نُت ئنا نُسخان
نوشت: انور بلسُم
دی بلوچستان پوسٹ
سبزل اسہ سوبر ءُ دانہ ءُ بندغ ئس اسک ولے نیست اوس ہم ئسک، اونا اِرا مار ئسُر اولیاد ایہن ہم پارہ دوست ءِ ولے سبزل ءِ اونا ہڑتومک آ مارک ہد آن بھاز دوست ئسُر۔ مارتا تہ پِن وریام و نہال خان ئسُر۔ نہال خان وریام آن چُنک ئس ہڑتومکاک تا چُنک سن، وریام نا عمر سینزدہ سال ئس و نہال نا عمر نو سال ئس۔ وریام باوہ ءِ تینا ہراتم توفک ءِ سفا کننگا خناکہ رہی آتا توسکہ، و باوہ تا شامٹ سینکُر خلککہ سُمَٹ مُلکاتٹی فصلاتے چتی خلنگان چھڑایاکہ ولہ چُھنکا نا لاڈکائی بھلا نا مُوجوا مچِٹ تیر مریک
سبزل خراستے لنگار کن دریکہ، نہال خان رندٹ تا دُدینگسا ہناکہ یا بہے شاغاکہ نہال رندٹ تا ہناکہ، دُن سارے باوہ تو تُوڷ بش کریکہ۔ اسہ دے خراس تا آخُر ٹی نت تہ ٹغلینگا تما، منہ دے نت آن بُشُت مس ہندُن اسہ دے نار آن دیر کشینگ ٹی ڈول کاٹم ٹی تا لگا دتر چُر مَس ولے چُنا ءِ بھلا ہراکا ہیتے ہلیک۔ ہندن اسہ دے سبزل پیشتما سہب ئنا وغدی مُلک نا کُنڈا خراستے دے ٹِک آن مالو درے لنگار کہ خلق آن ہنداخہ مُر کہ کھیب آن سما تمتوکہ کہ ہرا کُنڈا ہنانے، سہب ئنا دے ٹِک تِس نہال سما کرے دانگ ہینگ چَک خلک باوہ افک رُمبسا ہنا باوہ ئے پٹنگ کہ وریام خاچوک ئس۔
جواہر لُمہ ئس وریام و نہال نا۔ بس بیرُم تے سراہنگ کہ وریامے ٹُونہا کہ بش مہ دے ٹک تس نی دائسکان خاچانُس ہندُنی ٹی نہال نا رِلّی ءِ بُڑزا ہفے ہُرا کہ نہال جاگہ غا تینا افک ڈن آ پیشتما اُرا کہ نہال نا باوہ ہناسس کِسان کُوری آ دے ٹِک نا پارہ غا ولے نہال نا جند رُمبسا سلیشکو ئی (ڈغار نا پِن) ہمونگی حلمہ کرسا کائک دے کہی ہلینگ کنڈ آ۔
جواہر کُوک کرے او نہال عُمر نے ودھے اونگی ہمپہ باوہ نے کِسان کُوری آ ہنانے ولے نہال تَغے تَغ آ مُستی ہنسا کریکہ جواہر زو بس وریامے بش کرے کہ ہِن ایلمے ہُر درو رضو نا ڈَگی کھسک حرام مس کُچک آک مُچ ءُ ڈُھونڈ آتا ہموڑے بٹیسو تا سلیشکوئی نا پارہ غا، ایلم ہمونگی دُدینگسا ہنانے ہن ہڷ ہتہ بر تہ۔
وریام ہُٹرم کرے ہنا رُمبسا نت شپاد نہال نا پارہ غا کہ اینگان نائب ہیشُو نا کُچک بھاز کنوکو اس ئس خنا نہال ءِ کہ بریک ہمینگان اونا پاسوئی ہَب کرسا بریک دانگان جواہر ہم کِرّی نا ٹھال اس ہفے رُمبسا ہمونگی ہنا اینگان نائب ہیشُو نا کُچک ءِ خنا نہال پدی ہڑسینگا نرسا وریام نا کُنڈا، دانگان وریام ہنا جواہر ہم توار خلیسا کہ ہمت کر ایلمے کُچک سر مریک، کُچک ہم ہَب کرسا سر مس ہلک نت نا پاچہ ٹی نہال نا، نہال کھِبّ ہلک تما کُچک نت ئنا تہ سُو ءِ ڈلا ڈلنگ تو وریام ہم سر مس تا، جواہر ہم سر مس کُچک نرا ہفیر نہالے وریام جواہر خلق آ ایسر۔
