عِلم وُ زانت ئے درے آگہی ئے درے
جی ھَو دشمن کنا نا سَنی ئے درے
چاکر زہری
زانت ءُ تعلیم بےگوا مس راج ئنا
صوب ءُ پیشیم بے گوا مس راج ئنا
حفیظ شہزاد
حق ءِ حق پاروکا لاپتہ
کسر نشان تروکا لاپتہ
سمیع شاکر
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
راہشون ادبی دیوان نا وائس چیئرمین اسرار شوہاز تینا بیان ئٹ پارینے کہ پروفیسر ڈاکٹر لیاقت سنی تون اوار بلوچستان آن زانت، شعور، ادب، قلم، کتاب و تخلیق ہم برمتہ مسونو ہرانا نن ترند لوز آتیٹ مذمت ءِ کینہ۔
اسرار شوہاز مستی پارینے کہ اگہ پروفیسر لیاقت سنی ءِ گڑاس مس تو اونا ذمہ وار ساڑی حکومت مرو۔
او لیاقت سنی نا بیگواہی ءِ اسہ المیہ اس پاریسہ پارینے کہ ہردے بلوچستان آن جتا فکر تون تعلقدار مخلوق برمتہ مریک۔ پروفیسر لیاقت سنی نا یلہ کریفنگ کن خوانندہ گل آک، سیاسی پارٹیک، ادبی تنظیمک، وکیل آک، صحافیک و ایلو مخلوق تینا کڑد ءِ ایسری ایتر۔
یاتی مرے براہوئی اٹ پی ایچ ڈی دوئی کروک و براہوئی بولی آ پٹ و پول کروک لیاقت سنی ءِ درو مستونگ آن اونا اِرا پروفیسر سنگت تون اوار نادرست بندغ آک بیگواہ کریر، دوارہ ایلو اِرا پروفیسر ءِ یلہ کننگا ولے ڈاکٹر لیاقت سنی دائسکان بیگواہ ءِ۔
یلہ مروک پروفیسر آک بیان تسونو کہ برمتہ کروک آک اوفتیان شش کروڑ تاوان خوائنگ ئسر، و وار وار لیاقت سنی آن اونا تنخواہ نا سوج ءِ کننگ ئسر ولے ایلو پارہ غان بلوچ سیاسی و چاگڑدی جماعت و تنظیم آک دادے سرکار نا پارہ غان زوراکی نا بیگواہی پاننگو۔
بلوچ نیشنل موومنٹ نا ترجمان بیان اس شینک کریسہ پارینے کہ ریاست تاوان کن برمتہ نا پن آ لیاقت سنی ءِ بیگواہ کرینے۔ بلوچستان ئٹ پاکستان نا بلوچ راج ئنا جتا زند نا بشخ آتیان تعلقدار مخلوق نا برخلاف پاش آ بیدادی ساندہ برجاء مسونے، ڈاکٹر لیاقت سنی نا برمتئی دزگیری داٹی اسہ پین ڈھکیہ ءُ ودکی ئسے۔
بیان ئٹ پاننگانے کہ پاکستان اسہ پوسکنو چم ئسے نا ردئٹ ڈاکٹر لیاقت سنی نا بیگواہی ءِ تاوان کن برمتئی نا دروشم تننگ نا کوشست کننگے کہ ریاست آ ہور ارفنگپ ولے لیاقت سنی ءِ دے پاش ئٹ ہرا وڑ اٹ مسہ گاڑی اٹ سوار بندغ آک برمتہ کرینو او وڑ تینٹ پاکستانی ایجنسی تا نشانی ءِ۔
بلوچستان ادبی فورم ہم اسہ چُنک بیان اسیٹی لیاقت سنی نا بیگواہی نا مذمت ءِ کریسہ بندغی حق آتا تنظیم تیان خواست کرینے کہ اوفک لیاقت سنی کن توار ارفر۔
یاتی مرے لیاقت سنی نا بیگواہی نا برخلاف اینو کوئٹہ پریس کلب نا مون آ بی ایس او نا پارہ غان برانز نا پڑو کننگانے۔
بلوچستان یونیورسٹی نا پروفیسر لیاقت سنی بیگواہ کننگا۔
