سندھ نا بنجائی شار کراچی ٹی زمین جمب نا چنڈیک درک کننگار
زمین جمب کراچی ٹی آئی چندریگر روڈ، ٹاور کیماڑی، صدر، گلشن اقبال، گلستان جوہر، قائد آباد، ملیر کنٹ، سکیم تون اوار 33 ایلو علاقہ آتیٹ ہم چنڈیک درک کننگار۔
زمین جم پیمامرکز نا رد ئٹ کراچی ٹی شام ئنا 10 بجہ و 16 منٹ آ زمین جم درک کننگا ہرانا ترندی 4.1 و کڑمبی 15 کلومیٹر اس اندن زمین جم نا مرکز ڈی ایچ اے کراچی آن 15 کلومیٹر قطب ئٹ اس۔
حوال تا رد ئٹ جھل مگسی نا علاقہ گدھا گاڑا ٹی ارا قبائل نا نیام ئٹی جیڑہ ئٹ سم کاری نا سوب آن لیویز فورس نا کارندہ تون اوار مسہ بندغ مرگ نا گواچی مسر۔ لیویز فورس تون اوار بڑز ضلعی آفیسر آک ہند آ سر مریسہ حالیت ءِ سمبالار۔
گیشتر حوال تا رد ئٹ چِک و تاڑ نا بناء لیویز فورس نا رد ئٹ جھل مگسی نا علاقہ ٹی سم کاری نا سوب آن اسہ لیویز کارندہ عبدالفتاح تون اوار لعل جان و اونا سنگت مرگ نا گواچی مسر، سم کاری نا سوب آن تیوہ آ علاقہ ٹی خلیس تالان مسونے ویل ئنا حوال رسینگتون لیویز فورس و ضلعی آفیسران ہند آ سرمسر حالیت ءِ سمبالار، ویل ئنا رد ئٹ لیویز فورس پین پٹ و پول کننگ ءِ۔
انڈین آرمی نا اولیکو ڈیفنس جنرل بپن روات نا ہیلی کاپٹر تمیسہ بھس مس۔
بھارت نا میڈیا نا رد ئٹ چیف آف ڈیفنس اسٹاف جنرل بپن روات نا ملٹری ہیلی کاپٹر ریاست تامل ناڈو ٹی کونور آن خڑک تمیسہ بھس مس، ویل آن گڈ سرچ اینڈ ریسکیو آپریشن بناء کننگا۔
بھارت نا میڈیا رپورٹس تا رد ئٹ ہیلی کاپٹر ئٹ چیف آف ڈیفنس اسٹاف جنرل بپن راوت، اونا زائیفہ، خاہوت و کارندہ غاک سوار ئسر۔
بھارتی فضائیہ نا پارہ غان ہم دا رد ئٹ سوشل میڈیا آ پک کننگا کہ چیف آف ڈیفنس اسٹاف جنرل بپن راوت نا ایم آئی 17 وی فائیو ہیلی کاپٹر تمیسہ بھس مسونے۔
انڈین ائیر فورس نا پارہ غان شینک مروکا بیان ئٹ پاننگانے کہ ہیلی کاپٹر نا ویل ئنا سوب آتے درست کننگ کن پٹ و پول نا بناء کننگانے۔
ایلو پارہ غان بھارتی میڈیا رپورٹس ٹی ہیلی کاپٹر ویل ئٹ اِرا بندغ نا کہنگ نا پک مسونے داسکان دا درست متنے کہ کہوک آتیٹ دیر دیر اوار ء۔
بھارتی خبر تروکا ادارہ غاک این آئی نا رد ئٹ ہیلی کاپٹر نا ویل ئنا ہند آن خننگوکا جون آک ملٹری اسپتال آ دننگانو۔
یاتی مرے کہ بھارت نا فوج ئنا راہشون جنرل بپن راوت تینا وخت ئنا کاریم تے ایسر کننگ آن گڈ 31 دسمبر 2019 ٹی ریٹائر مسوسس ولے سرکار مودے اودے بھارت نا اولیکو چیف آف ڈیفنس اسٹاف تخاس۔
لاشاک تموکو بے قبر
