بلوچستان نا ضلع خضدار ئٹ سم کاری آن اسہ زالبول اس بیران مس، پولیس جاگہ غا سر مس سم کاری کروک نا دزگیری نا کوشست آک برجاء ءُ، بنائی وڑ ئٹ زالبول نا کسفنگ نا سوب معلوم متو۔

اندن اسہ پین تدینی اسیٹی مستونگ ئٹ متکنو دژمنی ئسینا سوب آن سم کاری آن اسہ بندغ اس بیران مس۔

تحصیل کردگاپ نا علاقہ لڑی دشت ئٹ متکنا دژمنی نا زی آ سم کاری آن مہراب خان، بیگ محمد سمالانی پنی ئسے نا مار مرگ نا گواچی مس۔ لیویز کوالخواک جاگہ غا سر مریسہ جون ءِ المی کاروائی کن شہید نواب غوث بخش رئیسانی اسپتال آ دریر۔ ہراڑے المی کاروائی آن گڈ جون خاہوت نا دو ٹی تننگا۔

لیویز نا رد ئٹ خونی منہ وخت مست سیاہ کاری نا شک ئٹ تینا زائیفہ تون اوار ارا بندغ نا خون کریسس و منہ وخت جیل مننگ آن گڈ یلہ مسوسس۔

رسینگوک حوال تا رد ئٹ تیوہ آ پاکستان ئٹ جہانی دین کرونا وائرس آن تدوکا بیست و چار گھنٹہ نا نیام ئٹی پین 86 بندغ مرگ نا گواچی مسونو۔

نیشنل کمانڈا ینڈ آپریشن  سینٹر (این سی او سی) نا کنڈان شینک کروکا پوسکناحساب نا رد ئٹ تدوکا بیست و چار گھنٹہ نا نیام ئٹی تیوہ آ پاکستان ئٹ پین 3 ہزار 884 کورنا کیس رپورٹ مسونو۔

پاکستان ئٹ کورونا کیس آتا جمعی 10 لکھ 75 ہزار 504
مسونو، این سی او سی نا رد ئٹ تدوکا بیست و چار گھنٹہ نا نیام ئٹی تیوہ آ ملک ئٹ 49 ہزار 506 کورنا ٹیسٹ کننگانے، تدوکا 24 گھنٹہ نا نیام ئٹی مثبت کیس کچ 7 اعشاریہ 84 فیصد مسونے۔

سندھ ئٹی کورونا کیس آتا کچ 4 لکھ اسہ ہزار 790، خیبر پختون خواہ ٹی اسہ لکھ 49 ہزار 56، پنجاب ٹی مسہ لکھ 65 ہزار 824، اسلام آباد ٹی91 ہزار 217، بلوچستان ٹی31 ہزار 234، آزاد کشمیر ٹی27 ہزار 507، و گلگت بلتسان ٹی 8 ہزار 876 مسونو۔

کورونا وائرس نا سوب آن تیوہ آتیان زیات مرگ پنجاب ٹی مسونے، ہراڑے 11 ہزار 239 بندغ مرگ نا گواچی مسونو، اندن سندھ ئٹی 6 ہزار 235 بندغ، خیبر پختونخواہ ٹی 4 ہزار 570، اسلام آباد ٹی821، گلگت بلتستان ٹی157، بلوچستان ٹی 332، و آزاد کشمیر ٹی 650 بندغ مرگ نا گواچی مسونو۔

رسینگوک حوال تا رد ئٹ بلوچستان نا ضلع ژوب ئٹی سلاء بند بندغ آک سم کاری کریسہ باوہ مار تون اوار 3 بندغ ءِ کسفسہ نرار، اندن تینا مون سم کاری آن اسہ بندغ اس ٹپی مسونے۔

حوال تا رد ئٹ بابڑ نا علاقہ ٹی مست ئنا دژمنی نا سوب آن سم کاری آن معروف زئی خوستی آن تعلق تخوک آ باوہ مار تون اوار 3 بندغ مرگ نا گواچی مسونو۔

لیویز رسینگوک حوال تا رد ئٹ مرگ نا گواچی مروکا آتیٹ ملک حمد اللہ، اونا مار امین اللہ، و حاجی عنایت اللہ عرف نیئک اوار ءُ۔ تحصیلدار بشیر احد نائب رسالدار فاضل شاہ نفری تون اوار ہند آ سر مریسہ جون تے سول ہسپتال آ سر کریر۔

بلوچستان نا ضلع ژوب ئٹی تینا مون سم کاری نا سوب آن اسہ بندغ اس  امیر محمد نا مار عبدالسلام ٹپی مسونے، ہرا دمدستی وڑ ئٹ ہسپتال آ سر کننگا، پین کارروائی برجاہ ءِ۔