رسینگوک حوال تا رد ئٹ بلوچستان یونیورسٹی نا مُسہ پروفیسر ڈاکٹر لیاقت سنی، شبیر شاہوانی و پروفیسر نظام شاہوانی بیگواہ کننگار، پروفیسر آتا گاڑی مستونگ نا ایب کیب نا علاقہ غلام پڑینز آن خننگانے۔
پولیس حوال تا رد ئٹ مُسٹ انگا پروفیسر آک بی اے نا برجاء امتحان تا اوننگ کن کوئٹہ آن خضدار آ ہننگ اسر، پولیس نا پاننگ ءِ بیگواہ پروفیسرز آتیان اِرٹ کانک نا علاقہ آن مون آ بسر۔ اسہ پروفیسر ڈاکٹر لیاقت سنی داسکان بیگواہ ءِ۔
یلہ مروکا پروفیسر آک داسکان ہچ حوال تیتنو، مالو ہم خوانندہ و اساتذہ آتا زوراکی نا بیگواہ کننگ نا ویل آک بلوچستان ٹی مسونو، اندن بھاز آ ویل آتا دوبہ پاکستانی فورسز و ڈھکوک اداروہ آتیا لگانے۔
لیاقت سنی بلوچستان یونیورسٹی ٹی براہوئی ڈیپارٹنمنٹ نا چیئرمین ءِ اندن او براہوئی زبان آ پٹ و پول نا رد اٹ چاہنگک، داکان بیدس او راہشون ادبی دیوان نا بنماسی بندغ آتیٹ حساب مریک، اندن او براہوئی ٹی پی ایچ ڈی کروک ءِ۔
بلوچ خوانندہ گل بی ایس او پجار پروفیسر آتا بیگواہ کننگ نا مذمت ءِ کننگ تون اوار پروفیسر لیاقت سنی نا دمدستی تون یلہ کننگا نا پارینے۔
بیان ٹی پاننگانے کہ تدوک وخت اٹ پروفیسر آتے ٹک کریسہ خلنگا و بھازا پروفیسر و خوانندہ تے بیگواہ کننگا، دا ہمو لڑ ءِ و یونیورسٹی نا استاد آتا بیگواہ کننگ تعلیم و بلوچستان دژمن کاریم ئسے۔
بیان ٹی پاننگانے اگا پروفیسر لیاقت سنی ءِ یلہ کننگتو گڑا نن خوانندہ گل آتیتون اوار حکومت نا زوراکی نا پالیسی تا برخلاف برانز کرون۔
ایلو پارہ غان لیاقت سنی نا بیگواہ کننگ آ راجی حوالکاری میڈیا غا مخلوق تینا اُست ہسونی و سوختئی نا درشانی کننگے۔ مخلوق لیاقت سنی ءِ یلہ کننگ نا ہیش ٹیگ چلیفنگ ءِ۔
فرانس ٹی ویلرلابیل نا علاقہ ئٹ پاکستانی ملاء ءِ مسیت لقمان ایچ ءِ فرانسیسی عدالت 18 توہ بندی نا سزا تسونے و فرانس ئٹ اونا پیہنگ آ تیوی زند ئنا پابندی ہم خلنگانے۔
ڈی ڈبلیو نا رپورٹ آتا رد ئٹ لقمان ایچ آ دوبہ ئس کہ او ٹک ٹاک آ 10، 9، و 25 ستمبر آ سوشل نیٹ ورک آ مسہ اندنو ویڈیو پوسٹ کرینے ہراٹی شدت پسندی خننگک۔ ملا غا دوبہ ءِ کہ چارلی ہیبڈو نا متکن آ دفتر نا پیشن چاخو حملہ آن پد ایپ آ تینا کلہو تے شینک کریس۔
جمعہ غا پنتواس نا عدالت نیم سال بندی و فرانسیسی علاقہ تیٹی پیہن آ پابندی نا سزا تسونے۔ پنتواس پیرس نا ایب کیب نا علاقہ ءِ، میڈیا رپورٹ اتا رد ئٹ لقمان ایچ سزا تے ایسر کننگ آن گڈ ملک آن کشنگو و اوڑان گڈ او ہچ فرانس نا سرزمین ئٹ گام تخنگ کپرو۔
عدالت نا صدر اسٹیفن بلٹ لقمان ایچ ءِ اسہ ڈوہدار پن کریسہ پارے کہ داسہ اودے تینا ڈیہہ پاکستان آ پدا رادہ کرور۔
