رسینگوک حوال تا رد ئٹ بلوچستان نا شار چمن ٹی مروکا بمب تراک نا مقدمہ سی ٹی ڈی تھانہ کوئٹہ ٹی نوشت کننگانے۔

تدوکا دے چمن نا علاقہ شہید ساجد مہمند روڈ آ جمعیت علماء اسلام نظریاتی نا مروکا مچی گام ٹی بمب تراک نا مقدمہ نمبر 35/202 ہفتہ آ پولیس نا ڈیوٹی آفیسر نا مدعیت ٹی سی ٹی ڈی تھانہ کوئٹہ ٹی نا درست دہشت گرد آتا بر خلاف نوشتہ کننگانے۔

گیشتر حوال تا رد ئٹ مقدمہ ٹی خون، گام خون ، ایکسپلوزیو ایکٹ، انسداد دہشت گردی ایکٹ نا دفعہ7 اوار کننگانے۔

یاتی مرے تدوکا دے کوئٹہ چمن ٹی فلسطین نا حق کن اسے مچیگام اس کشینگا، مچیگام نا ایسر مننگ تون اوار اسے تراک اس مس ہرانا سوب آن شش بندغ بیران مسر و جمعیت علماء اسلام نظریاتی نا بنجائی نائب صدر مولانا عبدالقادر لونی تون اوار بھاز بندغ آک ٹپی مسر۔

رسینگوک حوال تا رد ئٹ کراچی ڈیفنس کھڈا مارکیٹ ٹی سکیورٹی گارڈ نا سم کاری آن ارا بندغ ٹپی مسونو۔ پولیسں نا پاننگ ءِ سم کاری نا ویل ڈیفنس کھڈا مارکیٹ ٹی گاڑی پارک کننگ آ چنکو ہیت ئسے آ بناء مس اندا نیام ئٹ سکیورٹی گارڈ سوختہ مس سم کاری کرے۔

پولیس نا پاننگ ءِ کہ ڈبل کیبن گاڑی ٹی سوار انگا بندغ موٹر سائیکل سوار آتے مُر کننگ کہ ہارن تس اوکان گڈ گاڑی آن سکیورٹی گارڈ دڑینگا بس و موٹرسائیکل سوار بندغ تون  خراب وڑ ئٹ ہیت کننگ ء بناء کرے۔

اوکان گڈ سکیورٹی گارڈ سم کاری کرے ہرانا سوب آن اسہ سم اس موٹر سائیکل سوار اصغر و پنڈوخ زالبول ئسے ہم لگا، ویل آن گڈگاڑی ٹی سوار بندغ گارڈ تون اوار نرا۔

گیشتر حوال تا رد ئٹ بندغ آک گارڈ ء ِتوریر،ویل ئنا حوال رسینگتون پولیسں ہند آ سر مننگ تون سکیورٹی گارڈ ذیشان ءِ تھانہ آ درے اندن ٹپی زالبول و نرینا ءِ ہم دوا درمان کننگ کن جناح اسپتال آ راداہ کننگا۔

رسینگوک حوال تا رد ئٹ کورونا وائرس آن پاکستان ئٹ  پین88 بندغ مرگ نا گواچی مسونو ہراڑان گڈ کہوک آتا کچ 20 ہزار 177 مسونے۔پاکستان ٹی کورونا نا پک مروکا کیس آتا کچ8 لکھ 97 ہزار 468 مسونے۔

نیشنل کمانڈ اینڈ آپریشن سینٹر پاننگ ء ِپسکونا اساب نا رد ئٹ تدوکا 24 سائت ئنا نیام ئٹی 4 ہزار 7 پسکونوکیسز رپورٹ مسونو۔

اندن پنجاب ٹی 3 لکھ 33 ہزار 57، سندھ ئٹی 3 لکھ 6 ہزار 707، خیبر پختونخوا ٹی اسہ لکھ 29 ہزار 13، بلوچستان ئٹ 24 ہزار 413، گلگت بلتستان ٹی 5 ہزار 471، اسلام آباد ٹی 80 ہزار 156 آ ندن آزاد کشمیر ٹی 18 ہزار 651 کیسز رپورٹ مسونے۔