حوال تا رد ئٹ پاکستان ئٹ کورونا وائرس آن 67 بندغ مرگ نا گواچی مسونو، ہراڑان گڈ کہوک آتا کچ 23 ہزار 702 مسونے، اندن کورونا نا پک مروکا کیس آتا کچ 10 لکھ 58 ہزار 405 مسونے۔

نیشنل کمانڈ اینڈ آپریشن سینٹر نا پوسکنا حساب نا رد ئٹ تدوکا 24 گھنٹہ نا نیام ئٹ 4 ہزار 745 پسکنو کیس رپورٹ مسونے، پنجاب ٹی 3 لکھ 61 ہزار 458، سندھ ئٹی 3 لکھ 94 ہزار 748،خیبر پختونخوا ٹی اسہ لکھ 47 ہزار 26 کیس رپورٹ مسونو۔

اندن بلوچستان ئٹ 30 ہزار 967، گلگت بلتستان ٹی 8 ہزار 551، اسلام آباد ٹی 89 ہزار 569 اندن آزاد کشمیر ٹی 26 ہزار 86 کیس رپورٹ مسونے۔

بلوچ لبریشن آرمی نا ترجمان جیئند بلوچ میڈیا ءِ شنک کروک بیان اسیٹ پارے کہ بی ایل اے نا سرمچار تابش عنایت عرف ریحان 29 جولائی نا شام پنجگور ٹی وطن نا رکھ اکن کوزہ گیر دژمن تون جنگ آن گڈ شہید مس، بی ایل اے نا اسپیشل ٹیکٹیکل آپریشنل اسکواڈ (ایس ٹی او ایس) نا باسک سنگت تابش عنایت اسہ خاص تنظیمی مشن اس ایسر کننگ اس کہ پنجگور عیسّئی نا ہند آ کوزہ گیر پاکستانی فوج و نام نہاد “ڈیتھ اسکواڈ” تون مون پہ مون مس ہراڑے گھنٹہ آتے اسکان جھڑپ ٹی دژمن ءِ مش پکفنگ آن گڈ  سم ایسر مننگ آ سنگت تابش عنایت دزگیر مننگ نا جاگہ آ ایسری سم نا فلسفے ءِ ارفیسہ تینا ایسری سم ءِ تینا بدن ٹی خلیسہ شہادت نا گچین انگا ہند ءِ دوئی کرے۔

او پین پارے کہ پنجگور خدابادان نا ہندی تابش عنایت عرف ریحان ولد عنایت اللہ 2014 آن بی ایل اے نا اسہ بہادر ءُ سنگ اس ئسک، تینا بے مثال بہادری، ذہانت و جنگی لائخی تا سوب آن او منہ وخت ئٹ بی ایل اے نا اسپیشل ٹیکٹیکل آپریشنل اسکواڈ نا بشخ جوڑ مسوس، دا نیام ئٹی نی پنجگور شہر، گچک و کیلکور ٹی تینا فرض ءِ ایسر کرے و بھاز خاص ءُ جاگہ آتیٹ دژمن ءِ بےسہب  کریسہ خاص ءُ کڑدار ادا کرے۔

او پارے کہ تابش عنایت ایسر سم نا گچین فلسفہ ءِ گچین کریسہ تنظیمی راز تے ہر وخت اکن تینا سینہ ٹی ڈکیسہ و دژمن ءِ کلہو تس کہ بلوچ ہچ وخت تینا آجوئی وطن نا جہد آن  دو ارفپرو ۔

جیئند بلوچ پارے کہ تابش عنایت نا شہادت نا رد ئٹ سر و سوج ایسر کننگ آن گڈ تنظیم نا کنڈان دا بیان شینک کننگانے، سنگت تابش نا شہادت ٹی اوار بندغ آتے زوت اوفتا ڈو تا سزا تننگو۔

او پین پارے کہ بی ایل اے و تیوہ آ راج تینا عظیم انگا شہداء آتے ہچ وخت اوست آن دروفن و بلوچ شہد آتا دتر نا بدل ءِ آجوئی بلوچستان نا وڑ ئٹ الینگور۔

عوامی نیشنل پارٹی نا بنجائی باسک ملک عبداللہ کاسی نا بیگواہ مننگ آن پد اینو لاش خننگا۔

اے این پی نا احوال کار نا پاننگ نا درئٹ کہ ملک عبداللہ کاسی نا بیگواہ کننگ آن پد بیگواہ کروکاک پیسہ خواہنگ ئسرہ ولے اینو اونا لاش پشین نا علاقہ سرانان آن دو بس۔

