بانک کریمہ جہان اٹ ایمنی نا چیدہ
نوشت: وشین بلوچ
دی بلوچستان پوسٹ
تیوی جہان اٹ ہراتم کہ اسہ کوزہ گیر و زوراک ءُ طاغت اس تینا زوراکی ءِ برجا تخنگ کن بزگ آ راج آتا دود و اوفتا راجی ربیدگ آتے لتاڑنگ نا بنا ءِ کیک تو تیوہ غاتیان مست او بے وس آ راج آتا تہٹی اسہ چِک و تاڑ اس ودی کیک تاکہ او راج تین پہ تین چک و تاڑ آتیٹی اختہ مرے و ننا کوزہ گیری نا چمبازی سوگوْ مرے۔ کوزہ گیر طاغت آک بے وس آ راج ءِ نفسیاتی مرض اٹی اختہ کرسہ دا ہم پاہک نم اسہ جاہل ءُ راج ئسے آ تعلقدار اُرے، نما تعلیم و ایلو آسراتی تیکن نن ہر وڑ نا بندوبست ءِ کننگ اُن۔ نما اندا بدحالی و بزگی ءِ ایسر کننگ کن نن داڑے بسونن۔ نم تینا بے خوانندئی و بے شعوری نا سوب آن جاہل جٹ ، دُز و جنگجول مسونرے، نم اندا پد تموکا راج نا باتی اُرے۔ داسا ننا بننگ آن نمکن علم نا درغ آک ملنگ انگ تون اوار نما ڈکھ و ویل آتا ایسری ہم مرو۔
ولے دا ہیتاتا مسخت ہمو جاگہ نا راج ئنا زند ءِ جوان کننگ نا اف بلکن اوفتا نیت و مراد ہمو ڈیہہ نا خیسن و پیہن کو ہرافتیکہ او داڑے تینا کوزہ ءِ برجا تخانو۔
داوڑ نا چندی مثیال آک تاریخ نا پنہ غاتیا ننے نظر بریرہ۔ ہراتم اسہ کوزہ گیر اس اسہ ڈیہہ ئسے آ تینا کوزہ ءِ کیک تو اونا اولیکو گام تینا مسخت و آسراتی کن کاریم کننگ ءِ ولے او ڈیہہ نا مخلوق ءِ انداخدر بزگ تخک تینا اِرغ کن آہیری مریک اوفتے تین پہ تین جان نا دژمن جوڑ کیک اندا وڑ درآمد طاغت ور تینا نفع کن راج اٹی خانہ جنگی نا ہم خاخرتے لگفنگ تون اوار پین چندی ویل آتے بش کیک۔
بلوچستان قدرتی مڈی آن پُر ءِ ہرافتے آ ہر وخت زوراک آ طاغت آک تینا خن تا کیرغ آن خلکنو ولے زوراک آطاغت آک اخہ در کہ کوشست کرینو اوفک بے سہب مسونو۔
بلوچستان ٹی نرینہ غاتا مزاحمت نا کسہ غاک تاریخ نا پنہ غاتیا تالان اریر ولے شیرزال آک ہم مزاحمتی جہد ٹی اسہ تاریخ اس نوشتہ کرسہ تینا ڈیہہ کن تینے ندر کرینو۔
گل بی بی نا مزاحمت آن ہلیس کہ بانک کریمہ نا سیاسی مزاحمت دژمن نا تغ ءِ حرام کریسس۔ بانک کریمہ بلوچ ہمو وختا تینا جہد نا بناء ءِ کرے ہرا وختا بلوچستان نا مار و مسنک تینا راج و زمین نا پاکی کِن درآمد سیامار آتیتون جنگ نا بناء کریسُر۔ بی ایس او آزاد ہمو پڑ ئسکہ ہرانا مسخت تینا ڈیہہ نا رکھ تون اوار تینا راج ءِ غلامی آن کشنگ کن تینا جہد نا بناء ءِ کریسُس کہ اودے جہاں نا ہمو گل آتیٹی حساب کننگا کہ ہراکہ اسہ زوراکو ریاست سے نا شک ٹی دو شاغِسہ اودے باور کریفے کہ بلوچستان ٹی درآمد آتے ہچو جاگہ اس افک۔
سیاست نا پڑ ءِ بوشُت کرسہ بی ایس او آزاد ہر اسہ بلوچ ءِ سرپندی تسکہ کہ بلوچستان نا تیوی جیڑہ غاتا ایسری بیرہ آجوئی ءِ۔ ہراکہ بروکا زنک آتا شادکامی آجوئی نا فلسفہ ٹی ڈکھوک ءِ۔
