اوغانستان نا شار اسپین بولدک ئٹ اسیکہ وا چار بگٹی بلوچ باہوٹی تے ٹِک کننگانے، ہرانا سوب آن ہر چار آ بلوچ باہوٹیک بیران مسر۔ دا حوال ءِ پک کریسہ بلوچ ریپبلکن پارٹی نا صدر و بگٹی قبیلہ نا سرکماش براہمداغ بگٹی راجی حوالکاری میڈیا نا سائٹ ٹوئٹر آ دوبہ خلیسہ پارے کہ “پاکستانی ڈھکوک ادارہ غاتا دُو ءِ دا جلہو ئٹ۔”

یک شمبے نا دے بیران مروک بلوچ باہوٹی تا چاہنداری غلام نبی بگٹی، جنگی بگٹی، ساکا بگٹی و امیر جان بگٹی نا پن تیان مسر۔ حوال آتا ردئٹ دا ہمو بگٹی باہوٹیک ئسر ہرا 2006 نا سن ئٹ نواب اکبر خان بگٹی نا اسہ فوجی آپریشن اسیٹی شہادت آن گڈ لڈیسہ افغانستان آ ہناسر۔

بلوچستان ئٹ برجاء فوجی لشکر کشی تیان رکھنگ کن ہراڑے ہزار آتا کچ ئٹ بلوچ سندھ و پنجاب آ لڈنگ آ بیوس مسونو ہموڑے جنگ نا بُھس کاری تیان رکھنگ کن بھلو کچ اسیٹی بلوچ اوغانستان آ ہم ہنپسہ باہوٹی نا زند گدریفنگ آ بیوس ءُ۔ دا وخت اوغانستان جہان ئٹ تیوہ آتیان زیات بلوچ آتے باہوٹ تروک آ ملک ءِ۔ اندن بلوچستان نا مکران پارہ نا بلوچ بھلو کچ اسیٹی ہمپسہ گولڈ سمڈ لائن نا ایلو پارہ غا دے کہی بلوچستان ئٹ زند گدریفنگ ءُ۔

ہمپنگ آن گڈ ہم بے بختی و جنگ نا زیم آک بلوچ آتا رند ئٹ دا ایلو ملک آتیٹ ہم سر مسونو۔ بلوچ باہوٹیک، دا ملک آتیٹ بیدس جہانی کمک آ بھاز بدحالی سیتون بیدس رکھوک زند اس گدریفنگ آ بیوس ءُ۔

تدوکا منہ سال نا نیامٹ سد آتا کچ ئٹ بلوچ اوغانستان و دے کہی بلوچستان (ایران) ئٹ ٹِک مننگ نا گواچی مریسہ ءُ۔ بلوچ راہشون و مہماندار ملک آتا کوالخواک، دا جلہو تا دوبہ ءِ پاکستان نا ڈھکوک ادارہ غاتیا خلیسہ بسونو۔ راجی حوالکاری میڈیا آ بلوچ باہوٹی تیا مروک دا جلہو تا پچار ہمو اکاونٹ آتیان مننگ ءِ ہرافتے پاکستانی فوج تون تفوک سرپد مننگک، دا دوبہ غاتے پین سوْگوی بشخک۔

دی بلوچستان پوسٹ تدوک منہ سال آن مروک دا جلہو تا اسہ کچ اس مُچ کرینے، ہرافتے خنیسہ گمان مریک کہ بلوچ مہاجرین ہرا بدحالیت تون زند گدریفنگ ءُ۔ شیفکو نوشتہ لڑ اندافتا اسہ چُنکو بشخ ئسے:

