جہانی ادارہ جانجوڑی خیالدار کرینے کہ کرونا وائرس ایسر مروک اف و جہان ءِ دا دَین تون زند گدریفنگ ہیل کروئی مرو۔

تیوی جہان ئٹ کرونا وائرس آن مسہ لکھ آن زیات بندغ کسکنو و دین ءِ توننگ ئٹ سرسوب مروکا بھاز آ ملک آک لاک ڈاؤن و ایلو پابندی تیٹ کمبوتی نا پارہ غا ہننگو۔ واہم چاہندار آک برجاء خیالدار کننگو کہ دن کننگان دین نا ترندی زیات مننگ کیک۔

جہانی ادارہ جانجوڑی ہم کرونا وائرس نا تالانی ءِ خُلیفوک گوْندانے۔ ادارہ نا سخت آ حالیت آتا ڈائریکٹر مائیکل ریان چار شمبے آ جنیوا ئٹ ورچوئل پریس کانفرنس کریسہ پارے کہ کرونا وائرس بندغی ئٹ ہندی مسونے و داسہ کس پاننگ کپک کہ دا ہراتم اسکان توننگ مرو۔

او پارے کہ جہان آن دائسکان ایچ آئی وی ایسر متو و داسہ اوکرونا وائرس نا دروشم اٹ اسہ دین مون تروئی تمنگ ءِ ہرا زوت ایسر مفرو۔ ریان مُستی پارے کہ جہانی خلقت کن دا گچین ءُ وخت ئسے کہ کرونا وائرس نا ویکسین نا ٹہیفنگ کن کمک نا پٹ و پول کیر‘و دا نا ٹہیفنگ آن گڈ دانا سر کننگ ءِ پک مرے۔

جہانی ادارہ جانجوڑی نا سرکماش ٹیڈروس گیبریاسس نا ہم پاننگے کہ جہان نا زیات ملک کرونا وائرس ءِ توننگ کن جتا گام ارفنگ ءُ۔ واہم ادارہ نا پنت برجاء ڈول اندادے کہ اخس زیات مننگ کیک دانا تالانی ءِ توننگ کن گام ارفنگے۔

تدوکا سال نا ایسری آ چین نا شار ووہان آن ودی مروک کرونا وائرس تیوی جہان ءِ دا وخت اسکان پلویڑ ئٹ ہلکنے و تیوہ غاتیان زیات زیمی ملک امریکہ ءِ ہراڑے ہشتاد ہزار آن زیات بندغ کسفکنو۔

دین نا جانجوڑی کن امریکہ و برطانیہ تون اوار ایلو ملک آتیٹ ویکسین نا ٹہیفنگ آ کاریم برجاء ءِ۔ دین نا تالانی ءِ توننگ کن جاگس لاک ڈاؤن ءِ گڑا جاگس شار آتیٹ اُرا تیٹی مننگ نا پنت تننگسہ ءُ۔

چین تون اوار یورپ نا منہ ملک آتیٹ زندنا کاریم تے اسیکہ وا بناء کننگانے ولے شاری تے خیالداری کننگ نا پنت تننگانے۔

بلوچستان نا زر وزیر ظہور بلیدی ہم کورونا نا گواچی مس۔

راجی حوالکاری نا سائٹ آ بلوچستان نا زر وزیر میر ظہور بلیدی تینا کورونا وائرس آن زیمی مننگ نا حوال ءِ تس۔

I’m grateful to all friends, well-wishers & supporters who prayed for my early recovery after my Covid-19 test came +ve. I’m in self-quarantine as per doctors guidelines. Alhamdulillah, asymptomatic and recovering. Thanks to all.

— Zahoor Buledi (@ZahoorBuledi) May 13, 2020

ظہور بلیدی نا پاننگ ئس کہ اونا کورونا ٹیسٹ مثبت بسونے، ہراڑا او تینے اُراٹی رکھ کرینے۔

صوبائی وزیر ٹوئٹ کریسہ پارے کہ ای تینا تیوی سنگت و خیر خواہ تا منتوار اٹ ہرافک کورونا وائرس نا مثبت بننگ آن گڈ کنا زوت جانجوڑی کن دعا کریر۔

