ننا بندی تا قصہ ئے ننا بندیک نیتونو
امو بے مٹ منٹ اسر امو چندیک نیتونو

اموتے کلے نن چانہ پنٹ رنگٹ دروشم اٹ
اراتا مول دا پاہک جہی ہندیک نیتونو

امو بسر جھلٹ چھر اٹ دتر تے شولسہ تینا
کسر نا دنز تا پاہک امو ٹھپیک نیتونو

ارک ننتو سلیس انتس ارک نیتو رسینگا انت
ننا بھاتی تایاداکو ننا کپیک نیتونو

امر ای جو تفر نیتو امر جی پاو جی جی کیو
کنا کل بشخ انا منظور امو ٹیکیک نیتونو

پروفیسر منظور بلوچ

کوئٹہ نا سرینا ہوٹل اٹ مروک آ کار بمب تراک ئٹ پنچ بندغ مرگ نا گواچی و بھازاک ٹپی مسونو۔ تراک نا ذمہ واری ءِ تحریک طالبان پاکستان ارفینے۔

بلوچستان نا دارالحکومت کوئٹہ ئٹ چار شمبے نا نن آ دا تراک سرینا ہوٹل نا پارکنگ ئٹ مس ہراٹی پنچ بندغ مرگ نا گواچی و دوانزہ پین ٹپی مسر۔ ہندی وخت آ نن نا کم و وَد یانزدہ بجہ غا مس۔

پولیس کوالخوا تا ردئٹ پاش اندن گمان مریک کہ تراک نا مواد آک کاڑی اسیٹی تخنگاسر۔ مرگ نا گواچی مروک آتیٹ اسہ فرنٹ لائن منیجر و اسہ ہندی پولیس کانسٹیبل اس ہم اوار ءِ۔ ٹپ تے ہندی ہسپتال تیا دننگانے۔

ہندی ٹی وی چینل آک دا تراک آن گڈ دمدستی تون ندارہ تے شینک کریر، دافتیٹ پارکنگ ئٹ بُن ہلوک کار تے ہم خننگ مریک۔

دا جلہو آن گڈ زوت صوبائی وزیر داخلہ ضیاء اللہ اسہ پریس کانفرنس اس کرے و پارے “دا دہشتگردی نا تدینی تیٹ تینٹ ننا بندغ آک اوار ءُ۔”

حوال تا ردئٹ دا تراک اندنو وخت ئسے آ مس ہراتم چینی سفارت کار کوئٹہ نا دورہ آ ئس۔ واہم صوبائی وزیر داخلہ میر ضیاء اللہ نا پاننگ ئس کہ تراک نا وخت آ چینی سفارت ہوٹل اٹ اَلو بلکن کوئٹہ کلب ئٹ ساڑی ئس۔ او دا ہم پارے کہ تراک آن گڈ چینی سفیر تون اونا اوڑدئی مس ہرا گچین ءُ موڈ اسیٹی ئس۔

کوئٹہ: سرینا ہوٹل اٹ بم تراک

بلوچستان نا دارالحکومت کوئٹہ ئٹ پنی آ سرینا ہوٹل ئٹ بم تراک نا سوب آن بھازاک ٹپی و مرگ نا گواچی مسونو۔

بنائی حوال تا ردئٹ تراک ہوٹل نا پارکنگ اٹ مسونے ہراڑان بھازا گاڑی تے نسخان رسینگانے و خاخر لگانے۔#TBPNews | #Quetta pic.twitter.com/TGXlqhmRwM

— The Balochistan Post – Brahui (@TBP_Brahui) April 21, 2021

کوئٹہ ئٹ ہرا سرینا ہوٹل ئٹ دا تراک مس او دا شار نا اسٹ آ فائیو اسٹار ہوٹل ءِ و داڑے بروک آک زیات پیشن نا سیل و سوات کروک آک انداڑے ہندی مریرہ۔ سیکورٹی نا ردئٹ دا بھاز حساس ءُ علاقہ ئسے۔ اندا ہوٹل نا مون آ کوئٹہ نا فوجی چھاؤنی ءِ، اندن داڑتون بلوچستان اسمبلی ءِ و خڑک آ ریاستی ہوئی کورٹ ءِ۔

پاکستان نا رکھ خلنگوک شدت پسند تنظیم تحریک طالبان دا جلہو نا ذمہ واری ءِ قبول کرینے۔ دا گروپ حوالکاری ادارہ روئٹرز ءِ رادہ کروک اسہ کلہو اسیٹی پارے “دا اسہ وت کش جلہو اس ئس ہراٹی ننا اسہ وت کش بمبار اس مواد آن پُر اسہ کار ئسے ہوٹل نا تہٹی کاریم ئٹی ایس۔

براہوئی بولی نا پنی آ زانتکار بلوچستان یونیورسٹی نا پروفیسر (ر) ڈاکٹر حمید شاہوانی ناگہتہ کذیت کرے۔