۔ 3 مئی 2018 ئٹ دے کہی بلوچستان ئٹ اسہ بلوچ باہوٹی عیسیٰ ولد محراب ءِ گرگی نا علاقہ ئٹ سم کاری کریسہ کسفنگا۔
۔ 22 جون 2018 ئٹ نادرست سلاء بند بندغاک پین اِرا بلوچ باہوٹی پرزاد و نورجان ءِ دشتیار نا علاقہ ئٹ ٹِک کریر ہرانا سوب اوفک بیران مسر۔
۔ 22 جون 2018 ئٹ اوغانستان نا علاقہ اسپن بولدک ئٹ بلوچ باہوٹی تا اسہ گاڑی ءِ آئی ڈی جلہو ئٹ ٹِک کننگا۔
۔ 9 ستمبر 2018 ئٹ بلوچ ورنا سورج ولد اقبال ءِ سراوان ایران ئٹ سم کاری کریسہ کسفنگا۔
۔ 8 اکتوبر 2018 ئٹ چابہار ئٹ نثار زامرانی پنی بلوچ باہوٹی ءِ ٹِک کننگا۔
۔ 10 مئی 2019 آ اوغانستان نا شار کندھار ئٹ اسہ بلوچ باہوٹی ئسے نا اُرا وی بی آئی ڈی جلہو اس کننگا۔ دا بلوچ باہوٹی ءِ دا جلہو آن منہ دے مالو بنجائی بازار ئٹ ہم ٹِک کننگا ولے وہ جلہو کروک آتے بے سلاء کریسہ بچنگ ئٹ سرسہب مسوسس۔
۔24 مئی 2019 آ کندھار نا علاقہ عینو مینہ ئٹ بگٹی بلوچ باہوٹی تا اسہ گاڑی ئسے آئی ای ڈی جلہو ئٹ ٹِک کننگاسس ہرانا سوب چُنا زالبولک ٹپی مسر۔
۔28 مئی 2019 آ اسیکہ وا نا درست بندغ آک کندھار ئٹ اسہ بلوچ باہوٹی ئسے نا اُرا آ چغلی بمب جلہو اس کریر۔
۔ 2 جولائی 2019 آ کندھار شار ئٹ نادرست بندغ آک بلوچ باہوٹی عرض محمد مری ءِ سم کاری کریسہ کسفیر۔
۔25 جولائی 2019 آ اسیکہ وا بلوچ باہوٹی تا اُراتیا کندھار ئٹ چغلی بمب جلہو کننگا۔
۔22 اگست 2019 آ مسہ بلوچ باہوٹی ءِ ایران نا علاقہ کرگس ئٹ سم کاری کریسہ کسفنگا۔ کہوک آتا چاہنداری اسحاق و وحید نا پن تیٹ مسر۔
۔24 دسمبر 2019 آ اسی بلوچ باہوٹی نا اُرا ءِ آئی ای ڈی جلہو ئٹ ٹِک کننگا ہرانا سوب آن چُنا و زالبولک ٹپی مسر۔
۔ 3 فروری 2020 آ ایران نا علاقہ کرگس ئٹ اسہ بلوچ باہوٹی حمل نا مار تود ءِ سم کاری کریسہ کسفنگا۔
۔ 5 مارچ 2020 آ ایران ئٹ اِرا جتا جلہو تیٹ بلوچ باہوٹیک بیران مسر۔ اولیکو جلہو چابہار ئٹ مس ہراڑے عبداللہ نا مار رحمدل ءِ ٹِک کنگا، اندن ماسٹر علی ءِ سراوان ئٹ ٹِک کننگا۔
۔ 25 اپریل 2020 آ ایران ئٹ اسہ بلوچ باہوٹی زاھد بلوچ ءِ اونا اسہ سنگت تون اوار سم کاری کریسہ کسفنگا۔
۔ 30 اپریل 2020 آ شفی محمد نا مار عبدالوحید ءِ ایران نا علاقہ احمد آباد ئٹ سم کاری کریسہ کسفنگا۔
۔12 اگست 2020 آ اسہ بلوچ ورنا فارس بلوچ ءِ برمتہ کریسہ، اونا سُم تیٹ بروے آ جوْن ایران نا علاقہ درگس ڈیم نا رہی آ خسنگا۔
۔20 دسمبر 2020 آ نادرست سلاء بند بندغ آک اوغانستان نا علاقہ کندھار ئٹ بلوچ باہوٹی تا اسہ گاڑی آ سم کاری کریسہ ٹِک کریر ہراڑان گلبہار بگٹی و اونا مار مراد علی بگٹی بیران مسر۔ 2011 نا سن ئٹ ہم گلبہار بگٹی نا اُرا غا اسہ وت کش جلہو اس کننگاسس ہرانا سوب اونا اسہ مار درخان بگٹی تینا اسہ سنگت اسیتون بیران مسوسس۔
۔9 جنوری 2021 کندھار ئٹ بلوچ باہوٹی تا اسہ اُرا ئسے بمب جلہو اٹ ٹِک کننگا، ہرانا سوب اُرا دڑا ولے اوڑے ساڑی بلوچ باہوٹی قسمتی رکھوک مسر۔
۔12 مارچ 2021 آ سلاء بند بندغ آک بلوچ باہوٹی عبدالرحمان ءِ اونا اُراٹی پیہسہ سم کاری کریر کسفیر۔