بلوچستان نا دارالحکومت کوئٹہ نا علاقہ سیٹلائٹ ٹاؤن ٹی گیس سلنڈر تراک آن چُنا و نیاڑی تون اوار 3 بندغ ٹپی مسونو۔
ایدھی کوالخوا تا رد ئٹ سیٹلائٹ ٹاؤن نا علاقہ گول مسجد مردان کالونی ٹی اُراٹی گیس سلنڈر تراک آن مُسی ٹپی مسونے، ٹپی تیٹ 55 سال ئنا حاجی امین، 6 سال ئنا چُنا بی بی فاطمہ و امان اللہ پنی ءُ بندغ ئسے نا زائیفہ ہم اوار ءِ، ٹپی تے ہسپتال آسرکننگانو، پین کارروائی متعلقہ بند و بستی ادارہ کننگ ءِ۔
یاتی مرے بلوچستان نا دارالحکومت کوئٹہ و ایلو علاقہ آتیٹ برن سینٹرز ساڑی اف، ہرانا سوب آن گیس ہننگ آن ٹپی آ بندغ آک بیران مریسہ کیرا۔
یخ آتا بناء تون اوار بلوچستان نا جتا علاقہ آتیٹ گیس تراک و ایلو ویل آتیٹ ہر سال بھاز آ بندغ آک بیران مریرا۔
بلوچستان نا ضلع قلات ٹی پاکستانی فوج اینو صوب آن فوجی آپریشن نا بندات کرینے۔
احوال آتا ردئٹ شور پارود تون اوار خاران و نوشکی نا مشی آ علاقہ تیتون اوار ایب کیب ئٹ پاکستانی فوج آپریشن کننگے۔
علاقائی بندغ آتا پاننگ ءِ کہ پاکستان فوج نا بھلو کچ اس اڑتون اوار گمانی جاگہی ڈیتھ اسکواڈ آتا کارندہ غاک اندا علاقہ غاتیٹی خاننگانو۔
یاتی مرے بُنڈالو و اونا داپار ایپار نا علاقہ غاتیٹی پاکستانی فوج نا جاگہی مننگ نا احوال آک اریر۔
آپریشن آن دائسکان ہچو جانی و مالی نسخان نا احوال اف ولے گدرینگوک آ وخت آتیٹی اندا علاقہ تیٹی فوجی آپریشن آتا سوب آن جانی نسخان آتون اوار امو علاقہ غاتا باتی تا اُراتے اشنگ نا تدینی مسونے۔
بلوچستان نا ضلع چاغی نا علاقہ تحصیل نوکنڈی ہراکہ چِل ہزار آباتی آ تالان ءِ، دائسکان بنماسی آسراتی نا نیستی ءِ، سیندک پروجیکٹ نا شار آتیان بیدس 30 آن زیات چنکو بھلو خلق تحصیل نوکنڈی ٹی اوار ءُ ریکوڈک، سیندک پروجیکٹ چکندک پروجیکٹ آن بیدس بیست آ ہندی مائنز آک تدوکا چِل سال آن داڑے کاریم کریسہ بھلو زَر اس دوئی کننگو۔
نوکنڈی نا اسٹ آ ٹی ایچ کیو ہرادے زو تیٹ کاغذ آتیٹ آر ایچ سی آن ٹی ایچ کیو نا ہند تننگانے ولے حالیت ہمو مالو نا ءِ ہچ ءُ دیمروی یا بدلی اس خننگپک ایٹی تا۔ اندن ہسپتال ٹی بیرہ اسہ ڈسپینسر اِرا ایل ایچ ویز تون اوار مُسہ فور کلاس نا کارندہ ساڑی مریرا، دارو سی سال مالو نا آباتی نا کچ آن تننگسہ ءِ، ایکسرے و ایلو المی ٹیسٹ نا آسراتی اسکان اف، ایمرجنسی وارڈ غیرسرکاری تنظیم نا کنڈان جوڑ مسونے، ولے اوٹی الیکٹریکل بیڈ آن بیدس پین ہچ ءُ آسراتی اف و ہچ ءُ کاریم کروک تخنگتنے۔
علاقائی مخلوق نا رد ئٹ دائسکان چنا زالبول سینٹر مفرنگ نا سوب آن منہ دے مالو اسہ زالبول ئس کذیت کریسس و ہسپتال ٹی رینگوک آ کوارٹرآک ہم بد حالیت ئٹ ءُ مخلوق کوالخواہ تیان خواست کرینے کہ ٹی ایچ کیو ٹی نرینہ زالبول ڈاکٹر تخیسہ آسراتیک تننگر۔