ڈاکٹر حمید شاہوانی نا جہی آ جاگہ مستونگ ءِ، او بلوچستان یونیورسٹی براہوئی ڈیپارٹمنٹ ٹی چیئرمین ام مسونے اندن بلوچستان اسٹڈی سینٹر نا ڈائریکٹر و ڈین آف فیکلی لینگویج ام مسونے۔

ڈاکٹر حمید شاہوانی براہوئی بولی نا استاد اسینا حیثیت ٹی تینا خذمت آتے براہوئی بولی و ادب کن تسونے اندن ادبی تنظیم آتا عہدیدار آتون اوار کہی کتاب آتے ام نوشتہ کرینے۔

ڈاکٹر حمید شاہوانی نا کذیت آ بلوچ ادب تون تفوک آ کہی بندغ آک است ہسونی و افسوس نا درشانی کرینو۔

بلوچی بولی نا شاعر و بلوچی میوزک پروموٹر سوسائٹی نا بنجائی باسک ظفر اکبر نا چُنک سن آ مار حمل ظفر کیسنر تون مون تریسہ درو کذیت کرے۔

خاہوت نا پاننگ ءِ کہ دتر نا کینسر نا گواچی حمل ظفر استو خفتہ نا نماز آن گُڈ کراچی ٹی کذیت کرے۔

یاتی مرے حمل ظفر بلوچ نا جانجوڑی کن اوست ویلفیئر آرگنائزیشن پنی اسہ غیر سرکاری تنظیم اس مہم نا بناء ءِ کرے و اِرا سال ئٹ دا تنظیم زر والا مخلوق نا کمک ئٹ حمل ظفر بلوچ نا جانجوڑی کن جہد کرے۔

بلوچستان نا جتا علاقہ آتیٹ دا وخت درزن آتیٹ مخلوق کینسر نا گواچی ءُ، و دا وخت اسکان بھازاک ہرافتیٹ چُنا و ورنا ءُ، زند ءِ یلہ کرینو۔ کینسر نا مرض ئٹ بلوچستان نا بھازا علاقہ آتیان و خاص خضدار و نوشکے ئٹ مخلوق گواچی ءِ۔

بلوچستان ئٹ چاگڑدی و سیاسی باسک و تنظیم تا پارہ غان بھاز وار خواست کننگانے کہ کینسر نا مرض ئٹ ودکی ءِ توننگ کن گام ارفنگہ و بلچستان ئٹ کینسر ہسپتال اس ٹہیفنگہ۔

بلوچستان نا علاقہ دکی ٹی کولا کانڑ ئٹ زاری گیس نا سوب آن تراک آن گڈ ریسکیو آپریشن پورو مس، تیوہ غا ہشت ٹپی تے کشیسہ ہسپتال آ دننگانے۔

مائنز انسپکٹر صابر شاہ نا رد ئٹ دکی ئٹ کولا کانڑ ئٹ زاری گیس نا سوب تراک آن گڈ ریسکیو آپریشن پورو مس، تراک نا سوب کانڑ ئٹ پُتک ہلیسہ ٹپی مروک آ تیوہ غا ہشت مزورکار آتے کشنگا۔

ہرافتے دمدستی تون ڈی ایچ کیو دکی سرکننگا ہراڑے اوفتے بنائی جانجوڑی کمک آن گڈ کوئٹہ کن رادہ کننگا، ٹپی مروک ہفت نا حالیت بد پاننگک۔

امر جلیل نا خدا و ننا خدا

نوشت: محمد حنیف | مَٹ: عتیق آسکوہ بلوچ

دی بلوچستان پوسٹ

نیم سینئر چمشانک کار آتیٹ نازش بروئی کنے دوست بریک۔ حکومت داسہ ہنا کہ ایسہ ہنا والا چمشانک آتیان پرہیز کیک۔ فرہنگی تا نسل پرستی والا بیان تیٹی ملا نصرالدین نا لطیفہ تے بنفک۔

سیاسی و تاریخی شعور تون اوار اوار مَٹ مروک آ ربیدگی رویہ تیا ہم خن خلوک مریک۔ نوشتہ کیک انگریزی ئٹ ولے متل بلوچی بولی نا کاریم اٹ ہتیک۔ ننا زند ئنا زیات مروک سرگڑدانی تیٹ ہم امیت نا روشنائی پٹک۔

منہ تُوہ مالو او راجی حوالکاری تلہ غا نوشتہ کرے کہ اخس جُوانو ہیت ئسے کہ نن تینا ملک ئٹ ہر ڈول نا بے شرفی پٹینہ ولے خدا پاک نا شان ئٹ بے شرفی نا ہچو دود اس اف۔ ای ہم خوانسہ کاٹم ءِ سرفیٹ کہ آھو او تو بے نیاز ءِ۔