بلوچ باہوٹی تیا جلہو و تڑی تا لڑ بیرہ اوغانستان و ایران اسکان سلوک اف۔ دائسکان سندھ و پنجاب نا جتا علاقہ تیان بھازا بلوچ باہوٹی تے دزگیر کریسہ بیگواہ کننگانے۔ اندن دے کہی ملک آتیٹ ہندی بھاز بلوچ بوہوٹی تے گمان وڑئٹ پاکستانی ڈھکوک ادارہ غاتا پارہ غا تڑیک رسینگانو۔ بلوچ آتا حق آتیکن کاریم کروک جتا تنظیم آک بلوچ صحافی ساجد حسین و بلوچ راہشون کریمہ بلوچ نا خون نا دوبہ ءِ ہم پاکستانی ڈھکوک اداریہ تیا خلیرہ۔

بلوچ سیاسی جماعت آتا جہانی ادارہ تیان دا ہم گلہ ءِ کہ نہ بیرہ بلوچ باہوٹی تے رکھنگ افس بلکن اوفتے یو این ایچ سی آر ئٹ ہم رجسٹر کننگسہ اف۔

وخت بسونے کہ بندغی حق آتا جہانی ادارہ غاک، گچین وڑئٹ یو این ایچ سی آر بلوچ باہوٹی تا رکھ ءِ یخینی کے۔ دا مہماندار ملک آتا ہم ذمہ واری ءِ کہ جہانی اصول آتا ردئٹ دا باہوٹی تے رکھ ءِ تینا ملک آتیٹ یخینی کیر۔

رسینگوک حوال تا رد ئٹ بلوچستان نا ضلع کیچ  و منگچر ٹی سم کاری نا جتا ویل آتیٹ اسہ بندغ اس مرگ نا گواچی، و اسٹ ٹپی مسونے۔

رسینگوک حوال تا رد ئٹ بلوچستان نا ضلع کیچ ئٹی سلاء بند بندغ آتا سم کاری آن اسہ بندغ اس مرگ نا گواچی مسونے۔ سم کاری نا ویل ضلع کیچ نا بنجائی شار تربت نا علاقہ میری نا ہند آ مسونے، سم کاری نا سوب آن مرگ نا گواچی مروکا بندغ نا چائنداری میری آن تعلقدار ملا واحد نا پن ئٹ مس۔

اندن پین حوال ئسے نا رد ئٹ منگچر ٹی سم کاری نا سوب آن اسہ بندغ اس ٹپی مسونے۔

منگچر ٹی چھاپہ نا وختا ڈودار نا سم کاری آن تحصیلدار مسعود بگٹی بھاز ٹپی مسونے۔ لیویز آن رسینگوک حوال تا رد ئٹ اینو منگچر نا علاقہ چھوٹانگ ٹی اسہ چھاپہ ئسے نا وخت آ ڈودار نا سم کاری نا سوب آن تحصیلدار مسعود بگٹی بھاز ٹپی مسونے ہرا مستونگ آ راداہ کننگانے۔

بلوچستان نا ٹرانسپورٹ آک مسلم باغ ٹی بس ہشنگ نا برخلاف اینو پگہ تیوہ آ ملک ئٹ ٹرانسپورٹ بند کننگ نا پڑو کریسہ پاریر کہ صوبائی حکومت حکومتی رٹ ہڈ تننگ ٹی بے سہب مسونے، بلوچستان ئت موٹر ویز و ہائی وی مفرنگ نا سوب آن ہردے ویل آک مریرہ، حکمران چپ  سلوک اروک جوڑ مسونے، صوبہ ٹی جنگل نا قانود ء۔

