افسانہ: ہیروفی چِرک
نوشتکار: محراب بلوچ
دی بلوچستان پوسٹ
ڈکالی آ ڈیہہ ئٹ چِلہ نا مد تینا شواہی دے تیٹی برجاء ئس۔ ڈغار مُچ، پنچ دریاب نا سورہ تیان اُشنگسہ ہتم تے موڑہ نا دروشم ئٹ بدل کرسہ باریفیسس۔ خروسی تا رند آتے بنجر تیان موسم تا روانی تُڑیفسہ ایسر کریسس۔ پٹ و گیابان آتے کیہی سال آتیان ہتمک بانکر التویسر۔ ڈیہہ ئنا ناوڑ تئے بالی چُک آتا رند آک الور، کل موسم تا رنگ اسٹ ئس، موسمی چُک آک ڈکال ئنا سوب دا ہند آن کوچ کریسر۔ مش تا نوان آتیٹ سیسو تا کوکار الو۔ ڈکال داخہ زیات ئس کہ جل تا چشمہ غاک بارن آ جوڑ تا وڑ خشک ئسر۔ آبشاری آ شک آتئے دیر ئنا نشان آک چاہنگ متورہ۔ ڈیہہ ئنا ساڑی آ پدریچ چلتن نا ٹُل آ جھمر تا خاچنگ نا ندارہ ءِ ہچ خنتویسس۔ پیر و کماش آک بوسال ئنا گند اکہ سکارہ۔ ڈکال نا دُو تیان باتیک کل نا امیت ئسر۔ ڈیہہ ئنا کل بزغرک، بوتارک دتر نا خڑینگ شولارہ۔ دا گواڑخی آ ڈغار تینا کل رنگ آتے گوہاسس۔ ڈغار ئنا شوخ آ ندارہ غاک کل بیشون ئسر۔ برجاء غا سال ئنا چِلہ نا ایسری ئس، ہتم نا مُد آن بیرہ گڑاس دے سلوک ئسر۔ سال آتا ڈکال ءِ خننگ آن گڈ باتی تا اُست آتیٹ ہتم نا پھل و گواڑخ تا دیدار ئنا امیت زندہ سلوک الو۔
ڈکال تون اوار پنچ دریاب نا تولہ تا پنجہ غاک ہم ننا ڈیہہ و ڈغار آ سخت ئسر۔ ڈیہہ نا باتیک غلامی نا زمزیر ئٹ اندن گؤفنگاسر کہ زند گدریفنگ نا دود آتے اُست آن دریسر۔ جند ئنا ڈغار باتی تیکن تین جوڑ ئس۔ باتیک تینا ڈیہہ ئٹ اندن زند گدریفنگ ئسر دنکہ اسہ گیڑ اسیٹی ساہدار آک ڈَک کننگر۔ شار ئنا ہر گلی ئٹ تولہ غاتہ چرخ و گُوس ئس۔ تولہ غاک انداخہ سریلہ ئسر کہ باتی تا اُرا تے آ جلہو کریرہ، او بیرہ باتی تا دتر تیان تینا ملاسی ءِ ٹمبہ کریرا۔ شار ئٹ اسہ ہم دنو اُرا اس الو کہ ہراڑان تولہ غاک تینا پوروی ءِ کپروسر۔ ہر اُرا زند ئنا خوشی تیان بے مراد کننگاسس۔ تولہ غاتا نت تا تراپہ باتی تا ملی تیٹ اندن جہی ئس کہ ہرا مزاحمت نا خیال ءِ ملی تیٹ ودی مننگ کن التوکہ۔ خلیس نا گواچی مروکا شار ئٹ ہرکس تینا اُرا نا ویل آ خڑینک خلککہ۔ کس تینا دوست، سیال آتا چکار ئٹ الو۔ چاگڑد اندن تار تار ئس کہ ہرکس اس ایلو آن اِربشی ئس۔ پَتن بال آک کل پنجرہ تیٹ بند ئسر، آسمان نا زی آ بومب و ڈونڈخور آتا بال آک ئسر۔ خلیس اندن زیات ئس کہ مزاحمت نا کوکار حق ئنا بانگ آتیٹ ہم الو۔ شار ئٹ چِکوکا تہو نا چِرک ئٹ دتر نا گند انداخس زیات ئس کہ ہرا زبادی آ گند ءِ تہو آن ایسر کریسس۔ باتی تیٹ بھلو نا اُمیتی اس تالان ئس۔