منہ ہفتہ آن گڈ سُہب تون بش مسوٹ گڑا سما تما کہ سندھ ئنا زندہ پیر و دوست آ نوشتکار امر جلیل آ بے شرفی نا دوبہ لگاسس۔ ای خناٹ کہ ہرا بے شرفی نا دوبہ خلیرہ ہمو اودے زیات تالان کیرہ۔

اسہ ادبی مُچی اسیٹی خواننگوک اونا کسہ نا منہ سال متکنا ویڈیو اونا بے شرفی کننگ نا شاہدی ئٹ مونا ہتنگسہ ءِ۔ کاٹم جوْن آن جتا کننگ نا نعرہ راجی حوالکاری میڈیا ٹی تالان ءِ۔

دیخہ زیات دلیل تون ہیت کروک آک دا خواست ءِ ہم کننگ ئسر کہ ویڈیو ئٹ سد آ بنوک آک ساڑی ءُ ہرا اندا کسہ آن چس ہلنگ ءُ گڑا او تیوہ غاتیا ہم بے شرفی نا مقدمہ مریک۔

ای تینا زند ئٹ بلکن اسہ ادیب ئسے دا مابت رسینگ آ خنانٹ اخس امر جلیل ءِ۔ ادبی مُچی اسیٹی بریک گڑا اونا بنوک آتیٹ مُسہ زنک ئنا مخلوق مریک۔ وہیل چیئر آتیا تولوک پیر انگا ہم و میٹرک نا خوانندہ ہم۔

اسہ وار اسہ سنگت اس پاریسس کہ داخہ بندغ تو تیوہ غا سندھی قوم پرست آک اوار مریسہ مُچ کننگ کپسہ اخس دا تنیا امر جلیل کیک۔

ہشوک آ ہیت ءِ ہم امر اندن ہنینی تون پاریکہ کہ کس ئنا بے شرفی مننگ آ مرے گڑا اودے ہم سما تمپ۔ ای لس حالیت ئٹ بے شرفی والا مواد انٹرنیٹ آ پٹیپرہ (دا اندنے دنکہ کس سہب تون بش مریسہ خلق ئٹ سر ہلے و ہرکس آن سوج کریسہ کے کہ اینو کنا لمہ ءِ کرینگ دیر دیر تسونو۔)

سنگت آتیان سوج کریٹ گڑا سما تما کہ گوڑیفوک ءُ کیس اس مسونے امر جلیل آ پروردگار نا بے شرفی نا دوبہ ءِ۔

اسیکہ است ئٹ بس کہ بھلو نوشتکار ئسے پھڈہ ہم بھلو کرو۔ ولے دوارہ کسفنگ نا تڑیک و اُمت اخبار نا سرخی خناٹ گڑا اُست اٹ خلیس تما۔ امر جلیل کن و تینکن ہم۔

ٹَک خلکٹ کہ انت ننے تینا خدا تون ہیت کننگ کن ہم ٹوئٹر آ بے شرفی پٹوک لوَنڈ آتیان موْکل ہلوئی تمو؟ چُنکی ٹی قصص الانبیا ئٹ خوانوک اسہ تدینی اس ہم یات بس ہراتم حضرت موسیٰ اسہ گڈریہ ئسے غُر تس و دوارہ خدا موسیٰ ءِ غُر تس کہ کنا بندہ ءِ کنتون مابت نا ہیت کننگ ءِ نی نیامٹ انتکن بریسہ۔

ای سندھ اٹ صحافی سنگت آتیان سوج کریٹ کہ سندھی میڈیا ئٹ امر جلیل نا کوریج امر مننگے۔ سما تما کم کم۔ منہ سنگت پاریر کہ نن فساد و فتنہ تالان کننگ خواپنہ ہرا اسہ صائب ہیت ئسے۔

منٹ پاریر مولوی تیان خُلوک اُن، ای پاریٹ دا اوڑان ہم صائب ءُ ہیت ئسے۔

ننا رہی آ بے شرفی نا پٹوک و بے شرفی کروک نا شکاری اسہ تپہ ئسے ہرا سیاسی ءِ۔ پاکستان نا مسٹمیکو یا چارمیکو بھلا سیاسی جماعت ءِ اونا بھلا اسلام آباد ءِ اندن گیڑ کریکہ دکہ قرونِ اولی نا مجاہدین قیصر و کسریٰ نا کریرہ۔

و ہرا قانون برجاء تخوک آک بسرہ و داسہ ہم بریرہ اوفتے اسیکہ تینا مسلمانی ءِ پک کروئی تمک۔

گوڑینگ مرے ولے مس کہ اینو اگہ امر جلیل نا کسہ ئٹ بے شرفی پٹنگا گڑا پگہ اوفتا روحانی باوہ شاہ لطیف و سچل سرمت نا دیوان ہم ہشنگور، قبر آک ماس کش کننگور۔ دوارہ یات بس کہ لال شہباز قلندر نا مزار تو دتر اٹ اسٹ مسونے داسہ انتکن گوڑینگسہ۔

