بلوچستان نا ضلع خضدار ئٹ علامہ دین پوری پبلک لائبریری ءِ کرونا ایس او پیز تون ملنگ نا خواست کننگانے۔

سہہ شمبے نا دے خوانندہ تا بھلو کچ اس راجی حوالکاری میڈیا غا لائبریری ءِ ملنگ نا خواست کننگے۔ اوفتا پاننگے کہ خضدار ئٹ کرونا نا کیس آتا کچ بھاز کم ءِ نن ڈی سی خضدار آن خواست کینہ کہ کرونا ایس او پیز آتیتون لائبریری ءِ ملنگ نا موکل تننگے۔

اوفتا پاننگے کہ ایس او پیز آتیون لائبریری نا ملنگ آن خوانندہ تا بھلو کچ اس لائبریری آن فائدہ ارفنگ کیک۔

رسینگوک حوال تا رد ئٹ وزارت دفاع نا ٹوئٹر آ بیان اسیٹ پاننگانے کہ خادم حرمین شریفین شاه سلمان بن عبدالعزیز نا پنت آ وزارت دفاع ہیلتھ سروسز نا ائیر میڈیکل ٹرانسپورٹ ڈیپارٹمنٹ سعودی خاہوت ئسے انڈیا آن سعودی آ سر کرے۔

وزارت دفاع نا ردئٹ ہیلتھ سروسز نا جاز پانزدہ گھنٹہ نا مسافری آن گڈ دو شمبے نا شام ریاض نا کنگ سلمان ایئر فورس بیس سر مسونے۔

گیشتر حوال تا رد ئٹ رد ئٹ کورونا وائرس ءِ تالان مننگ آن توننگ کن تیوہ آ گامک و خیالداریک ارفینگا سر۔

غزل

یخ درے باریفے پھل ء بادام نا
اچ درک لگیتو اودے انجام نا

متکونا لتراک قدرے ہرجا بٹیر
اے غریبی کنا لگے سئے شام نا

مڷ کن لمہ نا خنک ہندن وہار
جلک دنکہ وہر وختا بشام نا

نکین مادر وطن داجغر نا دترک
رنگٹی او سفا چاس انام نا

کاٹمان دیر بڑزا چڑنگے فدا
کوک کر نی خفٹ اینو بے پام نا

ہدایت فدا

بلوچستان نا شار خاران آن پاکستانی سیکیورٹی کارندہ غاک اِرا بندغ ءِ دزگیر کریسہ بیگواہ کریر۔ ہڑتوما بندغ آتے سیکیورٹی نا کارندہ غاک یک شنمبے نا دے خاران نا جتا جتا جاگہ غاتیان ہلیسہ بیگواہ کریر۔

احوال آتا ردئٹ دا ارتوما بیگواہ مروکا بندغ آتا چاہنداری تنویر باوہ نا پن ماسٹر مشتاق و سفیان باوہ نا پن عبدالرحمٰن حسین ءِ۔

مونی خبر آتا ردئٹ بیگواہ مروکا ہڑتوما بندغ آتا روزگار درزی گری ءِ۔

ارٹمیکو پارہ غان کیچ نا علاقہ ملانٹ ٹی پاکستانی سیکیورٹی کارندہ غاک داد محمد پنی آ بند غ اسینا اراٹی چھاپہ خلیسہ اُرا نا باتی چنا و زالبول تے آ بے دادی و اُرانا زیات نہاد آ گڑا لٹ و پل کریسہ تینون درینو۔

مُد ئنا حوال تروک محکمہ پارینے کہ بلوچستان نا بھاز آ ضلع آتیٹ مُد باسن و بارن مننگ نا گمان ءِ۔

کوہلو، ژوب، بارکھان و ایب کیب ٹی طوفان و ترند تہو آن بیدس مچے پر ئنا ہم گمان ارے، کوئٹہ ٹی باسنی نا کچ 21 ڈگری سینٹی گریڈ ریکارڈ، قلات ٹی ساڑی باسنی نا کچ 19 ڈگری سینٹی گریڈ کننگانے۔

بلوچستان نا ساحلی علاقہ ٹی باسنی نا کچ 29 ڈگری سینٹی گریڈ ریکارڈ، سبی ٹی ساڑی باسنی نا کچ 32 ڈگری سینٹی گریڈ ریکارڈ کننگانے۔

