تعلیم نا فائدہ و اہمیت یوتھ لیڈر شپ نا پارہ غان گرلز ڈگری کالج حب ٹی سیمینار ہڈ تننگا ہراٹی مسڑ تا تعلیم، اوفتا کیریئر کاؤنسلگ کیپیسٹی بلڈنگ و تعلیم نا نیام ئٹی بروکا ہڑاند آتا رد ئٹ کالج نا خونندا آتے جتا وڑ ئٹ ٹرینگ نا دروشم ئٹ چاہنداری تننگکا۔

وائے ایل ایف نا کنڈان ہڈ تروک پروگرام ٹی خونندا آتے پین تعلیم اسکالرشپس و ایلو تعلیمی پروگرام آتا گیشتر حوال تننگا۔

یوتھ لیڈرشپ نا کنڈان حب ئنا جتا تعلیمی اداروہ آتیٹ ہیل تس و  پروگرام ہڈ تننگانے، وائے ایل ایف کوالخوا تا رد ئٹ اوفتا مسخت خونندا آتے تعلیم و اوفتا بروکا وخت اکن چاہنداری تننگ ءِ۔

یوتھ لیڈرشپ فورم ہڈ تروکا سیمینار ٹی ‏راجی بلوچ وومن فارم آن ناز بارکزئی اوار مریسہ خونندا آتے اوفتا مون ٹی بروک معاشی و چاگڑدی تعلیم ٹی بروک آ ہڑاند آتے ایسر کننگ و دو ہلیسہ ہیڑکوئی نا اہمیت آن چاہنداری تس۔

راجی بلوچ وومن فارم ئنا راہشون نا پننگ ئس کہ تعلیمی میدان تون اوار ہر جاگہ زالبول تے تینا ویل آتیتون مون تننگ کن و اوفتا مقابلہ کننگ کن اسٹ ایلو نا ہم کوپئی و سیوت الّمی ءِ۔

یوتھ لیڈر شپ نا کنڈان ماریہ بلوچ و ایلو کوالخواک دا سمینار ٹی اوار مسوسر ہرافک اوکان گڈ خونندا آتے پین تعلیمی پروگرامز آتیا انفرادی حوال تسر۔

بلوچستان نا مسہ ضلع ٹی سم کاری نا مسہ جتا ویل آتیٹ ارا بندغ مرگ نا گواچی مسونو، 2 ٹپی مسر، سم کاری نا ویل آک بلوچستان نا ضلع قلات، نوشکی و لورالائی ٹی مسونو۔

قلات ٹی سم کاری نا ویل  اسکلکو نا ہند آ مس ہراڑے سم کاری نا سوب آن نور بخش نا مار نصراللہ پنی ءُ بندغ اس مرگ نا گواچی مس۔

ویل ئنا حوال رسینگتون پولیس کارندہ آک ویل ئنا ہند آ سر مسر جوْن ءِ اسپتال آ سر کریر ہراڑے المی آ کاروائی آن گڈ جوْن خاہوت نا دو ٹی تننگا، ویل مست ئنا دژمنی نا سوب پاننگک۔

اندن ‏نوشکی ٹی گزنلی کراس آ نادرست  موٹرسائیکل سوار آتا گاڑی آ سم کاری آن پیر جان نا مار جعفر خان ٹپی مسونے ،ٹپی آ بندغ اسپتال سر کننگانے ہراڑے اونا دوا درمان کننگا۔ داسکان  ویل ئنا سوب آک سما تمتنو۔

پین حوال ئسے نا رد ئٹ  لورالائی ٹی نادرست بندغ آتا سم کاری آن اسہ بندغ اس مرگ نا گواچی و اسٹ ٹپی مسونے، ٹپی آ بندغ ٹیچنگ ہسپتال آ سر کننگانے۔ پولیس نا رد ئٹ  ویل مست ئنا دژمنی نا سوب مسونے۔

بلوچستان نیشنل پارٹی ڈسٹرکٹ مستونگ نا پارہ غان بنجائی کال آ ساروان پریس کلب نا مونا بلوچستان ءِ بشخ کننگ نا چم بازی نا برخلاف برانز و مچی کننگا۔

