بلوچستان نا دارالحکومت کوئٹہ قائد آباد ٹی ہمسایہ ہفت سال ئنا چنا اسیتون زوراکی کرینے، پولیسں نا رد ئٹ قائد آباد نا علاقہ ٹی رہینگوک شاری ئسے نا ہفت سال ئنا مسڑ تون قادر پنی ءُ ہمسایہ اس زوراکی کرینے۔
پولیس نا پاننگ ءِ زیمی آ مسڑ معائنہ کن سول اسپتال کوئٹہ آ راداہ کننگانے، ہراڑے ڈاکٹر آک چنا تون زوراکی مننگ ءِ پک کرینو۔
گیشتر حوال تا رد ئٹ چنا نا باوہ لمہ نا پاننگ ءِ زوراکی کروک آ بندغ عزم قادر ویل آن گڈ نرانے، ہرانا برخلاف مقدمہ نوشت کننگانے، و دزگیری کن چھاپہ خلینگ برجاہ ءِ۔
چُنکا مجید
نوشت: آکاش بلوچ | مٹ: شہزاد بلوچ
دی بلوچستان پوسٹ
18 اکتوبر 2010 نا دے چُنکا مجید جان ءِ ریاست نا ڈھکوک کارندہ آک اونا دکان آن بے گواہ کرسا 24 اکتوبر 2010 نا ہشت دے گُڈ شہید کرسا اونا چشوک لاش ءِ رابعہ خضداری خضدار سڑک نا کُنڈ ٸسے آن ملا۔ ہرانا جوْن ٸٹ ڈرل مشین ایلو سینہ ٹی 3 سُم ٸنا نشان ٸس۔
دژمن، مجید جان ءِ شہید کرسا اونا خاہوت ٸٹ خوف ودی کننگ نا بے سہب کوشست اس کرے، داکان مالو بھاز وار اُراغا چغلی بمب جہلو کریسک ولے دژمن ءِ دا سما الوکہ، دا اسہ سوگوْ ءُ فکر ٸسے ہرا شہادت آن پین سوگوْ مریک۔
ای اسُل اُستان دروفٹ ہمو دے ءِ ہرا وخت حیی پاروڑ تینٹ پارے مجید دژمن ءِ زندان ٸٹی ام خن نشان تراسا ایسری وخت وتن آ ندر مس، چُنکا مجید نا شہید نا بیرہ حالیت ءِ مٹ کرے بلکن سنگت نا شہادت آن گُڈ اسہ پین درغ اس ملنگا، رکھوک (شاری محاز) آ تولوک شہید حیی و شہید ضیاء عرف دلجان و ایلو سنگت آک شار ءِ خیر آباد پارسا مَش تیکن مون کریر۔
24 اکتوبر 2010 نا سہب ٸنا وخت کنا جغر نا ٹُکر سنگت چُنکا مجید نا جوْن ہرا وخت رابعہ روڈ خضدار آن ملا دا یکہ ءُ کیفیت اس ایس ننے آن بارنگا تیکن ولے سنگت و اونا خاہوت دا دے اکن مالو آن بیدار ئسر۔ مجید نا بے گواٸی و شہادت ننے آن بارنگا تے گوڑیفے ولے سنگت نثار آن بارنگا بہادر آتے کسر نشان ترسا و تُرندی ٸٹ دژمن تون جنگ کننگ کن بیدار کرے، سنگت مجید بلوچ تینا چُنکا وحی ٹی ہرا بادری تون اوار بیدادی سگسہ دژمن ءِ باور کرفے نن ہچو دُز، داڑیل افن، نن تون اسہ سوگوْ ءُ فکر ٸسے۔
نن تینا فکر آ گوری مننگ ءِ ترجیح تینہ، مجید ءِ باور اس دا کاروان کنے آن گُڈ پین سوگوی ٸٹ تینا مزِل نا پارہ غا روان مرو، اندا سوب آن تو مجید جان دژمن نا ام سوج نا ورندی ءِ تتو، ہراڑان دژمن طیش ٸٹ برسا مجید جان ءِ شہید کرے، اندا بہادری تو کنا سنگت نثار ءِ آٸن اس جوڑسا میدان جنگ ٸٹ بیدس خلیس آن جنگ کننگ ہیل تس، و امو ضیاء ایسری سُم تون اوار کُل راز آتے تینا سینہ ٹی ہر وخت کن جذب کرے۔