گیشتر حوال تا رد ئٹ نوکنڈی ٹی ساڑی باسنی نا کچ 28 ڈگری سینٹی ریکارڈ، کوئٹہ ٹی تہو ئٹی نمبی نا کچ 16 فیصد، گوادر ٹی 73 فیصد، سبی ٹی 35 نوکنڈی ٹی تہو ئٹی نمبی نا کچ 12 فیصد ریکارڈ کننگانے۔

کوئٹہ نا سول اسپتال ئٹ مریض ءِ دننگ ئٹ لفٹ تما ہراڑان مریض نا حالیت بد مس۔

ولید پنی ءُ شاری اس بینظر پل آن خڑک روڈ شکست ئٹ تدوکا دے ٹپی مس ہرا دمدستی تون اوار سول اسپتال نا ٹراما سینٹر آ دننگا۔

ولید نا کاٹم آ بروکا ٹپ آتا آپریشن آن گڈ اودے آئی سی یو ئٹ دننگ ئسر کہ دانا نیام ئٹ لفٹ تما ہراڑان ٹپی نا حالیت پین خلیس نا ہد اسکان مس۔

مریض واپس آئی سی یو ٹی دننگا ہراڑے ڈاکٹر آتا رد ئٹ او وینٹی لیٹر ئٹ تخنگانے۔

سول اسپتال نا ترجمان واقعہ غان بے سمائی نا درشانی ءِ کریسہ دا رد ئٹ وائرل ویڈیو ءِ متکن اوس پارے۔

ترجمان بلوچستان حکومت لیاقت شاہوانی پک کریسہ پارے کہ واقعہ تدوکا دے مونا بسوسس و لفٹ کبین مننگ نا سوب آن تماسس، لفٹ ئٹ 4 ئنا جاغہ 8 بندغ سوار مسوسسر۔

ترجمان نا پاننگ ءِ کہ لفٹ نا واپس جوڑ کننگ آن گڈ آپریشنل کننگانے اندن زیمی مریض نا ہر وڑ ئٹ خیال تخنگ برجاء ءِ۔

حوال تا ردئٹ بلوچستان نا ضلع مستونگ ٹی روڈ شکست نا جتا ویل آتیٹ 5 بندغ ٹپی مسر ہراتیٹ چنا و زالبول ہم اوار ءُ۔

رسینگوک حوال تا رد ئٹ مستونگ نا علاقہ کھڈ کوچہ ٹی ترند ہنوک موٹر سائیکل نا ڈک لگینگ نا سوب اِرا بندغ ٹپی مسر۔

گیشتر حوال تا رد ئٹ موٹر سائیکل دو آن یلہ مریسہ پول ٹی ڈک لگنگ آن موٹر سائیکل آ سوار اِرا بندغ ٹپی مسر، ہرافک دمدستی وڑ ئٹ ئٹ ہسپتال آ سر کننگار ہراڑے اوفتے درمان کننگ آن گڈ  ڈسچارج کننگا۔

اندن پین حوال ئسے نا رد ئٹ  موٹر سائیکل آ سوار زالبول نا گُد موٹر سائیکل نا ویل ئٹی اڑینگ نا سوب آن مسہ بندغ ٹپی مسر۔ ٹپیک دمدستی وڑ ئٹ اسماعیل بلوچ ایمرجنسی سنٹر آ سر کننگار ہراڑے اوفک  دوا درمان کننگا۔

اندن اسماعیل بلوچ لس مخلوق آن خواست کریسہ پارے کہ دن خوشی نا وخت آ موٹر سائیکل و گاڑی تیٹ سفر کریسہ تینا و ایلوفتا زند آتا خیالداری کننگے۔

یاتے مرے  بازی کوئٹہ کراچی بھلا روڈ آتیا روڑ شکست آک مریرا ہرافتے اسماعیل بلوچ میڈیکل ایمرجنسی سنٹر ٹی تینا کمک تینٹ نا ردئٹ درمان کننگک۔