برانز کروک آتیٹ بی این پی نا ضلعی صدر حاجی نزر محمد ابابکی، سینٹرل کمیٹی نا باسک ملک عبدالرحمٰن خواجہ خیل، بی ایس او نا سینٹرل کمیٹی نا باسک آغاعدنان شاہ بلوچ، جنرل سیکرٹری جمیل بلوچ، ڈپٹی جنرل سیکرٹری چیئرمین قدیر بلوچ، فناس سیکرٹری میر عبدالغفار مینگل، ہیومن رائٹس سیکرٹری منیر آغا بلوچ، ٹکری نوراحمد قمبرانی، ثناء نور بلوچ، ٹکری عبدالخالق بلوچ پاریر کہ بلوچستان ءِ بشخ کننگ نا چم بازی ہچبر سرسہب مننگ کہ ہلوفن۔

اوفتا پین پاننگ ئس کہ چمن آن ہلیس گوادر اسکان بلوچستان اسٹ ءِ، ساڑی حکومت بلوچستان ءِ بشخ کننگ نا چم بازی ءِ کننگ ءِ ہرادے بی این پی ہر وڑ ئٹ ہم سرسہب مننگ کہ ہلوف و اونا برخلاف ہر فورم آ توار ارفیسہ کرو۔

برانز کروک آک پریر کہ گوادر ءِ جتا صوبہ اس جوڑ کننگ نا تغ خنوکا تا  بیرہ تغ اس سلو۔

افک پاریر کہ بی این پی تینا راہشون سردار اختر مینگل نا راہشونی ٹی بلوچستان نا لس مخلوق نا حق حاکمیت، مڈی و ساحل کن جنگ کریسہ کرو و بلوچستان ءِ بشخ کننگ نا ہر چم بازی ءِ پاش کریسہ اوفتا چم بازی تا مونا آہن نا دیوال نا وڑ سلو و اوفتے بے سہب کرون۔

اوفک مُستی پاریر کہ بلوچستان نا مڈی و ساحل نا رھکنگ کن  ہر وڑ ئنا قربانی آن پد سلپرون۔ بلوچستان ءِ بشخ کروک آک اول بلوچ اکابرین تا تاریخ ءِ اریر، سی پیک نا پن آ بلوچستان نا مخلوق ءِ ریفیر گوادر نا مخلوق اینو ہم دیر، بجلی گیس و زند ئنا ایلو بنماسی خواست و آسراتی تے دوئی مننگ کن عزاب ءِ۔

اوفتا پین پاننگ ئس کہ داسا سلیکٹڈ حکمران بلوچستان ءِ قطبی و جہندمی نا پن آ بشخ کننگ نا بے سہب چم بازی کریسہ بندغ آتیا بنجائی کوزہ کننگ نا کوشت کریسہ ءِ ہرادے بی این پی و بلوچ راج ہچ وڑ ئٹ منیپک، بلوچ راج ہمو تیوہ آ  چم بازی تے سیوت و اواری ئٹ بے سہب کرو اندا وڑ ایلو سیاسی جماعت آک ہم بلوچستان نا بر خلاف مروکا چم بازی تا بر خلاف پبی وڑ ئٹ توار ارفیسہ تینا حق ادا کیر ادا۔

بلوچ اسٹوڈنٹس ایکشن کمیٹی نا مرکزی ترجمان تینا شینک کروکا بیان ئٹ تربت یونیورسٹی بست و بند نتیجہ نا حوالہ آن بے لائخی و بے پامی آ خلیس نا درشانی ءِ کریسہ پارے خوانوکا ادارہ غا تیٹی دا وڑ نا بے پامی رویہ غا تا سوب آن سدا خوانندہ غا تا بروکا وخت زوال مننگ نا خلیس ءِ۔

او پارے کہ تدوکا سال تربت یونیورسٹی نا پارہ غان بیچلرز نا سالانہ امتحان آک ہڈ تننگار ہرانا نتیجہ تا بناء داسکان متنے اندن جتا آ جامعہ غا تیٹی داخلہ آک بناء مسونو۔ جامعہ نا پارہ غان نتیجہ تا بفرنگ نا سوب آن خوانندہ غاک برجاء سال ئٹ داخلہ ہلنگ آن سلیرہ۔ بست و بندی حوالہ آن دا وڑ نا کُٹئی خوانندہ غاتا خواننگ ءِ توننگ نا سوب مننگ ءِ۔

او پین پارے کہ بلوچستان ئٹ دا وخت اسکان منہ اندنو جامعہ ارے ہراڑے خوانندہ غاک جوانو تعلیم دوئی کننگ کیرہ۔
ایلو صوبہ غاتا مون ئٹ تعلیمی شعبہ غاتیٹی بدحالی آن بیدس ہم دا حد و حویل جامعہ تیٹی ہم آسراتی تا مفرنگ نا برابرءُ۔

