نیشنل کمانڈ اینڈ آپریشن سینٹر (این سی او سی) نا اہم ءُ اجلاس ٹی کرونا آن زیمی ضلع غا تیٹی اسکول آتے 28 اپریل اسکان بند کننگ نا فیصلہ کننگانے. پہلی آن 8 اسکان کلاس آک مفسہ، صوبہ غاک تینا فیصلہ تیکن خودمختار ءُ.

نیشنل کمانڈ اینڈ آپریشن سینٹر (این سی او سی) نا اینو مروکا اجلاس ٹی امتحان آتا حالیت نا بابت اہم ءُ صلہ مس. این سی او سی تیوی ملک ئٹ کرونا آن زیمی ضلع غا تیٹی اسہ کلاس آن ہشت کلاس اسکان اسکول آتے 28 اپریل اسکان بند کننگ نا فیصلہ ء کرینے. پین فیصلہ 28 اپریل آ مروکا اجلاس ٹی مریک.

شفقت محمود پارے کہ  ہرا ضلع زیمی ءِ اوڑے اسکول آتیٹی پہلی آن 8 اسکان کلاس آک مفسہ. دا صوبہ تے فیصلہ کروئی ءِ کہ ہراڑے اسکول آتے بند کروئی ءِ یا آخہ. وزیر تعلیم شفقت محمود پارے کہ ملک ئنا ہر ضلع کرونا آن زیمی اف دا سوب آن ہرا ضلع غاک زیمی ءِ اوڑے کلاس اسٹ آن ہشت اسکان اسکول آتے 28 اپریل اسکان بند کیرہ.

او پین پارے کہ 28 اپریل آ ولدا دا بابت نا جاچ ءِ ہلینہ کہ اسکول آتے عئید اسکان بند کین یا عئید آن مست اسکول آک ملنگر، کرونا آن زیمی ضلع غا تیٹی یونیورسٹیک ہم بند مریرہ.

وزیر تعلیم پین پارے کہ تیوہ ملک ئٹ 19 اپریل آن 9، 10، 11 و 12 جماعت آتا خوانوکا ادارہ تیٹی سخت ایس او پیز نا رد ئٹ بننگ کیرہ تاکہ اوفک امتحان آتا تیاری ءِ کننگ کیر. بھاز کیس آتیان زیمی علاقہ تیٹی تعلیمی ادارہ غاک بند مرور.

امتحان آتا بابت وزیر تعلیم شفقت محمود پریس کانفرنس ئٹ پڑو کریسہ پارے کہ امتحان آک المی مرور، خوانندہ غاک امتحان آتا تیاری ء ِکیر، 40 لکھ چنا تا 9 و 10 نا امتحان آک مئی نا مسٹمی ہفتہ غا ہلنگ نا فیصلہ مسونے، دا امتحان آک 25 مئی آن مست مفسہ.

وزیر تعلیم پارے کہ او لیول و اے لیول نا امتحان آک شیڈول نا رد ئٹ و پورہ ایس او پیز نا رد ئٹ ہلنگ نا فیصلہ مسونے.

اینو مروکا اجلاس ٹی تعلیم و جانجوڑی نا وزیر آک ویڈیو لنک ئنا ذریعہ ئٹ اوار مسر. این سی او سی اجلاس ٹی امتحان آتا حالیت نا ہم جاچ ہرفنگا.

داڑان مست بلوچستان ئٹ تیوہ خوانوکا ادارہ غا تا ملوک مننگ نا فیصلہ مس. محکمہ تعلیم و محکمہ جانجوڑی بلوچستان صوبہ ٹی خوانوکا ادارہ تے بند کپرنگ آ منوکو فیصلہ اس تس.

صوبائی وزیر تعلیم سردار یار محمد رند و پارلیمانی سیکرٹری جانجوڑی ڈاکٹر ربابہ خان بلیدی نا نیام ملنگ ئٹ کرونا وائرس نا پوسکن آ حالیت آ گپ تران مس، ہراڑن گڈ تیوی صوبہ ٹی خوانوکا ادارہ غا تے ملوک تخنگ نا فیصلہ مس.