گم مننگ آن مُست

نوشت: ڈاکٹر حنیف شریف | مٹ: نعیم بلوچ

دی بلوچستان پوسٹ

اَزدے او تینتو تینٹ گم مَس، کس ءِ سما ہلوکہ، ہرانگ ہنانے، دیرا، ہرا پاسو، دنا پٹینگ کن، دیر کن، ولے او گم مس۔ گم مننگ آن مُست، او تینا کوٹ ءِ کشّا الماری ٹی ٹنگا۔ اکواڈیگیو (Acqua di gio)، ئے پچ اسیٹی خوشکا و تپّہ صاف کرے و خبر اف ہراکان اونا ڈبہ ءِ پٹا کہ او الماری نا بڑز ئنا خانہ ئٹی نشانی اسیکن تخوک ئس۔ بچّہ ئے سرفی آ دیر تیئٹ سلاسک چَٹ پوسکن کریسک تا و اونا زی آ اسٹیکر اس خلکسک، اونا زی آ نوشتہ ئس “ولدا مِلون۔” بچہ نا کڑی چُوڑی ئس، او ہموڑے پلستر اس خلکسک بُوشت کریسک تا۔ پڑدغاک بچہ تون اوار تِروک ئسر و پڑدہ نا راڈ ءِ ہم تیل تس ئسک ولے سما اَف انتکہ، پڑدہ نا زی آ شولینگوکا یا تموکا قلمی مَس ئنا داغاتے صاف کتوسک۔
بلکہ تینت خلکسک تا۔
یا اندون ئس کہ است متوکہ تا۔
یا اشتافی بے خیال مس ئسک۔
ولے او گم مننگ آن مُست تینا مچا ڈائری ءِ صاف و پاک کریسک و الماری ٹی تخاسک۔ خیر مُچہ پاننگ کپیسہ تا، انتکہ اونا ڈائریک پنچ ئسر۔ پنچ سال، پنچ ڈائری و اونا کُل ڈائری تیٹی اولی پنّہ آ صاف صاف تینا پِن ءِ نوشتہ کریسک، بہاٹ ہلنگ نا دے و ولدا تینا دسخط۔ داڑ آن بیدس او دا پنچینگ آ ڈائری تیٹی پین ہچ نوشتہ ہم کتوسک۔ ہچ آن ہچ۔ کُل پنّہ غاک تا پیہن ئسر و ہر ڈائری نا آخیر آ، ولدا پن ءِ نوشتہ کریسک و نوشتہ کریسک کہ “دا سال چُٹا” و تینا دسخط ءِ کریسک و ایلو دے پوسکنو ڈائری اس بہا ہلکسک و ہمو وڑ، ہمو ڈول نوشتہ کریسک۔ خط تا ہچ جوان ہلوکہ، خاص اندا ہشت تا سخت خراب نوشتہ کروک ئس۔ و ولدا چاننگاکہ ہم چُنکی ٹی لوہ و تختی نوشتہ کتنے۔ دسخط تا اندن ئس کس پائے بیدس ڈائری نا زی آ پین ہچ جاگہ آ دسخط کتنے۔ اندا خاطران ہر ڈائری نا  زی آ مچٹ پین وڑ ئس۔ اگہ دا کُل اسے جاگہ ئسے آ متورا، ای ہچ باور کتوٹا کہ دا اسے بندغ ئسینا دسخط ءِ اگہ ای بینک ئسے آ مسوٹ آ، او چیک ارفیکہ ایسکہ، ای ہر وار اونا چیک ءِ اونا اصلی آ تروکہ دسخط تون اوار کریٹ اُراٹ و مدام مینیجر توار کریٹہ کہ “دا امبل نا جندے یا آخہ”!

گم مننگ آن مُست او تینا اُرا ءِ صاف کریسک، کُل کتاب آتے سواریفیسک تخاسک۔ کتاباک پین انت مرور، اندا ہفتئی مُچ کروکہ تاک آک، ولے اندافتے سوارفیسک تخاسک۔ Amazon آن بروکو پاکٹ ئس اندافتا رئی آ تخوک ئس۔ دا پاکٹ، اونا گم مننگ آن اِرا دے مُست بس ئسک ولے پیش تمینگ آن مُست او دادے ملتوسک۔ او پین ہیت ئسے کہ او چاخو اس دالان آن ایس ئسک و ہمو پاکٹ نا رئی آ تخاسک؛ ولے سما اَف انتکہ ملتوسک تا۔ ولدا نن کہ ملان تا، اُران چکّا گوازی کروکو گتّہ اس ایٹی تا ئس۔ و راست، گم مننگ آن مُست مین ڈک ئنا دروازہ آ اِرا کُلف خلک ئسک۔ اسے اِرا وار اُراسک تا کہ بُوشت ءِ یا کہ ملوک ءِ۔ اونا دُو تا نشان صاف صاف ہموڑے لچوک ئسر، کس پائے اوفتے ہنوئی  متنے، اندا خاطران انداڑے رئینگ ئسر ولے تینا کوٹی نا کڑی ءِ یلہ کریسک، نظر اس ہم شاغتوسک زی آتا، آخہ، کڑی ءِ یلہ کریسک تا۔