او پارے کہ ڈاکٹر آتا صلہ آن گڈ ای تینے اُراتی جتا رکھ کرینٹ۔

یاتی مرے صوبائی وزیر آتیٹ ظہور بلیدی اولیکو وزیر ءِ ہراٹی کورونا وائرس پک مسونے۔

منگچر نا علاقہ گرانی نا زمیندارک عبدالسلام محمد شہی، عبدالغفور لاشاری، محمد رحیم نیچاری و ایلوک حوالکار آتیتون ہیت کریسہ پاریر کہ گرانی و اونا داپار ایپار نا علاقہ غاتیٹی ملخ آتا جلہو نا سوب آن باغاک بُھس مننگو۔ علاقہ نا زمیندارک بھاز فریشان ءُ۔ اگہ ملخ آتا ایسر کننگ کن ہچو گام اس ارفنگتو گڑا علاقہ نا غُٹ باغ و کشت کشار بُھس مریرہ۔

مون مستی پاریر کہ ملخ آتا جلہو انداخس ترندے کہ او درخت آتے ہم نسخان تننگو۔ داڑکن زوت آن زوت گام اس ارفوئی تمک۔ اگاں ہچس کتور گُڑا علاقہ نا تیار انگا کشت کشار و باغاک نیست مرور، زمیندارک تینا باخو کن ہم سرگڑدان مرور۔

علاقہ نا زمیندار آک ضلعی انتظامیہ و زمینداری تون تفوک محکمہ آن خواست کریسہ پاریر کہ گرانی و داپار ایپار نا علاقہ غاتیٹی ملخ آتا ایسر کننگ کن بھلا بھلا مشِن و جہاز آتا کمک اٹ اسپرے کیر کہ علاقہ والاتا سال آتا خواری پوک مف و باغ آتے بُھس مننگ آن بچفنگ مرے۔

بلوچستان نا نجی اسکول خواجہ غاک تعلیم ادارہ تے 15 جولائی اسکان بند کننگ نا فیصلہ آن چپ کوئٹہ ٹی احتجاج کریر و تیوی اسکول آتے زو ملنگ نا خواست کریر۔

نجی اسکول خواجہ غاک پریس کلب کوئٹہ آن ریلی کشیسہ سر وزیر بلوچستان نا ماڑی اسکان ہننگ و ہموڑے اسکول تا کلیت آتے مُچ کننگ نا کوشست کریر ولے پولیس اوفتے مونی ہننگ آن تورے۔

ریلی ٹی بشخ ہلوکاک عدالت روڈ آ برانز کریر و نعرہ خلکر۔ برانزی تا پاننگ ئس کہ 15 جولائی اسکان تعلیمی ادارہ تے بند کننگ نا فیصلہ آن کُل آن زیات بلوچستان نا یخ آ علاقہ غاک زیمی مننگ ءُ ہراڑے تدوکا 6 تو آن تعلیمی ادارہ آک بند تمانو۔

بشخ ہلوکاک پاریر کہ داسا اوفتے اسکول بلڈنگ تا کرایہ و استاد آتا تنخوا تے تننگ نا ہم وئس اف، حکومت نجی اسکول آتے تینٹ سمبالے۔

برانزی تا پاننگ ئس کہ ننا خواست آتے اگاں منتوس گڑا ایلو وار مُچ آ صوبہ نا ڈپٹی کمشنر دفتر آتیٹ نجی اسکول تا کلیت آتے ڈپٹی کمشنر دفتر آتیٹ مُچ کرون۔

خضدار لیویز نا سرسوب آ کارروائی، بھلو کچ اسیٹی منشیات کوزہ ٹی ہلنگا۔ کاروائی ئٹ مُسہ مننگ کروک ڈودار دزگیر۔

اسسٹنٹ کمشنر خضدار عبدالمجید سرپرہ پریس کانفرنس ٹی پارے کہ کوئٹہ کراچی روڈ آ لیویز چیک پوسٹ زاوہ آ نائب تحصیلدار حبیب گچکی، لیویز انچارچ زاوہ چیک پوسٹ عبدالمالک و ایلو کارندہ آک شک ئنا زی آ اسہ کار ئسے توریر، پٹ و پول نا وختا گاڑی نا ڈھکوکا کنڈ آتیان 100 کلو گرام گچین کوالٹی نا چرس کشنگا۔

اونا پاننگے کہ مننگ کروک مسہ ڈودار و کاریم ٹی ہتوکا گاڑی ءِ ہم کوزہ ٹی ہلنگانے۔ دزگیر مروک مننگ کروک ڈودار محمد خان، شیرباز و محمد حسین آن سر و سوج نا بناء کننگانے۔

