حوال تا رد ئٹ وزیر تعلیم سندھ نجی سکول ایسوسی ایشن نا وفد  تون اوڑدئی کننگ آن گڈ سندھ ئٹی 30 اگست آن 100 فیصد ویکسینیشن والا اسکول و کالج آتے ملینگ نا پڑو کرینے، پگا آن عملہ ءِ خوائفنگ نا موکل ہم تننگا۔

وزیر تعلیم سندھ سردار شاہ نا پاننگ اس کہ صد فیصد ویکسی نیشن والا تعلیمی ادارہ آک ملینگور، عملہ و استاد آتا ویکسی نیشن رپورٹ مچ کننگ المی مرو، اسکول پنجا فیصد ساڑی تون اوار ملون۔

داکان مست سندھ حکومت نا اسکول آتے بند کننگ نا فیصلہ آ خوانندہ چنا، استاد و باوہ لمہ  آک کراچی ٹی بھلو برانز اس کریر، ڈی اے چورنگی نا ایب کیب نا کسر تیا اسکول آتا بند کننگ نا بر خلاف نعرہ خلیسہ کریر۔

وزیر تعلیم سردار شاہ حالیت آتا نوٹس ہلیسہ پرائیویٹ اسکول آتا ایسوسی ایشن نا راہشون تیان خواست کریر و 30 اگست آن اسکول آتے ملینگ نا پڑو ہم کریر۔

نصیر آباد ٹی ارا جتا ویل آتیٹ اسہ بندغ اس مرگ نا گواچی، 2 بھاز ٹپی مسونو۔

حوال تا رد ئٹ نصیر آباد پولیس تھانہ نا حدود گوٹھ عبدالصمد بنگلزئی ٹی طالب حسین نا کشت و کشار تیٹ ٹریکٹر کلٹی مس ہرانا سوب آن طالب حسین ہند آ سر مرگ نا گواچی مس، جون المی کاروائی آن گڈ خاہوت نا دو ٹی تننگا۔

اندن پین حوال ئسے نا رد ئٹ روڈ شکست نا سوب آن ارا بندغ ٹپی مسونو.

گیشتر حوال تا رد ئٹ نصیر آباد نا علاقہ نوتال نا خڑک مزدا ٹرک و
موٹر سائیکل نا ڈک لگینگ نا سوب آن شکیل احمد تون اوار ارا بندغ بھاز ٹپی مسونو ہرا ہسپتال آ سر کننگار۔

کورونا وائرس آن 95 بندغ مرگ ئنا گواچی مسر، ہراڑان گڈ کہوک آتا کچ 24 ہزار 713 مس۔ پاکستان ئٹ کورونا نا پک مروکا کیس آتا کچ 11 لکھ 13 ہزار 647 مس۔

نیشنل کمانڈ اینڈ آپریشن سینٹر نا پوسکنا حساب نا رد ئٹ تدوکا دے 24 گھنٹہ نا نیام ئٹ 4 ہزار 373 پوسکنو کیس رپورٹ مسر، پنجاب ئٹ 3 لکھ 76 ہزار 252، سندھ ئت 4 لکھ 16 ہزار 230، خیبر پختونخوا ٹی اسہ لکھ 54 ہزار 606، بلوچستان ئٹ 31 ہزار 726، گلگت بلتستان ئٹ 9 ہزار 526، اسلام آباد ٹی 95 ہزار 196 اندن آزاد کشمیر ٹی 30 ہزار 111 کیس رپورٹ مسر۔

بلوچستان نا علاقہ خضدار و قلات ئٹ جتا ویل آتیٹ 9 بندغ زیمی اسٹ مرگ نا گواچی  مسونے۔

حوال تا رد ئٹ قلات یونین کونسل نیچارہ ٹی زاری خوراک کوننگ نا سوب آن اسہ خاہوت نا ہشت بندغ بد حالیت ئٹ ءُ، زیمی تیٹ  زالبول چنا ہم اوار ءُ-

زیمی آتے نیچارہ ٹی دوا درمان کننگ آن گڈ قلات ہسپتال آ سر کننگانو-

گیشتر حوال تا رد ئٹ نیچارہ ٹی محمد رحیم نیچاری نا اراٹی خاہوت نا بندغ آک چا کُننگ آن بد حال مسر ہرافتیٹ گڑاس بندغ  تسینگانو ہم، حوال تا رد ئٹ چاہ ئٹی زاری ءُ سادار اس تمینگ نا سوب دافتا حالیت بد مس۔

زیمی آتیٹ محمد رحیم و منیر احمد تون اوار چار زالبول و اِرا چنا ہم اوار ءُ ہرافتے نیچارہ سول ڈسپنسری ٹی دوا درمان کننگ آن گڈ قلات ڈی ایچ کیو دنگا ہراڑے زیمی آک دوا درمان کننگگار۔

اندن پین حوال ئسے نا رد ئٹ خضدار ٹی روڈ شکست نا سوب آن اسہ بندغ اس مرگ نا گواچی و اسٹ ٹپی مس۔

گیشتر حوال تا رد ئٹ خضدار ٹی پک اپ گاڑی و موٹرسائیکل نا ڈک لگینگ نا سوب آن موٹر سائیکل سوار ہند آ مرگ نا گواچی مسونے اندن اسہ زالبول اس ہم مرگ نا گواچی مسونے و اسہ زالبول اس بھاز ٹپی ءِ۔

حوال تا رد ئٹ آئل اینڈ گیس ریگولیٹری اتھارٹی ( اوگرا ) پاکستان ئٹ گیس نا رخ ئٹی 14 فیصد اسکا  ودکی نا موکل تسونے۔