دوننگا بہادری نا قربانیک راج آتے کن چراغ نا وڑ اٹ مریرہ، ہمو چراغ ہرا تینا مِزل نا مسافر ءِ اونا کسر ءِ نشان تراسا اونا راہشونی ءِ کیک۔
مجید نا چُنکا جون آن وہو کا لہو آن لگوکا چراغاک تہار آ کسر تے ٸٹ سفر کروکاتے کسر نشان تس بلکن تُغ ٸٹ خاچوکا ورنا تے تُغ آن بیدار کرے, تینا سنگت اولی مجید, مجید ثانی نا پن ٸنا آبرو تخِسا وتن آ گوری مس, پارے مجید ہر دور ٸٹ جنگ کرو۔
چاڑندہ سال نا مجید دا کُل ءِ ہراکان ہیل کرے؟ دنو ارادہ، جوزہ ہرا اُستاد آن بس؟ دا عمر ٸٹ او تینا سنگت، دژمن ءِ امر چاٸس؟ دا کُل ہمو بہادر آ خاہوت نا دتر ٸٹ اوڑدہ مرور، سنگت نا شہادت اونا خاہوت ءِ نزور کننگ کتو۔ شہید مجید جان نا شہادت آن گُڈ اونا باوہ حاجی محمد رمضان نا شہادت مرے یا نومبر 2012 ہمو تارمہ انگا دے ہراٹی کنا اُستاد، سنگت حیی نا شہادت مرے یا 19 فروری 2018 سنگت ضیاء عرف دلجان نا بہادر آ شہادت مرے دا ورنا تا شہادت دا خاہوت ءِ سوگوْ کرے، لُمہ وتن ءِ ساہ بشخسا ساندہ کن نمیران مس۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
بلوچستان ئٹ نجی تیل کمپنی تا پارہ غان پیٹرول گڑا تا تننگ ئٹ کمبوتی نا سوب بھاز پمپ آک بند مسونو۔
آل بلوچستان پیٹرولیم ڈیلرز ایسوسی ایشن نا صدر سید قیام الدین آغا نا ردئٹ تدوک کئی تُوہ تیان نجی کمپنی تا پارہ غان بلوچستان نا پیٹرول پمپ آتے خواست نا کچ پیٹرول و ڈیزل تننگتنے ہرانا سوب آن کوئٹہ تون اوار تیوی بلوچستان ئٹ پیٹرول گڑا تا نیستی ودی مسونے۔
ڈپٹی کمشنر کوئٹہ عرفان نواز میمن پارینے کہ کراچی آن پی ایس او نا پیٹرول نا بھلو کچ اس رادہ کننگانے و تیل سر مننگ تون کوئٹہ ئٹ پیٹرول نا نیستی ایسر مرو۔ اونا پاننگ ئس کہ عئید آ شاری تے پیٹرول نا نیستی اس مفرو۔
پیٹرول رسینگپننگ نا سوب آن شاریک سختی تا گواچی ءُ و ہراڑے پیٹرول رسینگ ءِ ہمو پمپ آتیا گاڑی و موٹر سائیکل آتا مرغن آ قطار آک خننگرہ۔
وسیم تابش بلوچ نا آئین و قانود آ چپ بیگواہ کننگ ءِ اسہ تُوہ آن زیات مسونے ولے او دائسکان یلہ مننگ کتئو – بی ایس او پجار
بلوچ اسٹوڈنٹس آرگنائزیشن پجار نا بنجائی بیان ئٹ ترجمان پارینے کہ وندر زون نا آرگنائزر وسیم تابش بلوچ ءِ 9 جون آ خضدار علی ہسپتال آن دزگیر کننگا ہرا دوارہ بیگواہ مس۔ داسہ اسہ تُوہ آن زیات وخت گدرینگانے ولے دائسکان اونا یلہ کرفنگ کن نہ ضلعی بست و بند گڑاس کرے و نہ پولیس کرینگے۔
بیان اٹ پاننگانے کہ تابش وسیم اسہ پرامن سیاسی باسک ئسے ہرا تنظیم نا اسہ گچین ءُ ذمہ وار اوغدہ ئسے نا کوالخواہ ءِ و خوانندہ سیات ئٹ موہبر مسونے ولے اودے دُن آئین و قانود ءِ لتاڑسہ دزگیر کریسہ بیگواہ کننگ پرامن خوانندہ و ہر اسہ سیاسی باسک اکن بے جاراتی نا سوب ءِ۔
