بلوچستان نا ضلع بولان نا علاقہ ڈھاڈر ئٹ پولیس لائن ءِ نادرست بندغ آک ٹک کرینو۔
پولیس نا رد ئٹ نادرست جلہوکار آک یک شمبے و دوشمبے نا نیامیکو نن پولیس لائن آ ہینڈ گرنیڈ خسار و نرار۔
پولیس کالخواہ تا رد ئٹ جلہو ئٹ ہچو جانی نسخان رسینگتئو۔ واہم تراک نا سوب پولیس لائن ئٹ سلوک واٹر ٹینکر زیمی مسونے۔
تدینی نا سوب آک دائسکان سما تمنگ کتنو نئے کہ جلہو نا زمہ واری ءِ دائسکان کس اس منانے۔
25 اپرل 2025 آ نن ئنا سئے بجہ نا خڑک بلوچستان نا علاقہ تمپ بوستان ئٹ پاکستانی لشکر چھاپہ خلیسہ اِرا چنک سن مار تے زوراکی ئٹ بیگواہ کرے۔
بیگواہ مروک چنک سن مار تا چاہنداری شمیم ولد غفار سن 10 سال و عارف ولد رسول بخش سن 15 سال، نا پن تیٹ مسونے۔
ہندی بندغ آتا رد ئٹ پاکستانی لشکر خاہوت والاتے چھاپہ نا وخت بیدادی نا گواچی کرے و ترند تڑی تریسہ چناتے تینتون اوار درے۔
خاہوت والا تا پاننگ ءِ کہ اوفتے ترندی ئٹ چپ مننگ و کس اسیتون حوال نہ کننگ نا پنت ءِ تسور، ایلو دروشم تیٹ ترند نتیجہ آتون مون تس نا تڑی تننگا۔
خاہوت والاک خواست کرینو کہ برمتہ مروک آ چناتے دمدستی وڑ ئٹ یلہ کننگے۔
یاتی مرے کہ بلوچستان ئٹ دا وڑ ئنا تدینیک پوسکنو ہیت افس، داڑان مالو ہم کیہی چنا و پیر انگا پاکستانی لشکر نا دو تیان بیگواہ مسونو اندا زوراکی ئٹ بیگواہی تا برخلاف اسہ دہائی ئسے آن زیات وخت مریک برانز کریسہ ءِ۔
بلوچ چاگڑد و سیاسی تپہ غاک دا زوراکی نا بیگواہی تا برخلاف نئے بیرہ بلوچستان ئٹ بلکن اسلام آباد و ایلو شار تیٹ ہم اسہ رنگ برانز کریسہ بننگ ءُ۔
ہدہ جیل ئٹ بین برانز — ٹی بی پی سرگپ
مشکاف بولان ئٹ بلوچ لبریشن آرمی نا پارہ غان پاکستان ریلوے نا جعفر ایکسپریس ءِ کوزہ کننگ و فوج آ بھیم بش کروک جلہو تے توننگ ئٹ بے سہبی آن پد بلوچستان نا متنازعہ حکومت نا وزیر آک بلوچ یکجہتی کمیٹی نا راہشون تیا دوبہ خلکر کہ اوفک بلوچ آجوئی دوست آتا سیاسی دروشمک ءُ و اوفتے دزگیر کریسہ بلوچستان ئٹ ایمنی ہتنگو۔ واہم بلوچستان نا زمینی گواچنی تیان نابلد ریاستی مقتدر طاغت آتا رد پالیسی تا سوب آن بلوچستان نا حالیت آک جوان جوڑ مننگ نا جاگہ غا ہڑدے خرابی نا پارہ غا ہنیسہ ءُ۔
بلوچ یکجہتی کمیٹی نا راہشون تے 3MPO نا ردئٹ دزگیر مروک اسہ توہ ئسے آن زیات مسنے و جیل ئٹ محکمہ انسداد دہشتگردی و ریاستی ادارہ تا ناروا سلوک، بیدس عدالت گام آک و بیبو بلوچ آ بیدادی کریسہ بیدس قانود پشین جیل آ دننگ نا برخلاف بلوچ یکجہتی کمیٹی نا راہشونک ہدہ جیل ئٹ بین برانز کننگ ءُ۔
پاکستان نا مقتدر کڑدہ تا خڑک تکوک بلوچستان نا متنازعہ سروزیر نا گام آک بلوچستان نا حالیت آتا خرابی نا سوب جوڑ مننگ ءُ و متنازعہ حکومتی کوالخواک مزاحمتی سیاست تون تفوک راہشون تا برخلاف گواچنی تیان چپ ءُ بیانیہ جوڑ کننگ ئٹ اختہ ءُ۔ واہم ریاستی رکھ آتیان پد ہم ہزار آتا کچ ئٹ بلوچ راج ئنا تینا سیاسی راہشون تا آجوئی کن برانز کننگ اندا پاش کننگ ءِ کہ بلوچ الس ئٹ ریاستی بیانیہ ءِ جاگہ دوئی اف۔
