یک شمبے نا دے بیگہ غا ایم ایم بلڈرز کوئٹہ ٹی شیوان ادبی کاروان بلوچستان نا بنجائی کابینہ نا گچین کاریک ایسر مسر۔

شیوان ادبی کاروان بلوچستان نا دا مجلس اِرا بشخ آ تالان ئس، اولیکو بشخ اٹ شیوان ادبی کاروان بلوچستان نا بنجائی گچین کاریک مسر و ارٹمیکو بشخ محفل مشاعرہ نا ئسک۔

شیوان ادبی کاروان بلوچستان نا گچین کاریک آرگنائزنگ کمیٹی نا عمران فریق، حمید فراز، گلزرین ساگر، حمدان عدیم، عمران فرہاد استا کماشی ٹی پورو کننگار۔

گچین کاری تیٹ حفیظ مینگل بھلو کچ اسیٹ ووٹ ارفیسہ چیئرمین گچین کننگا اندن شیخ عتیق حسرت بیدس مون تس آن  کنوینئر گچین کننگا۔ انفارمیشن سیکرٹری کن حفیظ شہزاد، مالیات سیکرٹری کن عرض جان ظہیر، آفس سیکرٹری کن شاہد شاز، حوالکاری سیکرٹری کن پیر جان مہر، ربیدگ سیکرٹری کن دانش مینگل گچین کننگار۔

ارٹمیکو بشخ محفل مشاعرہ نا ئس ہرانا کماشی ءِ پوسکن گچین مروکا بنجائی چیئرمین خواجہ حفیظ مینگل کرے۔ دا وخٹ او تینا تران ٹی پارے ای کل آن مست آرگنائزنگ کمیٹی نا منتوار اٹ ہرافک اسہ گچین وڑ اسیٹی گچین کاری تے ایسری تسر، ای منتوار اٹ شیوان نا ہر اسہ عہدہ دار نا ہرا کنے غا اسیکہ ولدا اُست تفیسہ چیئرمین گچین کریر۔

چیئرمین حفیظ مینگل پارے مسخت بولی و ادب نا دیمروی ءِ۔ شیوان ادبی کاروان بلوچستان نا سرسہبی ننا نما کل ئنا سرسہبی ءِ۔ ای دا ذمہ واری تے تینا کوپہ غاتئے ارفیسہ مدام سرسہب آ مزل کن نت دو خلوٹ۔

تلہ نا دود آتے پوسکن گچین مروکا کنوینئر شیخ عتیق حسرت مینگل دوئی کرے۔ و مشاعرہ ٹی عرض جان ظہیر، دانش مینگل، عمران فریق، مشاہد شاز، فتح میر، وحید غمخوار، حفیظ شہزاد، وحید ساسولی، داود ارمان، ساول خان، حسین احمد، فدا بلوچ، سربلال، حفیظ مینگل ساڑی ئسر۔

بلوچستان نا ضلع کیچ نا بنجائی شار تربت ئٹی درو فورسز پوسٹ آ مروک بمب جلہو نا ذمہ واری ءِ آجوئی خواہوک بلوچ سلاء بند تنظیم بلوچ لبریشن آرمی ارفینے۔

بمب تراک آن پنچ بندغ ٹپی مسوسر ہرافتیٹ پنجاب و سندھ آن تعلقدار چار بندغ اوار ئسر۔

بلوچ لبریشن آرمی نا ترجمان جیئند بلوچ پارینے کہ بی ایل اے نا سرمچار آک تربت بازار ٹی کوزہ گیر  پاکستانی لشکر نا اسہ چیک پوسٹ ئسے ہمو وخت بمب ئٹ ٹک کریر ہرا وخت اوفک چیک پوسٹ آن پین مچ ئسر، ترجمان نا پاننگ ءِ بمب تراک آن چار کارندہ ٹپی مسونو۔

ترجمان پارے کہ تربت شار ئٹی پاکستانی فوج و ڈھکوک ادارہ آک پیشن علاقہ نا مخلوق ءِ ہندی کریسہ اوفتیان جاسوسی تون اوار بلوچ تحریک نا بر خلاف حکمت عملی آ کاریم کننگو۔

بلوچ لبریشن آرمی نا ترجمان جیئند بلوچ پارے کہ ہندی وڑئٹ پوسکنو ڈیتھ اسکواڈ جوڑ کریسہ  بلوچ راجی تحریک ءِ توننگ کن کوشست برجاء ءِ، پن کروک ڈیتھ اسکواڈ ورناتے  بیگواہ کننگ تون اوار بلوچ نیاڑی و چنا تے شہید کننگ نا جرم ئٹ ڈودار مسونو۔

ترجمان پارے کہ بلوچ لبریشن آرمی پاش پائک کہ دا تیوہ آ ریاستی کارندہ آتے نن خننگ اُن، راجی  تحریک و بلوچ راج ئنا برخلاف دژمن کن کاریم کروک آتے عبرت نا نشان کرون۔

یاتی مرے تربت جہلو آن مالو بلوچ لبریشن آرمی تدوکا ہفتہ سوراب ٹی پاکستانی فورسز نا گاڑی آ چغلی بمب جہلو  و داڑان مالو ضلع بولان ٹی اِرا جتا جہلو آتا ذمہ واری ِء ارفیسس۔

بولان جہلو ٹی سلاء بند بندغ آک پاکستانی فورسز نا پوسٹ ءِ کوزہ کریسہ  11 کارندہ ءِ کسفیسر، اندن اوکان گڈ علاقہ ٹی سر مروک فورسز نا گاڑی ہم بمب جہلو ٹی ٹک کننگا ہراٹی کیپٹن تون اوار شش کارندہ  ٹپی مسوسر۔