جامعہ تیٹی ساہ ہلوک آ مُد تالان کننگانے و آجوئی تون خیال آتا درشانی و سیاسی کریم آتیا رکھ خلنگانے۔ سیاسی کریمک آتیا رکھ نا سوب آن بلوچستان نا تیوہ جامعہ تیٹی بست و بندی خوالخواک تینا مرضی نا رد ئٹ خوانندہ غاتے تنک کننگ و اوفتا خواننگ ئٹ ہڑاند شاغنگ کن ہر وڑ نا چم بازی تے کاریم ئٹ ہتنگ ءُ۔

او پین پارے کہ جامعہ بلوچستان ئٹ دا وخت داخلہ تا بناء مسونے اندن ایلو پارہ غان تربت یونیورسٹی نا کُٹئی و بست و بندی بے لائخی تا سوب آن تربت یونیورسٹی نا بیچلر نا خوانندہ غاک بلوچستان یونیورسٹی ئٹ داخلہ ہلنگ آن سلیرہ۔
دا وڑ نا عمل تیان خوانندہ تون نا انصافی و اوفتا خواننگ ئٹ ہڑاند شاغنگ نا ڈول ءِ۔

تینا بیان نا ایسر ئٹ او پارے کہ نن محکمہ خواننگ و جامعہ تا کوالخواک تیان خواست کینا کہ خوانوکا ادارہ تیٹی اسہ علمی ءُ  مُد ئسے نا ہڈ تننگ کن عملی ءُ گام ہرفنگے و خوانندہ تا مسئلہ تے گچین آ بنماس تیا حل کننگے۔ نن تربت یونیورسٹی بست و بندی خوالخواک تیان خواست کینا کہ زو بیچلرز تا نتیجہ تا پڑو کننگے و دا عمل ئٹ کُٹئی کروک آ بست و بندی کوالخوا تیان سر و سوج کننگے۔

وزیر داخلہ بلوچستان میر ضیا لانگو پارینے تدوکا تو ئنا حساب آ برجاء تو کورونا  نا کیس آتیٹ پین چار کچ ودکی مسونے، لس مخلوق آن خواست ءِ کہ کورونا آن بچینگ کن ماسک، رھکوک مری تون اوار ایس او پیز آ عمل کیر۔

گیشتر حوال تا رد ئٹ وزیر داخلہ بلوچستان  کورونا وائرس آن بچفینگ کن لس مخلوق آن خواست کریسہ پارے کہ کورونا وائرسی نا مسیٹمیکو لڑ خرابُ ء حالیت اس مننگ کیک، تدوکا تو ئنا حساب آ برجاء تو کورونا کیس آتیٹ چار کچ ودکی مسونے۔ میر ضیا لانگو نا پاننگ ئس کہ محکمہ داخلہ بلوچستان نا کنڈان دفعہ 144 خلنگ، بلوچستان ئٹ ہفتہ ٹی ارا دے پین الصوبائی ٹرانسپورٹ آ پابندی و ہر علاقہ ٹی کیس تا ودینگ آ  اسمارٹ لاک ڈان مننگ کیک۔

وزیر داخلہ بلوچستان پین پارے کہ روچہ ٹی گائیڈ لائنز آ عمل کننگ مرو، لس مخلوق ایس او پیز آ عمل کپک گڑا حکومت سخت ءُ فیصلہ کننگ کیک، او خواست کرے کہ کورونا آن بچنگ کن، ماسک، رھکوک مری تون اوار ایس و پیز آ عمل کیر۔

ڈسٹرکٹ بار ایسوسی ایشن مستونگ نا صدر عبدالحمید بنگلزئی ایڈوکیٹ نا صدارت ئٹ ڈسٹرکٹ بار روم ٹی اسہ ہلہلئی اجلاس اس ہڈ تننگا، ہراٹی ڈسٹرکٹ بار نا تیوہ آ  اوغہدیدار آتیان بیدس سینئر وکیل آک ہم بھلو کچ اسیٹ اوار مسر۔