لمہ اس رُلّک در پہ در
کربلا جوڈ مسونے گلزمین
اف تا سما پائے کیو اَمر
بش مبو ورناک کبو ہکّل
پدا مف لمہ اس در پہ در
خلیک ننے بمب او توپ اَٹ
انگہ پانا کہ مچٹ صبر
مریو قربان تینا لمہ کن
بارگ اس تے دتر تو تے امر
بارگ بلوچ
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
سٹی تھانہ نا خوڑکا ڈم، شاخ نا علاقہ محمد حسن پندرانی معڑ آ ارغ و انا زائیفہ نا خون، خونی نرا کہوکا تا تعلق سندھ ناعلاقہ ٹھوپ چوسول لاڑانہ آن ءِ۔
حوال تا رد ئٹ غلام حسین جتوئی تینا زائیفہ روشن بی بی تون اوار موٹر سائیکل آ اوستہ محمد نا کُنڈا بننگ ئس کہ ڈم شاخ نا ہندا محمد حسن پندرانی موڑا نا درست جلہو کروکاک سم کاری کریر ہڑتوما ارغ و زائیفہ ءِ کسفیر و نرار۔
جون تے خننگ تو خلق نا مخلوق میڈیا و پولیس ءِ حوال تس۔ پولیس ہڑتوم آ جون تے پوسٹ مارٹم آن گڈ خاہوت نا دوٹی تس ہرافتا تعلق لاڑکانہ سندھ نا علاقہ ٹھوپ چوسول گوٹھ آغا خان جتوئی آن پاننگک۔
پین پٹ و پول پولیس کننگ ءِ۔ اِرا خون آن علاقہ ئٹ خلیس و بیم تالان مس، جون تے اُرا غا سر کننگ تو اُراٹی گار پریات تالان مس۔ ہچو دزگیری اس عمل ئٹ بتنے۔
“سیخائی عقیدہ غاک” راجی آ آزموندہ یا مخلوق نا ردیک؟
نوشت: منتظر بلوچ
دی بلوچستان پوسٹ
تدوکا نوشت ئٹ ای دا ہیت ءِ لکھاسُٹ کہ سیخاتا گُم مننگ یا اوفتا خراب پاننگ آ عربیت/اسلام ازم نا تالان کروکا تا بھلو دُو ئس مسونے۔ عرب آن پیشن اسلام نا دامُن آن ایلو جاگہ تا، راج آتا اثر تیان صفا کننگ کہ چندی تحریک آک چلینگانو۔ جہی آ دود ربیدگ آتے شیف خلّنگ نا دا کاریم اینو ہم جتاء جتاء وڑئٹ تُرندی ئٹ برجا ءِ۔ اندا عربیت ننا بھلو مخلوق اس دز گیر کرینے و ننا بندغاک ننا جہی دود آتے خراب پاننگ آ کوچرا مفسہ۔
دیوبند مدرسہ تون تعلق تخوکا مُلا اشرف علی تھانوی اسے کتاب اس ” اغلاط العوام” نا پِن ئٹ نوشتہ کرینے۔ ہرانا پُوسکنا شینگکار “ادارۃ المعارف کراچی ئے”۔ دانا پوسکنا ایڈیشن دسمبر 2003ء آ شینک مسونے۔ دا کتاب ئٹ ننا سد آ سال تا راجی آ آزموندہ غاک ہرافک عقیدہ نا دروشم ئٹ مونا بسر اینو ہم کہی ہندنو عقیدہ ارے ہرافک اُرا تیٹی تینا ہمو دروشم ئٹ زندہ ءُ۔ بھازا عقیدہ غاک زند و مرگ ئنا چِشخ سمجھنگرہ۔ نن ہندافتیان گڑا سینا درشان ءِ تینا نوشت ئٹ ہتنگ نا کوشست ءِ کینہ۔
تھانوی تینا کتاب نا “بنائی لوز” ئٹ لکھک :
“مخلوق ئٹ بھاز ہندنو رد ءُ ویل ویل پنی ءُ ہرافتا شریعت تون ہچ کاریم اف ولے مخلوق ہندن یقین کرینے کہ اوفتا پک کننگ کہ ملا غا ہم اِمپسہ”۔