تینا کوٹی نا ڈک ءِ پیہن ءُ رنگ خلک ئسک۔ اندن صاف ئس، بندغ پائے، داسہ ایسنو خلکنو تا ولے مین ڈک متکن ئس و رنگ تا ہم لُڑاسک۔ داڑے اِرا کوٹی ئسک، چنکو دالان اس و دیم شودس۔ ہر گڑا تینا جاگہ آ سواروک تخوک ئس۔ بس، بیک کُٹاسر۔ بے ئنا ڈبہ غاک ایہن اِرٹ ئسر، اسٹ اس مصالحہ غاتا کبٹ ئٹی ئس ولے خالی ئس و اِرٹمی دالان ئٹی اِشٹوپ نا رہی تخوک ئس و او ہم خالی ئس۔ اِشٹوپ نا جند پوسکن الوکہ ولے نہ سی ئنا داغس اس زی آتا و نہ مصالحہ و کیچپ زی آتا تماسک۔ کس پائے اسٹ اس زو صاف کرینے تا ولے اشٹوپ نا کیرغان تموکہ سی ئنا داغاتے، بے خیال کرینے یا خنتنے تا۔ انداڑے کہ بندغ سلیک پُنار جوڑ کیک، اندا جاگہ آ گڑاس بیدیر تا سی ئنا پُڑی تماسر و اندا وخت آ نن بسوسُن، اشٹوپ انگہ لگفوک ئس۔ خاخر تا باز شیف ئس، کس پائے کہوک ءِ؛ اگہ کس اس تانکے خُڑک بتوکہ و خنتے خلتوکہ ہچ تیتوکہ کہ لگفوک ءِ۔

دیر اشٹوپ ءِ دون سست کریسک؟

گم مننگ آن مُست او تینا دالان آن گیس ئنا اشٹوپ کن لیٹر اس ہلک ئسک۔ اونا بِل اندا لیٹر نا رہی آ تخوک ئس۔ اونا زی آ گم مننگ نا دے ئنا تاریخ نوشتہ ئس۔ داڑان مُست او مدام تینا اُرانا اشٹوپ ءِ باکس ئٹ لگفیسک۔ کس تتئو گم مننگ آن مُست او انتکہ فکر کریسک کہ داسہ باکس نا تیلی تے بس ءِ۔ داسہ بندغ تینے اپ گریڈ کے۔

مننگ کیک او تینے اپڈیٹ و اپ گریڈ کننگ کن گم مسونے ولے دانا ہچو شاہد اس الوکہ، بِل ہم الوکہ، ہال ہم الوکہ، و ولد مگے مشینس ئس یا سوفٹ ویرس ئس کہ اپڈیٹ کننگ خواہسک آ؟ ولے مگے مشینک و سوفٹ ویئر آک اپڈیٹ مریرا۔ او مدام تینا آن اندا ہیت ءِ ارفیسک۔

گم مننگ آن مُست، او باز چنکو چنکو گڑا بہا ہلک ئسک۔ دا کُل ہمے بِل ئنا تہٹی شاغوک ئسر کہ اوفتیٹی گیس ئنا اشٹوپ نا لیٹر ئسک۔ او تینا بیشولوک آ شاور ءِ پوسکن کریسک۔ سرجاہ اس ہلک ئسک، خُشبو والو موم بتی ئس، مون ئنا کریم و ریش شولینگ کن استرا ئس و گڑاس بلیڈ۔ دا زمانہ ئٹی ہم او ریش ءِ ہمے مُستنا بلیڈ و استرا ئٹی شولاک آ۔ دیر چائک جند تا داڑے ہلوکہ کہ بندغ اریفیک آ ایہان تا۔ دیچہ اونا سنگت آک اوڑا بیئام کرینو کہ یا آخہ، کہ دا زمانہ ٹی بندغ ریش ءِ دون شولک؟ ولے مننگ کیک بلکے اودے ہچو سنگت اس متنے۔ اسے ہیٹر اس ہم لگفوک الوکہ۔ و ولدا مچہ اُراٹی کس اس ہراڑے مسک آ، ہیٹر نا پئیپ ئتا توار ئسک؛ کس پائے مُشک اس پیری ٹی ءِ۔ اندا خاطران کنا است پائک اودے ہچو سنگت اس متنے۔ اندا وخت آ اونا اُرانا ڈک ءِ اسٹ اس ٹُکیفے۔ نن سِٹان۔