اسہ گواچن، اسہ فسانہ اس
نوشت: برزکوہی | مٹ: عتیق آسکوہ بلوچ

دی بلوچستان پوسٹ

(1)
پنچ دے اسکان دے ئنا دروشم اندر مننگ تو ہمو چِل و پنچ نا قافلہ بیدس روشنائی نا کمک بیم بش کروک کسر تیا پند کریکہ و سہب تون ساف تمنگ آن مُست اسہ رکھوک ہند اس پٹیسہ ہموڑے ڈھکارہ تینے، اندن کہ دے تینا مُدام آ روشنائی ءِ آسمان نا ایسری تون خلککہ، اوفتا کاٹم آ گُراب آتا شپ شپ بناء مسکہ، دُننگا حالیت اٹ تغ و جارات بیرہ پِن نا سلیسکہ، خنک دے آ خلوک مسرہ کہ او ہراتم تینا دروشم ءِ تیوہ غاتیان بھلا مش ئنا پد آن ڈھکنگ بناء کے۔ بینگنی، ملاسی و دمدری نا خلوک دا قافلہ ہراتم پنچ دے ئنا مرغنا، صبر ئنا چکاس ہلوک سفر آن گُڈ تینا مِزل اسکان سر مس گڑا ہفت تُوہ آن گڈ اولیکو وار کماندار شیہک نا دروشم آ اسہ بشخندہ اس بیرفوک خننگا و او تینا سنگت آتیتون پارے “سنگت آک نن سرسہب مسون، ننا اسہ سنگت اس ہم ٹپی متئو۔” بھاز زوت ہمو بشخندہ بے جاراتی ئٹ مٹ مس و او تینا نائب کمان تون پارے “سہب تمنگ تون ہر سنگت ءِ اونا تینا تینا کیمپ رادہ کننگ نا بست و بند ءِ کہ، کنے نیٹورک آ حوال کن ہنوئی ءِ۔”

بڑز خیالات و حواصلہ تا خواجہ، شیہک نیامکو تپہ آن تعلقدار اسہ خوانندہ بلوچ ورنا ئسے۔ ہرا تینا چنکا زند ئٹ سیاست نا جتا شیفی بڑزی تے خنا و سال آتیان مالو دا فیصلہ آ سرمسوسس کہ ہراتم ظلم، وحشت و بیدادی تینا سیم آتیان دِرکہ گڑا دا چاگڑد ئٹ انصاف نا تول نا برابری بیرہ طاغت نا زور آ دوئی کننگ مریک، وحشی بیرہ وحشت ءِ سرپد مریک و بیدادی ءِ بیدادی تون ایسر کننگ مریک۔ ہمو وخت او سلاء بند مزاحمت نا کسر ءِ ارفیسس و داسہ سال آتیان گڈ اونا کوپہ غاتیا چار بلوچ سلاء بند جماعت آتا سیوت براس نا اسہ الّمی ریجن ئسے نا کماندار مننگ نا ذمہ واری بسوسس ہرادے او اِرا سال آن بھاز گچین وڑئٹ مُستی دننگ ئس۔

شیہک ترند آ گامی تیتون نیٹورک نا پارہ ہننگ ئس، اونا خن تیٹ تدوک دے تا معصومیت، نظریہ نا ہنینی و اونا مہروان آ فطرت نا ندارہ مُر آن خننگاکہ، اونا دروشم نا درشتگی* پاریکہ کہ او تینا عمر آن زیات بھلن مننگ ءِ، جتا مروک سنگت آک، مکران نا خاخر دسوک دے، بے تغ آ ننک تیوہ غاک تینا رند آتے اونا دروشم آ ہلاسر۔ اونا دُو تا سختی، پنوک ہور ہڈ آک، دوتیا اندر مروک لیک آک اونا خواری کش آ زند نا بین ءِ مُر آن کریسہ خننگارہ۔

او ہمو ہند آ سر مریسہ سیٹلائٹ فون ءِ کشیسہ سگنل پٹنگ ءِ بناء کیک و اسہ نمبر اس خلیک۔ اونا فون ءِ دمدستی تون ارفنگک۔ دا فون براس نا بنجاہ ءِ کننگک۔ شیہک دمدستی تون چُنک حوال آن گڈ پائک “خواجہ تیوہ غا سنگت آک سلامت ءُ، و ہمو خاخر پہ رضا اَلو، ننے گمان اَلو کہ خاخر داخس تالان مرو۔”