دا ہیت آتا درشانی ء آل بلوچستان ٹرانسپورٹ ایکشن کمیٹی نا چیئرمین حاجی عبدالقادر رئیسانی ، وائس چیئرمین حاجی میر دولت خان لہڑی ، صدر حبیب اللہ بادیزئی، جنرل سیکرٹری محمد اکبر لہڑی، آل کوئٹہ کراچی نا کوچیز یونین نا  چیئرمین عبداللہ کرد، صدر میر حکمت لہڑی، آل کوئٹہ تفتان کوچیز یونین نا صدر حاجی جمعہ خان بادینی و ایلوفک کوئٹہ ٹی پریس کانفرنس کریسہ پاریر۔

اوفک پاریر تدوکا دے مسلم باغ ٹی است پروغوکو ویل اس مس، ہراڑان گڈ کوچ آ پیٹرول چٹ تریسہ خاخر تننگا ہرانا  مذمت کینا۔

بلوچستان بلوچ و پشتون راج آتا ء، ٹرانسپورٹرز ٹیکس تروک آ بندغ آکو، تیوہ آ ملک ئٹ  موٹر ویز ارے ولے بلوچستان ٹی سنگل روڈ اف، حکومت بلوچستان نا نالائخی نا سوب آن بلوچستان ٹی جنگل نا قانود جوڑ مسونے، چپ سلوک اروک جوڑ مسونے، اینو آن کوئٹہ کراچی روڈ آ پہیہ جام ہڑتال کرون، نن ٹرانسپورٹرز  ٹی شہید مریکا تیوہ آ بندغ آتا خاہوت والا تون است ہسونی نا درشانی کینا، اللہ شہید آتے جنت الفردوس ٹی جاگہ تے و ارا والا تے صبر ایتے۔

کرونا کیس آتیٹ ترندی ئٹ ودکی مننگ نا سوب آن بھارت برازیل آن گدریفیسہ جہانی تلہ آ کرونا آن زیمی مروکا ارٹمیکو بد آ ملک جوڑ مس۔

بھارت ٹی کرونا وائرس نا ارٹمیکو لڑ ئٹ حالیت بد آن بد مننگ ءِ، ملک ئٹی تدوکا 24 سائت ئنا نیام ئٹی  اسہ لکھ 68 ہزار 912 بندغ ٹی وائرس پک مسونے، اندن ملک ئٹی جہانی دین آن پین  904 ناجوڑ مرگ نا گواچی مسونو۔

بھارت ٹی کرونا کیس آتا جمعی کچ اسہ کروڑ 35 لکھ آن گدرینگانے، اندن ملک ئٹی کرونا آن کہوک آتا جمعی کچ اسہ لکھ 70 ہزار 179 اسکان سرمسونے۔

جان ہاپکنز یونیورسٹی نا حساب نا رد ئٹ جہانی تلہ آ کرونا وائرس آن تیوہ آتیان زیات زیمی آ ملک آتیٹ فہرست ٹی امریکہ مسہ کروڑ 11 لکھ آن زیات کیس آتون اوار اولیکو و داسا بھارت ارٹمیکو نمبر آ بس۔ برازیل اسہ کروڑ 34 لکھ آن زیات کیس آتون اوار مسٹمیکو نمبر آ ہنا۔

آل انڈیا انسٹی ٹیوٹ آف میڈیکل سائنسز (ایمس) نئی دہلی نا ڈائریکٹر ڈاکٹر رندیپ گلیریا بنجائی اخبار ‘ٹائمز آف انڈیا’ تون ہیت کریسہ پارے کہ وائرس آن ساڑی حالیت مست آن بھاز خطرناک و مرگی کروک ءِ۔

اونا بقول کرونا نا اولیکو لڑ نا وخت آ اسہ زیمی ناجوڑ نا زیمی حوال ٹی بروکا 30 آن 40 بندغ نا زیمی مننگ نا  خلیس ئس ولے داسا دا کچ 70 آن 80 بندغ اسکان سر مسونے۔

