اسہ مزاحمت کار، اسہ کامریڈ اس، شہید رحمت شاہین بلوچ
نوشت: پُلھین بلوچ | مٹ: شہزاد بلوچ
دی بلوچستان پوسٹ
جہان نا مظلوم و محکوم راج آتے خواننگ آن سماء مریک کہ اوفک ظالم و سامراج نا مونا کاٹم اسُل شیف کتور، بلکن تینا ڈغار نا آجوٸی کن ایسری دم اسکان جنگ کریر۔
جہان بھاز آ اندنو کامریڈ ودی کرے ہراتے اینو اسکان انقلابیک تینا آٸیڈیل سرپند مریرہ، ہندوستان آن کامریڈ بگھت سنگھ تینا کامریڈ آتون ہمراہ اوڑدہ مرسا سامراج کن کاٹم نا خڷ اس جوڑ مس، اندن کیوبا ٹی فیڈرل کاسٹرو و کامریڈ چے گویرا، چین ٸٹی کامریڈ ماوزے و (جنوبی افریقہ) ٹی نیلسن منڈیلا انقلابی تیکن پیر و مُرشد جوڑ مسر۔
٠جہان نا ایلو راج آتا وڑ کنا لُمہ وطن، کنا مکہ، کنا حانل، بہادر آتا ڈغار بلوچستان ام دنو کامریڈ، دنو مزاحت کار ودی کرینے کہ ای دافتے بلوچستان نا بگھت سنگھ و ہوچی منہ قرار تیوا۔ ہرافک سامراج کن تینا ڈغارے دوزخ جوڑسا اوتا زند ءِ حرام کریر و اینو اسکان کننگ ءُ۔
ہراتم پرتگیزی کوزی گیراک تینا (ناپاک عزاٸم) آتون اوار بحرِ بلوچ نا کرَگ آ گام تخا تو کامریڈ حمل جیٸند ہراکہ اسہ آجوٸی دوست و اسہ مزاحمت کار اس ٸس تو تینا ڈغار آن دا کوزہ گیر ءِ دوست کتو و اونا برخلاف مزاحمت نا پڑو کرے۔
داکان گُڈ ہراتم سکندر اعظم جہان ءِ فتح کننگ کن پیشتما، ہراتم او بلوچستان ٸٹ پیہا تو سخت مُد و سخت انگا کسر آتے پک کرسا بھلو نسخان ٸسے آن پد آخر کار ایران ءِ سر مس۔ انتئے کہ بلوچستان تینٹ اسہ مزاحمت کار ٸسے۔ اونا ہر گِڑا مزاحمت کیک۔
بقولِ کامریڈ شہید سنگت ثناء بلون نا “کنا ڈغار نا ورنا تو مزاحمت کیک ولے دا دھرتی نا موسم ام دژمن تون مزاحمت کیک”۔
انگریز تینٹ تینا کتاب آتے ٹی نوشتہ کیک کہ ہراتم او سندھ آن بلوچستان ٹی پیہا تو سخت باسنی آن اوتا سد آ فوجیک کسکُر و ہراتم درہِ بولان آن کولپور و دشت ٸٹ پیہا تو سخت یخ و برف آن اوتا ہزارا فوجیک کسکُر۔
انگریز ءِ اخس مزاحمت نا مون بلوچستان ٸٹ تروٸی مس شاید ہچو ڈغار ٸسے آ مرے۔
مری بلوچ آتا مزاحمت ہراڑے “ماوند” ٸٹ اینو اسکان انگزیر آتا تخوک توپاک بلوچ آتا مزاحمت نا شاہدی ءِ تننگ ءُ۔ اندن بلوچستان نا ایلو علاقہ دُن کے مکران ٸٹ “گوگ پروش” نا جنگ ہراڑے پر تگیز آفسر بلوچ مزاحمت کار آتے سلامی تساسک۔
بلوچ مزاحمت کرسا کرے ہر بروکا پیشن جلہو کروک نا برخلاف و اینو اسکان مزاحمت کننگ ءِ۔
انگریز تیان گُڈ پاکستان آن بارا غیر مہذب کوزہ گیر نا برخلاف بلوچ اسہ وار پدا مزاحمت بنا کرے، انتئے کے او غلام مننگ آن زیات آجو مننگ ءِ دوست کیک، و آجوٸی کن ہچو قربانی سے آن دریخ کپک۔
پاکستان آنبارا کوزا گیر آتا برخلاف پرنس آغا عبدالکریم مزاحمت نا الم ءِ بُڑز کرے۔ داڑان پد پیر مرد شہید بابو نوروز خان مَش تے تینا ھنکین جوڑسا مزاحمت ءِ برجا تخا۔
امامِ انقلاب بابا خیربخش مری آن ہلیس ڈاڈائے بلوچ شہید نواب اکبر بگٹی اسکان، شہید سفر خان آن ہلیس شہیدِ انقلاب میر بالاچ خان اسکان، شہید واجہ غلام محمد بلوچ آن ہلیس شہید ڈاکٹر منان جان اسکان، شہید اُستاد اسلم آن ہلیس لُمہِ وطن شہید بانُک کریمہ اسکان و شہید سنگت شہداد جان آن ہلیس شہید سنگت آفتاب جان (وشین) اسکان مزاحمت نا اسہ نہ ایسر مروکا سلسلہ اس جاری و ساری ءِ ارا انشاللہ آزات بلوچستان نا حصول اسکان برجا مرو۔
اندا مزاحمت کار آتے ٹی اسہ پِن اس کامریڈ رحمت شاہین نا ام ارے، ہرا تینا شہید آتا گام تے ارفیسہ مزاحمت ءِ بنا کرے۔
