بیست و ہفت مارچ، بلوچ راج کن سیاہ دے پاننگک
نوشت: وشین بلوچ
دی بلوچستان پوسٹ
بلوچستان ہراکہ قدرت نا خیسن و پیہن تا رد اٹ مُچا جہان نا بھلا طاغت آتیکن اسے بھلو اہمیت اس تخانے۔ ہر دور اٹ ایشیا نا کنڈا یورپ، امریکہ تون اوار اوار ایلو لٹ و پول کروکا طاغت آک نظر شاغانو تو اوفتا کوشست ہندا مسونے کہ بلوچستان ءِ تینا کوزہ ٹی ہتین۔
داڑے اسے سوج اس ننا ملی ٹی بریک کہ اگہ بلوچستان داخسو بھلو اہمیت اس تخک گڈا امر اینو دا دور اسکان بلوچ داخسو مرغن ءُ پند خلکونے داڑے سر مسونے؟
اگہ نن بلوچ راج نا مسکوئی زند آ نظر شاغن تو ننے معلوم مریک کہ بلوچ اسہ اِرا صد سال آن داڑے بتنو آباد متنو بلکن 10 ہزار سال مُست ہندا ڈغار آ آباد مسونو۔ مہر گڈھ ہراڑان دو بروکا گڑاک اینو دور ٹی بلوچ دود و ربیدگ ٹی ننے نظر بریرہ۔
پنجابی، انگریز آن بھاز مُست بلوچستان آ جہلو کروکا آریان، منگول و ایلو طاغت آتے بلوچ تینا ڈغار آ راج کننگ کن ہلتننے۔
بلوچ راج 1400ء آن مُست اسے جاگہ الو، 1410ء آن پد بلوچ راج ءِ اسے جاگہ مُچ کننگ کِن مرکزی دروشم اٹ اوار کننگا۔
1666ء آن گڈ قلات ٹی بلوچ باقاعدہ تینا ریاست ءِ جوڑ کرے۔ بلوچ راج ہراڑسکان کہ آباد اسک او علاقہ غاک بلوچستان ٹی اوار کننگار او بلوچ نا زمین پاننگاکہ۔ دریائے سندھ آن ہلیس کہ کرمان اسکان، بلوچ ساحل آن ہلیس کہ ہلمند اسکان بلوچ آک آباد ئسر۔
میر نصیر خان 1749-1817 دا وخت بلوچ راج نا تاریخ نا خیسن آ دور ئسک۔ ہنری پوٹنگر نوشت کرینے کہ دا وخت ریاست بلوچستان نا 250 ہزار نا اسے بھلو فوجی لشکر اس ئسک۔
دا ہمو وخت اس کہ روس و برطانیہ بلوچستان نا کنڈا بننگ نا کوشست کریرہ۔ 1793ء ٹی اولیکو وار برطانیہ تینا قاصد ءِ مون تسک کہ اود بلوچستان و افغانستان تون اوار دا خطہ نا رد اٹ ننے حوال سر کے۔ 1795 ٹی برطانیہ نا قاصد انگریز آ دا حوال آتے سر کیک۔ ارٹمیکو وار 1809 ٹی برطانیہ اسے وار واپس تینا اسے بندغ اس مون ایتک ہرانا پِن کیپٹن گرانٹ ئسک اود بریک بلوچستان نا ساحلی سیم و سند آتا جائزہ ءِ ہلیک بندر اباس آن ہلیس کہ کراچی اسکان۔ او وخت ٹی کراچی بلوچ ماہیگیر آتا اسے چنکو دیہات اس اسک۔
1810ء ٹی ہنری پوٹنگر و کیپٹن کرسٹی تینٹ بلوچستان نا کنڈا سرہلکُر۔ ہنری پوٹنگر ہرا کہ بھلا گوازی (great game) نا کھلاڑی اس ئسک لسبیلہ، خضدار آن سفر کریسہ قلات ٹی خان آف قلات میر نصیر خان تون بھلو وخت اس گپ و تران کرے ہموکان گڈ اود ایران نا کنڈا سر ہلک۔
1839ء نا سال ئسک کہ انگریز بلوچستان آ جہلو کرے تو میر محراب خان نا لشکر اونا مونا سلیس و ایسری دم اسکان جنگ تسر مگر دا جنگ انگریز نا حق ٹی مسک و خان میر محراب خان تینا لشکر تون اوار شہید مسک۔