اے سی خضدار نا پاننگے کہ بنائی سر و سوج نا رد ئٹ ڈودار نشہ تے کوئٹہ آن کراچی و کراچی آن سمندری کسر تیان پیشن ملک آتیا رادہ کروئی ئس، ہراڑے دا نشہ تا قیمت ءِ کروڑ آتیٹ پارہ۔ ہرافتے خضدار لیویز سہی وختا کارروائی کرے و بے سوب کرے۔

ڈپٹی کمشنر خضدار ڈاکٹر طفیل بلوچ نا پارہ غان لیویز چیک پوسٹ زاوہ نا انچارچ و کارندہ غاتے برجاہ نشہ نا خلاف بھلو کچ اسیٹ کارروائی تیا سفتی سند تننگا۔

چمشانک
ناول – راجہ گدھ

نوشت: غنی بلوچ

دی بلوچستان پوسٹ

اگہ نن اردو ادب ٹی شاہکار یا بھلا تخلیق آتا زیہا ہیت کین و خاص کر ناول آتا بارہ ٹی ۔ گڑا گڑاس اندنو ناول ءُ ہرا اردو ٹی بھلو تخلیق یعنی شاہکار پاننگرہ۔

دُنکہ قرتہ العین حیدر نا ’’آگ کا دریا “، عبداللہ حسین نا ’’اداس نسلیں“، مرزا اطہر بیگ نا ’’غلام باغ “، بانو قدسیہ نا ’’راجہ گدھ “۔ دا چار ناول امو ناول آکو ہرا اردو ادب ٹی غٹ آن بھلا تخلیق پاننگرہ۔ ولے داڑے نن ہیت کینہ بانو قدسیہ نا ناول ’’راجہ گدھ “ نا بابت ئٹ۔

دا ناول ءِ بلکن 1980ء ٹی بانو قدسیہ نوشتہ کرینے۔ دا ناول ٹی بنداوی بحث چاگرد نا ویل آک، تپئی چک تاڑ آتا بارہ ٹی ءِ۔ دا ناول ٹی گچین انگا کڑدارک سیمی شاہ اونا ہم جماعت قیوم ءُ۔

ننا چاگرد ٹی اسے ویل اس بھلا تپہ یعنی ’’اپر کلاس“ و او شیفکو تپہ یعنی ’’لوئر کلاس‘‘ نا ءِ۔

سیمی شاہ؟
( “ وہ گلبرگی معاشرے کی پیداوار تھی “ ناول آن اقتباس )

قیوم؟ خلق سے آن بروکا شیفکو تپہ یعنی لوئر کلاس آن تعلق تخاکہ۔

آفتاب؟
( “امریکی فلموں کا آہستہ آہستہ چڑھتا سورج۔۔۔۔ موسیقی اور لے کے ساتھ ۔۔۔۔ روشن کرتا ہوا۔۔۔۔ گرمی پھیلاتا ہوا۔۔۔۔ اس سکس ملین ڈالر مین نے بھاری آواز میں کہا میرا نام آفتاب ہے“۔ ناول آن اقتباس )

یعنی آفتاب ہم بھلا تپہ غان تعلق تخاکہ۔

سیمی شاہ گلبرک نا رہینگوک، ہراڑے مادیت پرستی تینا تیوی زور ٹی ءِ۔ او ہرا گڑا نا است خواہی تخر اونا ہلنگ بھاز ہڑزان ءِ۔ اگہ کبین ارے تو او ذہنی ایشکامی ءِ۔ سیمی شاہ ہراڑکن کلاس ٹی ہر مار تون مخنگ، ہیت کننگ ہچو ویل اس اف۔ اندن سیمی شاہ ءِ تینا کلاس نا مار آفتاب تون عشق مریک۔ او ہم عشق لا حاصل۔۔۔۔۔

آفتاب ہرا کہ تینا ذات خود فریبی ٹی ءِ۔ ہرا مدامی تینکن آسرات ءُ کسر پٹک یا پٹننگ نا کوشست کیک۔ آفتاب مدامی اندا سرپد مریک کہ کنا نیام ٹی ہر فیصلہ مالو آن مسونے۔ اندا سوب آن کنتون ہر ہمو گڑا یا ویل مریک ہرانا فیصلہ مالو آن مسونے۔