بلوچ یکجہتی کمیٹی نا السی سیاسی تحریک ءِ دزگیریک، برانزی تا کسفنگ، بیدادی و جیل ئٹ ناروا سلوک ایسر کننگ ئٹ بے سہب مسنے و ریاستی تادی نا برخلاف بین برانز نا ذریعت ئٹ جیل ئٹی ہم او تینا مزاحمت ءِ برجاء تخانو۔ بلوچستان ئٹ سیاسی تحریک آتا دیہاڑ مسنے کہ اوفتے ریاستی تادی ئٹ ایسر کننگ متنے۔ سیاسی مزاحمت ظلم و تادی ئٹ وختی وڑئٹ نزور تو کننگ مریک، واہم السی سیاسی مزاحمت طاغت نا زور آ نہ مالو ایسر کننگ مسنے و نئے کہ داسہ ایسر کننگ مننگ کیک۔
بلوچستان نا ضلع کیچ ئنا تحصیل تمپ نا علاقہ بالیچاہ ئٹ پاکستانی لشکر چار شمبے و پنچ شمبے نا نیامیکو نن اسہ بندغ اسے زوراکی ئٹ بیگواہ کرے۔
بیگواہ مروک بندغ نا چاہنداری شوکت ولد ایوب نا پن ئٹ مسونے۔
23 اپریل نا نن کم و ود یانزدہ بجہ نا وخت پاکستانی لشکر شوکت ءِ اونا اُرا غان دزگیر کرے، ہراڑان گڈ او بیگواہ ءِ۔
ہندی حوالکار آتا پاننگ ءِ کہ شوکت تینا اُرا نا مون آ پکوڑا بہا کریسہ تینا خاہوت ءِ چلفسہ ئس۔ اودے بیگواہ مننگ ئٹ مُسہ دے گدرینگانو۔
بلوچ یکجہتی کمیٹی نا بنجاہی راہشون بیبرگ بلوچ حالیت بین برانز نا مسٹمیکو دے بھاز خراب مسنے۔ او تدوکا اسہ توہ ئسے آن زیات وخت آن دزگیر ئٹی ءِ۔ دزگیری آن مالو او مُست آن نت تیان منڈ ئس، و داسہ بین برانز نا سوب آن اونا طب بھاز خراب مسنے۔
اینو بیبرگ بلوچ تون اوڑدہی کروک خاہوت نا ردئٹ او بھاز ہائپوٹینشن (بلڈ پریشر ئٹ بھیم بش کروک حد اسکان کمبوتی) و وار وار بے سار مریسہ ءِ۔ اونا بدنی حالیت ترندی ئٹ خراب مننگ ءِ و اودے دمدستی جانجوڑی کمک و اسپتال آ دننگ نا گرج ءِ۔ داڑان پد ہم، پولیس کوالخواک اودے اسپتال آ دننگ آن نمن کننگ ءُ، ہرانا سوب آن اونا زند بھیم ئنا گواچی ءِ۔
اوفک پاریر کہ نن ریاست ءِ خبڑدار کینہ کہ بیبرگ بلوچ ءِ رسینگوک اسہ ہم جسمانی نسخان ئسے نا یا اونا زند ءِ بھیم نا گواچی کننگ نا غٹ ذمہ واریک ریاستی ادارہ تیا مرور۔
بلوچستان نا علاقہ مچھ و مستونگ ئٹ پاکستانی لشکر نا لشکر کشی برجاء ءِ، علاقہ آتیٹ گن شپ و ایلو ہیلی کاپٹر آتا ہن و بر برجاء ءِ و ڈرون طیارہ آک ہم بال کننگ آ خننگ مسنو۔
بولان نا علاقہ مچھ ئٹ گیشتری و ایب کیب ئٹ اینو مسٹمیکو دے لشکر کشی برجاء ءِ۔ پاکستانی لشکر نا بھلو کچ ئس علاقہ ئٹ سُر پُر ئٹ اختہ ءِ و جتا ہند آتیا ناکہ بندی کرسا ہن و بر نا کسر تے بند کرینے۔
ایلو کنڈ آن مستونگ نا علاقہ اسپلنجی، نا جتا علاقہ گونڈین،، سردار کمب، کنڈ، روشی تون اوار ایب کین ئنا علاقہ آتیٹ ہم لشکر کشی برجاء ءِ۔ لشکر کشی ٹی گن شپ ہیلی کاپٹر و ڈرون طیارہ غاک بشخ ہلنگ ءُ۔
دا لشکری کشی تیٹ دائسکان ہچ وڑ ئنا دزگیری یا جانی نسخان تا حوال رسینگتنے و کوالخواک ہم دا بارو ئٹ ہچو تران کتنو۔
بلوچستان نا ساحلی شار گوادر نا تحصیل پسنی ئٹ ورنا اس خودکشی کرینے۔