خان میر محراب خان نا شہید مننگ آن پد بلوچ راج تینا نت تیا سلنگ کتو گڈا انگریز بلوچستان نا زی آ حکمرانی کرے۔ تینا منشا اٹ بھاز پالیسی تے مونا ایسک ہرا بلوچستان و بلوچ راج کن بھاز بھلو نسخان ئسر مگر او وخت اوڑتون طاغت اسک انتس کہ اُست تا خوائس اود کرے۔ او وخت بلوچ راج نا کھلان بھلا نسخان دا مس کہ انگریز تینا وڑٹ بلوچستان ءِ بشخا ہراڑان اسے بلوچ کچ اس ایران ءِ دو بس اوڑان بیدس ہندن بھلو کچ اس اوغانستان، سندھ (جیکب آباد ، شاہداد کوٹ) پنجاب (ڈی جی خان، مظفر گڑھ ) دا کھلے بشخیسہ بلوچ راج کہ اسے بھلو فریشانی اس ودی کرے۔
دافتیان بیدس کوئٹہ، چاغی نصیر آباد ءِ انگریز دوئی مسک۔ ہراکہ پشتون علاقہ غاک ئسرر اوفتے اسے ایگریمنٹ سے نا تحت اٹ دوئی کرسہ برٹش بلوچستان نا پن تسک۔
1920 نا سال ئسک ہرا وخت انگریز آن بلوچستان نا آجوئی کن سیاسی جہد نا بناء مسک، میر عبدالعزیز کرد و میر یوسف عزیز مگسی نا راہشونی ٹی بلوچ راج ءِ اسے جاگہ کننگ کِن مچی ہڈ تننگا، اخبار نا ذریعہ اٹ مخلوق ءِ سرپدی تسر۔ ہندا نا سوب میر یوسف عزیز مگسی ءِ قیدی کننگا تاکہ اود دا کسر ءِ یلہ کے۔
جنگ عظیم دوئم آن پد ہرا وخت کہ انگریز برصغیر ءِ یلہ کننگ نا فیصلہ کرے تو او وخت اسکان ریاست ءِ پاکستان نا جوڑ مننگ کن ہچو جاگہ سے آ ہیت و گپ متویسس۔ او وخت ریاست قلات نا بحالی کن محمد علی جناح خان آف قلات نا وکیل ئسک۔ محمد علی جناح 1946 ٹی ریاست قلات نا کیس ءِ انگریز نا مونا ایسک ہرانا سوب 4 اگست 1947 نا دے کن وائسرائے ہندا لارڈ ماؤنٹ بیٹن، پوسکن جوڑ مننگ والا ریاست نا کماش محمد علی جناح و خان احمد یار خان نا نیامٹ بلوچستان نا آجوئی اے منار۔
11 اگست 1947 جمہ نا دے ئسک خان میر احمد یار خان نا کماشی ٹی اسے بھلو مچی اس قلات ٹی ساڑی ئسک۔
خان میر احمد یار خان تران کرسہ پارے کہ اللّٰہ تعالیٰ نا لکھ تورو آکو ننا زی آ کہ اینو اسے وار ولدا ننا ملک ننا دو ٹی بسک۔ اینو ای نما مونان سلوکٹ بیدس خوف آن تینا ہیتاتے نما مونا تخنگوٹ۔
خان تران کرسہ پارے کہ کنا زند نا مُسہ بھلو خوائش ئسر۔
اولیکو ہنداد ئسک کہ ننا ملک آجو مسک۔
ارٹمیکو ای پاوہ کہ بلوچستان ٹی شرعی حکومت قائم مرے تا کہ نن اسلامی وڑٹ تینا راج نا خذمت ءِ کین۔
مُسٹمیکو کنا است پائک کہ بلوچستان ہرا کہ دریائے سندھ آن ہلیس کرمان اسکان و ساحل بلوچ آن ہلیس ہلمند اسکان اسے جاگاہ مرے۔ ریاست بلوچستان نا سلامتی کن دو بڑزا کننگ تون اوار ریاست بلوچستان نا بیرک ءِ ہم بڑزا کریر۔
اِرا اسمبلی نا وجود تخنگا دارالعلوم او دارالخاص۔ 1948 نا اولیکو تو اسک کہ ریاست بلوچستان ٹی آجوئ آن پد اولی وار گچین کاریک مسر ہراڑے قلات اسٹیٹ نیشنل پارٹی کھلان بھاز ووٹ دوئی کرے۔
داسکان ریاست بلوچستان نا آجوئی پوسکن ئسک کہ قلات آن خان وزیراعظم و وزیر خارجہ بلوچستان پاکستان نا گورنر جنرل محمد علی جناح تون کراچی ٹی حال احوالی مسور۔