بھارت ٹی کرونا وائرس نا سوب آن تیوہ آتیان زیات زیمی مروکا ریاست مہاراشٹرا ءِ ہراڑے تدوکا 24 سائت ئنا نیام 63 ہزار 294 بندغ ٹی وائرس پک مسونے، اندن دین آن زیمی 349 بندغ مرگ نا گواچی مسونو۔ ریاست مہاراشٹرا آن گڈ کیرالہ، کرناٹک، تمل ناڈو، آندھرا پردیش و دہلی تیوہ آتیان زیات زیمی ءُ۔

دہلی ٹی ہم کرونا کیس آتیٹ ترندی ئٹ ودکی مننگ ءِ ہراڑے  اسہ دے ئٹی 10 ہزار 774 پوسکنو کیس رپورٹ مسونو۔

میڈیا رپورٹس نا رد ئٹ سپریم کورٹ آف انڈیا نا نیما کارندہ کرونا آن زیمی مسونو، داسا مقدمہ آتا کیس آک اسہ وار واپس آن لائن مرور۔

کرونا کیس آتیٹ ودکی نا سوب آن بھارت ایلو ملک آتے ویکسین تننگ ءِ مالوی آن بند کرینے، اندن نئی دہلی کوالخوا تا پاننگ ءِ کہ سوداگری معاہدہ آتا ہم پابندی لگو۔

اوغانستان نا سیم سری علاقہ اسپین بولدک ئٹ سلاء بند بندغ آک سم کاری کریسہ چار بگٹی باہوٹی ءِ کسفیر۔

تدینی ءِ پک کریسہ بلوچ ریپبلکن پارٹی نا ترجمان شیر محمد بگٹی راجی حوالکاری ویب سائیٹ ٹوئٹر آ تینا اسہ ٹوئیٹ اسیٹی پارے کہ اوغانستان ئٹ پاکستانی ڈھکوک آ ایجنسی نا خونیک پین چار بلوچ باہوٹی ءِ کسفیر۔

او پین پارے کہ پاکستانی ظلم و زوراکی و ٹارگٹ کلنگ نا سوب آن بھلو کچ  اسیٹی بگٹی قبیلہ آن تعلقداری تخوکا بندغ آک ایلو ملک آتیٹی باہوٹی ءُ ولے واہم باہوٹیک پاکستان نا ظلم آتیان رکھوک افس.

کہوکا بندغ تا چاہنداری غلام نبی، ترونگ علی بگٹی نا مار، جنگی، درمان بگٹی نا مار، سکا، دین محمد بگٹی نا مار، امیر جان، روستم بگٹی نا مار نا پن آتیان مسونے.

یاتی مرے کہ دا اولیکو تدینی اف کہ اوغانستان ئٹ بلوچ باہوٹیک ٹک کننگانو داڑان مست ہم اوغانستان ئٹ بلوچ باہوٹی تیا دا وڑ نا جہلو مسونے۔

بلوچ ریپبلکن پارٹی نا سرکماش براہمداغ بگٹی ہم دا ردئٹ ٹوئیٹ کریسہ پارے کہ اوغانستان ئٹ بلوچ باہوٹی تا بیدادی آ خون نا لڑ برجاء ءِ، اسہ پین بیدادی ءُ جہلو اسیٹی پاکستان نا ڈھکوک آ ایجنسی آک پین چار بگٹی نا خون ءِ کریر۔ براہمداغ بگٹی باہوٹی تا تنظیم و بندغی حق آتا گروپ آتا چپ مننگ ءِ لجی پاریسہ اقوام متحدہ و جہانی مخلوق ءِ پارے کہ بلوچ باہوٹی تا رکھنگ الّمی ءِ.

یاتی مرے تدوکا سال 20 دسمبر آ کندھار نا شار ئٹ سلاء بند بندغ آتا سم کاری آن اِرا بگٹی باہوٹی خلنگاسر ہرافتا چاہنداری گل بہار بگٹی و اونا مار مراد علی بگٹی نا پن آن مسوسس۔

اوغانستان نا جتا علاقہ تیٹی دا وخت بلوچستان آن لڈ و ہنپ کریسہ ہزار آتا باہوٹیک جاغئی ءُ۔

اندا دے تیٹی اسہ نیمہ ہراڑے بلوچستان ئٹ پاکستان نا آرمی تالان ءُ پِڑ ئسے آ آپریشن نا بناء ء کرینے ایلو پارہ غا بلوچستان آن پیشن بلوچ سیاسی باسک و بلوچ تحریک نا ہمدڑد آتے ٹک کننگ ءُ.