یاتی مرے اے این پی نا بنجائی باسک ملک عبداللہ کاسی ءِ 26 جون آ کچلاک آن برمتہ کننگا۔

اونا بیگوائی نا خلاف عوامی نیشنل پارٹی کچلاک کوئٹہ روڈ بند کریسہ برانزی مچی کرے ولے حکومت نا پاننگ آن پد اے این پی تینا برانزی مچی تے ایسر کرے۔

اندن داڑان مست ام اے این پی نا صوبائی احوال کار اسد اچکزئی ءِ بیگواہ کریسہ منہ وخت آن پد اونا ام لاش اسے دون سے آن خننگا۔

یاتی مرے عوامی نیشنل پارٹی دا وختا بلوچستان عوامی پارٹی و تحریک انصاف تون اوار بلوچستان گورنمنٹ ٹی حکومت کننگے.

بلوچستان نا علاقہ قلات،و مستونگ ئٹ روڈ شکست نا جتا ویل آتیٹ اسہ بندغ اس مرگ نا گواچی 4 ٹپی مسونو۔

رسینگوک حوال تا رد ئٹ کوئٹہ کراچی بھلا روڈ آ بینچہ عبدالرحمن کراس آ مزدا گاڑی کلٹی مننگ نا سوب آن  ڈرائیور تون اوار ارا بندغ۔ بھاز ٹپی مسونو۔

لیویز رسینگوک حوال تا رد ئٹ قلات بینچہ نا ہند آ عبدالرحمن کراس نا خڑک کوئٹہ آن کراچی آ ہنوک مزدا گاڑی تروند ہننگ نا سوب آن ویل ئنا گواچی مس ہرنا سوب آن گاڑی ٹی سوار آتا بندغ بھاز ٹپی مسر، ہرافتے بینچہ لیویز موبائل ڈی ایچ کیو ہسپتال قلات آ سر کرینے، ہراڑے اوفتا دوا درمان کننگانے۔

اندن مستونگ کرد گاپ نا خڑک کسٹم کارندہ آتا گاڈی ویگو و ٹرک ڈک لگانو ہرنا سوب آن کسٹم آفیسر سلیم طاھر  مرگ نا گواچی و اسہ کارندہ اس ٹپی مسونے۔

گیشتر حوال تا رد ئٹ کوئٹہ تفتان بھلا روڈ آ کردگاپ گریڈ اسٹیشن نا خڑک گشت آ محکمہ کسٹم کارندہ آتا گاڑی ویگو و ایلو کنڈان بروک آ ٹرک ڈک لگانو۔

ہرنا سوب آن کسٹم آفیسر سلیم طاهر ہند آ مرگ نا گواچی مس و اسہ کارندہ اس ٹپی مسونے، حوال رسینگتون لیویز بند و بست  کردکاپ ہند آ سر مریسہ مرگ نا گواچی مروک و ٹپی آ ء شهید نواب غوث بخش ہسپتال مستونگ آ سر کرینے۔

نوشکے پریس کلب نا گچین کاریک اڈ تننگار۔ دا گچین کاری تیٹی حاجی سعید بلوچ صدر و غلام رسول جمالدینی جنرل سیکرٹری گچین مسر۔

مونی حوال تا ردئٹ نوشکے پریس کلب نا سالانہ وخت پورو مننگ آن پد بروکا سال کن گچین کاری کننگار۔ دا گچین کاریک چیئرمین الیکشن کمیٹی حاجی طیب یلانزئی نا کمک اٹ اڈ تننگار ہراٹی حاجی سعید بلوچ صدر، صلاح الدین بلوچ نائب صدر، غلام رسول جمالدینی جنرل سیکرٹری، محمد صادق بادینی جوائنٹ سیکرٹری، مالک عدیل مینگل فنانس سیکرٹری و منظور بلوچ پریس اینڈ آفس سیکرٹری گچین مسر۔

پد رند – مرید بلوچ

دی بلوچستان پوسٹ

سر لوز
اِرا ہزار و پنچ آن گڈ دا وخت اسکان یعنی اِرا ہزار بیست و یک اسکان براہوئی رومانٹک شاعری ٹی پوسکنو رنگ بھاز خننگ آ بریک اندا دور ءِ جدیدٹ براہوئی رومانٹک شاعر آک پوسکنو رنگ آتیتون کہ براہوئی ادب نا پڑا ساڑی ءُ دا شاعرک واہم مچہ بھاز اسہ ایلو نا فکری گند و دروشم ءِ ایترہ ولے دافتیٹی براہوئی زبان نا جدید انقلابی شاعر مرید بلوچ نا اسہ چٹ جتاؤ رنگ ئسے۔ مرید بلوچ نا فکری گند و دروشم ءِ اگہ اسہ شاعر اس ایتک تو کنا خیال پائک او بیرہ مرید بلوچ مننگ کیک دنکہ مرید تینا راج ءِ شاعری نا دروشم اٹ اسہ کلہو اس ایتک:
بے وسی بین و ملاسی تے کنینہ
ہر بلائے مُرغنا نما خلقان دینہ
خوشی گوری نم کے تینکے غم ہلینہ