بی ایس او پجار نا بیان اٹ مُستی پاننگانے کہ اگہ تابش یلہ کننگ متئو گڑا عئید آن گُڈ برانزی تحریک نا پڑو کرون ہراٹی تیوہ غا بلوچستان ئٹ برانز، بھلا روڈ آتے بند کننگ و ہر ضلع ئٹ بین ہڑتالی کیمپ نا بناء کرون۔
چیف سیکریٹری بلوچستان مطہر نیاز نا دورہ پسنی آن گڈ محکمہ فشریز بلوچستان ئٹ کرپشن نا خلاف ایکشن، بیدس قانود ٹرالنگ ئٹ گمانی وڑ ئٹ ڈودار مننگ نا رِد ئٹ محکمہ فشریز حب نا اسسٹنٹ ڈائریکٹر نورالدین و اسسٹنٹ ڈائریکٹر فشریز پسنی گوادر محمد خالد نا برخلاف محکمانہ کاروائی کننگ نا موکل تننگا۔
بیدس قانود ٹرالنگ نا برخلاف ایم این اے لسبیلہ گوادر محمد اسلم بھوتانی نا راجی اسمبلی ٹی توار ارفنگ و وزیراعظم تون اوڑدئی کریسہ بیدس قانود ٹرالنگ تون اوار پسنی فش ہاربر اتھارٹی نا غیرفحالی نا بابت شکائست آن گڈ وزیراعظم نا پنت آتیا چیف سیکریٹری بلوچستان مطہر نیاز رانا برجاء توہ پسنی نا دورہ ءِ کریسہ مچی ہلوک آتون اسہ کھلی کچہری اسیٹی اوفتا ویل تا بابت حوال کرے۔ دا وخت آ مچی ہلوک آک تینے آ بیدادی و سمندر نا رہی بیدس قانود ٹرالنگ نا برخلاف چیف سیکریٹری نا مونا شکائست آتا ڈیر تے خلکر۔
چیف سیکریٹری بلوچستان مچی ہلوک آتے بھتہ خوری ٹی گمانی وڑ ئٹ اوار مروکا کوالخوا تا برخلاف کاروائی کننگ نا یخین ءِ تسوسس ہراڑا اوفک دمدستی تون ایکشن ہلیسہ حب و گوادر نا فشریز افسر آتا برخلاف کاروائی و ایف آئی آر کننگ نا حکم شینک کرینو، مچی ہلوک آتے و اینٹی کرپشن بلوچستان ءِ ہم دافتا برخلاف کاروائی نا موْکل ءِ تس۔
بلوچستان نا علاقہ حب ئٹ بشام نا پر تیان گڈ حب ڈیم ئٹی دیر بننگ نا لڑ برجاہ ءِ، ڈیم ئٹی دیر ئنا کچ 334 فٹ مسونے و ڈیم ئٹی بیرہ 5 فٹ دیر مچ کننگ نا گنجائش سلیس اسسٹنٹ کمشنر حب لیفٹیننٹ (ر) محمد احمد ظہیر حب ڈیم نا جانچ ہلک و کرش پلانٹ آتیان مشینری سر کننگ تون اوار دیر نا کنڈان زند کروکا بندغ آتے پارے دمدستی وڑ ئٹ جوان ءُ ہند ئسے آ کار۔
ایکسیئن ایری گیشن لسبیلہ عبدالجبار زہری پارے کہ اینو شام اسکا نوکاپ نا دیر ئنا حب ڈیم ئٹی بنگ نا گمان ارے ڈیم پور مننگ آن گڈ حب نا صنعتی و زرعی علاقہ کراچی حب و ہب کب نا علاقہ آتیٹ مخلوق نا کنوکا دیر ئنا خواست آتے پور کننگ کن ڈیم ئٹی مسہ سال ئنا دیر مچ مرو۔
اندن گوادر و کیچ ئنا جتا علاقہ آتیٹ بشام نا پر و بھس کرینے،ضلع کیچ ئنا جتا علاقہ آتیٹ تدوکا 24 گھنٹہ ٹی طوفانی آ پر تیان ہفتہ بندغ مرگ نا گواچی مسونے، و ہشت ٹپی مسونو،کیچ نا علاقہ پیدراک ٹی مسافر آن پور پک اپ گاڈی ء نوکاپ نا دیر درے ہرنا سوب آن زالبول تون اوار چار بندغ مرگ نا گواچی مسر چار ء بچفینو۔