بے دود آ زند ئنا اندا روانی ئٹ چِلہ نا مرغن آ ننک برجاہ ئسر۔ طوبے، نن نا مسٹمیکو پاس ئٹ تینا خن تے پاش کریکہ۔ باتیک ہزار ویل و نا اُمیتی ئٹ تینا کاٹم ءِ خرین آ زند ئنا برجاء ءُ نن ئسے ایسر کننگ کن سرجہ غا تخاسر۔ ڈیہہ ئٹ بھلو چُپی اس تالان ئس، ہر نیمہ تہار ئٹ ڈب الوک ئس، رژن ئنا برانز آتا ہچ ڈس الو۔ نن نا مُسٹمیکو پاس ئنا ایسری ئس، گھڑی نا سیلہ غاک ساف اکن روان ئسر۔ ہر وخت آن بار چپی برجاء ئس، کہ انداڑتون مُچ ڈیہہ ئٹ تولہ غاتا بان آتئے حق ئنا گروک تما۔ دا گروک شمبلاخ ترسہ انداخہ بھلو روشنائیس کرے دنکہ شیرزال اس بش مرے، تینا دُو تیان غلامی نا بنگڑی تے پرغیسہ، تینا زند ئنا کل ارمان، مراد و خواہش آتے آجوئی نا اُمیت ئٹ ندر کے و تینا نازرک آ بالاد ءِ پختہ غا فکر ئتو بارود ئنا باریم اس تفے و تینے کربان کے۔ اندنو رژن اس ئس کہ ہرانا برانز آک حق ئنا لشکر نا کلہو ءِ باتی تا اُرا اُرا اسکان سر کریر۔ دا گروک ئنا توار مُچ ڈیہہ ئٹ حق ئنا اعلان ءِ کرے، ہراڑان گڈ ڈیہہ ئٹ سہب تما۔ ہمو دے ہچ آزان متو، بڑز والا شان تس کہ ہرا حق ءِ تپک او دا گمر ٹی مف کہ اونا بانگ آن پد ای جہان ئٹ روشنائی بشخیوہ۔
زلم ئنا ٹل آتئے تموکا دا گروک آن پد تولہ غاتے چارمہ کنڈ اندنو تہو اس تینا پلویڑ ئٹ الک دنکہ اسہ جاگہ ئسے ہیروفی ءُ طوفان اس پلویڑ ئٹ السہ ڈم ایتے۔ دا تہو اندن ترند ئس کہ تولہ غاک تینا بان آتیٹ ہم جارات خنتورہ۔ اوزدے سہب اوفتیک اندن تہار ئس دنکہ دے ءِ ماگم الے۔ تہو نا چِرک آتا پلویڑ ئٹ الوک تولہ غاک آسمان نا بلسمی آ رنگ آتے گوہاسر۔ ساہ ئنا خلیس اندن زیات ئس کہ تولہ تیان دے تا حساب اناسس، سہب و نن ئنا فرق ءِ کننگ کتورہ۔ تہو اندن زیات ئس کہ ہرانا ہر چِرک تولہ غاتے کانپول آن اِرٹ کریکہ۔ ہر نیمہ غا تولہ غاتا کوکار ئس، دا تہو نا برجاء غا دے تیٹ تولہ غاتا حالیت اندن ئس دنکہ چرز آتا جلاب ءِ شِکرہ تا مُو الے۔ دا ہیروفی آ تہو نا برجاء غا دے تیٹ مُچ ڈیہہ ئٹ یزیدی بیرک بڑز متو۔ تولہ غاتا دا حالیت ءِ خننگ آن پد باتی تا مون آ امیت ئنا بشخندہ اس تالان ئس۔ باتیک کل تینا مِلی تیان خلیس ئنا گنبد ءِ بٹسہ مزاحمت نا دیوال ءِ جِک کننگ ئسر۔ ڈیہہ ئنا مسیت آتیٹ حق ئنا اعلان مننگ ئس۔ باتیک کل سیوت نا سیخا ٹی اس ایلو تون تفنگ ئسر۔ تولہ غاتا کوکار ڈیہہ ئنا باتی تیٹ بھلو گل و بال اس بشخنگ ئس۔
دا تہو تینا چرخ آتیٹ آسمان آ اندن جھمر جوڑا کہ ہرافتا شلنگ آن گڈ دا ڈغار ئنا کیہی سال آتا ملاسی ایسر مس۔ نوکاپ آک پنچ دریاب نا سورہ تے کَھریسہ کل ءِ ڈیہہ ئنا بنجر تیان ایپار کریر۔ مَش تا شِواہی جل تیٹ دیر، بوچ و پاٹ تے کھریسہ خشک آ ناوڑ تیک روان مس۔ تہو تیٹ بوسالی آ گند اوار الک و ڈیہہ ئٹ برجاء غا ڈکال ایسر مس۔ دا ڈغار ئٹ اوڑدہ مروکا گواڑخ و پھل آتا تمغ آتے نوکاپ اتسہ مُچ ڈیہہ ئٹ دسکنڈ کرے، ہرافک مزاحمت نا دروشم ئٹ برم تسر۔ داسہ ہمو ڈکالی آ ڈیہہ نا بنجرک خروسی آن پُر مسنو۔ ہتم تینا شوخ آ رنگ ئتون اوار دا ڈغار آ نت تخانے۔ ہتم ئٹ دنو پھل ترک کرینے کہ ہرافتے باتیک ڈیہہ نا زُلف آتیٹ خلسہ ناز کننگ ءُ۔ دشت ئنا پَٹ آتیان الیس چلتن نا ٹُل اسکان گواڑخ تا رند آک ءُ۔ دا ندارہ تے خننگ آن پد اندن گمان ارفک کہ دا ڈغار تینا ہمو دروشم آ بسنے کہ ہرا دروشم ءِ تا نن بیرہ دیہاڑ آ نقش خناسن۔ ڈاک ئنا پٹ آ ساہدار آک اندن خوافنگسہ ءُ دنکہ کچھی نا دامان ئٹ مائی بیبو نا ہُلیک جنگ آن مُست پڈ سیر کننگارہ۔ ساہدار آک اندن مَست ءُ دنکہ گُلبر نا مَش تیٹ خزم آک ترڈیسہ تینا مَستی تا درشانی ءِ کیر۔ داسہ ڈیہہ ئنا ناوڑ تئے ہم بالی چُک آتا ولر آک ءُ۔ چشمہ غاک ہم دیر آن پُر بِرونگ ءُ۔ مش تا آبشاری آ شک آتیٹ شیوال جوڑ مرسہ ءِ۔ ہتم نا خروسی تیٹ تتلی تا رنگی آ بال آک دا ڈغار ءِ پین شوخ ءُ ندارہ بشخنگ ءُ۔ اینو ہمو ہینار آ ڈغار ئنا زی آ گواڑخ و سوسن تا تہو تیتون اوار عکس آک ءُ۔
ڈیہہ ئٹ ہیروفی چِرک آن پد راسکوہ نا ٹپ آک ہم ہُف مرسہ مچے پدین مسنو۔ نوروز ءِ قلات ہم تینا پیشانی آن کرنچ آتے مُر کرسہ ڈیہہ ئتو بشخندہ ءِ۔ کھڈ کوچہ نا باغ آتا خروسی آماچ ءِ پین زیبدار کرینے۔ قلات ہم تینا میری آ گمر کرسہ تینا شاہی ضد آ سلوک ءِ و دژمن تے تینا پاناد ئٹ ساعت اس الپک۔ تمپ ئٹ ہم بانکؔ نا مراد آتا بیرک بڑزا مسنے۔ پسنی نا زر نا زی آ سلوک جھمر آتیٹی حملؔ کلمتی نا عکس جوڑ ءِ۔ کیچ ئنا ہند آتیٹ ولدا غلام محمد نا ترند آ توار پنانے۔ شال ہم مجیدؔ و فتحؔ نا رند آتے تینا دامان ئٹ خننگ آن پد مہر ئنا خڑینک خلسہ تینا خن تے اندن نم کرینے دنکہ باوہ اس سال آتا زہیری آن پد تینا باغی آ مڷ ئنا دیدار آ تینا خڑینک آتے تورنگ کپ۔ نوشکل تینا شہید آ مڷ آتا دتر تیان آجوئی نا پری کن انام بیغنگ ءِ۔ نتو نا ٹل آن حق نواز نا خمار آ بشخندہ خیصار نا شک آتئے گروشک ترسہ تمنگ ءِ۔ وڈھ ئنا خزم آک نوراؔ نا مزار ءِ لشکر نا حوال ءِ سر کرسہ مستائی الکنو۔ قاضیؔ ہم دا وخت اسکان تینا پتن بال آتا کلہو ءِ بابو نوروزؔ اسکان سر کرینے۔ اسلمؔ، ریحانؔ و سُمعیہ تون اوار پھل دوٹی وسیم و یسمہ نا بخیر آ سلوک ءِ۔ شاری و ماہل ہم آصفہ و حوا ءِ بہشت ئٹ بخیر کننگ ءُ۔ بانڑی مست توکلی نا شعر (تئی عشقے نیتاں بستو گشئے سجدہ کنغایہہ) ءِ دہرہ غا خلسہ مریم و رشید ءِ نازیفنگ ءِ۔ باتیک کُل آجوئی نا سرور ئٹ نشہ ءُ، ڈغار دژمن آ تین ءِ، تولہ غاک نت تیان تمانو، داسہ ڈیہہ ئٹ پین ہچ اف بیرہ آجوئی نا کوکار ءِ۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
