خاران نا اِرا جتا ہند آتیان اِرا جون خننگانو۔ شابیتی حوال تا ردئٹ اسہ جون اس کلی کشمیر آن خننگا اندن ارٹمیکو جون گواش روڈ، سوربڈو نا علاقہ غان خننگانے۔

کلی کشمیر آن رسینگوک جون ئنا چاہنداری داد محمد نا مار حفیظ ہند گزی ضلع خاران نا پِن ئٹ مسنے۔ حوالکار تا ردئٹ حفیظ اللہ 26 اپریل آن بیگواہ ئس۔ اودے کسفسہ جون ءِ بوری اسیٹی بند کریسہ خولم نا ملک آتیٹی خسنگاسس۔ پولیس حفیظ اللہ نا بیگواہ مننگ نا مقدمہ ٹی جون ئنا خننگ آن مُست پنچ بندغ دزگیر کریسہ سر و سوج بنا کریسس ہرا دا وخت پولیس نا دزگیر ئٹی ءُ۔

ارٹمیکو جون گواش روڈ، سوربڈو نا علاقہ غان رسینگانے، ہرا نا دائسکان چاہنداری مننگ کتنے۔ حوالکار تا ردئٹ جون ئتون گمانی وڑئٹ مُسہ رنگی ءُ اسہ بیرک اس ہم تخنگاسس و پِن کروک بندغ ءِ سُم خلیسہ کسفنگاسس۔

پولیس ہڑتوم آ تدینی تا پٹ و پول کننگ ءِ، اندن دا تدینی تیا السی کڑدہ تیٹ بھاز خُلیس خننگک۔

بلوچستان نا ضلع پنجگور ئٹ پاکستانی لشکر نا دو تیان بیگواہ مروک اسہ بندغ ئسے نا جون بیابان ئسے آن خننگانے۔

کسفنگوک بندغ نا چاہنداری حسن جان ولد یار محمد ہند سریکوران پنجگور نا پن ئٹ مسونے۔

احوالکار آتا رد ئٹ حسن جان ہرا لیویز نا ملازم ئسے اودے 29 اپریل آ پنجگور نا علاقہ چتکان بازار آن پاکستانی لشکر دزگیر کریسس، ہراڑان گڈ او بیگواہ مسوسس۔ پدان او نا جون بیابان ءُ ہند ئسے آن بٹوک خننگا۔

بلوچستان ئٹ بیدس عدالت کسفنگ نا دا اولیکو تدینی اف۔ تدوک وخت ئٹ ہم ہزار آ بندغ تے دزگیری نا وخت بیگواہ کننگ آن گڈ کسفنگانے۔ دا تدینی تا برخلاف بلوچ راج دوست و بندغی حق آتا ادارہ آتا باسک آک تدوک اِرا دہائی آن برانز کریسہ ءُ۔

ڈنک تدینی ئٹ جون آتے وے تننگی نا برخلاف (ڈی بلوچ) جدگال ڈن آ برانز، اُلس روڈ ءِ بند کرے۔

ڈنک تدینی ئٹ بیران نبیل ھوت، عمر زکا اللّٰہ و فیروز نا جون آتے خاہوت آتا دوٹی وے تننگی نا برخلاف اوفتا خاہوت و علاقہ نا بندغ آک (ڈی بلوچ) جدگال ڈن آ ایم ایٹ بھلا کسر ءِ بند کرینو۔

برانزی تا پاننگ ءِ کہ مُسہ دے گدرینگ آن گڈ ہم جون آتے اوفتا دوٹی تننگ افس ہرا دا باسنی ئٹ خراب ہم مننگ کیرہ۔

او پاریر کہ نن کیہی وار بست و بند و فورسز آن جون آتے تننگ نا خواست ءِ کرین ولے اسہ سوب ئسے آن بیدس ننا ہیت ءِ بنیسہ افس۔

استو دو بجہ نا وخت پنجگور نا علاقہ خدابادان ٹی ترند تراک و سم کاری تا توار بِننگا ۔

ہندی ذرائع نا ردئٹ دا جلہو سرکاری مخ تف سلہہ بند ٹولی نا فرحان نا ہند آ کننگا ۔

ذرائع نا پاننگ ئس کہ جلہو نا وخت علاقہ ٹی کیہی تراک آتیان گڈ سم کاری نا لڑ بھلو وخت ئسے اسکان برجاء مس ۔

ذرائع نا ردئٹ دا جلہو ٹی جانی نسخان آتا احوال ارے، واہم سرکاری کوالخواہ نا پارہ غان دا بابت ئٹ دائسکان ہچو پک ئس متنے  ۔