شہ مرید آتا ھند اُو جہہ ءِ دا
ھانلاتا اے قصہ ءِ بولان

فکرئتو چلتنی آ بُڑزئنگا
گودی بانک کریمہءِ بولان

شیئرک پُرجوزہ غا مُریدی نا
اے بشیری آ نالہ ءِ بولان

دفترے جُھد ئنا سپاھی تا
سرمچار آتا جاگہ ءِ بولان

ندر مسور وطن کِہ زیباغا
اے شہیدآتا چہرہءِ بولان

اے کِہ ڈکّانو خنتے ٹاپانو
سخت اُموفتیان غصہ ءِ بولان

بُزدل آ دشمناتے در پا نی
سنگر ءِ ننکہ مورچہ ءِ بولان

گواڑخی آ ھتم نا پُھلاتا
زیبدارا اے غُنچہ ءِ بولان

نرمزارا ننا اے شیراتا
آھنی آ اے سینہ ءِ بولان

خُمبٹی لکھ توار تُورینے
مھر بشخوکا درگہ ءِ بولان

تُوسُونُن نیتو نن کچاری اُن
عمر ئنا نیتو رشتہ ءِ بولان

زندگی تے پناتے بشخانُن
تا قیامت دا زندہ ءِ بولان

روشنائی ءِ چہرہ نا مُچا
دا ننا خنتا دیدہ ءِ بولان

بھاز لکھان نن غزل اُوڑا
شاعری نا دا حصہ ءِ بولان

خل تیا تے تخان کاٹم نن
لُمی آ کِہ سرجہ ءِ بولان

خلکنے جام ءِ سیرٹی چاوہ
فُل خماری ءِ ٹنبہ ءِ بولان

ھمت ءِ او ننا سمیع شاکر
سوگو ئنگا اے جوزہ ءِ بولان

سمیع شاکر

رسینگوک حوال تا رد ئٹ پنی آ شئر پاروک داد دوئی کروک استاد محمد اختر چنال زہری نا اُرائی کذیت کرے، ہرا عبدالقیوم چنال، محمد عمران چنال، بینجو نواز خلیل چنال و پنی آ طبلہ نواز زاہد چنال، ظفر چنال نا لمہ ئس۔

اندن کذیت کروک نا دفن ہندی قبرستان بھینٹ ٹی کننگانے، خوشامدی زہری ہاوس کلی گوم قلات ٹی مننگ ءِ۔

پین حوال ئسے نا رد ئٹ میراحمد یار خان پریس کلب قلات نا صحافیک فیض نیچاری، میر غلام حسین شاہوانی، امجد سلامی، ضیا الرحمان مینگل، علی احمد بلوچ، میر مقبول شاہوانی، شعیب نیچاری و ایلوفک اُست ہسونی نا درشانی و دعا کریر کہ اللہ تعالی کذیت کروک ءِ جنت الفردوس ٹی جاگہ ایتے و خاہوت ءِ صبر ایتے۔

ایسٹرا زینیکا نا ویکسین ءِ خلنگ آن گڈ تدوکا توہ 24 مارچ اسکان رغ آتیٹی دتر تفنگ نا 22 پین پلیٹ لیٹس آتیٹی کمی ئٹ ہشت کیس مونا بسوسر۔

برطانیہ ئٹ دارو درمان و جانجوڑی نا ریگولیٹر ایجینسی ایم ایچ آر اے نا پاننگ ءِ کہ دا 30 بندغ آن ہفت کسکنو ہرافتیٹی برطانیہ نا کرونا ویکسین ‘ایسٹرا زینیکا’ خلنگ آن گڈ بلڈ کلوٹس ( دتر تفنگ نا نشان آک) جوڑ مننگ نا شکایست آک مونا بسوسر۔

ایجنسی نا جمعہ نا دے آ 30 بلڈ کلوٹس نا کیس آتا رپورٹ کریسہ پاننگ ئس کہ جہانی دین نا خلاف ویکسین کاریم ئٹ بریک و ایجنسی بندغ آتیان خواست کرے کہ اوفک ویکسین خلیسہ کیر۔