سنگت کامریڈ حمید شاہین بولان نا بلاٸی سر آ ساڑی خلقِ کامریڈ میر النبی بنگلزٸی (اسپلنجی) ٹی ودی مس۔ بنائی تعلیم خلق ٸنا اسکول ٸسے آن دوٸی کننگ آن گُڈ اُرا والا تا کچھی نا علاقہ بھاگ ناڑی مُری نا سوب آن مونی تعلیم ہمونگا دوٸی کرے۔
میٹرک پورو کننگ آن گُڈ شال آ ہنا و مونی تعلیم برجا تخا۔ کالج بی اے نا وختان بلوچ راجی تحریک ٸٹ خُڑکی تخاکہ۔ ہمو وختان سنگت بی ایس او ٹی ساڑی مس۔
ہراتم واجہ ڈاکٹر اللہ نزر بلوچ بی ایس او ءِ پارلیمانی سیاست نا جنگل آن آجو کرسا اسہ آجو و خود مختار گُل بی ایس او آزاد نا پن تس تو شہید کامریڈ رحمت شاہین ہراکہ مالو آن ڈاکٹر نا فکر آن متاثر اس تو اونا کاروان ٸٹ ساڑی مس۔
تعلیم و سیاست تون اوار اوار سنگت صحافت و شاعری ٹی ام تینا لاٸخی تے منیفے۔ سنگت سوگوو فکر ٸسے نا خواجہ ئس۔ او ہر کاریم ءِ بھاز زیبائی ٸٹ ایسری تسکہ۔ او راج ٸنا دڑد ءِ ہلسا ہر مش و دامن ٸٹ سلوک ہر گدان آ ہنسا بندغ آتے تحریک نا باروٹ سرپدی تِساکہ۔ شاعری نا بولی ٸٹ وطن تون عشق و مابت ءِ قلم نا وسیلہ غٹ راج اسکان سر کرے۔
ہراتم دژمن ءِ سنگت نا کاریم تان خلیس محسوس مس تو بولان نا علاقہ مچھ آن نن ٸنا وخت سنگت ءِ ارفسا دژمن تینا زندان تے ٸٹ بند کرے۔ تقریباً اِرا تٶ آن پدا یلہ کرے تہ۔
دا وار سنگت مالو آن زیات تنظیمی کاریم تے ٹی اوار مس و سنگت آتے مُچ کرے۔ دا وار او مُچا وڑٹ بدل مساسک۔ او سیاسی مزاحمت آن زیات مسلح مزاحمت نا درس ترسا کریکہ کہ دا دژمن بیدس توفک نا بولی ءِ سرپند مریک۔ سنگت انتئے کہ مالو آن بی ایل اے نا سنگت آتو خُڑکی تخاکہ۔ داسا اسہ وار پین پوسکنو ارادہ اسیتون بولان ءِ تینا سنگر جوڑا۔ او شہید استاد عبدالرسول جان نا بھاز خُڑکی و رازداری ءُ سنگت اس ٸس۔ او شہید علی شیر کرد، شہید کریم جان و شہید استاد جرنل اسلم جان نا سنگت آتون حساب مریک۔ سینٸر سنگت آتون خُڑکی نا سوب آن او بھاز سوگو مساسک۔
کنا دا عظیم کامریڈ تون کچاری شہید استاد عبدالرسول جان نا وتاخ اسپلنجی ٹی مس۔ انتیکہ ای دا وخت عمر ٸٹی چُنک ئسوٹ، گڑاتے مچھٹ سرپند مسوٹا ولے دا عظیم سنگت آن بھاز زیات ہیل کننگ کن ملا۔
ای دادے اسہ بہادر مزاحمت کار ٸسے نا دروشم ٸٹ خناٹ۔ وخت تدیسا کرے سنگت تینا ہم خیال سنگت آتون ملِسا ہر محاز آ دژمن ءِ شکست ترسا کرے۔ سنگت شال بولان و کچھی ٹی تنظیمی کاریم تے ایسری ترسا کرے۔
مارچ 2011 ٸٹ ہرا وخت سنگت تنظیمی کاریم نا سلسلہ ٹی کچھی آن بولان آ بننگ ئس تو اسہ وار پدا آستونک نا دوشہ غاک ناپاک فوج ٸتون اوڑدہ مرسا دوپاسی کراس ڈھاڈر آن سنگت ءِ شہید استاد عبدالرسول جان و مسہ سنگت تون اوار بے گواہ کریر۔ ایلو سنگت آتے منہ دے آن گُڈ یلہ کریر ولے سنگت کامریڈ رحمت و استاد عبدالرسول جان ءِ دژمن تینا زندان ٸٹ بیدادی ترسا کرے۔
آخر ٹی اپریل 2011 ٹی سنگت ءِ دژمن شہید کرسا ننے آن پاشی وڑٹ جتا کرے شہید نا جون آ تشدد نا بے کچ نشان اس ہراکہ دژمن نا بزدلی ءِ پاش کننگ اس کہ او اسہ نظریاتی ءُ بندغ ٸسے ہلنگ کتو۔ شہید نا لاش ءِ شہید شفیع جان قبرستان اسپلنجی ٹی ڈغار نا خمب اٹ تننگا۔
اندا وڑ اسہ عاشقِ گُلزمین، اسہ مزاحمت کار اس اسہ تاریخ اس رقم کرے۔ و اندا شہید آتے تون ساڑی مس، ہرافک سامراج تون مزاحمت کریر و پوسکُنا بش و ودی مروکا ہر گواڑخ ءِ تینا دتر تریسا پین طاغت تالان کرے۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