اوڑے محمد علی جناح ہرا کہ خان آف قلات نا وکیل ئسک او خان آف قلات اودے پاکستان نا جوڑ کننگ کن مالی کُمک ہم کرے۔ مگر داسا محمد علی جناح نا گپ آتے آن معلوم مسک کہ اود زورٹ بلوچستان ءِ پاکستان تون اوار کننگ خوائک۔ دا ہیت ہرا وخت قلات آف بلوچستان ءِ سر مسک تو اود دا ہیت ءِ تومکا اسمبلی تے ٹی ایسک ہراڑے تومکا اسمبلی تا گچین مروک بندغاک ہرافتے ٹی میر غوث بخش بزنجو تون اوار نواب اسد اللہ خان رئسانی و نواب نوروز زہری تینا ہیتاتے مونا ایسر پاریر کہ پاکستان تون اوار مننگ نا ہچو سوج اس ودی مفک۔ پاکستان اسے مسلمان ریاست اس جوڑ مسونے نن کہ خوشی نا گپ ئسے نن اودے کُمک کرینن دانا سوب آن پاکستان اینو بسونے ننے مجبور کننگے کہ نن تینا ملک تینا تاریخ تینا دود و ربیدگ کل ءِ گیرام کین پاکستان تون اوار مرین دا گپ ئسے بے معنی ءُ۔
ہرا وخت کہ دا ہیتاک پاکستان نا گورنر جنرل ءِ سر مسر کہ بلوچستان ہچو وڑ اسیٹ پاکستان تون اوار مننگ خوائپک گڑا اود زوراکی اٹ بلوچستان نا زی آ کوزہ کننگ کن مونا بسک۔
پاکستان او وخت تینٹ ہم داخس طاغتور الو کہ اسے آجو ریاست سے آ کوزہ کے مگر وختی ہندا ہیت ءِ نما مونان تخاٹ کہ برطانیہ پاکستان ءِ تینا مفادات اکن جوڑ کرے گڑا جنوبی ایشیا غان پیشتما۔
انگریز ہمو وخت پاکستان اے ہر وڑٹ کُمک کننگ ئسک کہ بلوچستان اے زوت آن زوت پاکستان تون اوار کے تا کہ پیشن دنیا بلوچستان ءِ اسے آجو ریاست اس منیپس۔
خاران، لسبیلہ ہرافتے کہ انگریز ریاست قلات آن ہلک او تینا کوزہ ٹی کرے بلوچستان آن پیشتمنگ نا وخت دا تومکا ریاست آتے اسے وار ولدا خان نا حوالہ کرے۔ ولے ہرا وخت کہ پاکستان بلوچستان ءِ اوار کننگ نا ہیتے کرے تو ہمو وخت بلوچ راہشون آک امنا کریر گڈا پاکستان زوراکی اٹ مونا بننگ کن لسبیلہ، خاران او مکران ءِ پاکستان تون اوار کرے۔ بلوچ راج کِن دا وخت بھاز سخت او وخت اس اسک ہندا وڑ 27 مارچ نا نن خان آف قلات میر احمد یار خان ءِ بیوس کرسہ بلوچستان ءِ پاکستان تون اوار کننگا۔
ہرا وخت دا حوال بلوچستان ٹی لس مخلوق ءِ سر مسک تو کس دا ہیتے مننگ کن تیار الو بلوچ راج نا است ٹی اسے بھلو غم و غصّہ اس ئسک۔
دا ہیت گورنر مکران آغا عبدالکریم ءِ سر مس تو اود پاکستان نا کوزہ گری آن امنا کرے او ہمو وخت باغی مرسہ سرلٹ افغانستان آ ہنا سنگر کرے۔ اونا ہننگ نا مسخت پیشن دنیا ءِ پاکستان نا زوراکی تا بابت خبر تننگ او قلات ریاست نا بحالی کِن کوشست اسک۔ پاکستان دروغ نا سہارا ءِ ہلک آغا عبدالکریم ءِ ہیت او گپ کِن خوائفے مگر ہرا وخت اوفک قلات آن خڑک ہربوئ نا مشتے سر مسور تو پاکستانی فوج اوفتے آ جہلو کرے ہراڑے گڈاس سنگت شہید مسور آغا عبدالکریم گرفتار کننگا۔
بلوچ راج 73 سال ءِ تینا وطن نا آجوئ کِن کوزہ گیر پاکستان تون جنگ کننگے۔اینو نن خننگون کہ 20 سال آن دا جنگ اسے پوسکنو درشم سے آٹ مونا بننگے ءِ دژمن اینو تینا شکست ءِ خننگے اگر بروکا منہ سال دا جنگ ہندا وڑٹ مستی ہنا تو زوت بلوچ راج اسے وار ولدا تیوئ جہان اٹ اسے راجی و پہچان اسے نا خواجہ مرو۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