خازگ و بے سلوک آ پُچاک، اونا بلڈنگ نا واشنگ مشین ئٹی شاغوک ئسر و ٹائمنگ تا سی و دو (32) منٹ ئنا زی آ تخوک ئس و دیچہ ئٹ دے ئنا سے اوڑے ئسر۔ او لیپ ٹاپ ءِ چارج آ خلک ئسک، مُتکنا جراب آتے مُٹ تس ئسک و پازوار و بوٹاتا جاگہ آ تخاسک تا۔ پازوار و بوٹ، ولے ہچ ہلوکہ، تہا ئس تا ہم الوکہ۔ او دا کُل ءِ انتکہ دریسک؟

مننگ کیک اوڑتون بیرہ اسے جوڑا اس مرءِ یا مننگ کیک اوڑتون اندا اسے جوڑا ہم متنے۔ نت شپاد پیشتمانے۔

گم مننگ آن مُست، او غڑدل ئتا ڈبہ ءِ شیف دریسک و غڑدل آتے اسٹ اسٹ آ جتا انگا ڈبہ غاتیٹی شاغاسک۔ کاغذ آتے کاغذی آ جاگہ آ و کُنوک آ غڑدل آتے اسے جاگہ آ، اَنت اس کہ رئینگاسر، کُل ءِ Rest Mull ئٹی۔ کنا اوست پائک کاغذ نا ڈبہ ءِ او اِرا مُسے وار اُرانے و فکر کرینے۔ او باز وار ہفتئی Der spiegel ءِ اندا ڈبہ غان ارفیسک و تینا کوٹی ٹی ایسوسک۔ اصل ئٹی، دا بلڈنگ ئٹی کس اس دا Der spiegel ءِ ہر ہفتہ غا خواہفیک آ خواناک آ، اوڑان بار تینتو مُچ کتوکہ تا۔ اندون کہ ختم کریکہ تا ہیس ئکہ کاغذ نا ڈبہ ٹی خساکہ تا۔

مننگ کیک اوڑتون جاگہ مف۔

یا اودے متکنا گڑاتا خواننگ دوست ہلوکہ، تینتو تخننگ کن تیار مف ولے او ہرکس ئس: مائیس ئس، امبلس ئس، پیروس ئس، ورناس ئس، کاریم ئٹی ئس، بیروزگار ئس، اندا نا برکت آن، او چَڑا ہر ہفتہ Der spiegel ءِ انداکہ دوئی کریکہ۔ اونا رہی آ مُچہ سال ئنا  تاک ئسک۔ ولے گم مننگ آن مُست ہفتہ نا و اندا ہفتہ آ گم مس ئسک، دا اَڑتوماک الورک۔

مننگ کیک او دافتہ ارفننگ ءِ بے خیال کے۔
یا مننگ کیک کس اس اوفتے تختنے۔
ولے گم مننگ آن مُست، او دافتے اَرفتوسک۔

اونا ہمسایہ غاکتے دافتہ باروٹ ہچ علم ہلوکہ۔ اسٹ و اِرٹ دا بلڈنگ ئٹی پوسکن بسوسُر، گڑاسے باز وخت مریک داڑے توسنو، ولے او پین تبکہ اسیٹی ئسر و اونا طبقہ ئٹی گیشتر بندغاک ریٹائرڈ ئسر و مُچہ دے اُراٹی تموک ئسر و ٹی وی اُرارا۔ اگہ کس اس دافتون ہیت کریکہ، گڑا دافتیٹی بازاتے دا ہم ہوش ہلوکہ کہ دا مُچہ دے اصل ئٹی ٹی وی ٹی اَنت اُرینگ ءُ؟ اصل ئٹی ٹی وی اوفتیکن ساہدارس ئس۔ دا اگہ خاچار آ ہم، ٹی وی چالو ئس، بیشولارا ہم ٹی وی چالو ئس، پیشن پیشتمار آ ہم، چالو ئس۔ اصل ئٹی، ٹی وی اُرانا تنیائی ءِ ونڈ کریسک۔ سما اَف کنے اولی وار گمان مس کہ باز جاگہ آ ٹی وی اصل ئٹی بندغ ئسے، ساہدار ئسے، قصہ خلوکو ملنگ ئسے۔