(2)
ہرا نن کماندار شیہک نا راہشونی ئٹ 45 مزاحمتکار آتا قافلہ تینا رکھوک ہند آ سر مریک، ہمو نن آن پنچ دے مالو 15 اکتوبر 2020 آ دا چِل و پنچ بندغ مکران کوسٹل ہائے وے آن خڑک پاش آ آسمان نا شیف آ بزی ٹاپ نا ہند آ گھات خلوک مریرہ۔ دا دستہ اِرا ہفتہ پند کریسہ اوڑے سر مسوسس۔ اوفتا معلومداری نا ردئٹ اوفتا ٹارگٹ ءِ سر مننگ آ اسہ دے اس لگو و دا کسر اوننگ بھاز دے اسکان ہم برجاء مننگ کیک۔ داسہ اوفتا ودار ءِ چار دے گدرینگاسس، تیوہ غاتیتون دیر اکن بھلو کَلی ساڑی ئس و کُننگ کن کماندار تیوہ غاتے دانکو، و کُرنو تسوسس۔ کسر اوننگ اخس کہ مرغن مرے، اوفتے کم کننگ تون داڑے ہڈ کروئی ئس و ہمو وخت اسکان واپس ہنوئی اَلو، ہراتم او تینا ٹارگٹ ءِ دوئی کپسہ۔
ودار نا چارمیکو دے سہب مالو ہراتم اوفتا اسہ ٹیم اس دیر نا بست و بند کن پیشن مننگ ئس و ایلوفک تینا ہند آتے سنبھالوک تولوک ئسر، گڑا اوفک گراب آتا پیری کننگ نا توار ءِ بنگر۔ تیوہ غاک بیدار مریسہ کیموفلاج کریر تینے ڈھکار، ولے انت دانا مطلب دادے کہ دشمن ءِ اوفتا حوال رسینگاسس؟ اگہ دشمن لشکر ءِ اوفتا حوال رسینگانے گڑا انت اوفک دُن تالان ءُ جاگہ اسیٹی تینا وتاخ آن مُر دشمن تون مون تننگ کیرہ؟ مُستی دشمن کن کسر اروک جوانے یا مشن ءِ یلہ کریسہ واپس ہننگ؟ بلکن دشمن تینا ہڑدے ئی بال ئٹ مرے و اوفتے حوال رسینگوک مف، اگہ او بیرہ خُلیس نا سوب واپس مریرہ گڑا اخس بھلو کاریم ئسے خڑک بننگ آ ہلوئی تمک و اگہ گواچنی دشمن ءِ حوال تننگانے و او کاٹم آ بریک و اوفک دا تالان آ جاگہ غا مون ایترہ، گڑا اوفتا اخہ سنگت نا نسخان مننگ کیک؟ جنگ آتیٹ منصوبہ غاک سال و تُوہ تیٹ ٹہیفنگرہ، ولے جنگ ئنا میدان اسہ اندنو جاگہ ئسے ہراڑے نا ذہن ئنا تیوہ غا منصوبہ غاک ساہت آتیٹ بال کیرہ، اسہ منٹ، اسہ سُم و اسہ فیصلہ تیوی جنگ نا دروشم ءِ مٹ کننگ کیک و فیصلہ کننگ کیک کہ دیر سرسہب پیشن مریک و دنا جوْن پیشن مرو و شیہک نا تیوی زند بسوسس دا ساہت آ سرمسوس ہراڑے اوڑے ہمو گچین آ فیصلہ ءِ کروئی ئس۔ بندغ پین ہچس مفک بیدس تینا کروک فیصلہ آتیان۔ اینو نن تیوہ غاک انتس ارین، ہرکس ہرادکن ءِ، تیوہ غاتا وجود اونا تینا کروک فیصلہ ءِ۔ شیہک ءِ ہم فیصلہ کروئی ئس کہ او دیر ءِ؟

کماندار شیہک تینا سنگت آتے پائک “سنگت آک! اینو نن تیوہ غاک جتا ہند آتیان مرغن ءُ پند اس کریسہ بسونن، دا مرغنا پند نا نیامٹ نن بھلو سختی سگان۔ دا پند آن مالو ننے آن ہر اسٹ اسہ جتاو زند اس گدریفنگ ئس، ولے تیوہ غاتے اسہ نظریہ و اسہ فیصلہ اس جاگہ گوْفیسہ داڑے دا ہند آ مُچ کرے۔ و نظریہ بیرہ دادے کہ نن غلامی، ذلت و ظلم ءِ سگپرون۔ نن آجوئی و برار نا بندغ مننگ کن جہد کرون، چاہے ننے تینا ساہ ءِ ندر کروئی مرے۔ نن تینا زند ءِ ہمو دے ندر کرین، ہرادے نن غلامی آن نمن مسوسن۔ نن ہمو دے خلیس نا خن تیٹ خن شاغیسہ اودے تینے آ زوراک مننگ آن نمن مسوسن، نن ہمو دے آن آجوئی و ندر مننگ تون یاری کریسن، ہرادے نن دا کسر ءِ گچین کریسن۔ اینو نن سرسہب مریسہ زندہ واپس مرین، یا ننا دتر ننا پاک آ مِش تیٹ اوار مرے ولے ہر دروشم ئٹ دا یات تخنگو کہ منہ آجو بندغ داڑے غلامی تون مون تننگ کن بسوسر۔ ننا اینو نا دے ہم ننا ایلو دے تیان جتا اف۔ نن داڑے ودار کرون، اگہ دشمن کاٹم آ بریک گڑا نن ایسری ساہ اسکان جنگ تریسہ مون ایتون، چاہے ننے تیوہ غاتے ندر مروئی مرے، نن تینا ٹارگٹ ءِ دوئی کننگ آن بیدس واپس ہنپرون۔” شیہک تون تیوہ غاک امنائی کریسہ ہمو وڑ تینا پوزیشن تیا تولک مسر۔

منہ گھںٹہ آن گڈ یانزدہ بجہ و پنجاو پنج منٹ آ اسہ سنگت اس مخابرہ غا حوال ایتک، ٹارگٹ سر مننگے۔ منہ سیکنڈ آتیٹ مزاحمتکار آتا دا دستہ فوج نا ہمو قافلہ غا تمک۔ چار دے آن بے تغ، بینگن و ملاس دا مزاحمتکار آک گروک نا ترندی تون تینا دشمن ءِ تمیسہ پنچ منٹ ئٹ اودے نیست کیرہ و نیم گھنٹہ ئسے اسکان بھلا روڈ ءِ بیدس خلیس و بیم تینا دوٹی ہلوک مریرہ۔ پانزدہ فوجی کارندہ کسفنگرہ و اوفتا تیوی فوجی مڈی ءِ تینا دمدر آ کوپہ غاتیا ارفیسہ واپس ہمو مَش تیٹ اندر مریرہ ہرا ہزار آ سال آتیان اوفتا رکھ ءِ کیرہ۔

ترندی تون واپس مریسہ کماندار شیہک نا اسہ سنگت اس گلان پارے “واجہ دا بھلو کاریم اس ئس، اُست پدین مس۔” شیہک اونا پارہ غا اریسہ بشخندہ کرے و پارے “سنگت، بس مڈی مروس، ہڑدے دشمن ءِ نشان تسونہ کہ بلوچ اخس بھلو کاریم کننگ کیک۔”