تدوکا سال دسمبر نا توہ ئٹ اوغانستان نا صوبہ نیمروز نا اسہ بھلو بلوچ شخصیت اس حضرت گل بلوچ نا مار نجیب بلوچ ہم بیگواہ کننگ آن گڈ خلنگا۔

یاتی مرے کہ حضرت گل بلوچ اوغانستان ئٹ بلوچستان نا تحریک آزادی نا ہمدڑد آتیٹی اوار ءِ۔ ہفتاد نا دہائی ٹی ہراتم بلوچستان آن نواب خیر بخش مری نا راہشونی ٹی ہزار آتا کچ ئٹ بلوچ آک باہوٹی مسر گڑا حضرت نواب مری نا خڑک آ بندغ تون حساب مسوکا۔

تعلیم نا فائدہ و اہمیت یوتھ لیڈر شپ نا پارہ غان گرلز ڈگری کالج حب ٹی سیمینار ہڈ تننگا ہراٹی مسڑ تا تعلیم، اوفتا کیریئر کاؤنسلگ کیپیسٹی بلڈنگ و تعلیم نا نیام ئٹی بروکا ہڑاند آتا رد ئٹ کالج نا خونندا آتے جتا وڑ ئٹ ٹرینگ نا دروشم ئٹ چاہنداری تننگکا۔

وائے ایل ایف نا کنڈان ہڈ تروک پروگرام ٹی خونندا آتے پین تعلیم اسکالرشپس و ایلو تعلیمی پروگرام آتا گیشتر حوال تننگا۔

یوتھ لیڈرشپ نا کنڈان حب ئنا جتا تعلیمی اداروہ آتیٹ ہیل تس و  پروگرام ہڈ تننگانے، وائے ایل ایف کوالخوا تا رد ئٹ اوفتا مسخت خونندا آتے تعلیم و اوفتا بروکا وخت اکن چاہنداری تننگ ءِ۔

یوتھ لیڈرشپ فورم ہڈ تروکا سیمینار ٹی ‏راجی بلوچ وومن فارم آن ناز بارکزئی اوار مریسہ خونندا آتے اوفتا مون ٹی بروک معاشی و چاگڑدی تعلیم ٹی بروک آ ہڑاند آتے ایسر کننگ و دو ہلیسہ ہیڑکوئی نا اہمیت آن چاہنداری تس۔

راجی بلوچ وومن فارم ئنا راہشون نا پننگ ئس کہ تعلیمی میدان تون اوار ہر جاگہ زالبول تے تینا ویل آتیتون مون تننگ کن و اوفتا مقابلہ کننگ کن اسٹ ایلو نا ہم کوپئی و سیوت الّمی ءِ۔

یوتھ لیڈر شپ نا کنڈان ماریہ بلوچ و ایلو کوالخواک دا سمینار ٹی اوار مسوسر ہرافک اوکان گڈ خونندا آتے پین تعلیمی پروگرامز آتیا انفرادی حوال تسر۔

بلوچستان نا مسہ ضلع ٹی سم کاری نا مسہ جتا ویل آتیٹ ارا بندغ مرگ نا گواچی مسونو، 2 ٹپی مسر، سم کاری نا ویل آک بلوچستان نا ضلع قلات، نوشکی و لورالائی ٹی مسونو۔

قلات ٹی سم کاری نا ویل  اسکلکو نا ہند آ مس ہراڑے سم کاری نا سوب آن نور بخش نا مار نصراللہ پنی ءُ بندغ اس مرگ نا گواچی مس۔

ویل ئنا حوال رسینگتون پولیس کارندہ آک ویل ئنا ہند آ سر مسر جوْن ءِ اسپتال آ سر کریر ہراڑے المی آ کاروائی آن گڈ جوْن خاہوت نا دو ٹی تننگا، ویل مست ئنا دژمنی نا سوب پاننگک۔