دوارہ نازش بروئی نا اسہ متکنو مضمون اس خواناٹ ہراٹی او بے شرفی نا ویل ءِ اسہ مقدس ءُ نشہ اسیتون دروشم تسوسس۔

نازش دا تو نوشتہ کتئو ولے ای سرپد مسوٹ کہ اسٹ نا مون آ لعنت نوشتہ کریسہ کاٹم ءِ جوْن آن جتا نا نعرہ خلوک ئٹی ہمو کیفیت مرو ہرا معیاری ہیروئن نا اولیکو کش ءِ خلنگ آ مرو۔

اینو پگہ سُہب تون بش مننگ تون ننے مُتکنا نشئی تیانبار بے جاراتی مریک۔ ہراتم اسکان بے شرفی والا کش ءِ خلپن ہزبہ غاک جارات کپسہ۔

ہرا دے اسہ عیسائی مسڑ چُنا، اسہ خواری کش نرس، اسہ بخال چُنا اس رسینگپک گڑا تینا چِر اٹ پٹنہ۔ اوڑے رسینگتئو گڑا گوگل آ دنیا نا نقشہ ءِ ملینہ تولنہ و بے شرفی کروک آتا پٹنگ کن سر ہلینہ۔

داسہ کراچی ٹی ہندی ننا امر جلیل ہم بے شرفی کروک و ننا باوہ پیرئی شار اوکاڑہ آن لاہور آ بریسہ بھلو شو مین اس مروکا آفتاب اقبال ہم بے شرفی کروک۔

نازش تون بھاز دے آن ہیت متنے ولے کنے یخین ءِ کہ او بے شرفی تا دا مُد ئٹ ہم امیت اس پٹاکہ و پاریکہ کہ اسہ وار ہراتم نن کُل آ بے شرفی نا دوبہ لگہ گڑا ننے بلکن اسہ روحانی ڈول نا ہرڈ امیونٹی رسینگو و نن تیوہ غا گل و بال بے شرفی نا زند اس گدارون۔

بلوچستان نا بھلا یونیورسٹی جامعہ بلوچستان ٹی ام کرونا وائرس نا کیس آتیٹی گیشتری مننگے۔ اندا سوب آن اینو یونیورسٹی نا غٹ کلاس آتے بند کننگ نا پڑو کننگانے۔

جامعہ بلوچستان نا رجسٹرار گل محمد کاکڑ نا پارہ غان کلاس آتے بند کننگ نا پڑو کرسٹ پارینے یونیورسٹی ٹی کئی ڈیپارٹمنٹ آتیٹی کرونا وائرس نا کیس آک مونا بسونو خاص کر کمپیوٹر سائنس ڈیپارٹمنٹ و فارمیسی ڈیپارٹمنٹ ٹی کرونا وائرس نا کیس آ پک مسونو۔

ہرانا سوب آن کلاس آتے بند کننگ نا پڑو کریسہ تیوی یونیورسٹی غٹ بندغ آتے کرونا نا ٹیسٹ کننگ مریک ولے زوت آن زوت کلاس آتے ولدا ملننگ نا پڑو کرون۔

یاتی مرے داڑان مست ام کرونا وائرس نا سوب آن کوئٹہ ٹی سردار بہادر خان یونیورسٹی و آئی ٹی یونیورسٹی ءِ بند کننگانے۔

خدا بے ڈس مسونے

نوشت: امر جلیل | مٹ: عتیق آسکوہ بلوچ

دی بلوچستان پوسٹ

منہ دے آن خدا بے ڈس مسونے، کنا سنگت ءِ، ننا اسٹ ایلو تون جیڑہ ہم متوسس بس سلوک سلوک بے ڈس۔ منہ ساہت اکن کنے گمان مس کہ خدا ءِ پک بے ڈس کروک آک بے ڈس کرینو، اوفتا رہی آن واپس بننگ بھلو خواری ئسے، خدا داسہ ہچبر واپس بروف و اگہ وختس واپس بس تو او کنے درست کپرو بلکن کس ءِ ہم درست کپرو تینا خدائی ءِ ہم گیرام کرو داڑ اسکان کہ اودے تینا پن ہم یات مفرو۔

