جی بمب خسیسہ اسہ کلو نرخ ئٹی 29 رپئی 10 پیسہ نا ودکی کرینے۔

آئل اینڈ گیس ریگولیٹری اتھارٹی (اوگرا) نا کنڈان شینک کروکا نوٹیفکیشن نا رد ئٹ ایل پی جی نا 11.8 کلو نا ارائی سلنڈر 343 رپئی کبین مسونے، نوٹیفکیشن نا رد ئٹ ایل پی جی نا پوسکنا نرخ آک اکتوبر 2021 کن مرور، پوسکنا نرخ آتیٹ203 رپئی 69 پیسہ اسہ کلو تخنگانے۔

اوگرا نا نوٹیفکیشن ٹی پین پاننگا کہ ستمبر کن ایل پی جی نا اسہ کلو نرخ 174 رپئی 58 پیسہ تخنگاسس، اُرائی سلنڈر نا پوسکنا نرخ 2403 رپئی تخنگانے، اندن ستمبر کن ایل پی جی نا اُرائی سلنڈر نا نرخ 2060 رپئی 15 پیسہ تخنگاسس۔

ایلو کنڈان پاکستان تحریک انصاف (پی ٹی آئی) نا بنجائی حکومت پٹرولیم گڑا تا نرخ آتیٹ ودکی نا برجاہ تننگانے، اسہ وار واپس پٹرولیم گڑا تا نرخ آتیٹ ودکی کننگانے۔

بنجائی حکومت پٹرول نا نرخ آتیٹ چار رپئی اسہ لیٹر ودکی کرینے ہراڑان گڈ پٹرول نا پوسکنا نرخ 127 رپئی 30 پیسہ مسونے ۔

ہائی سپیڈ ڈیزل نا نرخ ئٹی 2 رپئی اسہ لٹر ودکی کننگانے، ڈیزل نا نرخ 122 رپئی 4 پیسہ مسونے ، ایلو پارہ غان لائٹ ڈیزل نا نرخ ئٹی 8 رپئی 82 پیسہ نا ودکی کننگانے ہرڑان گڈ نرخ 99 رپئی51 پیسہ نرخ مسونے۔

اندن گاسلیٹ نا نرخ 7 رپئی 2 پیسہ زیات کننگانے ہراڑان گڈ پوسکنا نرخ 99 رپئی 31 پیسہ مسونے۔

یاتی مرے کہ 15 دے مست  اوگرا نا کنڈان وزارت خزانہ ءِ رادہ کروکا سمری آن چھپ بنجائی حکومت پٹرولیم نا گڑا تا نرخ آتیٹ ودکی کریسس، پٹرول نا نرخ ئٹی 5 رپئی اسہ لٹر ودکی کننگانے ہراڑان گڈ پٹرول نا پوسکنا مرخ 123 رپئی 30 پیسہ مسونے۔

وزارت خزانہ نا شینک کروکا نوٹیفکیشن نا کنڈان ہائی سپیڈ ڈیزل نا نرخ ئٹی 5 رپئی 1 پیسہ اسہ لٹر ودکی کننگانے و پوسکنا نرخ ہائی سپیڈ ڈیزل نا 120رپئی 4 پیسہ ادہ فی لٹر مسونے۔

نوٹیفکیشن نا رد ئٹ لائٹ ڈیزل آئل نا نرخ ئٹی 5ٹپی 92 پیسہ اسہ لیٹر ودکی مسونے، ہراڑان گڈ لائٹ ڈیزل نا پوسکنا نرخ 90 رپئی 69 پیسہ مسونے۔

نوٹیفکیشن نا رد ئٹ گاسلیٹ  رخ ئٹی 5 رپئی 42 پیسہ اسہ  لیٹر ودکی کننگانے و گاسلیٹ نا پوسکنا نرخ 92 رپئی 26 پیسہ اسہ لٹر مسونے۔