ا ندن تربت سٹی ٹی چناک نوکاپ نا دیر ئٹی ہننگ مرگ نا گواچی مسر ، ناصر آباد ٹی اسکول نا دیوال تمنگ آن اسہ بندغ اس مرگ نا گواچی مسونے بشام نا پر تیان میرانی ڈیم لبریز مس،گوادر ٹی ہم تدوکا دے بیست و چار گھنٹہ ٹی مچے اورے اورے آ بشام نا پر تا لڑ برجاہ ء۔
بشام نا پر تیان گڈ ضلع آ علاقہ آتیٹ ڈور تیٹ ودکی بس شادی کور ڈیم و سوڑ ڈیم دیر آن پور مسونو پر آن گڈ
شار ئنا کسرک دریا تیان بار لگارا، طوفانی تہو تیان بھاز کمبہ آتا تمنگ آن بجلی نا بست و بند تینا مون مس۔
پاکستان ئٹ کورونا وائرس آن 24 گھنٹہ نا نیام ئٹی پین 38 بندغ مرگ نا گواچی مسونو، نیشنل کمانڈ اینڈ آپریشن سینٹر نا کنڈان شینک بیان نا رد ئٹ تدوکا 24 گھنٹہ نا نیام ئٹی کورونا نا پک کننگ کن 49 ہزار 247 ٹیسٹ کننگانے۔
ہرافتیٹ 2783 بندغ ٹی کورونا وائرس پک مسونے تیوہ آ پاکستان ئٹ داسکان کورونا نا پک مروکا مثبت کیس آتا کچ 986.668 مسونے، ہرافتیٹ 18.329 درواخ مسونو۔
تدوکا دے دا کسفوکا دین آن پین 38 بندغ مرگ نا گواچی مسونو، اندا وڑ پاکستان ئٹ داسکان دا دین آن کہوک بندغ آتا جمعی کچ 22 ہزار 760 مسونے۔
اوغانستان نا صوبہ کندھار ئٹ سم کاری آن اسہ انڈین صحافی اس خلنگانے۔
سم کاری نا ویل کندھار نا ضلع اسپین بولدک نا ہند آ مونا بس ہراڑے انڈیا نا صحافی دانش صدیقی خلنگا۔
یاتی مرے کہ اسپین بولدک اوغانستان نا پاکستان تون اوار آ سیمی علاقہ ءِ ہرادے تدوکا دے جنگ آن گڈ طالبان تینا کوزہ ٹی ہلکس۔
اوغان میڈیا نا رد ئٹ دا صحافی تدوکا دے تیان دا علاقہ ٹی رپورٹنگ کننگ اس کہ اوغان اسپیشل فورسز و طالبان نا نیام جھڑپ ئٹ خلنگا۔
داسکان طالبان نا ہیت آک دا بابت مونا بتنو۔
ایلو پارہ غان اوغانستان نا صوبہ کندھار ئٹ جنگ برجاء ءِ کابل آن دی بلوچستان پوسٹ نا رپورٹر ہسپتال کوالخواہ تا ہیت ءِ مستی دریسہ پارے کہ تدوکا 24 گھنٹہ ٹی کندھار نا میرویس اسپتال ئٹ 31 لس ءِ شاری و ارا پولیس کارندہ ٹپی تے ایسونو۔ 31 شاری تیٹ 10 زالبول اوار ءُ۔
اسپتال کوالخوا تا رد ئٹ ٹپی تے بولدک، پنجوائی کرز، میرویس مینہ، ارغنداب آن ایسونو۔
اوغان فورسز تا پارہ غان اسپین بولدک بارڈر کراسنگ نا کنٹرول ءِ دوئی کننگ کن فوج ئنا آپریشن برجاء ءِ۔ اوغان فورسز و طالبان تیٹ سخت حالیت نا جھڑپ آک برجاء ءُ۔
بلوچستان نا علاقہ بیلہ ٹی آر سی ڈی کسر آ ٹرک نا ڈک لگنگ آن اسہ بندغ اس بیران و ارٹمی ٹپی مس۔