انتیکہ بے ڈس کروک آتا رہی آن واپس مننگ آن گڈ زیات اندن مریک، اسہ وار ننا سنگت دھنی بخش ءِ بے ڈس کننگاسس، سیال و قریب آک گمان کریر کہ خلنگانے، ولے ناگمان تینا پنچمیکو سال دے آ فریشانی نا حالیت تون واپس بس، مغفرت کن دعا کروک آتیتون توس و دوتے بڑز کریسہ تینکن مغفرت و جنت الفردوس اٹ ہند اس خواہنگا آ لگا، مخلوق درست کرے، اُرا نا تہٹی دریر، او تینا زائیفہ ءِ تاتہ و تاتہ ءِ تینا زائیفہ سرپد مس، تینا ہلہ ءِ طالبان نا شہید اعظم ضیاء الحق سرپد مس، اینو پگہ گدو بندر (حیدر آباد نا تاریخی آ گنوک آتا ہند و ساڑی دماغی ناجوڑی تا بھلا ہسپتال) ئٹ بند ءِ و رنگ آتا فرخ ئٹ اڑینگوک ءِ، وانگڑ ءِ مولی و مولی ءِ وانگڑ سرپد مریک۔ کنے خلیس ئس کہ بے ڈس کروک آک خدا تون ہم دھنی بخش آنبار کروک مفس، خدا اگہ پیہن و مون نا فرخ ءِ بے خیال کرے گڑا کاروکاری نا جاگہ غا او پیہن و پیہنی کریسہ کسفو، خلیس تون اڑینگوک کنے گمان مس کہ خدا آخر ہراتم خدا ءِ، بے ڈس کروک آتے بے ڈس کریسہ واپس برو، کنے آن بیدس مننگ کپرو، ای ہم اوڑان بیدس مننگ کپرہ، کنے یخین ءِ کہ خدا واپس برو، ولے کنا سیال، سنگت و دژمن تا پاننگ ءِ کہ کنا خدا واپس بفرو، اوفتا ردئٹ ای ہرادے خدا سرپد مسونٹ او گواچن ئٹ سرگواسی گوپال داس نا روح ءِ، سرگواسی گوپال داس کنا ہم سن ئس و پیری ئٹ دین ءِ مٹ کریسہ مسلمان مسوسس، خُلوک اس ئس اندا سوب سنت کرفتوسس، پن خدا بخش تخاسس ولے خدو نا پن ئٹ پنی ئس، روچہ نماز نا پکا ئس، پنچ وخت مسیت ئٹ خننگاکہ۔

اسہ دے مولوی صاحب خدا بخش عرف خدو ءِ اسہ کنڈ اسیٹی درے و پارے کہ بِن خدا بخش نی ہراتم اسکان سنت کرفپیسہ او وخت اسکان پک ءُ مسلمان اس مننگ کپیسہ، خدا بخش عرف خدو لڑزہ ٹی بس، اوڑا بیم تالان مس۔ ٹَک خلک کہ دین ءِ مٹ کریسہ اسیکہ وا گوپال داس مریو گڑا سنت کرفنگ آ بچیوہ، سنگت آتون صلہ کرے، سنگت آک خبڑدار کریر داسہ واپس دین ءِ ہلاس مرتد مریسہ کہوس، واجب القتل پن کننگوس و خلنگوس، داسہ نا مرضی ءِ کہ زند ءِ بچفسہ یا سنت ءِ بچفسہ۔۔۔۔ خدا بخش زند ءِ گچین کرے، سنگت آک کاٹم آ دستار تفیر، لخ ئٹ پُھل آتا ہار شاغار و نائی نا رہی آ دریر، او وخت اسکان خلیس ئٹ خدا بخش نا نیم ساہ ہنیسہ کرے، چچی آنبار لرزہ ٹی بس، سنگت آک بٹیسہ دوٹی ہلکر تا، نت دو خلک، بیوس آ نائی آن رد اس مس و اِٹ کرے، استرہ خدا بخش نا کاریم ءِ لُڑفیسس، داخس دتر وہا کہ ہسپتال سر مننگ اسکان ساہ تس، داٹی ہچو شک اس اف کہ خدا بخش نا کہنگ آ کنا اُست بھاز ہسون مس ولے دا اسل رد ءِ کہ خدا بخش نا روح کنتون حوال ئٹی ءِ یا ای خدا بخش نا روح تون حوال ئٹی اٹ۔

ای ہراتم آن ہوش سنبھالان اٹ خدا کنتون ءِ، ای ہراتم کھلونہ غاتیتون گوازی کریٹہ او وخت خدا ہم کنتون اوار تولسہ گوازی کریکہ، ای گلی ٹی ٹِلی کریٹہ گڑا خدا کنتون ٹِلی کریکہ، اسکول ئٹ، کالج ئٹ، یونیورسٹی ئٹ کنتون مسکہ، کنتون اوار سینیما ئٹ فلم اُراکہ، دا ہمو دے تا ہیت ءِ ہراتم سندھ نا مغل اعظم صدر کراچی ئٹ سینیما نا پیشن ٹکٹ بلیک ئٹ بہا کریکہ او وخت اسکان شہزادہ سلیم ودی متویسس۔