گیشتر حوال تا رد ئٹ پاکستان ٹی اینو آن ویکسی نیشن نا پوسکنا لڑ بناء کننگانے، این سی او سی نا رد ئٹ 30 سال آن زیات عمر نا بندغ آتا ویکسی نیشن بناء کننگانے۔ اندن 30 سال آن زیات عمر نا بندغ آک تینے رجسٹر کیر، تینا شناختی کارڈ نمبر 1166 آ ایس ایم ایس کیر۔

حوال تا رد ئٹ کوئٹہ تون اوار تیوہ آ بلوچستان ئٹ روچہ و عئید آن گڈہم ککڑ نا نرخ ئٹی کمی مننگ کتو، 500 آن 600 رپئی کلو اسکا سو سودا مننگ ءِہرانا سوب آن مخلوق بھاز پریشانی تا گواچی ءِ۔

کوئٹہ نا شاریک ہیٹ ئنا سو کبین مننگ آن ککڑ نا سو ہلکورا، عئید آن مست نرخ آتیٹ ودکی تو ئس ولے عئید آن گڈ ہم نرخ آک کم مننگ کتوس، 510 رپئی ٹی سودا مروکا ککڑ داسا 550  رپئی کلو و مُر علاقہ آتیٹ 600 رپئی ٹی سودا مننگے  ہراکہ شاری تیا کبینی نا اسہ پین بارم ئسے، مخلوق ودوکا کبینی آن بھاز پریشان ءِ۔

شاری تا پاننگ ءِ کہ ہر گڑا کبین آن کبین مریسہ ءِ، و دا کبینی ٹی دا طوفان ءِ کنٹرول کننگ کس ئنا وس ئٹی اف۔ ککڑ نا سودا کروک آتا پاننگے  کہ مال ایلو جاگہ آتیٹ کبین بریک ہرا نرج آتیٹ کبینی نا سوب ءِ۔

بلوچستان نا سیم سر شار چمن ٹی مرغی بازار ٹی تراک اس مس ہرانا سوب آن شش بندغ بیران مسر ، نو بندغ آن زیات ٹپی مسونو ۔

احوال آتا ردئٹ چمن ٹی فلسطین نا حق کن اسے مچیگام اس کشینگا ۔ مچیگام نا ایسر مننگ تون اوار اسے تراک اس مس ہرانا سوب آن شش بندغ بیران مسر و جمعیت علماء اسلام نظریاتی نا بنجائی نائب صدر مولانا عبدالقادر لونی تون اوار کہی بندغ آک ٹپی مسونو ۔

یاتی مرے اینو یعنی 21 مئی نا دے تیوی پاکستان ئٹ فلسطین نا حق کن ہر جاگہ مچیگام اڈ تننگانے اندن پاکستان نا بنجائی شار اسلام آباد ٹی اسے مچیگام اس اڈ تننگا اراٹی پاکستان قومی اسمبلی نا اسپیکر اسد قیصر و پاکستان سینیٹ نا چیئرمین صادق سنجرانی اوار مرسٹ تینا خیال آتا درشانی کریر ۔

رسینگوک حوال تا رد ئٹ پنجگوربالی پَٹ آن فلائیٹ نا بند مننگ نا سوب آن علاقئی مخلوق بالی سفر نا آسراتی تیان بے بشخ مسونے،  2 فروری 2020 آن پنجگور بالی پٹ آن پی آئی اے نا فلائیٹ سروس تیوی بند کننگانے۔ و داڑتون اوار پی آئی اے نا کوالخوا  پی آئی اے پنجگور نا تیوہ آ اسٹافت و مڈیک ہم ایلو علاقہ آتیٹ شفٹ کننگانو۔

پنجگور بالی پٹ  بلوچستان ئٹی مست ئنا بالی پٹ آتیتون حساب مریک، دا بالی پٹ پاکستان نا ٹہیفنگ آن مست1940ٹی ساڑی ئس ولے او وخت انگریزی رجیم نا کاریم ٹی ئس 1963ٹی پنجگور بالی پٹ بلڈنگ نا کاریم بناء مس و 1965 ٹی پنجگور آن کراچی کن  پی آئی اے نا سروس بناء کننگا ولے او وخت ئٹی رن وے کچا ئس، پِر ئنا مد ئٹی بھاز دے  فلائیٹ پد بیٹنگاکا۔