بانک کریمہ ہمو وختان اسہ بے مٹ و گچینو کڑد اسینا گودی ئسک۔ اونا شعور و پختگی نا اندازہ اونا زند ئنا جہد آن خلینگک کہ او سوگوی اٹ تینا سوچ و فکرے عملی دروشم ترسہ دا باور کریفے کہ زالبول ہرادے کہ ردوم آن نرینہ نا مون آن مدام شیف خلکونو اوفک ہچ وڑئٹ نرینہ غاتیان کم افس۔ زند ئنا ہر پِڑ آ نیاڑی نرینہ تون اوار سلینگ و کاریم کننگ کیک۔ اود تینا زندے بلوچ راج کن عظیم ءُ مثیال اس جوڑ کرے۔ بلکن تیوی جہان کن ہم اسے گچینو کڑدار اسینا گودی مس۔
بلوچستان نا اسے اندنو ہند ئسے آن تینا مِزل نا کنڈا پند نا بناء ءِ کرے ہراکان ہچ ءُ گمان اس الو کہ تُمپ ئنا بڑزنگا مشتا نیام آن داخہ در سوگوْ آ جوزہ و جیرت تخوک ءُ شیرزال اس تینا لمہ ڈغار کن بش مرو ہراکہ مکران نا تیاب نا کنڈ آتیان ہلیس رخشان نا ریک آتا چوٹی تے اسکان اونا ہند آک ءُ۔
ہرانا ہر قدم جھالاوان و ساراوان آن ہلیس کوہِ سلیمان نا خرونا بڑزی تے کان اونا توار دژمن کِن کاٹم نا خڷ اس جوڑ مسک۔
اونا مہروانا سنگتاک سنگت ثناہ بلوچ، سنگت ذاکر مجید بلوچ و سنگت زاہد بلوچ تون اوار پین بھاز سنگتاک تینا مسخت آ ندر مسُر یا تو اینو نا دے اسکان ریاست نا ظلم آنا گواچی مسُر۔
دا وخت بلوچ و بلوچستان نا سوگوار آ وخت ئسک ہراڑے ہر عمر و وہی نا نیاڑی، نرینہ چُنا ریاست نا زوراکی نا آماچ مسک۔ دا کل ءِ تینا خنتیٹ خننگ تون اوار اوار تینٹ ام بھاز ریاستی زوراکی تا آماچ مسک، اونا خاہوت نا بندغاک بیگواہ مریسہ کسیفنگار ولے اود تینا کسر آن ہڑسینگتو، ریاست نا زوراکی اودے پین سوگوی بشخا، اود تینا نظریہ تینا اولیکو و گڈی ذمہ واری خیال کریسہ لمہ ڈغار نا آجوئی و شادکامی کن تینا لمہ جیجا تینا خاہوت و کھل ءِ آسراتی تے تینا ملی آن کشا و بلوچستان کِن بدر ملک ئٹی ہنا تینا فرض ءِ پورو کریسہ جہان ءِ دا پارے کہ بلوچ راج ئسے، زندہ ءُ راج ئسے۔
اینو اگر طاغتور بلوچ راج ءِ غلام تخانے تو دانا مطلب دا افک کہ نن چُھپ تولن و تینا کہنگ نا ودار مرین بلکن بلوچ راج تیوی جہاں اٹ ہمو راج آتیٹی حساب مریک ہرا غلامی آ لعنت پارسیہ مڑدی اٹ ندر مننگ ءِ تینا شرف خیال کیرہ۔
بانک کریمہ تینا زند نا گڈیکو ساعت ءِ پیشن گدریفسہ تینا مخست ءِ مونا دریسہ اندا پاریکہ کہ دژمن نا کسیفنگ آن بلوچ ایسر مفرو بلکن اونا اندا نابودی نا سوب بلوچ نا است ٹی اونا وطن کن پوسکُنو دروشم اسیٹ جوزہ اس خننگو۔
دژمن دا جنگ ءِ باہ تسونے اینو اود تون ہچو ہیت و گپ بچتنے اندانا سوب اود تینا طاغت نا زورا کسیفنگ نا وڑ و ڈول آتے ہتیسہ بلوچ آتے نزور کننگ نا کوشست ئٹی ءِ ولے اینو ہر بلوچ تینا حق اکن ظلم و زوراکی نا خلاف راسکوہ نا مش آنبار سلوک ءِ ہرادے شیف بٹنگ دا دژمن نا کاریم افک۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