اجلاس ٹی قاضی کورٹ دشت و جوڈیشل مجسٹریٹ دشت نا عدالت آتے کوئٹہ آ دننگ نا مننگ کروک صلہ نا پبی  لوز آتیٹ مذمت کریسہ پاریر کہ قاضی کورٹ دشت ٹی دا وخت 130 مقدمہ بننگ ء، اندن ہراڑے مقدمہ آتا کچ زیات مریک اوڑے جوڈیشل آفیسران آتا کچ ودیفیرا، تاکن ساہلین ء سہی وخت و اڑزان نرخ انصاف تننگ مرے۔

اونا پین پاننگ ئس کہ ساہلین مقدمہ آتے کوئٹہ آ بننگ کن بھاز کلو میٹر سفر کروئی تمو، ہراکہ ساہلین تون اوار نا انصافی نا ڈول مرو، ہرانا دسٹرکٹ بار مستونگ نہ بیرہ مذمت کیک بلکن ہمو صلہ تا بر خلاف ہر فورم آ توار ارفون۔

اجلاس ٹی پین پاننگا کہ داکان مست  جوڈیشل مجسٹریٹ تحصیل کردگاپ ایسر کننگا، داسا جوڈیشل مجسٹریٹ دشت ء ایسر کریسہ چارج جوڈیشل مجسٹریٹ مستونگ ء تننگا، ہرانا سوب آن ہمو ساہلین آتے بھاز سختی تو مون تروئی تمو۔ او پارے کہ نن دا اجلاس نا وڑ ئٹ جناب چیف جسٹس آف بلوچستان ہائی کورٹ آن خواست کینا کہ دشت نا عدالت آتے  کوئٹہ آ راداہ کننگ نا صلہ ء دمدستی وڑ ئٹ واپس ہلیسہ جوڈیشل مجسٹریٹ کردگاپ ء  دمدستی بحال کیر۔

او پارے کہ دشت ٹی مستقل جوڈیشل مجسٹریٹ تخر، و تحصیل کھڈکوچہ ٹی ہم جوڈیشل مجسٹریٹ تخنگ تون اوار ڈسٹرکٹ اینڈ سیشن کورٹ ٹی فیملی جج  دمدستی  تخنگ ء ہم یخینی کیر، نئے تو ایلو ڈسٹرکٹ بار مستونگ سخت آن سخت برانز کننگ آ بیوس مرون۔

بلوچستان نا ضلع پنجگور آن پاکستانی سیکیورٹی کارندہ غاتا آپریشن و مسہ زالبول ء‌ِ زوراکی اٹ دزگیر کریسہ نادرست آ ہند دریر۔ تدینی پنجگور نا علاقہ گچگ ٹی مسونے۔

احوال آتا ردئٹ گچگ نا علاقہ ٹوبہ ٹی آپریشن نا وخت آ مسہ زالبول ہرافتا پنک راج بی بی زائیفہ لعل جان، کپوت زائیفہ عوض و نازل زائیفہ امام بخش ہرافتے بندی کریسہ نا درست آ ہند دننگانے۔

یاتی مرے داڑان مست ام بلوچستان نا جتا جتا علاقہ غاتیان زالبول آتے بیگواء کننگانے و اوفتیکن توار ارفنگا کننگانے۔

اندن منہ وخت مست ام گچگ آن آپریشن نا وخت آ 9 زالبول ء‌‌‌‌‌ِ بندی کننگ و بیگواہ کننگ نا احوال بسونو۔

بلوچستان نا دارالحکومت کوئٹہ ٹی وائس فار بلوچ مسنگ پرسنز نا برانز ءِ 4277 دے پورو مسر، سول سوسائٹی آن تعلق تخوک آ بندغ آک کیمپ آ بسر و اسٹ ہسونی نا درشانی کریر۔

بیگوا راشد حسین نا لمہ کیمپ آ بس تینا برانز ءِ ریکارڈ کرفے، خاہوت آتا پاننگ ئس کہ راشد حسین ءِ متحدہ عرب امارات آن ڈھکوک ادارہ آک زورٹ بیگوا کریسہ شش تو آن گڈ پاکستان نا دوٹی تسر۔

راشد حسین بلوچ نا لمہ اینو سپریم کورٹ نا مونا تینا مار ئنا یلہ کننگ نا رد ئٹ ہناسس۔

وائس فار بلوچ مسنگ پرسنز نا راہشون ماما قدیر نے وفود تون ہیت کریسہ پارے کہ بلوچ چنا تا قربانی تا سوب آن بلوچ راج تیوہ جہان ئٹ تینا چاہنداری کوزہ مروک ریاست نا حیثیت ئٹ منیفنگ ٹی سرسہب مسونے۔