عمل اف بس نـَنُن گفتارٹی بہلُن
ارین ئک مے نـَنُن دستارٹی بہلُن

امر ای نی اسٹ پا دُن مرین یار؟
نُما کڑدے نَـنُن شلوارٹی بہلُن

ہشانُس زندسے تینا ہنانُس نی
ننے ہر نی نـنُن کوکارٹی بہلُن

وشے لاڈے لڈے تیٹی ننا غمکو
ننا خوآشی ارے ہر وارٹی بہلُن

ارے دا عاجزی نا مُچ کسر دیدہ
مرے بیرک نُما دا شارٹی بہلُن

امو آسمانٹی کہ دڈدسے گوہا
امو نا مہرسے دا خارٹی بہلُن

خَنِک خَنتے چُنک خیصارٹی وختس
پَٹِک اُستے ننا خُضدارٹی بہلن

سَلو مونا بَرو گر کہ ہَتو لالے
سِلاتے دا اسُل بٹپیس جارٹی بہلن

خدا یا لشکرے زندہ تخس ہر دم
ننا دا ڈیھ ئنا کوچہ تلارٹی بہلُن

بجار بلوچ

بلوچستان نا ضلع نوشکی ئٹ اسہ تیل دروک گاڑی اسیٹی ناگمان خاخر بش مس، خاخر لگنگ نا حوال رسینگ تون فائر برگیڈ نا کاریمیک جاگہ غا سر مسور و خاخر ءِ کسفنگ نا کوشست آتے بناء کریر۔ اندا نیام ئٹ بھلو کچ اسیٹ لس شاریک ہم ٹرک ئنا خڑک مُچ مسور۔

ریسکیو احوال کار آتا رد ئٹ خاخر ءِ کسفنگ نا وخت اسہ ترند ءُ تراک اس مس۔ تراک نا سوب فائر برگیڈ نا کاریمی و 25 آن زیات شاری پُتک ہلیسہ ٹپی مسور۔

ٹپی تے بنائی جانجوڑی کمک کن سول اسپتال نوشکی آ سر کننگا۔ اسپتال ئٹ ایمرجنسی خلنگانے و ٹپی تے پین علاج کن کوئٹہ غا سر کننگ نا تیاریک برجاء ءُ۔

ہندی حوالکار آتا رد ئٹ ایمبولینس آتا کمبوتی نا سوب مریض آتے سر کننگ ئٹ سختی تون مون تس ءِ، اندنکہ علاقہ و رضاکار آک تینا کمک تینٹ نا ردئٹ کاریم تیٹ گھٹ ءُ۔

بلوچ یکجہتی کمیٹی نا راہشون ڈاکٹر ماہ رنگ بلوچ، بنجاہی راہشون بیبرگ بلوچ، بیبو بلوچ و شاہ جی صبغت اللہ بلوچ تدوک پنچ دے آن بین برانز آ تولوک ئسور۔ بین برانز نا سوب اوفتا طبیعت آک ترندی ئٹ خراب مریسہ ئسور، اندنکہ اسہ توہ ئسے آن زیات وخت جیل ئٹ گدارینگ نا سوب آن اوفتا جانجوڑی مالو آن زیمی مروک ئس۔ اسہ رنگ بینگنی و ترند باسنی نا سوب اوفتا حالیت پین خراب مسوسس۔

بی وائی سی نا رد ئٹ بین برانز ءِ ایسر کننگ کن بلوچ چاگڑد نا جتا انگا تپہ فکر آن تعلق تخوک آ بندغ آک اسہ رنگ بلوچ یکجہتی کمیٹی نا قیادت تون حوال ٹی ئسور و خواست کریسہ ئسور کہ اوفک تینا بین برانز ءِ ایسر کیر۔ اینو، بلوچ بیگواہ بندغ آتا خاہوت آک، سیاسی بندی تا خاہوت و بھلا وکیل آتا تالان اسہ بھلو ٹولی اس جیل ئنا دورہ ءِ کرے و بلوچ یکجہتی کمیٹی نا قیادت آن خواست کرے کہ “ریاست ءِ نما ساہ ئنا پرواہ اف، ولے نن نما زند ءِ دوست تخنہ؛ گڑا ننا شرف ئٹ تینا بین برانز ءِ ایسر کبو۔”

جیل ئنا بست و بند بیرہ ڈاکٹر ماہ رنگ بلوچ، شاہ جی و بیبرگ بلوچ نا خاہوت و وکیل آتے اوڑدئی نا اجازت تس۔ اوڑدئی آن گڈ بلوچ یکجہتی کمیٹی نا قیادت زوراکی ئٹ بیگواہی آن زیمی خاہوت و وکیل آتا شرف ئٹ تینا بین برانز ءِ ایسر کننگ نا فیصلہ ءِ کریر۔