دا ناول چاگرد نا تپئی ویل آتون اوار نفسیاتی ویل آتا ہم ءِ کیک ۔ اندن کہ چاگرد ٹی اسے نفسیاتی ویل اس وت کشی نا ءِ۔

( “ پھر سیمی شاہ اٹھی اور بولی۔۔۔ سر آپ کا کیا خیال ہے کہ اگر معاشرہ آئیڈیل ہو تو پھر کیا کوئی فرد کبھی خود کشی کر سکتا ہے “۔ ناول آن اقتباس )

انداٹی اسے شرہ اس چاگرد ئٹ تینے تینٹ کسفنگ یعنی وت کشی نا بابت بش مریک۔ ایسر ٹی ہیت داڑے سر مریک کہ وت کشی چاگرد ٹی اسے ویل ئسے نا گڈیکو ورندی ءِ۔ گواچن آ سوب ابدال مننگ ءِ۔ ابدال بے آسودہ آ است خواہی تا سوب آن مریک۔ ہرا مثبت ہم مننگ کیک، منفی ہم مننگ کیک۔ 

ناول نا بنا ٹی اسے کڑدار اس پروفیسر سہیل ہم ارے۔ ہرا روایتی بندغ ئسے نا مننگ نا جاگہ غا کتاب آتا شونک تخیسہ ہم  تینا تہہ ئنا اَنا ءِ زندہ تخانے۔ حلال و حرام نا تھیوری تروکا پروفیسر سہیل بنداوی وڑٹ حرام ءِ ہم دیوانگی نا سوب پائک۔

قیوم!
گدھ جاتی یعنی ڈھونڈ خور ذات نا ہمو انسان ہرا بُنداوی وڑٹ اسے گڑاسیکن ہم اولیکو گام ءِ ارفپک او مدامی ہر ہمو گڑا نا پاراغا کائک ہرا اوڑا حرام کننگانے اندا گڑا قیوم تون سیمی شاہ نا معاملہ ٹی ہم مریک۔ ہرا وختا کہ سیمی شاہ کذیت کیک۔ انداکان قیوم نا اسے پین پوسکنو دورئس بناء مریک۔ 

اردو ٹی پارہ ’’وہیں پر پہنچا جہاں کا خمیر تھا“ اندا نا ڈول قیوم نا اوڑدئی عابدہ تون مریک۔ قیوم ہرا بے سوبی عشق نا سوب آن حرام نا پٹ و پول ٹی سرگردان ء، اسے وار پدی قیوم نا زند ٹی ’’امتل‘‘ بریک۔ روح نا حرام کنوکائے حرام رزق کنوک اس رسینگک ولے امتل و قیوم ٹی دا گڑا اسہ وڑ ءِ کہ ہرتوماک حرام کننگ آ بھلن مسونو۔ قیوم حرام کنوکا ہمو ڈھونڈخور کہ امتل ہم اونا سنگتی آ پورو بتو ایسر ٹی اونا ہم خون مریک۔

اندن راجہ گدھ یعنی قیوم برام نا است خواہی کیک ولے حرام کنوکائے اوڑے ہم ہمو ورندی رسینگک ہرا بناء آن رسینگسٹ برسہ ءِ۔ برام حلال ءُ گڑاس ءِ دانا حرام تون اواری مننگ کپک۔

 دا ناول ٹی بانو قدسیہ پاش آ بندغ آتا کڑدار آتا زیہا شرہ کرینے ولے بندغ آتا جاگہ غا چُک آتا جہان نا کُمک ہلیک۔

 چکاک ہرا ڈھونڈ خور نا ابدالی ءِ اونا حرام کُننگ نا سوب سرپد مریسہ ڈھونڈ خور ءِ بندغ گوندرہ۔ چُکاک ڈھونڈ خور ءِ جنگل آن اندا سوب آن کشنگ خوارہ کہ ڈھونڈ خور نا کُننگ نا عمل گواچنی خواری اس اف بلکن خواری آن مُر نریسہ رزق ہلنگ نا ہمو آسرات آ کسر ءِ ہرا حرام نا پارہ غا دیک، ہرادے ڈھونڈ خور ہم انسان آن ارفینے۔ گڑا دُن ڈھونڈ خور ءِ جنگل آن کشوئی ءِ کہ اونا سوب آن ایلو چکاک ہم ابدال مریرہ و حرام نا پارہ غا کارہ ۔