اندن ‏نوشکی ٹی گزنلی کراس آ نادرست  موٹرسائیکل سوار آتا گاڑی آ سم کاری آن پیر جان نا مار جعفر خان ٹپی مسونے ،ٹپی آ بندغ اسپتال سر کننگانے ہراڑے اونا دوا درمان کننگا۔ داسکان  ویل ئنا سوب آک سما تمتنو۔

پین حوال ئسے نا رد ئٹ  لورالائی ٹی نادرست بندغ آتا سم کاری آن اسہ بندغ اس مرگ نا گواچی و اسٹ ٹپی مسونے، ٹپی آ بندغ ٹیچنگ ہسپتال آ سر کننگانے۔ پولیس نا رد ئٹ  ویل مست ئنا دژمنی نا سوب مسونے۔

بلوچستان نیشنل پارٹی ڈسٹرکٹ مستونگ نا پارہ غان بنجائی کال آ ساروان پریس کلب نا مونا بلوچستان ءِ بشخ کننگ نا چم بازی نا برخلاف برانز و مچی کننگا۔

برانز کروک آتیٹ بی این پی نا ضلعی صدر حاجی نزر محمد ابابکی، سینٹرل کمیٹی نا باسک ملک عبدالرحمٰن خواجہ خیل، بی ایس او نا سینٹرل کمیٹی نا باسک آغاعدنان شاہ بلوچ، جنرل سیکرٹری جمیل بلوچ، ڈپٹی جنرل سیکرٹری چیئرمین قدیر بلوچ، فناس سیکرٹری میر عبدالغفار مینگل، ہیومن رائٹس سیکرٹری منیر آغا بلوچ، ٹکری نوراحمد قمبرانی، ثناء نور بلوچ، ٹکری عبدالخالق بلوچ پاریر کہ بلوچستان ءِ بشخ کننگ نا چم بازی ہچبر سرسہب مننگ کہ ہلوفن۔

اوفتا پین پاننگ ئس کہ چمن آن ہلیس گوادر اسکان بلوچستان اسٹ ءِ، ساڑی حکومت بلوچستان ءِ بشخ کننگ نا چم بازی ءِ کننگ ءِ ہرادے بی این پی ہر وڑ ئٹ ہم سرسہب مننگ کہ ہلوف و اونا برخلاف ہر فورم آ توار ارفیسہ کرو۔

برانز کروک آک پریر کہ گوادر ءِ جتا صوبہ اس جوڑ کننگ نا تغ خنوکا تا  بیرہ تغ اس سلو۔

افک پاریر کہ بی این پی تینا راہشون سردار اختر مینگل نا راہشونی ٹی بلوچستان نا لس مخلوق نا حق حاکمیت، مڈی و ساحل کن جنگ کریسہ کرو و بلوچستان ءِ بشخ کننگ نا ہر چم بازی ءِ پاش کریسہ اوفتا چم بازی تا مونا آہن نا دیوال نا وڑ سلو و اوفتے بے سہب کرون۔

اوفک مُستی پاریر کہ بلوچستان نا مڈی و ساحل نا رھکنگ کن  ہر وڑ ئنا قربانی آن پد سلپرون۔ بلوچستان ءِ بشخ کروک آک اول بلوچ اکابرین تا تاریخ ءِ اریر، سی پیک نا پن آ بلوچستان نا مخلوق ءِ ریفیر گوادر نا مخلوق اینو ہم دیر، بجلی گیس و زند ئنا ایلو بنماسی خواست و آسراتی تے دوئی مننگ کن عزاب ءِ۔

اوفتا پین پاننگ ئس کہ داسا سلیکٹڈ حکمران بلوچستان ءِ قطبی و جہندمی نا پن آ بشخ کننگ نا بے سہب چم بازی کریسہ بندغ آتیا بنجائی کوزہ کننگ نا کوشت کریسہ ءِ ہرادے بی این پی و بلوچ راج ہچ وڑ ئٹ منیپک، بلوچ راج ہمو تیوہ آ  چم بازی تے سیوت و اواری ئٹ بے سہب کرو اندا وڑ ایلو سیاسی جماعت آک ہم بلوچستان نا بر خلاف مروکا چم بازی تا بر خلاف پبی وڑ ئٹ توار ارفیسہ تینا حق ادا کیر ادا۔