من ساہت آن گڈ ٹی وی و راجی حوالکاری میڈیا آ فوجی تا مرگ نا گواچی مننگ نا حوال تا بننگ بناء مریک۔ پاکستانی میڈیا آ دفاعی تجزیہ کروک آک ہیت ءِ بناء کیرہ کہ جلہو کروک آتے پیشن نا طاغت آتا کمک دوئی ئس، ہرا پوسکنا سلاء و مڈی تون ئسر، لس بلوچ گلی تیٹ ہیت بناء کیک کہ دن خلنگ کیرہ گڑا ہڑدے انتئے خلپسہ، آجوئی پسند دانشور زوت فیس بک اسٹیٹس اپلوڈ کننگ بناء کیرہ کہ جہانی جنگی اصول آتا ردئٹ دا جلہو ئٹ بھاز آ نزوریک اریر۔ ہراتم دا تیوہ غا تجزیہ غاک مریسہ کیرہ حنیف بے سما مریسہ تمک۔ شیہک زوت دیر ئٹ “کیلسی” خلیسہ اودے کنیفک۔ سنگت آک سوج کیرہ انت مس؟ شیہک پائک، ہچس نہ بس بینگنی نا سوب آن نزور مریسہ کاٹم تا چکر کننگ ئس۔

(3)
دا جلہو آن ہفت تُوہ مالو اپریل ئٹ کماندار شیہک براس نا علاقئی کونسل نا اسہ میٹنگ اس ہمو وخت خوائفک، ہراتم تیوہ غا تنظیمک چنکا بھلا کاریم تیٹ گٹ مریرہ، ایلو پارہ غا بے کچ سختیک تیوہ غاتے پلویڑ کرینو۔ اسہ پارہ غا مظلوم نا حیثیت ئٹ اسہ جنگ ئسے نا بناء کننگ نا سوب مڈی نا کمی نا ویل ساندہ ہر تنظیم و ہر مزاحمتکار نا کاٹم آ زمخ آنبار ٹنگوک مریک، ایلو پارہ غا چمباز طاغت تخوک دشمن و اونا پیداگیر آک ہم ہر پارہ غا تالان مروک ءُ۔ مظلوم و محکوم آتا جنگ آک ہم گوڑیفنگوک مریرہ، ہراتم اوفک بے سہب مریر تو اوفتا ایسری مریک ولے ہراتم او سرسہبی تون اسہ گام اس مونی کار گڑا ہر ایلو گام مالو ناڑان زیات سخت مریک۔ سرسہبی و سختیک اِرا اسہ وڑ نا لیک آتیانبار دوٹی ہلیسہ ہنیسہ کارہ۔ نم اخس کہ مونی کارے چکاس ہموخس سخت مریسہ کرو۔ بے سہب آ جنگ آتیان مخلوق ایہن ہم پنک، ولے مظلوم آتا سرسہب آ جنگ آتیٹ ہم مخلوق پنک انتیکہ ہر سرسہبی تون سختی تا کچ ہموخس زیات مریسہ کائک کہ اسہ لس ءُ بندغ اس آسراتی تون بھلا عکس آن خن تے ہڑسیسہ سرسہب آ پند ءِ گیرام کیک و سختی تیان پنک۔ اندا سوب دننگا جنگ آتیٹ بدن نا طاغت آن بھاز زیات شابیت و سوگوْ آ نظریہ نا خواست مریک۔

شیہک ہرا ورنا تا راہشون تیتون تولوک ئس، اوفک ہمونو اسہ نظریاتی شابیت و سوگوْ نظریہ نا جھتہ اس ئس۔ ہرادے داسہ براس نا زوت سرسہبی تا سوب سختیک پلویڑ کریسر۔ اوڑے فیصلہ مریک کہ “نن دشمن ءِ منصوبہ ئٹ سرسہب مننگ کن ہلپرون کہ او ننے تالان کریسہ چنکا چنکا جلہو تے اسکان تورہ، ننے اسہ بھلو جلہو اس کروئی مرو، اسہ اندنو جلہو اس کروئی مرو ہرانا توار جہان اسکان سرمرے، اسہ اندنو جلہو اس ہراڑان کوزہ گیر ئٹ بے جاراتی تالان مرے، تیوی جہان ءِ سما تمہ کہ دشمن دروغ تڑنگ ءِ، نن انداڑے ساڑی اُن و تینا وطن نا رکھ کننگ نا پورہ لائخی تخنہ۔

اوکان گڈ کماندار شیہک و ایلو سنگت آک تولسہ حساب خلیرہ، تینا ٹارگٹ ءِ گچین کیرہ۔ دوارہ اوفک دا ہیت آ سلیرہ کہ دا وخت دمدستی تون بندغی طاغت و داخس مڈی اوفتون ساڑی اف۔ او امر داخسو بھلو کاریم اس کننگ کرور؟ شیہک ایلو دے براس نا مرکز تون ہیت کننگ کن نیٹ ورک نا پارہ غا رادہ مریک۔

(4)
ہراتم نے آ جنگ اس برے گڑا اوڑان نی ہچبر بچنگ کپیسہ، نی اودے چپ شاغنگ کیسہ، ولے ایسر آ نے اونا بشخ مون پہ مون یا پین دروشم اسیٹ مروئی تمک و گڈو کروک آ جنگ ءِ نی اخس چپ شاغسہ، اونا فائدہ بیرہ دشمن ءِ مریسہ کرو۔ اگہ دا گڈو کروک آ جنگ نا نن ایسری ءِ کننگ کتون گڑا دا ننے ایسر کیک۔ جہان آن جتا آ ڈیہہ بلوچستان نا اسہ آجوئی نا مجاد اس نیم گھںٹہ ئسے اسکان تینا بنجائی کونسل نا مونا اندن انگا گڈو کروک انگا جنگ نا برخلاف اسہ جلہو ئسے نا منصوبہ ءِ تخیسہ کرے، ہرانا تیوہ غا بشخ آتیا خوڑتی اٹ اریسہ اودے موْکل تننگک و اوکان گڈ مڈی آ ہیت بناء مریک۔ شیہک پائک “واجہ! ای حساب ءِ خلکنٹ، ننے کم و وَد پنجا آن زیات مزاحمت کار نا خواست مرو، ہرا تیوہ غا سیوتی تنظیم تا جتا کیمپ آتیان علاقئی کماندار آک چنک نوٹس ئسے آ مُچ کرور، ولے ننے بھاز آ فوجی مڈی، کُن خور و اِن و بر کن شانزدہ لکھ نا خواست مرو۔