کنا پاننگ نا مطلب ءِ کہ خدا کنا وہم اف، او ساڑی ءِ، ای اوڑان بیدس پورو افٹ، او کنے آن بیدس پورو اف، ای اریٹ تو او ارے، او متوکہ گڑا ہچس متوکہ، نئے ڈیہہ نہ آسمان نہ طوبے نہ دے نہ استارک، نہ مش نہ چیل نہ ریگستان نہ جنگل نہ دریا نہ انسان نہ سوئر، ہچس ہم متوکہ، او ارے گڑا ہر گڑا ارے، خدا ٹی بھازا جوانیک اریر، او سوختہ مفک، او کس آن بیر ہلپک، کس ءِ بیم بش کروک عذاب آتیان خلیفپک، کس ءِ داد ئنا جوفہ تفک، کس آن قربانی خواپک، کس ءِ عبادت کن بیوس کپک، خدا نا جوانی تا لڑ بھاز مرغن ءِ ولے خدا ٹی اسہ اِرا خامی ہم ارے دنکہ خدا ہچس کُننگ کپک، نہ برگر نہ بریانی، دا سرپد مفیرے کہ گڑاس کُننگ آن خدا نا ہاضمہ خراب مریک، نئے نئے دنو ہچو ہیتس اف۔

اسہ وار خدا کنتون لاہور آ بس، پھجے نا ہوٹل ٹی تولوک ئسون، ای تولوک سرپاچہ کُننگ ئسوٹ، خدا خنتے خلوک کنے اوننگ ئس، ای اسہ باخو اس خدا نا پارہ غا مریفسہ پاریٹ کہ اسہ باخو اس کُننگ آن کہیپیسہ، خدا پارے کہیرہ تو انسان آک۔۔۔ ای خدا اٹ ای کہیپرہ، ای سوج کریٹ گڑا انتکن کنپیسہ؟ پارے کنیرہ بیرہ بندغ آک، ای خدا اٹ ای ہچ کنپرہ، ای پاریٹ سہی ءِ نا بشخ ئنا سرپاچہ ءِ ای کنیوہ، پارے ولے اسہ ہیت اس یات تخس، نی چاہے پھجے نا سرپاچہ نا دئے دیگ ہم کنیس چٹفس ولے نی پاکستان نا وزیراعظم مننگ کپیسہ۔۔۔۔

اسہ وار ای خدا ءِ سرگڑدار کریٹ، ای سوج کریٹ کہ نی اسہ لکھ بیست و چار ہزار نبی رادہ کرینس اوفتیٹ اسہ زالبول اس ہم اف، اسہ زالبول ئسے نبی کتوس۔۔۔ نی انتکن دن کریس؟ ورندی تننگ نا جاگہ غا داڑے ایڑے اوننگ آ لگا، ای پاریٹ کہ کنے سما ءِ نی انتکن دُن کریس انتیکہ نے لمہ و لمئی مہر نا بارہ ئٹ ہچس سما اف۔

کنا پارہ غا اریسہ پارے کہ کنتو مریسہ نی تینے خدا سرپد مننگ آ لگانس؟
ای پاریٹ کہ ای بخت والا ئسے اٹ کہ ای خدا افٹ، کنے اسہ لمہ اس ودی کرینے، اندا سوب کنے زالبول نا عظمت نا گمان ارے۔
خدا نی بخت والاس افیس کہ نے لمہ اس ودی کتنے، اندا سوب نے سما اف کہ اسہ لمہ و لمہ نا مہر انتس مریک، اگہ سما مسکہ گڑا دئے پانزدہ زالبول ءِ ہم نبی کریسہ الّمی رادہ کریسہ، نی دا جہان ءِ نرینہ تیکن جوڑ کرینس، راوان و بدروح تیکن جور کرینس۔۔۔
خدا پارے کہ پاسہ گڑا نے داسہ زالبول اس کیو؟
ای دمدستی تون پاریٹ کہ دنو ظلم کپیس، کنا چار اُرائی ءُ و چار پیشن والا، ای زالبول اس جوڑ مسوٹ گڑا برامی زند ئٹ ہڑاند اس برو، شرعی ویل اس ودی مرو و اسلامی جمہوری مملکت خداد نا آئین ئٹ ترمیم کروئی تمو۔۔۔

خدا ءِ بخت متئو کہ خدا نا لمہ اف، اودے کس ودی کتنے۔۔ خدا نا اسہ پین خامی اس بھاز افسوز نا ئسے، دڑد تروک ءِ، اُست ءِ ہسون کروک ءِ، کائنات نا ہر مخلوق کن جوڑی ودی کرے، نر چُک اکن مادہ، شیر اکن مادہ شیر، بندغ و سوئر آتیکن ہم جوڑی تخلیق کرینے ولے تینے تنیا تخا، تینکن مادہ ودی کتئو، چھڑا چھانڈ ءِ جہان شک ئنا چمشانک تون اریک، خدا اگاں بندغ اس مریسہ جہان اٹ برے گڑا اودے ہندی مننگ کن کس کرایہ غا اُرا اس ہم تف۔