اندن 1986 ٹی پنجگور بالی پٹ نا رن وے دیر گریڈ کننگ آن گڈ سوگوکننگا، پنجگور بالی پٹ بھاز  اہمیت تخک، جہانی بالی روٹ آ ٹہیفوک نا سوب آن بالی

ٹریفک کنٹرول سسٹم ہم ارے،و پنجگوربالی پٹ آن ہڑدے کراچی کوئٹہ تربت کن فلائیٹ مسوکا۔

اندن اوکان گڈ فلائیٹ کم کننگا، و 2 فروری 2020 آن پنجگور فلائیٹ تیوہ بند کننگا و علاقائی مخلوق بالی سفر نا آسراتی تیان بے بشخ مسر۔

رسینگوک حوال تا رد ئٹ بھارت ٹی کورونا تباہی بش کرے، پین 3 ہزار 880 بندغ  مرگ نا باٹی ہنار،کورونا بحران ٹی بھاز خراب  کارکردگی آ مودی نا پن کٹنگ 2019 آن گڈ کم انگا کچ آ بس۔

بھارت ئٹ اسہ دے ئٹی پین 2 لکھ 76 ہزار آن زیات بندغ ٹی وائرس پک مسونے،اندن وائرس آن کہوک آتا جمعی کچ ارا لکھ 87 ہزار آن زیات مسونے۔

گیشتر حوال تا رد ئٹ ہندوستان  22 ریاست آتیٹ مثبت کیسز تا کچ ئٹی پانزدہ فیصد آن بڑز ءُ،ارٹمیکو لڑ ئنا وخت آ دونیم سد نا خڑک ڈاکٹر آک ہم مرگ نا گواچی مسونو۔

اندن کورونا دین مودی سرکار ءِ ہم ڈبیفے، حکومت نا بھاز خراب کارکردگی آ مودی نا پن کٹنگ 2019 آن گڈ کم انگا کچ بسونے۔

لس مخلوق المی آسراتی مفرینگ نا زمہ وار نریندرا مودی ء ِپاننگ ءُ۔ اوفتا پاننگ ءِ کہ بھارت نا مخلوق جون ارفیسہ دم درینگانو،کوالخوا مخلوق ءِ ریلیف تننگ ٹی بے سہب خننگیک۔

بلوچستان نا ارا جتا ضلاع آتیٹ روڈ شکست و سُم کاری نا ویل آتیٹ اسہ بندغ اس مرگ نا گواچی و اسٹ ٹپی مسونے۔

پنجگور نا علاقہ تسپ سیڈے سر نا ہند آ ایران ساختہ زمباد ٹی سوار سلاء بند بندغ آک اسہ لوڈ زمباد گاڑی ئسے آ سم کاری کریسہ اسہ بندغ اس ٹپی کریر۔

ویل ہمو وخت مس، ہرا وخت  سلاء بند بندغ آک گاڑی ءِ توننگ کن کوشست کریر گاڑی نا سرپرنگ نا سوب آن  سلاء بند بندغ آک سم کاری کریسہ اسہ بندغ ئسے ٹپی کریر۔

ایلو کنڈان تدوکا شام کیچ نا علاقہ شاہی تمپ اسپتال نا کراس آ ارا موٹرسائیکل نا ڈک لگینگ نا سوب آن اسہ بندغ اس مرگ نا گواچی و 2 ٹپی مسر، کہوک آ بندغ نا چائنداری بلوچستان نا علاقہ چار سر آن گنگزار رفیق نا پن ئٹ مسونے۔

چے گویرا نا کلہو اس فیدل کاسترو نا پنا

نوشت: ارنسٹو چے گویرا
مٹ: ذیشان منان

دی بلوچستان پوسٹ

دا وختا کنے باز ہیت یات بننگ ءِ کنے ہمو دے ہم یات بننگے کہ اولیکو دے ای نے ماریا انٹونیا نا اُراٹی خناٹ و نی کنے بننگ نا صلہ خلکُس و انقلاب نا تیاریک، ویل آک کُل اسٹ اسٹ آ یات بننگو۔

اسے دور اس ہمو اسک کہ ننے جُست کننگ مس “کہ کہنگان پد دیرے حال تننگ مرے”؟ دا ہیت نا گواچی نا خُلیس ننے تینا خاخر ٹی ہفیس اس۔ دا ہیت راست اس ئسک کہ انقلاب نا کسر ٹی اِرا کسرو اسٹ سرسہبی یا کہنگ و دا جہد ٹی ننا باز سنگتاتے موت تینا کریسس۔