داکان مونی کتاب نا پنہ 14 ٹی لکھک:
“مشہور ءِ کہ دے آن کسہ پاپہ بو نہ تو بندغ کسرے گیرام کیک، دا غُٹ ہیتاک سٹی پٹی ءِ بے بنیاد ءُ۔ دُنو عقیدہ تِخنگ گُناہ ءِ۔” (ویل 23)
بُڑز لکھوکا ‘ویل’ آ مُلا تھانوی تُرندی ئٹ “واہیات” نا لوز ءِ نوشتہ کرینے ہرانا معنہ پاش ءِ۔ ایلو ہیت دادے کہ دا عقیدہ آزموندہ غان ہندن بِسّونے کہ اینو ہم دے آن کسہ خلپسہ۔
پنہ 96 آ خواجہ نوشتہ کیک :
“بھاز مخلوق دا سرپد مریک کہ نرینہ نا چَپی آ خن و نیاڑی نا راستیکو خن پرپٹنگ آ ویل، مصیبت اس و دا چَپ آ خوشی بریک، دا تیوی رد ءُ گمان ئسے۔”(ویل 3)
دا جیڑہ (مُلا دادے جیڑہ اس سرپد مریک) ہم تینا ہندا دروشم ئٹ زندہ ءِ خن ئنا پِرپٹنگ مہمان ئسے نا بننگ تو تفوکے (مطلب خوشی تون) بھاز جاگہ نیاڑی نا راستی آ خن ئنا پِرپٹنگ ویل ئسے نا ڈس ءِ ایتک۔
ہندن پنہ 99 آ لکھک
” داڑے رواج ءِ کہ بندغ اس جاگہ ئسے آ ہننگے، تو اودے پد آن توار خلیر تو او جنگ آ تیار مریک کہ کنے پد آن انت ئسے کن توار کریس۔ داسا کنا کاریم مفک تو دا ہیت ئنا شریعت تون ہچ کاریم اف۔”
دا اسے بھاز زیات رواج ہرفوکو عقیدہ ئسے ہرادے بھاز جاگہ “پدگُوانک” و گڑاس جاگہ “مکن” پارہ۔ بیرہ دا اف کہ ہرا بندغ ءِ پد آن توار خلکُنو او جنگ آ تیار مریک بلکہ پد آن توار کننگا اُرا والاک، لمہ، ہیڑ غُٹ دا گِڑاغا اسٹ ایلو آ تُرند مریرہ کہ پدگُوانک کپبو۔
ہندا بابت ئٹ اسے کسہ ئس پنی ءِ کہ ہراتم دودا جنگ ئکے تینا لشکر تون پیشتماکہ۔ او غُٹ ءِ رخصت کریسس تو بالاچ پارے ای ہم جنگ ئکے بریوہ ولے دودا اودے ہڑسا پارے کہ نی ہُراٹی مر داسکانے چُنک اُس۔ پیش تمنگ نا وخت آ دودا ءِ نیاڑی اس پد آن توار خلک تو دودا نا اُست شک کرے او واپس اڑسینگا بس بالاچ ءِ پارے کہ ای جنگ ئٹ خلینگیوہ کنا بیرے نی ہلیس۔
“ارمان پہ تو باگاڈ چم
منی موت ءِ را نشانے داتے
زند ءَ را جت ئے چامپولے”
(ارمان نیکے گروشک خنی، کنا مرگ ئنا ڈس ءِ تسوس، زند ءِ چپانٹ ئس خلکُس۔)
ہندن خُواجہ پنہ 101 آ بومب ئنا بابت ئٹ پاہک کہ دا ساہدار ہراڑے تُولے۔ مخلوق پاہک کہ شار سُنسان مریک یا بندغ ئس کہیک دانا راستی تو تعلق اف۔” دا بابت ئٹ ننا راج داسکانے آبادی ئٹ بومب ئس خنے تو مِڑرہ تا اودے روادار مفسہ کہ توار خلک تو شار ئٹ بندغ اس کہیک یا خلق سُنسان مریک۔ ہندا وڑ کُکُڑ نا بانگ تننگ آن گُڈ اودے تڑنگ ءِ ہم خراب پاہک یا شام ئنا روفہ خلنگ نا خرابی پاہک کہ شریعت آن ثابت متنے۔ ہندا سوب آن دافتے آن تینے تورِن نا تو گناہگار مرینہ۔
