کوئٹہ تفتان بھلا کسر N-40 آ تفتان و نوکنڈی نا نیامی علاقہ ئٹ نادرست سلہہ بند بندغ آک مُسہ تجارتی گاڑی ءِ خاخر تسر۔
ٹرانسپورٹ و تاجر برادری نا احوالکار آتا رد ئٹ سلہہ بند بندغ آک اسہ ٹرالر، اسہ 10 ویلر ٹرک و اسہ تیل ٹینکر ئسے زوراکی ئٹ تورفیر و پدان ہر مُسہ گاڑی ءِ خاخر تسر۔
بنائی احوال آتا رد ئٹ تدینی ئٹ ہچو جانی نسخان ئسے نا حوال مون آ بتنے، واہم ہر مُسہ تجارتی گاڑی تے خاخر تننگ نا سوب بھلو کچ اسیٹ مالی نسخان تو مون تِس مسونے۔
تدینی نا حوالہ ئٹ کالخواہ نا پارہ غان دسکان ہچو بیان اس مون آ بتنے۔
بلوچستان نا ضلع پنجگور نا ہسپتال ئٹی ہتنگوک آ جون تیان ارٹ پین نا ہم چاہنداری مسک۔
منا دے مہالو پاکستانی لشکر سہ آپریشن ئسے ٹی پنچ بندغ ءِ خلنگ نا دعوی کریسس و اوفتا جون تے ہسپتال آ رادہ دننگاسس، ہرافتیان مسہ بندغ نا چاہنداری مالؤ آن مسوسس و ایلو ارا جون ئنا چاہنداری اینو مسونے۔
پوسکن چاہنداری مروک آ بندغ آتیٹی گوارگو نا ہندی جمال نا مار وزیر احمد و سبزآپ نا ہندی عبیداللہ نا مار جاسم اوار ءُ۔
یات سلے کہ داکان مست ہرا مسہ بندغ نا چاہنداری مسوسس، اوفتیٹی زوراکی ئٹ بیگواہ کچکول نا مار پیر جان، شعیب بلوچ و حافظ مدثر اوار ئسر۔
سما مرے کہ شعیب بلوچ ءِ 8 فروری 2023، پیر جان ءِ ہندا سال 10 جون آ پاکستانی لشکر زوراکی ئٹ بیگواہ کریسر۔ ہراکان پد اوفتے مون آ اسل ہتوسر۔
پاکستان نا آزاتی نا دے ئنا وار آ بلوچستان نا بنجاہی شار کوئٹہ تون اوار بلوچستان نا گیشتر ضلع تیٹ لس وڑٹ چھپی تالان و بے مزہی نا چاگڑد اس خننگ ئٹ بسونے۔ دا وخت آ واپاری نا کیہی جاگہ غاک و بازار بند رہینگار۔و کسر تیا ٹریفک ہم لس دے تیان چٹ کم خننگا، شار ئنا مخلوق نا بھلو کچ اس ارا تیٹی ہڈ کریر و جتا انگا علاقہ تیٹی زند ئنا روانی ہم خاص وڑٹ زیمی مریسہ خننگا۔
کوئٹہ شار ئنا بھلا واپاری نا جاگہ غاک، مارکیٹ و علاقہ تیٹی گیشتر دکان آک بند ئسر۔ بنجاہی کسر و ایلو بھلا بھلا کشک آتیا ہم لس وڑٹ ٹریفک چٹ کم رہینگا، ہرانا سوب آن شار ئنا کیہی بشخ آک بڑیبانگ خننگارہ۔ کیہی جاگہ تیا کسر و بازار آتیٹی اسہ اسہ بندغ خننگارہ، ٹرانسپورٹ نا ہن ع بر ہم کچ ئٹ رہینگا۔
بلوچستان نا ایلو بھلا شار و ضلع تیان رسینگوک آ حوال آتا رد ئٹ دا وخت آ واپاری کچ ئٹ مس و اولس نا ہن بر ہم کم مسوسس، کیہی علاقہ تیٹ بازار تا بندش نا سوب آن واپاری کننگ سفا بند ئسکہ، مخلوق گیشتر ارا تیٹی ہڈ کننگ ءِ دوست تخا۔
ایلو پارہ غئے کوئٹہ تون اوار جتا جتا انگا حساس انگا جاگہ، پاکستانی لشکر نا کہمپ، سرکاری دفتر و بھلا ماڑی و مڈی تا کنڈ آتیا سخت سیکیورٹی نا بابت کننگا۔ سیکیورٹی کارندہ تیٹی ودوکی و پین گیشتر کارندہ خوائفنگا و بھلا خاص انگا جاگہ تیا ہن و بر تیا ہم نظر شاغنگسہ مس۔