و ولدا ہمو بندغ پیشتما کہ ہرا ہفتئی تاک ءِ، شیف آ کاغذ نا ڈبہ ئٹی چغل کرے۔ اونا پِن روزی ئس، قحبہ اس ئسک، شار ئنا کلب اسیٹی ناچو اس ئسک۔ اودے خواننگ نا زرہ اس ہم شوق ہلوکہ۔ روزی نا یارس تینتو تینٹ Der spiegel ءِ گراکی اوڑکن بندوک کریسک۔ اندا خاطران اوڑکن ہر ہفتہ Der spiegel اونا پِن آ بس ئکہ۔ او دوہی مسکہ تا و کپی چنڈی خواناکاتا و حساب ئٹ کاغذ نا ڈبہ ٹی چغل تس ئکہ تا۔ او آخری ہفتہ غاتا تاک آتے ہم چغل تس ئسک ولے سوال دادے او دا تاک آتے انتکہ ارفتوسک؟

مننگ کیک کہ او فیصلہ کریسک او گم مریک۔
یا گم مننگ نا وخت آ دیر چائک کہ دنیا ٹی اَنت مننگ ءِ۔ سیاست امر ءِ؟
یا مننگ کیک کہ اونا اوست Der spiegel آن پُر مس ئسک،
یا مننگ کیک، پین اسٹ ئس اونا بننگ آن مُست ارفینے تا،
یا مننگ کیک، دا مَسڑ ڈروغ تڑیننگ ئٹی ءِ،
یا مننگ کیک، بلکے، او اندا مَسڑ نا سوب آن گم مسونے۔
مننگ کیک کہ اودے دا دوست مسونے۔

ولے دا ہیت پک ءِ کہ گم مننگ آن مُست او ہڑتوما ہفتہ نا تاک آتے ارفتنے و مسڑ ہم تیتوکہ کہ نن انتکہ ہفتئی تاک آتا بارواٹ سوج کننگن۔ او تینا ہمے یار ئنا نمبر ءِ ہم تس کہ اوڑکن گراکی پیسہ غاتے تس ئسک، ولے انسان چاننگپک۔ ای انگہ وخت وخت فکر کیوا کہ مننگ کیک، اودے دا مسڑ تون مہر مسونے۔ اصل ئٹی، نیک و غریب آ بندغاتے قحبہ آ مسنک ایہن دوست بریرا ولے ای امر پاننگ کیوا کہ او نیک و غریبو بندغ ئس مسونے۔

مننگ کیک او لُچ اس مسونے، ڈروغ تَڑ اس مسونے، بے ایمان اس مسونے، دُز ئس مسونے۔

بلڈنگ نا کیرغان تولوک پنڈوک ءِ او دروست کتو اونا کُچک ہم۔ اونا گم مننگ آن مُست پنڈوک ءِ دا ہیت یات ئس، کس اس اودے بیست و سئے یورو تس ئسک۔ پنڈوک گَل اس کہ اونا زند ئٹی دا اولی وار ئس کہ اودے داخس پیسہ تِس ئسک، ولے او دا ہیت آن بے خیال ئس کہ اودے دیر تِس ئسک تا؛ مائیس، امبلس، مارکوس، چُناس۔ مننگ کیک، ہمو ئس، مننگ کیک، پین اسٹ ئس۔