جہان نا پنی آ فٹ بال گوازی گر ڈیاگو میرا ڈونا است ئنا دورہ نا سوب آن کذیت کرے۔ اونا وکیل ام اونا بیران مننگے پک کرے ۔
حوال تا ردئٹ ڈیاگو میرا ڈونا نا وکیل پارینے کہ منہ وخت مست اونا دماغ نا سرجری کننگا ہرا سرسوب مس ڈاکٹر آتا پارہ غان اودے ہسپتال آن ام کشنگ نا موکل تننگا ولے ناگتہ است ئنا دورہ نا سوب آن کذیت کرے۔
یاتی مرے ڈیاگو میرا ڈونا 30 اکتوبر 1960 ٹی ودی مسونے۔ ارجنٹائن آن تعلق تخوکا میرا ڈونا تینا جواننگا گوازی نا سوب آن بیستمیکو کرن نا فیفا پلئیر آف دی ایوارڈ اودے 2 وار رسینگانے۔ اونا کماشی ٹی 1986 ٹی ارجنٹائن فیفا ورلڈ کپ ام کٹانے ۔ اندن فٹ بال نا گوازی پن کٹسٹ کئی ایوارڈ آتے تینا پن آ کرسٹ 60 سال عمر اٹ او کذیت کرے ۔
بلوچستان نا علاقہ بولان و کوئٹہ ٹی سُم کاری نا ویل آتیٹ اسہ بندغ اس بیران و اسٹ ٹپی مسونے۔
بلوچستان نا دارالحکومت کوئٹہ نا علاقہ چشمہ اچوزئی ٹی سلاء بند بندغ اسینا سُم کاری آن اسہ بندغ اس ٹپی مسونے۔
ایدھی نا حوال تا رد ئٹ کوئٹہ نا علاقہ چشمہ اچوزئی ٹی سلاء بند بندغ ئس سُم کاری کریسہ لعل محمد نا مار نثار احمد ءِ ٹپی کرینے، و ٹپی ہسپتال آ سرکننگانے، پین کارروائی متعلقہ بند و بست ادارہ کننگ ءِ۔
اندن پین حوال ئسے نا ردئٹ بلوچستان نا ضلع بولان کچھی نا تحصیل بھاگ ٹی سلاء بند بندغ آتا سُم کاری آن اسہ بندغ اس بیران مسونے۔
حوال تا رد ئٹ ضلع بولان کچھی نا علاقہ تحصیل بھاگ نا ایریا گوٹھ بڈا ٹی سلاء بند بندغ آتا سُم کاری آن نصراللہ بیران مسونے، سُم کاری ءِ مالو نا دوژمنی نا سوب پاننگسہ ءِ۔
“گودی”
مَشتیٹی ئے گدان گودی نا
میڷ تتو نے شوان گودینا
راج اونا اوڑ تون زیب دار
قصّہ ئے دا بیان گودی نا
غلہ غاتے پِڑا شُپِک او
کھونٹ سے مونہ غا ٹھپِک او
ہُر زَہے خل تیان جُپِک او
پُھرّ ئے نُسخل نُتان گودی نا
کاٹم ئے تینا او رندنگے
کِنئڑو تیل وا خلنگے
مون ہُروکٹ تینے ہُننگے
انت پاو بڑزے شان گودی نا
گودی نا کُٹ ئٹی مارسے
لولی تیک لیلڑے وارسے
مار کنا بخت و استارسے
نی مروس اُست خان گودی نا
شتکنگا قد ئتو کاٹھی تہ
گوئن ئنا گونجک ئس باٹی تہ
خاسُن ایت خسّی ئس شا ٹی تہ
لوتھ پُھر چِکّھہ غان گودی نا
چمّڑی تان ایتے کُنیو
بے مزّہ بائے سورمبو کیو
نیک دعا لُما جیجا نے تیو
خلقت ئے مہروان گودی نا
او کشیدہ کچی دوچ کیک
شِیتُلہ میڑِک او موچ کیک
شیر زال راج ئکن سوچ کیک
پین پِن ئٹ انت پان گودی نا
جھمراتا عجب موسُم ئے
رنگ رنگی خنوس بلسُم ئے
دامون ہیمون دشت خولم ئے
کُھٹِپک زُو نِکان گودی نا
انور بلسم
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