اونا پاننگ ئس کہ ہر دے آباتی تیا بمباری، اُرا تے ہُشنگ، راج ئنا اشتماعی زنک ءِ ایسر کننگ ءِ کوزہ گیر ریاست تینا کوزہ نا ایسری دے بند کرو۔

ماما قدیر نا پاننگ ئس کہ کوزہ بلوچستان ٹی بندغ آتے افیسہ بیگوا کننگ آن گڈ اوفتا جشوک آ جون آتا خننگ نا لڑ اسہ بھلو بندغی المیہ ئسے، ایلو کنڈان حکومتی مخ تفی ئٹ ڈیتھ اسکواڈ بلوچ ورنا تون اوار زالبول، پیر و چنا تے کسفنگ نا موْکل تننگ گڑتی ئسے۔

ماما قدیر نا پین پاننگ ئس کہ تدوکا سال ڈہنک ٹی بلوچ زالبول ملک ناز ءِ اندا ڈیتھ اسکواڈز نا کارندہ آک کسفیر و چنکا برمش ءِ ٹپی کریسر، ولے اونا بنجائی ڈودار نا اینو آجو مننگ انصاف نا بند و بست ءِ پاش کیک۔

بلوچ اسٹوڈنٹس آرگنائزیشن پجار نا بلوچستان یونیورسٹی ٹی یونٹ باڈی اجلاس ہڈ تننگا ہرانا صدارت بنجائی چیئرمین زبیر بلوچ کرے۔ خاص انگا مہمانک صوبائی صدر بابل ملک بلوچ ئسر اندن ایلو مہمانک گرامی ٹی سی سی نا ممبران شکیل بلوچ، علی نواز بلوچ، ادریس بلوچ، عمیر بلوچ،  صوبائی سینئر نائب صدر شفقت ناز بلوچ، وسیم بلوچ و ٹکری ارشاد بلوچ ئسر۔

اجلاس ٹی خونندا آک بھلو کچ اسیٹ بشخ ہلکر۔ اجلاس نا بناء ٹی شہداء ءِ سرخ سلام تننگا، و اوفتا یاد ئٹی ارا سائت اکن چپی کننگا، اجلاس ٹی علاقائی، ملکی و جہانی سیاسی حالیت آتیا شابیت ہیت مس۔

اجلاس آن ہیت کریسہ بنجائی چیئرمین زبیر بلوچ پارے سی پیک بلوچ نا بد حالیت آتیٹ ودکی کرینے، بلوچ آک تینا ڈیہہ ئٹی زندان آتیٹ بند کننگانو، دا امر ءُ دیمروی ئسے، سی پیک اگہ بلوچ خوانندہ آتے اسہ کالج و یونیورسٹی اس تننگ کپک گڑا بلوچ ورناک دا پراجیکٹ نا بر خلاف ہیت کرور، و دانا برخلاف ہر تلہ آ برانز ہم کرون دیمروی و خوشحالی نا پن آ سامراج ننا ڈیہہ و ساحل آ کوزہ گیری و خون ئنا بازار ءِ باسن کننگ خوائک، بلوچستان ءِ بشخنگ آن ورناتے سوختہ کننگ نا کوشت ءِ کننگ ءِ بلوچستان ءِ بشخ کننگ بلوچ نا زمین آ کوزہ کننگ نا تغ ہچ پورو مروف۔

اجلاس آن ہیت کریسہ صوبائی صدر بابل ملک بلوچ و سی سی ممبران آک ہیت کریسہ پاریر کہ بلوچ مڈی نا بے کچ کاریم لٹ و پل آن جوان پوہ اُن، اگہ کس اس دا سوج خلیک کہ او ہر وڑ ئٹ بلوچ ءِ خلیفینگ و خون ئنا بازار ءِ باسن کریسہ ننے نناحق آن مور کننگ کیرا ، گڑا دا اوفا غلط فہمی نا گواچی ءِ۔

بلوچ نا تاریخ مزاحمت و شہادت آتیان پر ءِ، اجلاس نا ایسری ٹی الیکشن کمیٹی ٹہفنگا، ہرانا کماش علی نواز بلوچ ئس، اندن عمیر بلوچ و وسیم بلوچ ممبر ئسر، الیکشن کمیٹی نا نتیجہ آتا رد ئٹ یونٹ سیکٹری اکرام بلوچ و ڈپٹی یونٹ سیکٹری گل خان نصیر گچین مسر۔