شابیتی حوال تا رد ئٹ پسنی وارڈ نمبر 2 ئٹ ورنا ظفر ولد اللّٰہ بخش تینا دو تیٹ تینا زند ءِ ایسر کرے۔
حوالکار آتا رد ئٹ خودکشی نا سوب آک سما تمنگ کتوس، یاتی مرے کہ بلوچستان ئٹ خودکشی نا تدینیک اسہ بد حالیت دروشم اس دوئی کرینو ہڑدے خودکشی نا تدینیک رپورٹ مریسہ کیرہ۔
بلوچستان ئٹ فورسز آتا پارہ غان زور شاغنگ، بلیک میلنگ و ایلو وڑ تیٹ ہراساں کننگ آن گڈ کیہی بندغ آک خودکشی نا تدینی تیٹ ہم رپورٹ مسونو۔
حسن بالاد زندگی گوری وتن
مس نے آ صدخہ ننا شاری وتن
ڈیھ تو گنڈوک رشتہ ئس احساس نا
زندگی ندر ۓ وفا کن تاس ئنا
بوچ زرہ ڈیھ ئنا رنگاک کل
مس دتر چٹکار کرے ولدانا پھل
باگل ئس پائل تے ٹی آھو خلے
عکس ئکے اونا خنوکس خن ملے
کوک کے چشمہ وفا نا پد سلے
خاخر ئٹ جلوہ ادا ئس ہِس مرے
کڑد ئنا بالاد داخس بڑز ارے
سوگوی ئٹ چلتن آتے پد بٹے
باغ ئسے ٹی فکر ئنا جوزہ ردا
مرگ ئنا ڈیھ کن ندارہ تے خنا
عشق ئنا ٹل آ دسے مہر آتا پھل
پین رنگ ئس ایس دتر تا مش نا ٹل
مسخت ئس جمار خنا خاخر تے ٹی
بیریفے زندے تخا انبر تے ٹی
شورہ غاتا لارہ ئٹ اف چہرہ ئس
ہِس کرے ذات ۓ وتن نا جلوہ ئس
تارمہ غا تٹ چراغ روشن تخا
مڑدہ غا روح تِٹ کرے قید زند اِنا
مرگ ئکے ہائے دنو چاری وتن
مس نے آ صدخہ ننا شاری وتن
میرو بلوچ
کوئٹہ نا کیب نا علاقہ مارگٹ ٹی جمعہ نا دے بمب ڈسپوزل اسکواڈ نا گاڑی نا خڑک مروک تراک نا سوب پاکستانی لشکر نا 5 کارندہ مرگ ئنا گواچی اندن 2 ٹپی مسونو ۔
سیکیورٹی ذرائع نا ردئٹ تراک ہمو وخت مس ہرا وخت بمب ڈسپوزل اسکواڈ ہڑدے نا ڈول کاروائی ٹی اختہ ئسر ۔ تراک آن گڈ علاقہ ءِ گھیرہ ٹی ہلنگا۔
مرگ ئنا گواچی مروک آتا چاہنداری صوبیدار شہزاد آمین، نائب صوبیدار عباس، سپاہی خلیل، سپاہی زاہد و سپاہی خرم سلیم نا پن آن مسونے ۔ ٹپی مروک آتیٹ لانس نائیک ظفر ق لانس نائیک فاروق اوار ءُ، ہرافتے زوت ئٹ اسپتال آ دننگا ۔
بلوچستان ٹی پاکستانی لشکر ءِ بلوچ آزاتی دوست سلہہ بند تنظیم آتا پارہ غان ہر وخت جلہو آتیٹ ٹک کریسہ ءُ مارگٹ و اونا ایب کیب ٹی ہنوکا وخت ئٹ ہم آزاتی دوست آک کاریم کننگو واہم دا تدینی نا زمہ واری ءِ دائسکان کس ارفتنے ۔
بلوچستان نا ضلع قلات نا علاقہ کپوتو ٹی کسر آ کڈ کروک بمب تراک نا سوب ٹی جمعیت علمائے اسلام ( ف ) نا راہشون مولانا عبداللہ نیچاری تون اوار چھار بندغ کسکر اندن پنچ بندغ بھاز ٹپی مسونو ۔
لیویز ذرائع نا ردئٹ تراک بنائی وڑ ئٹ کسر نا کرک آ کڈ کروک آئی ای ڈی نا زریعت ئٹ کروک معلوم مریک ۔
تراک ہمو وخت مس ہراتم زیمی بندغ آک گاڑی کپوتو نا ہند آن گدرینگ ئس ۔ تراک نا سوب گاڑی تیوہ وڑ ئٹ بھس مسونے ۔
کہوک آتیٹ اِرا زالبول و اسہ چُنا ئس ہم اوار ءِ ۔ غٹ ٹپی مروک آتے کمک کننگ کن ڈی ایچ کیو ہسپتال آ دننگانے ، ہراڑان اوفتا خلیس نا حالیت نا سوب اوفتے کوئٹہ غا ریفر کننگانے ۔
تدینی آن گڈ فورسز کارندہ غاک علاقہ ءِ گھیرہ کریسہ پٹ و پول نا بناء کرینے ۔