ایہن تو وطن نا زی آ بناء غان ہلیس دا وخت اسکان ہرا شاعر آک کہ نوشتہ کرینو اوفتا جوزہ آک داد تننگ نا لائخ ءُ ولے جدید انقلابی شاعری نا زی آہیت مرے تو مرید بلوچ نا پِن الّمی بریک۔

نعرہ بازی تیان چھپ اسل انقلابی و مزاحمتی شاعری نا درشم امر مریک؟ داسہ کانہ انقلابی و مزاحمتی شاعری نا بنداوی دروشم نا پارہ غا ہمو شاعری ہراکہ براہوئی ادب ءِ واقعی اسہ جدید ءُ رنگ ئسے تو اسہ جنگ زدہ ء ُ ڈیہہ ئسے نا مزاحمتی آ شاعر گواچن ءِ تینا مونا تخسا دُن نوشتہ کیک:
خبر کرک ان نی پمبئی آ خداتے تینا
زراب و توش ردیفنہ نن چناتے تینا

ہرا و خت ٹی کہ زلم نا برخلاف و آجوئی کن جہد ئسے نا بناء مسنے اوڑے طاقت ور انگا ریاست سردار معتبر تا دروشم ئٹ و عام مخبر آتا دروشم ئٹ آستونک نا دوشہ تے ودی کرینے تو اندا آستونک نا دوشہ تا کڑد ءِ شاعر مونا تخسا تینا راج ءِ اوفتیان معلومدار کننگ کن شاعر دا وڑ نوشتہ کرینے:
ہزار ارمان کپ کرینٹ دا مشتا شم تے
ای چاوہ جُوانی ٹی دز و لچ رہنماتے تینا

مرید نا شاعری غٹ آن جتا ءِ تو انتئے جتا ءِ؟ دا گوڑینگ نا ہیت اس اف انتئے کہ مرید بلوچ بیرہ قلم نا جہدے کننگ اف بلکن آجوئی نا خاطر تینا ساہ ءِ ہم دلدستا تخانے، مرید حالیت ءِ جنگ ٹی ءِ او دھرتی نا ڈکھ ویل آتیان اسہ انقلابی شاعر ئسے آن زیات واقف ءِ، وطن تو اونا مابت نا پیمانہ ہمو کچ ٹی ءِ کہ کس پئے اوٹی دھرتی تینٹ بیان کیک:
نہاراتو الیوہ مل زراباتو مخنگ ئٹ زندگی کیوہ اے یار انتے نی حیران اُس
دتر چٹکار کیوہ اُستنا مشتے ای مست ءُٹ خُد سری کیوہ اے یار انتے نی حیران اُس

داڑے نظم ئسے نابشُخ ئٹ وتن تون اسلم نا ٹولی یعنی فدائی آ ورنا تاعشق ءِ رومانوی ءُ دروشم ئسے ئٹ گوڑیفوک زیبا وڑ بیان کرینے:
وطن تو مخِن نن مخن چَمبُڑِن نن
دا جوزہ تے جنگی آ چاڑٹ بِسن نن
زَبَکہ زراب ان گِروکن شِتاب اُن
پَری ویج و تاب اُن نن اُن صدخہیک

مرید بلوچ نا دا کتاب کہ کنا مونا تخوکے دادے خواننگٹ تو کنے اندن گمان مننگے کہ دا کتاب ءِ مرید نوشتہ کتنے بلکن دا کتاب ءِ جنرل اسلم نا جہد نوشتہ کرینے دا کتاب ءِ لمہ یاسیمن نا حوصلہ نوشتہ کرینے، دا کتاب ءِ فدائی تا حوصلہ آک نوشتہ کرینو دا کتاب ءِ تینا جند اکن تخوکا آخریکو سُم آن دمس مُست ئنا دڑد و خوْشیک نوشتہ کرینو، شور پارود نوشتہ کرینے، دا کتاب ءِ مرید نا شوگیری نوشتہ کرینے، داکتاب ءِ چیدہ غاک نوشتہ کرینو، دا کتاب ءِ سنگر آک نوشتہ کرینو، دا کتاب ءِ ننا خاک نوشتہ کرینے، دا کتاب ءِ کنا دھرتی بلوچستان نوشتہ کرینے۔

درویش بلوچ
26 جنوری 2021