ہندا وخت کوئٹہ تون اوار جتا جتا انگا جاگہ تیا سرکاری ادارہ و پاکستانی لشکر نا انتظام نا شیف آن چنک گؤانڈ ءُ دیوان ہڈ تننگ مس ۔
بلوچستان نا جتا علاقہ تیٹ مسہ جتا جتاؤ جلہو نا حوال مون آ بسونے، ہرافتیٹی تربت ئٹی پاکستانی لشکر نا لاری تے تراک ئٹ ٹک کننگ، ہرنائی ٹی پولیس چیک پوسٹ ءِ بمب ئسے ئٹ بھس کننگ و مستونگ ئٹی وزیر داخلہ بلوچستان ضیاءلانگو نا کاروان آ سلہہ بند جلہو اوار ءُ۔
مستونگ نا علاقہ کنڈ عمرانی نا خڑک بلوچستان نا وزیر داخلہ ضیاء لانگو نا کاروان آ سلہہ بند بندغ آک جلہو کریر، بنداوی حوال آتا رد ئٹ ضیاء لانگو جلہو آن بچا، ولے کاروان ئٹی اوار مسہ بندغ ٹپی مسر۔
ضلع کیچ ئنا بنجاہی شار تربت ئٹی شہید فدا چوک نا خڑک پاکستانی لشکر نا لاری تے آئی ای ڈی نا وسیلہ ئٹ ٹک کننگا، بنداوی حوال آتا رد ئٹ تراک آن پد جانی نسخان نا خلیس نا درشانی کننگانے، واہم دا رد ئٹ سرکاری حوالہ ئٹ کہوک و ٹپی تا کچ کساس نا بابت امنائی مننگ کتنے۔
تراک آن پد زوت پاکستانی لشکر علاقہ ءِ گڑگیس کریر، سروک آتا پارہ غان دائسکان جلہو نا ترندی و جانی نسخان تا بابت ئٹ خاص وڑ ئنا شابیتی حوال شینک کننگتنے۔
داکان ضلع ہرنائی ٹی استو ننکان نادرست سلہہ بند بندغ آک پنچ میل پولیس چیک پوسٹ ءِ شورہ غاتیٹ ٹک کریر۔ بنداوی حوال آتا رد ئٹ تراک ئٹی چیک پوسٹ نا ماڑی ءِ سخت نسخان رسینگا، واہم دائسکان ہچو جانی نسخان ئسے نا حوال رسینگتؤ۔
ہر مسہ تدینیک اسہ ہندنو وخت ئسے ٹی مسنو کہ ہراتم بلوچستان نا جتا جتا انگا علاقہ تیٹ پاکستانی لشکر، پولیس و سرکاری مڈیک سلہہ بند جلہو و تراک آتا گواچی ءُ۔ واہم تربت، ہرنائی و مستونگ نا پوسکنا تدینی تا حوالہ ئٹ زمواری کس ئسے نا دائسکان ارفنگ نا حوال مون آ بتنے۔
بلوچستان نا جتا جتا انگا علاقہ تیٹ سلہہ بند بندغ آتا پارہ غان پاکستانی لشکر نا زی آ جلہو، کسر تیا ناکہ بندی و گیس لین آتے ٹک کننگ نا تدینی تا حوال آک مون آ بسنو۔
وسیلہ تا رد ئٹ مند نا علاقہ کوہ ڈغار نا ہند آ زبیدہ جلال روڑ آ سلہہ بند بندغ آک ناکہ بندی کریسہ اسنیپ چیکنگ کریر۔ ہندا وخت مند گواک ئٹی پاکستانی لشکر نا اسہ چوک پوسٹ ئسے آ ہم سلہہ بند بندح آتا پارہ غان جلہو نا حوال ارے۔
ارٹمیکو پارہ غان کیچ ئنا علاقہ بلیدہ ٹی پاکستانی لشکر نا کیمپ آ راکٹ آتیٹ جلہو نا حوال رسینگانے۔ ہندی وسیلہ تا رد ئٹ کیمپ آ بی ایم ۱۲ راکٹ فیر کننگا ہراکہ کیمپ ئنا تہٹی تمیسہ ترند ءُ تراک ئسے تون ترخا۔