جواہر پُوہاڑ کرسا ہوغا کہ بَلا ءِ کنا ہفیر، اللہ کتَّو ہیشُو نا کُچک ءِ مارا کنا بھیڑ کرے۔ نہال ہوغسا لڑزاکہ انت کہ کُچک نا سیہاڑان انت کہ چھار نیش کُچک نا نہال نا نت نا پِھنج ءِ ٹپ کریسُر، جواہر گُدے تینا چیرا مار ئنا نتا خیسُنو پِلپِل تفے سوگھو کرے۔ وریامے غصہ بس ہفے باوہ نا تھوفکے رُمبسا ہنا نائب ہیشُو ناکُچک ءِ خلک کھسفے۔
سُمتا ٹھیمبارہ ئے بِنگ سبزل خراستے شوم ٹی اِلا لنگار جُغا حلمہ کرسا خلقا بس اُرا کہ مارے کُچک کُنگُنے وریام آن ہلک تُھوفکے تخا ہفیر نہال ءِ دریر شار آ نت ءِ تہ پٹی کریر سیلہ خکُر، ایسر تا ارا غا۔
نائب ہیشُو میر دینار نا نائب ئس۔ بِنگ کہ کُچکے کنا سبزل نا مار کھسفینے، ہنا سبزل نا خراستے شومان تہ درے تینا خلق ئٹی واڑ کرے۔
سبزل بس شار آن شوم نا کُنڈا چَک ئے ہڑسا کہ مِش خنتیٹی خراسک افس بس اراٹی ولائت ءِ ہفے کہ جواہر نی ہنداخہ خنتویس خراستے دیر درے؟
جواہِر پائے ہیشُو کاوڑ کرینے کُچک کہ تینا خراستے واڑ کرینے ولدا ہنانے رپوٹ کرینے میر دینار آ پارینے بریس میر دینار نا وتاخ آ۔
سبزل چُنا ءِ بڈ آن دھڑفے خَوا غان دیرس کُنگ خیری ئٹ مون ئنا خیداتے پھاک کرسا ہنا میر دینار نا وتاخ آ کہ ہیشُو مالو آن ساڑی ئس۔
میر دینار خنا سبزل ءِ توار کرے اڑے نی ہرا مڑد ئنا مار مسونُس کہ نادا مار دا وہی ٹی سُم خلیک۔
سائیں کنا مار ساہ بچا وہ ای کہ ایلم نا تینا کُچک آن سُم خلکونے۔ اونا پین ہچ او کست ئس الو کُچک تو نے بی سما ءِ کہ او مشاخ آ کُچَک اسہ وار اس نے ہم دُدیفے۔ سبزل عاجزی ئٹ میر دینار ءِ پارے۔
کنے دُدیفے ہم ای ہِچ پاتوٹ تا، نی گڑا مارے نے انت کہ خلتویس کہ کُچک ءِ خلپیس خبر اف نے او کنا نائب نا کُچک ئس۔ میر دینار ٹُرندی ئٹ پارے۔
سائیں ای امر پاروسُٹ تہ ای کسان کُوری ڈغار ئٹی لنگار کننگ ٹی اسُٹہ خراستا ولے داسا خراستے کنا واڑ کرینے نائب ہیشُونی پارتا کنا خراستے ملے کنے تے، سبزل بیوسی ئٹ عرض کرے میر دینار ءِ پارے ۔
ہچ ءُ خراس افک یا خراستے ننے ایت یا مارے نے جیل کینہ فیصلہ نا دوٹی ءِ۔ میر دینار بش مس کُڑسی آن کاوڑ کرے سبزل آ۔
بش مس کچاری آن تا سبزل پائے نُم سائیں نُت ئنا نُسخان اُرے، سبزل پیشتمسا پارے۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