بلوچ یکجہتی کمیٹی نا ترجمان پارینے کہ تنظیم نا راہشون ڈاکٹر ماہ رنگ، بنجاہی راہشون شاہ جی صبغت اللہ، بیبرگ بلوچ، بیبو و گلزادی بلوچ نا جیل ئٹ بین برانز ءِ چار دے پورا مسونو۔ دا بین برانز نا نتیجہ ئٹ اوفتا صحت ترندی ئٹ خراب مریسہ ءِ۔

او پارے کہ بیبو بلوچ ءِ ہدہ جیل کوئٹہ غان پشین جیل آ دننگ و سی ٹی ڈی و پولیس کارندہ غاتا جیل ئنا تہٹی بریسہ ڈاکٹر ماہ رنگ، بیبو و گلزادی بلوچ آ بیدادی نا برخلاف ڈاکٹر ماہ رنگ، بیبو بلوچ، گلزادی بلوچ، شاہ جی و بیبرگ بلوچ بین برانز آ تولوک ءُ۔

ترجمان پارے کہ اینو ہرا وڑ ریاست پاکستان ننا راہشون آتون جیل ئٹ ظلم و زوراکی نا بد ءُ مثیال اس ٹہیفنگ ءِ۔ نن بحیثیت راج دا زوراکی نا کسہ ءِ تینا ملی تیٹ نشخ کریسہ اُن۔ نن نئے دا زوراکی ءِ گیرام کرون و نئے ہی ریاست پاکستان ءِ بشخون۔ اینو ریاست طاغت نا نشہ ئٹ مست آ ہُلی آن بار جیل ئٹ بلوچ زالبول آتے بیدادی نا گواچی کریسہ ءِ، و اوفتے اسہ رنگ خلیس نا گواچی کریسہ ءِ، ولے دا طاغت ساندہ ٹہیفوک اس اف۔ دا وڑ ئنا فاشسٹ و زوراک ریاست آتا مثیال جہان نا دیہاڑ ئٹ پاش ءِ۔ نن اینو دا ریاست ءِ پانہ کہ بلوچ راجی راہشون آتا جیل ئٹ مروک آ بدسلوکی و زوراکی نا بیر ءِ بلوچ راج تینا اشتماعی طاغت و اُلسی طاغت ئٹ ہلو۔ بلوچ راج دا زوراکی و تادی تے ہچبر ءُ دروشم سے ئٹ گیرام کروف۔

او پارے کہ نن بلوچ راج ئنا کل سیاسی و چاگڑدی ٹولی و تنظیم آتیان خواست کینہ کہ دا زوراکی نا برخلاف عملی وڑ ئٹ بلوچ یکجہتی کمیٹی تون اوار سلِر۔

بلوچستان نا ضلع ڈیرہ بگٹی نا تحصیل سوئی ئٹ سم کاری آن اسہ تدینی ئسے ئٹ اِرا بندغ بیران مسونو۔

ہندی بندغ آتا رد ئٹ وزیر اعلیٰ بلوچستان سرفراز بگٹی نا سلہہ بند ٹولی نا صمد ہمزانی پنی بندغ اس اینو سوئی نا علاقہ جانی بیڑی ئٹ ہندی بندغ نا ڈغار آ کوزہ کننگ نا کوشست کرے۔ اندا وخت سم کاری آن اِرا بندغ بیران مسور۔

ہرافتا چاہنداری میر ہوتکانی بگٹی و ضلا ہوتکانی بگٹی نا پن تیٹ مسونے۔ واہم تدینی تون تفوک ضلعی بست و بند ہچو ہیت اس مون آ ہتنے۔

بلوچستان نا علاقہ مستونگ، اسپلنجی ئٹ پاکستانی لشکر بھلو کچ اسے ئٹ مستی گام خلیسہ ءِ، اینو اِرٹمیکو دے علاقہ ئٹ آپریشن برجا ءِ۔

علاقائی حوالکار آک ٹی بی پی ءِ پاریر کہ اسپلنجی و ایب کیب ئٹ پاکستانی لشکر نا زمینی فوج مستی گام خلیسہ ءِ، فوج ءِ بکتر بند و ایلو فوجی گاڑی تا کمک دوئی ءِ۔

پن کروک علاقہ آتیان دائسکان اسہ وڑ ئسے نا دزگیری یا جانی نسخان آتا حوال آک رسینگ مننگ کتنو اندن کالخواہ دا بابت ئٹ ہچو ہیت اس مون آ ہتنے۔