ساندہ مڈی نا نیستی نا گواچی دا تحریک بھازا سختی تیان گڈ شانزدہ لکھ روپئی نا بست و بند ءِ کریسہ شیہک اسکان سر کیک و دا آپریشن نا کماندار پن کیک۔ ہرا ہفت تُوہ آن گڈ دشمن نا پانزدہ فوجی کارندہ نا اسہ بنجائی کسر ئسے آ کسفنگ آ ایسر مریک۔

(5)
ایلو منہ تُوہ کماندار شیہک و اونا سنگت آتیکن آسراتی نا مفسہ، دنو بھلو آپریشن اس دشمن نا بامس نا شیف آن بسٹ رازداری تون ایسری اسکان دننگ جوئے شِیر ہتنگ نا وڑ مریک ولے جہان ئٹ دنو ہچس اف ہرا سوگوْ نظریہ و بڑزا ارادہ غاتا ٹُل آتے اسکان سر مف۔

مسہ تُوہ نا تہٹی شیہک تیوی مشن نا تیاری تے ایسر کیک ولے دا وخت آ مشن ءِ دک اس لگک کہ ہراتم اودے سما تمک کہ مشن تون تفوک منہ مزاحمتکار نزور تمانو و اوفک دشمن نا مونا سلاء بٹینو۔ ولے او ہمت ءِ ہلیپک و اسیکہ وا پورہ کاریم نا لڑ ءِ مٹ کیک، اودے منہ تُوہ پین لگک۔

ہمو دے بریک، ہراتم مشن کن پیشن مننگ نا وخت بریک۔ براس نا دا موبر آ کماندار تینا دو ئٹ مشن نا نقشہ ارفوک بریک تینا تیوہ غا جانباز جہد کار آتے مُچ کریسہ توار ایتک کہ “ببو سنگت آک! داسہ مشن آ گڈیکو وار ہیت کننگ نا وخت بسونے۔ تیوہ غا تیاریک مسونو۔” مُچ مروک تیوہ غا مزاحمتکار آتیٹ اسہ گچین ءُ گل و بالی اس تالان مریک۔ ہر اسٹ اسٹ ایلو ءِ خمب کننگ آ لگک۔ گل و بالی نا ندارہ ئٹ کماندار بھازا سنگت آتے دا پاریسہ مونجھا کیک کہ “سنگت آک نن داڑے بھاز سنگت مُچ مسونن، داسہ مشن اٹ منہ بدلی ہتنگانے۔ مالو ننے 84 سنگت نا خواست ئس، داہ مشن ٹی بدلی کننگانے، دانا ردئٹ داخس ءُ بھلو کچ اسیٹی ہننگ تینٹ گوریلا خواست آتا برخلاف مرو۔ داڑان بیدس داسہ ننتون داخس مڈی ہم اف کسر کن۔ اندا سوب مشن کن بیرہ 45 سنگت ءِ گچین کننگو۔” کماندار نا ہیت ءِ بننگ آن گڈ اسہ ساہت ئسے اسکان چھپی تالان مریک، ہر اسٹ ہننگ خوائسکہ، کس ءِ ہڑسینگ وارہ کنتوکہ۔

تینا سنگت آتا دروشم تے خوانیسہ اسیکہ وا شیہک سنگت آتون پائک “سنگت آک! نن ذات نا آخہ، زنک آتا آجوئی نا جنگ ءِ کننگن، سنگت آک! نن ساہت آتا آخہ عہد آتا جنگ ءِ کننگن، سنگت آک! نن کہنگ نا آخہ زندہ مننگ نا جنگ ءِ کننگن۔ نن ایسری آخہ، نن بناء اُن۔ نن کڑدار آخہ ننے آن ہر اسٹ اسہ کسہ ئسے و دا کسہ غاتے مونی ہنوئی ءِ، دا بیرہ اسہ مڑتس ئسے، دنو بھاز مڑتس آک نمکن کسر اُروک ءُ، ہچو سنگت اس اُست آ کپ، ننے جنگ آخہ بلکہ نن جنگ ءِ گچین کرینن گڑا ہر سنگت تینا میدان ءِ خنیسہ کائک، وارس او بزی ٹاپ مرو، وارس او دشت، وارس بولان، وارس شور و وارس بلوچستان نا پین مش و پٹ اس مرو۔ ہر سنگت تینے تینا مڑتس کن تیار تخہ، دا مڑتس آک ہمو وخت اسکان بریسہ کرور ہرا وخت اسکان شہادت بخت مفک یا گڑا سرسہبی ننا نت تیان دروت ہلپک۔