اوگرا نا کنڈان سوئی ناردرن و سوئی سدرن نا برجاہ مالی سال ئنا  ریونیو خواست آتا درخواست آتا فیصلہ ہم برجاہ کننگانے۔

فیصلہ نا ردئٹ سوئی ناردرن ٹی گیس نا نرخ ئٹی 14 فیصد ودکی نا موکل تننگانے، گیس ئنا فی ایم ایم بی ڈی پی نرخ 86 رپئی 93 پیسہ ودکی آن گڈ 686 رپئی77 پیسہ تخنگانے، اوگرا سوئی ناردرن  تدوکا مالی سال ئنا  بقایہ آتا ردئٹ 254 ارب رپئی دوئی کننگ نا موکل تننگ تو و دا معاملہ آ وفاقی حکومت آن سلا لینگانے۔

داڑان بیدس ریگولیٹری اتھارٹی سوئی سدرن ٹی گیس ئنا نرخ ئٹی 70 فیصد ودکی نا موکل تننگانے، نرخ ئٹی 54 رپئی 47 پیسہ ودکی آن گڈ گیس ئنا نرخ 779 رپئی
98 پیسہ فی ایم ایم بی ٹی یو تخنگے۔

اوگرا نارد ئٹ گیس نا نرخ ئٹی ودکی برجاہ مالی سال اکن کننگانے داکان نرخ آتیٹ ودکی نا فیصلہ وفاقی حکومت آن موکل الینگ آن گڈ مرو۔

رسینگوک حوال تا رد ئٹ نے تدوکا 24 گھنٹہ نا نیام ئٹی جہانی دین کرونا وائرس نا سوب آن پین 95 بندغ مرگ نا گواچی مسونو، تیوہ آ پاکستان ئٹ کورونا نا سوب آن کہوک آتا جمعی کچ 24 ہزار 573 مسونے۔

نیشنل کمانڈ اینڈ آپریشن شینٹر ( این سی او سی ) نا پوسکن شینک کروک حساب نا رد ئٹ تدوکا بیست و چار گھنٹہ نا نیام ئٹی تیوہ آ پاکستان ئٹ 3 ہزار 221 کورونا کیسز رپورٹ مسونو، تیوہ آ پاکستان ئٹ کورونا کیس تا جمعی کچ 11 لکھ 5 ہزار 300 مسونے، این سی او نا رد ئٹ تدوکا 24 گھنٹہ نا نیام ئٹی83 ہزار 181 کرونا کیس رپورٹ کننگانو، تدوکا 24 گھنٹہ نا نیام ئٹی کورونا نامثبت کیس آتا کچ 68۔6 فیصد مس۔

اندن سندھ ئٹی کورونا نا کیس آتا کچ 4 لکھ 13 ہزار 379، خیبر پختونخوا ٹی اسہ لکھ 53 ہزار 134 پنجاب ٹی مسہ لکھ 73 ہزار 718 ، اسلام آباد ٹی 34 ہزار 402 ، بلوچستان ٹی31 ہزار 632 ، آزاد کشمیر میں 29 ہزار 593 وگلگت بلتستان ٹی 9 ہزار 442 مسونو۔

کورونا نا سوب آن زیات مرگ پنجاب ٹی مسونے، اندن11 ہزار 412 بندغ مرگ نا گواچی مسونو، اندن سندھ ئٹی 6 ہزار 475 ، خیبرپختونخوا ٹی 4 ہزار 679 ، اسلام آباد 837 ، گلگت بلتستان 166، اندن بلوچستان ٹی 335 و آزاد کشمیر ٹی 669 بندغ مرگ نا گواچی مسونو۔

راہشون ادبی دیوان بلوچستان نا اولیکو آن لائن (Zoom) میٹنگ اینو 4 بجہ غا سرپرست اعلی ڈاکٹر لیاقت سنی نا کماشی ٹی اڈ ہلک۔ دا میٹنگ اٹی راہشون نا 4 سنگت ساڑی ئسر۔

مہماندار وائس چیرمین اسرار شوہاز بلوچ ئس، او تران کریسہ پارے کہ اینو نا پوسکنا دور ٹی بائدے نن ٹیکنالوجی آن فائدہ ہرفسہ آن لائن کچاری تا لر ءِ برجاہ تخن۔

سنگت حسنین تینا احتجاج ءِ ریکارڈ کرفسہ پارے کہ داکان مُست نا کابینہ ہچو پروگرام اس اڈ تتو اندا وجہ غان اوفک گچینکاری کچاری ٹی ہم ساڑی متنو، اندن اوفک خواننگ و خوانفنگ نا گرج ءِ مون مستی دننگ نا باروٹ ہم تینا خیال آتا درشانی کریر۔

مجلس ٹی ساڑی سنگت جلیل رئیسانی ہم تینا خیال آتا درشانی ءِ کریسہ پارے کہ بائدے نن ٹیکنالوجی ءِ غرز کریسہ ساڑی وخت انا گرج آتے پورو کین.

گڈ سر ٹی مجلس نا کماش ڈاکٹر لیاقت سنی تران کریسہ پارے کہ نن اسہ وخت اس مست ہم خواننگ و خوانفنگ نا دود ءِ مونی دننگ کن کوشست اس کریسن داسہ ولدا وخت انا گرج اندادے کہ نن کتاب سنگتی ءِ مونی دین و کتاب اے تینا راہشون کین۔

دا آن لائن مجلس ٹی دا پک کننگا کہ بروکہ راہشون کچاریک ہر جمعہ نا نن 10بجہ غا اڈ ہلور۔