داسا کہ ننا فکری ردُم محکمے حالتاک موست ئنا وڑ کسہ اسینا رنگ اَٹ افس۔

کیوبا نا انقلاب نا اخس کہ زمہ داری کنا کوپاغاتیا مسونے ای تینا وس اٹ کُلے پورو کرینٹ داسا ای ہندا فکر کرینُٹ ہمو فرض کہ کنے کیوبا نا انقلاب و گلزمین توں تفینے اود پورا مسونے داسا ای نیان و تینا کامریڈا سنگتاتے آن و مخلوک آن اجازت خواوا اینو ای تینا راجی پارٹی و راجی لیڈرشپ نا عہدہ فوج نا میجر و کیوبا نا شہری سے آن جتا مریوہ۔
وختس ای تینا زند نا کتاب نا درو نا تاخے لیٹیفیوا کنے ہندا احساس مریک کہ ای انقلاب کن اُست ئٹ کاریم کرینٹ و ہچ وڑنا قربانی آن تینے پدی تورتنٹ اسے ردی اس مسونے او دا کہ ای اولی ٹی نے پوہ متنٹ اوخس بھروسہ کتنُٹ کہ کروئی مسونے ای نا انقلابی رہبری ءِ باز اُرے آ پوہ مسونُٹ ای نا و نا کیوبا نا راج توں باز یادگارو وخت گدریفینٹ ای کیوبا نا جہد ٹی اواریءِ تینکن اسے فخر اس پوہ مریوہ۔

داسا کنے دنیا نا ایلو مظلوما مخلوک توار کننگ ءِ و نی کنتوں دا سفر ٹی اوار مننگ کپیسہ انتیکہ نا کوپاغاتا کیوبا نا راج ئنا پگہ ءِ داسا ننا کسرک جتا ءُ۔ ای دا ہم پاننگ خواوا کہ دا کسر ٹی سر ہلنگ کنکے ارزان افک ای دا کاریمے خوشی و دردنا جوزہ تون اوار کننگ اُٹ۔ ای تینا خیرا تینا تغ، امیت و مہرواننگا بنداغاتے یلہ کننگ اُٹ۔ ای دا گلزمین نا ہمو بندغاتے یلا کننگ اُٹ کہ اُفک کنے تینا چُنا پارینو ای باز ڈھکیا اُٹ۔

ای امر ہندا ہیل کروک آ جنگی ہنراتے پوسنکو جنگجاہ اسیا دننگ اُٹ۔ ای ہندا انقلابی روح ءِ ایلو مخلوکے تننگ خواوا۔ دشمن نا خلاف آ جنگے ای تینا کُلان بلا فرض سرپد مریوہ و دا جنگ کنا پوسکنا ٹپاتے ہم درمان کیک ای دا ہیتے پاننگ خواوا کہ داسا کیوبا کنا ہچ کاریم نا محتاج افک اگاں ای کہنگ نا وخت پین سرزمین آسیا مسٹ کنا خنک کیوبا و اونا مخلوک کین مہر نشان ترور۔ ای نا باز منتوار اُٹ کہ ای نیان باز گڈا ہیل کرینٹ اُٹ و آخری دم اسکان نا وفادار مروٹ ای ہر وخت کیوبا نا خارجی پالیسی تان مطمین مسنُٹ ای ہرانگ ہم مریو تینے کیوبن جہدکار اس پوہ مریوہ۔

کنے دا ہیت نا ہچ غم اف کہ ای تینا زائیفہ و چنا تیکن ہچ گڑاس خیرا ہلنگ افٹ ای اوفتیکن نے آن ہچ خواپرہ ای چاوا کہ کیوبن حکومت اُوفتا خیالے تخو اُفتا کُننگ، خواننگ، تولنگ نا خیالے تخو۔

ای نیتون و کیوبا نا قوم تون باز ہیت کننگ خواوا ولے کنا خیالا دا ضروری اف انتیکہ لوز او احساس آتے بیان کننگ کپک کہ ای اُوفتے پاننگ خواوا۔

نن مُدام انقلاب نا نیمہ غا گام خلیسا کینہ۔۔۔
ای انقلابی و آشوبی جوزہ تون نیتون بغل گیر مریوا۔

(رنسٹو چے گویرا)