گیشتری حوال آتا رد اٹ جمعہ نا سہب آ کوئٹہ کراچی آر سی ڈی کسر سنگری کراڑو نا ہند آ ٹرک نا ڈک لگنگ آن موٹرسائیکل آ سوار جمعیت علمائے اسلام جھاو نا راہشون مولانا عبدالعزیز سرمستانی نا ایلم عبدالواحد خدا بخش سر مستانی بلوچ نا مار بیران و مولانا عبدالعزیز ٹپی مس۔
حوال آ تا رد اٹ جون و ٹپی آ بندغ ءِ ریسکیو 1122 نا باسک آک سول ہسپتال بیلہ غا سر کریر ہراڑے ڈاکٹر و لسبیلہ ویلفیئر ٹرسٹ نا رضاکار آک سید زینل شاہ کریم بلوچ و ایلو ٹپی تے علاج کن مدت کریر و الّمی کاروائی تیان پد جوْن ءِ اونا خاہوت تا دوٹی تسر۔
پین حوال ئسے نا ردئٹ کراچی آن پسنی آ ہنوکا اسہ لاری ئسے نا برک آک کاریم ہلار ہرانا سوب آن گاڑی مَش تون ویل نا گواچی مس ہرانا سوب آن مسہ بندغ بھاز ٹپی مسر، مسٹنگا ٹپی تے زو ہندی ہسپتال آ سر کننگا۔
اندن بلوچستان نا علاقہ مستونگ کھڈ کوچہ غان خڑک، تُرند ہننگ نا سوب آن گاڑی چپی مس ہرانا سوب آن مسہ بندغ بیران و اسٹ اس ٹپی مس۔
گیشتری حوال تا رد اٹ کھڈ کوچہ آن خڑک کوئٹہ غان خضدار آ ہنوکا ٹوڈی گاڑی چپی مس ہرانا سوب آن مسہ بندغ محمد خان، جاوید اختر و نصیر احمد ہمو جاگہ غا بیران و محمد عارص ٹپی مس ہرادے زو شہید غوث بخش رئیسانی میموریل ہسپتال آ سر کریر و جون آ تے ضابطے نا کاروائی آن پد خاہوت تا دوٹی تسر و ٹپی تے درمان کننگا۔
بلوچستان ناضلع کیچ نا بنجائی شار تربت ٹی پِر بھس کاری کرے۔ تربت نا یوسی پیدراک نا علاقہ نیامی کلگ جمک آ ہننگ آ مسافر گاڑی ءِ نوکاپ نا دیر درے۔
حوال تا رد ئٹ گاڑی ٹی یانزدہ بندغ سوار ئسر، دمدستی حوال رسینگتون کمشنر مکران و ڈپٹی کمشنر کیچ نا پاننگ آ اے ڈی سی تابش بلوچ، اے سی تربت عقیل کریم، ڈپٹی ڈائریکٹر پی ڈی ایم اے مکران ملک ریحان دشتی، ریسکیو کن پیدارک مرگاپ ڈور نا ہند آ شام ئنا سر مریسہ کمکی کارروائیاں بناء کریر۔
لیویز آن رسینگوک حوال تا رد ئٹ مرگاپ دیر ٹی چُلک نا سوب آن گاڑی ءِ نوکاپ نا دیر درینے۔
گاڑی ڈرائیور شکیل گنگزار نا جوْن شام ئنا کشینگا، اندن ارٹ پین ٹپی آ حالیت ٹی ریسکیو کننگانو، ہرافتے شام ئنا دوا درمان کننگ کن ہسپتال آ رادہ کننگا۔
ایلو زالبول و چنا تون اوار مسہ بندغ ءِ نوکاپ نا دیر درینے، ہرافتیٹ اسہ 45 سال ئنا زالبول ئسے نا جوْن ضلعی بند و بست و پی ڈی ایم اے نا باسک آک شام ئنا مسہ بجہ آ مسہ کلومیٹر مر آن خنانو۔
ہندی بند و بست نا رد ئٹ اینو اسہ چاڑدہ سال ئنا مار و اسہ 09 سال ئنا مسڑ ئسے نا جون اینو سہب ئنا یانزدہ آ خننگانے، شام و مشی لڑ مننگ نا سوب آن ریسکیو ٹیم ء سختی تو مون تروئی تمانے، اینوجمعہ نا سہب ضلعی بند و بست نا ٹیم پٹنگ ءِ واپس بناء کرینے-