اوکان گڈ کماندار محاذ کن 45 سنگت ءِ جتا کرے، و مش ماس ئسے نا رہی آ تیوہ غاتے گڑد لیک اسیٹی تولفے و ڈغار آ نقشہ ءِ تخا و اسہ خیسن ءُ قلم اس جیب آن کشیسہ نقشہ آ اسہ ہند ئسے آ نشان خلیسہ پارے “سنگت آک! داکان پند بناء مرو۔ پگہ بیگہ تون پنچ بجہ غا نن سر ہلون و سہب پنچ اسکان پند برجاء مرو و تیوہ غاتیان سخت آ پند اندا مرو، دا نیامٹ ٹارچ دائیک تینا جاگہ غا سگریٹ کشنگ نا ہم موْکل مفرو و ہر حالیت اٹ ننے پنچ بجہ اوڑے سر مروئی ءِ، اوڑے دیر نا اسہ چشمہ ئسے، منہ درخت مرور، اوڑے اسہ سنگت اس برو، تینتون اِرغ ہتو، ولے پگہ بیگہ پنچ آن گڈ ننے کسر اٹ کُننگ کن ہچس رسینگپرو، بیرہ دیر و بسکوٹ آ گزران کروئی مرو، اوڑے چشمہ غا منہ سنگت ءِ ہنیسہ موٹر سائیکل آتے ہتوئی مرو، کہ منہ سنگت موٹر سائیکل نا کسر اٹ تینا پند ءِ بناء کیر، ایلو بیش تا بست و بند مسونے، منہ سنگت مڈی تے پیش تیا لڈیسہ پند کرور۔ اسہ ویل اس ارے کہ منہ بیش بھاز نزور ءُ، اندا سوب کسر ئٹ اوفک خیال تخوئی ءِ۔”

کماندار خیسن آ قلم ئٹ نقشہ غا دا تیوہ غا ہند آتیا نشان خلیسہ ہننگ ئس، و پاننگ ئس کہ ہراڑے سلوئی ءِ و ہراڑے آخہ و امر بیرہ ننکان پند کروئی ءِ، و امر دا پند ءِ اِرا ہفتہ اسکان کروئی ءِ۔ ایسر اٹ کماندار اسہ بھلو خیسن ءُ گڑد لیک اس نقشہ غا خلیسہ سنگت آتون پائک “دادے بزی ٹاپ نا ہمو ہند ہراکان اورماڑہ داخس۔۔۔۔۔۔ و گوادر داخس۔۔۔۔۔۔ کلومیٹر مُر مرو و نن داڑے دشمن آ جلہو کننگ کن تولوک مرون۔

(6)
“واجہ سنگت آک کل سلامت ءُ، خاخر پہ رضا تننگتوسس، ننے گمان الو کہ خاخر داخس تالان مرو۔” کماندار شیہک براس نا بنجائی کونسل ءِ رپورٹ تننگ ئس۔ تیوی واپسی نا پند ئٹ ایلو تیوی سنگت آک یا تو دا سرسہب جلہو نا بابت خوشی آن ہیت کننگ ئسر و انداڑا ٹک خلنگ ئسر یا گڑا ہر پارہ غا پند نا دمدری نا زہم آک ئسر۔ ولے واپسی آن گڈ شیہک نا ملی ٹی بیرہ اِرا ہیت پیری کننگ ئسر، ہرافتا سوب نہ اودے خاچنگ نا گمان ئس و نہ دمدری نا۔ اولیکو دا کہ امر تیوی سنگت آک سلامت رکھوک ہند آتیا زوت آن زوت سر مریر و ایلو ہراتم اودے کسر ئٹ حوال رسینگا کہ دشمن نا ہرا گاڑی ءِ اوفک خاخر تسوسر، او پٹرول نا سوب تالان مسوسس، ہرا دشمن فوج نا کارندہ تا جوْن تے پلویڑ کریسہ ہس کریسس۔ او فریشان ئس کہ دادے اسہ پہ رضا ءُ عمل اس سرپد مننگپک۔

اونا و اونا سنگت آتا جنگ بندغی کن ئس، اودے اسل دا وارہ کنتوکہ کہ اوفتے وحشی سرپد مننگہ۔ او بندغی نا رکھوک آک ئسر، او اسہ تہذیب ئسے نا رکھوک آک ئسر، و وحشی تہذیب آک بُھس کاری کیرہ اونا رکھ ءِ آخہ۔ اندا سوب او دا ویل آ داخس حساس مسوسس۔ اودے دا ہم سما ئس کہ واپسی آ اودے تیوی آپریشن نا حوال ءِ سینٹرل کمانڈ ءِ تروئی مرو، دُن مف کہ دا اسہ ردی نا سوب داخس بھاز سنگت نا نن و دے ئنا خواری پُوک مرے۔

او بنجائی کمانڈ ءِ تیوی احوال ءِ شابیتی اٹ تس، اوڑا بھازا سوج آک کننگار، تیوی بشخ آتیا خوڑتی اٹ اوننگا، بنجائی کمانڈ تون مالو آن شابیتی احوال ئس۔ شیہک نا پاننگ آن گڈ پاش مس کہ دا اسہ بے رضا ءُ عمل اس ئس و اونا ہیت آتیون امنائی کننگا و دا مشن ءِ اسہ سرسہب مشن اس پِن کننگا۔

شابیتی اٹ ہیت و گپ آن گڈ شیہک سیٹلائٹ فون ءِ بند کریسہ اونا انٹینا ءِ کشا جیب اٹ شاغا، و ہفت تُوہ اٹ اولیکو وار اونا دروشم آ ایشکامی اس تالان مس۔ و او بشخندہ کریسہ مدان مدان بنجائی کیمپ نا پارہ غا ہنا۔ تُوہ تے آن گڈ او سیر پڈ اِرغ کنو و پورہ ءُ تغ اس کرو۔

(7)
راولپنڈی اٹ آئی ایس آئی نا احوال تس بناء ئس کہ اوفتیتون نمن مفروک شاہدی ارے کہ بلوچستان ئٹ پیشن ملک طاغت آتا دُو ءِ و او بلوچ مزاحمت کار آتے بھلو کچ اسیٹی مڈی تننگو و زیات جلہو تے پیشن ملک نا ایجنسیک تینٹ کننگو۔
کوئٹہ ئٹ اڑزان نرخ آ تجزیہ نگا کیفے نیو اسٹار ہوٹل ئٹ تینا چار سنگت آتا مجلس ئٹ شیرچاہ نا ارٹمیکو کپ کن توار کریسہ کرونا آن گڈ بلوچ تحریک آ تجزیہ کریسہ پاننگ ئس کہ اونا معلومداری نا رد ئٹ داسہ بلوچ تحریک ایسر مسونے۔