جُوانیک انداخس کہ اوفتا حساب اف ولے خدا نا اسہ پین خامی اس کنے کُٹہ کیک، تولوک تولوک پائک کہ خوابو، انتس کہ خوارے، تیوی جہان کنے آن خوائسہ بسونے نی ہم خوا۔۔۔
ای پاوہ کہ نی بیرہ خدا مہ فضول ئٹ سر وزیر مفہ، کنے نے آن ہچو کنٹریکٹ ئسے نا خواست اف۔۔
دُن ءُ ورندی اس بنیسہ خدا دیخہ در ہم سوختہ متئو، دا خدائی سفت ئسے ہرا ننے ٹی اف۔

اسہ وار منگھو پیرنا مگر مچھ آتا رہی آ سلوک ئسون، اسہ دم تون پارے کہ نی کنے آن گڑاس خوا، نی خواپیسہ انتئے، گراس تو خوا۔۔
کنا ملی پیری کرے، است اٹ بس کہ دھکہ ایتیو مگر مچھ آک کنیر تا۔
داڑان مُست کہ خدا ءِ دھکہ ایتوسٹ، ای تینٹ لغوشت کریسہ تلاپ نا رہی آ تولوک بھلا مگر مچھ آتا نیامٹ ہناٹ تماٹ، مگر کچھ آک ہچ سُرتویس، گوڑینگاٹ، خدا آن سوج کریٹ کہ دا مش ئنا ڈوک آتیانبار آ مگرمچھ آک داخہ جانبڈ انتکن ءُ، خدا ورندی تس کہ دا سندھی مگرمچھ ءُ۔

اسہ وار نن بوٹ بیسن ٹی پیری کننگ ئسون، یکدم خدا پارے کہ کنے آن گڑاس خوا، پار انتکن خواسہ۔۔
ای پاریٹ کہ کنے کترینہ کیف ات ایت، ای کترینہ کیف آ عاشق مسونٹ، کترینہ کیف ات ایت۔
خدا پارے اڑے چادی، اسہ کترینہ کیف اکن اِرا ملک ئنا نیامٹ ایٹمی جنگ کرفسہ انت۔
ای سوج کریٹ کترینہ کیف نا اہمیت کشمیر آن ہم زیات مسونے انت۔
پارے کہ کترینہ کیف کن مسٹمیکو جہانی جنگ نا گمان ءِ، ای نیکن جہانی امن ءِ خطرہ ٹی شاغپروٹ۔
ای پاریٹ نی ہم کنتون مریسہ مریسہ پیری تروک اس مسونس، ہیت ءِ چپ شاغاس۔

اوکان گڈ خدا کنے ہچ سوج کتئو کہ خوا انت خواسہ، و اوکان گڈ بھاز دے اسکان خدا کنے گڑا خواہنگ نا پاتئو۔ ای است اٹ خوش ئسوٹ کہ تنک کروک آ ہیت خدا نا ذہن آن پیشن مسونے، ہراڑا ای بھاز تنک مسوٹہ، خوا، منت کہ، کنے آن گڑاس خوا۔۔۔
خدا نا دا ہیت کنے ہچبر دوست بتوکہ، کنا عزت نفس ءِ مجروح کریکہ۔
اسہ وار ای داخس سوختہ مسوسٹ کہ صدر نا نیام آ چیہانٹ کریسہ پاریٹ فقیر اس افٹ۔۔۔۔ ای پنڈوخ ءُ پخیر اس افٹ۔۔۔۔۔۔ ای پنڈوخ اس افٹ۔۔۔۔۔۔۔۔ بننگ اس نہ خدا۔۔۔۔۔۔۔۔ ای نے آن پنڈہ خواپروٹ۔۔۔۔۔۔۔۔

کنا چیہانٹ ءِ بنیسہ مخلوق مچ مس، کنے آن بیدس کس خدا ءِ خننگ اَلو، اسہ پیر ءُ جوگی اس کنا کوپہ غا دو تخا، و پارے کہ دیر پائک نی پنڈوخ ئسے اُس۔۔۔۔۔ نیتون دیر پاننگ ءِ کہ نی کس آن پنڈہ خوا۔۔۔
ای خدا نا پارہ غا اشارہ کریسہ پاریٹ کہ دا پائک کہ کنے گڑاس خوا۔۔
کنے آن گڑاس خوا۔۔۔ کنے آن گڑاس خوا۔۔۔۔۔۔ ای ہچس خواپرہ۔
ای پنڈوخ اس افٹ۔۔۔
ای پنڈوخ اس افٹ۔۔۔
مخلوق دانگ اینگ اُرا، کس ہچس خنتو، کنے چادی سرپد مریسہ کنا حالیت آ ہلیسہ افسوز کریسہ ہنار۔