پنڈوک ہمو وخت آ کُل پیسہ غاتے بیئر کریسک و کُننگ ئسک تا و داسہ اندافتا شیشہ غاتے بڈا کریسک و دافتے واپس کننگ و بیئر کن پین اڑزانو کسر اس  پٹننگ ئس۔ سپر مارکیٹ نا دخل آ تولوک مسڑ ءِ او دروست کرے۔ دون تتئو دیرے، پِن تا دیرے ولے عکس ءِ تا خنا، گڑا چائس کہ اَو، اُو سامان ہلینگ کن چڑا اندڑے بسئکہ۔ او پارے کہ او اینو پگہ دا عکس آن پیر ءِ: ریش ئنا تا مئونی کم ئس، ٹِک، زنو ئنا تا زی آ، ریش تا پیہن ئس، پُژغاک تا تمننگ ئسر۔ ہیت ہیت ئنا زی آ زمین ءِ اُرا، و باز ہیت کتو۔ خالی بسئک و تینا سامان تے تخہ و خنتے تینا زمین آ سخت کرے۔ و وخت کس پارے داخہ پیسہ مسونو، پیسہ غاتے، ہمو وخت ئنا وخت کَش آ و تس تا و بے تَرک و توار ہنا۔ مسڑ نا حساب ئٹی، او بِل ہچ التوکہ۔ چَڑا پاریکہ، خوائپک۔” گڑا ہمو بِل اُراٹی تخوک ئس اراکہ بس ئسک؟

مننگ کیک پِین سپر مارکیٹ ئسے آن الک ئسک تا۔
مننگ کیک، بے خیال مَس ئسک کہ او بِل ہچ الپک۔
مننگ کیک او خنانے کہ داسہ ہننگ ئٹی ءِ، بِل ہلے یا ہلپ، اَنت فرق تمیک۔
یا مننگ کیک دا سامان تے اوڑ کن پین اسٹ ئس ہلکونے۔ اگہ پِین اسٹ ئس گڑا دیر؟
مننگ کیک روزی۔
انداڑتون نن شار ئنا جنگل ءِ سر مسون، گڑا کنا ذہن ئٹی بس روزی ئسک۔

سما اَف انتکہ، کنا ہوش و گوش خیال، روزی نا پاسو ئسر، دا جنگل ئٹی جاگہ اَف دنکہ روزی آنبار دا جنگل ہفت حیران ئسکہ، بِرّ ئسک۔ اگہ دا جنگل ئٹی نے روزی تون ملوئی ہلوکہ، گڑا پِین کاریم اس سخت باز جوان ئس، خودکشی۔

جنگل بَز ئس و ہر پاسو چِرینگ و سیل اکن کَسر کشوک ئس۔ نی ہرا وخت آ بسوسہ، نے اسٹ نہ اسٹ ئس مِلاکا کہ چِرینگنگ ئٹی ئس، رومب ئٹی ئس، عکس کشینگ ئٹی ئس، چُناک تا تُد ئسر ایتوتا، کُچک ئسیتون یلہ ئس یا مسڑ اس بغل ئٹی تا ئس۔ اندا خاطران، خودکشی کن ہم، جوانو جاگہ اس ئسک ۔ بندغس کہ تینے کسفنگ خوائک، اندنو جاگہ اس جوانے کہ مرگ ئنا وخت آ کس مف، ولے مرگ آن پد بندغ است جم مریک کہ کس نا کس اس پٹیک تا۔

نن جنگل ئٹی اندا جوْن ئنا زی آ سلوک ئسون، نیم عمر ئنا بندغس ئس۔ کاٹم نا تا پژغاک تمینگ ءِ بنا کریسر، ریش تا پیہن مننگ ئس، ٹِک، زنو ئنا تا زی آ ریش تا پیہن مَس ئسک، خودکشی کریسک۔ و خودکشی آن مُست مَسڑ ئسے کاغذ ئس نوشتہ کریسک کہ اونا پِن روزی ئس، ولے اے امبل او ہلوکہ۔

و دا وخت آ کہ ای اونا کوٹی ٹی کرسی نا زی آ تولوک ئسوٹ، اناگت آن ای فکر کریٹ، خنیسہ دا امبل اونا جند مسئکہ۔ یا خنیسہ داسہ، او دروازہ ءِ ملاک آ و وختس کنے خنے، حیران مرے، یا اوست ترخ مرے، یا نَرّے، یا کوکار کے ای دیر اُٹ؟ اونا اُراٹی اَنت کیوا و رومب ئنا تیٹی، پولیس ءِ ٹیلیفون کے یا پیرینگ آ ہمسایہ نا ڈَک ءِ ٹُکیفے، یا ہراکہ روزی ءِ تینتو اوار کے و برے۔ ای بشخندہ کریٹ، و است جم مسوٹ کہ او دا کاریم ءِ کننگ کیک۔ اندن کہ اِی پاریسوٹ، بلکہ کَپ تا ولے کننگ کے الم کیک تا۔ انتیکہ گم مننگ آن مُست، او باز کاریم کریسک۔ گم مننگ آن پد، ایہن دا کاریم تے کننگ کیک۔ و ولدا است ئنا سِخت ئٹ اِی فکر کریٹ کہ گم مننگ آن پَد او انت کننگ ئٹی مرو، خنیسہ او تینٹ اندا ہیت آ فکر کننگ ئٹی مرو۔