فرانسیسی حوال رسیوفوکا ادارہ ‘اے ایف پی’ نا رد ئٹ ایسٹرا زینیکا نا ویکسین ءِ خلنگ آن گڈ تدوکا توہ 24 مارچ اسکان رغ آتِٹی دتر تفنگ نا 22 پین پلیٹ لیٹس ئٹ کمی آن ہشت کیس مونا بسوسر۔

ایجنسی نا پین پاننگ ءِ کہ ویکسین کننگ آن گڈ بلڈ کلوٹس نا بیم بھاز کم ءِ۔

ایم ایچ آر اے نا برجاء آ توہ 2 اپریل آ شینگ کروکا بیان ئٹ پاننگ ئس کہ ویکسین نا نادرست رد عمل مونا بننگ نا کچ و حالیت، ہروخت نا ویکسین نا مقابلہ ٹی غیر معمولی اف۔

یاتی مرے کہ فائزر و موڈرنا نا جوڑ کروکا ویکسین آن دنو اسہ شکایست اس مونا بتنے۔

یورپ نا ملک ہالینڈ ئٹ ہم برجاء آ ہفتہ جمعہ آن 60 سال آن کم سن ئنا بندغ آتے ایسٹرا زینیکا ویکسین نا کننگ سلیفنگاے.
ہالینڈ نا دا گام 25 آن 65 سال نا زالبول آتا پنچ کیس مونا بننگ آن گڈ ہرفنگا ہرافتیٹی اسِٹ مرک ئنا گواچی مس.

داڑان مست برجاء آ ہفتہ ٹی جرمنی ئٹ ہم اندا گام ہرفنگاسس.
یوروپین میڈیسن ایجنسی (ای ایم اے) مالو اسیٹرا زینیکا ویکسین ء رکھوک پن کریس. ایجنسی بروکا ہفتہ ہفت اپریل آ دا رد ئٹ پین پنت برجاء کننگ کیک.
ای ایم اے نا چھارشنبہ آ پاننگ ئس کہ او سمجھک کہ ویکسین رکھوک ء و چاہندار آتا رد ئٹ داٹی ہچو رسک اف.

ایسٹرازینیکا برطانیہ ئٹ آکسفورڈ یونیورسٹی نا اوار مننگ تون تیار کروکو ویکسین اسے. برطانیہ ٹی کرونا جہانی دین آن بھاز زیمی مروکا ملک آتیٹی اوار ء و جہانی دین نا سوب آن اسہ لکھ و 72 ہزار بندغ مرک نا گواچی مسونو.

بلوچستان نا بھلا شار کوئٹہ ٹی بلوچستان ایمپلائز اینڈ ورکر گرینڈ الائنس نا برانزی مچی اینو ششمیکو دے ام برجاء ءِ۔ سرکاری نوکر آتا پارہ غان ہفتہ نا دے کوئٹہ شار ٹی اسے مچی گام اس ام کشنگا ہراٹی جتا جتا پارٹی تا راہشون آک اوار ئسر۔

ایلو پارہ غان بلوچستان نا وزیر اعلیٰ جام کمال خان سرکاری نوکر آتیان دا برانزی مچی ءِ ایسر کننگ نا خواست کریسہ گدرینگوک آ دے تینا اسے وڈیو کلہو اسیٹی نوکر آتیان برانزی مچی ءِ ایسر کننگ نا خواست کریسہ پارے کہ سرکاری نوکر آتے الس نا پامداری تخوئی ءِ انتیکہ روڈ آتے بند کننگ نا سوب آن الس فریشان ءِ، اندن کرونا وائرس ام بھاز ترندی ٹی تالان مننگے دا برانزی مچی ٹی کرونا وائرس نا ایس او پیز آتا پامداری ام تخننگ مننگ اف ہرانا سوب آن شار ٹی کرونا وائرس ترندی ٹی تالان مننگے۔