داکان بلوچستان نا علاقہ روجان وستی ٹی میر ہزار خان نا ہند آ گیس پیپ لین تراک آن بھس مننگ نا حوال ہم مون آ بسونے۔
دا تدینی تا رد ئٹ دائسکان ہچو سرکاری و امنائی اس مون آ بتنے و نئے کہ تدینی تا زمواری ءِ دائسکان کسس ارفینے۔
کوئٹہ ٹی سکیورٹی خلیس نا سوب آن موبائل ڈیٹا سروس اسہ وار پدا بند کننگا، ہرانا سوب آن شار ئٹ انٹرنیٹ نا کاریم ئٹی ہتنگ و آنلائن رابطہ غاتیٹی اڑاند بسونے۔
حوالکار تا ردئٹ بلوچستان نا جتا علاقہ تیٹ مالؤ آن انٹرنیٹ بند ءِ، ہرافتیٹی حب چوکی، خضدار، قلات، نوشکے، مستونگ، و مکران نا جتا انگا جاگہ غاک اوار ءُ۔
حکومت نا پاننگ ءِ کہ اگست ئٹی سکیورٹی خلیس نا سوب آن موبائل سروسز آک بند کننگنگ ئٹی ءُ۔ شار والا تا پاننگ ءِ کہ کوئٹہ ٹی ہر ارا دے آن پد ناگمان انٹرنیٹ نا بند مننگ آن ہڑدیئی کاریمک و رابطہ غاک زیمی مننگ ئٹی ءُ۔
یات سلے کہ حکومت بلوچستان و سیکیورٹی لشکر اگست ئٹی مروک آ جلہو تا دو آن جتا علاقہ تیٹ تھریٹ الرٹ شینک کریسہ کرفیو خلکنے، ایکان بھاز انگا علاقہ تیٹ دفعہ 144 ہم خلوک ءِ و ڈبل سواری آ ہم رکھ خلنگانے۔
کوئٹہ ٹی بلوچستان پولیس و بست و بند بلوچ لبریشن آرمی نا پارہ غان مروک آ جلہو تا خلیس آن گیشتر فوجی و نیم فوجی کارندہ تیتون اوار پولیس نا کارندہ ہم خوائفنگانے۔
سوراب، گدر ئٹی آباتی تیا پاکستانی جیٹ آتا بمباری تا برخلاف تربت ئٹی شٹرڈاؤن برانز نا وخت آ پولیس کارندہ غاتا پارہ غان بھاز آ دکان تا کلف آتے پرغنگ و اوفتے زوراکی ئٹ ملفنگ نا کوشست کننگا۔
سوشل میڈیا غا پیری کروک اسہ ویڈیو اسیٹی پولیس کارندہ غاتے اسسٹنٹ کمشنر تربت نا ساڑی گری ٹی دکان آتا کلف آتے پرغنگ و ملفنگ نا کوشست کریسہ خننگک۔
ایلو پارہ غان انجمن تاجران نا باسک اس ہندی صحافی تیتون ہیت کریسہ پارے کہ تنظیم نا پارہ غان ہچو پڑؤ تننگتوسس، واہم دکان دار آک سوراب تدینی نا برخلاف تینے آن تینٹ تینا دکان تے بند کرینو۔ واپار کروک دکاندار آک دکان تا کلف آتے پرغنگ نا عمل آ افسوز نا درشانی کریر۔
اجمن تاجران آتا رد ئٹ معاملہ ڈپٹی کمشنر کیچ ئنا مون آ تخنگا ہراکان پد ڈپٹی کمشنر نا اواری آن ویل ایسر مس و ہچ وڑ ئنا پین تلخی و ہڑدڑ ودی متؤ۔
یات سلے کہ بلوچستان نا ضلع سوراب ئٹی پاکستانی لشکر نا فضائی جلہو و اوٹی لس مخلوق نا کہنگ نا برخلاف اینو پنچ شمبے نا دے بلوچستان نا جتا جتا انگا علاقہ تیٹ شٹرڈاؤن و کسر بندی برانز برجا ءِ۔
زیمی مروک آ خاہوت و ہندی بندغ آک ہم جون تے بھلا کسر نا زی آ تخیسہ برانز کرینو۔
بلوچ یکجہتی کمیٹی نا پارہ غان برانز نا پڑؤ نا رد ئٹ سوراب، خضدار، قلات، مستونگ، نوشکے و ایلو علاقہ تیٹ کیہی واپاری جاہ و دکان آک بند ءُ۔ کیہی جاگہ تیا ہن و بر نا زیمی مننگ نا ہم حوال ارے۔
