کریمہ بلوچ ہم ہنا
ٹی بی پی سرگپ
کریمہ بلوچ نا پن بلوچ راجی تحریک نا ہمو بڑز پن تیٹ حساب مریک ہرافک دا تحریک ءِ اسہ دروشم اس بشخار۔ بلوچستان ئٹ برجاء “آجوئی نا تحریک” ئٹ اونا بڑز بالاد آ شخصیت نا ساڑی مننگ ءِ نہ بیرہ بلوچ سیاسی باسک بلکن تیوی ڈیہہ ماراکہ۔
کریمہ بلوچ تینا سیاسی پند نا بناء ءِ چُنک سنی ئٹ بلوچ خوانندہ گل بی ایس او آن بناء کرے۔ او تینا لائخی، سوگوْ آ ارادہ و قدرت نا تروک شخصیت نا سوب تنظیم نا تلہ غا زوت بڑز ہنیسہ کرے و جتا اوغدہ تیا گچین آ ذمہ واری تے ایسری تریسہ کرے۔ او اولیکو وار سنہ 2006 ئٹ بلوچ اسٹوڈنٹس آرگنائزیشن نا بنجائی کمیٹی نا باسک ہمو وخت گچین مس ہراتم بی ایس او ونڈ مننگ نا مرغنا وخت آن گڈ اواری نا پڑو کریسس۔ سنہ 2008 ئٹ او بی ایس او آزاد نا بنجائی جونیئر وائس چیئرپرسن گچین مس۔ کریمہ بلوچ تنظیم ءِ سوگوْ کننگ و گچین وڑئٹ بلوچ زالبول تے سیاست نا پارہ غا پامدار کننگ ئٹ کڑد ایسری تس۔ سنہ 2012 ئٹ او بی ایس او آزاد نا سینئر وائس چیئرپرسن گچین مس۔
چانڑدہ مارچ 2014 آ بی ایس او آزاد نا چیئرمین زاھد بلوچ نا جبری گمشدگی آن گڈ او تنظیم نا قائم مقام چیئرپرسن نا ردئٹ ذمہ واری تے سنبھالا و سخت آ حالیت آتیٹ زاھد بلوچ نا یلہ کننگ کن تحریک بناء کرے۔ دوارہ سنہ 2015 ئٹ تنظیم بیستمیکو کونسل سیشن ئٹ کریمہ بلوچ چیئرپرسن گچین مس۔ او بی ایس او نا ہفتاد سالہ تاریخ ئٹ گچین مروک اولیکو زالبول چیئرپرسن ئس۔
کریمہ بلوچ نہ بیرہ بلوچ اسٹوڈنٹس آرگنائزیشن نا ہفتاد و یک نا تاریخ ئٹ اولیکو چیئرپرسن ئس بلکن او برجاء بلوچ تحریک ئٹ بلوچ زالبول تیٹ سیاسی تحریک ودی کننگ نا سروک ہم سرپد مننگک۔ او دود آتے پرغسہ اسہ قبائلی چاگڑد اسیٹی زالبول تے اُرا تیان کشیسہ روڈ آتیا برانز کننگ آ سرسہب مس۔ اونا راہشونی آ لائخیک بلوچ چاگڑد گچین وڑئٹ بلوچ زالبول تیٹ بدلی ودی کرے، اوڑان زیمی مریسہ بھازا بلوچ زالبولک سیاست نا بشخ مسر، اندا سوب ءِ کہ اینو کم و وَد تیوہ غا بلوچ سیاسی جماعت آتا راہشون تیٹ زالبولک اوار ءُ۔
سنہ 2016 ئٹ پنی آ برطانوی نشریاتی ادارہ بی بی سی کریمہ بلوچ نا پن ءِ “جہان نا سد بااثر زالبول” تا لڑ ئٹ شاغا۔