نادرست ہند ئسے آن آجوئی خواہوک دانشور فیس بک آ تینا اولیکو اسٹیٹس ءِ پوسٹ کریسس، ہراٹی پیرس نا مینا بازار ئٹ بلوچستان نا بیرک ءِ خلنگ نا فائدہ تے پاننگاسس، داسہ ارٹمیکو اسٹیٹس آ گوگل آ پٹ و پول کننگ ئس کہ براس نا سلاء بند جلہو امر جہانی خواست و بندغی حق آتا برخلاف ءِ۔

بلوچستان نا مش تیٹ کماندار شیہک “ٹیڑ” آ تینا ڈپٹی ءِ ایسر کریسہ مِش و خل آن ٹہیفنگوک جُھب اٹ پیہاسس، ہراڑے براس نا علاقئی کونسل اسیکہ وا مُچ ئس۔ او سر مریسہ پارے “سنگت آک! تیوہ غاتیان مُست ننے تینا مشن نا نزوری تیا ہیت کروئی ءِ کہ ننے آن انت نزوریک مسوسر، اوکان گڈ کنا ملی ٹی اسہ پین بھلو جلہو ئسے نا منصوبہ ءِ، اونا تیاری ءِ ننے داسی آن بناء کروئی ءِ۔

بلوچستان نا علاقہ تربت نا بازار ٹی بمب تراک اس مسونے۔ احوال آتا ردئٹ تراک آن 5 بندغ ٹپی مسونو۔ ٹپی مروکا بندغ آتے مُستی علاج کن سول ہسپتال تربت آ دننگانے۔

احوال آتا ردئٹ دا تراک تربت شار ٹی سینیما چوک آن خڑک ایف سی چیک پوسٹ نا خڑک آ مسونے۔

ٹپی مروکا بندغ آتیٹ پنجاب آن تعلقدار اللہ یار نا مار لیاقت، سندھ آن تعلقدار مشکور علی نا مار نصیب خان، پنجاب بہاولپور آن تعلقدار فاروق نا مار نعیم، سندھ آن تعلقدار مہران نا مار ذیشان و تربت دشتی بازار آن تعلقدار ظفر نا مار لیاقت اوار ءُ۔

تراک نا سوب آن اِرا گاڑی ءِ ام نسخان رسینگانے۔ تراک آن پد ایف سی و پولیس تیوی علاقہ ءِ گیڑ کریسہ اِن و بر نا غٹ کسرتے بند کرینو۔

یاتی مرے بلوچستان ٹی فورسز کارندہ غاتیا مروکا جہلو و تراک آتا ذمہ واری ءِ مدامی بلوچ آجوئی خواہوک آ سلاہ بند تنظیم آک ارفینو ولے اینو نا مروکا تراک نا ذمہ واری ءِ دائسکان ہچو تنظیم اس ارفتنے۔

حوال تا رد ئٹ ہفتدہ سال ئنا بشیر احمد ہراکہ انٹرنیشل پبلک اسکول ڈھوک کالا خان راولپنڈی ٹی ہشت جماعت نا خوانندہ ئسے و بلوچستان نا ضلع خضدار نا ہندی ئسے، تدوکا اِرا دے ئنا ئسے بیگواہ ءِ۔

بلوچستان نیشنل پارٹی نا راہشون ثناء بلوچ راجی حوالکاری نا ویب سائیٹ ٹوئٹر آ اسہ ٹویٹ اسیٹ دا رد ئٹ پارے کہ بشیر احمد، ہرا ہفتدہ سال ئنا ئسے بلوچستان خضدار نا ہندی ءِ و انٹرنیشنل پبلک اسکول ڈھوک کہالا خان راولپنڈی ٹی ہشت جماعت نا طالب علم ئسے اِرا دے ئنا ئسے بیگواہ ءِ۔

یاتی مرے کہ بلوچستان ٹی بیگواہ بندغ آتا ویل بد ءُ دروشم اسیٹی بسونے، و بلوچستان ٹی بھازی بیگواہ بندغ آتا ویل ٹی بلوچ راج دوست جماعت آک تہمت خلیرا کہ بندغ آتے پاکستانی لشکر و ڈھکوک ایجنسیک دزگیر کریسہ بیگواہ کیرہ و بیگواہ بندغ آتا یلہ کننگ کن کوشست کروک تنظیم وائس فار بلوچ مسنگ پرسنز تدوکا 10 سال برجاہ برانز کننگ ءِ۔

وزیر اعظم پاکستان عمران خان اینو اسہ دے اکن  بلوچستان نا شار کوئٹہ ءِ سر مس، اوڑتون اوار کوئٹہ ٹی وزیر داخلہ شیخ رشید احمد و ایلو وفاقی وزیر آک ہم ساڑی ئسر۔

وزیراعظم عمران خان نا زیر صدارت گورنر ہاؤس بلوچستان ٹی اسہ بڑز تلہ مجلس اس مس، ہراٹی مچھ تدینی و بلوچستان ٹی سیکورٹی پلان آ عمران خان ءِ بریفنگ تننگا۔

بڑز تلہ مجلس آن گڈ وزیر اعظم عمران خان گورنر ہاؤس آن سردار بہادر ویمن یونیورسٹی کن پیش تما ہراڑے او مچھ تدینی ئٹی بیران مروک آ مزور کار آتا خاہوت تون اوڑدئی کرے۔

یاتی مرے کہ وزیراعظم نا دا بننگ مچھ ئٹی مروکا ہزارہ مزور کار آتا کسفینگ نا ویل آن گڈ خاص وڑ ئٹ کننگا و دا رد ئٹ وزیراعظم ہم منہ دے مالو اسہ ٹوئٹ اسیٹ پاریسس کہ ای بھاز زو کوئٹہ آ بروٹ۔