بلوچستان ئٹی زوراکی ئٹ بیگواہی تا برخلاف وائس فار مسنگ پرسنز نا کالخواہی ٹی کوئٹہ پریس کلب نا مون آ اڈ تروک برانزی کیمپ تنظیم نا سروک نصراللہ بلوچ نا سروکی ٹی شش ہزار مسہ سد و بیست و پنچمیکو دے ہم برجا سلیس۔
ہندا وخت خواست کننگا کہ کل بیگواہ غا بندغ آتے زوت آن زوت یلہ کننگے، بیگواہ غا بلوچ آتا بیدس عدالت خون و زوراکی ئٹ بیگواہی تا تیوہ ایسری نا باوری تننگے و زیمی آ خاہوت آتے اوفتا چنا تا بابت ئٹ معلومداری تننگے۔
وی بی ایم پی خواست کرے کہ زوراکی ئٹ بیگواہی تا کل تدینی تا ساف پٹ و پول کننگے و زمہ وار آتے قانود نا ردئٹ گٹ گیر کننگے۔
گوادر نا علاقہ پدی زر ئٹ شاہی ہوٹل آن 5 اگست 2026 آ عبدالشکور نا مار نصیب بلوچ ءِ پاکستانی لشکر نا کارندہ غاک دزگیر کننگ آن پد زوراکی ئٹ بیگواہ کریر۔
ایلو پارہ غان کیچ ئنا علاقہ شے کہن تربت آن 23 اپریل 2026 آ زوراکی ئٹ بیگواہ کننگوک محمد عیسیٰ نا مار کییا 5 اگست 2026 آ یلہ مس۔حوال آتا ردئٹ اودے رمپ ئنا علاقہ بالیچہ غان یلہ کننگانے۔
یات سلے کہ بلوچستان ئٹی زوراکی ئٹ بیگواہی تا چرجوئی اسہ کش برجا ءِ۔
بلوچستان نا ضلع سوراب گدر نا علاقہ ٹی پاکستانی لشکر نا جیٹ بمباری و اوٹی لس الس نا خلنگ نا برخلاف اینو پنچ شمبے نا دے بلوچستان نا جتا جتا انگا علاقہ تیٹ شٹر ڈاؤن و کسر بند برانز برجا ءِ۔ ایکان زیمی مروک آ خاہوت و ہندی مخلوق جون تے بھلا کسر نا زی آ تخیسہ برانز کرینو۔
بلوچ یکجہتی کمیٹی نا پارہ غان برانز کن تروک آ پڑؤ نا رد ئٹ سوراب، خضدار، مستونگ، نوشکے و ایلو علاقہ تیٹ کیہی واپاری نا جاگہ و دکان آک بند ءُ۔ کیہی جاگہ تیا ٹریفک نا ہن و بر ہم زیمی مننگ نا حوال ارے۔
سوراب ئٹی برانز نا سوب آن کوئٹہ و کراچی بھلا کسر ہن و بر کن خاص وڑٹ زیمی مروکے، ہراڑے برانز کروک آک جلہو ئٹ کہوک آ بندغ آتا جون تے تخیسہ برانز کرینو۔ ہندی حوال آتا رد ئٹ کسر نا ہڑتوما کنڈ آتیا لاری تا بھلو رد لگوکے۔
یندی وسیلہ و برانز کروک آتا رد ئٹ ۱۲ اگست آ سوراب نا علاقہ گدر گودان ئٹی اسہ بالی جلہو ئسے نا وخت بمباری مس، ہراٹی نیاڑی و چنا تیتون اوار ۲۰ آن برز بندغ کسکر و شانزدہ ٹپی مسوسر۔
جلہو آن پد کہوک آ بندغ آتا خاہوت و ہندی بندغ آک جون تے سوراب نا بنجاہی چوک آ کوئٹہ و کراچی نا بھلا کسر آ تخار۔
برانز کروک آتا پاننگ ءِ کہ ہراتم اسکان اوفتا خواست آک مننگپسہ برانز و ہتڑ برجا مریک۔ کسر نا بندش آن بلوچستان نا تہیکو علاقہ غاتے کراچی و کوئٹہ تون اوار کروک آ ڈغاری آ کسر بند مریسہ سلیسونے۔