دا گِڑاتے نن بیرہ ردی پان او منیپن تا یا دافتیا مسخرہ خلین کنا خیال پاہک تینا گڑا ءِ پین نا پاننگ آ رد کننگ یا تینا گِڑاتیا مسخرا خلّنگ ایلو نا گِڑا ءِ خنتیا تخنگ نوآبادیاتی ذہنیت نا کاریمے اسے آزات و ملی سے نا کاریم اف۔
داڑے دا سوج مونا برو ءِ کہ دافک بیرہ اتفاق مسونو ہرافک پدان یقین ئٹ بدلینگانو و عقیدہ جوڑ مسونو؟ دافتا راستی تون انت تعلق ئے؟ ورندی دادے کہ دافک ننا راج ئنا کہی زمانہ غاتا آزموندہ غاک مسونو ہرافک مونا یقین نا دروشم ئٹ بدلینگانو۔ او راستی تا دادے کہ ننا تاریخ، راج، چاگرد و ننا شعوری سفر نا بشخ مسونو و اریر۔ دافتے دون ارزانی ئٹ رد کننگے ای تینٹ جاہلی ئس سرپد مریوہ کہ تینا آزموندئی آ یخین آتے رد پا ایلو نا بغیر آزموندہ کروکا یقین آتے تینا زی آ تِرِپ کر۔ دافتے سرپد مروئی ءِ نہ تو دا بَھلَاک کیدِرہ ننے۔
ارٹمیکو سوج دا مننگ کیک کہ ملا تھانوی دا گپ آتے ہندوستان نا چاگرِد نا رِد ئٹ مونا آ ایسونے اودے داڑے امر لِچّفِن۔ دانا ورندی دادے کہ بھازا سیخائی عقیدہ غاک ننا و ہمسایہ راج آتا اِسٹ ءُ۔ (دا اثرات آک مننگ کیرہ کہ اسٹ ایلو آ تمّانو) ہرافک اینو ہم آزموندہ مرسا ءُ۔
یاتی:
(دودا و بالاچ بلوچ تاریخ نا اِرا پِن گدرینگانو۔ ہڑتوماک ایلم مسونو۔ ہرافک سمی ءِ باہوٹ کریسر ولے بیبگر سمی نا ساہدار تے لُٹّاسس۔ اوڑا باہوٹ نا رکھ اکن جلہو کریر۔)
تیوہ آ پاکستان ئٹ کورونا وائرس آن 24 گھنٹہ نا نیام ئٹی پین 10 ناجوڑ مرگ نا گواچی مسونو اندن نیشنل کمانڈ اینڈ آپریشن سینٹر نا پارہ غان شینک کروکا بیان نا رد ئٹ تدوکا دے پاکستان ئٹ کورونا نا پک کننگ کن 42 ہزار 944 ٹیسٹ کننگانے ہرافتیٹ 336 بندغ ٹی کورونا وائرس پک مسونے،اندن مثبت کیس آتا کچ 0.78 فیصد ریکارڈ مسونے داڑان بیدس 862 ناجوڑی نا حالیت خلیس ٹی ءِ۔
کورونا وائرس و خیالداری گامک:
کورونا وائرس نا بر خلاف دا خیالداری گام تے ارفنگ آن دا دین ئنا بر خلاف جنگ ءِ کٹینگ اڑزان مننگ کیک،سہب ئنا منہ وخت دے گدریفوئی ءَ، کڈی تا بند کریسہ تولپبو بلکن دروازہ کھڑکی تے ملبو و مچے دے ءِ کڈی تیٹ مننگ کن ہلبو، بند کڈی تیٹ اے سی خلینگ نا جاگہ آ پنکھہ نا تہو آ تولبو، دے ئنا برمش تیٹ ساڑی یو وی شوا وائرس نا پیشن نا ساخت آ بروک مروک پروٹین ءِزیمی کیک و وائرس ءِ نزور کیک۔