اوکان مالو مچھ ویل ئٹی کسفنگوکا مزور کار آتے کوئٹہ نا ہزارہ ٹاؤن قبرستان ٹی دفن کریر، دا وخت آ شاریک بھلو کچ اسیٹ ساڑی ئسر، مزور کار آتا نماز جنازہ علامہ راجا ناصر عباس خوانا ہراٹی خاہوت ، لس علاقہ مخلوق و شاریک بھلو کچ اسیٹ اوار مسر۔

یاتی مرے کہ تدوکا دے پاکستان نا وزیر اعظم عمران خان پاریسس کہ مچھ تدینی ئٹ بیران مروک 11 مزور کارکن ءِ دفن کننگک گڑا او اینو کوئٹہ آ راداہ مرو نہ تو “بلیک میلنگ” ٹی بروف۔

او پاریسس کہ نن خاہوت والاتے دا کہلو ءِ سر کرینن کہ ہرا وخت نما تیوہ غا خواست آتے منان، اگہ دا خواست ءِ کننگک کہ نن وزیرِ اعظم نا بننگ اسکان دفن کروفن، گڑا اسہ ہم ملک ئسے نا وزیرِ اعظم ءِ دا وڑ بلیک میل کننگپک۔

بھاز آ سال تیان  تیوہ آ ملک ء گیس تروک آ  ڈیرہ بگٹی نا مخلوق گیس نا برجاء بند مننگ آ علاقہ مخلوق کسر تیا پیش تمار، فیلڈ منیجر پیرکوہ گیس فیلڈ و ایلو  تعلقدار کوالخوا تا بر خلاف نعرہ خلکر ۔ مخلوق گیس تفرنگ  ء ڈیرہ بگٹی نا ساڑی گچین راہشون تا بے لائخی پارے۔

حوال تا رد ئٹ گیس ئنا برجاہ بند مننگ نا بر خلاف گیس مڈی آن پر انگا زمین ڈیرہ بگٹی نا علاقہ پیرکوہ نا قبائلی پیہن ریشیک بھاز آ  ایلو مخلوق تون اوار  کسر تیا پیش تمار، پیرکوہ گیس فیلڈ نا مونا سلیسہ نعرہ خلکر  و تروند انگا یخ ئٹی گیس نا بند مننگ ء علاقہ نا مخلوق آ بیدادی پاریر۔

بلوچستان نا علاقہ مچھ اٹی ہزارہ برادری نا مزور کار آتا کسفنگ نا دڑدی آ ویل نا بر خلاف بی ایس او مستونگ زون و بلوچ یکجہتی کمیٹی نا پارہ غان “کینڈل واک” مس، اوڑتون اوار اسے پروگرام اس ام اڈ تننگا۔

دا مُچّی ٹی بشخ ہلوک آک تینا خیال آتا درشانی کریسہ پاریر کہ ہزارہ قوم نا نسل کشی بیرہ بلوچ نا توار ءِ شیف کننگ نا اسے کوشست ئسے انتیکہ داڑان جہان ءِ دا نشان تننگک کہ بلوچستان ٹی مذہبی فرقہ غاتا نیام ئٹی ہم جنگ اس ارے، ولے دا ظلم و زوراکی نا بر خلاف بلوچ راج ہزارہ قوم تون اوار سلوکے، اندن ہزارہ قوم نا نسل کشی آ ہم خڑینک وہیفک۔

مونی پاریر کہ ہراتم کہ بلوچستان ئٹی اسہ سیاسی ءُ جنز اس بش مریک تو حکمران آک دا توارے پد بٹنگ کِن ہزارہ قوم نا نسل کشی ءِ کریسہ تینے ہر وڑ نا ذمہ واری تے آن آزات کننگ نا کوشست کیرہ ولے بلوچستان نا بیوس آ راج اولیکو دے آن دا سامراجی چم تیان واخب ءِ و دننگا بندغی دژمن کڑدار آتا خلاف سلیسونے۔ تو دا سخت انگا پاس آ بی ایس او و بلوچ یکجہتی کمیٹی مستونگ تینا ہزارہ ہیڑ، لمّہ غاتون اوار ءُ۔

اوفک پاریر ساڑی آ سیاسی سرکڑدہ و ذمہ وار آتیان خواست کینہ کہ ہزارہ قوم ئنا نسل کشی ءِ ایسر کیر۔ دا نسل کشی و ظلم و زوراکی نا ویل اٹ اوار مروکا آتے دزگیر کریسہ سزا تننگے تانکہ ہزارہ قوم ءِ انصاف دُو برے۔

شیوان ادبی کاروان بلوچستان نا پارہ غان اسے مجلس اس اڈ تننگا۔ مجلس اِرا بشخ اٹی ئس ہرانا اولیکو بشخ محفل مشاعرہ و ارٹمیکو بشخ گچین کاریک ئسر۔

محفل مشاعرہ نا کماشی ءِ پوسکنا گچین مروکا آرگنائزر عمران فریق کرے۔ گچین کاری مجلس نا کماشی ءِ دانش مینگل کرے ۔

دا مجلس ٹی مست ئنا ذمہ وار آتا ذمہ واری تے ایسر کریسہ پوسکنو آرگنائزنگ باڈی اس ٹہیفنگا۔ پوسکنا آرگنائزنگ باڈی ٹی عمران فریق آرگنائزر، حمید فراز، حمدان عدیم، گلزرین ساگر و عمران فرہاد آرگنائزنگ کمیٹی نا باسک گچین کننگار۔

اندن مشاعرہ ٹی عمران فریق، دانش مینگل، شیخ عتیق حسرت، عرض جان ظہور، ڈاکٹر حفیظ شہزاد، صلاح الدین آزاد، داؤد خان، عبدالباسط شمیم، نوید عمر، ساول خان، عامر مینگل و عطاء اللہ بشخ ہلکر ۔