ای کرسی آن بش مسوٹ، الماری آن Acqua di gio ءِ کشّاٹ و کرسی نا مونا ٹیبل نا زی آ تخاٹ۔ “بائدے دادے تینتو دریک آ”، ای دیر تون گلہ کریٹ و ولدا Acqua di gio الماری ٹی ئس، ٹِک، ہمو جاگہ آ، ہمو وڑا کہ گم مننگ آن مُست او تخسک تا۔ بس، دا وار ڈبہ تا الوکہ۔ او کنا مونا ٹیبل نا زی آ، تنیا تموک ئس۔

یاتی:
دا افسانہ ءِ حنیف شریف ساجد حسین نا زی ءَ نوشتہ کرینے۔
Acqua di gio:  سینٹ ئنا پِن ئسے۔
Rest Mull: جرمنی ٹی ہر غڑدال آتیکن جیتا او ڈبہ استعمال کیر ءَ ہراٹی مکس ءَ غڑدال آتے شاغر ءَ اودے ریسٹ مال پارا۔
Der Spiegel: جرمنی نا ہفتئی (میگزین) تاک ئسے۔

پاکستان نا نیشنل کمانڈ اینڈ آپریشن سینٹر پارینے کہ اسہ دے ئٹی پین 113 بندغ کرونا وائرس نا سوب آن مرگ نا گواچی مسونو اندن 49 ناجوڑ نا مرگ وینٹیلیٹر آ مسونے۔

سہہ شمبے آ این سی او سی نا کنڈان پاننگانے کہ 24 سائت ئٹی 3 ہزار 84 پسکونو کرونا کیس رپورٹ مسونے ملک ئٹ مثبت کرونا کیس آتا کچ 7.93 فیصد ءِ، کرونا نا سوب آن تیوہ آتیان زیات پنجاب ٹی 67 مرگ مسونے، خیبرپختونخوا ٹی 29 مرگ مسونے، سندھ 11، اسلام آباد 1،  بلوچستان ٹی 5 مرگ مسونے، کرونا آن کہوک آتا جمعی کچ 19 ہزار 106 مسونے۔

این سی او سی پارے کہ تدوکا 24 سائت ئنا نیام ئٹی 38 ہزار 883 ٹیسٹ کننگانے اندن فعال کیس آتا کچ 78 ہزار 959 اسکا سر مسونے، کرونا وائرس آن جوڑ مروکا تا کچ 7 لکھ 66 ہزار 492 ءِ، تیوہ آ ملک ئٹ کرونا وائرس نا کیس آتا جمعی کچ 8 لکھ 64 ہزار557 مسونے۔

دا وخت پاکستان نا 639 جتا اسپتال آتیٹ 5 ہزار 353 ناجوڑ دوا درمان مننگ ءُ، پشاور ٹی 40 فیصد، ملتان ٹی 70 فیصد، لاہور ٹی 64 فیصد، گوجرانوالہ ٹی 59 فیصد وینٹیلیٹرز آک پُر ءُ، داڑان بیدس گوجرانوالہ ٹی 54 فیصد، پشاور 52 فیصد، ملتان ٹی 64 فیصد و صوابی ٹی 52 فیصد آکسیجن بیڈ آتا مریض آک ساڑی ءُ۔

پنی آ زانتکار، نوشتہ کار و ادیب پروفیسر عزیز بگٹی کذیت کرے۔

پروفیسر عزیز بگٹی بلوچستان یونیورسٹی آن ایم اے پولیٹیکل سائنس، بلوچی آنر، ایل ایل بی کرینے۔

اندن “بلوچستان شخصیات کے آئینے میں” ، “بلوچستان سیاسی کلچر و قبائلی نظام” ، “بگٹی قبیلہ” تون اوار پین چندی کتاباتے نوشتہ کرینے۔

بلوچی بولی و ادب نا زی آ ام چندی کتاب نوشتہ کرینے۔