باسنی نا کچ نا زیات مننگ آن وائرس آ ہچ زیم تمپک ولے یو وی برمش زیات تمننگ آن وائرس نزور، دیر باسن کریسہ تھرماس آتیٹ تخیسہ ہر اسہ گھنٹہ آن گڈ نیم کپ اس کنبو، وائرس تیوہ آتیان مست گٹ ئٹی انفیکشن کیک و ہموکا پف آتسکان سر مریک، باسن دیر آن وائرس گٹ ئٹ کایک ہراڑے وائرس بیکار مرک۔
حوال تا رد ئٹ خضدار ٹی بجلی نا بیدس پڑو لوڈ شیڈنگ، ٹرپنگ مخلوق ءِ بے فریشانی تا گواچی کرینے، بھاز آ سال تیان یخ آتیٹ بجلی آن لس مخلوق ءِ بے بشخ مننگے، شار ئنا آباتی نا ودنگ نا نیمون کریسہ دے پہ دے شار ئنا نیمہ بشخ ءِ تارمئی ٹی بٹنگانے۔
مخلوق نا پاننگ ءِ کہ نمائندہ آتا چھپ ئنا روچہ تخنگ معنہ تخنگ ءِ، خضدار سٹی نا تیوہ آ فیڈر آتے اسہ ارا فیڈر آن بیدس ایلو تیوہ آ فیڈور آک بند کننگرہ، علاقئی مخلوق سخت پریشانی تا گواچی مسونے۔
خضدار نا سیاسی حلقہ آک صحافی تون ہیت کریسہ پاریر واپڈا تینا دود آتے برجاء تخیسہ علاقائی مخلوق ءِ بجلی آن بے بشخ کرینے۔
بلوچستان نا ضلع پنجگور ئٹ نادرست سلاء بند بندغ آک کرش بلانٹ آ جلہو کریسہ مشینری تے خاخر تسر۔
گیشتر حوال تا رد ئٹ پنجگور نا علاقہ خدابادان پسکول ندی ٹی جاغئی ٹھیکہ دار دور محمد نا کریش پلانٹ آ نادرست سلاء بند بندغ آک سم کاری کریسہ شیول ٹریکٹر ءِ ہشار۔
داسکان ویل ئنا سوب آک درست متنو نئے کوالخوا تا ہیت آک دا رد ئٹ مونا بسونو۔
یاتی مرے کہ تدوکا وخت ئٹ ہم اندا پلانٹ آ جلہو مسوسس۔
یورپی یونین تینا بیان ئٹ پارے کہ پاکستان ئٹ داسہ مذہبی انتہا پسندی و سگ ئنا کمبوتی آ خلیس ء۔
یورپی یونین تینا بیان ئٹ پاکستان ئٹ آزادی نا درشان و آزادی صحافت آ لگوکا پابندی تیا ہم خلیس نا درشانی ء کرے و پارے کہ زوراکی نا بیگواہیک، بے دادی و انصاف نا حصول ئٹ اڑاند آک قبول مننگ نا وڑ ئٹ افس۔
یورپی یونین سوج کرے کہ حکومت پاکستان نفرت تالان کروک آتا برخلاف انت گام ارفینے؟
یاتی مرے ک 3 دسمبر آ سیالکوٹ ئٹ اسپورٹس گارمنٹ نا فیکٹری نا سری لنکن مینیجر پریا نتھا کمارا آ فیکٹری نا کاریم کروکاک مذہبی پوسٹر تے کشنگ نا دوبہ ء خلیسہ جہلو کریر، پریانتھا کمارا تینا ساہ ء بچِفینگ کن بڑزنا مزِل آلگا ولے فیکٹری نا کاریم کروک آک پدے تا ہلکر و چھت آ گھیرا کریر تا۔
بندغی است ہشوک آک دا خونی گوازی ء فیکٹری فیکٹری نا گاٹ آک تورننگ ئٹ بے سُہب مسُر، فیکٹری نا کاریمیک مینجر ء خلیسہ شیف ایسُر، انداخس خلکور تا کہ سا تس، وا ہم چُٹیفتاوس، جون ء گریسا فیکٹری آن پیشن چوک آ دریر لٹ خلکر، لغت خلکر لدو خاخر تسر تا۔