تینا سیاسی کاریم تا سوب آن کریمہ بلوچ ساندہ “ریاستی ادارہ غاتا” پارہ غان تڑی و دوبہ تا گواچی مس۔ اوڑا بھاز دروغ نا مقدمہ غاک کننگار۔ اونا ماما ماسٹر نور احمد ءِ برمتہ کننگا و دوارہ اونا جوْن خسنگا، اندن اونا ہلہ مار کریم جان ہم زوراکی تون بیگواہ کننگان گڈ جوْن خسنگا۔ اوڑا سیاست آن دو ارفنگ کن زور شاغنگا، اونا اراغا بھاز وار جلہوک مسر۔ دا سوب او کینیڈا غا ہنپ کرے و تینا سیاسی کاریم تے ہموڑے برجاء تخاسس و اوڑتون اوار ٹورنٹو یونیورسٹی ئٹ اکنامکس نا خوانندہ اس ئس۔ او 2018 اسکان بی ایس او آزاد نا چیئرپرسن مس و دوارہ جتا جہانی تلہ غاتیا بلوچ ویل ءِ مونا ہتیسہ کرے، تا وخت کہ 21 دسمبر 2020 آ اونا جوْن ٹورنٹو شار آ خننگا۔
سی و ہفت سالہ کریمہ بلوچ 20 دسمبر آ بیگواہ ئس، و پولیس اونا پٹ پول ءِ بناء کریسس، دا بابت ٹورنٹو پولیس اونا دروشم رنگ و عکس ءِ شینک کریسہ مخلوق آن کمک نا خواست کریسس، ولے ایلو دے اونا خاہوت پک کرے کہ کریمہ بلوچ نا جوْن ٹورنٹو آ خننگانے، ایلو پارہ غان ٹورنٹو پولیس دا تدینی نا بارہ ئٹ پٹ پول کننگے و مُستی حوال شینک کتنے۔
شکبر آ حالیت آتیٹی اونا ناگمان آن مرک بلوچستان آن پیشن بلوچ باہوٹی تا رکھ نا بابت پامدار ءُ سوج ودی کرینے۔ بلوچ باہوٹیک برجاء پیشن ملک آتیٹ ٹک مریسہ بننگو، اوغانستان و ایران ئٹ بلوچ باہوٹی تے ٹِک کننگ نا بھاز تدینیک مسونو، داسہ بلوچ باہوٹیک یورپ و کینیڈا ئٹ ہم ٹِک مننگو۔ کریمہ بلوچ نا بیگواہی نا دے اوغانستان نا شار کندھار ئٹ بلوچ آتا بگٹی قبیلہ آن تعلقدار اِرا باہوٹی تے سم کاری کریسہ بیران کننگاسس۔
برجاء سال مارچ نا تُوہ ئٹ سویڈن ئٹ اسہ باہوٹی بلوچ صحافی ساجد حسین بیگواہ مسوسس۔ دوارہ اونا جوْن ہم اپسالا شار ئٹ اسہ جُو ئسے نا رہی آ بد آ حالیت ئٹ رسینگاسس۔ اونا خاہوت و سیال آک دا دوبہ ءِ خلکوسر کہ اودے کسفنگانے و صحافی تا جہانی گل “رپورٹرز ود آوٹ بارڈرز” اونا زوراکی نا بیگواہی و خوْن نا دوبہ ءِ پاکستان نا ڈھکوک ادارہ تیا خلکوسس۔
بلوچ سیاسی جماعت آتا دعویٰ ءِ کہ باہوٹی تا حق آتا جہانی تنظیمک بلوچ باہوٹی تا رکھ ئٹ بے سہب مسونو۔ اوفک جہانی ادارہ تیان خواست کرینو کہ او دا پامدار آ حالیت نا نوٹس ہلیر و بلوچ باہوٹی تا رکھ ءِ یخینی کیر۔
جہانی برادری گچین وڑئٹ دے کہی ملک آک ہراڑے بلوچ سیاسی باسک آک باہوٹی ءُ، اوفتا دا ذمہ واری مریک کہ باہوٹی تا رکھ ءِ یخینی کیر۔ سیاسی باہوٹ تننگ نا مطلب بیرہ ملک ئٹ مننگ آن زیات مرے۔ اگہ دا ناگمان نا بیرانی تیٹ پیشن نا دو اوار مننگ نا شاہدی مونا بریک گڑا ہمو ملک آتے جہانی پِڑ آ ترندو گام ارفوئی تمک۔