او مونی پارے کہ اندا سرکاری نوکر آک تینا جند ئنا پگار آتا ودکی کن برانزی مچی کننگو ولے اندن سرکاری نوکر آتیٹی اسکول خوانفوک آک مخلوق نا چناتے خوانفپسہ اندا استاد آک اسکول آتیٹی غیر حاضر ءُ۔

احوال آتا ردئٹ سرکاری نوکر آتا گرینڈ الائنس ہفتہ نا دے کوئٹہ شار ٹی مچی گام اس کریر۔ دا مچی گام عبدالستار ایدھی چوک آن ہلیس انسکمب روڈ، جناح روڈ، سرکلر روڈ آن مریسہ ولدا عبدالستار ایدھی چوک آ ایسر مس۔

دا مچی گام نا کماشی ءِ گرینڈ الائنس نا کنوینر عبدالمالک کاکڑ، حبیب الرحمان مردانزئی، داد محمد بلوچ و ایلوفک کریر۔

گرینڈ الائنس نا راہشون آک ہیت و گپ کریسہ پاریر کہ اگہ ننا خواست آک پورو کننگ متور نن دہ جماعت نا امتحان آتیان، بجٹ و پی ایس ڈی پی نا تیاری نا بائیکاٹ کینہ و دوشنبے نا دے غٹ روڈ آتے بند کننگ نا پڑو ءِ کینہ۔

تیوہ جہان ئٹ مسیحی برادری ایسٹر نا مجلس ہڈ تننگ ءِ، ویٹی کن ٹی مروکا  مجلس آتیٹ پوپ فرانسس خاص وڑ ئٹ ہیت کرے۔

اندن ویٹی کن ٹی مروکا مجلس ئٹ پوپ فرانسس موم بتی روشن کرے، مجلس آن ہیت کریسہ او پارے کہ بندغ آتے دَین ئنا دے تیٹ بے امیت مروئی اف۔

فرانس نا اسٹور آتیٹ چاکلیٹ آن جوڑ رواجی بیدہ تخنگانے، کرونا دَین ئنا ساڑی وخت آ ایسٹر آ چاکلیٹ و مٹھائی تا دکان تے ملینگ نا موکل تننگانے۔

گیشتر حوال تا رد ئٹ نکارا گووا ٹی ایسٹر نا وخت آ ریلی کننگانے، اندن بندغ آک بھلو کچ اسیٹ ماسک خلیسہ مجلس تیٹ اوار مسر، سری لنکا نا دارالحکومت کولمبو ٹی ایسٹر نا خاص ءُ مجلس ہڈ تننگا، مجلیس ٹی 2019 ٹی مروکا بمب تراک ٹی مرگ نا گواچی مروکا تے یات کریر و دعا خوانار۔

بلوچ اسٹوڈنٹس آرگنائزیشن نوشکی زون نا پارہ غان بوائز ڈگری کالج نوشکی ٹی سمیع اللہ مینگل نا پن آ کتاب بشخنگ مجلس ہڈ تننگا، ہراٹی کالج نا خوانندہ آتے کتاب تننگا، مجلس ٹی کالج نا خوانندہ آک بھلو کچ اسیٹ بشخ ہلکر۔

دا وختا آ پروگرام ٹی بی این پی نا ضلعی صدر میر عطاء اللہ مینگل، بی ایس او نا بنجائی کمیٹی نا باسک آک صمند بلوچ، ناصر زہری بلوچ، الیاس شاہ بلوچ، بی ایس او نوشکی زون نا صدر آغا عاطف شاہ بلوچ، سلیمان بلوچ تران کریر اندن پروگرام ٹی کالج نا استاد آک ہم اوار مسر۔

تران کروک آک پاریر کہ ساڑی صدی علم و زانت و پوسکن آ ٹیکنالوجی نا صدی ءِ، بی ایس او بلوچ راج ئنا وارث تنظیم نا رد ئٹ  بلوچستان ٹی پرامن علمی و شعوری جہد ءِ ودکی تننگ ءِ تاکن خوانندہ آتے ءِ منفی چاگڑد دژمن سرگرمی تیان مر کریسہ شعوری ہیت و شرہ و سیاسی تنظیمی پروگرام نا بشخ اس جوڑ کریسہ تعلیمی ادارہ آتے فعال و سوگوْ کننگر۔