ولے کنا خوشفہمی اُرے اسکان سلتو، اسہ وار مفروک ءِ مروک کننگ کن ای سیم سر آن ایمون مریسہ ایلو پارہ غا ہناٹ سلیسٹ، کیکر نا درخت نا مون آ کُٹ ءِ تورسہ بیر خوائنگ آ لگاٹ، گڑا خدا نا توارے بنگٹ۔۔۔ کیکر آن بیر خوائنگ اُس۔۔۔ کنے آن خوا انت خواسہ۔
کنا پد آن بسوسس سلیسوسس۔
ای پاریٹ فضول اٹ بھلنی نشان تفہ، کنے سما ءِ نی ہچس تننگ کپیسہ۔
پاننگ آ لگا کہ اڑے نی گڑا خوائسہ تو اُر۔
ای پاریٹ نی فضول اٹ ضد کپہ خدا، کنے تننگ کن نیتون ہچ ہم اف۔
پارے ای خدا اٹ، ای ضد کپرہ، اینو خوا۔۔۔۔ انتس کہ خواسہ خوا۔
انت کہ است نا خوائے۔
ای پاریٹ سوچ خل۔
پارے سوچ بندغ آک خلیرہ، ای خدا اٹ، خوا انتس کہ خواسہ۔۔۔
ای پاریٹ سہی ءِ۔۔۔۔ اگہ تننگ کیسہ گڑا کنے تینا خدائی ءِ ایت۔۔۔۔ و تینٹ کنے آنبار بندغ اس مہ۔۔۔
کنے تینا خدائی ءِ ایت۔۔۔
و تینٹ بندغ اس مریسہ بہ۔
بس دوارہ چُھپی۔۔۔۔ اسل چُھپی تالان مس۔۔۔۔
دنکہ کرن آک گدرینگانو۔
ای چک ءِ ہڑساٹ اُراٹ
خدا بے ڈس مسوسس۔۔۔۔۔۔۔۔۔۔۔۔۔۔

_______________
اُردو مَٹ: ٹھاکر ظہیر حسین

محکمہ تعلیم بلوچستان نا پارہ غان بلوچستان ٹی کرونا وائرس نا سوب آن 19 اپریل آن اولیکو جماعت آن ہلیس ہشتمیکو جماعت اسکان کلاس آتے چنکا عئید اسکان بند کننگ نا پڑو کننگانے۔

صوبائی وزیر تعلیم سردار یار محمد رند احوالکار آتون ہیت و گپ کرسٹ پارے کہ نن وفاقی حکومت نا فیصلہ نا ردئٹ پگہ آن الیس تا چنکا عئید اسکان اولیکو جماعت آن الیس ہشتمیکو جماعت اسکان کلاس آک بند مریرہ۔

اندن او مونی پارینے کہ نوہمیکو جماعت آن ہلیس دوانزدہ میکو جماعت اسکان کلاس آک سخت ایس او پیز نا پابندی نا ردئٹ برجاء مریرہ ۔

یاتی مرے دا فیصلہ سرکاری و پرائیویٹ غٹ اسکول آتئے مریک اندن حکومت نا پارہ غان پاننگانے کہ پرائیویٹ اسکول والاتے ام دا پڑو نا پابند مروئی اگہ کس اس ام دا پڑو نا برخلاف کرے اونا خلاف قانودی کاروائی مننگ کیک۔

یاتی مرے داڑان مست ام کوئٹہ ٹی کرونا وائرس نا سوب آن چار اسکول و سردار بہادر خان یونیورسٹی، آئی ٹی یونیورسٹی ءِ بند کننگانے۔

بلوچستان نا بنجائی شار کوئٹہ ٹی کورونا وائرس کیس آتیٹ ودکی نا سوب آن حکومت شار ئٹی سمارٹ لاک ڈاؤن نا پڑو کریسس ولے سوداگر آک بلوچستان حکومت نا فیصلہ آن نمن مریسہ اینو تیوہ آ سوداگر آک مالو آن بار کاروبار ءِ برجاء تخار۔

شار ئٹی لاک ڈاون آن بیدس دکان و کاروباری ہند آتے ملینگ ءُ، جناح روڈ، لیاقت بازار، کندھاری بازار، مشن روڈ، عبدالستار روڈ تون اوار ایلو کاروباری علاقہ آتا دکان آک ہم ملینگار۔ سوداگر آک حکومت نا لاک ڈاون نا فیصلہ آن نمن مسر۔

دا وخت آ سوداگر آک پاریر کہ تدوکا سال ئنا وڑ کاروبار ءِ بھس مننگ کن ہلوفن۔ ٹکری حمید بنگلزئی پارے حکومت فیصلہ کریسہ باور تیتویسس، دسا کاروبار تے بند کروفن و سوداگر آتا کاروبار برجاہ مرو۔