اوفک پاریر بی ایس او نا ہر وخت ئٹی اندا کوشت مسونے کہ خوانندہ آک کالج آتیٹ ریگولر مریسہ تعلیمی عمل تون اوار شعوری عمل نا بشخ جوڑ مریر۔ بی ایس او  پرتشدد زہنیت ءِ چاگڑد دژمن منفی سرگرمی تیان نفی کریسہ کتاب و قلم نا جہد ءِ مُستی دیک و تعلیمی ادارہ ہی بی ایس او نا سیاسی و شعوری پروگرام نا میدان عمل ءِ۔

دا پوسکنا وخت ئٹی خونندہ آتا ذمہ واری مریک کہ تعلیمی ادارہ آتا فعالیت و استاد و شاگرد نا عزت و احترام نا سیالی ءِ تخیسہ شعوری جہد نا بشخ جوڑ مریر، بی ایس او ہر تلہ آ خوانندہ آتا سیاسی و شعوری راہشونی کرو۔

1 of 6

بلوچستان نا علاقہ بارکھان ئٹ ادبی و ربیدگی مُچی نا بناء اینو مس، ہرا پگہ اسکان برجاء مرو۔

کوہ سلیمان ادبی و ثقافتی میلہ نا پِن ئتون بارکھان ئٹ مُچی نا بناء مسونے، دا مُچی اِرا دے اسکان برجاء مرو ہراٹی کتاب اسٹال آک خلنگانو اندن ایلو مجلس آک مننگ ءُ۔

پروگرام نا کوالخوا تا ردئٹ اینو بیگہ تون اللہ بشک بزدار نا صدارت تون محفل مشاعرہ مرو، اندن پگہ 4 اپریل نا دے سیمینار ہڈ تننگو ہراٹی ڈاکٹر شاہ محمد مری، ڈاکٹر فاروق بلوچ، اللہ بشک بزدار، ڈاکٹر کہور خان، ڈاکٹر سلیم کرد، پناہ بلوچ، حمیدہ نور، زوراخ بزدار و ایلوفک گپ و تران کرور۔

اندن پگہ بیگہ نا ساز و زیمل پروگرام مرو ہراٹی علاقائی فنکار آک تینا فن ئنا درشانی کرور۔

اینو پروگرام نا بناء بک اسٹال آتیان کننگا، بلوچ اسٹوڈنٹس ایکشن کمیٹی تون اوار جتا ادارہ غاتا پارہ غان دا مُچی ئٹ اِرا دے اکن بک اسٹال خلنگانے ہراڑے ہڑزان نرخ آتیا کتاب آک دوئی مرور۔

دا مُچی ئٹ ڈاکٹر سلیم کرد نا مٹ کروک کتاب نا مون پاشی ہم کننگ مرو۔

بلوچستان نا جتا علاقہ آتیٹ دا سال دا وڑئنا مُچیک ہڈ تننگانو، داکان مالو حب، کیچ، کوئٹہ و پنجگور ئٹ اندنو مُچی ہڈ تننگا ہرافتے مخلوق بھاز دوست تخا۔ لسبیلہ لٹریری فورم نا مُچی ءِ نادرست سوب آتیان کوالخواک پد بٹیر۔

لسبیلہ لٹریری فورم نا کوالخوا تا پاننگ ءِ کہ جتا وڑ ئنا ہڑاند آتا سوب آن مُچی ءِ نادرست وخت اسکان پد بٹنگانے۔ دا مُچی نا پد بٹنگ آ بھازاک تینا بے جاراتی تا درشانی کرینو۔

دافتیان بیدس مصبا لٹریری فیسٹول نا بناء کوئٹہ مری آباد ٹی اینو آن مسونے اندن ڈگری کالج ہوشاپ نا پارہ غان ہتم فیسٹول نا پن ئٹ مسہ دے ئی پروگرام ہڈ تننگا ہرا اینو ایسر مس۔

1 of 4